1. Éé ní e Jìhóvà ni náa nè ni ẽ́?

O BEÈ naa và láá dú enè Neǹ Ditõ̀ò Jìhóvà ẹ? Túá kà, be à sẹlẹ o beè dã́ lé kpẹ̀aí lọl bá o tẹ̀ àbèè o kà, nen eo gé gbái siai tóm àbèè nen eo gbáì diaí tọọ̀ kpá, àbèè tṍó e bà géè kọ́ kpẹ̀a aa tọ dọ tọ. (Máàk 13:10) Tṍóá, nen beè tú gã́bug tṍó zọ̀ọ̀mà ni noá Kpá Káí. Tṍó eo gé nóai nu, o beè gbóó vùlè Jìhóvà vaá nyimá kọ à vulè nàgé olo. Jìhóvà beè naa kọọ̀ ó bã mm̀ kà kàí, vaá ò gbóò dú enè nen ea gé nyoone nvéè Jíízọ̀s Kráìst, eo íè ẹ̀b dẽesĩ́ gé tõó dùm dọ̀ọ̀mà dè-dè. (Jọ́ọ̀n 6:44) Tọ́ọ̀ kà bàà-bàà bùlà á gé ló, nyíé ni ẹ́ẹ kọọ̀ Jìhóvà beè naa kọ nen á noòmà ni kà kà belí naa ní ea tú ni naamá ene kà a gyóòlo.

2. Éé ní eé ló bel boo mm̀ nakà togó belí é?

² Kátogóí e ni nyímá ló kà kà belí, è gbóò ié nèà deè ge nvèè bá nè dõòna gbò kọ bàá zọ̀i tení boo èèlè dùmí. Àé láá valíí ló gè kọ́ Kpẹ̀a aa tọ dọ tọ, sõò àé láá tàvàlàí ló gè noòmà Kpá Káí nen. É kọ níà bé ea ólò tõó ní ló naa ẽ́? Be à dì naa vó, gbò lọ̀ọ̀gà bùlà ea di mm̀ nakà togó belí é láá nvèè bá nè ni. Èé ló bel boo gbò nú ea ólò naa kọ é noòmà nuù gbò nen. Èé ló nágé bel boo bé eé láá bé èlbá gbò nu ànà-ànà ea gáẹ̀ láá òòmài lọl ló gè noòmà Kpá Káí. Túá kà, naanii èé ló bel boo nú ea náa vaá èé íè ge noòmà Kpá Káí, e bè níì áá gè kọ́ kpẹ̀a nì.

3. Éé ní ea náa vaá è ólò kọ́ kpẹ̀a ẹ́?

³ Tṍó e Jíízọ̀s beè di boo kunukẽ̀í, a beè nè bàà kà tóm pá a gbò nyòòne nvée kọ bàá sì. Túá kà, a beè kọ́ nèva kọ bàá vee lé kpẹ̀a ea kil ló Boǹ Méné Bàrì, vaá a beè noòmà va bé e bàé sí naa. (Máát. 10:7; Lúùk 8:1) Dì belí nu dòòmà bá,  Jíízọ̀s beè kọ́ nú e pá a gbò nyòòne nvée é náa tṍó e gbò nen dã́ lé kpẹ̀a e bà vee, nè nú e bàé náa tṍó e gbò nen náa zigà ge pãané va tṍ ló. (Lúùk 9:2-5) A beè kọ nágé bé e sìtóm kọ̀ kpèaí é kọá iná dénè ketõ̀ò naa, tṍó ea kọ́ọ̀ pá a gbò nyòòne nvée é kọ́ kpẹ̀aí nvee gã́bug ketõ̀ò “naa ní e dénè nen é dã́.” (Máát. 24:14; Tóm 1:8) Kọ̀bèè à gá náa vaá gbò nen à dã̀ àbèè kọ bà náa dã́, Jíízọ̀s beè kọọ̀ bàá kilsĩ́ gè vee lé kpẹ̀a ea kil ló Boǹ Méné Bàrì nè gbò nen.

