1. Éé ní ea náa vaá gè kpoogá deè nyòòmà búùló kyọ̀àsĩ́ nu à dú nú e nyìmànù di m ẽ́?

 GE KPOOGÁ dee ló ólò dùùlà dùm nen. Dì belí nu dòòmà bá, tṍó e búùló kyọ̀àsĩ́ nu nááá, gbò e ba beè kpoogá dee ló ólò fùl zelí bà vaá bà ólò láá nvèè bá nè dõona gbò. Ene kà bõ̀ònaló ea di Europe ea ólò nvèè bá nè gbò nen kọ́ọ̀: “Kà lé kpóògà dee ló ólò dùùlà dùm gbò nen.”

2. Éé ní ea náa vaá èé kpóógá dee ló nyòòmà pọ̀b kpo tã̀àgã̀ ẽ? (Máátìù 24:44)

² Pọ̀b kpo “tã̀àgã̀” é nááá mm̀ bùló. (Máát. 24:21) Sõò náa é bélí gã́bug búùló kyọ̀àsĩ́ nú ea ólò naaá, boo béè kọọ̀ beele nyímà kọ àé nááá. Nú ea é dú 2,000 gbáá ea kil nvéeá, Jíízọ̀s beè ãane pá a gbò nyòòne nvée kọ bàá di kpènà ló nyòòmà pọ̀b tã̀àgã̀ ea é dú sĩ́. (Bugi Máátìù 24:44.) Be è kpóògá dee ló nyòòmà tṍóá, èé láá fùl zelí bá tàvàlà tṍóá vaá nvèè nàgé bá nè dõona gbò.​—Lúùk 21:36.

3. Mósĩ́ deè ní e gè ié ĩ̀ìmà, tóè sàn, nè vulè é láá nvèè bá nèi kọ é kpoogá dee ló nyòòmà pọ̀b kpo tã̀àgã̀ ẽ?

³ Bugi togó boo taa kà kpãa ea é láá nvèè bá nèi kọ é láá kpoogá dee ló nyòòmà pọ̀b kpo tã̀àgã̀. Èé labví láb naa vàẹ be bà kọ́ é vee kpẹ̀a ea kil ló bèèla bel vaá gbò e bà náa ólò Bàrì à naa uuí boo é? (Kùùà 16:21) Àé dú bíi kọ é ié ĩ̀ìmà kọbé è láá gbàntṍ ló Jìhóvà vaá dẹlẹ nyíé boo a kpènà. Éé ní eé láá naa beè sìgà pá vígà náa íe na nu gè tõoma dùm ẽ? (Háb. 3:​17, 18) Àé dú bíi kọ é ié tóè sàn kọbé è láá nvèè bá nèva. Be gbò dó àla gbááá ló naa uuí boo, éé ní eé náa beè pá vígà nè bẹ̀ì gbá tõó kĩée ea biilà ẹ́? (Èzí. 38:​10-12) Àé dú bíi kọ é ié agẹbá vulè kìlmà vá ló, kọbé è láá nvèè bá nèva mm̀ tàvàlà tṍóá.

