1. Éé ní eé láá naa kọbé nyíè Jìhóvà ẹ́ẹ ẹ́?

 DÒÒMÀ dẽe ló kọ ò dõò kà lé nu nè nen eo vulè, nyíé ni náa é ẹ́ẹ be nená sọbá nú eo dõò nèeá gbẹẹ́ kẽ! Boo dõona bá, nyíé ni é palàge ẹẹ beè nená ṍá ni zaa vaá nvèè ka ló nú eo dõò nèe ã́. Mósĩ́ deè ní eé láá tú nu dòòmà báí doolé ló nu ààa e Jìhóvà néi ẽ́? Jìhóvà beè lẹ̀ẹ̀là a Sã́áná kọ á úí boo. Nyíée é palàge ẹẹ be è zaava ló nakà nènù e ka di lóá vaá zogè kọọ̀ nyíéi ẹ́ẹ ló vulè ea íe kìlmàí ló, ea náa kọ á nèi nu ààaá!​—Jọ́ọ̀n 3:16; Róm̀ 5:​7, 8.

 2. Éé ní eé ló bel boo mm̀ nakà togó belí é?

² Bé e tṍó gé téní naa, be née ọ́ẹ̀ dẽe èé láá òòà aa ló ge nvèè ka ló nu ààaá. Be è náa vó, àé bélí kọ è sọọ̀ bá nú e Jìhóvà beè nèi gbẹẹ́ kẽ. Kọbé née náà vó, à dú bíi kọ é olòó bugi togó boo nú e Jìhóvà nè Kráìst ni náa nèi. Nakà togó gè nòí é nveè bá nèi kọ é láá naa vó. Èé ló bel boo bélè e íè lọl ló nu ààaá kátogóí nè bélè eé láá ié lọl ló dì deèsĩ́. Èé ló nágé bel boo nú eé láá naa ge zogè kọọ̀ nyíéi ẹ́ẹ ló vulè e Jìhóvà íeí ló, bọọ èlmà tõ̀ò tṍó sẹ̀lẹ̀nù ge kẽ̀èa boo ú Kráìstí.

BÉLÈ E ÍÈ LỌL LÓ NU ÀÀAÁ KÁTOGÓÍ

 3. Mókà bélè ní e íè lọl ló nu ààaá kátogóí é?

³ Kátogóí, è dì e gé íe bélè lọl ló nu ààaá. Dì belí nu dòòmà bá, boo béè nu ààaá, Jìhóvà ólò ia ló bẹẹ pọ́lọ́ nèi. Náa dú bíi kọ àé íè ge ia ló bẹẹ pọ́lọ́ nèi. Sõò, à ia ló nèi boo béè kọ à gbĩ́ gè naa vó. Neǹ ọ́lì sọ́l beè kọ́ bé e nyíée ẹ́ẹ ló bé e Jìhóvà ia ló a pọ́lọ́ naa tṍó ea kọ́ọ̀: “Boo béè kọ ò dúù lé e Jìhóvà, vaá di kpènà ló gè ia ló pọ́ló.”​—Ps. 86:5; 103:​3, 10-13.

 4. Boo béè bà mée ní e Jìhóvà beè nè nu ààaá ẹ́? (Lúùk 5:32; 1 Tímotì 1:15)

 ⁴ Àé láá tõó ló sìgà bẹ̀ì kọọ̀ náa bọ́ló kọ Jìhóvà á ia ló nèi. À dú kà-kà kọ náa bọ́ló kọọ̀ Jìhóvà á ia ló nèi. Neǹ tóm Pọ́ọ̀l beè kọọ̀ “náa bọ́ló kọ bàá [kolìèe] nen e Jíízọ̀s lẹẹlà.” A beè kpáá kọọ̀: “Sõò sàn nyíè Bàrì ní ea túm naamá nen em dúù e.” (1 Kọ́r. 15:​9, 10) Tṍó e ọ́gà ló bẹẹ pọ́lọ́, Jìhóvà ólò ia ló nèi. Ló éé? Níì boo béè kọ à bọ́i ló nì, sõò boo béè kọ à vulèi. Be à tõo ní ló kọ náa bọ́ló kọọ̀ Jìhóvà á ia ló nè ni, kẽ̀èa boo kọ a beè nè nu ààaá boo béè gbò e bà náa gbõoma, e bà ọ́gá ló pọ́lọ́ e ba beè sì.​—Bugi Lúùk 5:32; 1 Tímotì 1:15.

