1-2. Mókà gbò nu ànà-ànà ní e gbò gyóòlo Jìhóvà e bà bọ́ló dẹ̀lẹ̀ nyíé boo ólò kpeesĩ́ ló é?

 PỌ́LỌ́ nu ea náaí ló é láá nyaaná zivekà bẹẹ dùm tṍó e née géè ẹ̀bmà dẽe. Dì belí nu dòòmà bá, kà pọ́lọ́ íb cancer e náa ólò dõogẽ bã ló nen beè bã ló ene kà vígà págbálà ea ólò tú gè fã̀ Bàrì kolmá nu, ea bée kọlà Luis. a Neǹ dóm biè beè kọ́ nèe kọọ̀ náa é tõo ná dùm gã́bug ẽ́. Monika nè a dóm beè dì e bà géè sí gã́bug tóm mm̀ bõ̀ònatõ̀ò. À íe dee e Monika beè gbóó nyimá kọọ̀ a dóm géè gũá sí pọ́lọ́ mm̀ gã́bug gbáá. Ene kà vígà pábia ea bée kọlà Olivia, ea gáà ia dóm, beè teelá aa a be boo béè búùló kyọ̀àsĩ́ nu. Tṍó ea ooà kẽ, a beè mòn kọọ̀ búùló kyọ̀àsĩ́ nuá beè kyọ̀sĩ́ a tọ. Mm̀ bùló, dùm dénè gbò e kólì béeí beè nyaaá mm̀ pọ́ì ńkpulu dẽè tṍó. É kọọ̀ o beè mòn nen e íb tã̀àgã̀í nááá ló? É kọ à íe pọ́lọ́ nu ea ni náa kọọ̀ zivèkà o dùm á nyaaá?

² Náa kal ló béè kọọ̀ è gé fã̀ Jìhóvà mm̀ bọ́ọ̀ló dẹ̀lẹ̀ nyíé boo, è ólò tení bá tàvàlà dìtõ̀ò nè zọ̀ló e dõona gbò gé tení bá. È ólò tení nágé bá nàà uú boo nè bíígá ló. Náa kal ló béè kọọ̀ Jìhóvà náa ólò uúi lọl bá gbò dìtõ̀òí, à zigà kọ àé nveenìè bá neèi. (Àìz. 41:10) Tení dú ló a nvèè bá, èé láá kilsĩ́ gè ié ẹ́ẹ́-ẹẹ̀ nyíe, nè lé béèlàfùl, vaá bọ́lò dẹ̀lẹ̀ nyíé boo bã̀àna tṍó e di kèbá tàvàlà dìtõ̀ò. Mm̀ nakà togó belí, èé ló bel boo ténì sĩ́deè e Jìhóvà ólò nvèèmà bá nèi tṍó e di kèbá tàvàlà dìtõ̀ò. Èé ló nágé bel boo nú ea dú  bíi kọ é naa kọbé è íe bélè lọl ló nvèè bá ea aa bá Jìhóvà.

JÌHÓVÀ É KPENÀ NI

3. Tṍó e gé téní bá agẹbá tã̀àgã̀, éé ní ea é láá tàvàlàí ló gè naa ẽ́?

³ Ànà-ànà e ólò kpeesĩ́ ló. À ólò tàvàlàí ló gè bugi togó leevè vaá nè lé béèlàfùl tṍó e gé téní bá agẹbá tã̀àgã̀. Ló éé? Boo béè kọọ̀ è di mm̀ bììla nyíe vaá è dì nàgé kèbá tã̀àgã̀ bùlà. Àé láá belí kọ è gé dõogẽ kyã̀à e bè née nyímà kĩée e gé kil. Nvèè kpíi ló bé e tã̀àgã̀ beè tọá ló pálaa kà vígà pábia e beè zẹ́ẹ́ kọ́ nú ea kil lóá naa. Olivia kọ́ọ̀, “Tṍó e búùló kyọ̀àsĩ́ nuá ni kyọsĩ́ nà tọ lọ̀l, pọ̀ beè palàge siím vaá ním beè nyimá nu gè naa.” Kilma ló pọ́lọ́ e dóm Monika beè sìa, Monika kọ́ọ̀: “Nyíem beè palàge bììlà. A beè zọ̀m belí kọ bà tú gẹ̀ kùùmàm. Ním beè ié ná lóó gè naamá gbò nú em beè olòó naa. Ním beè nyimá kọọ̀ íb nuí é láá naaám ló.” Mósĩ́ deè ní e Jìhóvà ólò nvèè bá nèi tṍó e pọ̀ sííi é?

