1. Éé ní ea ólò dọ̀ ní nyíe tṍó eo bugì togó boo íb nen e Jìhóvà dú é?

 É KỌỌ̀ o beè láá dòòmà dẽe ló íb nen e Jìhóvà dú? Tṍó eo gé ló bel nèe mm̀ tã̀àgã ló, éé ní ea ólò dọ̀ ní nyíe ẽ́? Náa kal ló béè kọọ̀ née é láá mòn Jìhóvà, Kpá Káí baatẽ́ nú ea kilíé ló mm̀ kele-kele sĩ́deè. Kpá Káí kólí Jìhóvà kolíe “nàànì nè gbọ” nè “sã́ ea ólò taa nu.” (Ps. 84:11; Híb. 12:29) Mm̀ ene kà mòànù dẽe, Èzíkiẹ̀l beè baatẽ́ kọọ̀ kĩée e Jìhóvà dì bélí dem ea kọlà sáfaià, kpọ́gọ́lọ́ ea mo, nè gùnùgũ̀ ea nyágĩ́. (Èzí. 1:​26-28) Sìgà gbò bààtẽ́ ea kilíé ló é láá naa kọ pọ̀ á siíi vaá naa kọ é tuumá kọọ̀ née é láá dũ̀ùà bã̀é kpàn.

2. Éé ní ea é láá naa kọ á tavala ló sìgà gbò ge dũ̀ùà bã kpàn Jìhóvà ẹ?

² Boo béè kọọ̀ née láà mòn Jìhóvà, àé láá tàvàlàí ló gè zìgà kọ à vulèi. Sìgà gbò bugi togó kọọ̀ Jìhóvà náa é láá vulèè va boo béè gbò pọ́lọ́ nu ea ni náa vá ló mm̀ dùm. Be à sẹlẹ bà náa beè ié tẹ̀ ea vulè va. Jìhóvà dã́ ból ló vaá à nyímá bé ea é láá tọáí ló naa. Kọbé è àgala boo kọ à vulèi, à náa kọ é nyimá gbò lé kpãa ea íe tení dú ló gbò bel ea di mm̀ Kpá Káí.

3. Éé ní ea náa èé palàge nó nú ea kil ló vulè Jìhóvà ẹ?

³ Ene kà moǹ bel ea palàge baatẽ́ Jìhóvà leevè dú vulè. (1 Jọ́ọ̀n 4:8) Jìhóvà dú vulà. Vulè ní ea ólò lẹ̀ẹ̀là bel ló kọ̀láá kà nú ea náa ẽ́. Vulè e Bàrì íe palàge bọọ naa ní ea íná nágé ló gbò e bà náa vulèe. (Máát. 5:​44, 45) Mm̀ nakà togó belí, èé ló bel boo nú ea kil ló Jìhóvà nè a vulè. Bé e gé nó nu ea kil ló Jìhóvà naa, níà bé eé kpáá palàge vùlèe naa ẽ́.

JÌHÓVÀ PALÀGE VÙLÈI

4. Lé nyíe e Jìhóvà íe ólò tọá ní ló naa vàẹ? (Ẹ̀b nàgé fòtó.)

⁴ “[Jìhóvà] íe lé nyíe.” (Jém̀z 5:11) Kpá Káí tú Jìhóvà doolé ló kà ea íe tóè sàn kilma ló a nvín. (Àìz. 66:​12, 13) Dòòmà dẽe ló kà ea gé ẹb nú ea kil ló nvín ea dìé nùmá, ea  vulè. À tú gẹ́ẹ́-gẹẹ̀ bá dààmàe vaá tú gbọ́ọ́-gbọọ̀ ló mon ea dĩinée ló loomá bel nèe. Tṍó ea tó àbèè kọọ̀ nu zọ́ẹ, à ólò gbĩ́ bé ea é náa vaá nèe nú ea íe bíi ló. Tṍó e íè tã̀àgã̀ bùlà, èé láá àgala boo kọọ̀ Jìhóvà vulèi. Neǹ ọ́lì sọ́l beè emí kọọ̀: “Tṍó e tã̀àgã̀ bùlà elím ló, o beè nvèèm nyíé gbàà vaá dĩiném ló.”​—Ps. 94:19.

5. Éé ní e vulè Jìhóvà ea kyãa mm̀ bọ́ọ̀ló dẹ̀lẹ̀ nyíé boo tõó dọ ẹ?

