7 TOGÓ BEL GE NÒ
SỌ́L EA GÃ́BUG DÚ 15 Leelai Sã́áná Jìhóvà!
Mókà Bélè Ní Eo Íè Boo Béè Kọọ̀ Jìhóvà Ia Ló Nè Ni Ẽ́
“Olo ní e kà-kà ia ló pọ́lọ́ aa bá ẹ́.”—PS. 130:4.
NÚ EÉ NÓ
Èé ló bel boo sìgà nu dòòle ló ea di mm̀ Kpá Káí ea baatẽ́ bé e Jìhóvà ólò ia ló pọ́lọ́ naa. Ge naa vó é náa kọ nyíéi á palàge ẹẹ ló nú e Jìhóvà náa nèi kọbé à láá ia ló bẹẹ pọ́lọ́.
1. Éé ní ea náa vaá àé láá tàvàlà ge nyimá ló nú ea di bùlà nen ea kọ́ọ̀, “m ia ló nè ni” ẽ́?
LÓÓ ni é palàge dĩ̀ìnà tṍó e nen kọ́ nè ni kọọ̀, “m ia ló nè ni.” Bọọ èlmà tõ̀ò be o beè naa nú ea kyẽ́e! Sõò éé ní e tã́á bel ea kọ́ọ̀ “m ia ló nè ni” tõó dọ̀ ẹ? É kọọ̀ nen eo beè naa nú ea kyẽ́eá gé kọ́ọ̀ òé kpáá duai kà lé kóò? Sẹ̀ nená gé kọ́ọ̀ náa gbĩ́ gè kpáá lo nàè bel kilma ló nú ea beè naaá, vaá nóo é láá dua nai kóò e? Dõona íb nu ní ea ólò di nyíè gbò nen tṍó e bà kọ́ bà iàẹ̀ ló neè nen ẽ́.
2. Mósĩ́ deè ní e Kpá Káí baatẽ́ bé e Jìhóvà ólò ia ló pọ́lọ́ naa ẽ́?
2 Bé e Jìhóvà ólò ia ló pọ́lọ́ naa dú kele ló bé e gbò nen ólò ia ló nu naa. Tọ́ọ̀ nen náa é láá ia ló nu belí Jìhóvà. Kilma ló Jìhóvà, neǹ ọ́lì sọ́l beè kọọ̀ “Olo ní e kà-kà ia ló pọ́lọ́ aa bá ẹ́, kọbé gbò nen sííá ni pọ̀ ló.” a (Ps. 130:4) Mm̀ kà-kà, Jìhóvà ní e “kà-kà ia ló pọ́lọ́ aa bá ẹ́.” Ẹlẹ ní ea dobá nú e gè ia ló pọ́lọ́ aa deè tõó dọ̀ nèi ẽ́. Sìgà tṍó, gbò e ba beè emí Kpá Káí ólò tú moǹ bel Híbrù ea tõó dọ̀ ge ia ló pọ́lọ́ loomá bel, tṍó e bà gé baatẽ́ bé e bá e Jìhóvà ólò ia ló pọ́lọ́ dú kele ló níí gbò nen naa.
3. Mósĩ́ deè ní e bé e Jìhóvà ólò ia ló pọ́lọ́ naa dú kele ló níí gbò nen ẽ́? (Àìzáíà 55:6, 7)
3 Tṍó e Jìhóvà ia ló pọ́lọ́ nè nen, náa ólò kpáá kẽ̀èa na boo. Vaá níí ólò naa kọ é kpáá zọ̀ Jìhóvà ié kà lé gbaa ló. Nyíéi palàge ẹẹ kọọ̀ Jìhóvà ólò ia ló nèi lee.—Bugi Àìzáíà 55:6, 7.
4. Mósĩ́ deè ní e Jìhóvà ni nveè bá nèi kọ é dã́ ból ló nú e kà-kà ia ló pọ́lọ́ tõó dọ̀ ẹ?
4 Beè bé e Jìhóvà ólò ia ló pọ́lọ́ naa dú kele ló bé e gbò nen ólò ia ló naa, mósĩ́ deè ní e beéle e née gbõomà é láá dã́ ból ló nú e kà-kà ia ló pọ́lọ́ tõó dọ̀ ẹ? Jìhóvà tú nu dòòle ló ea é nveè bá nèi kọ é dã́ ból ló bé ea ólò ia ló pọ́lọ́ naa loomá bel. Mm̀ nakà togó belí, èé ló bel boo sìgà nu dòòle lóá. Gbò nu dòòle lóá é náa kọ é dã́ ból ló kọọ̀ tṍó e ọ́gà, Jìhóvà ólò ia ló bẹẹ pọ́lọ́ vaá naa kọ é kpáá dú pá a kóò. Ge ló bel boo gbò nu dòòle lóá é náa kọ é kpáá vùlè bẹẹ Tẹ̀ e vulè nè sàn ea íeí ló ólò naa kọ á ia ló bẹẹ pọ́lọ́.
