Nda beè mèà gbẹá St. Paul, Minnesota, U.S.A., mm̀ gbáá 1954. Pá beéle tọ náa beè dú tãa àbèè ge bã méné, vaá e beè olòó sì Tọ Bàrì Fádá. Nda ní em beè egè bàà ńkàneǹ zẹ̀ẹ̀ vòò kà nvín e ńdáà tẹ̀ nè ńdáà kà beè ié é. Tṍó em beè di dí pá nvín, m beè sí tọọ̀ kpá e pá Fádá ní e ba beè iéé, vaá ba beè túm naamá nen ea é nveè bá nè Fádà tṍó e tọ Bàrì gé kilsĩ́ ẽ́. Sõò, ním beè nyimá gã́bug nú ea di mm̀ Kpá Káí. Náa kal ló béè kọ m beè zìgà kọ Bàrì ea beè dèm dénè nu dì, ním beè zìgà kọọ̀ tọ Bàrì Fádá é láá nvèè bá nèm kọ ḿ láá fã̀ Bàrì leevè.

Mm̀ nà túá gbáá gbẹá tọọ̀ kpá gè nó log ea kọlà William Mitchell College, Gbò Neǹ Ditõ̀ò Jìhóvà beè kòn bá nvéè nà nù tọ. M beè dì em géè ẹẹlẹ̀ nu, vaá dóm nè vaá beè zìgà nèm mm̀ gbọ́ọ́-gbọọ̀ ló kọ bàé beè kpáá oòàẹ kẽ duè. Tṍó e bà dú, m beè bĩiná vá bàà kà bíb kọọ̀: “Éé ní ea náa vaá nu à leé ló gbò pọ́lọ́ èlmà gbò lé é?” nè “Éé ní ea é láá naa kọ nyíè nen a ẹẹ ẹ́?” M beè tú kpá ea kọlà The Truth That Leads to Eternal Life nè New World Translation of the Holy Scriptures, ea íe  grín kóó lọ̀l vá bá. M beè zìga ge zọ̀va noá Kpá Káí. Níí beè kùùlàm dẽe. Nyíém beè palàge ẹẹ gè nyimá kọọ̀ Boǹ Méné Bàrì ní ea dú bẹbẹ̀l ea é beè lẹ̀ẹ̀là bel ló gbò nen e bà di boo kunukẽ̀í ẽ́. M beè gbóó mòn kọọ̀ bẹbẹ̀l gbò nen aa deè dọ̀, vaá a náa kọọ̀ gbò nen á ié gbele tõ̀ò nyaa ló, mòn tã̀àgã̀, pọ́lọ́ bèèla, nè bììla nyíe.

Mm̀ gbáá 1982, m beè kìn lóó nè Jìhóvà vaá dììa múú mm̀ áá kà gbááá gbẹá pọ̀b kà bõ̀ònaló ea beè sẹ̀ẹ̀à gbẹá St. Paul Civic Center ea togó bel beè kọọ̀ “Kingdom Truth.” M beè òòa kẽ kil civic center sè ea bẽene gé emí nà ẹ̀bmà ea é túm naamá neǹ kpóò log. Túá ból e bãà mm̀ òb ẽ́ ló gbááá, m beè mòn kọ m̀ ténì ló nà ẹ̀bmà, ea náa kọ ḿ gbóó dú neǹ kpóò log.

M beè zọ̀ Mike Richardson ea géè sí tóm tọ nàà tóm ea di Brooklyn nyòònà gbẹá pọ̀b kà bõ̀ònaló ea togó bel beè kọ̀là “Kingdom Truth” a, vaá a beè beè baatẽ́ kọọ̀ a beè dú gè nvèè tọọ̀ tóm gbò e bà gé ẹb nú ea kil ló log ló pọ̀b tọ nàà tóm. Nda beè kẽ̀èa boo gbò moǹ bel gbálà Ítiópìà ea ẽ́á mm̀ kpá Tóm 8:36 vaá gbóó bĩìà nà bá kọọ̀, ‘Éé ní ea é náa kọ ḿ gá nvèè bée ló gè sí tóm Tọọ̀ Tóm Gè Kpó Logí é?’ Vó beè naa kọ ḿ nvèè bée ló gè sí tóm Bẹ́tẹẹ̀l.

