1-2. (a) Mó tṍó ní e ólò bọọgẹ̀ kẽ̀èa boo nen e beè vùlè ea beè ù e? (b) Éé ní e Jíízọ̀s beè nvee kẽ kà lèlà bílá dee ea zilà dú deé e bà fẹ́ẹá ẹ́?

KỌ̀LÁÁ bé e gbò e beè vùlè beè ú kpã́á dee naa, è ólò kpáá kẽ̀èà vá boo. È ólò bọọgẹ̀ bugi togó boo nú ea kil vá ló tṍó ea kpṍònè deé e ba beè ù.

² Buù gbáá, è ólò gbaaá dẽè gabug gãà gbò nen beeá ló bàlà booí sẹlẹ sẹ̀lẹ̀nù ge kẽ̀èa boo nen e palàge vùlè ea beè ù​—ea dú Jíízọ̀s Kráìst. (1 Pít. 1:8) È ólò gbá bõoná vaá kẽ̀èa boo nen ea beè tú a dùm aamái lọl bá náàkyọ̀ nè ú. (Máát. 20:28) Mm̀ kà kà, Jíízọ̀s beè gbĩ́ kọọ̀ pá a gbò nyòòne nvée á olòó kẽeàè boo a ú. Kà lèlà bílá dee ea zilà dú deé e bà fẹ́ Jíízọ̀sa, a beè noo kele íb dè gyã́á ló m̀m̀-ne nvee kẽ vaá kọọ̀: “Olòó naanii níí naamá gè kẽeam mí boo.”​—Lúùk 22:​19, NW.

3. Éé ní eé ló bel boo mm̀ nakà togó belí é?

³ Pọ́ì ńkem̀ gbò e bà dṹùnà gbò e bà ólò sí kẽè Sẹ̀lẹ̀nù Ge Kẽ̀èa Boo Ú Kráìstí ní e bà íe ból dẽesĩ́ gè kil káála ẹ́. Boo tṍó e gã́bug gãà gbò e bà sí kẽ íe ẹ̀b dẽesĩ́ gè tõó boo kunukẽ̀í. Mm̀ nakà togó belí, èé ló bel boo gbò nú ea náa vaá à ólò tàn pálàa gbòí gè sí kẽè sẹ̀lẹ̀nùí buù gbáá. Èé ló nágé bel boo bélè e ólò ié lọl ló gè sì. Naanii èé daamà togó tení dú ló gè bugi togó boo sìgà nú ea náa vaá gbò e Bárì beè tṍ nóo ból ólò sì.

4. Éé ní ea náa vaá gbò e Bàrì beè tṍ nóo ból ólò dé fétúlú vaá ṍ mííá gbẹá kẽè Sẹ̀lẹ̀nù Ge Kẽ̀èa Boo Ú Kráìst e?

⁴ Buù gbáá, à ólò tàn gbò e Bàrì beè tṍ nóo ból gè sí kẽè sẹ̀lẹ̀nùí vaá dé fétúlú nè ge ṍ mííá. Éé ní ea náa à bọ́va ló gè dé fétúlú nè ge ṍ mííá ẽ́? Ge aalá bíbvá, bugi togó boo nú ea beè naaá dee deè nvéè bílá dee e Jíízọ̀s beè dììma dùm boo kunukẽ̀í ã́. Tṍó e Nàànù Ténì Zelíá ni sẹẹà lọ̀l, Jíízọ̀s beè gbóó tú Dè Gyã́á Ló M̀m̀-neè Bẹẹ Tẹ̀ Íé nvee kẽ. A beè tenmà fétúlú nè mííá nè 11 neǹ tóm e ba beè bọ́ló dẹ̀lẹ̀ nyíé booá kọ bàá dè vaá õ̀. Jíízọ̀s beè kọ́ nú ea kil ló bàà kà zíl gbaa ló nèva​—ea dú ãa zíl gbaa ló nè zíl Boǹ Ménéá. * (Lúùk 22:​19, 20, 28-30) Gbò zílí beè naa kọọ̀ gbò tómá nè ńkem̀ gã́bug dõòna gbò á ié nèà deè ge dú gbò méné nè gbò vààla gyọ́ọ gbẹá káálá. (Kùùà 5:10; 14:1) Áá gbò e Bàrì beè tṍ nóo ból e bà sígá boo kunukẽ̀í e bà di mm̀ pálàa kà zílí ní e bàé láá dé fétúlú vaá ṍ mííá gbẹá kẽè sẹ̀lẹ̀nùí ẽ́.

