1. Mókà bélè ní e ólò ié lọl ló gè sí kẽè Sẹ̀lẹ̀nù Kẽ̀èa Boo Ú Kráìst e?

 JÌHÓVÀ beè nèi nú ea palàge sí gã́ ki tṍó ea lẹẹlà a Sã́áná kọ á úí boo! (2 Kọ́r. 9:15) Òé láá ié lé gbaa ló kilma ló Jìhóvà boo béè kọ Jíízọ̀s beè úí boo, vaá òé láá ié nágé ból dẽesĩ́ gè tõó dùm dọ̀ dè-dè. Vóà naa, à bọ́ló kọ é õá Jìhóvà zaa ló nu ààa ea néi boo béè kọ à palàge vùlèi! (Róm̀ 5:8) Kọbé nú e Jìhóvà nè Jíízọ̀s ni náa nèi náa táí nyíe, Jíízọ̀s beè kọ é olòó kẽeàè boo a ú buù gbáá.​—Lúùk 22:​19, 20.

 2. Éé ní eé ló bel boo mm̀ nakà togó bel ge nòí ẽ́?

² Gbááí, Sẹ̀lẹ̀nù Kẽ̀èa Boo Ú Kráìst é sẹẹa deè Saturday, April 12, 2025. È agàlà boo kọọ̀ dénè bẹ̀ì gé noo gè sí kẽ. Ge tú tṍóá bùgmà togó boo a nú e Jìhóvà nè a Sã́áná ni náa nèi é palàge dọ̀ bélè nèi. Mm̀ nakà togó bel ge nòí, èé ló bel boo nú e nu ààaá nóòmài ea kil ló Jìhóvà nè a Sã́áná. Togó bel ea bẽene níí é nveè bá nèi kọ é dã́ ból ló bélè eé láá ié lọl ló nu ààaá, nè bé eé láá zogè kọ nyíéi ẹ́ẹ́ ló naa.

NÚ E NU ÀÀAÁ NÓÒMÀI KILMA LÓ JÌHÓVÀ

 3. Mósĩ́ deè ní e ú enè nen é láá aalá gã́bug nen ẽ́? (Ẹ̀b nàgé fòtó.)

³ Nu ààaá náa kọ é nyimá kọọ̀ Jìhóvà dú Bàrì lé bèèla. (Dìt. 32:4) Éé ní ea náa vaá è kọ́ vó é? Tṍó e Ádàm lọ̀l togó kèbá Bàrì, a beè dú neǹ náàkyọ̀ vaá a beè gbóó ù.  Boo béè kọ è gbóò dú gbò náàkyọ̀ vaá níà nú ea náa è ólò ùe. (Róm̀ 5:12) Jìhóvà beè gbóó lẹ̀ẹ̀là Jíízọ̀s kọ á úí boo kọbé à áálái lọl bá náàkyọ̀ nè ú. Sõò mósĩ́ deè ní e ú enè nen ea gbõoma é láá aalá gã́bug nen ẽ́? Neǹ tóm Pọ́ọ̀l baatẽ́ kọọ̀: “Vaá tẽ̀ènè bé e dénè nen dú gbò pọ́lọ́ tení domá ló lọ̀l togó kẽ e enè nen [Ádàm] beè lọ̀l naaá, vóá bé e Bàrì léèvè bel dénè nen tení dú ló gbàn tṍ ló e enè nen [Jíízọ̀s] beè ie naa ẽ́.” (Róm̀ 5:19; 1 Tím. 2:6) Pọ́ọ̀l géè kọọ̀ dénè nen beè dú gyóòlo nè náàkyọ̀ nè ú boo béè lọ̀l togó kèbá enè nen ea beè gbõoma. Vóà naa, a beè dú bíi kọ enè nen ea gbõoma á úí boo kọbé è láá ié dì pọ́ì aa bá náàkyọ̀ nè ú.

 4. Éé ní ea náa vaá Jìhóvà náa dõogẽ sọ̀tọ́ deè kọọ̀ gbò nvín e bà aa mm̀ Ádàm e bà gbaníe tṍ ló á tõó dùm dọ̀ dè-dè e?