Nyíè ńdáà tẹ̀ nè ńdáà kà náa beè ẹẹ kọ m̀ dúù enè Neǹ Ditõ̀ò Jìhóvà. Ńdáà tẹ̀ beè bĩinám kọọ̀, mókà bélè ní e olo dì belí neǹ kpóò lóg é íe lọl ló gè sí tóm nè Watchtower ẹ. M beè baatẽ́ nèe kọọ̀ m̀ gé nveè bá tóm. M beè kọ́ nèe kọọ̀ bàé kpẽ́ ńkem̀ kpègè nèm buù ẽ́, dì belí nagbò e bà ólò sí tóm Bẹ́tẹẹ̀la.

Boo béè kọ m beè zìgà ge sí tóm tọ bèèla, ním beè láá vàlẹ̀ bá sí tóm Bẹ́tẹẹ̀l tṍóá, vó beè naa ḿ dààmà togó gè sí tóm Bẹ́tẹẹ̀l ea beè di Brooklyn, New York, mm̀ gbáá 1984. Ba beè kọ ḿ sí tóm tọọ̀ tóm e bà ólò ẹ̀b nú ea kúu log. Nyìmànù em beè íe tṍó em géè sí tóm gbẹá tọ bèèlaá, beè kpoogè m dee ló nyòòmà nú ea gé dú sĩ́.

Ba beè zalí pọ̀b tọọ̀ Stanley ea di Pọ̀b Boǹ Jersey, ló November 1983. Pá vígà beè bĩiná ténma ea aa bá gbò e bà gé bẹl be bàé láá siè tóm ló tọá. Tṍó e pá vígà íná ló gbò e bà gé bẹl kĩá, ba beè kọ́ nè va kọọ̀ bà gbĩ́ì ge sẹlẹ̀ẹ̀ pọ̀b kà bõ̀ònaló Gbò Neǹ Ditõ̀ò Jìhóvà mm̀ pọ̀b tọọ̀ Stanley. Níá beè domà tã̀àgã̀. Ge kọọ̀ pọ̀b tọọ̀ Stanley beè di bon kiẽ́e ki ólò palàge kyã̀à, beè naa kọọ̀ gbò bẹbẹ̀lí á gá zìgà ge nè va kpá. Pá vígà beè emí kpá ló belí kilma tọ bèèla, sõò tọ beelaá náa beè zìgà ge bã mm̀ belá.

 Túá sè em ínà Bẹ́tẹẹ̀l, bõ̀ònatõ̀òí beè emí kpá ló belá tẹlẹ pọ̀b tọ bèèla ea beè di dóá kọ bà náa zigà ge neè va kpá. Boo béè kọọ̀ m̀ ã́àa tú bàà gbáá siimá tóm mm̀ tọ bèèla ea di St. Paul, Minnesota, m beè palàge nyimá ló íb bel ea di kẽ. Ene kà gbálà kpóò log ea beè di dẽè beélè belá beè kọọ̀ bà ólò sẹlẹ nàànù e gbò nen ólò sí kè kẽ mm̀ pọ̀b tọọ̀ Stanleyí, bà ólò tõo zogègì fíìm, vaá bìlà sọ́l. Éé ní ea náa vaá náa é lelà ge sẹlẹ nàànù bõ̀ònaló fã̀ ẽ? Pọ̀b tọ bèèlaá beè bã mm̀ belá vaá beelá kọọ̀ Pọ̀b Boǹ Jersey náa uú boo bẹẹ dì pọ́ì ge fã̀ Bàrì. Tọ bèèlaá beè nè gã́ kọọ̀ pọ̀b boní á nè va kpá ge sọ̀ va tọ́ deè, vaá nda beè gbóó dààmà togó gè mòn bé e Jìhóvà tã́ànè dee bá a bõ̀ònàtõ̀ò tení dú ló tọọ̀ tóm gbò e bà ólò ẹ̀b nú ea kil ló log naa. Nyíè nda beè palàge ẹẹ kọ m beè di ló belí.