⁵ Jìhóvà bọ́ló dẹ̀lẹ̀ nyíé boo. (Ps. 103:8) Náa ólò kìnii gbẹẹ́ kẽ tṍó e náà nú ea dú pọ́lọ́. Pá Ízràẹ̀l beè naa nú ea bẽ́émá Jìhóvà gã́bug tṍó, sõò tṍó e bà ọ́gá aa ló ba pọ́lọ́, Jìhóvà beè naa kọ bàá agala boo kọọ̀ à íèè vulè e bè náa íe kùbmà kìlmà vá ló, tení dú ló gè kọ́ nè va kọọ̀: “O beè palàge sí gã́ ki kè sĩ́ nda, m beè nvèè ni ka ló, vaá vùlè ni.” (Àìz. 43:​4, 5) Tẽ̀ènè íb vulèá ní e Jìhóvà íe kilma ló beele deè nieí é. Vóà naa, èé láá kilsĩ́ gè dẹlẹ́ẹ nyíé boo. Kọbèè e beè ié agẹbá lọ̀, Jìhóvà náa é sọ́i bá gbẹẹ́ kẽ. Tṍó e ọ́gà vaá òòa kẽ dú ló Jìhóvà, èé mon kọọ̀ vulè ea ié kìlmàí ló náa nyááá. À zigà kọọ̀ ‘àé iàẹ̀ ló bẹẹ pọ́lọ́.’ (Àìz. 55:7) Kpá Káí kọ́ọ̀ tṍó ea ni ia ló pọ́lọ́ nèi, èé gbóó ié “tṍó dĩ̀ìnè ló . . . ea aa bá Jìhóvà.”​—Tóm 3:19.

6. Éé ní e Zèkàráíà 2:8 nóòmài kilma ló Jìhóvà ẹ?

⁶ Bugi Zèkàráíà 2:8. Boo béè kọọ̀ Jìhóvà vulèi, à ólò vàlẹ̀bá dã́ ból ló bé e nu tọ́aí ló naa vaá di kpènà ló gè kpènài. Nyíée ólò bììlà tṍó e nyíéi biilà. Vóà naa, èé láá tã̀àgã ló Bàrì kọọ̀: “Kpènàm belí bé eo ólò kpènà o nvín dẽe naaá.” (Ps. 17:8) Dẽe dú kà gẹẹ-gẹẹ ló ketõ̀ò ea di ló nen vaá è ólò palàge nvèè ka ló. Vóà naa, tṍó e Jìhóvà túi doolé ló a nvín dẽe, à bélí kọọ̀ à gé kọ́ọ̀, ‘Kọ̀láá nen ea nveèi kom ló, e pá ńdáà gbò, nveè kom ló nú em palàge nvèè ka ló.’

7. Éé ní ea náa vaá à bọ́ló kọ é naa nú ea é náa kọ é agala boo kọọ̀ Jìhóvà vulèi é?

⁷ Jìhóvà gbĩ́ kọ é agala boo kọ à vulèè buù bẹ̀ì. Sõò à nyímá kọọ̀ gbò nú e ni téní bá é láá naa kọ á tàvàlàí ló gè zìgà kọ à vulèi. Àbèè kọọ̀ èé láá dì e gé téní bá gbò dìtõ̀ò ea doà bẹẹ gè dẹlẹ nyíé boo vulè e Jìhóvà íe kìlmàí ló. Éé ní ea é náa kọ é agala boo kọọ̀ Jìhóvà vulèi é? Níà ge nó nú ea kil ló bé e Jìhóvà vulè Jíízọ̀s, gbò e ba beè tṍ nóo ból, nè dénè bẹ̀ì naa.

 BÉ E JÌHÓVÀ ÓLÒ ZOGÈ KỌỌ̀ À ÍÈÈ VULÈ NAA

8. Éé ní ea beè naa kọ Jíízọ̀s á agala boo kọọ̀ a Tẹ̀ vulèèe é?

⁸ Mm̀ gã́bug gbáá e nen náa é láá bugi, Jìhóvà nè a Sã́áná beè palàge vùlè ene. Ba gbaa ló a bĩ́é èl níí kọ̀láá nen ea di bàlà booí. Mm̀ kpá Máátìù 17:​5, Jìhóvà beè kọ́ bé ea vulè Jíízọ̀s naa. Jìhóvà gáẹ̀ láá dõogẽ kọọ̀, ‘Níì nen e nyíém ẹẹ́ ló’ e. Sõò, a beè gbĩ́ kọ é nyimá bé ea vulè Jíízọ̀s naa, vó ní ea náa à kọọ̀ “níì nà Sã́áná em vulè” e. Jìhóvà beè kaaga boo íb nen e Jíízọ̀s dú nè nú ea é gé naa. (Ẹ́fẹ. 1:7) Vaá Jíízọ̀s náa beè ié bàà-bàà bùlà kilma ló vulè ea tẹ̀ íe kìlmàé ló. Jíízọ̀s beè palàge àgala boo kọọ̀ Jìhóvà vulèèe. A beè kọ́ gã́bug tṍó kọọ̀ a tẹ̀ vulèèe.​—Jọ́ọ̀n 3:35; 10:17; 17:24.

