1. Éé ní ea náa vaá pọ̀ é láá siíi sìgà tṍó ẽ́?

 PỌ̀ ÓLÒ siíi sìgà tṍó. Sõò ge nó Kpá Káí a náa kọ é gá siiá ná pọ̀ ló gbò e ba ni ú, gbò zọ, àbèè nú ea é nááá dì deèsĩ́. Sõò, è di tṍó e “nu pọ̀” gé nááá, dì belí bé gím, bàg, nè pọ́lọ́ kom. (Lúùk 21:11) Èé láá siiá nágé pọ̀ ló bíígá ló ea aa bá kpóó ea gé bẹl, gbò nen, àbèè pá bẹẹ tọ e bà bé uú boo kà-kà fã̀. Sìgà gbò ólò siiá pọ̀ kọọ̀ bà náa é láá ĩimàè tã̀àgã̀ e bà gé téní bá àbèè ní e bàé kpeesĩ́ ló dì deèsĩ́.

2. Baatẽ́ dìtõ̀ò e Dévìd beè tení bá gbẹá Gáàt.

² À íe tṍó e pọ̀ beè sii Dévìd. Dì belí nu dòòmà bá, tṍó e Méné Sọ́ọ̀l beè gbĩ́ gè fẹ́ẹ, a beè beeláfùl ge teelá kil boǹ Gáàt ea di Fìlístìà. Pọ́ì ńkem̀ aaló tṍóá, Méné Ékìsh ea géè bẹ̀l Gáàt beè gbóó nyímá kọọ̀ Dévìd ní ea dú pọ̀b neǹ bé e ba beè ọlí sọ́l lèèmàe kọ à fẹ́ “gã́bug òb tõ̀ò” pá Fìlístìà ẹ. ‘Pọ̀ beè palàge sii’ Dévìd. (1 Sám. 21:​10-12) Pọ̀ beè siíe ló nú e Ékìsh é láá naá ẽ. Mósĩ́ deè ní e Dévìd beè bé èlbá a síìà pọ̀ ẹ?

3. Dẹ̀ẹ̀a boo nú ea di mm̀ kpá Psalm 56:​1-3, 11, mósĩ́ deè ní e Dévìd beè bé a síìà pọ̀ èlbá ẹ́?

³ Mm̀ kpá Psalm 56 togó, Dévìd baatẽ́ bé e nu beè tọàẹ̀ẹ́ ló naa tṍó ea beè di Gáàt. Kpá Psalmí kọ́ bé e pọ̀ beè sii Dévìd naa, vaá kọ nagé bé ea beè bé èlbá a síìà pọ̀ naa. Dévìd beè dẹlẹ nyíé boo Jìhóvà tṍó e pọ̀ beè siíe. (Bugi Psalm 56:​1-3, 11.) Jìhóvà náa beè kẹlẹ́ẹ. Tení dú ló nvèè bá ea aa bá Jìhóvà, Dévìd beè labví láb e gbò nen náa beè nè dẽe: A beè sẹlẹ ló belí nen e lóó togóe náa dú lé! Tãa vó e Ékìsh gbĩ́ gè fẹ́ Dévìd, a beè kpóe lọa ló, vaá Dévìd beè gbóó teelá gũá.​—1 Sám. 21:13–22:1.