4. Dẹẹa boo nú ea di mm̀ kpá Fílipaì 4:​6, 7, éé ní e Jìhóvà zigà kọ àé náànìè neèi ẽ́?

⁴ Nú e Jìhóvà ólò naa. À zigà kọ àé neèi nú e Kpá Káí kólíe “fẹ́ẹ́-fẹẹ̀ ló Bàrì.” (Bugi Fílipaì 4:​6, 7.) Nakà fẹ́ẹ́-fẹẹ̀ lóí gé loá bel nyòòmà dĩ̀ìnè ló bùlà e ólò ié boo béè kọọ̀ è íè kà lé gbaa ló kilma ló Jìhóvà. Nakà fẹ́ẹ́-fẹẹ̀ ló ‘e gbò nen náa é láá dã́ ból lóí’; palàge bọọ èlmà kọ̀láá kà nu eé láá bugi togó boo. É kọ o beè láá íe dĩ̀ìnè ló bùlà tṍó eo ni tú agẹbá tãàma ló Jìhóvà lọ̀l? Dĩ̀ìnè ló bùlà eo íèa níà “fẹ́ẹ́-fẹẹ̀ ló Bàrì.”

5. Mósĩ́ deè ní e fẹ́ẹ́-fẹẹ̀ ló ea aa bá Bàrì ólò kpènà bẹẹ nyíe nè bẹẹ bùlà ẹ?

⁵ Tẽ̀ènè kà gã́belá kọ́ nágé kọọ̀ fẹ́ẹ́-fẹẹ̀ ló ea aa bá Bàrì “é kubmà” àbèè ge kpènà “bọọ nyíe nè bọọ bùlà.” Moǹ bel ea kọlà gè “kubmà” dú bel e gbò bé ólò lò, vaá à ólò loá bel nyòòmà gbò bé e bà ólò kpènà pọ̀b bon kọbé tọ́ọ̀ nu náa nááá ló gbò e bà di m. Gbò e bà di mm̀ pọ̀b boná ólò daá mm̀ fẹ́ẹ́-fẹẹ̀ ló boo béè kọ bà nyímá kọọ̀ gbò bé di gã́ gbànsĩ́ boná e bà gé kudẽe ló. Mm̀ tẽ̀ènè sĩ́deèá, tṍó e fẹ́ẹ́-fẹẹ̀ ló ea aa bá Bàrì kpènà bẹẹ nyíe, lóói ólò dĩ̀ìnà, boo béè kọ è nyímà kọọ̀ è íè kpènà. (Ps. 4:8) Dì belí Hánà, kọbèè bẹẹ dìtõ̀ò náa gbẹá boo nyaaá, èé láá íe dĩ̀ìnè ló bùlà. (1 Sám. 1:​16-18) Vaá tṍó e íè dĩ̀ìnè ló bùlà, àé valií ló gè bugi togó leevè vaá nè lé béèlàfùl.

6. Éé ní eé náa kọbé è láá ié fẹ́ẹ́-fẹẹ̀ ló ea aa bá Bàrì e? (Ẹ̀b nàgé fòtó.)

⁶ Nú ea dú bíi kọ é naa. Tṍó eo di kèbá tàvàlà dìtõ̀ò, bàn Jìhóvà kọ á kuè ni dẽe  ló. Mósĩ́ deè e? Tãagã ló Bàrì dọ̀ọ̀mà tṍó eo é íe fẹ́ẹ́-fẹẹ̀ ló ea aàẹ́ bá. (Lúùk 11:9; 1 Tẹ̀s. 5:17) Luis, e beè zẹ́ẹ́ kọ́ nú ea kil lóá baatẽ́ nú ea vaà Ana nè ẹ̀ẹ̀ beè naa tṍó e bà nyímá kọọ̀ gbálà ńkem̀ ẽ́ ní ea é tõomàè dùm ẽ. À kọ́ọ̀: “Tṍó e dìtõ̀ò meà naaí, à ólò tàvàlà gè nè béèlàfùl kilma ló íb bóa e nen é tú àbèè dõona kà nu ea dú bíi. Sõò, tã̀àgã̀ ló Bàrì ólò naa kọ é ié fẹ́ẹ́-fẹẹ̀ ló gbẹá kèbá tàvàlà dìtõ̀ò.” Luis nè a va kọ́ọ̀ bà ólò tãagã̀è ló Bàrì gã́bug tṍó vaá bàn kọọ̀ Jìhóvà á neè vaa dĩ̀ìnè ló bùlà, nè nyìmànù kọbé bà láá neè lé béèlàfùl. Vaá baa mon bé e Jìhóvà áálá ba tã̀àgã ló naa. Be ò gé téní bá tàvàlà dìtõ̀ò, kilsĩ́ gè tãagã ló Bàrì. Be ò náa vó, òé mon kọọ̀ fẹ́ẹ́-fẹẹ̀ ló ea aa bá Jìhóvà é kpenà ni, vaá naa kọ ó ié dĩ̀ìnè ló bùlà.​—Róm̀ 12:12.

