Jìhóvà gbĩ́ kọọ̀ nyíè gbò e bà ílá á ẹẹ, nè ge kọ bàá dé kpéè ló kà lé gbaa ló. (Máát. 19:4-6) Be à dú o bùlà ge ilí àbèè ge iá, mósĩ́ deè ní eo é láá mòn lé dóm àbèè lé va ẹ́? Boo béè kọọ̀ Jìhóvà dú bẹẹ Neǹ Dèm Nù, à nyímá nú ea dú bíi kọ é naa kọbé è láá ié ẹ́ẹ́ nyíe mm̀ bẹẹ ílà dóm nè va. Vóà naa, be ò tú gbò nòòkúu ea nei siimá tóm, òó íe ẹ́ẹ́ nyíe ea bọọ lọ̀l vaá à lee mm̀ bọọ ílà dóm nè va. Bugi togó boo sìgà gbò nòòkúuí.

Túá kà, à bọ́ló kọ é dã́ ból ló kọọ̀: “Nyíè nen dú kẹ̀lẹ̀-kẹ̀lẹ̀ èl kọ̀láá kà nú ea dì vaá dú pọ́lọ́.” (Jèr. 17:9) Tṍó e bàà nen e bà gbĩ́ gè ilá monà vaá dààmà togó gè bilá ló ílà dóm nè va, bà ólò gbẹá boo ié kà agẹ bá tàn nyòòmà ene, tṍó ea meà naa vó, à ólò tàvàlà ge nè béèlàfùl e nyìmànù di m. Tṍó e nen gbĩ́ gè ilí àbèè ge iá boo béè áá tọa ló e bà íe nyòòmà ene, bà ólò láá ié kẹ̀lẹ̀ tṍó e tṍó ni tení. (Pró. 28:26) Níà nú ea náa vaá náa dú lé kọọ̀ bàà nen e bà gbĩ́ gè ilá á gyàsĩ́ ló gbò bel ea é náa kọ bàá tuumá kọọ̀ bàé íè ge ilàẹ̀ tṍó e bà gáà palàge nyena ló ene ẽ́.

Kpá Próvẹẹ̀b 22:3 kọ́ọ̀: “Neǹ nyìmànù ólò mòn tã̀àgã̀ ea gé dú sĩ́ vaá ììlà ló, sõó neǹ ból ólò kyã̀à bã bá vaá mòn tã̀àgã̀ ea dú ló.” Mókà gbò gẹẹ-gẹẹ ló ní ea é láá di ló gè gbĩ́ neǹ ge ilí àbèè gé iá lọl boo íntanèt e? À dú pọ́lọ́ kọọ̀, sìgà gbò bílá ló ílà dóm nè va tenmá boo íntanèt, vaá tṍó e tṍó ni téní nen é bà géè gbĩ́ gè ilí àbèè ge iáá gbóó kẹlẹ́ va. Nagé, sigà gbò a kuulà account boo béè gé kẹ̀ẹ̀mà gbò nen vaá tuumá kpègè lọ̀l vá bá. Sìgà tṍó gbò e bà gé náa gbò núi ólò kpọ́ kyáá bel kọọ̀ baala dṹùnàè gbò Neǹ Ditõ̀ò Jìhóvà.

Nee dõòná kà nuù gẹẹ-gẹẹ ló ea dì nàgé lói. Sìgà kà website ge gbĩimá neǹ ge ilí àbèè ge iá ólò kọ́ nú e bàà nen e bà gbĩ́ gè ilá é náa kọbé bà nyímá be níà lèlà neǹ ge ilí àbèè gé iá ẹ́. Sõò, náa íe nú ea zógè kọọ̀ gbò belá dú kà kà. É kọọ̀ àé dú nú e nyìmànù di m ge dẹlẹ nyíé boo kòmpútà e nen náàmà bá vaá élá boo nèèmà béèlàfùl ea kil ló nú ea palàge dì bíi, dì belí ílà dóm nè va? Née é láá tú kòmpútà doolé ló gbò nòòkúu ea di mm̀ Kpá Káí—Pró. 1:7; 3:5-7.

Nòòkúu ea di mm̀ kpá Próvẹẹ̀b 14:15 kọ́ọ̀: “Neǹ ból ólò zìgà kọ̀láà kà bel, sõò neǹ nyìmànù ólò bugi togó boo kọ̀láá kà nú  ea gbĩ́ gè naa.” Besĩ́ ò kálá tuumá kọọ̀ není é dú kà lé neǹ ge ilí àbèè ge iá, zẹ́ẹ́ gbĩ́ gè nyimáe ló leevè. Sõò àé tavàlà ge nyimá be níà lèlà neǹ ge ilí àbèè ge iá tenmá boo íntanèt. Kọbèè ò mon gã́bug nú ea kilíé ló boo íntanèt vaá tú gã́bug tṍó zọ̀ọ̀màe loá bel, é kọ òó láá àgala boo kọọ̀ o paláge nyimáe ló? A beè bọọ́ ló sìgà gbò e ba beè dòòmà kọọ̀ baa monìè nen e bàé ílìè tṍó e bà mon kọọ̀ nen e bà monìè sĩ́ nè sĩ́ náa dú íb nen e bà géè gbĩè.