⁴ É kọ a beè dú bíi kọọ̀ Jíízọ̀s á ù kọbé à láá dùùlài? É kọ Jìhóvà náa gáẹ̀ láá naa kọọ̀ gbò nvín e bà aa mm̀ Ádàm e bà gbaníe tṍ ló á tõó dùm dọ̀ dè-dè? Àé láá tõoí ló kọ gè naa vó ní ea gáẹ̀ beè dú kà lé nu gè naa ẽ́, sõò náa gáẹ̀ beè zogè kọọ̀ Jìhóvà dú Bàrì lé bèèla. Vaá be Jìhóvà beè naa vó, à gáẹ̀ belí kọọ̀ Ádàm nè gbò nvín e bà aàẹ́ náa beè sí tọ́ọ̀ kà pọ́lọ́.

 5. Éé ní ea náa vaá èé láá agala boo kọọ̀ Jìhóvà é ólòó naa nú ea lelà ẹ?

⁵ Vaá èé kọ́ vàẹ be Jìhóvà náa beè nèi nu ààa naa ní eé íe nèà deè ge tõó dùm dọ̀ dè-dè e? À gáẹ̀ beè tõoí ló kọ Jìhóvà náa dú Bàrì lé bèèla vaá náa tõó boo a nòòkúu ea kil ló lé nè pọ́lọ́, vó gáẹ̀ beè naa kọọ̀ é ẹ̀b kọ be à sẹlẹ Jìhóvà náa é ḿm̀-mè dõona kà gbò nú ea beè zìgà. Sõò náa dú bíi kọ é ié tã̀àgã̀ bùlà kọ náa é ḿm̀-mè gbò nú ea beè zìgà. Ge kọ Jìhóvà náa kọọ̀ lé bèèla á dì, vaá sọ̀tọ́ deè kọ a Sã́áná á úí boo náa kọ é agala boo kọọ̀ àé ólòó naa nú ea lelà.

 6. Mósĩ́ deè ní e nu ààaá tẹ́lẹ bàlà kẽ bé e Jìhóvà vulèi naa ẽ́? (1 Jọ́ọ̀n 4:​9, 10)

⁶ Nu ààaá náa kọ é nyimá kọọ̀ Jìhóvà ólò naa nú ea lelà, vaá à náa nagé kọ é dã́ ból ló bé ea vulè bọọ́ kètẽ́ naa. (Jọ́ọ̀n 3:16; bugi 1 Jọ́ọ̀n 4:​9, 10.) Nu ààaá náa nagé kọ é dã́ ból ló kọọ̀ Jìhóvà beè lẹ̀ẹ̀là a Sã́áná kọ á úí boo kọbé è íe nèà deè ge tõó dùm dọ̀ dè-dè vaá dũunà pá a tọ. Tṍó e Ádàm beè sí pọ́lọ́, Jìhóvà beè kpóe lọl zẹ̀ẹ̀ pá a tọ. Vó ní ea náa vaá tṍó e meà née beè dũunà pá tọọ̀ Jìhóvà ẹ. Sõò tení dú ló nu ààaá, Jìhóvà a ia ló bẹẹ náàkyọ̀ vaá naa kọ dénè gbò e bà íée zìgà m vaá gbànìe tṍ ló á dũunà pá a tọ. Bã̀àna  kátogóí, èé láá zọ̀ Jìhóvà nè pá vígà ié kà lé gbaa ló. Mm̀ kà-kà, dénè nuí zógè kọ Jìhóvà palàge vùlèi!​—Róm̀ 5:​10, 11.