4. Mósĩ́ deè ní eé láá naa kọọ̀ bé e dẹlẹ̀ nyíé boo Jìhóvà naa á kpáá agaló é? Nè nu dòòmà bá.

 ⁴ Beele é láá be nagé bẹẹ síìà pọ̀ èlbá tení dú ló gè dẹlẹ nyíé boo Jìhóvà. Sõò, mósĩ́ deè ní eé láá naa kọọ̀ bẹẹ gè dẹlẹ nyíé boo Jìhóvà á kpáá agaló é, bọọ èlmà tõ̀ò tṍó e pọ̀ sííi é? Bugi togó boo nakà nu dòòmà báí. Túá ból, pọ̀ é láá sií ni beè kpá ló ni gé zọ. Sõò, be ò dẹlẹ nyíé boo o neǹ dóm biè, pọ̀ náa é sííná ni. Àé láá dú kọ o beè dã́ nú ea kil ló gã́bug nen ea beè bò, e íb zọ̀lóá di ló. À palàge pãané ni tṍ ló vaá naa kọ ó agala boo kọọ̀ à dã́è ból ló bé e nu gé zọ́ ni naa. À gbóó kọọ̀ bé ea beè boè dõona gbò vaá kpáló va à valí naaá, níà bé ea é bóè ni naa ẽ́. Mm̀ tẽ̀ènè sĩ́deèá, bé e dẹlẹ̀ nyíé boo Jìhóvà naa ólò kpáá agaló tṍó e bugì togó boo gbò nú ea ni náa, gbò nú ea gé náa kátogóí, nè gbò nú ea é náa dì deèsĩ́. Níà nú e Dévìd beè naa ẽ́. Boo tṍó e gé nó gbò nú ea beè kọ́ mm̀ kpá Psalm 56 togó, bugi togó boo bé eo é láá kpáá naa kọọ̀ o gè dẹlẹ nyíé boo Jìhóvà á agaló naa, nè bé eo é láá bé èlbá o síìà pọ̀ naa.

ÉÉ NÍ E JÌHÓVÀ NI NÁA Ẽ́?

5. Éé ní e Dévìd beè bugi togó boo kọbé à láá bé èlbá a síìà pọ̀ ẹ? (Psalm 56:​12, 13)

⁵ Náa kal ló béè kọọ̀ dùm Dévìd beè di kèbá gẹẹ-gẹẹ ló, a beè ká bùlà gbẹẹ́ boo gbò nú e Jìhóvà ni náa. (Bugi Psalm 56:​12, 13.) Níà nú e Dévìd beè olòó naa ẽ́. Dì belí nu dòòmà bá, sìgà tṍó, à ólò bugi togó boo gbò nú e Jìhóvà beè dèm, vaá níí beè naa kọ á nyimá bé e Jìhóvà íe kpóó vaá vùlè gbò nen naa. (Ps. 65:​6-9) Dévìd beè bugi nagé togó boo gbò nú e Jìhóvà ni náa nè dõona gbò. (Ps. 31:19; 37:​25, 26) Vaá a beè bugi nagé togó boo gbò nú e Jìhóvà ni náa nè ẹlẹ. Jìhóvà beè kpènà vaá nvèè bá nè Dévìd lọ̀l gé tṍó ea beè di pá nvín. (Ps. 22:​9, 10) Mm̀ kà kà, ge bugi togó boo gbò nuí beè nvèè bá nè Dévìd kọ á kpáá dẹlẹ nyíé boo Jìhóvà!

6. Éé ní ea é nveè bá nèi kọ é dẹlẹ nyíé boo Jìhóvà tṍó e pọ̀ sííi é?

⁶ Tṍó e pọ̀ síí ni, bĩiná o bá kọọ̀, ‘Éé ní e Jìhóvà ni náa ẽ́?’ Bugi togó boo gbò nú ea beè dèm. Dì belí nu dòòmà bá, tṍó e gé bugi togó boo bé e Jìhóvà ólò ẹ̀b nú  ea kil ló gbò ńnóm nè fàlávà naa​—ea dú gbò nu e náa beè dem mm̀ a bèla, e bà náa ólò fã̀e​—à ólò naa kọ é dẹlẹ nyíé boo kọ àé ẹb nú ea kil ló beele. (Máát. 6:​25-32) Bugi nagé togó boo gbò nú e Jìhóvà ni náa nè pá a gyóòlo. Òé láá nó nú ea kil ló nen ea beè ié agẹ zìgà e Kpá Káí kọ́ nú ea kil ló, àbèè ò bugi nòòtẽ́ ea kil ló gbò gyóòlo Jìhóvà e bà di mm̀ beélè deeí. a Gbá ló vó, bugi togó boo gbò nú e Jìhóvà ni náa ea zógè kọ à gé ẹb nú ea kil ní ló. A beè kolí ni nvee mm̀ kà-kàí naa vàẹ? (Jọ́ọ̀n 6:44) Mósĩ́ deè ní ea beè aalá o tã̀àgã ló? (1 Jọ́ọ̀n 5:14) Mósĩ́ deè ní e ú vààa gyọ́ọ̀ Jíízọ̀s dì ea gé dọ bélè nè ni buù dee é?​—Ẹ́fẹ. 1:7; Híb. 4:​14-16.