JÌHÓVÀ ÓLÒ IA LÓ BẸẸ PỌ́LỌ́
5. Éé ní ea ólò naaá tṍó e Jìhóvà ia ló bẹẹ pọ́lọ́ ẹ́?
5 Kpá Káí tú pọ́lọ́ doolé ló nyẽ̀è tò. Méné Dévìd beè kọọ̀: “Nà pọ́lọ́ dìḿ boo togó; bà bélí nyèè tò ea elím ló gè toolá.” (Ps. 38:4) Sõò Jìhóvà ólò ia ló pọ́lọ́ gbò e bà ọ́gá. (Ps. 25:18; 32:5) Moǹ bel Híbrù e bà tab naamá “ge ia ló” tõó dọ̀ “ge dala boo” àbèè “ge dàlà.” Vóà naa, tṍó e Jìhóvà ia ló bẹẹ pọ́lọ́, à bélí kọ à dàlà nyẽ̀è tò lọ̀líí ból.
“O beè gbóó ia ló nà pọ́lọ́” (Ps. 32:5)
6. Kà kpã́á ãàe ní e Jìhóvà ólò tobví bẹẹ pọ́lọ́ tẹlẹ̀ ẹ?
6 Dõona kà nu dòòle ló ea di mm̀ Kpá Káí kọ́ bé e Jìhóvà ólò tú bẹẹ pọ́lọ́ kilma kpã́á lọ̀líí ló naa. Kpá Psalm 103:12 kọ́ọ̀: “Dì belí bé e kĩée e nàànì baa àà kil kpã́á aa ló dọ̀ọ̀mà tẽ́ nàànì naaá, níà bé ea tú bẹẹ pọ́lọ́ kilma kpã́á lọ̀líí ló naa ẽ́.” Kĩée e nàànì ólò baa àà palàge dú kpã́á aa ló dọ̀ọ̀mà tẽ́ nàànì. Vóà naa, kọ̀láá bé e bàlà booí kpọ́lá naa, kĩée e nàànì ólò baa àà nè dọ̀ọ̀mà tẽ́ nàànì náa é láá nyòònà. Níí tõó dọ̀ kọọ̀ Jìhóvà ólò tú bẹẹ pọ́lọ́ kilma kà kpã́á lọ̀líí ló. Ge nyimá naa vó náa kọ é agala boo kọọ̀ Jìhóvà náa ólò kẽ̀èa na boo bẹẹ pọ́lọ́.
“Dì belí bé e kĩée e nàànì baa àà kil kpã́á aa ló dọ̀ọ̀mà tẽ́ nàànì naaá” (Ps. 103:12)
7. Mósĩ́ deè ní e Kpá Káí baatẽ́ nú e Jìhóvà ólò naa ló bẹẹ pọ́lọ́ ẹ́? (Máíkà 7:18, 19)
7 Náa kal ló béè kọọ̀ Jìhóvà ólò tú bẹẹ pọ́lọ́ kilma kà kpã́á, é kọ à ólò kpáá bugíí ló? Ẽ́èe. Kilma ló Jìhóvà, Méné Hèzìkáíà beè emí kọọ̀: “O tóbví dénè nà pọ́lọ́ tẽeá nvée.” (Àìz. 38:9, 17) Níí tõó dọ̀ kọọ̀ Jìhóvà ólò tobví pọ́lọ́ gbò e bà ọ́gá tẽeá nvée vaá náa ólò kpáá ẹ̀b nà. Bà é láá tàb nàgé tã́á belá naamá: “O ia ló [nà pọ́lọ́] vaá ẹ̀b belí kọọ̀ à gáà zẹẹ naaa.” Kpá Káí kpáá ló íb belá mm̀ dõona kà nu dòòle ló ea di mm̀ kpá Máíkà 7:18, 19. (Bugi.) Dọ̀ Kpá Káíá kọ́ọ̀ Jìhóvà a tóbví bẹẹ pọ́lọ́ tẹlẹ kètẽ́ pène. Tṍó ea kil nvéeá, náa beè olòó valí ló nen gè tú nú e ba beè tobví tẹlẹ kètẽ́ pène.
