3 TOGÓ BEL GE NÒ
SỌ́L EA GÃ́BUG DÚ 35 “Sai Nú Ea Palàge Dú Lé”
Nè Béèlàfùl Ea Léémá Jìhóvà
“Ge siiá pọ̀ ló Jìhóvà ní ea dú dààà togó nyìmànù ẽ, vaá ge nyimá nu ea kil ló Nen Ea Di Káí Lọ̀l Vaá À Lee ní ea dú dã̀ból ló nu ẽ́.”—PRÓ. 9:10.
NÚ EÉ NÓ
Èé ló bel boo bé eé láá tú nyìmànù, dã̀ból ló nu, nè tàvẹ̀nù nèèmà lé béèlàfùl naa.
1. Mókà ànà-ànà ní e dénè bẹ̀ì ólò kpeesĩ́ ló é?
È ÓLÒ nè béèlàfùl kọ̀láá dee. À ólò valí gè nè béèlàfùl kilma ló íb gyã́á eé dé bòm dee àbèè tṍó eé dáa. Boo tṍó ea ólò tàvàlà ge nè sìgà béèlàfùl. Gbò béèlàfùl e neè é láá tọá ló bẹẹ válá ló, bé e nyíéi é ẹ́ẹ naa, gbò e vulè, àbèè bé e fãà Jìhóvà naa. È gbĩ́ gè nè béèlàfùl ea é dọ bélè nè beele nè pá bẹẹ tọ. Bọọ èlmà vó, è ẹbmà dẽè ge nè béèlàfùl ea é léémá Jìhóvà.—Róm̀ 12:1, 2.
2. Gbò éé ní ea é nveè bá nè ni kọ ó nè lé béèlàfùl e?
2 Òé láá nè kà lé béèlàfùl be (1) ò nyímà nú ea kil ló nú eo gbĩ́ gè naa, (2) bugi togó boo bé e Jìhóvà ẹb nú eo gbĩ́ gè naaá naa, nè (3) tú ọ̀ẹ̀ dẽe bùgmà togó boo buù kà béèlàfùl eo gbĩ́ gè nè. Nakà togó belí é ló bel boo táaa kà nú ea bọ́ló kọ é naaí, vaá àé nveè nàgé bá nèi kọ é bumá bẹẹ kpóó bug.—Pró. 2:11.
NYIMÁ NÚ EA KIL LÓ NÚ EO GBĨ́ GÈ NAA
3. Nè nu dòòmà bá ea kil ló nú ea náa vaá à dú bíi kọ ó zẹ́ẹ́ tú ọ̀ẹ̀ dẽe bùgmà togó boo nú eo gbĩ́ gè naa besĩ́ ò kálà nè béèlàfùl.
3 Túá kà nú ea dú bíi kọ ó naa kọbé ò láá nè lé béèlàfùl, dú gè nyimá nú ea kil ló nú eo gbĩ́ gè naaá. Éé ní ea náa vaá níí à dú bíi é? Dòòmà dẽe ló kọọ̀ nen e kpá lóe gé zọ sí ló neǹ dóm biè boo béè agẹbá zọ̀ ló ea dìé ló. É kọọ̀ neǹ dóm biè é dõogẽ nyimá ló íb bóa ea é ne nená be náa zẹ́ẹ́ ẹ̀bvìe vaá bĩináe sìgà bíb? Náa é náa vó. Òé láá nè nàgé lé béèlàfùl be ò zẹ́ẹ́ tú ọ̀ẹ̀ dẽe bùgmà togó boo nú ea kil ló nú eo gbĩ́ gè naaá nè bé eo é láá naa naa. Mósĩ́ deè ní eo é láá naamá vó é?