7. Mósĩ́ deè ní e nú e neǹ kọ́ọ̀ bùlà Bàrì Dániẹ̀l beè tení bá beè nvèè bá nè Vanessa kọ á láá bé èlbá a síìà pọ̀ ẹ?

⁷ Vanessa, b ea dú ene kà vígà pábia ea ólò tõó Haiti, beè kpeesĩ́ ló tã̀àgã̀ ea beè palàge siimàe pọ̀. Ene kà gbálà ea di ba bon beè olòó kolíe, lẹ̀ẹ̀là tóm máe buù dee, vaá tãagẽ́e kọ á maèé ló. Sõò, Vanessa náa beè zìgà. Vó beè naa kọọ̀ gbálàí á palàge nvèè súng vaá noo gè síe pọ́lọ́. Vanessa kọ́ọ̀, “Pọ̀ beè palàge siím.” Mósĩ́ deè ní ea beè láá bé èlbá a síìà pọ̀ẹ? A beè pììgà bé ea kpóó sim tùlà naa gè kpènà a bá. Enè neǹ kànen beè nvèè bá nèe naa ní ea kpẹá belí nè kpóó ea gé bẹl. Vígà pábiaí beè kà nágé bùlà gbẹẹ́ boo bé e Jìhóvà beè kpènà pá a gyóòlo tṍó ea kil nvéeá naa. Vanessa kọ́ọ̀, “Túá kà nen em beè bugi togó boo dú neǹ kọ́ọ̀ bùlà Bàrì Dániẹ̀l. Náa kal ló béè kọọ̀ náa beè sí tọ́ọ̀ kà pọ́lọ́, ba beè tobvíe tẹlẹ mm̀ bànà kpẹẹ̀, vaá tá kói géè tá ló gbò kpẹẹ̀ ea di m. Sõò Jìhóvà beè ẹ̀b nú ea kilíé ló. M beè tãagã ló Jìhóvà vaá tú dénè nu gbẹẹ́ bá. Tṍó em ni náa vó lọ̀l, pọ̀ náa beè sii nám.”​—Dán. 6:​12-22.

ÉÉ NÍ E JÌHÓVÀ DÌ EA GÉ NÁA KÁTOGÓÍ É?

8. Éé ní e Dévìd beè agala boo é? (Psalm 56:8)

⁸ Náa kal ló béè kọọ̀ dùm Dévìd beè bã kèbá gẹẹ-gẹẹ ló gbẹá Gáàt, náa beè ká bùlà gbẹẹ́ boo a síìà pọ̀. Sõò, a beè olòó bugi togó boo gbò nú e Jìhóvà gé náa nèe kà lèlà tṍóá. Dévìd beè nyimá kọọ̀ Jìhóvà ní ea gé kpènàèe vaá tulèèe é, vaá à dã́ ból ló bé e nu tọ́àẹ̀ẹ́ ló naa. (Bugi Psalm 56:8.) Dévìd beè íe nágé nvèè bá ea aa bá pá a kóò e bà vulèe, dì belí Jónatàn nè pọ̀b neǹ vààla gyọ́ọ ea bée kọlà Àhímelẹ̀k. (1 Sám. 20:​41, 42; 21:​6, 8, 9) Náa kal ló béè kọọ̀ Méné Sọ́ọ̀l beè gbĩ́ gè fẹ́ẹ, a beè teelá ààẹ́ bá. Dévìd beè agala boo kọọ̀ Jìhóvà palàge nyimá dénè tã̀àgã̀ ea gé ténìè bá vaá dã́ ból ló bé e gbò tã̀àgã̀í tọ́àẹ̀ẹ́ ló naa.