4. Dẹ̀ẹ̀a boo nú ea di mm̀ kpá Máátìù 28:18-20, éé ní eé íè ge naa bií ló tóm gè vee lé kpẹ̀a ea kil ló Boǹ Méné Bàrì e?

⁴ Éé ní ea beè egè bàà kà tóm e Jíízọ̀s beè nè pá a gbò nyòòne nvée ẽ́? A beè kọ́ nèva kọọ̀ bàá noòmà nuù gbò e bàé dú gbò nyòòne nvée kọ bàá gbàntṍ ló dénè a lẹ̀ẹ̀là. Sõò belí bé e sìgà gbò kọ́ naa, é kọọ̀ áá gbò nyòòne nvéè Kráìst mm̀ túá gbò gbááá ní e Jíízọ̀s beè nè tóm gè vee lé kpẹ̀a nè ge noòmà nuù gbò nen ẽ́? Ẽ́èe, Jíízọ̀s beè kọọ̀ tóm ea palàge di bíií é kilsĩ́ gè siá dọ̀ọ̀mà “kùbmà nvéè bàlà booí.” (Bugi Máátìù 28:18-20.) Àé láá dú kọọ̀ Jíízọ̀s beè nè nakà tómá tṍó ea beè sila ló nú ea é sígá ló 500 nen e bà géè nyoonée ã́. (1 Kọ́r. 15:6) Vaá mm̀ kùùà nù ea beè zogè Jọ́ọ̀na, Jíízọ̀s beè tẹlẹ bàlà kẽ kọọ̀ à dúè a bùlà kọọ̀ dénè pá a gbò nyòòne nvée á nvèè bá nè dõòna gbò kọ bàá nó nú ea kil ló Jìhóvà.—Kùùà 22:17.

5. Dẹ̀ẹ̀a boo nú ea di mm̀ 1 Kọ́rìnt 3:6-9, mósĩ́ deè ní e Pọ́ọ̀l bààtẽ́ gbaaló ea di zẹ̀ẹ̀ ge kọ́ kpẹ̀a nè ge noòmà nu ẽ́?

⁵ Neǹ tóm Pọ́ọ̀l beè tú tóm gè naa kọọ̀ gbò nen á nyoone nvéè Kráìst doolé ló tóm gè fó nu, ea zógè kọọ̀ à bọ́ló kọ é naa èlmà áá gè fó nu. A beè kẽeé nyíè pá vígà e ba di Kọ́rìnt kọọ̀: “Nda beè fò, Apọ́lọ̀s à tṍ múú kúm . . . boolo ò dii belii ól Bàrì.” (Bugi 1 Kọ́rìnt 3:6-9.) Dì belí gbò e gé gbá siá tóm boo “ól Bàrì,” níì áá gè fó nu ní eé náaé nì, èé tṍ múú kúm vaá olòó ẹ̀b bé e nú e fóò gé bọọ naa. (Jọ́ọ̀n 4:35) Sõò, è nyímà kọọ̀ Bàrì ní ea ólò naa kọọ̀ nú e fóò á bọọ ẹ́.

6. Gbò éé ní ea bãàà mm̀ bẹẹ tóm gè noòmà nuù gbò nen ẽ́?

⁶ É dì é gé gbĩ́ “gbò e Bàrì beè sà kọ bà é ié dùm e bè náa tá.” (Tóm 13:48) Kọbé è láá naa kọọ̀ gbò nen á nyoone nvéè Kráìst, èé íè ge nvèè bá nèva kọ bàá (1) dã́ ból ló, (2) ziga ló, vaá (3) tú nú e bà nó lọl mm̀ Kpá Káí siimá tóm. (Jọ́ọ̀n 17:3; Kọ́l. 2:6, 7; 1 Tẹ̀s. 2:13) Dénè gbò e bà di mm̀ bõ̀ònatõ̀ò é láá nvèè bá nè gbò e bà gé nó Kpá Káí tení dú ló gè vùlè va nè ge zààvà vá ló tṍó e bà dú nònù. (Jọ́ọ̀n 13:35) À bọ́ló kọọ̀ nen ea ólò noòmà nuù nen á tú gã́bug tṍó nè kói nvèèmà bá nè nen ea gé nóòmà nu naa ní ea é láá bé èlbá “gbò dùlà bel e bè náa dú kà kà.” (2 Kọ́r. 10:4, 5) Àé láá túi gã́bug ẽ́ bá gè nvèè bá nè nen e ólò noòmà nu kọ á láá nyaaná bá ló a sĩ́deè tõò dùm kọbé à láá sìm tùlà ge dììa múú. Sõò, àé dọ bélè nèe be à nyááná bá ló gbò a sĩ́deè tõò dùm.

7. Éé ní ea ólò naa kọ é kọ́ kpẹ̀a vaá naa kọọ̀ gbò nen á nyoone nvéè Kráìst e?

