Ńdáà tẹ̀ beè dú neǹ kànen mm̀ tọ Bàrì ea kọlà United Church of Canada, vóà naa, ńdáà vígà pábia nè nda ólò sí Sunday school buù deè Sunday, vaá tṍó ea ni dú 11:00 boo lọ̀ọ̀le, è ólò gbóó gbaaá ló ńdáà tẹ̀ sí tọ Bàrì gbò kànen. Boo fèèbe, è ólò zọ̀ ńdáà kà sí Kíndòm Họ́ọ̀l. Vó beè naa kọ á valíí ló gè mòn kele ea di zẹ̀ẹ̀ pálaa kà bõ̀ònalóí.

Ńdáà kà beè kọ́ gbò ãa nú ea nó lọl mm̀ Kpá Káí nè Bob nè Marion Hutcheson, e ba beè duá kóò mm̀ gã́bug gbáá, vaá ba beè gbóó du nagé Gbò Neǹ Ditõ̀ò Jìhóvà. Mm̀ gbáá 1958, dóm nè vaí beè faalá nda nè taa kà ba nvín págbálà siimá Divine Will International Assembly ea beè sẹẹa mm̀ aatáà dee gbẹá New York City. Tṍó em kẽea boo, m̀ monì kọ ba beè sí gã́bug tóm kọbé bà láá faalám siimá àsémbìlìa, vaá àsémbìlìa náa è tám nyíe tọ́ọ̀ dee.

Tṍó em gáà dú bàà ob gbáá, e beè olòó kìl ól, vaá a beè leemám gè ẹ̀b nú ea kil ló gbò nom. A beè palàge tànim ge dú neǹ dóm biè ea é bó gbò nom. Ńdáà kà beè ló belí nè ene kà neǹ kànen ea di bẹẹ bõ̀ònatõ̀ò. Neǹ kànená beè kẽem nyíe kọọ̀ è di mm̀ gbò dee e “tṍó é gé tà” vaá a beè bĩinám beè gè tú gã́bug gbáá siimá pọ̀b tọọ̀ kpá náa é tọ́á ló nà gbaa ló kilma Jìhóvà. (2 Tím. 3:1) Níí beè naa kọ ḿ beeláfùl ge aa ló gè sí pọ̀b tọọ̀ kpá.

 Sõò m beè olòó bugi togó boo tóm em é sí tṍó em ni aa sẹ́kóndílí skúùl. Náa kal ló béè kọọ̀ m̀ ólò kọ́ kpẹ̀a kọ̀láá kà tà sè, ním beè dé kpéè ló vaá a beè tõóm ló kọọ̀ ním é láá dú neǹ gyà deèsĩ́ tóm kọ̀ kpẹ̀a. Dénè tṍóá, ńdáà tẹ̀ e náa ólò sí nònù nè vígà ńdáà tẹ̀ géè sièm kpóó ló kọ ḿ tù dénè dee siimá tóm gbẹá pọ̀bkà kómpinì ea di Toronto. Vígà ńdáà tẹ̀ beè ié pọ̀b dọ̀ gbẹá tọọ̀ tómá, vó beè naa kọ ḿ sí tómá.

Gbẹá Toronto, ge sí tóm èlmà ló tṍó nè ge zọ̀ gbò e bà náa ólò fã̀ Jìhóvà naaá nu beè naa kọ ḿ gá láá si ná nònù àbèè ge kọ́ kpẹ̀a belí bé ea bọ́ló naa. M beè zẹ́ẹ́ tõó ló ńdáà nómá tẹ̀ e náa ólò sí nònù, sõò tṍó ea ú, m beè gbóó gbĩ́ dõona ketõ̀ò ge tõo.