Neǹ ọ́lì sọ́l beè kọọ̀: “Ním ólò zọ̀ gbò kẹ̀lẹ̀ naaá nu, vaá ním ólò gbaaá ló gbò e bà gṍ nú e bà dú.” (Ps. 26:4) A dú lóó nuù sìgà nen gè kpọ́ kyáá bel tṍó e bà gé émí nú ea kil ló ba bá boo íntanèt kọbé gbò nen íèè va lèèmá m. Bà ólò láá gṍ gbò pọ́lọ́ láb ea dì vá m tṍó e bà gé zọ dõòna gbò loá bel boo íntanèt. Boo tṍó e sìgà gbò ólò kọọ̀ baala dṹùnàè Gbò Neǹ Ditõ̀ò Jìhóvà, sõò, é kọọ̀ baa diià gé múú? É kọọ̀ bà íe kà lé gbaaló kilmà ló Jìhóvà? É kọọ̀ gbò e bà di mm̀ ba bõ̀ònatõ̀ò ólò fã̀ va dẽe? Sẹ̀ bà ólò zogè pọ́lọ́ nu dòòmà bá mm̀ ba bõ̀ònatõ̀ò vaá du nágé “pọ́lọ́ kóò” ge zọ̀ gbá tọ ẹ́? (1 Kọ́r. 15:33; 2 Tím. 2:20, 21) Dẹ̀ẹ̀a boo gbò nòòkúu ea di mm̀ Kpá Káí, é kọọ̀ bà di pọ́ì ge ilí àbèè beè ge iá? Àé dú bíi kọ ó nyimá ààlaà gbò bíbvá, sõò nóo é láá dõogẽ nyimá bé nóo zọọ̀ pá vígà e bà palàge nyimáe ló loá bel. (Pró. 15:22) Mm̀ kà kà, nen ea gé fã Jìhóvà náa é zẹ́ẹ́ bugi togó boo gè zọ̀ “gbò e bà náa dẹlẹ nyíe boo Kráìst” naaá nu—2 Kọ́r. 6:14; 1 Kọ́r. 7:39.

Boo béè gbò nuù gẹẹ-gẹẹ ló ea di ló gè gbĩ́ neǹ ge ilí àbèè ge iá tenmá boo website, à íe gbò lé sĩ́deè eé láá gbĩimá neǹ ge ilí àbèè ge iá ea é náa kọọ̀ ka á di ló bẹẹ ílà dóm nè va. Ãàe ní eo é láá ié nen eo é ílí àbèè ge iá lọ̀lẹ? Tṍó e pá vígà géè bõonáá, è géè naaá nu vaá nyená ló ene tṍó e ínà bẹẹ gbò nònù, àsémblì, pọ̀bkà bõ̀ònaló nè dõòna kà gbò bõ̀ònaló e ólò ié.

Kátogóí e pọ́lọ́ kom ea kọlà COVID-19 náa kọ á gá valíí ló gè kpáá bõoná gbẹá Kíndòm Họ́ọ̀lí, è ólò sí nònù tenmá boo fóòn àbèè kòmpútà ea náa kọ é láá nyimá ló gbò e bà gáà ili àbèè ge iá e bà di mm̀ bõ̀ònatõ̀ò. Bé e bà áálá bíb vaá nè lòbel naa gbẹá nònù é náa kọ ó nyimá íb agẹ zìgà e bà íe. (1 Tim. 6:11, 12) Òó láá bãí kiẽ́e e bà kólíe breakout room ea di boo Zoom loai sọ́l tṍó e nònù ni íná kùbmà. Ge zọ̀ pá vígà naaá nu mm̀ gbò sĩ́deèá, é láá naa kọ ó mòn bé e nen eo íè lèèmá m zọ dõòna gbò naaá nu naa vaá nyimá íb láb e nená íe. (1 Pít. 3:4) Buù bé eo gé nyímai ló ene naa, níà bé eo é nyímai beè bọọ nu sẹ̀ẹ̀a sĩ́ dú tẽ̀ènè kà naa ẽ́.

Tṍó e nen gbĩ́ neǹ ge ilí àbèè ge iá mm̀ sĩ́deè ea gbááá ló gbò nòòkúu ea di mm̀ Kpá Káí, bel e kpá Próvẹẹ̀b kọ́á é dú kà kà kìlmàé ló, ea kọ́ọ̀: “Nen ea mon lé va [àbèè dóm] mon lé nu, vaá àé íe tã́áná dee bá ea aa bá Jìhóvà.”—Pró. 18:22.