JÌHÓVÀ É NÉ NI AGẸLÓ

7. Agẹbá tã̀àgã̀ ólò tọáí ló naa vàẹ?

⁷ Ànà-ànà e ólò kpeesĩ́ ló. Tṍó e gé téní bá tã̀àgã̀, àé láá tàvàlàí ló ge bugi togó, labví láb, vaá naa nù boo bá ea bọ́ló. Àé láá belí kọọ̀ è aà bá enè íb tã̀àgã̀ bã bá ńdõona kà. Ana e beè zẹ́ẹ́ kọ́ nú ea kil lóá kọ́ọ̀, a beè olòó ièè kele-kele íb tã̀àgã̀ bùlà lọ̀l gé tṍó ea dóm beè ù. À kọ́ọ̀: “Tṍó ea tõoḿ ló kọ ḿ gé ló tọ́ọ̀ nu, m̀ ólò dú ńsàn nyíè nà bá. Sìgà tṍó m̀ ólò bã̀ súng kọ á gé ná.” Bọọ èlmà vó, à ólò tõó ló Ana kọ à dúè áá ẹ̀ẹ̀ vaá à ólò tàvàlàẹ́ ló gè nè béèlàfùl boo gbò nú e Luis beè olòó naa. Sìgà tṍó, à ólò tõoé ló belí kọ à diè sĩ́ pene e bá kpóó fọ́ọ́lọ́ gé ulà. Mósĩ́ deè ní e Jìhóvà ólò nvèè bá nèi tṍó e tã̀àgã̀ bùlà elíi ló é?

8. Dẹẹa boo nú ea di mm̀ kpá Àìzáíà 33:​6, éé ní e Jìhóvà zigà kọ àé náànìè neèi ẽ́?

⁸ Nú e Jìhóvà ólò naa. À zigà kọ àé neèi agẹló. (Bugi Àìzáíà 33:6.) Tṍó e bá kpóó fọ́ọ́lọ́ ula sĩ́ pene, àé láá maaná mìàlo kilma kĩée ea dú gẹẹ-gẹẹ ló. Gã́bug mìàlo ólò ié báà kpọ́gọ́lọ́ ea di pálaà bá e bà ólò eelá tẹlẹ múú, kọbé bá kpóó fọ́ọ́lọ́ náa láà tãa bá mìàloá kilma kọ̀láá kĩée ea léémáe. Gbò báà kpọ́gọ́lọ́á ólò naa kọọ̀ mìàloá á gá bọọgẹ̀ zùgà, kọbé gbò e bà di m íé dĩ̀ìnè ló bùlà vaá bà faà náa é díi. Náa kal ló béè vó, gbò báà kpọ́gọ́lọ́í ólò siá tóm leevè tṍó e mìàlóí di boo tee. Mm̀ tẽ̀ènè sĩ́deèá, Jìhóvà é neí agẹló tṍó e kilsĩ́ gè bọ́ló dẹ̀lẹ̀ nyíé boo kèbá gbò tã̀àgã̀ e gé téní bá.