 5. É kọ à lelà kọọ̀ é tuumá kọ à bọ́ló kọọ̀ Jìhóvà á ia ló nèi? Baatẽ́.

⁵ Náa bọ́ló kọ é tuumá kọọ̀ Jìhóvà é íè ge ia ló nèi boo béè kọ e tú gã́bug gbáá fã̀àmàe. À dú kà-kà kọọ̀ nyíè Jìhóvà ólò ẹẹ ló dénè tóm e ni sí nèe. (Híb. 6:10) À néi nu ààaá pọ́ì, níì boo béè kọ à kpẽ́émá dénè tóm e ni sí nèe nì. Náa lelà kọ é tuumá kọọ̀ à bọ́ló kọ Jìhóvà á ia ló nèi boo béè dénè tóm e ni sí nèe, be è túúmá naa vó, à tõó dọ̀ kọ née íè bíi ló nu ààaá.​—Doolé ló Gàlésìà 2:21.

 6. Éé ní ea náa vaá Pọ́ọ̀l beè pììgà bé ea kpóó sim tùlà naa gè sí tóm nè Jìhóvà ẹ?

⁶ Pọ́ọ̀l beè nyimá kọọ̀ kọ̀láá bé ea piigàẹ̀ naa, náa bọ́ló kọ Jìhóvà á iàẹ̀ ló neèe. Sõò, éé ní ea beè naa kọ Pọ́ọ̀l á pììgà bé ea kpóó sim tùlà naa gè sí tóm nè Jìhóvà ẹ? A beè naa vó mm̀ ge zogè kọọ̀ nyíée ẹ́ẹ̀lìẹ̀ ló sàn nyíe e Jìhóvà íe kilmàèé ló. (Ẹ́fẹ. 3:7) Dì belí Pọ́ọ̀l, èé kilsĩ́ gè tú bẹ̀à sã́ bùlà siimá tóm nè Jìhóvà níì boo béè kọ à bọ́ló kọọ̀ á iéi sàn nyíé ló nì, sõo ge zogè kọ nyíéi ẹ́ẹ́ ló nú ea ni náa nèi boo béè kọọ̀ è vulèe.

 7. Mókà dõona sĩ́deè ní e láá ié bélè lọl ló nu ààaá kátogóí é? (Róm̀ 5:1; Jém̀z 2:23)

⁷ Dõona sĩ́deè eé láá ié bélè lọl ló nu ààaá kátogóí dú gè ié kà lé gbaa ló kilma ló Jìhóvà. a Dì belí bé e beè kọ́ mm̀ nakà togó bel e beè nòa naaá, tṍó e bà maníi, nèe beè ié lé gbaa ló kilma ló Jìhóvà. Sõò boo béè nu ààaá, è gbóò láá “zọ̀ Bàrì naaá fẹ́ẹ́-fẹẹ̀ ló” vaá tõo bã̀é ló.​—Bugi Róm̀ 5:1; Jém̀z 2:23.

 8. Éé ní ea náa vaá à bọ́ló kọ é õá Jìhóvà zaa ló nèà deè e íè ge tã̀àgãé ló é?