9. Mókà tã́á bel ní ea zógè bé e Jìhóvà vùlè gbò ea beè tṍ nóo ból naa ẽ́? Baatẽ́. (Róm̀ 5:5)

⁹ Jìhóvà kọ́ nágé bé ea vulè gbò ea beè tṍ nóo ból naa. (Bugi Róm̀ 5:5.) Nvèè kpíí ló tã́á bel ea kọ́ọ̀ ‘nvee m àbèè ge tṍ mm̀ bẹẹ nyíe.’ Ene kà kpá ea ólò baatẽ́ Kpá Káí kọ́ọ̀, à “eelàí boo belí múú.” Ẹ̀b bé e níá palàge baatẽ́ íb vulè e Jìhóvà íe kilma ló gbò ea beè tṍ nóo ból naaà! Gbò e Bàrì beè tṍ nóo ból nyímá kọọ̀ ‘Bàrì vulèè va.’ (Júùd 1) Neǹ tóm Jọ́ọ̀n beè kọ́ íb tọa ló e bà íe tṍó ea émí kọọ̀: “Ni ẹbvii bé e Tẹ̀ vulèi naa, vaá naa kọ beele é kọ̀là pá nvín Bàrì!” (1 Jọ́ọ̀n 3:1) É kọọ̀ áá gbò e ba beè tṍ nóo ból ní e Jìhóvà vulè e? Ẽ́èe, Jìhóvà a zógè nàgé kọọ̀ à vulèè dénè bẹ̀ì.

10. Éé ní ea dú pọ̀bkà nú ea zógè kọọ̀ Jìhóvà vulè ni ẽ́?

¹⁰ Éé ní ea palàge zogè bé e Jìhóvà vulèi naa ẽ́? Níá nu ààaá​—tení dú ló níí, Jìhóvà zógè kọọ̀ a vulè palàge bọọ èlmà níí dénè nen! (Jọ́ọ̀n 3:16; Róm̀ 5:8) Jìhóvà beè sọ̀tọ́ deè kọọ̀ a Sã́áná ea vulè á ú boo dénè nen kọbé à láá ia ló bẹẹ pọ́lọ́ vaá túi naamá pá a kóò. (1 Jọ́ọ̀n 4:10) Bé e gé bugi togó boo íb gã́ ki e Jìhóvà nè Jíízọ̀s beè kpẽ́í boo naa, níà bé eé dã́ ból ló bé e vulè e bà íe kìlmàí ló bọọ́ kètẽ́ naa ẽ́. (Gàl. 2:20) Jìhóvà náa beè nè nu ààaí boo béè kọ à lelà kọ á naa vó, sõò a beè nè boo béè vulè ea íe kìlmàí ló. Jìhóvà zógè kọ à vulèèi tení dú ló gè tú a Sã́áná ea palàge vùlè vaamái gyọ́ọ́ boo. Jìhóvà beè sọ̀tọ́ deè kọ a Sã́áná á mòn tã̀àgã̀ vaá úí boo.

11. Éé ní eo nóò lọl ló nú ea di mm̀ kpá Jèrèmáíà 31:3 é?

¹¹ Dì belí bé e ni mon naa, Jìhóvà náa ólò gṍ tọa ló ea íe kìlmàí ló, sõò à ólò kọ́ bé ea vulèi naa. (Bugi Jèrèmáíà 31:3.) Jìhóvà a dũunài nvea ló boo béè kọọ̀ à vulèi. (Doolé ló Dìtolónomì 7:​7, 8.) Tọ́ọ̀ nen àbèè enè íb nu náa é láá naa kọọ̀ Jìhóvà á gá vùlè nài. (Róm̀ 8:​38, 39) Vulè e Jìhóvà íe kìlmàí ló tọ́á ló olo naa vàẹ? Bugi kpá Psalm 23, kọbé ò mon nú e vulè nè tọa ló e Jìhóvà íe beè naá ló Dévìd nè nú ea é láá naá ló dénè bẹ̀ì.