 7. Mósĩ́ deè ní e bé e Jíízọ̀s beè mòn tã̀àgã̀ naa náa kọ é dã́ ból ló bé e Jìhóvà vulèi naa ẽ́?

⁷ Èé láá palàge dã́ ból ló bé e Jìhóvà vulèi naa be è bugi togó boo bé e nyíè Jìhóvà beè bììlà naa tṍó ea mon a nvín ea gé mon tã̀àgã̀. Sétàn beè kọọ̀ tọ́ọ̀ nen e nu agàẹ́ ló náa é láá fã̀ Jìhóvà vaá bọ́ló dẹ̀lẹ̀ nyíé boo nèe. Ge zogè kọ bel e Sétàn beè lòa dú kyáá, Jìhóvà beè sọ̀tọ́ deè kọ a Sã́áná á mòn tã̀àgã̀ besĩ́ à kalá ù. (Jóòb 2:​1-5; 1 Pít. 2:21) Jìhóvà beè mòn tṍó e gbò tùle bõ̀ònaló fã̀ géè òn Jíízọ̀s, tṍó e gbò bé géè bomée, nè tṍó e bà túe ká kúté. Jìhóvà beè mòn nàgé tṍó ea Sã́áná ea palàge vùlè mon tã̀àgã̀ vaá ú nyaaló ú. (Máát. 27:​28-31, 39) Jìhóvà íe kpóó ea gáẹ̀ láá kpeg kọ gbò nuá á gá naaá. Dì belí nu dòòmà bá, Jìhóvà gáẹ̀ beè láá dùùlà Jíízọ̀s tṍó e gbò nàà uú boo beè kọ́ọ̀: “É ni ẹb, kátogóí, be àé léémá Bàrì ge dùùlàẹ.” (Máát. 27:​42, 43) Sõò, be Jìhóvà á dùùlàẹ, Jíízọ̀s náa gáẹ̀ beè úí boo vaá beele née gáẹ̀ ié tọ́ọ̀ kà ból dẽesĩ́. Vó ní ea beè naa kọọ̀ Jìhóvà á sọ̀tọ́ deè kọ a Sã́áná á mòn tã̀àgã̀ dọ̀ọ̀mà tṍó ea úé.

 8. É kọ nyíè Jìhóvà beè bììlà tṍó ea mon a Sã́áná ea gé mon tã̀àgã̀? Baatẽ́. (Ẹ̀b nàgé fòtó.)

⁸ Náa bọ́ló kọ é bugi togó kọọ̀ Jìhóvà náa ólò ié tọa ló boo béè kọ ẹlẹ ní ea bọọ lọ̀l vaá à lee é! A beè dèmii naa ní eé íe tọa ló. Vóà naa, à tõó dọ̀ kọ Jìhóvà ólò ié nágé tọa ló boo béè kọ Kpá Káí kọ́ọ̀ a beè dèmií mm̀ a bèla. Kpá Káí tẹ́lẹ bàlà kẽ kọọ̀, nyíè Jìhóvà beè ‘bììlà’ tṍó e bà náa nú ea kyẽ́e. (Ps. 78:​40, 41) Bugi togó boo nú ea beè naaá ló Ébràhàm nè a nvín Áízẹ̀k. Kẽ̀èa boo kọọ̀ Jìhóvà beè kọ́ nè Ébràhàm kọ á tú áá kà a nvín vaamá gyọ́ọ neèe. (Jén. 22:​9-12; Híb. 11:​17-19) Ge dòòmà dẽe ló íb tọa ló e Ébràhàm beè ié tṍó ea géè noo gè fẹ́ Áízẹ̀k, é náa kọ é dã́ ból ló bé e nyíè Jìhóvà beè bììlà naa tṍó ea mon gbò e bà géè bòm a nvín nè tṍó e bà fẹ́ẹ!​—Ẹ̀b vídiò ea kọlà Imitate Their Faith​—Abraham, Part 2 ea di boo jw.org.