Pá vígà beè dààmà togó gè gbóó sí tóm tọá, vaá Àsémblì Họ́ọ̀l ea di Pọ̀b Boǹ Jersey ní e ba beè tõó nvèè kùbmà ló ní ea égè 79 tọọ̀ kpá Gílẹẹ̀d ea beè sẹ̀ẹ̀a September 8, 1985 e, náa beè toolá enè gbáá tṍó e bà sí tóm ló tọá lọ̀l. Nyíém beè ẹẹ ló nèà deè ge nvèè sãa kúm sìtóm kọ̀ kpẹ̀a tení dú ló gè dũùnà gbò ge kpó log, vaá dĩ̀ìnè ló nè ẹ́ẹ́-ẹẹ̀ nyíe em beè ié bọọ èl kọ̀láá íb ẹ́ẹ́-ẹẹ̀ nyíe em beè ié tṍó em géè sí tóm tọ bèèla besĩ́ m̀ kalá dù Bẹ́tẹẹ̀l. Nda ním beè nyimá kọọ̀ níì íb kele íb nèà deè e Jìhóvà beè sẹ̀ẹ̀ nda ẹ́.

Mm̀ gbò gbáá 1980 a, gbò dóm biè nè pá tọọ̀ biè náa beè olòó nvèè ka ló tṍó e Neǹ Ditõ̀ò Jìhóvà kọ́ náa é nveàè mii ló. Gbò va gbàà ólò kpee sĩ́ ló gã́bug ànà-ànà boo béè kọọ̀ gbò dóm bèèla ólò ẹ̀b kọọ̀ gbò bia náa íe gã́ gè kọ bàá gá nveenìè va mii ló. Gbò bèèla ólò kọọ̀ be è gbò kà náa zigà kọ bàá nveenìèe va mii ló, bàé láá ú gbẹẹ ba gbò nvín.

Kà lèlà December 29, 1988, mii beè palàge sí ló vígà pábià ea kọlà Denise Nicoleau tṍó ea man a nvín págbálà lọ̀l. A mii beè kil kẽ èlmà 5.0, vaá a neǹ dóm biè beè gbĩ́ gè kọ á zìgà ge nvèà mii ló. Vígà Nicoleau náa beè zìgà. Tṍó e dee zilà, pá tọọ bièa beè sí tọ bèèla kọ bàá neè va kpá ea é náa kọ bàá láá nveenìè mii ló vígà pábiaí. Dóm bèèlaá náa beè zẹ́ẹ́ dã́ bel lọ́l gã́ vígà pábià Nicoleau àbèè a dóm vaá náa beè zẹ́ẹ́ kọ́ nè va kọ à neè kpá pá tọọ̀ bièa kọ bàá nvèèe mii ló.

Deè Friday, ea dú December 30, pá tọọ̀ bièa beè nvèè mii ló Vígà Nicoleau náa kal ló béè kọọ̀ a dóm nè pá ba tọ e ba beè dìé ló tọọ̀ bièa náa beè zìgà. Ló èlà deá, ba beè sii gã́bug pá ba tọ nè ene nen àbèè bàà kà neǹ kànen boo béè kọọ̀ bà náa zìgà kọ bàá nvèè mii ló Vígà Nicoleau. Boo lọ̀ọ̀leè Saturday, ea dú December 31, ba beè nè kpẹ̀a ea kil ló síí-siiá boo níúz pẹ́pà, boo TV, nè boo lédiò beeá  tení ló zivèkà Pọ̀b Boǹ New York nè Long Island.

Boo lọ̀ọ̀leè deè Monday, nda beè zọ̀ Pọ̀b Neǹ Bèèla ea kọlà Milton Mollen loá bel boo belá. M beè baatẽ́ kà kà bel ea di kẽ nèe, vaá nvèè kà m nèe kọ neǹ bèèlaá beè bii bá dẽè kpá kọ bàá nvèèe mii ló ea gáà dã́ tọ́ọ̀ kà bel lọ̀líé gã́. Pọ̀b Neǹ Bèèla ea kọlà Mollen beè kọ́ nèm kọ ḿ dú a tọọ̀ tóm boo fèèbeè deeá gé kọ́ gbò kà kà bel ea kuu belá nè gbò log ea bãàa m neèe. Philip Brumley em géè sí tóm kè kẽ beè zọ̀m gbá tọ sì gé mòn Pọ̀b Neǹ Bèèla ea kọlà Mollen gbẹá a tọọ̀ tóm boo ló èlà deeá. Neǹ dóm bèèlaá beè kolí nágé neǹ kpóò log e pá tọọ̀ bièa kọ á dú kè bila ló belá. Bẹẹ loa sọ́l beè palàge agabá. À íe kiẽ́e ea íná vaá Vígà Brumley á gbóó dààmà togó gè emí nu boo a fóòn vaá kọọmá nèm kọ ḿ “gbọọlẹ̀ ló.” Nú ea émí nèmá beè dú kà lé dùùlà bá deè tṍ, boo béè kọọ̀ súng géè palàge bàm vaá m̀ géè naa kọọ̀ neǹ kpóò log pá tọọ̀ bièa á nyimá kọọ̀ à náa kà pọ́lọ́ nu.