5. Éé ní e gbò e Bàrì beè tṍ nóo ból nyímá ea kil ló ba ból dẽesĩ́ ẽ́?

⁵ Nee dõòna kà nú ea náa vaá à ólò tàn gbò e Bàrì beè tṍ nóo ból gè sĩ́ kẽè Sẹ̀lẹ̀nù Ge Kẽ̀èa Boo Ú Kráìstí: sẹ̀lẹ̀nùí ólò naa kọ bàá bugi togó boo ba ból dẽesĩ́. Jìhóvà beè nèva ból dẽesĩ́ ea dú dũ̀ùnè​—ea dú gè dé kpéè ló dùm e bè náa tá gbẹá káála, nè ge zọ̀ Jíízọ̀s Kráìst nè gbò e bà dṹùnà 144,000 nená siá tóm, vaá ní ea palàge bọọ, dú gè di kèsĩ́ Jìhóvà Bàrì! (1 Kọ́r. 15:​51-53; 1 Jọ́ọ̀n 3:2) Gbò e Bàrì beè tṍ nóo ból nyímá kọọ̀ níà gbò nú e bàé déè kpéè ló gbẹá káála ẹ́. Sõò kọbé bà láá kil káála, bàé íè ge kilsĩ́ gè bọ́ló dẹ̀lẹ̀ nyíé boo dọ̀ọ̀mà tṍó e bàé ú. (2 Tím. 4:​7, 8) À ólò palàge ẹẹlẹ̀ nyíè gbò e Bàrì beè tṍ nóo ból tṍó e bà bugi togó boo ba ból dẽesĩ́ gè kil káála. (Táítọ̀s 2:13) Èé kọ́ vàẹ kilma ló ‘nagbò naanà bóláẹ́’? (Jọ́ọ̀n 10:16) Sìgà éé ní ea náa vaá baala ólò si nágé kẽè Sẹ̀lẹ̀nù Ge Kẽ̀èa Boo Ú Kráìst e?

6. Éé ní ea náa vaá nagbò naanà bólá ólò sí kẽè Sẹ̀lẹ̀nù Ge Kẽ̀èa Boo Ú Kráìst buù gbáá ẹ́?

⁶ Nagbò naanà bólá náa ólò sí kẽè Sẹ̀lẹ̀nù Ge Kẽ̀èa Boo Ú Kráìst boo béè ge dè àbèè ge õ̀, sõò nyíé va ólò ẹẹ kọ bà síè. Mm̀ gbáá 1938, ní ea dú túá tṍó e ba beè kolí gbò e bà íe ẹ̀b dẽesĩ́ gè tõó boo kunukẽ̀í kọ bàá sí kẽè Sẹ̀lẹ̀nù Ge Kẽ̀èa Boo Ú Kráìst e. Kpá Tọ Kùdẽe Ló níí March 1, 1938, beè kọọ̀: “À palàge bọ́ló vaá lèlà kọọ̀ [nagbò naanà bólá] á di kẽè sẹ̀lẹ̀nùí vaá ẹ̀b bé e bà náa naa. . . . À bọ́ló kọ á du nágé tṍó e baala é ṍ kààgà.” Nyíè nagbò naanà bólá ólò ẹẹ gè sí kẽè Sẹ̀lẹ̀nù Ge Kẽ̀èa Boo Ú Kráìst belí bé e nyíè nen e bà kólí siimá kẽè sẹ̀lẹ̀nù ílà dóm nè và ólò ẹẹ naaá.

7. Éé ní ea náa vaá à ólò tàn nagbò naanà bólá gè di kẽè lòbèl ea ólò nèà gbẹá kẽè Sẹ̀lẹ̀nù Ge Kẽ̀èa Boo Ú Kráìst e?