 9. Mósĩ́ deè ní e kpá Róm̀ 8:​32, 38, 39 nveè bá nè ni kọ ó dã́ ból ló bé e Jìhóvà vulè ni naa ẽ́?

⁹ Nu ààaá náa kọ é nyimá kọọ̀ tọ́ọ̀ nen, bã̀àna bẹẹ dúà ló e palàge vùlè àbèè bẹẹ díì-díílá kóò náa é láá vùlèi belí bé e Jìhóvà vulèi naa. (Bugi Róm̀ 8:​32, 38, 39.) Jìhóvà palàge vùlèi èlmà bé e vulè bẹẹ bá naa. É kọ àé tan ni gè tõó dùm dọ̀ dè-dè? À palàge tàn Jìhóvà kọ ó tõó dùm dọ̀ dè-dè èlmà bé ea tan olo naa. É kọ à tan ni kọ Jìhóvà á ia ló o  náàkyọ̀? À palàge tàn Jìhóvà ge naa vó. Áá nú ea gbĩ́ kọ ó naa dú gè ié zìgà mm̀ ú vààa gyọ́ọ̀ a Sã́áná vaá ò gbaníe tṍ ló. Nu ààaá tẹ́lẹ bàlà kẽ bé e Jìhóvà palàge vùlèi naa. Mm̀ ãa bàlà boo, èé kpáá palàge nó nú ea kil ló vulè e Jìhóvà íe kìlmài ló.​—Ẹ̀klì. 3:11.

NÚ E NU ÀÀAÁ NÓÒMÀI KILMA LÓ JÍÍZỌ̀S

10. (a) Éé ní ea beè naa kọ nyíè Jíízọ̀s á palàge bììlà nyòòmà tṍó e bà é gé fẹ́ẹ ẹ́? (b) Mósĩ́ deè ní e Jíízọ̀s beè naa kọọ̀ béè Jìhóvà á di káí é? (Ẹ̀b nàgé ńkpó ea kọ́ọ̀ “ Jíízọ̀s Beè Bọ́ló Dẹ̀lẹ̀ Nyíé Boo Vaá Naa Kọ Béè Jìhóvà Á Di Káí.”)

¹⁰ Bé e gbò nen ẹb Jìhóvà naa ólò palàge bọọ ló Jíízọ̀s. (Jọ́ọ̀n 14:31) Nyíè Jíízọ̀s beè palàge bììlà tṍó e ba gbáẹ bel kọ à on Bàrì vaá tú kọ́ọ̀ kyọ̀ tẹlẹ boo béè a Tẹ̀. Níà nú ea náa vaá a beè tã̀àgã ló Bàrì kọọ̀: “Nà Tẹ̀, be à válí, ò tú noní lọlím sĩ́” ẽ́. (Máát. 26:39) Jíízọ̀s beè naa kọọ̀ béè Jìhóvà á di káí tení dú ló gè bọ́ló dẹ̀lẹ̀ nyíé boo dọ̀ọ̀mà tṍó ea ú.

11. Mósĩ́ deè ní e Jíízọ̀s beè zogè kọ à palàge vulèè gbò nen ẽ́? (Jọ́ọ̀n 13:1)

¹¹ Nu ààaá nóòmài kọọ̀ Jíízọ̀s ólò palàge ẹ̀b nú ea kil ló gbò nen, bọọ èlmà tõ̀ò, pá a gbò nyòòne nvée. (Pró. 8:31; bugi Jọ́ọ̀n 13:1.) Jíízọ̀s beè nyimá kọ àé úè nyaaló ú vaá dõona kà gbò tóm ea é síè gbẹá boo kunukẽ̀í é palàge tàvàlà. Níì áá boo béè kọ Jíízọ̀s vulè Jìhóvà ní ea beè naa kọ á sí gbò tómá ẽ́ nì, sõò a beè naa vó boo béè kọ à vulè gbò nen. Jíízọ̀s beè zogè kọ à palàge vulèè gbò nen tení dú ló gè kọ́ kpẹ̀a, noomà va nu, vaá nvèè bá nè va. Bã̀àna deé e bà fẹ́ Jíízọ̀s, a beè logí kpóótọọ̀ pá a gbò tóm, siè va kpóó ló, noomà va nu, vaá nvèè va nyíé gbàà. (Jọ́ọ̀n 13:​12-15) Bã̀àna tṍó e Jíízọ̀s beè di boo té tã̀àgã̀, a beè naa kọ neǹ zib ea beè dìé kpàn á ié ból dẽesĩ́ vaá zogè kọ à  íèè tọa ló kilma ló a kà tení dú ló gè kọ́ nè Jọ́ọ̀n kọ á ẹ̀b nú ea kilíé ló. (Lúùk 23:​42, 43; Jọ́ọ̀n 19:​26, 27) Jíízọ̀s beè zogè kọ à vulèè gbò nen tṍó ea úí boo, vaá a beè naa nagé vó tení dú gè tú lé bá sẹ̀ẹ̀mà gbò nen tṍó ea beè di boo kunukẽ̀í.