9. Éé ní e Jìhóvà nyímá ea kil ló buù bẹ̀ì e?

⁹ Tṍó e tã̀àgã̀ eo gé téní bá náa kọ pọ̀ á sií ni, kẽea boo kọọ̀ Jìhóvà nyimá íb tã̀àgã̀ eo gé téní bá nè bé ea tọ́a ní ló naa. Dì belí nu dòòmà bá, níì áá pọ́lọ́ bá e bà géè sẹ̀ẹ̀mà pá Ízràẹ̀l gbẹá Íjèpt ní e Jìhóvà beè nyimáé nì, a beè nyimá nágé íb “nyãa ló e bà gé téní bá.” (Ẹ́xọ. 3:7) Dévìd beè ọlí sọ́l kọọ̀ Jìhóvà monìè a “bíígá ló” nè íb “agẹbá tã̀àgã̀” ea gé ténìè bá. (Ps. 31:7) Tṍó e gbò níí Bàrì mon tã̀àgã̀, “nyíée beè bììlà”​—kọbèè tṍó e ba beè mòn tã̀àgã̀ boo béè ba pọ́lọ́ béèlàfùl. (Àìz. 63:9) Tṍó e pọ̀ síí ni, Jìhóvà dã́ ból  ló bé e nu tọ́a ní ló naa, vaá à di kpènà ló gè nvèè bá nè ni kọbé ò láá bé èlbá o síìà pọ̀.

10. Éé ní ea náa vaá ò agala boo kọọ̀ Jìhóvà ólò ẹ̀b nú ea kil ní ló vaá àé nveè bá nè ni kọ ó láá emá kọ̀láá íb tã̀àgã̀ eo kpeèsĩ́ ló é?

¹⁰ Be ò gé téní bá tã̀àgã̀ ea palàge agabá, àé láá tàvàlà ní ló gè mòn bé e Jìhóvà gé nveè bá nè ni naa. Vóà naa, bànie kọ á naa kọ ó mòn bé ea gé nveè bá nè ni naa. (2 Kíǹ. 6:​15-17) Tṍó eo ni náa vó lọ̀l, bĩiná o bá kọọ̀: É kọ à íe lòbèl àbèè ààla bel ea ni síè ni kpóó ló gbẹá nònù? É kọ à íe ene kà bẹẹ kpá, vídiò, àbèè ãa sọ́l ea ni síè ni kpóó ló? É kọ à íe nen ea beè ló bel àbèè ge bugi dọ̀ Kpá Káí ea beè naa kọọ̀ lóó ni á àgà? Gbò bel sìà kpóó ló ea aa mm̀ Kpá Káí nè nvèè bá ea aa bá pá vígà é láá vàlẹ̀bá táí nyíe. Sõò gbò nuí dú kele íb dõ̀ònù ea aa bá Jìhóvà. (Àìz. 65:13; Máàk 10:​29, 30) Dénè nuí zógè kọọ̀ Jìhóvà ólò ẹ̀b nú ea kil ní ló. (Àìz. 49:​14-16) Vaá à bọ́ló kọ ó dẹlẹ́ẹ nyíé boo.

11. Éé ní ea beè nvèè bá nè Aida kọ á láá bé èlbá a síìà pọ̀ ẹ?