VULÈ E JÌHÓVÀ ÍE KÌLMÀ NÍ LÓ TỌ́A NÍ LÓ NAA VÀẸ?

12. Éé ní e kpá Psalm 23 kọ́ nú ea kil ló é?

¹² Bugi Psalm 23:​1-6. Sọ́l e Dévìd beè emí mm̀ kpá Psalm 23 zógè bé ea dẹlẹ nyíé boo kọọ̀ Jìhóvà vulèèe vaá ẹ̀b nú ea kilìèé ló naa. Nú e Dévìd beè emí mm̀ kpá Psalmí baatẽ́ íb lé gbaa ló ea di zẹ̀ẹ̀ a Neǹ Kùdẽe Ló, ea dú Jìhóvà nè ẹ̀ẹ̀. Dévìd beè ié dĩ̀ìnè ló bùlà boo béè kọọ̀ à sọtọ́ deè kọọ̀ Jìhóvà á lelèèe dee bá, vaá a beè palàge dẹ̀ẹ̀àẹ́ boo. Dévìd beè nyimá kọọ̀ Jìhóvà é vulèèe dénè deé mm̀ a dùm. Éé ní ea beè naa kọ á agala boo naa vó é?

13. Éé ní ea beè naa kọọ̀ Dévìd á agala boo kọọ̀ Jìhóvà é ẹb nú ea kilìèé ló é?

 ¹³ “Tọ́ọ̀ nu náa é náním.” Dévìd beè mòn kọọ̀ Jìhóvà ólò palàge ẹ̀b nú ea kilìèé ló. Dévìd beè nyimá kọọ̀ Jìhóvà a túèe naamàè a kóò vaá tenmàè ẽ. Níà nú ea náa vaá a beè agala boo kọọ̀ kọ̀láá bé e nu meà naá dì deèsĩ́, Jìhòvà é kilsĩ́ gè ẹ̀b nú ea kilìèé ló é. Boo béè kọọ̀ Dévìd beè dẹlẹ nyíé boo kọọ̀ Jìhóvà vulèèe vaá ẹ̀b nú ea kilìèé ló beè naa kọ á gá bọ̀ọ̀gẹ̀ ié tã̀àgã̀ bùlà, tãa vó nyíée beè ẹẹ vaá nú ea íe beè gbõomáé ló.​—Ps. 16:11.

14. Mósĩ́ deè ní e Jìhóvà é láá ẹ̀b nú ea kilní ló é?

¹⁴ Jìhóvà palàge vùlèi vaá à ólò ẹ̀b nú ea kilíí ló, bọọ èlmà tõ̀ò tṍó e pọ́lọ́ nú náaí ló. A beè tõó ló Claire a ea ni tú 20 gbáá siimá tóm Bẹ́tẹẹ̀l kọ náa íèè tọ́ọ̀ kà nvèè bá tṍó e pá ba tọ beè aa bá enè íb tã̀àgã̀ dọbá ńdõona kà. Kom ea kọlà stroke beè zọ̀ a tẹ̀, ba beè kpó ene kà a vígà pábia lọl mm̀ bõ̀ònatõ̀ò, ba ki beè dii vaá bà náa beè ié ná tọ gè tõó m. Mósĩ́ deè ní e Jìhóvà beè zogè kọ à vulèè vaá ẹ̀b nú ea kil vá ló é? Claire kọ́ọ̀: “Buù deeí, Jìhóvà ólò ẹ̀b nú ea kil ló bíì pá beélè tọ. Gã́bug tṍó, Jìhóvà ólò naa bẹẹ bíi èlmà bé e géè ẹ̀bmà dẽe naa! M̀ ólò bọ̀ọ̀gẹ̀ bugi togó boo bé e Jìhóvà ni nveè bá nè pá beélè tọ naa, vaá bé ea vulèi naa náa ólò tám nyíe. Tṍó em kẽèa boo gbò nuí, à ólò nvèè bá nèm kọ ḿ emá tàvàlà dìtõ̀ò.”

15. Éé ní ea beè naa kọọ̀ lóó Dévìd á dĩ̀ìnà ẽ? (Ẹ̀b nàgé fòtó.)