4. Mósĩ́ deè ní e Kpá Káí zógè kọọ̀ à dú bíi kọ é kilsĩ́ gè ié ĩ̀ìmà, tóè sàn nè vulà ẹ?

⁴ Moǹ bel Bàrì síèi kpóó ló kọ é kilsĩ́ gè ié ĩ̀ìmà, tóè sàn, nè vulè. Kpá Lúùk 21:19 kọ́ọ̀: “Bọọ gè ĩ̀ìmà é náa kọ ó kumai  bọọ dùm.” Kpá Kọ́lọsì 3:12 à kọọ̀: “Iei . . . tóè sàn.” Vaá 1 Tẹ̀sàlónaikà 4:​9, 10 à kọ nagé kọọ̀: “Boo béè kọ Bàrì beè noomà boolo kọ ó vulei ene. . . . Sõò è gé gbóó nvèèi kpóó ló, e pá vígà, kọ ó kilíí sĩ́ mm̀ vulà súú dẽe lóí.” Ba beè emí gbò belí má gbò nyòòne nvéè Kráìst e ba beè ié ĩ̀ìmà, tóè sàn nè vulà. Sõò, a beè dú bíi kọ bàá kilsĩ́ gè ié gbò kpãaí. À bọ́ló kọ beele é naa na gé vó. Kọbé è láá naa vó, èé ló bel boo bé e gbò níí Kráìst deè kéléá beè zogè kọ bà íèè buù kà kpãaí naa. Tṍóá èé gbóó ló bel boo bé eé láá nó gbò nyòòne nvéeá naa, vaá zogè kọọ̀ è di kpènà ló nyòòmà pọ̀b kpo tã̀àgã̀ ea é dú sĩ́í.

5. Mósĩ́ deè ní e gbò níí Kráìst deè kéléá beè ĩ̀ìmà gbò tã̀àgã̀ e bà géè tení báẹ́?

⁵ A beè dú bíi kọọ̀ gbò nyòòne nvéè Kráìst deè kéléá á ié ĩ̀ìmà. (Híb. 10:36) Daalá lọl ló kọ bà géè tení bá tã̀àgã̀ e gbò nen ólò tení bá, ba beè kpeesĩ́ ló dõona kà tã̀àgã́. Níì áá gbò tùle bõ̀ònaló fã̀ pá Júù nè gbò e bà géè bẹ̀l Róm̀ ní e ba beè biigè va lóé nì, sõò pá ba tọ beè biigè va ló nagé. (Máát. 10:21) Vaá a beè dú bíi kọ bàá gá zìgà kọọ̀ kyáá nòòmànù ea aa bá gbò e ba beè dọ̀ aa nvéè Kráìst á naa kọ bàá aa ló gè fã̀ Bàrì. (Tóm 20:​29, 30) Sõò gbò nyòòne nvéeí beè ĩ̀ìmà vaá bọ́ló dẹ̀lẹ̀ nyíé boo. (Kùùà 2:3) Mósĩ́ deè e? Ba beè bugi togó boo nu dòòmà bá gbò e ba beè ié ĩ̀ìmà ea di mm̀ Kpá Káí, dì belí Jóòb. (Jém̀z 5:​10, 11) Ba beè bàn kọọ̀ Jìhóvà á neè va kói. (Tóm 4:​29-31) Vaá ba beè kilsĩ́ gè ká bùlà gbẹẹ́ boo lé nu ea é silà aa mm̀ gè ié ĩ̀ìmà.​—Tóm 5:41.

6. Éé ní eo nóò lọl ló nú e Merita beè naa kọbé à láá ĩ̀ìmà tã̀àgã̀ ẽ?

⁶ Beele é láá ié nágé ĩ̀ìmà be è kilsĩ́ gè nò vaá bugi togó boo nu dòòmà bá gbò e ba beè ĩ̀ìmà ea di mm̀ Kpá Káí nè bẹẹ gbò kpá ea dẹẹa boo Kpá Káí. Ge naa vó beè nvèè bá nè ene kà vígà pábia ea bée kọlà Merita, ea ólò tõó Albania, kọ á láá ĩìmà nàà uú boo ea aa bá pá ba tọ. À kọ́ọ̀: “Ge bugi nòòtẽ́ ea kil ló Jóòb beè agẹIém ló. A beè tení bá gã́bug tã̀àgã̀​—vaá náa beè nyimá ló nen ea tã̀àgã̀ aa bá​—sõò a beè kọọ̀: ‘Dọ̀ọ̀mà tṍó em é ú, nda é kilsĩ́ gè bọ́ló dẹ̀lẹ̀ nyíé boo!’ (Jóòb 27:5) M beè gbóó mòn kọọ̀ gbò tã̀àgã̀ em géè tení bá náa beè tõ̀ò níí Jóòb. Náa kal ló béè kọọ̀ Jóòb náa beè nyimá kĩée ea tã̀àgã̀ aà, nda beè nyimá ló gbò e ńdáà tã̀àgã̀ aa bá.”