⁷ Nagbò naanà bólá ólò bugi nagé togó boo baálà ból dẽesĩ́. À ólò tàn va gè di kẽè lòbèl ea é neà gbẹá kẽè sẹ̀lẹ̀nùí, boo béè kọọ̀ à ólò bọọgẹ̀ kọ́ nú e Kráìst nè  144,000 nen e bàé zọ́ẹ bẹ̀l é náa nè gbò e bà bọ́ló dẹ̀lẹ̀ nyíé boo Kèbá Bẹ̀l Kráìst Mm̀ Enè Tõ̀ò Gbáá. Kèbá tùle Méné Jíízọ̀s Kráìst, gbò e bàé zọ́ẹ bẹ̀l gbẹá káála é náa kọọ̀ boo kunukẽ̀í á dú páladaìs nè ge naa kọọ̀ gbò nen á gbõoma. Ẹ̀b bé e nyíè gã́bug gãà gbò e bà sí kẽè sẹ̀lẹ̀nùí ólò ẹẹ naa tṍó e bà doomà dẽe ló gbò kọ́ọ̀ bùlà Bàrì ea é ḿḿ-má dì deèsĩ́, dì belí ní ea di mm̀ kpá Àìzáíà 35:​5, 6; 65:​21-23; nè Kùùà Nù 21:​3, 4. Ge dòòmà dẽe ló tṍó e baala nè gbò e bà vulè é gbá di mm̀ ãa bàlà booá ólò agẹlẹ ló ba ból dẽesĩ́ nè ba béèlàfùl kọ bà náa é ooàẹ̀ aa ló gè fãè Jìhóvà.​—Máát. 24:13; Gàl. 6:9.

8. Éé ní ea dú dõòna kà bug ea náa vaá nagbò naanà bólá ólò sí kẽè Sẹ̀lẹ̀nù Ge Kẽ̀èa Boo Ú Kráìst e?

⁸ Bugi togó boo dõòna kà nú ea náa vaá nagbò naanà bólá ólò sí kẽè sẹ̀lẹ̀nùí. Bà gbĩ́ gè zogè kọ bà vulèè vaá nveenìè sãa kúm gbò e Bárì beè tṍ nóo ból. Moǹ Bel Bàrì beè gbẹẹ́ sĩ́ kọọ̀ kà lé gbaa ló é dí zẹ̀ẹ̀ gbò e Bàrì beè tṍ nóo ból nè gbò e bà íe ẹ̀b dẽesĩ́ gè tõó boo kunukẽ̀í. Mósĩ́ deè e? Naanii èé bugi togó boo sìgà nu dòòmà bá.

9. Éé ní e kọ́ọ̀ bùlà Bàrì ea di mm̀ kpá Zèkàráíà 8:23 tẹ́lẹ bàlà kẽ kilma ló bá e nagbò naanà bólá ólò ẹ̀bmà gbò e Bàrì beè tṍ nóo ból é?

⁹ Bugi Zèkàráíà 8:23. Kọ́ọ̀ bùlà Bàrìí palàge baatẽ́ bá e nagbò naanà bólá ólò ẹ̀bmà gbò e Bàrì beè tṍ nóo ból. Tã́á bel ea kọ́ọ̀ “neǹ Júù” nè “boolo” gé lóá bel nyòòmà tẽ̀ènè gbò​—ea dú gbò e Bàrì beè tṍ nóo ból e bà sígá boo kunukẽ̀í. (Róm̀ 2:​28, 29) ‘Òb nen e bà aa dénè dóá’ tõó dọ̀ nagbò naanà bólá. Ge kọ bà “síi bá ló,” tõó dọ̀ kọ bà gbááá ló gbò e Bàrì beè tṍ nóo ból mm̀ õ̀òa fã̀. Boo béè vó, kà lèlà bílá dee e sẹ̀lẹ̀nùí é sẹẹàa, nagbò naanà bólá ólò zogè kọ bà gbááàẹ̀ ló gbò e Bàrì beè tṍ nóo bólá tení dú ló gè zọ̀ va sí kẽ.

10. Éé ní e Jìhóvà náa mm̀ ge mm-mè kọ́ọ̀ bùlà Bàrì ea di mm̀ kpá Èzíkiẹ̀l 37:​15-19, 24, 25 é?