“O tóbví dénè nà pọ́lọ́ tẽeá nvée.” (Àìz. 38:17)
“Òé tóbví kọ̀láá kà ba pọ́lọ́ tẹlẹ kètẽ́ pène” (Máí. 7:19)
8. Éé ní e gbò bel dòòle lóá ni nóòmài ẽ́?
8 Gbò bel dòòle ló nuí a náa kọ é nyimá kọọ̀ tṍó e Jìhóvà ia ló bẹẹ pọ́lọ́, à dalà nyẽ̀è tò ea beè dìí ból lọ̀l. Dévìd beè kọọ̀, “Ẹ́ẹ́-ẹẹ̀ nyíe á di ló nen e Bàrì ia ló a náàkyọ̀, nen e Bàrì úu bá boo a pọ́lọ́; ẹ́ẹ́-ẹẹ̀ nyíe á di ló nen e Jìhóvà náa bugi a pọ́lọ́.” (Róm̀ 4:7, 8) Níà kà-kà ia ló pọ́lọ́ ẹ́!
JÌHÓVÀ ÓLÒ LOGÍ BẸẸ PỌ́LỌ́
9. Mókà nu dòòle ló ní e Jìhóvà baamà tẽ́ bé ea ólò ia ló bẹẹ pọ́lọ́ naa ẽ́?
9 Jìhóvà ólò logí pọ́lọ́ gbò e bà ọ́gá tení dú ló ú vààa gyọ́ọ̀ Jíízọ̀s. Bugi togó boo nú e Kpá Káí kọ́ọ̀ Jìhóvà ólò naa. Kpá Káí kọ́ọ̀ Jìhóvà ólò logí bẹẹ pọ́lọ́. Níí ólò naa kọọ̀ nen ea beè sí pọ́lọ́ á di õ̀òa. (Ps. 51:7; Àìz. 4:4; Jèr. 33:8) Jìhóvà baatẽ́ nú ea ólò sìlà aa mm̀ ge naa vó, à kọ́ọ̀: “Náa kal ló béè kọọ̀ bọọ pọ́lọ́ kúmí do, nda é náa kọ á ẹẹ belí báà múú; náa kal ló béè kọọ̀ à dú mii-mii belí dẽè kàn, nda é náa kọ á ẹẹ belí vo.” (Àìz. 1:18) À ólò palàge tàvàlà ge logí nú ea kúmí do àbèè mii-miì nu lọl dẽè kọ̀là ló. Sõò tení dú ló nu dòòle lóí, Jìhóvà náa kọ é agala boo kọọ̀ àé lógìè bẹẹ pọ́lọ́ õ̀ònà naa ní e nen náa é mon na.
“Náa kal ló béè kọọ̀ bọọ pọ́lọ́ kúmí do, nda é náa kọ á ẹẹ belí báà múú” (Àìz. 1:18)
10. Mókà dõona kà nu dòòle ló ní e Jìhóvà baamà tẽ́ bé ea ólò ia ló bẹẹ pọ́lọ́ naa ẽ́?
10 Dì belí bé e beè nó mm̀ nakà togó bel e ã́àa nòa naa, pọ́lọ́ bélí “kom” e nen síi. (Máát. 6:12; Lúùk 11:4) Vóà naa, buù tṍó e síì pọ́lọ́ Jìhóvà, à bélí kọ è kpáà dé kom tẹlẹ boo kom e beè síì. È síì gã́bug kom bá Jìhóvà! Sõò tṍó e Jìhóvà ia ló bẹẹ pọ́lọ́, à bélí kọ à kuu nú boo kom e síìé bá. Náa ólò kọ é kpáá kpẽ ná kom ló pọ́lọ́ e beè sì tṍó ea ni ia ló nèi. Dì belí bé e nen ólò ié dĩ̀ìnè ló tṍó e bà kuu nú boo kom ea beè sii naaá, níà bé e ólò ié dĩ̀ìnè ló tṍó e Jìhóvà ia ló nèi naa ẽ́!