⁸ Tã̀àgã ló Bàrì dú ene kà pọ̀bkà nèà deè e íè boo béè kọọ̀ à náa kọ é tõo bã ló Jìhóvà. Níì áá tṍó e dénè bẹ̀ì bṍònà vaá enè nen à tã̀àgã̀i ló Bàrì boo ní e Jìhóvà ólò dã̀e nì, sõò à ólò dã nagé tã̀àgã ló buù bẹ̀ì. Tã̀àgã ló Bàrì ólò naa kọọ̀ é ié dĩ̀ìnè ló bùlà, vaá naa kọ é ié lé gbaa ló kilma ló Jìhóvà. (Ps. 65:2; Jém̀z 4:8; 1 Jọ́ọ̀n 5:14) Jíízọ̀s beè olòó tã̀àgã ló Bàrì tṍó ea beè di boo kunukẽ̀í boo béè kọ a beè nyimá kọọ̀ Jìhóvà é dã́è a tã̀àgã ló, vaá ge tã̀àgã ló Bàrì é náa kọ a gbaa ló kilma ló a Tẹ̀ á palàge agaló. (Lúùk 5:16) Nyíéi palàge ẹẹ boo béè kọọ̀ tení dú ló ú vààa gyọ́ọ̀ Jíízọ̀s, è láà bã̀àà kóò Jìhóvà vaá kọ́ bé e nu tọ́aí ló naa nèe mm̀ tã̀àgã ló!

BÉLÈ EÉ LÁÁ IÉ LỌL LÓ NU ÀÀAÁ DÌ DEÈSĨ́

 9. Mósĩ́ deè ní e nu ààaá é dọ bélè nè gbò gyóòlo Jìhóvà e bà bọ́lò dẹ̀lẹ̀ nyíé boo dì deèsĩ́ ẽ́?

⁹ Mósĩ́ deè ní e gbò gyóòlo Jìhóvà e bà bọ́ló dẹ̀lẹ̀ nyíé boo é íe bélè lọl ló nu ààaá  dì deèsĩ́ ẽ́? Jìhóvà é né va dùm e bè náa tá. Gã́bug nen ólò ẹ̀b kọọ̀ ge tõó dùm dọ̀ dè-dè náa é láá valí boo béè kọ gbò nen ólò ù. Sõò tóm̀ bùlà e Jìhóvà beè ié kilma ló gbò nen dú kọọ̀ é tõó dùm dọ̀ dè-dè. Dénè nen gáẹ̀ beè tõó dùm dọ̀ dè-dè be Ádàm náa beè sí pọ́lọ́. Náa kal ló béè kọ àé láá tõoí ló kọọ̀ gè tõó dùm dọ̀ dè-dè náa é válí, èé láá agala boo kọọ̀ dì deèsĩ́ èé beè ié dùm e bè náa tá boo béè kọọ̀ Jìhóvà a náa kọ níí á valí tení dú ló gè lẹ̀ẹ̀là a Sã́áná kọ á úí boo.​—Róm̀ 8:32.

10. Éé ní e gbò e Bàrì beè tṍ nóo ból nè na gbò naanà bólá gé ẹb dẽesĩ́ gè iéé?

¹⁰ Jìhóvà gbĩ́ kọ é olòó bugi togó boo dùm e bè náa tá kátogóí, náa kal ló béè kọọ̀ à dú tã́áná dee bá eé beè ié dì deèsĩ́. Gbò e Bàrì beè tṍ nóo ból gé ẹb dẽesĩ́ gè kil káála gé zọ̀ Jíízọ̀s bẹl boo kunukẽ̀í. (Kùùà 20:6) Na gbò naanà bólá gé ẹb dẽesĩ́ gè tõó dùm dọ̀ de-de mm̀ Páradaìs gbẹá boo kunukẽ̀í, tṍó e nyaa ló, bììla nyíe nè mòn tã̀àgã̀ náa é dinà. (Kùùà 21:​3, 4) É kọ ò dṹùnà na gbò naanà bólá e bà íe ból dẽesĩ́ gè tõó dùm boo kunukẽ̀í dọ̀ de-de? Jìhóvà beè dèm gbò nen kọ bàá tõó boo kunukẽ̀í dọ̀ dè-dè. Vóà naa, ge tõó boo kunukẽ̀í dọ̀ dè-dè é náa kọ nyíéi á palàge ẹẹ.

