É KỌ à íe tṍó eo beè di kèbá tã̀àgã̀ vaá nóo beè ié nen ea nveè bá nè ni? Nyíéi é láá bììlà boo béè kọ è di mm̀ “tavàlà tṍó,” vaá sìgà tṍó, àé tõoí ló belí kọ à dú áá bẹ̀ì. (2 Tím. 3:1) Sõò à íe gbò e bà é láá nvèè bá nèi tṍó e di kèbá tàvàlà dìtõ̀ò. Kpá Káí kọ́ọ̀ lé kóò é láá palàge nvèè bá nèi “tṍó tã̀àgã̀.”​—Pró. 17:17.

Neǹ tóm Pọ́ọ̀l beè ié bélè lọl ló pá a kóò e ba beè gbá kọ́ kpẹ̀a aa dó dọ dó. (Kọ́l. 4:​7-11) Tṍó e Pọ́ọ̀l beè di kpọ́gọ́lọ́ gbẹá Róm̀, pá a kóò beè nvèè bá nèe naa sìgà nú e náa beè láá naá boo a lóó. Dì belí nu dòòmà bá, Ẹpafradáítọ̀s beè tú gbò nú e Pọ́ọ̀l íe bíi ló ea aa bá pá vígà e ba beè di Fílipáì máe. (Fíl. 4:18) Tékèkọ̀s beè tú kpá lẹ̀ẹ̀la tóm e Pọ́ọ̀l beè emí má kele-kele bõ̀ònatõ̀ò. (Kọ́l. 4:7; ẹ̀b study note ea di mm̀ New World Translation of the Holy Scriptures) Pá kóò Pọ́ọ̀l beè nvèè bá nèe kọ á láá kọ́ kpẹ̀a tṍó e ba beè sii Pọ́ọ̀l gbẹẹ́ tọ, nè tṍó e ba beè siíe nvee tọọ̀ kpọ́gọ́lọ́. Mósĩ́ deè ní eo é láá dú lé kóò e?

Deè nieí, gã́bug pá vígà a zógè bé e kà lé kóò é láá nvèè bá nè nen naa. Dì belí nu dòòmà bá, Elisabet ea dú neǹ gyà deesĩ́ tóm kọ̀ kpẹ̀a dénè tṍó ea ólò tõo Spain kọ́ bé e ene kà vígà pábia beè nveenìè bá neèe naa. Tṍó e kà Elisabet beè ié kom ea kọlà cancer, vígà pábiaá beè lẹ̀ẹ̀là gbò dọ̀ Kpá Káí ea síèe kpóó ló tenmá boo fóòn máe. Elisabet kọ́ọ̀ “Tṍó em monì gbò lẹ̀ẹ̀la tómá, nyíém beè palàge ẹẹ. M beè nyimá kọ à íe nen ea gé bulà nú ea kilím ló, vó beè naa kọ ḿ ié kói gè naamá gbò nú ea beè dú bíi kọ ḿ naa.”​—Pró. 18:24.

Èé láá naa kọọ̀ bẹẹ gbaa ló kilma ló pá vígà á palàge aga ló tení dú ló gè nvèè bá nè va kọbé bà láá kọ́ kpẹ̀a vaá sí nònù. Dì belí nu dòòmà bá, òé láá nè lóó gè tú faà dààmà neǹ vígà ea ni dú kànen mm̀ dee kilma nònù àbèè kĩée e bà é tõo kọ́ kpẹ̀a. Be ò náa vó, àé náa kọ ó láá siei kpóó ló ene. (Róm̀ 1:12) Sõò, sìgà pá vígà náa ólò láá àà na tọ. Mósĩ́ deè ní eo é láá nvèè bá nè va ẹ́?

Tàvàlà dìtõ̀ò àbèè zọ̀ ló a náa kọ sìgà pá vígà á gá láá si ná nònù gbẹá Kíndòm Họ́ọ̀l. Bugi togó boo nú ea beè naaá ló Dévìd e kom̀ cancer ea kọlà lymphoma beè dìé ló. A beè tú nú ea é sígá ló ọ̀ọ̀lẹ̀ ẽ́ tõ̀òma tọọ̀ biè kọbé à íe bóa. Mm̀ zivekà tṍó ea beè di kèbá bóaá, David nè a vaà Lidia beè olòó sí nònù tenmá boo Zoom.

Mósĩ́ deè ní e pá vígà beè nvèè bá nè va ẹ́? Sìgà pá vígà beè olòó piiga boo gè zọ̀ David nè Lidia loá bel tenmá boo Zoom tṍó e ba ni  zaalà nònù. Gbá ló vó, tṍó e David nè Lidia áálá bel gbẹá nònù, pá vígà ólò emí kpá ṍà zaa tenmá boo fóòn má va. Gbò nuí beè naa kọ David nè Lidia á nyimá kọọ̀ pá vígà vulèè va, vaá náa dúè áá ọ̀và.