⁷ Éé ní ea náa vaá è ólò kọ́ kpẹ̀a vaá noòmà nu gbò nen kọ bàá dú gbò nyòòne nvéè Kráìst e? Túá kà dú boo béè kọọ̀ è vulè Jìhóvà. Tṍó eo piigà bé eo kpóó sim tùlà naa gè gbàntṍ ló log Jíízọ̀s ea kil ló gè kọ́ kpẹ̀a nè ge noòmà nuù gbò nen kọ bàá nyoone nvéè Kráìst, ò zógè kọ ò vulèè Bàrì. (1 Jọ́ọ̀n 5:3) Nyimá kọọ̀, vulè eo íè kilma ló Jìhóvà ní ea náa kọ ó kọ́ kpẹ̀a aa tọ do tọ ẹ́. Sõò é kọọ̀ túá bólá, a beè valí ní ló gè kọ́ kpẹ̀a nè dõòna gbò? Be à sẹlẹ náa beè valí. É kọọ̀ pọ̀ beè sií ni túá deé eo  beè kọ́ kpẹ̀a aa tọ dọ tọ? Àé láá dú kọ a beè mèà naa vó! Sõò o beè gbàntṍ ló logá boo béè kọ ò nyímà kọọ̀ níà tóm e Jíízọ̀s gbĩ́ kọ ó sìe. Vaá tṍó eo ni tú gã́bug dee siimá, a beè gbóó dààmà togó gè valí ní ló. Vaá èé kọ́ vàẹ kilma ló gè noòmà nuù nen ẽ́? É kọọ̀ ge noòmà nuù nen ólò siimà ni pọ̀? Be à sẹlẹ à ólò mèà naa vó. Sõò be ò ban Jìhóvà kọ á naa kọọ̀ ó láá bé èlbá síìà pọ̀ vaá ié agẹ ló gè láá noòmà kpá káí nen, Jìhóvà é nveè bá nè ni kọ ó ié tàn ge naa kọọ̀ gbò nen á nyoone nvéè Kráìst.

8. Dẹ̀ẹ̀a boo nú ea di mm̀ kpá Máàk 6:34, éé ní ea é láá kpáá naa kọ é noòmà nuù dõòna gbò e?

⁸ Ní ea égè bàà kà, vulè e íè kilmà ló gbò nen ólò naa kọ é noòmà va nu. Dì belí nú dòòmà bá, à íe deé e lóó Jíízọ̀s nè pá a gbò nyòòne nvée beè palàge ọọ boo béè gã́bug tṍó e baa ni kọ́ọ́má kpẹ̀a. Ba beè ié bíi ló kiẽ́e e bàé láá tõo bṍséi, sõò gã́bug nen beè gbĩ́ va mòn. Ba beè dú ńsàn nyíè Jíízọ̀s, naa ní ea daamà togó gè noòmà va ‘gã́bug nu.’ (Bugi Máàk 6:34.) A beè tú agẹ bá siimá tóm deé náa kal ló béè kọọ̀ lóóe géè ọọ. Ló éé? Jíízọ̀s beè tú a lóó sẹlẹ́ dìtõ̀ò gbòa vaá gbóó mòn kọọ̀ bà íe bíi ló nvèè bá. A beè gbĩ́ gè nvèè bá nèva boo béè kọ a beè mòn kọọ̀ bà géè mòn tã̀àgã̀ vaá bà íe bíí ló ból dẽesĩ́. Gbò nen deè nieí íe gbò tã̀àgã̀ e bà gé téní bá vaá ié nágé bíi ló ból dẽesĩ́, bã̀àna tṍó e monì kọ à belí kọọ̀ nyíe va gé ẹ́ẹ. Bà bélí naanà ból e bà dágí vaá bà náa íe neǹ kùdẽe ló ea é túlè va. Neǹ tóm Pọ́ọ̀l baatẽ́ kọọ̀ gbò e bà dì naa vó náa nyímá ló Bàrì vaá bà náa íe ból dẽesĩ́. (Ẹ́fẹ. 2:12) Ba dì boo èèlè ea é tú “nen tẹlẹ ke tõ̀ò kyọ̀à sĩ́”! (Máát. 7:13) Tṍó e bugì togó boo bé e gbò e bà di kiẽ́e e ólò kọ́ kpẹ̀a íe bíí ló gè nyimá ló Bàrì naa, vulè nè sàn nyíe e íè vá ló ólò naa kọ é nvèè bá nèva. Vaá kà lé sĩ́dẽe eé láá nvèèmà bá dú gè zọ̀ va noá Kpá Káí.