“Ia ló bẹẹ pọ́lọ́ nèi” (Máát. 6:12)
11. Éé ní e Kpà Káí gé kọ́ tṍó ea kọ́ọ̀ Bàrì õonà bẹẹ “pọ́lọ́” ẹ́? (Tóm 3:19)
11 Níì áá gè kuu nú boo bẹẹ pọ́lọ́ àbèè kom e beè sii ní e Jìhóvà ólò naa ẽ́ nì, sõò à ólò logí pọ́lọ́ lọ̀líí ló. (Bugi Tóm 3:19.) Dì belí nu dòòmà bá, tṍó e bà kuu nú boo kom e ba beè emí dẽè kpá kọ nen síi, bà ólò niinà gbṍó tenmá boo. Sõò, be ò ẹb dẽè kpáá, òé mon nómbà e ba beè kuu nú booá. Ge logí nu dú kele ló níá. Kọbé è láá dã́ ból ló nakà nu dòòle lóá, à dú bíi kọ é kẽea boo kọọ̀ tṍó ea kil nvéeá, íb nú e ba beè olòó naamá íǹk beè naa kọ á olòó valí gè gyù nú e bà tú íǹk emá. Nen é láá tú sàpó e múú di gbàà gyũ̀ùmà nú e ba beè emí. Vóà naa, tṍó e bà gyu àbèè ge “õ̀ònà” kom e nen beè sii, tọ́ọ̀ kà náa ólò sigá ná. Gbò nen náa ólò mòn nà tọ́ọ̀ nú e ba beè emíá. À ólò belí kọọ̀ nen gáà zẹẹ sii kom. Nyíéi palàge ẹẹ kọọ̀ tṍó e Jìhóvà ia ló bẹẹ pọ́lọ́, à ólò belí kọ è gáà zẹẹ sí pọ́lọ́!—Ps. 51:9.
“Kọbé à ia ló bọọ pọ́lọ́ nèi” (Tóm 3:19)
12. Éé ní e nóò lọl ló bù dee ea bọọ́ gbe é?
12 À íe nagé dõona kà sĩ́deè e Jìhóvà baamàtẽ́ bé ea ólò ia ló bẹẹ pọ́lọ́ naa. À kọ́ọ̀: “Nda é õonà bọọ náàkyọ̀ lọ̀l vaá àé bélí kọ m̀ túù bùdee kọ̀lmàvaá naa kọ bọọ pọ́lọ́ á belí kọ m̀ túù bùdee ea bọọ́ gbe kọ̀lmà.” (Àìz. 44:22) Tṍó e Jìhóvà ia ló pọ́lọ́ nèi, à ólò belí kọ à tú bù dee ea bọọ́ gbe kọ̀lmà kọbé née moǹ nà, kọbèè ẹlẹ náa ólò mòn nà.
“Nda é õonà bọọ náàkyọ̀ vaá àé bélí kọ m̀ túù bù dee kọ̀lmà” (Àìz. 44:22)
13. À ólò tọáí ló naa vàẹ tṍó e Jìhóvà ia ló nèi ẽ́?
13 Éé ní e níí tõó dọ̀ kilma ló beele é? Tṍó e Jìhóvà ia ló nèi, náa bọ́ló kọ é kilsĩ́ gè bẽgẽ̀ bel bẹẹ bá. Jìhóvà a kuu nú boo bẹẹ pọ́lọ́ boo béè ú vààa gyọ́ọ̀ Jíízọ̀s Kráìst. Tṍó e Jìhóvà ia ló nèi, à ólò belí kọọ̀ è gáà zẹẹ si pọ́lọ́. Níà nú e kà-kà ia ló pọ́lọ́ ea aa bá Jìhóvà tõó dọ̀ kilma ló beele tṍó e ọ́gá aa ló bẹẹ pọ́lọ́ ẹ́.
JÌHÓVÀ ÓLÒ KPÁÁ TÚI NAAMÁ PÁ A KÓÒ
Boo béè kọọ̀ bẹẹ Tẹ̀ ea di káála ia ló bẹẹ pọ́lọ́ nèi ní ea náa kọ é láá zọ̀ẹ ié kà lé gbaa ló é (Ẹ̀b 14 kpò)
14. Éé ní ea náa vaá èé láá agala boo kọọ̀ tṍó e Jìhóvà ia ló nèi, náa é ne nài kpọ̀té ló pọ́lọ́ e beè sì e? (Ẹ̀b nàgé fòtó.)