11-12. Mókà gbò tã́áná dee bá ní e ẹb dẽesĩ́ gè ié mm̀ Páradaìs e? (Ẹ̀b nàgé fòtó.)

¹¹ Dòòmà dẽe ló bé e dùm é meà naa gbẹá mm̀ Páradaìs boo kunukẽ̀í. Tṍóá, nóo é beè ié ná tã̀àgã̀ bùlà kilma ló zọ̀ ló àbèè ú. (Àìz. 25:8; 33:24) Jìhóvà é né ni kọ̀láá kà lé nú eo íè bíi ló. É kọ àé tan ni gè palàge nó nú ea kil ló gbò nom, àbèè ge nó gè tú gòmà kpaamá sọ́l, sẹ̀ àé tan ni ge nó gè tã́ nu ẽ́? Mm̀ Páradaìs, èé íe bíi ló gbò e bà nyímá tẽ́ gè tã́ tọ vaá tìb tọ nè gbò e bà é fó nu. Mm̀ kà-kà, èé íe nagé bíi ló gbò e bà é bul gyã́á, naa gbò nuù síìmà tóm vaá ẹ̀b nú ea kil ló gbò nú e ba  beè fò. (Àìz. 35:1; 65:21) Ge tõó dùm dọ̀ dè-dè é náa kọ ó ié tṍó gè noomá dénè núí, nè dõona kà gbò nu.

¹² Nyíéi é palàge ẹẹ gè zaava ló gbò e bà é kẽeà aa kemà ú! (Tóm 24:15) Dòòmà dẽe ló bé eo é dé kpéè ló gè kpáá nó nú ea kil ló Jìhóvà nè dénè nú ea beè dèm naa. (Ps. 104:24; Àìz. 11:9) Ní ea palàge dú lé lọ̀l vaá à lee dú kọọ̀, òé beè fã̀ Jìhóvà boo bá ea bọ́ló, nóo é beè sí ná pọ́lọ́ naa ní eo é íe bíi ló gè bàn ia ló lọ̀líé bá! É kọ òé pee nèà deè ge tõó dùm dọ̀ dè-dè boo béè “ge tõo mm̀ kpéè ló pọ́lọ́ mm̀ gbálà ńkem̀ tṍó”? (Híb. 11:25) Ẽ́èe! Tã́áná dee bá eé beè ié dì deèsĩ́ palàge bọọ èl kọ̀láá kà nú eé láá ié mm̀ nakà bàlà booí. Kẽ̀èa boo kọọ̀ Jìhóvà é ḿm̀-mè gbò nú ea beè zìgà. Née gáẹ̀ beè láá ié gbò tã́áná dee báí beè Jìhóvà náa beè vùlèi vaá lẹ̀ẹ̀là a Sã́áná kọ á tú a dùm vaamái gyọ́ọ boo!