4. Dẹ̀ẹ̀a boo nú ea di mm̀ kpá Próvẹẹ̀b 18:13, éé ní eo é náa kọbé ò láá nè lé béèlàfùl e? (Ẹ̀b nàgé fòtó.)
4 Ge olòó bĩiná bíb é nveè bá nè ni kọ ó nyimá ló nú eo gbĩ́ gè naa. Dòòmà dẽe ló kọọ̀ bà kólí ni kè kẽè enè íb sẹ̀lẹ̀nù. É kọ òé sí? Be nóo nyímà ló nen ea é sẹlẹ sẹ̀lẹ̀nùa àbèè nú ea beè noo nyòòmà bé e sẹ̀lẹ̀nùa é sẹẹà naa, àé dú bíi kọ ó bĩináe sìgà bíb ea dì belí: “Gbẹá ãàe vaá mó tṍó ní e sẹ̀lẹ̀nùa é sẹẹà ẹ? É kọ gbò e bà é sí kẽè sẹ̀lẹ̀nùa é bọọ́ tõ̀ò? Mée ní ea é ẹb nú ea kil ló bé e sẹ̀lẹ̀nùa é sẹẹà naa ẽ́? Bà mée ní e bà é sí kẽ ẽ́? Éé ní eo beè noo kọ gbò nen é náa gbẹá kĩá ẽ́? É kọ bà é ténmà míí ea ólò tení dẽè nen?” Ge nyimá ààlaà gbò bíbví é nveè bá nè ni kọ ó láá nè lé béèlàfùl.—Bugi Próvẹẹ̀b 18:13.
Nyimá nú ea kil ló nú eo gbĩ́ gè naa tení dú ló gè bĩiná bíb (Ẹ̀b 4 kpò) a
5. Éé ní ea bọ́ló kọ ó naa tṍó eo ni nyímá nú ea é nááá gbẹá kè sẹ̀lẹ̀nùa ẽ́?
5 Tṍó eo ni nyímá gbò nú ea é nááá gbẹá kè sẹ̀lẹ̀nùa lọ̀l, palàge tú ọ̀ẹ̀ dẽe bùgmà togó boo besĩ́ ò kálá nè béèlàfùl. Dì belí nu dòòmà bá, èé kọ́ vàẹ beè gbò e bà é sí kẽè sẹ̀lẹ̀nùa dú gbò e bà náa ólò tõó boo gbò nòòkúù Jìhóvà, àbèè kọ míí e bà é ṍ ólò tení dẽè nen vaá tọ́ọ̀ nen náa é lẹẹlà bel ló míí e bà é ṍ ẽ́? É kọ nóo bulà kọọ̀ gbò e bà é dí kĩá é láá dè vaá ṍ bìlà? (1 Pít. 4:3) Vaá èé kọ́ vàẹ beè sẹ̀lẹ̀nùa é sẹẹa tṍó e ólò siimá nònù àbèè deé e ólò kọọmá kpẹ̀a ẹ́? Tṍó eo dã́à ból ló bé e dìtõ̀òa é meà naa vaá ò bugi togó boo gbò gáí, àé náa kọ ó nè lé béèlàfùl. Sõò à íe dõona kà nú ea bọ́ló kọ ó naa. O nyímá bé e dìtõ̀òa é meà naa; sõò òé láá bĩiná o bá kọ é kọọ̀ nú ea é nááá kĩá é léémá Jìhóvà?—Pró. 2:6.
BUGI TOGÓ BOO BÉ E NÚ EO GBĨ́ GÈ NAAÁ É TỌ́Á LÓ JÌHÓVÀ NAA
6. Dẹ̀ẹ̀a boo nú ea di mm̀ kpá Jém̀z 1:5, éé ní ea náa vaá à bọ́ló kọ é bàn kọ Jìhóvà á nvèè bá nèi ẽ́?
6 Bàn kọ Jìhóvà á nvèè bá neè ni naa ní eo é nyímá bé e nú eo gbĩ́ gè naa é tọ́aẹ́ ló naa. Jìhóvà zigà kọọ̀ àé neèi nyìmànù kọbé è láá nè béèlàfùl ea é léémáe. À ólò nè nyìmànù “taalẹ bá vaá náa ólò kamí bel ló.”—Bugi Jém̀z 1:5.
7. Mósĩ́ deè ní eo é láá nyimá bé e Jìhóvà ẹb enè íb nú eo gbĩ́ gè naa naa ẽ́? Nè nu dòòmà bá.
7 Tṍó eo ni ban kọ Jìhóvà á le-lé ni dee bá lọ̀l, tú ọ̀ẹ̀ dẽe ẹ̀bmà bé ea áálá o tã̀àgã ló naa. Dì belí nu dòòmà bá: Be ò gé sí ketõ̀ò vaá nóo nyímà deè kĩée eo gé kil, òé láá bĩiná bel nen ea ólò tõó kĩá. Sõò tṍó eo ni bĩ́íná bel nená lọ̀l, é kọ òé téní àà besĩ́ à kálá nè ni ààla? Ẽ́èe, nóo é náa vó. Òé dĩine ló pãane tṍ ló bé ea gé dobá èèlè nè ni naa. Mm̀ tẽ̀ènè sĩ́deèá, tṍó eo ni ban kọ Jìhóvà á nè ni nyìmànù lọ̀l, pììga boo gè nyimá bé ea áálá o tã̀àgã ló naa tení dú gè gbĩ́ nú e Kpá Káí kọ́ kilma ló belá nè gbò nòòkúu ea di mm̀ Kpá Káí eo é láá siimá tóm. Dì belí nu dòòmà bá, tṍó eo gé ne béèlàfùl ea kil ló gè sí kẽè enè íb sẹ̀lẹ̀nù belí ní e beè zẹ́ẹ́ kọ́ nú ea kil lóá, òé láá bugi togó boo nú e Kpá Káí kọ́ kilma ló gè dé bìlà, ge bã̀àà pọ́lọ́ kóò, nè nú ea náa vaá à dú bíi kọ é tú Boǹ Méné Bàrì naamá túá kà nú mm̀ bẹẹ dùm èlmà ge naa nú ea léémái.—Máát. 6:33; Róm̀ 13:13; 1 Kọ́r. 15:33.