9. Dẹ̀ẹ̀a boo nú ea di mm̀ kpá Fílipaì 2:13, mósĩ́ deè ní e Jìhóvà é láá nvèè bá nè ni ẽ́?

⁹ Be à sẹlẹ nóo ólò gbĩ́ gè noòmà Kpá Káí nen boo béè kọ ò nyímà kọọ̀ àé tú ni gã́bug tṍó bá gè kpoogá dee ló nè ge noòmà nuù nen. Be à dì naa vó, kọ́ nè Jìhóvà mm̀ tã̀àgã ló. Bàn kọ á nveenìè bá neè ni kọ ó láá ié tàn gè ié nen eo é nóòmà nù nè ge láá noòmà Kpá Káí nen. (Bugi Fílipaì 2:13.) Neǹ tóm Jọ́ọ̀n beè kọ́ nèi kọọ̀ Jìhóvà é áálá gbò tã̀àgã ló ea gbááá ló A bùlà. (1 Jọ́ọ̀n 5:14, 15) Vóà naa, òó láá àgala boo kọọ̀ Jìhóvà é nveè bá nè ni kọ ó ié tàn ge noòmà nuù gbò nen.

10-11. Éé ní ea é láá naa kọ é gá noòmà Kpá Káí gbò nen ẽ́?

¹⁰ È nyímà kọọ̀ tóm gè noòmà nu palàge dú bíi, náa kal ló béè kọọ̀ è gé téní bá gbò nu ànà-ànà ea é láá naa kọọ̀ á tàvàlàí ló gè sí belí bé ea taníi gè sí naa. Naanii èé zẹ́ẹ́ ló bel boo sìgà gbò nu ànà-ànàá nè bé eé láá bé èlbá naa.

¹¹ Àé láá tõoí ló belí kọọ̀ née láà sí belí bé ea taníi naa. Dì belí nu dòòmà bá, sìgà pá vígà a dú kànen mm̀ dee àbèè kọọ̀ kpá ló va gé zọ. É kọ níà íb dìtõ̀ò eo di bá ẹ́? Be à dì naa vó, bugi togó boo ene kà nú e nóò tṍó COVID-19 ní. È monì kọọ̀ èé láá zọ̀ gbò nen noá Kpá Káí tenmá boo fóòn àbèè kòmpútà. Vóà naa, òó láá tõó tọ zọ̀ gbò nen noá Kpá Káí tṍó ea válí. Vaá à íe dõòna kà lé nú ea é láá sìlà aa m. Sìgà gbò gbĩ́ gè nó Kpá Káí, sõò níì tṍó e pá vígà noo gè kọ́ kpẹ̀a ní e baala ólò ié nágé tṍóé nì. Bàé láá ié tṍó boo lọ̀ọ̀le àbèè bílá dee. È kọọ̀ òó láá noo ó tṍó naa ní ea é gbááá ló tṍó e baala íe tṍó? Bílá dee ní e Nikọdímọ̀s beè ié tṍó ẽ́, vó beè naa kọọ̀ Jíízọ̀s á noòmàe nu tṍóá.—Jọ́ọ̀n 3:1, 2.

12. Gbò éé ní ea náa è àgala boo kọọ̀ èé láá noòmà Kpá Káí é?

 ¹² Àé láá tõoí ló kọọ̀ née é láá noòmà Kpá Káí. Be à sẹlẹ àé láá tõoí ló kọọ̀ è íè bíi ló gè kpáá nyimá gã́bug nu àbèè ge ié kalì e neǹ dòbá ólò ié besĩ́ è kálá láá noòmà nuù nen. Be à ólò tõó ní ló naa vó, nee taà kà nú ea é láá siè ni kpóó lóí. Túá kà, Jìhóvà ẹb kọọ̀ ò sim̀ tùlà ge noòmà nuù dõòna gbò. (2 Kọ́r. 3:5) Ní ea égè bàà kà, Jíízọ̀s ea íe ‘dénè lẹ̀ẹ̀là bel lọl káála tẹlẹ bàlà booí’ ní ea né ni tóm gè noòmà nuù gbò nen ẽ́. (Máát. 28:18) Ní ea égè taà kà, dõòna gbò é láá nvèè bá nè ni. Jíízọ̀s beè dẹ̀ẹ̀a boo nú ea Tẹ̀ beè noòmàe kọ á kọ̀, vaá olo é láá naa nagé vó. (Jọ́ọ̀n 8:28; 12:49) Gbá ló vó, òó láá kọ́ nè nen ea ólò ẹ̀b nú ea kil ló grúùp eo ólò zọ̀ kọ́ kpẹ̀a, neǹ gyà deèsĩ́ tóm kọ̀ kpẹ̀a, àbèè neǹ kọ̀ kpẹ̀a e togóe tulà nu kọ á nvèè bá nè ni naa ní eo é láá noòmà Kpá Káí nen. Enè sĩ́deè eo é láá noomá gè sẹlẹ nò Kpá Káí dú gè gbaaá ló pá vígàá tṍó e bà gé nóòmà Kpá Káí nen.