¹⁰ Bugi Èzíkiẹ̀l 37:​15-19, 24, 25. Jìhóvà a ḿm̀-mè nakà kọ́ọ̀ bùlà Bàrìí tení dú ló gè naa kọọ̀ gbò e ẹlẹ beè tṍ nóo ból nè nagbò naanà bólá á gbá siá tóm mm̀ gbaa ló. Kọ́ọ̀ bùlà Bàrìá kọ́ nú ea kil ló bàà kà kpóó té. Gbò e bà íe ból dẽesĩ́ gè kil káála dì belí kpóó té “Júdà” (ea dú tẽ́ gã e ba beè sà gbò méné pá Ízràẹ̀l lọ̀l), vaá gbò e bà íe ẹ̀b dẽesĩ́ gè tõó boo kunukẽ̀í dì belí kpóó té “Ífrèm.” * Jìhóvà é gbá gbòí naa ní e bàé dú “tẽ̀ènè kà kpóó té.” Níí tõó dọ̀ kọọ̀ bàé gbá siá tóm kèbá ba Méné, ea dú Kráìst Jíízọ̀s. Buù gbáá, gbò e Bàrì beè tṍ nóo ból nè nagbò naanà bólá ólò gbá sí kẽè sẹ̀lẹ̀nùí dì belí “tẽ̀ènè gònò naanà ból” ea íe “tẽ̀ènè neǹ kùdẽe ló.”​—Jọ́ọ̀n 10:16.

11. Mósĩ́ deè ní e “naanà ból” e kpá Máátìù 25:​31-36, 40 kọ́ nú ea kil lóá, ólò zogè kọ bà nveenìè sãa kúm pá vígà Kráìst e?

¹¹ Bugi Máátìù 25:​31-36, 40. “Naanà ból” e nu dòòle lóí gé kọ́ nú ea kil lóá tõó dọ̀ gbò lé lab dògò e bà di mm̀ gbò deé e tṍó é gé tàí e bà íe ẹ̀b dẽesĩ́ gè tõó dùm boo kunukẽ̀í​—baala ní e bà dú nagbò naanà bóláẹ́. Bà ólò nvèè bá nè pá vígà Kráìst e bà sígá boo kunukẽ̀í kọ bàá láá sí ba tóm ea palàge bọọá, ea dú tóm gè vee lé kpẹ̀a nè ge noòmà nu.​—Máát. 24:14; 28:​19, 20.

12-13. Mókà dõòna kà sĩ́deè ní e nagbò naanà bólá é láá zogè kọ bà nveenìè sãa kúm pá vígà Kráìst e?

 ¹² Buù gbááí, sìgà sè besĩ́ à kálá dú sè ge sẹlẹ sẹ̀lẹ̀nùí, nagbò naanà bólá ólò zogè kọ bà nveenìè sãa kúm pá vígà Kráìst tení dú ló gè kolí gbò nen beeá ló bàlà booí siimá kẽè sẹ̀lẹ̀nùí. (Ẹ̀b ńkpó ea kọ́ọ̀ “ É Kọ Ò Gé Kpóógá Dee Ló Nyòòmà Sẹ̀lẹ̀nù Ge Kẽ̀èa Boo Ú Kráìst?”) Bà ólò nvèè nàgé bá noo nu naa ní e sẹ̀lẹ̀nùí é láá sẹ̀ẹ̀a kọ̀láá kà bõ̀ònatõ̀ò beeá ló bàlà booí, kọbèè à gá náa bà náa íe tọ́ọ̀ nen ea dé fétúlú vaá ṍ mííá gbẹá kẽè sẹ̀lẹ̀nùí. À ólò ẹẹlẹ̀ nyíè nagbò naanà bólá gè nvèè bá nè pá vígà Kráìst mm̀ gbò sĩ́deèá. Nagbò naanà bólí ólò nyimá kọọ̀ Jíízọ̀s ẹb nvèè bá e bà nveè nè pá a vígà belí kọ bà nveenìè neè ẹlẹ.​—Máát. 25:​37-40.

¹³ Náa kal ló béè kọọ̀ bẹẹ ból dẽesĩ́ dú kele, dõòna kà éé ní ea náa vaá dénè bẹ̀ì ólò sí kẽè sẹ̀lẹ̀nùí ẽ́?

