À ÍE báà dem e ba beè emí nu boo mm̀ gbò gbáá 700-600 B.C.E. ea di ketõ̀ò ge sì gé ẹ̀b gbò nu e ba beè mon boo gbò kpò kunukẽ̀ e bà kol bée mm̀ Kpá Káí ea di Jèrúsalẹ̀m. Ba beè mòn báà demá mm̀ kóló dem e ba beè olòó lì nen m ea di kuló Hẹ́bròn ea di Ízràẹ̀l. Émì nú ea di boo báà demá kọ́ọ̀: “Bẽgẽ bel á di ló Hagaf ea dú nvín Hagav, bé e Yahweh Sabaot kọ́ ẹ́.” Mósĩ́ deè ní e nakà émì nuí nveè sãa kúm nu e Kpá Káí kọ́ ẹ́? À zógè kọọ̀ ba beè palàge nyimá ló béè Bàrì ea kọlà Jìhóvà, e bà émí naamá YHWH mm̀ nómá súú kpá émà nuù Híbrù, vaá bà géè tú siimá tóm buù dee mm̀ gbò tṍó e bà géè emí Kpá Káíá. Kàsĩ́, dõòna kà gbò émì nu e bà mongí mm̀ gbò kóló demá zógè kọọ̀ gbò e bà ólò kil kiẽ́e gé gũá beè olòó bọọgẹ̀ emí béè Bàrì nè baálà gbò bée e béè Bàrì di gbàà kú gbò gbọọá.

Dr. Rachel Nabulsi ea aa pọ̀b tọọ̀ kpá ea di Georgia ló bel boo nakà émì nuí kọọ̀: “Ge kọọ̀ bée ea kọlà YHWH sila gã́bug tóm mm̀ nakà émì nuí nóòmài gbele tõ̀ò nu. . . . Émì nuá nè gbò kiẽ́e ea silà zógè bé e YHWH beè palàge dì bíi naá mm̀ dùm pá Ízràẹ̀l nè pá Júdà.” Níí nveè sãa kúm béè Bàrì ea di mm̀ Kpá Káí, e bà émí naamá YHWH mm̀ súú kpá Híbrù ea silà gã́bug tõ̀ò tóm. Béè Bàrì ólò bọọgẹ̀ di gbàà béè gbò nen.

Tã́á bel ea kọ́ọ̀ “Yahweh Sabaot,” e ba beè emí boo báà demá, tõó dọ̀ “Jìhóvà ea íe gbò bé.” Vóà naa, à bélí kọọ̀ gbò nen e ba beè di mm̀ tṍó Kpá Káíá géè bọọgẹ̀ tú béè Bàrì nè tã́á bel ea kọ́ọ̀ “Jìhóvà ea íe gbò bé” loomá bel. Níí nveè nàgé sãa kúm Kpá Káí tṍó ea tú tã́á bel ea kọ́ọ̀ “Jìhóvà ea íe gbò bé” ea sila 283 tóm mm̀ Kpá Káí e ba beè emí mm̀ dém bel Híbrùa loomá bel, bọọ èlmà tõ̀ò mm̀ émì nuù Àìzáíà, Jèrèmáíà, nè Zèkàráíà.