¹⁵ “À ólò dĩiném ló.”  Gbò tã̀àgã̀ e Dévìd beè kpeesĩ́ ló beè naa kọọ̀ sìgà tṍó á ié tã̀àgã̀ bùlà. (Ps. 18:​4-6) Náa kal ló béè vó, Jìhóvà beè vulèe vaá ẹ̀b nú ea kilíé ló, vó  beè náa kọọ̀ lóóe á dĩ̀ìnà. Jìhóvà beè faalá a kóò e lóóe ni ọọí kilma “gbàà bṹú-bṹú sĩ́ víl” nè “gbò ketõ̀ò bõ̀séi e múú dì.” Níí beè naa kọọ̀ Dévìd á kpáá tú zààvà fã̀àmà Jìhóvà.​—Ps. 18:​28-32.

16. Mósĩ́ deè ní e vulè Jìhóvà ni náa kọọ̀ lóó ni á dĩ̀ìnà ẽ?

¹⁶ Mm̀ tẽ̀ènè sĩ́deèá, ‘vulè Jìhóvà ea kyãa mm̀ bọ́ọ̀ló dẹ̀lẹ̀ nyíé boo ní ea náa vaá è gáà u tà’ tṍó e kpeè sĩ́ ló tã̀àgã̀ deè nieí é. (Làm. 3:22; Kọ́l. 1:11) Bugi togó boo nu dòòmà bá Rachel. Nyíée beè palàge bììlà tṍó ea dóm aàẹ́ ló àà vaá aa mm̀ bõ̀ònatõ̀ò tṍó COVID-19 na. Éé ní e Jìhóvà beè naa nèe ẽ́? À kọ́ọ̀: “Jìhóvà beè naa kọ ḿ nyimá kọọ̀ à vulèèm. A beè naa kọọ̀ gbò kóò á dì ḿ ló, ba beè faalá gyã́á mám, ba beè olòó emí gbò bel nè gbò dọ̀ Kpá Káí ea nveèm nyíé gbàà, bà ólò tõo ḿ kpàn màngã̀ kọbé nyíém ẹ́ẹ, vaá olòó kẽeém nyíé kọọ̀ Jìhóvà gé ẹb nú ea kilím ló. M̀ ólò õá Jìhóvà zaa lee ló gè naa kọ ḿ ié pá tọ e bà vulèm.”

17. Éé ní ea beè naa kọọ̀ ‘pọ̀ á gá sii’ Dévìd e?

¹⁷ “Pọ̀ náa é síím boo béè kọọ̀ olo dìḿ ló.” Dévìd beè kpeesĩ́ ló gã́bug nuù gẹẹ-gẹẹ ló, vaá a beè ié gã́bug gbò ọ́b e bà palàge ié kpóó. Sõò a beè ié kpènà boo béè kọọ̀ Jìhóvà vulèe. Dévìd beè mòn kọọ̀ Jìhóvà dièé ló kèbá kọ̀láá kà dìtõ̀ò, vaá níá beè sièe kpóó ló. Vó ní ea beè naa vaá à ọlí kọọ̀: “[Jìhóvà] beè dùùlàm lọl bá kọ̀láá kà nú ea géè siimàm pọ̀” ẹ. (Ps. 34:4) Náa kal ló béè kọọ̀ pọ̀ beè palàge sii Dévìd, a beè bé èlbá gbò nú ea géè siimàe pọ̀ boo béè kọ a beè nyimá kọọ̀ Jìhóvà vulèèe.