14. Mósĩ́ deè ní e Jìhóvà nè Jíízọ̀s zógè kọ bà palàge vulèèi é?

¹⁴Nyíéi palàge ẹẹ ló bé e Jìhóvà nè Jíízọ̀s vulèi naa. Jìhóvà a zógè kọ à vulèèi mm̀ kele-kele sĩ́deè, sõò enè sĩ́deè ea palàge bọọ lọ̀l vaá à lee dú gè lẹ̀ẹ̀là a Sã́áná kọ á úí boo. (Jọ́ọ̀n 3:16) È nyímà nàgé kọọ̀ Jíízọ̀s palàge vùlèi tení dú ló gè tú a dùm ne boo beele. (Jọ́ọ̀n 15:13) Náa íe tọ́ọ̀ nú eé láá kpẽ́ nè Jìhóvà nè Jíízọ̀s boo béè vulè e bà íeí ló. Sõò èé láá zogè kọọ̀ nyíéi ẹ́ẹ̀lìè tení dú ló bé e tõò dùm buù dee naa. (Kọ́l. 3:15) Vaá è ólò sí kẽè Sẹ̀lẹ̀nù Ge Kẽ̀èa Boo Ú Kráìst boo béè ge kẽ̀èa boo bé e bà vulèi naa, nè ge zogè kọ è vulèè va.

15. Éé ní ea náa vaá gbò e Bàrì beè tṍ nóo ból nè nagbò naanà bólá ólò nvèè ka ló nu ààaá ẹ́?

¹⁵È ólò palàge nvèè ka ló nu ààaá. (Máát. 20:28) Gbò e Bàrì beè tṍ nóo ból ólò palàge nvèè ka ló nu ààaá boo béè kọ à náa kọọ̀ ba ból dẽesĩ́ á valí. Zìgà e bà íe mm̀ vààa gyọ́ọ̀ Kráìst a náa kọọ̀ Jìhóvà á tenmà va naamá gbò lé lab dògò vaá zalí va naamá pá a nvín. (Róm̀ 5:1; 8:​15-17, 23) Nyíè nagbò naanà bólá ólò ẹẹ nagé ló nu ààaá. Boo béè zìgà e bà íé mm̀ vààa gyọ́ọ̀ Kráìst, bà õòa kèsĩ́ Bàrì, bàé láá sí tóm nèe, vaá bà íe ẹ̀b dẽesĩ́ gè ‘fùl zelí bá pọ̀b kpo tã̀àgã̀.’ (Kùùà 7:​13-15) Enè sĩ́deè e gbò e Bàrì beè tṍ nóo ból nè nagbò naanà bólá zógè kọ bà nveenìè ka ló nu ààaá dú gè sí kẽè sẹ̀lẹ̀nùí buù gbáá.

16. Dõòna kà éé ní ea ólò naa kọ é sí kẽè Sẹ̀lẹ̀nù Ge Kẽ̀èa Boo Ú Kráìst e?

¹⁶ Dõòna kà nú ea náa vaá è ólò sí kẽè sẹ̀lẹ̀nùí dú kọọ̀ è gbĩ́ gè gbàntṍ ló Jíízọ̀s. Kọbèè è íè ból dẽesĩ́ gè kil káála àbèè ge tõó dùm boo kunukẽ̀í, buù bẹ̀ì ólò gbàntṍ ló lẹ̀ẹ̀là e Jíízọ̀s beè ne ló èlà deé ea beè nvèè Dè Gyã́á Ló M̀m̀-neè Bẹẹ Tẹ̀ Íe kẽá, a beè kọọ̀: “Olòó naanii níí naamá gè kẽeam mí boo.”​—1 Kọ́r. 11:​23, 24, NW.

