TṌÓ e bà géè emí Kpá Káíá, ba beè olòó kpẽ́ kpègè va nè pá tọọ̀ ńpábia tṍó e ńpá-gbálà nè ńpábia zigà kọ bàá ilá. Kpègà vaá é láá dú gyọ́ e ka di ló, nom, àbèè kpègè. Sìgà tṍó, ba beè olòó kpẽ́ kpègè ló va tení dú ló gè sí tóm dẽe, dì belí Jékọ̀b ea beè zìgà kọ àé túè àlàbà gbáá siimàè tóm neè tẹ̀ Réchẹ̀l kọbé à neèe Réchẹ̀l naamá a va. (Jén. 29:​17, 18, 20) Éé ní ea náa vaá ba beè olòó kpẽ́ kpègè va ẹ́?

Enè neǹ nò Kpá káí ea bée kọlà Carol Meyers beè kọọ̀: “Ba beè olòó kpẽ́ kpègè va gè nyaamá dẽè tóm e nvín pábiaá géè sí gbẹá ba tọ, ea beè palàge dú bíi mm̀ tọ e bà géè kìl ól.” Kpègè e bà kpẽ́ ló va ólò kpáá agẹlẹ ló gbaa ló ea di zẹ̀ẹ̀ pá tọọ̀ ńpágbálà nè ńpábia. Gbaa ló ea di zẹ̀ẹ̀ pálaa kà pá tọí é láá naa kọọ̀ bàá nvèè bá nè ene tṍó e tã̀àgã̀ bã́ kẽ. Gbáló vó, kpègè vaá tẹ́lẹ bàlà kẽ kọọ̀ nvín pábiaá beè zìgà kọ àé íàẹ̀ dóm vaá àé gbóó láá aa tọ ló a tẹ̀ nyoone a dóm.

Ge kpẽ́ kpègè va náa tõó dọ̀ kọọ̀ va dú nu e bàé láá oo àbèè ge zalí. Kpá ea kọlà Ancient Israel​—Its Life and Institutions kọ́ọ̀: “Ge kọ à bọ́ló kọọ̀ nen á kpẽ́ kpègè va àbèè gyọ́ nè pá tọọ̀ ńpábiaá beè naa kọọ̀ ílà dóm nè vaà pá Ízràẹ̀l á belí gè zalí nu nè ge oo nu. Sõò kpègè va palàge dú ńkem ló kpègè e bà gáè beè láá oo pábia ló.”

Deè nieí, gã́bug dó ólò kilsĩ́ gè kpẽ́ kpègè ló va. Tṍó e gbò tẹ̀ nè kà e bà gé nyoone nvéè Kráìst bĩ́íná kpègè va, bà ólò ‘naa kọọ̀ dénè nen á nyimá kọ bà dúè gbọ́ọ́-gbọọ̀ ló’ tení dú gè bĩiná kpègè ea bọ́ló. (Fíl. 4:5; 1 Kọ́r. 10:​32, 33) Tṍó e bà náa vó, bà zógè kọ bà náa dúè gbò e bà “vulè kpègè,” àbèè gbò gọ̀l òò. (2 Tím. 3:2) Gbá ló vó, tṍó e gbò tẹ̀ nè kà e bà gé nyoone nvéè Kráìst náa bĩ́íná gã́bug kpègè ló va, àé náa kọọ̀ dómá á gá dõogẽ dàlà dee ló ba ílà dóm nè va dọ̀ọ̀mà tṍó ea é íe gã́bug kpègè ge kpẽ́ ló vaá. Àé láá naa nagé kọọ̀ dómá á gá aa ló tóm gyà deèsĩ́ tóm gé bã ló tóm bèkéè kọbé à láá ièè gã́bug kpègè ea é kpẽ́ ló va.

Sìgà dó, log ólò kọ́ gã́bug kpègè e bàé kpẽ́ ló va. Beè dó ea dì náa vó, tẹ̀ nè kà e bà gé nyoone nvéè Kráìst é tõó boo gbò logá. Ló éé? Boo béè kọọ̀ Moǹ Bel Bàrì kọ́ọ̀ “kọ̀láá nen á tõó kè kẽè gbò e bà gé bẹl” nè ge gbàntṍ ló log e náa úúá boo log Bàrì.​—Róm̀ 13:1; Tóm 5:29.