18. Mósĩ́ deè ní e gè agala boo kọọ̀ Jìhóvà vulèè ni é láá siè ni kpóó ló tṍó e pọ̀ síí ni ẽ́?

¹⁸ Mósĩ́ deè ní e gè nyimá kọọ̀ Jìhóvà vulèi ólò sièi kpóó ló tṍó e gé téní bá dìtõ̀ò ea síìmài pọ̀ ẹ? Enè neǹ gyà deèsĩ́ tóm kọ̀ kpẹ̀a ea bée kọlà Susi baatẽ́ bé ea beè tọá ló a dóm nè ẹ̀ẹ̀ naa tṍó e ba nvín págbálà fẹ́à a bá. À kọ́ọ̀: “Tṍó e kà agẹbá pọ́lọ́ nu búló naaá ló nen, pọ̀ é láá siíe vaá à tõoé ló belí kọọ̀ dõona kà gbò pọ́lọ́ nu é kpáá naaàè ẽ́ ló. Sõò bé e Jìhóvà vulè vaá ẹ̀b nú ea kilíí ló naa, beè naa kọ pọ̀ á gá siináí.” Rachel, e beè zẹ́ẹ́ kolí béeá beè kpáá kọọ̀: “Enè deè bílá dee e nyíém beè palàge bììlà vaá pọ̀ à siím, m beè gbóó tò vaá tãagã ló Jìhóvà. Kà lèlà tṍóá, m beè gbóó mòn kọ à nveèm nyíé gbàà vaá  dĩiném ló naa ní e dáá bã́ ḿ dẽe, belí bé e kà ólò naa a ńkem̀ nvín naaá. Nú ea beè naaáḿ ló deeá náa é tám nyíe.” Enè neǹ kànen mm̀ bõ̀ònatõ̀ò ea bée kọlà Tasos beè tõó kpọ́gọ́lọ́ ténì gbáá boo béè kọọ̀ náa zigà ge bã ló tóm bé. Mósĩ́ deè ní ea beè mòn kọọ̀ Jìhóvà vulèèe vaá ẹ̀b nú ea kilìèé ló é? À kọọ̀: “Jìhóvà beè nèm gbò nú em íè bíi ló èlmà bé em géè ẹ̀bmà dẽe naa. Níí beè agẹlẹ ló zìgà em íè mm̀ Jìhóvà vaá naa kọ ḿ kpáá palàge dẹlẹ́ẹ nyíé boo. Gbá ló vó, tení dú ló a nyómá káí, Jìhóvà beè naa kọ ḿ ié ẹ́ẹ́-ẹẹ̀ nyíé náa kal ló béè kọọ̀ m beè di kèbá dìtõ̀ò ea gáẹ̀ láá naa kọọ̀ nyíém á bììlà. Níí beè naa kọ ḿ nyimá kọọ̀ bé em dẹlẹ̀ nyíé boo Jìhóvà naa, níà bé em é mon kọ à vulèm naa ẽ́. Vó beè naa kọ ḿ bã boo tóm gyà deè sí tóm kọ̀ kpẹ̀a gbẹá kpọ́gọ́lọ́.”

DŨ̀ÙÀ BÃ KPÀN O BÀRÌ EA DÚ GBỌ́Ọ́-GBỌỌ̀ LÓ

19. (a) Mósĩ́ deè ní e gè nyimá kọọ̀ Bàrì vulèi é láá tọá ló bé e tãagã̀ ló Bàrì naa ẽ́? (b) Mókà bààtẽ́ ea kil ló vulè Jìhóvà ní ea tọ́á ní ló é? (Ẹ̀b ńkpó ea kọ́ọ̀ “ Gbò Bel Ea Náa Kọ É Agala Boo Kọọ̀ Jìhóvà Vulèi.”)

¹⁹ Gbò nú ea beè naaá ló gbò e ni ló bel booá zógè kọọ̀ Jìhóvà dú “Bàrì ea ólò vulèi” vaá à dìí ló! (2 Kọ́r. 13:11) À íe lèèma mm̀ buù bẹ̀ì. È agàla boo kọọ̀ a vulè “ea kyãa mm̀ bọ́ọ̀lọ́ dẹ̀lẹ̀ nyíé boo” dìí ló. (Ps. 32:10) Buù bé e gé bugi togó boo bé ea zógè kọọ̀ à vulèi naa, níà bé eé mon kọ à gé ẹb nú ea kilíí ló naa ẽ́, vaá vó é náa kọ é dũ̀ùà bã̀é kpàn. Èé láá taaá ló tã̀àgã ló Bàrì vaá kọ́ bé e íè bíi ló a vulè naa. Èé láá kọ́ kọ̀láá kà nú ea gé tãagẽ́i nèe, vaá àgala boo kọ àé dã́ ból ló, nè ge kọ à di kpènà ló gè nvèè bá nèi.​—Ps. 145:​18, 19.

20. Mósĩ́ deè ní e vulè e Jìhóvà íe ólò dũ̀ùnài nvèèé kpàn ẽ?

²⁰ Dì belí bé ea ólò leemái gè ĩìtẽ́ kpàn sã́ deé e agẹ bá tọ́ọ dì naaá, níà bé vulè e Jìhóvà ié ólò naa kọ é dũ̀ùà bã̀é kpàn naa ẽ́. Vulè e Jìhóvà íe kìlmàí ló palàge boo, vaá dú gbọ́ọ́-gbọọ̀ ló. Vóà naa, nyíé ni á ẹẹ boo béè kọọ̀ Jìhóvà vulè ni. Naanii mè buù bẹ̀ì é zógè kọ è vulèe tení dú ló gè kọọ̀: “Nda vulè Jìhóvà”!​—Ps. 116:1.