MOǸ bel ea kọlà “chariot,” e New World Translation lóómá bel kĩí, gé lóá bel nyòòmà kọ̀láá íb faà e nom ólò kpọlẹ̀. (Tóm 8:​28, 29, 38) Kọ̀láá bé ea dì naa, àé láá dú kọọ̀ faà e gbálà Ítìópìà beè di m-má beè bọọ́ kà el faà bé àbèè faà tee e nom ólò kpọlẹ̀. Nee sìgà gbò bug ea náa vaá è kọ́ vóí.

Gbálà Ìtìópìàí beè dú pọ̀b nen ea ólò sí tóm tọọ̀ méné vaá a beè sí kpã́á deè kyẽè. Gbálàí “géè ẹ̀b nú ea kil ló dénè gyọ́ Kàndésì ea dú pábia ea géè bẹ̀l Ìtìópìà.” (Tóm 8:​27, NW.) Kĩée e Sudan nè deè kpọ̀lọ̀-kpọ̀lọ̀ ea di ló Íjèpt di kátogóí, beè dũunà Ìtìópìàí deè kéléá. Àé láá dú kọọ̀ gbálàí beè bã mm̀ kele-kele faà tṍó ea géè sí kyẽèí, vaá àé láá dú kọọ̀ a beè iè ge faalá bẹ̀lẹ̀ ea beè tú gbò nú ea dúe bíi ló gbẹá boo kyẽèí nvee m. Faà e ténì kà kpú kẽ di kè kẽ, e bà tú nu kọ̀lmà boo, e nom gé kpọ́lẹ̀ beè di zẹ̀ẹ̀ gbò faà e ba beè olòó dààmà nen mm̀ túá gbò gbááá. Kpá ea kọlà Acts​—An Exegetical Commentary kọ́ọ̀, “Gã́bug bẹ̀lẹ̀ ólò láá bã mm̀ nakà faàí, níí ólò naa kọọ̀ gbò e bà gé sí kyẽè á ié dĩ̀ìnè ló, vaá naa kọọ̀ nen á láá sí kpã́á ketõ̀ò.”

Gbálà Ìtìópìàí géè bugi kpá tṍó e Fílip ínaé ló. Kpá Káí kọ́ọ̀, “Fílìp à gbóó gbalá kyãà bã ló faàa vaá dã́ mon gbálàa ea gé bugi kpá e neǹ kọ́ọ̀ bùlà Bàrì ea kọlà Àìzáíà beè emíá.” (Tóm 8:30) Bà náa beè dèm nakà faà ge siimá kyẽè e nom ólò kpọlẹ̀í kọ á teelá bá kpóó. Ge kọọ̀ nakà faàí náa ólò teelá bá kpóó ní ea beè naa kọọ̀ gbálàí á láá tõó m bugi kpá, vaá Fílip á láá teemà kpóó tọ tùlàẹ.

Gbálà Ìtìópìàa beè kọ́ nè “Fílìp kọ á dẽe bã mm̀ faàa vaá ĩinèèe tẽ́ ku kpàn.” (Tóm 8:31) Tṍó e faà tee e nom ólò kpọlẹ̀ gé téélá, nen ea gé ọ́ví ólò elá èla gbẹá m. Sõò faà ge dààmà nen, ié kĩée ea é tá nen, e Fílip nè gbálà Ìtìópìàa beè ĩìtẽ́.

Boo béè nú e kpá Tóm 8 togó kọ́, nè nú e nòòtẽ́ tẹ́lẹ bàlà kẽ, e nyááná bá ló bé e beè olòó tã́ faà gbálà Ìtìópìàa naa. È tã́à naamá pọ̀bkà faà ea bọọ́ kà èl faà bé àbèè faà ge teemá tee e nom ólò kpọlẹ̀.