13. Éé ní ea náa à bọ́ló kọ é di kpènà ló gè noòmà nuù nen mm̀ kele-kele sĩ́deè e?

¹³ Àé láá tàvàlàí ló gè tú ãa sĩ́deè àbèè ãa nuù tóm kọọmá kpẹ̀a. Bé e beè olòó sẹlẹ nò Kpá Káí naa a nyááá. Kpá e gé nóòmà gbò nen katogóí ea kọlà Dé Kpéè Ló Dùm Dọ̀ọ̀mà Dè-dè! bĩ́íná kọ é palàge kpoogá dee ló nyòòmà buù kà nò Kpá Káí, ea dú kele ló bé e beè olòó naa tṍó ea kil nvéeá. Pọ́ì ńkem̀ kpò ní eé bugi é, vaá èé zọ nen e gé nóòmàa loá bel boo gã́bug nu. Tṍó e gé nóòmà nu, èé tú bẹẹ gbò vídiò nè dõòna kà gbò nuù tóm siimá tóm, dì belí JW Library^®. Be nóo nyímà tẽ́ gè láá tú gbò nuù tómí siimá tóm, kọ́ nè nen ea é láá nvèè bá noòmà ni bé eo é tú siimá tóm naa. À ólò leemái gè naa nú mm̀ sĩ́deè ea ni ọọlài ló. Náa ólò valí kọ é gbẹá boo nyaaá nyoone ãa sĩ́deè e bà kọ é naamá nu. Sõò, tení dú ló nvèè bá Jìhóvà nè ní ea aa bá dõòna gbò, òé láá vàlẹ̀ bá nyaaá nyoone vaá dé kpéè ló ãa sĩ́deè ge noòmà nuù nen ní. Enè neǹgyà deèsĩ́ tóm kọ̀ kpẹ̀a kọ́ọ̀, nakà sĩ́deè ge noòmà Kpá Káíí palàge naa kọọ̀ “nen ea gé nó Kpá Káí nè nen ea gé nóòmà á dé kpéè ló.”

14. Éé ní ea bọ́ló kọ é kẽ̀èa boo tṍó e gé kọ́ kpẹ̀a kiẽ́e gbò nen náa bọọgẹ̀ pãanéí tṍ ló é, vaá mósĩ́ deè ní e 1 Kọ́rìnt 3:6, 7 síèi kpóó ló é?

¹⁴ Èé láá di kiẽ́e ea ólò tàvàlà ge noòmà Kpá Káí nen. Náa ólò leemá sìgà gbò ge gbànii tṍ ló tṍó e gé kọ́ kpẹ̀a vaá sìgà nen ólò naa uú boo. Éé ní ea é láá naa kọ é àgala boo kọọ̀ gbò e bà dì naa vó é beè láá gbàntṍ ẽ́? Kẽ̀èà boo kọọ̀ dùm gbò nen é láá vàlẹ̀ bá nyaaá mm̀ bàlà boó e tã̀àgã̀ bọọ́ m-mí, vaá gbò e náa beè leemá va gè gbàntṍ é láá ié lèèmá mm̀ gè nó nú ea kil ló Bàrì. (Máát. 5:3) Sìgà gbò e bà náa beè olòó zìgà ge tú bẹẹ gbò kpá a daamà togó gè zọ̀i noá Kpá Káí. È nyímà nàgé kọọ̀ Jìhóvà ní ea dú Tẹ̀ íè ólíé. (Máát. 9:38) À gbĩ́ kọ é kilsĩ́ gè fó nu vaá tṍ múú kúm, sõò Ẹlẹ ní ea é náa kọ á dùme. (1 Kọ́r. 3:6, 7) À palàge dú nu sìà kpóó ló gè nyimá kọọ̀ kọbèè née láà noòmà Kpá Káí nen kátogóí, Jìhóvà é tã́ànèi dee bá dẹ̀ẹ̀a boo bé e piigà ge nvèè bá nè gbò nen naa, e bè níì gã́bug nen e neè kpá àbèè ge noòmà nu nì! *

15. À ólò tõó ló Jìhóvà naa vàẹ tṍó e nen nó Kpá Káí vaá tú gbò nú ea gé nó siimá tóm ẽ́?