7. Kọbèè née gé tení bá kà agẹbá tã̀àgã̀ kátogóí, éé ní ea bọ́ló kọ é naa ẽ́?

⁷ Èé láá nó gè ié ĩ̀ìmà tení dú ló gè olòó tãagã ló Jìhóvà vaá kọ́ bé e nu tọ́aí ló naa nèe. (Fíl. 4:6; 1 Tẹ̀s. 5:17) Àé láá dú kọọ̀ nóo gé tení bá kà agẹbá tã̀àgã̀ kátogóí. Sõò é kọ ò ólò gbĩ́ tùle ea aa bá Jìhóvà, tṍó e nyíé ni biiilà àbèè tṍó e nóo nyímà nu gè naa? Be ò ólòó bàn nvèè bá lọl bá Jìhóvà buù dee, náa é tavàlà ní ló gè naa vó tṍó eo é kpeèsĩ́ ló tã̀àgã̀ ea el vó dì deèsĩ́. Òé gbóó láá agala boo kọ à nyimá kà lèlà tṍó nè sĩ́ deè ge nvèèmà bá nè ni.​—Ps. 27:​1, 3.

8. Mósĩ́ deè ní e nu dòòmà bá Mira zógè kọọ̀ ge ĩìmà tã̀àgã̀ kátogóí é nveè bá nèi kọ é láá ĩìmà gbò tã̀àgã̀ eé kpeesĩ́ ló dì deèsĩ́é? (Jém̀z 1:​2-4) (Ẹ̀b nàgé fòtó.)

⁸ Be è láá ĩ̀ìmà gbò tã̀àgã̀ e gé tení bá kátogóí, èé láá ĩ̀ìmà pọ̀b kpo tã̀àgã̀ eé kpeesĩ́ ló dì deèsĩ́. (Róm̀ 5:3) Éé ní ea náa è kọ́ vóé? Gã́bug pá vígà a mon kọọ̀ buù tṍó e bà láá ĩ̀ìmàè gbò tã̀àgã̀ e bà ténìè bá, à ólò nveenìè bá neè va kọ bàá láá ĩ̀ìmàè dõona kà tã̀àgã̀ e bà kpeelìè sĩ́ ló. Ge ié  ĩ̀ìmà ólò agẹlẹ́ va ló vaá naa kọ bàá kpáá agala boo kọọ̀ Jìhóvà di kpènà ló gè nveenìe bá neè va. Zìgàí ólò nvèè bá nèva kọ bàá láá ĩ̀ìmà dõona kà tã̀àgã̀ e bà kpeesĩ́ ló. (Bugi Jém̀z 1:​2-4.) Enè neǹ gyà deèsĩ́ tóm kọ̀ kpẹ̀a ea bée kọlà Mira, ea ólò tõó Albania, beè mòn kọọ̀ ge ĩ̀ìmà gbò tã̀àgã̀ ea beè tení bá tṍó ea kil nvéeá ní ea beè nveenìè bá neèe kọ á láá kilsĩ́ gè ĩ̀ìmà gbò tã̀àgã̀ ea gé tení bá kátogóí é. À kọ́ọ̀, sìgà tṍó à ólò tõonìèé ló kọọ̀ áá ẹlẹ ní e gã́bug tã̀àgã̀ dìè ló. Sõò a beè kẽea boo gbò nú e Jìhóvà beè naa nèe 20 gbáá ea kil nvéeá, à gbóó kọ́ nè a bá kọọ̀: ‘Kilsĩ́ gè bọ́ló dèlè nyíé boo. Ó gá zìgà kọọ̀ bé e Jìhóvà beè nveè bá nè ni kọ ó láá bé èlbá gbò tã̀àgã̀ eo beè tení bá gbò gbáá ea kil nvéeá naa á pè.’ Òé láá bugi nagé togó boo bé e Jìhóvà ni nveè bá kọ ó láá ĩ̀ìmà tã̀àgã̀ naa. Agala boo kọọ̀ à nyímá kọ̀láá tṍó eo ĩimà tã̀àgã̀, vaá àé né ni kpẽ́ ló. (Máát. 5:​10-12) Tṍó e pọ̀b kpo tã̀àgã̀ é daaà togó, òé láá kilsĩ́ ge ĩ̀ìmà boo béè kọọ̀ o beè ólòó ĩimà tã̀àgã̀.