Èé láá noo gè zọ̀ pá vígà e bà náa ólò láá àà na tọ kọ́ kpẹ̀a. Èé láá nyaaná bá ló sìgà nu kọbé è láá zọ̀ va kọ kpẹ̀a. Ge naa vó é zógè kọ è bulà nú ea kil vá ló. (Pró. 3:27) Be à sẹlẹ, òé láá zọ̀ va emí kpá lẹ̀ẹ̀la tóm kọọmá kpẹ̀a, àbèè ge zọ̀ va kọ́ kpẹ̀a tenmá boo fóòn. Gbò kànen é láá noo kọọ̀ ba bõ̀ònatõ̀ò á ié bila ló bel e ólò ié besĩ́ è kálá àà gé kọ kpẹ̀a tenmá boo Zoom, kọbé gbò e bà náa ólò láá àà na tọ láá zọ̀ va sí kẽ. Nyíè David nè Lidia beè palàge ẹẹ tṍó e ba bõ̀ònatõ̀ò nveè nakà nòònùá kẽ. David kọ́ọ̀ “Tṍó e ni zọ gbò e ba di bẹẹ grúùp íè bila ló bel ge sì gé kọ́ kpẹ̀a vaá bà tã̀àgã̀ ló Bàrì lọ̀l, è ólò palàge ié sìà kpóó ló.” Gbá ló vó, be à válí, òé láá noo gè olòó zọ̀ nen eo ólò noomà Kpá Káí noá nu gbẹá tọọ̀ nen e náa ólò láá àà na tọ.

Tṍó e zọọ̀ pá vígà e bà náa ólò láá àà na tọ naaá nu, è ólò mòn gbò lé kpãa e bà íe, vó ólò naa kọ é kpáá palàge dũ̀ùà bã̀ vá kpàn. Dì belí nu dòòmà bá, tṍó e zọọ̀ va kọ́ kpẹ̀a vaá è mòn bé e bà palàge baatẽ́ gbò kà-kà bel ea di mm̀ Kpá Káí naa, naa ní e gbò nen dã́ ból ló, à ólò naa kọ é kpáá palàge vùlè va. Èé láá ié gã́bug kóò tṍó e nveè bá nè pá vígà kọ bàá sí nònù vaá kọ́ kpẹ̀a.​—2 Kọ́r. 6:13.

Tṍó e Pọ́ọ̀l beè di kèbá tàvàlà dìtõ̀ò, a kóò Táítọ̀s beè nvèè bá nèe naa ní ea íe dĩ̀ìnè ló. (2 Kọ́r. 7:​5-7) Nu dòòmà bá Táítọ̀s nóòmài kọ níì áá gè ló bel ea é síè kpóó ló pá vígà ní ea dú bíi é nì, sõò, à dú nágé bíi kọ é dì vá kpàn vaá naa gbò nú ea é nveè bá nè va.​—1 Jọ́ọ̀n 3:18.

Pá vígà e bà di Russia a zógè kà lé nu dòòmà bá ea kil ló gè nvèè bá nè ene. Bugi togó boo nú ea beè naaá ló Sergey nè a vaà Tatyana. Gbò bila pẹ̀gẹ̀lẹ̀ beè làb ba tọ vaá faalá va ààmà gé bĩiná va bel. Ba beè sọ̀bá a vaà Tatyana kọ á kil be. Sergey kọ́ọ̀: “Tṍó e [Tatyana] iná be, ene kà vígà pábia beè kãáe vaá sièe kpóó ló. Tṍó e pọ́ì ńkem̀ tṍó téní, gã́bug pá vígà beè dù gé nvèè bá kpoogè dee ló bẹẹ tọ nèi.”

Sergey kpáá kọọ̀: “Nú ea di mm̀ kpá Próvẹẹ̀b 17:​17, ea kọ́ọ̀: ‘Lé kóò ólò ié vulè kọ̀láá tṍó, vaá ẹ̀ẹ̀ vígà ea meà boo béè ge nvèè bá tṍó tã̀àgã̀’ palàge leemám. M beè mòn kọọ̀ nú ea di mm̀ dọ̀ Kpá Káíá dú kà-kà boo béè kọọ̀ m beè palàge ié bíi ló nvèè bá tṍó e bà géè biigèm lóá. Jìhóvà beè nèm gbò kóò e ba beè ié agẹ ló vaá nvèè bá nèm.” a

Kátogóí e nu gé palàge tàvàlàí, è palàge ié bíi ló nvèè bá ea aa bá pá bẹẹ kóò. Èé palàge ié va bíi ló tṍó pọ̀b kpo tã̀àgã̀. Vóà naa, naanii èé pììgà bé e bẹẹ kpóó sim tùlà naa gè nvèè bá nè pá bẹẹ kóò kátogóí!​—1 Pít. 4:​7, 8.