Tṍó e ene kà ávà téní, Pọ̀b Neǹ Bèèlaá ea kọlà Mollen, beè gbóó kọọ̀ belá é dú túá kà bel e bàé zẹ́ẹ́ lò boo lọ̀ọ̀leè deé ea bẽene deeá. Tṍó e gé aa a tọ bèèla, Pọ̀b Neǹ Bèèlaá beè kọọ̀ neǹ kpóò log pá tọọ̀ bièa “íe agẹ tóm gè sí sṍóe.” Níí tõó dọ̀ kọọ̀ náa é válí ló neǹ kpóò log pá tọọ̀ bièa gè zogè tẹlẹ bàlà kẽ kọọ̀ à lelà kọọ̀ pá tọọ̀ biè á tú bá kpóó nvèèmà mii ló Vígà pábià Nicoleau. A beè tõo ḿ ló belí kọọ̀ Jìhóvà géè kọ́ nèm kọọ̀ èé el bá belá. A beè bọọ ḿ ló gè mòn kọọ̀ Jìhóvà túi siimá tóm mm̀ ge naa a bùlà.

E beè tení boo nú eé kọ́ boo lọ̀ọ̀leè deé ea bẽene dọ̀ọ̀mà kà kpã́á tóm bílá deè. Tọ bèèlaá beè di kà ku ló tọ nàà tóm ea di Brooklyn, vóá gã́bug gbò e ba beè olòó sí tóm mm̀ ńkem̀ Tọ E Bà Ólò Ẹ̀b Nú Ea Kuu Log beè sí kĩá. Tṍó e ténì kà neǹ bèèlaá dã́ bẹẹ bel, ba beè kọ bà náa gáẹ̀ beè tenmá kọ bàá nvèèe mii ló. Pọ̀b tọ bèèlaá beè beelá belá leè Vígà Nicoleau vaá kọọ̀, à bé uú boo nú ea lela ló nen gè naa, gè dõogẽ bii bá tẽ́ kpá naa vó e bè nóo zẹ́ẹ̀ dã́ bel lọl gã́ nená.

Pọ̀b tọ bèèla ea di Pọ̀b Boǹ New York beè nvèè sãa kúm kọọ̀ Vígà Nicoleau di lèlà be à kọ́ bàá gá nveenìèe mii ló. Níí ní ea beè dú túá kà bel ea kil ló gè nvèà mii ló e ba beè beelá gbẹá pọ̀b tọ bèèla e nda beè íe nèà  deè ge di dẽe ẽ́. (Ẹ̀b ńkpó ea kọ́ọ̀ “ Ge Bé Èl Bá Gã́bug Bel Gbẹá Pọ̀b Tọ Bèèla Ea Di United State.”) M beè gbaá nágé ló sìgà gbò kpóò log e ba di tọ nàà tóm kilma ló bel gbò pá nvín e bà síi, zààlà dóm nè va, ge zalí nè ge oo tọ, nè bel kunukẽ̀.

Túá tṍó em beè mòn ńdáà vaà, Denise, a beè dú pábia ea dóm beè siíe bá ea géè búmá taà kà nvín. A beè ié pííla ea géè sì gbá ló a tóm gyà deè sĩ́ tóm. Dùm beè palàge tàvàlàẹ́ ló, vaá nyíém beè ẹẹ ló a béèlàfùl ge fã̀ Jìhóvà. Mm̀ gbáá 1992, e beè gbá sí pọ̀b kà bõ̀ònaló ea beè sẹ̀ẹ̀a Pọ̀b Boǹ New York ea togó bel beè kọọ̀: “Light Bearers.” E beè ilá dú dóm nè va enè gbaa aa ló tṍóá. Ge ié va ea tú gè fã̀ Jìhóvà kolmá nu vaá dú nen ea ólò láá bìlà bil dú dõ̀ònù ea aa bá Jìhóvà. Denise beè dú kà lé kpẽ́ em beè ié dénè dee mm̀ bẹẹ dùm.—Pró. 31:12.