9. Mósĩ́ deè ní e bõ̀ònatõ̀ò ea beè di Ántìọ̀k ea di Sìríà beè zogè kọ bà íè tóè sàn ẽ?

⁹ Bugi togó boo nú ea beè naaá ló gbò níí Kráìst e ba beè di Jùdíà tṍó e kíì gyã́á beè dọ̀. Tṍó e bõ̀ònatõ̀ò ea di Ántìọ̀k ea di Sìríà dã́ naa vó, ba beè ié tóè sàn kìlmà vá ló. Sõò ba tóè sàn beè bã mm̀ láb. Ba beè “bilá ló kọ buù ọ̀và á lọlàgì nu nyòòmà bé e bá buù ọ̀và tóólá naa domá, kọbé bà nveemàè bá nèe ba gbò vígà mm̀ Kráìst e bà di Jùdíà.” (Tóm 11:​27-30) Náa kal ló béè kọọ̀ pá vígà e kíi beè di lóá ólò tõó kpã́á, gbò níí Kráìst e bà di Ántìọ̀k beè beeláfùl ge nvèè bá nèva.​—1 Jọ́ọ̀n 3:​17, 18.

10. Mósĩ́ deè ní eé láá zogè kọ è íè tóè sàn kilma ló pá vígà e búùló kyọ̀àsĩ́ naaá vá lóé? (Ẹ̀b nàgé fòtó.)

¹⁰ Beele é láá zogè nàgé kọ è íèè tóè sàn tṍó e dã́à kọọ̀ búùló kyọ̀àsĩ́ nu nááá ló pá vìgà. È ólò valẹ̀bá nè lóó​—tení dú ló gè bĩiná gbò kànen be à íe tóm eé láá sì mm̀ ge nvèèmà bá, ge nè lọ̀là-lọ̀là, àbèè ge tãagã ló Bàrì má pá vígà e búùló kyọ̀àsĩ́ nu nááá lóá. b (Pró. 17:17) Dì belí nu dòòmà bá, mm̀ gbáá 2020 a, ba beè íbá ló nú ea sígá ló 950 kà Disaster Relief Committee kọ bàá nvèè bá nè pá vígà e bà ié bíi ló nvèè bá tṍó e pọ́lọ́ kom ea kọlà COVID-19 géè zoogáá. Nyíéi palàge ẹẹ ló pá vígà e ba nè lóó gè sí tómí. Tóè sàn e ba beè ié kilma ló pá vígà beè naa kọ bàá dõo nu gè tõoma dùm nèva, naa gbò nú ea dú bíi kọbé bà láá fã̀ Bàrì, vaá gbẹá sìgà ketõ̀ò, ba beè sí tóm ló àbèè ge tìb gbò tọ ea beè kyọasĩ́ nè gbò tọ gè tõó m fã̀ Bàrì.​—Doolé ló 2 Kọ́rínt 8:​1-4.