9. Mósĩ́ deè ní e gbò nu gè gbĩimátẽ́ ló nu e bõ̀ònatõ̀òí ni náa é láá nvèè bá nèi ẽ́? (Ẹ̀b nàgé fòtó.)

⁹ Nú ea dú bíi kọ é naa. Tṍó eo di  kèbá agẹbá tã̀àgã̀ bùlà, piiga boo gè olòó tãagã ló Bàrì, sí nònù, vaá kọ́ kpea. Mm̀ kà-kà, be à sẹlẹ nóò é láá naa gbò nuí belí bé eo gáẹ̀ beè naa naa, sõò kẽea boo kọọ̀ Jìhóvà dã́ból ló o dìtõ̀ò. (Doolé ló Lúùk 21:​1-4.) Gbáló vó, olòó noo tṍó eo é nóómá Kpá Káí boo o lóó vaá o bugi togó boo nú eo nóò. Ló éé? Boo béè kọọ̀ Jìhóvà a néi gbò kpá nè vídiò ea é nvèè bá nèi kọ é láá ĩ̀ìmà vaá ié agẹló kèbá gbò tã̀àgã̀ e gé téní bá. Kọbé ò láá mòn gbò togó bel eo íè bíi ló, tú gbò nu gè gbĩimátẽ́ ló nu ea di mm̀ bọọ dém bel gbĩimá, dì belí JW Library^® app, Watch Tower Publications Index, nè Research Guide for Jehovah’s Witnesses. Monika e beè zẹ́ẹ́ kọ́ nu ea kil lóá kọ́ọ̀, à ólò tuè bẹẹ gbò kpá gbĩimátẽ́ ló dùùlà bá deè tṍ ea dúèe bíi ló kọ̀láá tṍó ea íèè tã̀àgã̀ bùlà. Dì belí nu dòòmà bá, à beè gbĩ́tẽ́ ló moǹ bel ea kọlà “súng.” Sìgà tṍó, à ólò gbĩ́tẽ́ ló nú ea kil ló gè “kẹlẹ nen” àbèè ge “bọ́ló dẹ̀lẹ̀ nyíé boo.” Tṍóá, à ólò gbóó bugi kọ̀láá kà togó bel ea mon dọ̀ọ̀mà tṍó ea é ié dĩ̀ìnè ló bùlà. À kọ́ nágé kọọ̀: “Tṍó em gbĩ́ì tẽ́ ló nuí, ním ólò ié ná tã̀àgã̀ bùlà vaá à ólò belí kọọ̀ Jìhóvà piilàm bá ló. Tṍóo em bugì gbò nuí, m ólò gbóó nyimá kọọ̀ Jìhóvà dã́ból ló dénè bé e nu tọ́a ḿ ló naa, vaá à gé nvèè bá nèm.” Nvèè bá ea aa bá Jìhóvà é láá nvèè nàgé bá nè olo dọ̀ọ̀mà tṍó eo é ié dĩ̀ìnè ló bùlà.​—Ps. 119:​143, 144.

JÌHÓVÀ É NVEÈ BÁ NÈ NI

10. À ólò tọáí naa vàẹ tṍó e kà agẹbá pọ́lọ́ nu nááaí ló é?

¹⁰ Ànà-ànà e ólò kpeesĩ́ ló. À íe sìgà dee e nyíéi ólò bììlà vaá lóói ólò palàge ọọ boo béè kà agẹbá pọ́lọ́ nu ea náaí ló. Èé láá belí nen ea ólò palàge teelá tee e kom bã́é ló vaá à gbóó kyã̀à igálá. Àé láá tàvàlàí ló gè sí gbò tóm e beè olòó sì, àbèè kọọ̀ náa é taníi gè naa gbò nú ea ólò leemái. Dì belí Èláíjà, àé láá tàvàlàí ló gè aa boo, vaá áá dáá ní ea é bã́í dẽe ẽ́. (1 Kíǹ. 19:​5-7) Éé ní e Jìhóvà zigà kọ àé naanìè tṍó e lóói ọọ ẹ́?

11. Mókà dõona kà sĩ́deè ní e Jìhóvà ólò nvèèmà bá nèi ẽ́? (Psalm 94:18)

¹¹ Nú e Jìhóvà ólò naa. À zigà kọ àé nveenìè bá neèi. (Bugi Psalm 94:18.) Dì belí bé e nen ea ólò teelá tee e kom beè bã̀é lóá ólò ié bíi ló nvèè bá kọbé à láá kyã̀à naaá, níá bé beele é láá ié nágé  bíi ló nvèè bá kọbé è láá kilsĩ́ gè sí tóm nè Jìhóvà naa ẽ́. Kọ̀láá tṍó e dìtõ̀ò meà naa vó, Jìhóvà zigà nèi kọọ̀: “Ndá Jìhóvà o Bàrì, gé síí ni bá ló bálè, vaá kọ́ nè ni kọọ̀, ‘Pọ̀ á gá sií ni. Nda é nveè bá nè ni.’” (Àìz. 41:13) Méné Dévìd beè mòn bé e Jìhóvà beè nvèè bá nèe naa. Tṍó ea beè kpeesĩ́ ló tã̀àgã̀ nè dò ẹ̀b ea aa bá pá a gbò ọ́b, a beè kọ́ nè Jìhóvà kọọ̀: “O bálè ní ea gé nvèè bá nèm ẽ́.” (Ps. 18:35) Sõò mósĩ́ deè ní e Jìhóvà ólò nvèè bá nèi ẽ́?