12. Mósĩ́ deè ní e Jíízọ̀s gé nveè bá nèi kátogóí é?

¹² À dú kà-kà kọọ̀ áá “enè tóm,” ní e Jíízọ̀s beè úí boo é, sõò à dì ea gé náa gã́bug lé nu nèi. (Róm̀ 6:10) Mósĩ́ deè e? À dì ea gé sí tóm agẹlẹ bá kọbé è láá ié bélè ea aa ló a ú vààa gyọ́ọ. Bugi togó boo sìgà tóm ea gé sí kátogóí. À gé sí tóm dì belí bẹẹ Méné, Pọ̀b Neǹ Vààla Gyọ́ọ, nè togó boo bõ̀ònatõ̀ò Bàrì. (1 Kọ́r. 15:25; Ẹ́fẹ. 5:23; Híb. 2:17) Ẹlẹ ní ea di togó gè bõonè ló gbò e Bàrì beè tṍ nóo ból nè gbele gã́bug nen e bà é tõó bookunukẽ̀í, ea dú tóm ea é sí lọ̀l besĩ́ pọ̀b kpo tã̀àgã̀ kálá íná kùbmà. b (Máát. 25:32; Máàk 13:27) À ólò naa kọọ̀ pá a gyóòlo á ié gbò nú e bà íe bíi ló kọbé bà láá kilsĩ́ gè bọ́ló dẹ̀lẹ̀ nyíé boo nè Jìhóvà mm̀ dee-deè nvéè deeí. (Máát. 24:45) Vaá àé kilsĩ́ gè ẹ̀b nú ea kilíí ló mm̀ enè tõ̀ò gbáá ea é bẹl. Mm̀ kà-kà, Jìhóvà beè nèi a Sã́áná kọbé à náa gã́bug lé nu nèi!

KILSĨ́ GÈ NÓ NU

13. Mósĩ́ deè ní eo é láá kilsĩ́ gè nó nú ea kil ló vulè e Jìhóvà nè Jíízọ̀s íe kìlmàí ló é?

¹³ Òé láá kilsĩ́ gè nó nu ea kil ló vulè e Jìhóvà nè Kráìst Jíízọ̀s íe kìlmàí ló be ò kilsĩ́ gè bugi togó boo gbò lé nu e ba ni náa nèi. Be à sẹlẹ, nyòòmà tṍó Sẹ̀lẹ̀nù Ge Kẽ̀èa Boo Ú Kráìst gbááí, òé láá tú ọ̀ẹ̀ dẽe bùgmà ene kà kpá ea di mm̀ Kpá Káí ea kọ́ nú ea kil ló gbò nú e Jíízọ̀s beè naa tṍó ea beè di boo kunukẽ̀í. Ó gá di boo béè bé eo é náa vaá ò bugi gã́bug vaá ò gbálá tṍó eo gé bugi. Tãa vó, tú ọ̀ẹ̀ dẽe bùgmà kọbé ò mon dõona kà gbò bug ea náa vaá à bọ́ló kọ ó vùlè Jìhóvà nè Jíízọ̀s. Tṍó eo ni náa vó lọ̀l, zọ̀ dõona gbò loá bel boo gbò nú eo ni nó.

14. Dẹ̀ẹ̀a boo nú ea di mm̀ kpá Psalm 119:​97, mósĩ́ deè ní e gè gbĩ́tẽ́ ló nu é nveè bá nèi kọ é kilsĩ́ gè nó nú ea kil ló nu ààaá nè dõona kà gbò nú e Kpá Káí nóòmà ẽ? (Ẹ̀b nàgé fòtó.)