8. Éé ní eo é náa kọbé ò láá mòn gbò dùùlà bá deè tṍ eo íè bíi ló é? (Ẹ̀b nàgé fòtó.)
8 Sìgà tṍó, àé dú bíi kọ dõona gbò á nvèè bá nè ni kọbé ò láá nyimá gã́bug nú ea kil ló nú eo gbĩ́ gè naa. Òé láá bĩiná lọ̀ọ̀gà bùlà lọl bá vígà págbálà àbèè vígà pábia e togóe tulà nu. Sõò òé íe nagé bélè be ò gbĩ́tẽ́ ló nú boo o lóó. Gã́bug dùùlà bá deè tṍ di mm̀ bẹẹ gbò kpá gè gbĩimá tẽ́ ló nu, dì belí kpá ea kọlà Research Guide for Jehovah’s Witnesses nè Scriptures for Christian Living. Kẽ̀èa boo kọ o nu sẹ̀ẹ̀a sĩ́ á dú gè nè béèlàfùl ea é léémá Jìhóvà.
Bugi togó boo bé e nú eo gbĩ́ gè naaá é tọ́á ló Jìhóvà naa (Ẹ̀b 8 kpò) b
9. Éé ní ea náa vaá èé láá agala boo kọọ̀ bẹẹ béèlàfùl é léémá Jìhóvà ẹ? (Ẹ́fẹsọ̀s 5:17)
9 Éé ní ea náa vaá èé láá agala boo kọọ̀ bẹẹ béèlàfùl é léémá Jìhóvà ẹ? Túá kà, à dú bíi kọ é palàge nyimá ló Jìhòvà. Kpá Káí kọ́ọ̀ “Ge nyimá nu ea kil ló Nen Ea Di Káí Lọ̀l Vaá À Lee ní ea dú dã̀ból ló nu ẽ́.” (Pró. 9:10) Mm̀ kà-kà, èé íe kà-kà dã̀ból ló nu tení dú ló gè nyimá ló íb nen e Jìhóvà dú, a tóm̀ bùlà, nè nú ea léémáe àbèè nú ea bẽ́émáe. Òé láá bĩiná o bá kọọ̀, ‘Dẹ̀ẹ̀a boo nú em ni nyímá ea kil ló Jìhóvà, mókà béèlàfùl ní em é láá nè kọbé à léémáe ẽ́?’—Bugi Ẹ́fẹsọ̀s 5:17.
10. Éé ní ea náa vaá gè tõo boo gbò nòòkúu ea di mm̀ Kpá Káí à palàge bọọí ló èlmà bé e nu tọ́á ló pá bẹẹ tọ àbèè gbò e bà di mm̀ bẹẹ bon naa ẽ́?
10 Kọbé è láá naa nú ea é léémá Jìhóvà, sìgà tṍó àé dú bíi kọ é naa nú ea bẽ́émá gbò e bà dṹùnài. Dì belí nu dòòmà bá, sìgà tẹ̀ nè kà e bà bulà nú ea kil ló ba nvín é láá tãgĩ bá ba nvín pábia kọ á iá nen ea íe gã́bug kpègè àbèè nen ea é láá lọ̀l gã́bug kpègè ló ba nvín, kọbèè nená náa ólò tú gè fã̀ Bàrì kolmá nu. À dú kà-kà kọọ̀ bà gbĩ́ nen ea é láá palàge ẹ̀b nú ea kil ló ba nvín, sõò mée ní ea é nveè bá nèe kọ á kilsĩ́ gè fã̀ Bàrì e? Jìhóvà ẹb nakà belí naa vàẹ? Ààlaà bíbvá di mm̀ kpá Máátìù 6:33. Mm̀ dọ̀ Kpá Káíá, Jíízọ̀s síèi kpóó ló kọ é ‘zẹ́ẹ́ bùlà ge di kè lẹ̀ẹ̀là bel Bàrì.’ Náa kal ló béè kọ è ólò nvèè ka ló bẹẹ tẹ̀ nè bẹẹ kà vaá è ólò fã̀ dẽè gbò e bà di mm̀ bẹẹ bon, nú ea palàge bọọí ló dú gè naa kọọ̀ nyíè Jìhóvà á ẹẹ.