14 Tṍó e Jìhóvà ia ló nèi, è ólò agala boo kọọ̀ à kpáá túi naamá a kóò. À ólò nvèè bá nèi kọ é gá bẽgẽ̀ bel bẹẹ bá zelmá kẽ. Náa bọ́ló kọ pọ̀ á siíi kọọ̀ Jìhóvà ká súng gbẹá gbàà nyòòmài vaá à gbĩ́ gè nèi kpọ̀té. Jìhóvà náa é náa vó. Éé ní ea náa vaá èé láá dẹlẹ nyíé boo Jìhóvà tṍó ea kọ́ à iàẹ̀ ló neèi ẽ́? Jìhóvà beè kọ́ nè neǹ kọ́ọ̀ bùlà Bàrì Jèrèmáíà kọọ̀: “Nda é ia ló ba náàkyọ̀ nè va, vaá ním é kpáá kẽ̀èa na boo ba pọ́lọ́.” (Jèr. 31:34) Tṍó e neǹ tóm Pọ́ọ̀l géè ló bel kilma ló gbò bel ea di mm̀ dọ̀ Kpá Káíá, a beè kọọ̀: “M̀ é ia ló ba pọ́lọ́ vaá ním é kẽea na boo ba lọ̀ nù.” (Híb. 8:12) Sõò éé ní e níá tõó dọ̀ ẹ?
“Ním é kpáá kẽ̀èa na boo ba pọ́lọ́.” (Jèr. 31:34)
15. Éé ní e gè kọọ̀ Jìhóvà náa kẽea na boo bẹẹ pọ́lọ́ tõó dọ̀ ẹ?
15 Kpá Káí náa ólò tú moǹ bel ea kọlà “kẽ̀èa boo” loomá bel áá tṍó e nen gé bugi togó boo nú ea beè naaá tṍó ea kil nvéeá. Sõò, à ólò tú loomá nágé bel nyòòmà nen ea gé náa enè íb nu. Neǹ zib e ba beè káẹ kpàn Jíízọ̀sa beè bàn Jíízọ̀s kọọ̀: “kẽ̀èà ḿ boo tṍó eo é íná mm̀ o Boǹ Méné.” (Lúùk 23:42, 43, NW.) Náa géè bàn Jíízọ̀s kọ á nveenìè bá neèe kà lèlà tṍóá. Bel e Jíízọ̀s beè kọ́ nè gbálàa zógè kọ àé beè kẽée lọl kemà ú. Vóà naa, tṍó e Jìhóvà kọ́ nèi kọ náa é kẽeà nàè boo bẹẹ pọ́lọ́, à tõó dọ̀ kọọ̀ náa é ne nài kpọ̀té boo béè pọ́lọ́ e beè sì. Jìhóvà náa é néi kpọ̀té boo béè pọ́lọ́ ea ni ia ló nèi.
16. Mósĩ́ deè ní e Kpá Káí baatẽ́ dì pọ́ì e ólò ié tṍó e Jìhóvà ia ló bẹẹ pọ́lọ́ ẹ́?
16 Kpá Káí tú dõona kà bel dòòle ló loomá bel ea nveè bá nèi kọ é dã́ ból ló kọọ̀, è ólò ié dì pọ́ì tṍó e Jìhóvà ia ló nèi. Kpá Káí kọ́ nágé kọọ̀ boo béè kọ née gbõomà, è dúù ‘gyóòlo nè pọ́lọ́.’ Sõò nyíéi ẹ́ẹ kọọ̀ Jìhóvà ia ló nèi vaá “dùùlài lọl bá lẹ̀ẹ̀là bel pọ́lọ́.” (Róm̀ 6:17, 18; Kùùà 1:5) Ge nyimá kọọ̀ Jìhóvà a ia ló nèi a náa kọ é ié dì pọ́ì belí gyóòlo e bà náa kọ á ié dì pọ́ì.
“Bàrì beè dùùlài lọl bá lẹ̀ẹ̀là bel pọ́lọ́” (Róm̀ 6:18)
17. Mósĩ́ deè ní e ólò ié bóa tṍó e Jìhóvà ia ló nèi ẽ́? (Àìzáíà 53:5)
17 Bugi Àìzáíà 53:5. Kpá Káí kọ́ọ̀ boo béè kọ è dúù gbò pọ́lọ́, è bélì gbò e kom ea ólò fẹ́ nen di ló. Sõò boo béè kọọ̀ Jìhóvà beè lẹ̀ẹ̀là a Sã́áná kọ á úí boo, è gbóò ié bóa aa bá kom ea ólò fẹ́ nená. (1 Pít. 2:24) Tṍó e síì pọ́lọ́, è kyọọ̀ lé gbaa ló e beè ié kilma ló Jìhóvà. Sõò boo béè ú vààa gyọ́ọ̀ Jíízọ̀s, Jìhóvà ólò ia ló nèi vaá naa kọ é kpáá zọ̀ẹ ié lé gbaa ló. Dì belí bé e nyíè nen e bà bó kà agẹbá zọ̀ ló lọl ló ólò ẹẹ naaá, níà bé e nyíè beele ólò ẹẹ nagé naa tṍó e Jìhóvà ia ló bẹẹ pọ́lọ́ vaá naa kọ é kpáá zọ̀ẹ ié kà lé gbaa ló naa ẽ́.