11. Mósĩ́ deè ní e gè ié tóè sàn ólò nvèè ka ló bẹẹ Tẹ̀ ea di káála ẹ́?

¹¹ Tṍó e zógè kọ è íè tóè sàn kilma ló gbò e búùló kyọ̀àsĩ́ nu nááá ló, dõona gbò ólò mòn tóm e síì. Dì belí nu dòòmà bá, mm̀ gbáá 2019 a, fọ́ọ́lọ́ ea kọlà Hurricane Dorian beè kyọ̀sĩ́ ene kà Kíndòm Họ́ọ̀l ea di Bahamas. Tṍó e pá vígà géè sí tóm ló Kíndòm Họ́ọ̀la, ba beè bĩiná enè nen e náa ólò sí nònù ea gé zọ́va sí tómá gã́bug kpègè e bàé láá siimá tómá. A beè kọ́ nèva kọọ̀: “Àé léémám ge nèi . . . nu gè siimá tóm nè gbò e bàé zọ́i sì. . . . M̀ gbĩ́ gè nvèè bá nè bọọ bõ̀ònaló. Bé eo nveenìì bá nei pá bọọ vígà naa palàge leemám.”  Gã́bug nen ea di bàlà booí náa nyímá ló Jìhóvà. Sõò gã́bug ọ̀và ólò ẹ̀b láb Gbò Nen Ditõ̀ò Jìhóvà. Nyíéi ólò ẹẹ gè nyimá kọọ̀ tṍó e íè tóè sàn kilma ló dõona gbò, à ólò naa kọ bàá tõo bã ló Nen “ea sàn nyíe bọọ zoogá”!​—Ẹ́fẹ. 2:4.

12. Mósĩ́ deè ní e gè ié tóè sàn kátogóí é nveè bá nèi kọ é kpoogá dee ló nyòòmà pọ̀b kpo tã̀àgã̀ ẽ? (Kùùà Nù 13:​16, 17)

¹² Éé ní ea náa vaá àé dú bíi kọ é ié tóè sàn tṍó pọ̀b kpo tã̀àgã̀ ẽ? Kpá Káí tẹ́lẹ bàlà kẽ kọọ̀ gbò e bà náa gbááá ló bìlà bẹl-bẹ̀l é téní bà tã̀àgã̀ kátogóí nè tṍó pọ̀b kpo tã̀àgã̀ ea é dú sĩ́. (Bugi Kùùà Nù 13:​16, 17.) Àé dú bíi kọ é nvèè bá nè pá vígà kọbé bà láá ié nu gè tõ̀òma dùm. Tṍó e bẹẹ Méné Kráìst Jíízọ̀s, é dú gé tú bèèla bel tẹlẹ boo gbò pọ́lọ́ lab dògò, è gbĩ́ì kọ á mòn kọ è íè tóè sàn naa ní ea é kọ́ nèi kọọ̀, “dui gé bãí kĩ e Bàrì gé lẹẹlà bel.”​—Máát. 25:​34-40.