ZOGÈ KỌ NYÍÉ NI Ẹ́Ẹ LÓ VULÈ E JÌHÓVÀ ÍEÍ LÓ

13. Mósĩ́ deè ní eé láá zogè kọ nyíéi ẹ́ẹ ló vulè e Jìhóvà íe kìlmàí ló é? (2 Kọ́rìnt 6:1)

¹³ Mósĩ́ deè ní eé láá zogè kọọ̀ nyíéi ẹ́ẹ kọ Jìhóvà néi nu ààaá ẹ́? Èé láá naa vó tení dú ló ge tú gè sí tóm nèe naamá túá kà nú mm̀ bẹẹ dùm. (Máát. 6:33) À lelà naa vó boo béè kọ Jíízọ̀s beè ù “kọbé gbò e bà di dùm náa kilsĩ́ gè naa baála lee ló, sõò ge naa lee ló nen ea beè ù vaá Bàrì à kẽée lọl kemà ú boo béè baalaá.” (2 Kọ́r. 5:15) Jìhóvà a tói sàn vaá ia ló nèi, vóà naa, èé piigà kọ̀láá bé e bẹẹ kpóó sim tùlà naa kọbé è láá fã̀e boo bá ea bọ́ló vaá zogè kọ nyíéi ẹ́ẹ ló gbò nú ea ni náa nèi.​—Bugi 2 Kọ́rìnt 6:1.

14. Mósĩ́ deè ní eé láá zogè kọ è dẹlẹ̀ nyíé boo gbò tùle e Jìhóvà gé néi ẽ́?

¹⁴ Èé láá zogè nàgé kọ nyíéi ẹ́ẹ ló vulè e Jìhóvà íe kìlmàí ló, tení dú ló gè dẹlẹ́ẹ nyíé boo vaá tõó boo gbò tùle ea néi. Mósĩ́ deè ní eé láá naa vó é? Èé láá naa vó tení dú ló gè bugi togó boo gbò nú e Jìhóvà gbĩ́ kọ é naa tṍó e gé ne béèlàfùl ea kil ló íb tọọ̀ kpá àbèè tóm eé sí. (1 Kọ́r. 10:31; 2 Kọ́r. 5:7) Tṍó e neè béèlàfùl ea zógè kọ è dẹlẹ̀ nyíé boo Jìhóvà, bẹẹ zìgà nè gbaa ló e íè kilma ló Jìhóvà é palàge agaló, vaá èé agala boo kọọ̀ Jìhóvà é néi dùm e bè náa tá.​—Róm̀ 5:​3-5; Jém̀z 2:​21, 22.

15. Mósĩ́ deè ní eé láá zogè kọ nyíéi ẹ́ẹ ló nú e Jìhóvà ni náa nèi tṍó Sẹ̀lẹ̀nù Ge Kẽ̀èa Boo Ú Kráìst e?

¹⁵ Èé láá zogè nàgé kọ nyíéi ẹ́ẹ ló vulè e Jìhóvà íe kìlmàí ló, tení dú ló gè naa kọ̀láá kà nú ea é zógè kọ nyíéi ẹ́ẹ ló nu ààaá tṍó Sẹ̀lẹ̀nù Ge Kẽ̀èa Boo Ú Kráìst. Gbá ló gè noo nu naa ní eé láá sí kẽè Sẹ̀lẹ̀nù Ge Kẽ̀èa Boo Ú Kráìst, èé kólí nágé dõona gbò kọ bàá zọ̀i sì. (1 Tím. 2:4) Baatẽ́ nú  ea é nááá kẽè Sẹ̀lẹ̀nù Ge Kẽ̀èa Boo Ú Kráìst nè gbò eo kólì. Ge zogè va vídiò ea kọlà Éé Ní Eaẹ̀ Naa Vaá À Jíízọ̀s À Ù E? nè Kẽ̀èa Boo Ú Jíízọ̀s é palàge dọ̀ bélè. Gbò kànen mm̀ bõ̀ònatõ̀ò á piiga boo gè kolí gbò e bà gáà sí na nònù domá kè Sẹ̀lẹ̀nùá. Dòòmà dẽe ló íb ẹ́ẹ́-ẹẹ̀ nyíé ea é dí káála nè boo kunukẽ̀í beè sìgà gbò e bà náa gé fanà Jìhóvà kpáá òòà dù gé fã̀e! (Lúùk 15:​4-7) Naanii èé piiga boo gè kànà moǹ kọ̀láá nen ea dú kẽè Sẹ̀lẹ̀nù Ge Kẽ̀èa Boo Ú Kráìst, bọọ èlmà tõ̀ò gbò e níà túá tṍó e bà gé zọ́i sìe, àbèè gbò e bà gáà beè sina mm̀ gã́bug gbáá. È gbĩ́ì kọọ̀ lóó va á dĩ̀ìnà vaá bàá nyimá kọ nyíéi ẹ́ẹ gè mòn va!​—Róm̀ 12:13.