¹⁴ Be o tú gã́bug gbáá tõoma mm̀ kà-kàí, àé láá tõó ní ló kọọ̀ náa é válí gè nó ãa nú ea kil ló bé e Bàrì dú Bàrì lé bèèla  naa, nu ààaá, nè bé e Bàrì vulèi naa. Kà-kà bel ea dì dú kọọ̀, èé láá kilsĩ́ gè nó ãa nu ea kil ló táaa kà nú e kólì béeá àbèè dõona kà gbò togó bel. Vóà naa, éé ní eo é láá naa ẽ́? Bugi, vaá ò bugi togó boo gbò nú eo nóò lọl mm̀ bẹẹ gbò kpá. Tṍó eo bugì dọ̀ Kpá Káí e nóo láà dã́ ból ló, gbĩ́tẽ́ ló nú ea kil ló. Tṍó eo ni náa vó lọ̀l, tú zivè deè deeá bùgmà togó boo ãa nú eo nóò ea kil ló Jìhóvà, a Sã́áná nè vulè e bà íe kìlmà ní ló.​—Bugi Psalm 119:97.

15. Éé ní ea náa vaá à dú bíi kọ é kilsĩ́ gè gbĩ́ ãa nu lọl mm̀ Kpá Káí é?

¹⁵ Lóó ni á gá ọọ be nóo nóò ãa nu àbèè nú ea palàge leemá ni buù tṍó eo gé bugi Kpá Káí àbèè ge gbĩ́tẽ́ ló nu. Ò bélì nen ea ólò gbĩ́ nóò kpé. À ólò dú bíi kọ nen ea gé gbĩ́ nóò kpé à ié ĩ̀ìmà vaá tú gã́bug tṍó àbèè dee gbĩimá besĩ́ à kálá mòn. Sõò, bà ólò kilsĩ́ gè naa vó boo béè kọ bà palàge nvèè ka ló bã̀àna ńkem̀ nóò kpé e bà mon. Mm̀ kà-kà, kọ̀láá kà ãa nú e nóò lọl mm̀ Kpá Káí palàge lee èl nóò kpé! (Ps. 119:127; Pró. 8:10) Vóà naa, kilsĩ́ gè bugi Kpá Káí vaá gbĩ́ gbò ãa nú eo é láá nò.​—Ps. 1:2.

16. Mósĩ́ deè ní eé láá nó Jìhóvà nè Jíízọ̀s e?

¹⁶ Tṍó eo gé nó Kpá Káí, gbĩ́ gbò sĩ́deè eo é láá tú gbò nú eo ni nó siimá tóm. Dì belí nu dòòmà bá, nó gè vùlè lé bèèla belí Jìhóvà tení dú ló gè tú lé bá sẹ̀ẹ̀mà dõona gbò. Nó bé e Jíízọ̀s vulè a Tẹ̀ nè dõona gbò naa, vaá ò dí kpènà ló gè naa dénè nú e Jìhóvà kọ́ ó naa nè ge nvèè bá nè dõona gbò bã̀àna tṍó ea tàvàlà ní ló gè naa vó. Gbá ló vó, nó Jíízọ̀s tení dú ló gè kọ́ kpẹ̀a nè dõona gbò naa ní e bà é íe zìgà mm̀ nu ààaá.

17. Éé ní eé ló bel boo mm̀ togó bel ea bẽene níí ẽ́?

¹⁷ Bé e gé dã́ ból ló vaá nvèè ka ló nú e nu ààaá tõó dọ̀ naa, níà bé eé kpáá palàge vùlè Jìhóvà nè a Sã́áná naa ẽ́. Ge naa vó é náa kọ bàá kpáá palàge vùlèi. (Jọ́ọ̀n 14:21; Jém̀z 4:8) Vóà naa, naanii èé tú gbò nú e Jìhóvà ni néi noomá nú ea kil ló nu ààaá. Mm̀ togó bel ea bẽene níí, èé ló bel boo sìgà bélè eé láá ié lọl ló nu ààaá nè bé eé láá palàge zogè kọ è nveè ka ló nú e Jìhóvà ni náa nèi naa.