13. Dẹ̀ẹ̀a boo nú ea di mm̀ kpá Róm̀ 15:​7, mósĩ́ deè ní e gbò nyòòne nvéè Kráìst deè kéléá beè kilsĩ́ gè vulè ene ẽ?

¹³ Vulè ní ea beè naa kọ bàá nyimá ló kà-kà gbò e bà géè nyoone nvéè Kráìst deè kéléá ẹ́. Sõò é kọọ̀ gè vule ene beè valí? Pá vígà e ba beè di bõ̀ònatõ̀ò ea di Róm̀ beè aa kele-kele bon. Sìgà ọ̀và beè dú Júù, vaá ba beè bumá va kọ bàá gbàntṍ ló Log Mózìs, boo tṍó e sìgà ọ̀và aa dõona kà dó vaá bé e ba beè bumá va naa beè dú kele. Sìgà gbò nyòòne nvéè Kráìst beè dú gyóòlo boo tṍó e sìgà ọ̀và beè ié dì pọ́ì​—vaá àé láá dú kọọ̀ sìgà ọ̀và beè íe gyóòlo. Mosĩ́ deè ní e gbò nyòòne nvéè Kráìstí é láá kilsĩ́ gè vùlà náa kal ló béè kọọ̀ bà aa kele-kele ketõ̀ò ẽ? Nen tóm Pọ́ọ̀l beè siè va kpóó ló kọ bàá tú “ene boo lé bá.” (Bugi Róm̀ 15:7.) Éé ní ea géè kọ̀ẹ? Tã́á bel e bà tab naamá “túi ene boo lé bá” tõó dọ̀ ge kolí kyáà nen àbèè gè naa nú ea é léé ló dõona gbò, dì belí gè tú va nvee tọ àbèè ge tú va nvee gbàà pá kóò. Dì belí nu dòòmà bá, Pọ́ọ̀l beè kọ́ nè Fáílimòn kọ á tú Ònésimùs ea beè teelá aa ló a tẹ̀ tọ “nvea ló.” (Fáí. 17) Vaá Presélà nè Àkílà beè tú lé bá tuumá Àpọ́lọ̀s, e náa beè nyimá gã́bug nú ea kil ló bõ̀ònatõ̀ò Kráìst, vaá “ba beè kolíe kilma ba tọ.” (Tóm 18:26) Tãa vó e bà sọtọ́ deè kọọ̀ kĩée e bà aà á poó va, gbò nyòòne nvéè Kráìstí beè tú lé bá tuumá ene.

14. Mósĩ́ deè ní e Anna nè a dóm beè zogè kọ bà íèè vulè e?

¹⁴ Beele é láá zogè nàgé kọ è vulè pá vígà tení dú ló gè tú va naamá kóò vaá noo tṍó dììmà vá ló. Tṍó e náà vó, bàé vulè nàgé beele. (2 Kọ́r. 6:​11-13) Bugi togó boo nú ea beè naaá ló Anna nè a dóm e bà ólò kọ́ kpẹ̀a aa dó dọ dó. Pọ́ì ńkem̀ tṍó aa ló tṍó e bà lẹẹlà va kilma West Africa, pọ́lọ́ kom ea kọlà COVID-19 beè gbóó dààmà togó. Boo béè pọ́lọ́ komí, ba náa beè láá zọ̀ pá vígà bõoná sí nònù vaá ge nyimá ló pá vígà náa beè valí vá ló. Mósĩ́ deè ní e dóm nè vaí é láá zogè kọ bà íèè vulè e? Ba beè olòó zọ̀ pá vígà loá bel tenmá boo videoconference vaá kọ́ bé ea tan va gè kpáá palàge nyimá va ló naa. Belá beè palàge tọá ló pá vígàí naa ní e ba beè olòó kolí va, vaá lẹ̀ẹ̀là tóm má va. Éé ní ea beè naa kọọ̀ dóm nè vaí á gbĩ́ gè nyimá ló pá vígà e bà di ba ãa bõ̀ònatõ̀ò ẽ? Anna kọ́ọ̀: “Bé e pá vígà beè zogè kọ bà vulèè nda nè pá beélè tọ tṍó e lé nu àbèè pọ́lọ́ nu náaaí ló naa beè palàge tọám ló vaá naa kọ ḿ vulè dõona gbò.”

15. Éé ní e nu dòòmà bá Vanessa nóòmà ni kilma ló gè vùlè pá vígà ẹ? (Ẹ̀b nàgé fòtó.)