¹⁵ Nyíè Jìhóvà ólò ẹẹ tṍó e nen nó Kpá Káí vaá kọ́ gbò nú ea nó nè dõòna gbò. (Pró. 23:15, 16) Nyíè Jìhóvà é palàge ẹẹ  tṍó ea mon pá a gbò é bà gé tú bẹ̀à sã́ bùlà kọọmá kpẹ̀a vaá noòmà nuù gbò nen! Dì belí nu dòòmà bá, náa kal ló béè kọọ̀ pọ́lọ́ kom beè zààlà beeá ló bàlà booí, kpẹ̀a bé e tóm beè siá naa gbáá 2020, tẹ́lẹ bàlà kẽ kọọ̀ pá vígà beè sẹlẹ nò Kpá Káí ea tóólá 7,705,765, ea náa kọọ̀ gã́bug nen ea tóólá 241,994 á kìn lóó nè Jìhóvà vaá dììa múú. Ãa gbò nyòòne nvéè Kráìstí, é nóòmà nuù dõòna gbò vaá naa kọọ̀ gã́bug nen á kpáá nyoone nvéè Kráìst. (Lúùk 6:40) Tọ́ọ̀ kà bàà-bàà bùlà á gé ló kọọ̀, è ólò naa kọọ̀ nyíè Jìhóvà á ẹẹ tṍó e nóòmà nuù gbò nen kọ bàá dú gbò nyòòne nvéè Kráìst.

16. Mókà lé nu ní eé láá noo sẹ̀ẹ̀a sĩ́ ẽ́?

¹⁶ Tóm gè naa kọ gbò nen á nyoone nvéè Kráìst náa válí, sõò Jìhóvà é nveè bá nèi kọ é láá noòmà nuù gbò nen kọ bàá vùlèe. É kọọ̀ èé láá noo sẹ̀ẹ̀a sĩ́ gè dààmà togó gè zẹ́ẹ́ noòmà Kpá Káí enè nen? Nú ea é silà aa m é láá bọọí ló be à gá náa è tú gbò nèà deè e íè bĩimá kọ̀láá nen e zọọ̀ nyòònà be àé léémáe gè zọ̀i noá Kpá Káí. Èé láá àgala boo kọọ̀ Jìhóvà é tã́ànè deè bá bẹẹ pììgà.

17. Àé tõoí ló naa vàẹ be à gá náa vaá è láá noòmà Kpá Káí nen ẽ́?

¹⁷ Ge kọ́ kpẹ̀a nè ge noòmà Kpá Káí dõòna gbò dú pọ̀bkà nèà deè e íè! Tómí ólò palàge ẹẹlẹ̀i nyíe. Neǹ tóm Pọ́ọ̀l ea beè nvèè bá nè gã́bug gbò e ba beè di Tẹ̀sàlónaikà kọ bàá dú gbò nyòòne nvéè Kráìst beè kọ́ bé e nu tọ́àẹ́ ló naa tṍó ea kọọ̀: “Sẹ̀ mée ní e boolo bulàì kọ à dú beéle ból dẽe sĩ́, a bè ṍ kààgà, à bè pẹ̀gẹ̀lẹ̀ bé èl bá e beele é kaamà ka boo tṍó e bẹẹ Dõò Jíìzọ̀s é dú é? É kọ níì boolo nì? Boolo ní e o dúì beéle ka nè beéle ṍ kààgà e.” (1 Tẹ̀s. 2:19, 20; Tóm 17:1-4) Níà bé ea ólò tõó nagé ló gã́bug nen deè nieí naa ẽ́. Ene kà vígà pábia ea bée kọlà Stéphanie ea dóm nè ẹ̀ẹ̀ beè nvèè bá nè gã́bug nen kọ bàá dììa múú, kọ́ọ̀, “Náa íe tọ́ọ̀ kà ẹ́ẹ́ nyíe eé láá ié èlmà tṍó e nveè bá nè gbò nen kọ bàá kìn lóó nè Jìhóvà.”