Pá tọọ̀ Hutcheson, e ba beè faalám siimá pọ̀bkà bõ̀ònaló mm̀ gbáá 1958 a, beè belí tẹ̀ nè kà kìlmàm ló. Ba beè kọ ḿ dù gé tõó ba tọ vaá ba beè nvèè bá nèm kọ ḿ kilsĩ́ gè fã̀ Jìhóvà. Mm̀ gbáá 1960, ba nvín John nè nda beè gbóó dììa múú. John beè dààmà togó gè sí tóm gyà deèsĩ́ tóm, vaá níí beè naa kọ ḿ bọ̀ọ̀vẹ̀ gbàà nà sìtóm kọ̀ kpẹ̀a. Pá vígà e bà di bẹẹ bõ̀ònatõ̀ò beè mòn bé em gé sim kilsĩ́ naa, vaá tṍó e tṍó téní, ba beè túm naamá nen ea gé ẹb nú ea kil ló Tọọ̀ Kpá Ea Di Kèbá Bẹ̀l Bàrì. a

Mm̀ gbáá 1966, m beè ilí Randi Berge, ea géè tú bẹ̀à sã́ bùlà siimá tóm gyà deèsĩ́ tóm kọ̀ kpẹ̀a, vaá a beè dì nàgé kpènà ló gè sí tóm kĩée e bíì gbò kọ̀ kpẹ̀a palàge bọọ. Nen ea ólò kùdẽe ló bẹẹ sékiùt beè iéi lèèma m vaá a beè sièi kpóó ló kọ é gé nvèè bá nè bõ̀ònatõ̀ò ea di Orillia, ea di Ontario. Vóà naa, e beè gbóó kil kĩá.

Tṍó e ínà Orillia, m beè gbóó zọ̀ Randi dú neǹ gyà deèsĩ́ tóm kọ̀ kpẹ̀a. Nyíém beè gbóó palàge ẹẹ belí nágá ẹlẹ! Tṍó em daamà togó gè sí tóm gyà deèsĩ́ tóm kọ̀ kpẹ̀a, nyíém beè ẹẹ tṍó em nóòmà Kpá Káí gbò nen vaá mòn kọ bà dã́ból ló. Nyíéi beè palàge ẹẹ kọ è nveè bá nè ene kà dóm nè va e bà ólò tõó Orillia naa ní e bà nyááná ba sĩ́deè tõ̀ò dùm vaá fã̀ Jìhóvà.

Enè dee e beè iná Toronto, e beè mòn Arnold MacNamara, ea dú enè nen ea beè di zẹ̀ẹ̀ gbo e bà ólò tulè tóm Bẹ́tẹẹ̀l. A beè bĩinái be àé léémái gè dú gbò gyà deèsĩ́ tóm kọ̀ kpẹ̀a ea di kele. M beè gbẹá boo aalá naa: “Ẽei! Sõò bàá gá lẹ̀ẹ̀lài kilma Quebec!” Ním beè ié lé bùlà ea kil ló gbò e bà ólò ló French ea di Quebec, boo béè bel e gbò e bà ólò ló Bèkéè ea di Canada ólò ló kìlmà vá ló. Tṍóá, gbò nen géè nvèè tã̀àgã̀ kọọ̀ pá Quebec á tõoa boo ba bá vaá aa kè kẽè pá Canada.

Arnold beè aalá nèi kọọ̀, “Áá Quebec ní e tọ nàà tòm gé lẹẹlà gbò gyà deèsĩ́ tóm kọ̀ kpẹ̀a ea di kele tẹlẹ̀ kátogóíé.” Tẽ̀ènè tṍóá, m beè zìgà ge kìl. M beè nyimá kọọ̀ à léémá Randi ge kil kĩá. Tṍó e tṍó tení, m beè gbóó nyimá kọọ̀ kà lé béèlàfùl ní e beè nèe!