12. Jìhóvà é láá tú bà mée nvèèmà bá nèi tṍó e lóói ọọ ẹ́?

¹² Gã́bug tṍó Jìhóvà ólò tú dõona gbò nvèèmà bá nèi. Dì belí nu dòòmà bá, tṍó e lóó Dévìd beè ọọ, a kóò Jónatàn beè kãáe vaá ló bel ea é síèe kpóó ló nèe. (1 Sám. 23:​16, 17) Mm̀ tẽ̀ènè sĩ́deèá, Jìhóvà beè sà Èláíshà kọ á nvèè bá nè Èláíjà. (1 Kíǹ. 19:​16, 21; 2 Kíǹ. 2:2) Deè nieí, Jìhóvà ólò tú pá bẹẹ tọ, pá kóò, àbèè gbò kànen nvèèmà bá nèi. Sõò, tṍó e nyíéi biilà, à ólò tànii gè kpòòlà lóó lọl zẹ̀ẹ̀ gbò nen. À ólò tànii kọ á dú áá bẹ̀ì. Níà nú ea ólò naaá ló gbò nen. Éé ní eé láá naa kọbé è íe nvèè bá ea aa bá Jìhóvà ẹ?

13. Éé ní ea dú bíi kọ é naa kọbé è láá ié bélè lọl ló nvèè bá ea aa bá Jìhóvà ẹ? (Ẹ̀b nàgé fòtó.)

¹³ Nú ea dú bíi kọ é naa. Pììgà boo gè bé tàn ge kpòòlà o lóó lọl zẹ̀ẹ̀ gbò nen lọa m. Tṍó e kpoolà lóó lọl zẹ̀ẹ̀ gbò nen, à ólò naa kọ é bugi togó boo áá bẹẹ bá nè gbò tã̀àgã̀ e gé téní bá. Ge bugi togó naa vó, ólò naa kọ é gá nè lé béèlàfùl. (Pró. 18:1) Mm̀ kà-kà, à íe sìgà tṍó ea bọ́ló kọ á dú áá bẹ̀ì, bọọ èlmà tõ̀ò tṍó e ténì bá kà agẹbá dìtõ̀ò. Náa kal ló béè vó, be è kpoolà lóó lọl zẹ̀ẹ̀ gbò nen mm̀ kà gã́bug tṍó, àé belí kọ è kìn gbò e Jìhóvà gé tú nvèèmà bá nèi. Vóà naa, kọ̀láá bé e gè naa vó é tavàlà ní ló naa, piiga boo gè tú nvèè bá ea aa bá pá bọọ tọ, pá kóò, nè gbò kànen mm̀ bõ̀ònatõ̀ò. Ẹ̀b va naamá gbò e Jìhóvà gé tú nvèèmà bá nè ni.​—Pró. 17:17; Àìz. 32:​1, 2.

JÌHÓVÀ É NVEÈ NI NYÍÉ GBÀÀ

14. Mókà gbò dìtõ̀ò ní ea é láá siimài pọ̀ ẹ?

¹⁴ Ànà-ànà e ólò kpeesĩ́ ló. Pọ̀ ólò láá siíi tṍó e ténì bá tàvàlà dìtõ̀ò. Kpá Káí kọ́ nú ea kil ló gbò gyóòlo Bàrì e ba beè tení bá tàvàlà dìtõ̀ò àbèè nàà uú boo ea aa bá pá ba gbò ọ́b, vaá pọ̀ à sií va. (Ps. 18:4; 55:​1, 5) Mm̀ tẽ̀ènè sĩ́deèá, è ólò láá  kpeesĩ́ ló nàà uú boo gbẹá tọọ̀ kpá, ól tóm, vaá pá bẹẹ tọ àbèè kpóó ea gé bẹl ólò láá biigèi ló. Sìgà tṍó kpálói ólò palàge zọ̀ vaá belí kọ èé gé ù. Kọ̀láá tṍó e dìtõ̀ò meà naa vó, è ólò belí pá nvín e náa é láá nvèè bá nèà a lóó. Mósĩ́ deè ní e Jìhóvà ólò nvèèmà bá nèi kèbá gbò dìtõ̀òí ẽ́?