¹⁵ Gã́bug bẹ̀ì di mm̀ bõ̀ònatõ̀ò e pá vígà  e bà di m aa kele-kele ketõ̀ò vaá bé e bà ólò labví láb naa dú kele. Èé láá kilsĩ́ gè vùlè va tení dú ló gè ká bùlà gbẹẹ́ boo ba lé kpãa. Náa ólò valí ló ene kà vígà pábia ea bée kọlà Vanessa, ea ólò tõó New Zealand, ge zọ̀ pá vígà e bà di ba bõ̀ònatõ̀ò naaá nu. Sõò a beè beeláfùl kọọ̀ tãa vó ea aalìè ló gbò e ba láb bẽ́émáe, àé kpáá túè gã̀bug tṍó dììmàè vá ló. Ge naa vó beè naa kọ á mòn nú ea náa kọọ̀ pá vígàí á leemá Jìhóvà. À kọ́ọ̀: “Tã́gíní tṍó e ba beè íbá ló nà dóm naamá nen ea gé kùdẽe ló sẹ́kiùt, è ólò zọ̀ pá vígà e bà íe kele-kele láb naaá nu, vaá gè zọ̀va naaá nu beè valím ló. Kátogóí, à ólò leemám ge zọ̀ kele-kele pá vígà naaá nu. Mm̀ kà-kà, nyíè Jìhóvà ólò ẹẹ tṍó e náà vó, boo béè kọọ̀ ẹlẹ ní ea beè kolíi nvee zẹ̀ẹ̀ pá vígà e bà íe kele-kele láb ẹ́.” Tṍó e ẹ̀bvì dõona gbò belí bé e Jìhóvà ẹb va naa, è zógè kọ è vulè va.​—2 Kọ́r. 8:24.

16. Éé ní ea náa vaá àé dú bíi kọ é vùlè pá vígà tṍó pọ̀b kpo tã̀àgã̀ ẽ? (Ẹ̀b nàgé fòtó.)

¹⁶ Àé dú bíi kọ é vùlè pá vígà tṍó pọ̀b kpo tã̀àgã̀. Mósĩ́ deè ní e Jìhóvà é kpenài tṍó e tã̀àgã̀í é nááá ẽ́? Bugi togó boo nú e Jìhóvà beè kọọ̀ pá a gbò á naa besĩ́ bà kalá kyòsĩ́ Bábilọ̀n tṍó ea kil nvéeá, a beè kọọ̀: “Aalii e pá ńdáà gbò, bãi mm̀ bọọ àn, vaá ò kuai nùtọ ló. Gũai mm̀ pọ́ì ńkem tṍó, dọ̀ọ̀mà tṍó e súngí é téní tà.” (Àìz. 26:20) À belí kọọ̀ beele é tú nágé gbò dùùlà bá deè tṍí siimá tóm tṍó e pọ̀b kpo tã̀àgã̀ é daaà togó. Moǹ bel ea kọlà “àn” é láá dú bẹẹ bõ̀ònatõ̀ò. Tṍó pọ̀b kpo tã̀àgã̀, èé láá ié kpènà e Jìhóvà beè zigàa be è kilsĩ́ gè gbaaá ló pá vígà. Vóà naa, à dú bíi kọ é sí tóm agẹlẹ bá kátogóí kọbé è láá vùlè pá vígà vaá zọ̀ va naaá nu. Bẹẹ dùùà é láá dẹẹa boo bé e zọọ̀ pá vígà naaá nu naa!

17. Be è kpóógá dee ló kátogóí, éé ní eé láá naa tṍó e pọ̀b kpo tã̀àgã̀ é nááá ẽ́?

¹⁷ “Gbele deè Jìhóvà” é tú tã̀àgã̀ tẹlẹ boo gbò nen. (Zèp. 1:​14, 15) Gbò níí Jìhóvà é tení nágé bá tàvàlà dìtõ̀ò. Sõò be è kpóógá dee ló kátogóí, èé láá ié dĩ̀ìnè ló bùlà vaá nvèè bá nè dõona gbò. Èé láá ĩ̀ìmà kọ̀láá íb tã̀àgã̀ e kpeèsĩ́ ló. Tṍó e pá vígà gé téní bá tàvàlà dìtõ̀ò, èé íe tóè sàn kìlmà vá ló vaá pììgà bé e bẹẹ kpóó sim tùlà naa gè nvèè bá nèva. Vaá èé dává gbẹá ló pá vígà, e palàge vùlèa. Jìhóvà é néi dùm e bè náa tá, mm̀ bàlà boó e née é kẽea na boo dénè tã̀àgã̀ nè búùló kyọ̀àsĩ́ nu ea di kátogóí.​—Àìz. 65:17.