“Beele gbóò ié bóa boo béè gbò kom e ba beè nvèèé ló.” (Àìz. 53:5)
BÉ E JÌHÓVÀ ÓLÒ IÁ LÓ PỌ́LỌ́ NÈI NAA TỌ́A NÍ LÓ NAA VÀẸ?
18. Éé ní e ni nó lọl ló kele-kele nu dòòle ló e Kpá Káí lóómá bel kilma ló bé e Jìhóvà ólò ia ló pọ́lọ́ naa ẽ́? (Ẹ̀b nàgé ńkpó ea kọ́ọ̀, “Bé e Jìhóvà Ólò Ia Ló Nèi Naa.”)
18 Éé ní e ni nó lọl mm̀ Kpá Káí ea kil ló bé e Jìhóvà ólò ia ló bẹẹ pọ́lọ́ naa ẽ́? Tṍó e Jìhóvà ia ló nèi, à ólò belí kọ è gáà zẹẹ si tọ́ọ̀ kà pọ́lọ́ vaá è agàlà boo kọọ̀ náa é néi kpọ̀té boo béè pọ́lọ́ ea ni ia ló. Níí ólò naa kọ é láá ié kà lé gbaa ló kilma ló bẹẹ Tẹ̀ ea di káála. À bọ́ló kọ é kẽ̀èa boo kọọ̀ kà-kà ia ló pọ́lọ́ dú dõ̀ònù ea aa bá Bàrì. À néi nakà dõ̀ònùí boo béè kọ à vulèi vaá à ólò dõo nu taalẹ bá, níì boo béè kọ à bọ́i ló nì.—Róm̀ 3:24.
19. (a) Éé ní ea náa vaá à bọ́ló kọ nyíéi á ẹẹ ẹ́? (Róm̀ 4:8) (b) Éé ní eé ló bel boo mm̀ togó bel ea bẽene níí ẽ́?
19 Bugi Róm̀ 4:8. Nyíéi palàge ẹẹ kọọ̀ Jìhóvà Bàrì ní e “kà-kà ia ló pọ́lọ́ aa bá ẹ́”! (Ps. 130:4) Sõò à íe nú ea dú bíi kọ é naa be è gbĩ́ì kọ Jìhóvà á ia ló nèi. Jíízọ̀s beè kọọ̀: “Be ò iai ló pọ́lọ́ e dõona nèn beè síi, bọọ Tẹ̀ ea di káála é ia ló boólò pọ́lọ́ nèi.” (Máát. 6:14, 15) Vóà naa, à dú bíi kọ é nó Jìhóvà vaá ia ló pọ́lọ́ nè dõona gbò. Sõò mósĩ́ deè ní eé láá naa vó é? Togó bel ea bẽene níí é kọ́ bé eé láá ia ló pọ́lọ́ nè dõona gbò naa.
SỌ́L EA GÃ́BUG DÚ 46 È Ṍà Ni Zaa E Jìhóva
a Kà lèlà Kpá Káí e ba beè emí mm̀ dém bel Híbrù tú moǹ bel ea kọlà “ia ló pọ́lọ́” loomá bel. À tõó dọ̀ kọọ̀ ní e Kpá Káí gé kọ́ nú ea kil lóá ní ea dú áá kà-kà ia ló pọ́lọ́ ea dìe, náa kal ló béè kọọ̀ à íe kele-kele sĩ́deè ge ia ló pọ́lọ́ ea dì. Gã́bug tàb Kpá Káí náa palàge nvèè kele zẹ̀ẹ̀, sõò New World Translation of the Holy Scriptures náa vó tení dú ló gè tú moǹ bel ea dú kele ló níí dõona kà gbò Kpá Káí e ba beè tàb emá nú ea di mm̀ kpá Psalm 130:4.