Tṍó e ni tú vòò sè siimá tọọ̀ kpá gbò e bà ólò nó French lọ̀l, Randi nè nda bií ló dõona kà dóm nè va beè sí Rimouski, ea é láá toolá 540 kilometer (àbèè 336 mi) aa ló deè bàá nàànì ea di deè boo gù ló Montreal. E beè kpáá ié gã́bug nu gè nò, vaá níí beè dọ̀ bàlà kẽ tṍó em beè bugi sìgà nègã́ gbẹá nònù. M beè kọọ̀ gbẹá bẹẹ pọ̀bkà bõ̀ònaló ea gé dú sĩ́, èé íe gã́bug gbò kyáà e bà aa “ostrich” tãa vó em kọọ̀ gã́bug gbò kyáà e bà aa “Austria.”

Gbẹá Rimouski, ténì bẹ̀ì beè gbaaá ló ténì kà vígà pábia e bà gáà iá dóm bií ló Huberdeau nè a va nè bàà kà ba nvín pábia. Huberdeau nè a va beè bàn pọ̀bkà tọ ea íe àlàbà kà àn vaá e beè kpẽ́ kpègè ló naamá kĩée e gbò gyà deèsĩ́ tóm kọ̀ kpẹ̀a é tõo, è ólò kolíe Ẹ́ẹ́ Tọ boo béè kọọ̀ ba beè tú ẹ́ẹ́ ágbá tẹlẹ̀ ló vaá gbò bã̀ ea di ló beè ẹẹ. Nú ea é láá dú 12 àbèè 14 nen ní bà ólò tõó m ẽ́. Boo béè kọọ̀ Randi nè nda dúù gbò gyà deèsĩ́ kọ̀ kpẹ̀a ea di kele, è ólò aà gé kọ́ kpẹ̀a boo lọ̀ọ̀le, fèèbe, nè ló èlà, vaá nyíéi beè ẹẹ kọọ̀ è ólò mòn nen ea é zọ́i kọ́ kpẹ̀a​—kọbèè ló èlà e tọ́ọ dì.

E beè tõo bã ló gbò gyà deèsĩ́ tóm e bà bọ́ló dẹ̀lẹ̀ nyíé booí, naa ní ea beè belí kọ bà dṹùnà pá bẹẹ tọ. Sìgà tṍó è ólò kpá sã́ vaá ĩ̀ìtẽ́ ló àbèè ge ié “deé e dénè bẹ̀ì é gbá bùl gyã́á vaá dè.” Ene kà vígà págbálà ea beè dìí ló beè nyimá tẽ́ gè ọlí sọ́l, vóà naa, bílá deè deè Saturday è ólò bọọgẹ̀ ọlí sọ́l vaá zòb-zob.

Gã́bug gbò e bà di Rimouski beè ié lèèma ló gè nó Kpá Káí! Mm̀ vòò gbáá, nyíéi beè ẹẹ gè mòn gã́bug gbò e bà sim kilsĩ́ vaá dììa múú. Gbò kọ̀ kpẹ̀a e ba di bõ̀ònatõ̀òa beè bọọ dọ ló, vaá ba beè láá toolá 35 nen.

Gbẹá Quebec, ba beè nèi búma ea náa kọ é láá palàge kọ́ kpẹ̀a. E beè mòn bé e Jìhóvà beè nvèè bá nèi mm̀ bẹẹ sìtóm kọ̀ kpẹ̀a naa vaá nèi gbò nú e íè bíi ló gè tõoma dùm. Gbá ló vó, e beè kpáá vùlè gbò e bà ólò ló French​—vaá níí beè naa kọọ̀ bé e pá dõona kà bálásĩ́ ólò naa nu naa á leemái.​—2 Kọ́r. 6:13.

Tọ nàà tóm beè gbóó kọ é kil Tracadie ea di New Brunswick, tṍó e née beè ẹ̀bmà dẽe. Níí beè dú nu ànà-ànà boo béè kọ è ã́àa bàn tọ vaá m beè ié nágé tóm ge noomà nu gbẹá tọọ̀ kpá em ólò tú sìgà dee siimá. Gbá ló vó, sìgà gbò e ólò noomà Kpá Káí ã́àa dú gbò kọ̀ kpẹ̀a, vaá kà lèlà tṍóá e tib bẹẹ Kíndòm Họ́ọ̀l iná kpã́á.