¹¹ Aida, ea ólò tõó Senegal, beè mòn bé e Jìhóvà beè nvèè bá nèe naa. Boo béè kọọ̀ ẹlẹ ní ea dú túá sĩ́ nvín ea di ba tọẹ́, a tẹ̀ nè a kà beè ẹ̀bmà dẽe kọọ̀ á gbĩ́ gã́bug kpègè kọbé à láá ẹ̀bvìè nú ea kilìè vá ló. Sõò vígà pábiaí beè tõó dùm ea valí bá kọbé à láá dú neǹ gyà deèsĩ́ tóm kọ̀ kpẹ̀a dénè tṍó, vaá níí beè naa kọọ̀ Aida á gá íe gã́bug kpègè. Pá ba tọ beè nvèèe súng ló vaá gbẹ́ẹ. Vígàí kọ́ọ̀, “Pọ̀ beè siím kọ ním é láá nvèè bá nè ńdáà tè nè ńdáà kà nè ge kọọ̀ kọ̀láá nen é kiním. M beè bẽgẽ̀ bel Jìhóvà kọ à sọtọ́ deè kọ nu á tàvàlàḿ ló.” Sìgà dee aa ló tṍóá, vígà pábiaí beè pãane tṍ ló lòbèl ea síèe kpóó ló gbẹá nònù. À kọ́ọ̀, “Nen ea géè nè lòbèla beè kẽeí nyíee kọọ̀ Jìhóvà nyímá kọ̀láá kà nú ea gé tãagẽ́i bùlà. Tení dú ló nvèè bá ea aa bá gbò kànen nè pá vígà, m beè gbóó kpáá nyimá kọọ̀ Jìhóvà vulèm. M beè dààmà togó gè tãagã ló Jìhóvà vaá agala boo kọọ̀ àé áálá nà tã̀àgã ló, vaá lóóm beè dĩ̀ìnà tṍó em monì kọ à áálá nà tãagã ló.” Tṍó e tṍó téní, Aida beè gbóó ié tóm ea náa kọ á kilsĩ́ gè dú neǹ gyà deèsĩ́ tóm kọ̀ kpẹa vaá láá ẹ̀b nú ea kil ló pá ba tọ nè  dõona gbò. À kpáá kọọ̀, “Gbò nú em beè tení báí a náa kọ ḿ dẹlẹ nyíé boo Jìhóvà lọl mm̀ dénè nà nyíe. Kátogóí, kọ̀láá tṍó e pọ̀ síím vaá m̀ tãagã ló Bàrì, pọ̀ náa ólò sii nám.”

ÉÉ NÍ E JÌHÓVÀ É NÁA DÌ DEÈSĨ́ Ẽ́?

12. Dẹ̀ẹ̀a boo nú ea di mm̀ kpá Psalm 56:​9, éé ní e Dévìd beè dẹlẹ nyíé boo é?

¹² Bugi Psalm 56:9. Nakà dọ̀ Kpá Káíí kọ́ nágé dõona sĩ́deè e Dévìd beè bé èlbá a síià pọ̀. Náa kal ló béè kọọ̀ a dùm beè di kèbá gẹẹ-gẹẹ ló, a beè bugi togó boo nú e Jìhóvà é beè naa nèe. Dévìd beè nyimá kọọ̀ Jìhóvà é duulàẹ̀ẹ kà lèlà tṍó ea bọ́ló, boo béè kọọ̀ Jìhóvà ní ea beè ièe bá ló naamá méné ea é bẹl Ízràẹ̀l ẹ. (1 Sám. 16:​1, 13) Dévìd ólò dẹlẹ nyíé boo kọọ̀ kọ̀láá kà nú e Jìhóvà zigà é nááá.

13. Éé ní e agàlà boo kọọ̀ Jìhóvà é náa ẽ́?

¹³ Éé ní e Jìhóvà ni zigà nè ni ẽ́? Née é ẹbmà dẽe kọ á dùùlài lọl bá kọ̀láá kà tã̀àgã̀. c Sõò, Jìhóvà é náa kọọ̀ kọ̀láá kà tã̀àgã̀ e kpeèsĩ́ ló mm̀ nakà bàlà booí á iná kùbmà mm̀ ãa bàlà boo. (Àìz. 25:​7-9) Bẹẹ neǹ dèmnù íe kpóó gè kẽee gbò e ba beè ù, bó dénè bẹẹ zọ̀ló, vaá kyọ̀sĩ́ gbò e bà gé náa uuí boo.​—1 Jọ́ọ̀n 4:4.

14. Éé ní eé láá bugi togó boo é?

