Mary nè a dóm John, a ólò tõó ene kà dó e gã́bug gbò e bà dú Philippine ólò tõo sí tóm, vaá nyíé va ólò ẹẹ gè kọ́ kpẹ̀a nè va. Tṍó COVID-19 na, Mary beè zọ̀ gbò e bà di ba dó nè gbò e bà aa kele-kele dó noá Kpá Káí. Móbá ní ea beè naamá ẽ́?

Mary ólò bĩiná gbò ea ólò noomà Kpá Káí kọọ̀, “É kọ à íe nen eo nyímà ló ea é léémáe gè nó Kpá Káí?” Be bà áálá naa ẽei, à ólò gbóó bĩiná kọọ̀, “É kọ òé láá faalám siimá vá ló?” Ge bĩiná gbò vàlẹ bíbvá ólò domà gã́bug lé kpẹ̀a. Ló éé? Boo béè kọ à ólò tàn gbò e bà íe lèèma ló nú e bà nó lọl mm̀ Kpá Káí gè kọ́ nè pá ba tọ nè ba kóò. Tṍó e Mary bĩ́íná gbò bíbví, éé ní ea beè sìlà aa m ẽ́?

Jasmin e Mary ólò noomà Kpá Káí beè dòbá ténì nen e bà íe lèèma ló gè nó Kpá Káí nèe. Enè ọ̀và e a bée kọlà Kristine beè dé kpéè ló gè zọ̀ Mary noá Kpá Káí naa ní ea kọ́ nèe kọ á olòó zọẹ̀ẹ noàè Kpá Káí bàà tóm buù sè. Tṍó e Mary bĩ́íná Kristine be à íe nen ea nyímá ló ea é taníe gè nó Kpá Káí, a beè kọọ̀ “Ẽei, m̀ é do bá pá ńdáà kóò nè ni.” Tṍó e sìgà sè ni téní, Kristine beè dòbá ténì kà pá a kóò ea é tan va gè nó Kpá Káí nè Mary. Tṍó e tṍó téní, Kristine beè kpáá dòbá sìgà pá a kóò nè Mary vaá pá a kóòa beè dò nàgé bá dõona gbò nèe.

A beè leemá nágé Kristine kọọ̀ pá a tọ e bà di Philippine á no nagé Kpá Káí. Vó beè naa kọ á zọ̀ a nvín pábia ea bée kọlà Andrea loá bel ea kil ló. Túá ból, Andrea beè tuumá kọọ̀ Gbò Neǹ Ditõ̀ò Jìhóvà níà gbò Kọ́ọ̀t, boo béè kọ bà náa ólò ziga ló Jíízọ̀s, vaá áá nòòtẽ́ ea di mm̀ Kpá Jénesìs tẹlẹ Málakaì ní e bà ólò bugi é. Sõò bé ea ólò ẹ̀b Gbò Neǹ Ditõ̀ò Jìhóvà naa beè nyaaá túá dee ea zọ Mary noá Kpá Káí. Kọ̀láá tṍó e bà gé nóòmàe Kpá Káí, à ólò kọọ̀, “Tã́gíní bé e Kpá Káí ní ea kọ́ vó é, àé íè ge dú kà-kà!”

Tṍó e tṍó téní, Andrea beè dòbá bàà kà a kóò bií ló enè nen e bà ólò gbá siá tóm nè Mary vaá ba beè dààmà togó gè nó Kpá Káí. Gbá ló vó, Mary náa beè nyimá kọọ̀ Angela, ea dú vígà tẹ̀ Andrea e dẽée beè gimí ólò pãané va tṍ ló tṍó e bà gé nó Kpá Káí. Enè dee, Angela beè kọ́ nè Andrea kọ á doèe bá nè Mary vá á kọ́ nèe kọ à tanìèe kọ á noomàèe Kpá Káí. Nú e Angela géè nó beè palàge leemáe. Besĩ́ì enè ẽ́ à kalá tení aa ló tṍó ea beè dààmà togó gè nó Kpá Káí, Angela beè bii tṍ ló gã́bug dọ̀ Kpá Káí vaá kọ Mary á olòó noomàèe Kpá Káí ténì tóm buù sè! Nvèè bá ea aa bá Andrea beè naa  kọ Angela á láá sí nònù kũune kẽ tenmá boo Zoom.

Tṍó e Mary nyímá kọọ̀ Joshua, ea dú dóm Kristine ólò pãanìè va tṍ ló tṍó e bà gé nóá Kpá Káí, Mary beè bĩináe be àé léémáe gè gbaaá vá ló. Joshua beè kọ́ nèe kọọ̀, “M̀ é pãanéi tṍ ló sõò ó gá bĩinám tọ́ọ̀ kà bíb, be ò bĩ́ínám bíb, m̀ é àà.” Besĩ́ à kálà dú vòò kà mínìt, Joshua beè bĩiná gã́bug bíb èl Kristine, vaá a beè tànie gè kilsĩ́ gè nó Kpá Káí.

Vàlẹ bíb e Mary beè bĩináá beè naa kọ á ié gã́bug nen gè noomà Kpá Káí. Boo béè kọ gbò ea ólò noomà Kpá Káí beè palàge bọọ́ tõ̀ò, a beè kọ́ nè pá vígà kọ bàá noomà nuù sìgà ọ̀và. Mary beè zọ̀ 28 nen e bà di ténì kà dó noá Kpá Káí.

Jasmin, ea dú túá nen e Mary beè zọ̀ noá Kpá Káí e beè zẹ́ẹ́ kọ́ nú ea kil lóá beè diia múú ló April 2021. Kristine beè diia múú ló May 2022 vaá òòà kil ló pá a tọ e bà di Philippine. Bàà nen e Kristine beè dòbá nè Mary kọ á noomà va nuá beè dììà nàgé múú. Angela beè diia múú tṍó e sìgà ẽ́ ni téní, vaá kátogóí a dú neǹ gyà deèsĩ́ tóm kọ̀ kpẹ̀a dénè tṍó. Joshua ea dú dóm Kristine nè ba nvín Andrea, bií nágé ló dõona gbò e Mary gé nóòmà va Kpá Káí dì e bà gé sim kilsĩ́ leevè.

Mm̀ túá gbò gbááá, gã́bug nen e ba beè dã́ lé kpẹ̀aí beè kọ́ nú ea kil ló nè pá ba tọ nè ba kóò. (Jọ́ọ̀n 1:​41, 42a; Tóm 10:​24, 27, 48; 16:​25-33) Àé palàge dú lé gè bĩiná gbò eo ólò noomà Kpá Káí nè dõona gbò e bà íe lèèma mm̀ ge nó Kpá Káí kọọ̀, “É kọ à íe nen eo nyímà ló ea é léémáe gè nó Kpá Káí?” Be ò bĩ́íná nakà vàlẹ bíbvá, be à sẹlẹ, òé láá mòn nàgé gbò e bà íe tan ge nó Kpá Káí.