Buù kà tà sè, è ólò palàge tãagã ló Bàrì kilma ló vaá e beè sì gé ẹ̀b bé e Tracadie  meà naa, kĩá beè palàge dú kele ló Rimouski. Sõò e beè beeláfùl kọọ̀ tã́gíní bé e Jìhóvà gbĩ́ kọ é kil kĩáá, èé kil. E beè tú gbò nú ea géè tãagẽ́i gbẹẹ́ bá Jìhóvà, vaá e beè mòn bé ea beè nveè bá nèi naa. (Mál. 3:10) Ge kọọ̀ Randi íe kà lé gbaa ló kilma ló Jìhóvà, ié dùm ge sí tóm nè dõona gbò, ne ge kọọ̀ nyíée ólò ẹ́ẹ ló kọ̀láà kà nu, ní ea beè naa kọ é láá sí tómí ẽ́.

Áá Robert Ross ní ea beè dú neǹ kànen mm̀ beélè bõ̀ǹatõ̀òí ẽ́. A vaà Linda nè ẹ̀ẹ̀ géè sí tóm gyà deèsĩ́ tóm gbẹá kĩá, vaá ba beè beeláfùl ge tõó kĩá tṍó e bà íe nvín. Bã̀àna tṍó e bà gé búmá ba nvín págbálà, ba beè palàge siè kpóó ló Randi nè nda tení dú ló ba dùm kólì kyáà nè bé e ba beè tú bẹ̀à sã́ bùlà kọọmá kpẹ̀a naa.

Tṍó e ni tú bàà gbáá siimá tóm gyà deèsĩ́ tóm kọ̀ kpẹ̀a gbẹá Tracadie, ba beè kpáá kolíi tṍó e née géè ẹ̀bmà dẽe​—kọ é gé sí tóm gè kùdẽe ló sékiùt. E beè sí tóm gè kùdẽe ló sẹ́kiùt gbẹá kĩée e bà ólò ló Bèkée mm̀ àlàbà gbáá, vaá ba beè kpáá òòmàí kẽ kilma sẹ́kiùt e bà ólò ló French ea di Quebec. Nen ea ólò kùdẽe ló dístrikt ea di Quebec, ea bée kọlà Léonce Crépeault, ólò lèèlàm tṍó em ni ne nà lòbèl lọ̀l. Sõò tṍó e tṍó ni téní, à ólò gbóó bĩinám kọọ̀, “Éé ní eo gáẹ̀ láá naa kọbé pá vígà palàge ié bélè lọl ló o lòbèl e?” b Ge iém lèèma m beè naa kọọ̀ nà nòòmànù á valí gè dã́tẽ́ ló.