¹⁴ Tṍó e pọ̀ síí ni, bugi togó boo gbò nú e Jìhóvà é náa dì deèsĩ́. Dòòmà dẽe ló bé ea é tọ́a ní ló naa tṍó e Sétàn náa é di nà, tṍó e áá gbò lé lab dògò ní e bàé dié, nè tṍó e gbò nen é gbóó dààmà togó gè gbõoma. Ene kà nu gè ẹ̀b ea beè di mm̀ pọ̀bkà bõ̀ònaló ea beè sẹẹa mm̀ gbáá 2014 a, beè zogè bé eé láá bugi togó boo bẹẹ ból dẽesĩ́ naa. À íe tẹ̀ ea géè zọ̀ pá a tọ loá bel boo bé e gbò bel ea di mm̀ 2 Tímotì 3:​1-5 é nyááá naa, be bà tú loomá bel kilma ló Páradaìs, à kọ́ọ̀: “Mm̀ ãa bàlà booá, ẹ́ẹ́-ẹẹ̀ nyíe é di. Gbò nen é vulè ene, vaá vùlè kà-kà bel ea di mm̀ Kpá Káí. Bàé náa nú e ba kpóó sim tùlà, bàé kìlmà kpá ló kẽ, vaá lèèlà Bàrì. Bàé gbantṍ ló ba tẹ̀ nè ba kà, bàé íè dùm ṍà zaa, vaá bọ́ló dẹ̀lẹ̀ nyíé boo. Bàé palàge vùlè pá ba tọ, vaá láá zọ̀ nen naaá nu. Bàé ló lé bel ea kil ló dõòna gbò, vaá láá lẹ̀ẹ̀là bel ló ba bá, bàé dú gbọ́ọ́-gbọọ̀ ló. Bàé vulè nu ea dú lé, vaá nen é láá dẹlẹ́ va nyíé boo. Bà náa é náa áá nú e baala kọ́, bàé kilmà bùlà kẽ. Bàé vulè Bàrì èlmà kpéè ló vaá ié tàn nyòòmà gè fã̀ áá Bàrì; tõo bã ló íb gbò e bà dì naa vó.” É kọ ò ólò zọ̀ pá o tọ àbèè pá vígà loá bel kilma ló bé e dùm é meà naá gbẹá mm̀ ãa bàlà boo?

15. Náa kal ló béè kọọ̀ pọ̀ beè sii Tanja, éé ní ea beè nvèè bá nèe kọ á láá bé èlbá a síìà pọ̀ ẹ?

¹⁵ Ene kà vígà pábia ea bée kọlà Tanja, ea ólò tõó North Macedonia, beè bé èlbá a síìà pọ̀ tení dú ló gè bugi togó boo gbò tã́áná dee bá ea é íé dì deèsĩ́. A tẹ̀ nè a kà beè palàge naa uué boo, boo béè kọ à nó Kpá Káí. Tanja kọ́ọ̀: “Sìgà nu e pọ̀ ólò siím ló kọ àé nááá ólò naaá. Ńdáà kà ólò bòmim kọ̀láá dee em síì nònù. Ba beè kọ bàé fẹ́ẹ̀m be m̀ dú enè Neǹ Ditõ̀ò Jìhóvà.” Dee deè nvée, ba beè kpó Tanja lọl tọ. Éé ní e vígà pábiaí beè naa ẽ́? À kọ́ọ̀: “M beè ká bùlà gbẹẹ́ boo bé e nyíém é beè ẹẹ gbẹá mm̀ ãa bàlà booá naa, be m̀ kilsĩ́ gè bọ́ló dẹ̀lẹ̀ nyíé boo. M beè bugi nagé togó boo gbò tã́áná dee bá e Jìhóvà é ném gbẹá mm̀ ãa bàlà booá ló gbò nú ea peèm kátogóí, nè gè kọọ̀ dénè pọ́lọ́ nú ea beè naaáí é beè táḿ nyíe.” Mm̀ kà-kà,  Tanja beè kilsĩ́ gè bọ́ló dẹ̀lẹ̀ nyíé boo. Vaá tení dú ló nvèè bá ea aa bá Jìhóvà, a beè mòn tọ ea tõó m. Kátogóí, Tanja a íá dóm, vaá a dóm ea bọ́ló dẹ̀lẹ̀ nyíé booí nè ẹ̀ẹ̀ gé tú ẹ́ẹ́-ẹẹ̀ nyíe siimá tóm dénè tṍó.