Tṍó e beè ilá, gbò pá nvíná beè toolá 11, 13, nè 16 gbáá. Nda beè gbĩ́ gè dú kà lé tẹ̀ kìlmà vá ló, vó beè naa kọ ḿ tú ọ̀ẹ̀ dẽe bùgmà bẹẹ gbò kpá ea ló bel bé e nen é láà dú tẹ̀ boo gbò pá nvín e dõòna kà tẹ̀ ní ea beè bònie naa. E beè tení bá ànà-ànà mm̀ gã́bug gbáá, sõò nyíém beè ẹẹ kọọ̀ gbò pá nvíná túm naamá ba kóò e bà dẹlẹ nyíé boo nè tẹ̀ ea vulè va. È ólò tú bàà bá tuumá pá kóò bẹẹ gbò nvín vaá nyíéi ólò ẹẹ kọ gbò nvín ãaí dìí kpàn.

Mm̀ gbáá 2013, Denise nè nda beè àà kil Wisconsin gé nvèè bá nè bẹẹ gbò tẹ̀ nè kà. A beè bọọ ḿ ló kọọ̀, bà náa beè nvèè kùbma ló nà ge sí tóm Bẹ́tẹẹ̀l. Ba beè gbóó túm naamá nen ea é nveè bá nè tọọ̀ tóm gbò e bà ólò ẹ̀b nú ea kuu gbò bel bẹẹ bõ̀ònatõ̀ò é bá nvee tọ bèèla.

Ló September 2018, m beè mòn kọọ̀ m̀ géè bọọ̀gẹ̀ kọ̀ òò besĩ́ m̀ kalá ló bel. Bẹẹ neǹ dóm biè dò m ẹ̀b, sõò náa beè mòn tọ́ọ̀ nú ea dú boo. Tṍó e tṍó téní, dõòna kà neǹ dóm biè beè kọ́ nèm kọ ḿ gé mòn dõòna kà neǹ dóm biè ea ólò ẹ̀b nú ea kuu togó nen. Ló January 2019, nen ea ólò ẹ̀b nú ea kuu togó není beè mòn kọ m̀ íè ene kà kom e bà kólíe progressive supranuclear palsy (PSP).

Taà deè aa ló deeá, tṍó em géè bilà bìl gànè ló ea ólò palàge leemám, m beè dọ̀ vaá ká-káí bálèm à buná. Ndaa tú gã́bug deé mm̀ na dùm bìlmà nakà bìlà bìl gànè lóí vaá m beè láá olòó bìlà leevè. Vó beè naa kọ ḿ nyimá kọ ním géè láá lẹ̀ẹ̀là nà bel ló bé e kpá lóm géè kyã̀à naa. A beè bọọ́ ḿ ló ge mòn bé e kom e bà kólíe progressive supranuclear palsy (PSP) beè zoogá vaá gbalá naa vaá a beè naa kọ á tàvàlà ḿ ló gè láá ló bel, ge kyã̀à, nè ge sọ̀ọ̀là nú mèn.

Nyíém beè palàge ẹẹ gè tú nà nèà deè em íè dì belí neǹ kpóò log nvèèmà sãa kúm sìtóm Boǹ Méné. Vaá nyíém palàge ẹẹ kọ m emí gã́bug kpá e gbò dóm biè, gbò kpóò log, nè gbò dóm bèèla ólò bugi. M ló nágé gã́bug bel mm̀ ge kpènà gbò níí Jìhóvà kọ bà di lèlà ge láá sà íb bóa e bàé tú e bà náa é nveà mii ló. Nagé, m̀ kọ́ọ̀ dì belí bé e Lúùk beè kọ́ naá mm̀ kpá Lúùk 17:10 ea kọ́ọ̀: ‘Ndaa pọ́ì gyóòlo e bè náa bọ́ ló kọ bà á õá m zaa. Áá tóm e a kuú m ní em beè sì e.’