KÈBÁ Log Mózìs, Jìhóvà beè tenmá kọ bàé láá tú kúkuú kẽ nè bẹ̀ẹ̀ kukuu vaamàè gyọ́ọ neèe. Bà ólò bọọgẹ̀ kòl béè pálaa kà ńnómí tṍó e bà gé kọ́ nú ea kil ló gè tú ńnóm vaamá gyọ́ọ, vaá bà ólò láá tú kúkuú kẽ nè bẹ̀ẹ̀ kukuu vaamá. (Lìv. 1:14; 12:8; 14:30) Éé ní ea náa vaá níí beè dú lé é? Ene kà bug ea di nvée dú kọọ̀ kúkuú kẽ náa beè olòó bọọgẹ̀ tọla kẽ. Ló éé?

Kúkuú kẽ dú ńnóm ea beè di Ízràẹ̀l e bà ólò nyaaná tõ̀ò kil dõòna kà dó tṍó gbei. Ló October, bà ólò pẹẹ kil gbò dó ea bẹà sã́, vaá òòa kẽ dú Ízràẹ̀l tṍó e boo ni dààmà togó gè dọọ́ kĩá. (Sọ́l Sól. 2:​11, 12; Jèr. 8:7) Níí tõó dọ̀ kọọ̀ a beè olòó tàvala ló pá Ízràẹ̀l ge tú kúkuú kẽ nèèmà vaala gyọ́ọ tṍó tọ́ọ.

Sõò, bẹ̀ẹ̀ kukuu náa ólò bọọgẹ̀ nyaaná tõ̀ò kil dõòna kà dó, vóà naa, ba beè palàge tọla kẽ ló pá Ízràẹ̀l. Nagé, bẹ̀ẹ̀ kukuu níà nom̀ tọ. (Doolé ló Jọ́ọ̀n 2:​14, 16.) Dẹ̀ẹ̀a boo nu e kpá ea kọlà Bible Plants and Animals kọ́, “bẹ̀ẹ̀ kukuu beè di kòláá kà bon ea di Palestine. Kọ̀láá kà be beè olòó ié kiẽ́e e bẹ̀ẹ̀ kukuu ólò mà, àbèè ge sòòlà deè gbàà kú tọ naa ní e gbò ńnóm é láá ma m.”​—Doolé ló Àìzáíà 60:8.

Jìhóvà zógè kọọ̀ à íèè vulè nè nyìmànù tení dú ló gè naa kọọ̀ pá Ízràẹ̀l á láá tú gbò ńnóm ea beè di kẽ tṍóá vaamàè gyọ́ọ neèe.