NAA KỌỌ̀ BÉ EO DẸLẸ̀ NYÍÉ BOO JÌHÓVÀ NAA Á KPÁÁ AGALÓ

16. Éé ní ea é nveè bá nèi kọ é ié agẹló tṍó e gbò kọ́ọ̀ bùlà Bàrì ea di mm̀ kpá Lúùk 21:​26-28 é ḿḿ-má ẽ́?

¹⁶ Mm̀ tṍó pọ̀b kpo tã̀àgã̀, “gbò nen é gbaàa bá pọ̀.” Sõò gbò níí Bàrì é kilsĩ́ gè elá agàlà vaá íe agẹló. (Bugi Lúùk 21:​26-28.) Éé ní ea náa vaá pọ̀ náa é sííi é? Boo béè kọ e beè nó gè dẹlẹ nyíé boo Jìhóvà. Tanja, e beè kọ́ nú ea kil lóá kọ́ọ̀, gbò nú ea beè tenìè bá dì ea gé nveenìè bá neèe kọ á láá emàè gbò tã̀àgã̀ ea gé nááá kátogóí. À kọ́ nágé kọọ̀, “M dã́ ból kọọ̀ Jìhóvà é láá nvèè bá nèi kèbá kọ̀láá kà dìtõ̀ò e ténì bá vaá tãanèi dee bá. Sìgà tṍó, à ólò belí kọọ̀ dõona gbò ní e bà gé lẹẹlà bel ló nú ea gé nááá ẽ́, sõò, kà-kà bel ea dì dú gè kọọ̀ Jìhóvà íe kpóó gè lẹ̀ẹ̀mà bel ló dìtõ̀ò èl va. Náa kal ló béè kọọ̀ tã̀àgã̀ e gé téní bá é láá palàge agabá, àé beè iná kùbmà.”

17. Mósĩ́ deè ní e togó bel gbáá 2024 é nveè bá nèi ẽ́? (Ẹ̀b fòtó ea di boo kóó kpáí.)

¹⁷ Deè nieí, pọ̀ ólò láá sii kọ̀láá nen. Sõò dì belí Dévìd, née é zigà kọọ̀ pọ̀ á lẹ̀ẹ̀lài bel ló. Bẹẹ togó bel gbáá 2024 fáálá tã̀àgã ló Bàrì e Dévìd beè tã̀àgã̀, ea kọ́ọ̀: “Tṍó e pọ̀ síím, m̀ ólò dẹlẹ́ ni nyíé boo.” (Ps. 56:3) Dì belí bé e ene kà kpá ea baatẽ́ nakà dọ̀ Kpá Káíí tẹ́lẹ bàlà kẽ naa, Dévìd “náa beè olòó bugi togó boo gbò nú ea gé síìmàe pọ̀, àbèè ge ká dẽe gbẹẹ́ boo gbò tã̀àgã̀ ea gé téní bá, sõò a beè ká dẽe gbẹẹ́ boo Neǹ Dùùà ea é duulàẹ.” Olòó bugi togó boo togó bel gbááí mm̀ gbò ẽ́ ea é dú sĩ́, èlmà tõ̀ò tṍó eo gé téní bá gbò tã̀àgã̀ ea síìmà ni pọ̀. Noo tṍó bùgmà togó boo gbò nú e Jìhóvà beè naa tṍó ea kil nvéeá, gbò nù ea gé náa kátogóí, nè gbò nù ea é náa dì deèsĩ́. Tṍóá, òé gbóó láá zọ̀ Dévìd kọọ̀: “Nda dẹlẹ̀ nyíé boo Bàrì; pọ̀ náa é síím.”​—Ps. 56:4.