TÚ Ọ̀Ẹ̀ DẼE BÙGMÀ TOGÓ BOO BUÙ KÀ BÉÈLÀFÙL EO GBĨ́ GÈ NÈ
11. Mókà kpãa e kpá Fílipaì 1:9, 10 ló bel kilma ló ní ea é nveè bá nè ni kọ ó láá tú ọ̀ẹ̀ dẽe bùgmà togó boo buù kà béèlàfùl eo gbĩ́ gè nè ẽ?
11 Tṍó eo ni mon gbò nòòkúu ea di mm̀ Kpá Káí ea é láá nvèè bá nè ni, à dú bíi kọ ó tú ọ̀ẹ̀ dẽe bùgmà togó boo buù kà béèlàfùl eo gbĩ́ gè nè. (Bugi Fílipaì 1:9, 10; ẹ̀b study note kil ló “full discernment” ea di mm̀ New World Translation of the Holy Scriptures.) Tàvẹ̀nù é nveè bá nè ni kọ ó nyimá ló nú ea é silà aa mm̀ buù kà béèlàfùl eo neè. Sìgà tṍó, òé láá vàlẹ̀bá nè béèlàfùl kilma ló nú eo gbĩ́ gè naa. Sõò níì dénè béèlàfùl ní ea ólò valí gè nèe nì. Tàvẹ̀nù é nveè bá nè ni kọ ó láá nè lé béèlàfùl bã̀àna tṍó ea tavàlà ge naa vó.
12-13. Mósĩ́ deè ní e tàvẹ̀nù é nveè bá nè ni kọ ó láá nè lé béèlàfùl kilma ló íb tóm eo é sí é?
12 Dòòmà dẽe ló kọọ̀, ò gé gbĩ́ tóm eo é sí kọbé ò láá nvèè bá nè pá o tọ. Ò monì bàà kà tóm eo é láá sì. Ò gbóó bugi togó boo dénè nú ea kil ló tómá, dì belí bé e tómá meà naa, tṍó e tómá é daaà togó, gã́bug tṍó ea é tú ní bá ge kyã̀à iná kĩée tómá dì, nè dõona kà nú ea bãàa m. Tṍó eo ni bugi togó boo lọ̀l, ò gbóó mòn kọọ̀ pálaa kà tómá dú ní e nen ea gé fã Bàrì é láá sì. Be à sẹlẹ, ò saà ene kà tómá boo béè kọ à léémá ni àbèè kọ bà é kpẽ́ gã́bug kpègè ló. Sõò à íe dõona kà gbò nú ea dú bíi kọ ó bugi togó boo besĩ́ ò kálá sì.
13 Dì belí nu dòòmà bá, é kọ pálaa kà tómá é náa kọ ó gá láá sí nònù? É kọ pálaa kà tómá é náa kọ ó gá di ló pá o tọ naa ní e bà náa é ié kpènà, ẹ́ẹ́-ẹẹ̀ nyíe, vaá naa kọ bàá gá láá tõo bã ló Jìhóvà? Ge bĩiná o bá gbò bíbví é nveè bá nè ni kọ ó láá sà ge naa “nu ea palàge dú lé,” naamá o gè fã̀ Bàrì nè ge naa bíi ea di ló pá o tọ èlmà ge ká bùlà gbẹẹ́ boo gè ié gã́bug kpègè. Tṍóá, òé gbóó láá nè béèlàfùl e Jìhóvà é tã́ànè dee bá.