Ene kà tóm em beè sì e náá é tám nyíe dú tóm em beè sí mm̀ gbáá 1978 gbẹá International Convention ea beè sẹẹa gbẹá Montreal, ea togó bel kọ́ọ̀, “Victorious Faith.” M beè sí tóm Kĩée E Bà Ólò Bùl Gyã́á. È géè ẹ̀bmà dẽè 80,000 nen, vaá ba beè nyaaná bé e beè olòó nè gyã́á naa. Dénè nu beè dú ãa: gbò nu gè siimá tóm, gyã́á ge bùl, nè bá gè bùlmà. E beè ié 20 pọ̀bkà faà ea ólò naa kọọ̀ gyã́á á dú tọ́ọ vaá à ólò tãagẽ́i sìgà tṍó. Besĩ́ pọ̀bkà bõ̀ònalóá à kalá dààmà togó, née beè láá bã boo beá dọ̀ọ̀mà taa tóm dáá bílá dee, boo béè bìlà bíl ea beè di boo beá deé ea bẽene deè pọ̀bkà bõ̀ònalóá. Vaá a beè dú bíi kọ é nvèè sã́ ló nú e bàé dé bòm deè deá besĩ́ dee kálá zìlà! Lóói beè tũgã́, sõò m beè nó gã́bug nu lọl ló bé e gbò e ba beè nè lóó gè sí tómí beè siá kpóó ló vaá gbá siá tóm mm̀ kùùnà mòn naa. Dénè bẹ̀ì beè vùlà, vaá níí naa kọ é bã̀àa kóò dọ̀ kátogóí. Nyíéi beè palàge ẹẹ gè sí pọ̀bkà bõ̀ònaló ea beè sẹ̀ẹ̀a gbẹá Quebec, boo béè kọọ̀ mm̀ gbò gbáá 1940 tẹlẹ 1950 a, ba beè olòó biigè ló pá vígà gbẹá kĩá.

 M beè no nagé gã́bug nu lọl bá gbò kànen e géè gbá siá tóm ge ẹ̀b nú ea kil ló gbò pọ̀bkà bõ̀ònaló ea beè sẹ̀ẹ̀a gbẹá Montreal. À ié gbáá e David Splane, ea dṹùnà Gbò Ge Tulè Tóm kátogóí, ní ea beè di togó gè ẹ̀b nú ea kil ló pọ̀bkà bõ̀ònalóí é. Tṍó e dõona kà pọ̀bkà bõ̀ònaló kpáá sẹ̀ẹ̀a, ba beè kọ ḿ sí tóm e vígàí géè sìa, vaá David beè palàge nvèè bá nèm.

Mm̀ gbáá 2011, tṍó e ni tú 36 gbáá kã̀àmà kele-kele bõ̀ònatõ̀ò lọ̀l, ba beè kolím kọ ḿ noomà nu Tọọ̀ Kpá Ea Dì Nè Gbò Kànen Mm̀ Bõ̀ònatõ̀ò. Mm̀ bàà gbáá, Randi nè nda beè ma boo 75 kà kele-kele vái, sõò nyíéi beè ẹẹ ló tóm e géè sì. Dee deè nvéè buù sè, nyíè gbò kànen ólò palàge ẹẹ boo béè kọ bà ólò mòn bé e Gbò Ge Tulè Tóm bulà nú ea kil ló ba gè fã́ Bàrì naa.

Tṍó e tṍó téní, m beè noomà nú Tọọ̀ Kpá Ea Dì Nè Gbò E Bà Gé Vee Kpẹ̀a Boǹ Méné. Bé e nòònù tọọ̀ kpáí meà naa ólò naa kọọ̀ pọ̀ á sii gbò nvín tọọ̀ kpáí ló gè tú àlàbà kà ávà ĩimátẽ́ tọọ̀ kpáá buù dee, àbèè ge tú taa kà ávà siimá tóm boo nu e ba beè nèva gbẹá tọọ̀ kpá buù deè ló èlà tṍó e ba ni iná tọ, nè ge naa ténì kà àbèè vòò kà nu gè naa gbẹá tọọ̀ kpá buù sè. Nen e ólò gbá noomà nu gbẹá tọọ̀ kpáí nè nda ólò baatẽ́ kọọ̀, bà náa é láá sì be Jìhòvà náa nveè bá nèva. M̀ ólò bọọgẹ̀ kẽea boo bé ea ólò bọọ́ ló gbò nvín tọọ̀ kpáí naa kọọ̀ ge dẹẹa boo Jìhóvà beè naa kọ bàá láá teeIá tùlà ba nu gè naa gbẹá tọọ̀ kpáí èlmà bé e bà géè ẹ̀bmà dẽe naa.