15. Mókà bel agẹló ní e kpá Psalm 94:19 néi ẽ́?

¹⁵ Nú e Jìhóvà ólò naa. À ólò nvèèi nyíé gbàà vaá nèi dĩ̀ìnè ló bùlà. (Bugi Psalm 94:19.) Nú ea di mm̀ kpá Psalmí é láá naa kọ é dòòmà dẽe ló ene kà ńkem̀ nvín pábia e pọ̀ sííe vaá náa láà daa boo béè kọọ̀ kà agẹbá náà káála gé pómí. Èé láá dòòmà dẽe ló kọọ̀ a tẹ̀ bã́ tọá, túe lọl boo, vaá dàlàẹ dọ̀ọ̀mà tṍó e dáá é bã́é dẽe. Náa kal ló béè kọọ̀ náà káálaá gé pómí, lóó nvíná é dĩinà boo béè kọọ̀ à di bá a tẹ̀. Tṍó e gé téní bá tã̀àgã̀ vaá pọ̀ à siíi, à ólò leemái kọọ̀ bẹẹ Tẹ̀ ea di káála á ẹ̀b nú ea kilíí ló, belí kọ à dàlài dọ̀ọ̀mà tṍó eé íe dĩ̀ìnè ló bùlà. Éé ní eé láá naa kọbé è íe nvèè nyíé gbàà ea aa bá Jìhóvà?

16. Éé ní eé láá naa kọbé è íe bélè lọl ló nvèè nyíe gbàà ea aa bá Jìhóvà ẹ? (Ẹ̀b nàgé fòtó.)

¹⁶ Nú ea dú bíi kọ é naa. Olòó zọ̀ Jìhóvà naaá nu tení dú ló gè tã̀àgã̀é ló vaá bugi Kpá Káí. (Ps. 77:​1, 12-14) Tṍó eo gé tení bá tã̀àgã̀, túá kà nú ea é bã́ ní nyíe é dú gè tãagã ló Bàrì. Kọ́ gbò nú ea síìmà ni pọ̀ vaá tãagẽ́ ni nè Jìhóvà. Sọ̀tọ́ deè kọ Jìhóvà á nvèè ni nyíé gbàà vaá ló bel nè ni tení dú ló gè bugi Kpá Káí. (Ps. 119:28) Òé mon kọọ̀ à íe gbò dọ̀ Kpá Káí ea é palàge nvèè ni nyíé gbàà tṍó e pọ̀ síí ni. Dì belí nu dòòmà bá, òé láá mòn gbò bel ea é síè ni kpóó ló mm̀ kpá Jóòb, Psalm, nè Próvẹẹ̀b, nè gbò bel Jíízọ̀s ea di mm̀ kpá Máátìù 6 togó. Be ò tãagã ló Bàrì vaá bugi a Moǹ Bel, àé nveè ni nyíé gbàà.

17. Éé ní eé láá agala boo é?

¹⁷ Èé láá agala boo kọọ̀ Jìhóvà é dií ló tṍó e nu tavàlàí ló mm̀ dùm. Náa é dú áá bẹ̀ì. (Ps. 23:4; 94:14) Jìhóvà zigà kọ àé kpenàèi, neèi agẹló, nveenìè bá neèi, vaá nvèèi nyíé gbàà. Kpá Àìzáíà 26:3 kọ́ kilma ló Jìhóvà kọọ̀: “Òé kpenà gbò e bà palàge dẹ̀ẹ̀à ní boo; Òó kilsĩ́ gè nè va fẹ́ẹ́-fẹẹ̀ ló, Boo béè kọọ̀ bà dẹlẹ́ ni nyíé boo.” Vóà naa, dẹ̀ẹ̀a boo Jìhóvà vaá tú nvèè bá ea gé né ni mm̀ kele-kele sĩ́deè. Be ò náa vó, òé íe agẹló bã̀àna tṍó e dìtõ̀ò tavàlà ní ló.