14. Mósĩ́ deè ní e gè tú tàvẹ̀nù siimá tóm, nè ge ié vulè é nveè bá nèi kọ é gá naa nú ea é sívè dõona gbò e?
14 Tàvẹ̀nù é nveè bá nèi kọ é bugi togó boo bé e béèlàfùl e neè é láá tọá ló dõona gbò naa, kọbé née náà nú ea é ‘sívè dõona gbò.’ (Fíl. 1:10) Níí palàge dú bíi tṍó e gé ne béèlàfùl kilma ló nu gè nveà nè bé eé sẹẹà gyáa naa. Dì belí nu dòòmà bá, àé láá ié enè íb nveà nu àbèè bá gè sẹ̀ẹ̀mà gyáa ea léémá ni. Sõò, èé kọ́ vàẹ be kọ̀là ló àbèè bá gè sẹ̀ẹ̀mà gyáaá é bẽ́émá sìgà gbò e bà di mm̀ bõ̀ònatõ̀ò àbèè gbò e bàá gé mm̀ bõ̀ònatõ̀ò ẽ? Tàvẹ̀nù é nveè bá nèi kọ é nvèè ka ló bé e nu tọ́a vá ló naa. Vulè é nveè bá nèi kọ é naa nú ea é léé “ló dõona neǹ,” vaá àé náa nagé kọ é naa nú mm̀ kuna-kuna bá. (1 Kọ́r. 10:23, 24, 32; 1 Tím. 2:9, 10) Ge naa vó é nveè bá nèi kọ é nè béèlàfùl ea zógè kọ è vulè vaá fã̀ dẽè dõona gbò.
15. Éé ní ea bọ́ló kọ ó bugi togó boo besĩ́ ò kálá nè béèlàfùl ea palàge dú bíi é?
15 Be ò gbĩ́ gé nè béèlàfùl ea palàge dú bíi, bugi togó boo nú ea bọ́ló kọ ó naa besĩ́ ò kálá nè béèlafùlá. Jíízọ̀s beè noomài kọọ̀ é zẹ́ẹ́ “tenmà dẽe ló íb kpègè” e nú e gbĩ́ gè naa é sí. (Lúùk 14:28) Bugi togó boo gã́bug tṍó, nú eo íè, nè nú ea é tú ní bá kọbé béèlàfùl eo gbĩ́ gè nèa láá ié togó. Sìgà tṍó, àé dú bíi kọ ó zọ̀ pá bọọ tọ loá bel kilma ló nú e buù nen é náa kọbé béèlàfùl eo gbĩ́ gè nèa láá ié togó. Éé ní ea náa vaá à dú bíi kọ ó zẹ́ẹ́ naa gbò nuí ẽ́? Ge naa vó é náa kọ ó mòn nú ea dù bíi kọ ó nyaaná bá ló àbèè dõona kà nú eo é láá naa ea léè èl béèlàfùl eo beè zẹ́ẹ́ nèa. Tṍó eo zọọ̀ pá bọọ tọ loá bel boo vaá ò pãane tṍ ló ba lọ̀ọ̀gà bùlà, àé nveè bá nè ni kọ o béèlàfùl á ié togó.—Pró. 15:22.
NÈ BÉÈLÀFÙL EA PALÀGE DÚ LÉ
16. Éé ní ea é láá nvèè bá nè ni kọ ó nè béèlàfùl ea é dọ bélè e? (Ẹ̀b nàgé ńkpó ea kọ́ọ̀ “ Bé Eo É Láá Nè Lé Béèlàfùl Naa.”)
16 Be ò náa gbò nú e beè zẹ́ẹ́ kolí béeá, òé ne lé béèlàfùl. Ge naa gbò nú eo é láá naa vaá bugi togó boo gbò nòòkúu ea di mm̀ Kpá Káí é nveè bá nè ni kọ ó nè béèlàfùl ea léémá Jìhóvà. Tṍóá, òé gbóó láá bàn Jìhóvà kọ á nvèè bá nè ni naa ní eo béèlàfùl é íe togó.
17. Éé ní ea é nveè bá nè ni kọ ó láá nè lé béèlàfùl e?
17 Kọbèè à gá náa vaá o beè nè lé béèlàfùl tṍó ea kil nvéeá, kẽ̀èa boo kọọ̀ nú ea é láá nvèè bá nè ni kọ ó nè lé béèlàfùl dú gè dẹ̀ẹ̀a boo nyìmànù ea aa bá Jìhóvà, níì nú eo nyímà àbèè nú eo ni náa nì. Áá Jìhóvà ní ea é láá nè ni kà-kà nyìmànù, dã̀ból ló nu, nè tàvẹ̀nù ẽ, vaá gbò nuí é nveè bá nè ni kọ ó nyimá nu. (Pró. 2:1-5) Jìhóvà é nveè bá nè ni kọ ó nè béèlàfùl ea é léémáe.—Ps. 23:2, 3.
SỌ́L EA GÃ́BUG DÚ 28 Ge Bã̀àà Kóò Jìhóvà