Lèèma e ńdáà kà beè ié mm̀ dõona gbò beè naa kọ á nvèè bá nè gbò ea ólò noomà Kpá Káí kọ bàá sìm kilsĩ́, vaá níí beè naa kọọ̀ ńdáà tẹ̀ á ié tàn ge sí nònù. Taà deè aa ló deé e ńdáà kà beè ù, a beè bọọí ló gè mòn ńdáà tẹ̀ kè kẽè lòbèl kèsĩ́ gbò nen gbẹá Kíndòm Họ́ọ̀l, vaá lọl tṍóá ààmà a beè kilsĩ́ gè sí nònù mm̀ 26 gbáá. Náa kal ló béè kọọ̀ náa beè dììa múú, gbò kànen beè kọ́ nèm kọ à ólò dú túá nen ea é iná nònù buù sè.

Ńdáà kà beè dù kà lé nu dòòmà bá nè nda nè pá nà vígà pábia. Taa kà pá ńdáà vígà pábia nè ba dóm dì e bà gé fã Jìhóvà mm̀ bọ́ọ̀ló dẹ̀lẹ̀ nyíé boo. Enè ọ̀và gé sí tóm tọ nàà tóm ea di Portugal, vaá ń-na ọ̀vàa gé sí tóm tọ nàà tóm ea di Haiti.

Randi nè nda di e gé sí tóm dì belí gbò gyà deèsĩ́ tóm kọ̀ kpẹ̀a ea di kele gbẹá Hamilton, ea di Ontario. Tṍó e géè sí tóm gè kùdẽe ló sẹ́kiùta, e beè dé kpéè ló gè zọ̀ pá vígà kãa gbò e bà ólò noomà Kpá Káí. Sõò kátogóí, nyíéi ẹ́ẹ ló gè zọ̀ gbò e beè kọ́ kpẹ̀a nè noá Kpá Káí vaá mòn bé e bà gé sim kilsĩ́ naa. Vaá ge bã̀àa kóò pá vígà e ba di bẹẹ ãa bõ̀ònatõ̀ò síèi kpóó ló, boo béè kọọ̀ è monì bé e Jìhóvà gé nvèè bá nèva naa tṍó e nu dú lé nè tṍó e dìtõ̀ò tavàlà.

Tṍó e kẽea boo bé e pá vígà beè iéi lèèma m naa, nyíéi ólò ẹẹ. Níí a náa kọọ̀ é “ié tàn” ge nvèè bá nè dõona gbò vaá siè va kpóó ló kọ bàá kilsĩ́ gè fã̀ Jìhóvà. (2 Kọ́r. 7:6, 7) Dì belí nu dòòmà bá, à ié pá tọ e dénè ọ̀và géè gbá sí tóm kọ̀ kpẹ̀a dénè tṍó daalá lọl ló ba tẹ̀. M beè bĩiná ba tẹ̀ be a beè láá bugi togó boo gè dú neǹ gyà deèsĩ́ tóm kọ̀ kpẹ̀a. A beè aalá kọ à gé nveenìè bá neè taà nen e bà gé sí tóm gyà deèsĩ́ tóm e bà diè a tọ. M beè gbóó bĩináe kọọ̀, “Gbàà olo nè Jìhóvà, méé ní ea é láá palage nvèè bá nèva ẹ́?” M beè sièe kpóó ló kọ á zọ̀va sí tóm gyà deèsĩ́ tóm kọ̀ kpẹ̀a. Ọ̀ọ̀lẹ̀ ẽ́ aa ló tṍóá, a beè gbóó dú neǹ gyà deèsĩ́ tóm kọ̀ kpẹ̀a.

Randi nè nda é kilsĩ́ gè vee gbò “tóm dũ̀ùnè” Jìhóvà nè gbò “kúúlí ea é dú deè sĩ́,” vaá àé léémái kọ bàá dé kpéè gè sí tóm nè Jìhóvà belí bé e beele ni dé nágé kpéè ló naa.​—Ps. 71:17, 18.