16. Éé ní ea náa vaá àé dú lé be è bọọvẹ̀ gbàà bẹẹ sìtóm kọ̀ kpẹ̀a tṍó Sẹ̀lẹ̀nù Ge Kẽ̀èa Boo Ú Kráìst e?

¹⁶ É kọ òé láá kpáá bọ̀ọ̀vẹ̀ gbàà o sìtóm nè Jìhóvà tṍó Sẹ̀lẹ̀nù Ge Kẽ̀èa Boo Ú Kráìst? Ge naa vó dú kà lé sĩ́deè ge zogè kọ nyíéi ẹ́ẹ ló dénè nú é Jìhóvà nè Kráìst ni náa nèi. Ge bọ̀ọ̀vẹ̀ gbàà bẹẹ sìtóm kọ̀ kpẹ̀a é náa kọ é palàge mòn bé e Jìhóvà gé nveè bá nèi naa, vaá vó é náa kọ é kpáá palàge dẹlẹ́ẹ nyíé boo. (1 Kọ́r. 3:9) Gbá ló vó, pììga boo gè bugi gbò dọ̀ Kpá Káí e ba beè noo nyòòmà tṍó Sẹ̀lẹ̀nù Ge Kẽ̀èa Boo Ú Kráìst ea di mm̀ Olòó Bugi Togó Boo Nú Ea Di Mm̀ Kpá Káí Buù Dee àbèè ní ea di mm̀ Dùm Nè Kpá Bõ̀ònaló Sìtóm Kọ̀ Kpẹ̀a. Òé láá sà nàgé gè kpáá nó nú ea kil ló gbò nú ea di mm̀ gbò dọ̀ Kpá Kaíá.

17. Éé ní ea ólò ẹẹlẹ̀ nyíè Jìhóvà ẹ? (Ẹ̀b ńkpó ea kọ́ọ̀ “ Gbò Nú Eo É Láá Naa Gè Zogè Kọọ̀ Nyíé Ni Ẹ́ẹ Ló Vulè E Jìhóvà Íe Kìlmàí Ló.”)

¹⁷ Be à sẹlẹ, o dìtõ̀ò náa é sọ́ ni tọ́ deè kọ ó tú kọ̀láá kà lọ̀ọ̀gà bùlà ea di mm̀ togó bel ge nòí siimá tóm. Be à dì naa vó, kẽea boo kọ Jìhóvà náa ólò tú nú e náà doolé ló níí dõona gbò, vaá à ólò mòn nú ea dìí nyíe. À mon bé e nyíé ni ẹ́ẹ ló nu ààaá naa.​—1 Sám. 16:7; Máàk 12:​41-44.

18. Éé ní ea náa vaá nyíéi à ẹẹ ló Jìhóvà nè Jíízọ̀s Kráìst e?

¹⁸ Nu ààaá ní ea náa kọ Jìhóvà á ia ló bẹẹ pọ́lọ́, naa kọ é láá bã̀ààe kóò, vaá naa kọ é ié ból dẽesĩ́ gè tõó dùm dọ̀ dè-dè e. Naanii èé ólòó zogè kọ nyíéi ẹ́ẹ ló vulè e Jìhóvà íe kìlmàí ló ea náa kọ é láá ié gbò tã́áná dee báá. (1 Jọ́ọ̀n 4:19) Naanii èé zógè nàgé kọ nyíéi ẹ́ẹ kọ Jíízọ̀s palàge vùlèi vaá tú a dùm vaamái gyọ́ọ boo!​—Jọ́ọ̀n 15:13.