17. Mósĩ́ deè ní e Sẹ̀lẹ̀nù Ge Kẽ̀èa Boo Ú Kráìst ólò nvèè bá nèi kọ é tõo bã ló Jìhóvà ẹ?

¹⁷À ólò naa kọ é tõo bã ló Jìhóvà. (Jém̀z 4:8) E nó kọọ̀ Sẹ̀lẹ̀nù Ge Kẽ̀èa Boo Ú Kráìst ólò naa kọ é bugi togó boo ból dẽesĩ́ e Jìhóvà néi nè bé e vulè ea íe kìlmàí ló bọọ naa. (Jèr. 29:11; 1 Jọ́ọ̀n 4:​8-10) Tṍó e bugì togó boo ból dẽesĩ́ e íè kilma ló dì deèsĩ́ nè vulè e Jìhóvà íe kìlmàí ló, à ólò naa kọọ̀ bẹẹ vulè nè gbaa  ló e íè kilma ló Jìhóvà á kpáá agaló.​—Róm̀ 8:​38, 39.

18. Éé ní e gè bugi togó boo nu dòòmà bá Jíízọ̀s síèi kpóó ló kọ é naa ẽ́?

¹⁸À ólò nvèè bá nèi kọ é nó nu dòòmà bá Jíízọ̀s. (1 Pít. 2:21) Gbò dee ea nyoone deé e sẹ̀lẹ̀nùí é sẹẹà, è ólò bugi gbò nòòtẽ́ ea kil ló nú ea beè naaá mm̀ dùm Jíízọ̀s dee deè nvéè sè ea beè dììma boo kunukẽ̀í, bé ea beè ú naa, nè a kẽ̀èà aa kemà ú. Vaá lòbèl ea é neà gbẹá kè sẹ̀lẹ̀nùí ló èlà deeá ólò kẽeí nyíe bé e Jíízọ̀s vulèi naa. (Ẹ́fẹ. 5:2; 1 Jọ́ọ̀n 3:16) Tṍó e bugì nú ea kil ló vààa gyọ́ọ̀ Jíízọ̀s vaá bugi togó boo, à ólò sièi kpóó ló kọ é “tõó dùm e ẹlẹ, Jíízọ̀s Kráìst, beè tõo.”​—1 Jọ́ọ̀n 2:6.

19. Mósĩ́ deè ní eé láá naa kọọ̀ vulà súú dẽe ló Bàrì á gbẹáí boo é?

¹⁹À ólò naa kọ é beeláfùl ge naa nú ea é náa kọọ̀ vulà súú dẽe ló Bàrì á gbẹáí boo. (Júùd 20, 21) Vulà súú dẽe ló Bàrì é gbẹ́aí boo tṍó e gbanìe tṍ ló, naa kọ a bée á di káí, vaá naa nú ea ẹ́ẹ̀lẹ̀ẹ nyíe. (Pró. 27:11; Máát. 6:9; 1 Jọ́ọ̀n 5:3) Sẹ̀lẹ̀nù Ge Kẽ̀èa Boo Ú Kráìst ólò naa kọ é tõó dùm buù dee mm̀ sĩ́deè ea é náa kọ Jìhóvà á nyimá kọọ̀, ‘è gbĩ́ gè naa nú ea é náa kọọ̀ a vulà súú dẽe ló á gbẹáí boo!’

20. Éé ní ea ólò naa nagé kọ é sí kẽè Sẹ̀lẹ̀nù Ge Kẽ̀èa Boo Ú Kráìst e?

²⁰ Kọbèè è íè ból dẽesĩ́ gè kil káála àbèè ge tõó dùm boo kunukẽ̀í, è íè gã́bug nú ea ólò naa kọ é sí kẽè sẹ̀lẹ̀nùí. Tṍó e gbáà bõoná kẽè sẹ̀lẹ̀nùí deeá, è ólò kẽ̀èa boo ú nen e vulè, ea dú Jíízọ̀s Kráìst. Ní ea bọọ lọ̀l vaá à lee, è ólò kẽ̀èa boo pọ̀bkà sĩ́deè e Jìhóvà beè zogè kọ à vulèèi, ea dú gè lẹ̀ẹ̀là a Sã́áná kọ á aalái. Gbááí, Sẹ̀lẹ̀nù Ge Kẽ̀èa Boo Ú Kráìst é sẹẹa ló èlà deè Friday, April 15, 2022. È vulè Jìhóvà nè a Sã́áná. Vóà à naa, tọ́ọ̀ nu á gá òòmài lọl ló gè sí kẽè Sẹ̀lẹ̀nù Ge Kẽ̀èa Boo Ú Kráìst deé ea kpṍònè deeá.