1-2. Mósĩ́ deè ní eé láá tú neǹ Kráìst doolé ló tọ gbàn deè ea palàge bọọ́ gãboo é? (1 Kọ́rìnt 15:58)

 DEE deè nvéè mm̀ gbò gbáá 1970 a, ba beè tìb 60-kpãà tọ ea el gãboo dénè tọ ea di Tokyo, ea di Japan. Gbò nen beè bĩiná beè tọí é láá emá zùgà kunukẽ̀ ea ólò naaá gbẹá boní. Éé ní e gbò e ba beè tìb tọí beè naa kọbé à láá emá zùgà kunukẽ̀ ea ólò bọọgẹ̀ naaá pọ̀b boní ẽ́? Ba beè tìb tọí kọ á palàge agaló naa ní ea é láá bẽeá kọbé zùgà kunukẽ̀ náa láà kõoná. Gbò e bà gé nyoone nvéè Kráìst bélí tọ gbàn deèí. Mósĩ́ deè e?

² Nen ea gé nyoone nvéè Kráìst é íè ge ié agẹ ló vaá gbọọ́ ló belí tọí. Àé dú bíi kọ á palàge ié agẹló vaá beeláfùl ge tõó boo gbò nòòkúù Jìhóvà nè a log. (Bugi 1 Kọ́rìnt 15:58.) Àé dí ‘kpènà ló gè gbàntṍ ló’ log Bàrì vaá náa é nyááná gã́. Boo dõona bá, àé dú bíi kọ á dú “gbọ́ọ́-gbọọ̀ ló” tṍó ea dìtõ̀ò bĩ́íná kọ á naa vó. (Jém̀z 3:17) Nen Kráìst ea ólò ẹ̀b nú boo bá ea bọ́ló náa é ẹb kọọ̀ áá ńlẹ́ẹ̀ béèlàfùl ní ea dú léé, àbèè ge tẹlẹ̀ gbẹ́gẹ̀lẹ̀. Mm̀ nakà togó belí, èé ló bel boo tṍó ea é dú bíi kọọ̀ nen á elá àgàlà. Èé ló nágé bel boo vòò kà nú e Sétàn ólò naa kọbé née láà elá àgàlà.

3. Mókà log ní e Nen Ea Bọọ Lọ̀l Vaá À Lee néi mm̀ kpá Tóm 15:28, 29 é?

³ Jìhóvà ní ea dú nen ea ólò nè log ea bọọ lọ̀l vaá à lee é, vaá à ólò nè log e pá a gbò é dã́ból ló. (Àìz. 33:22) Dì belí nu dòòmà bá, gbò ge tulè tóm mm̀ túá gbò gbááá beè kọ́ taà kà nú e pá vígà é náa kọbé bà láá kilsĩ́ gè elá  àgàlà: (1) dú gè kìn gbò ńbàlì e bà náàmà bá vaá fã̀ áá Jìhóvà, (2) dú gè gbàntṍ ló log Bàrì ea kil ló mii, vaá (3) dú gè tõó boo nòòkúù Jìhóvà ea kọ́ é kpòòlà lóó lọl ló kúnàgã̀. (Bugi Tóm 15:​28, 29.) Mósĩ́ deè ní e gbò níí Kráìst deè nieí é láá elá àgàlà mm̀ taà sĩ́deèí é?

4. Mósĩ́ deè ní e ólò fã̀ áá Jìhóvà ẹ? (Kùùà Nù 4:11)

⁴ È ólò kìn ge fã̀ gbò ńbàlì e bà náàmà bá, vaá fã̀ áá Jìhóvà. A beè nè log pá Ízràẹ̀l kọ bàá fãè áá ẹlẹ. (Dìt. 5:6-10) Tṍó e Sétàn beè ẹ̀bmà Jíízọ̀s, a beè palàge tẹlẹ bàlà kẽ kọọ̀ áá Jìhóvà ní eé íè ge fã̀e. (Máát. 4:8-10) Vóà naa, née ólò nè fã̀ gbò nú e bà náàmà bá. Née ólò tu nagé ka ea kuu Bárì nè gbò nen​—kọbèè bà dú gbò tẹ̀sĩ́ fã̀, gbò e bà gé bẹl, gbò e bà ólò láá bìlà bọ́ọ̀l, nè gbò ọ́lì sọ́l. È ólò dì nè Jìhóvà vaá fã̀ áá nen ea beè “dèm dénè nu.”​—Bugi Kùùà Nù 4:11.

5. Éé ní ea náa vaá è ólò gbàntṍ ló log Bàrì ea kil ló gè nvèè ka ló dùm nè mii ẽ́?

⁵ È ólò tõó boo log Jìhóvà ea kil ló gè nvèè ka ló dùm nè mii. Ló éé? Boo béè kọọ̀ Jìhóvà kọ́ọ̀ mii ní ea tõó dọ̀ dùm ẽ, vaá dùm dú nènù ea aàẹ́ bá. (Lìv. 17:14) Tṍó e Jìhóvà beè kọ́ nè gbò nen kọ bàá bà nom, a beè kọ́ nèva kọ bàá gá bà mii. (Jén. 9:4) A beè tu nagé logí nvee gbàà log ea beè nè pá Ízràẹ̀l tenmá bá Mózìs. (Lìv. 17:10) Vaá a beè kọ nagé nè gbò ge tulè tóm mm̀ túá gbò gbááá kọ bàá tenmá kọọ̀ kọ̀láá gbò e bà gé nyoone nvéè Kráìst á gá bà “mii.” (Tóm 15:28, 29) Beele ólò palàge gbàntṍ nakà logí tṍó e gé ne béèlàfùl ea kil ló íb bóa eé tú. b

6. Éé ní eé piiga boo gè naa kọbé è láá tõó boo gbò nòòkúù Jìhóvà ea õoà ẽ?

⁶ È ólò palàge tõó boo gbò nòòkúù Jìhóvà ea kil ló gè kpòòlà lóó lọl ló kúnàgã̀. (Híb. 13:4) Neǹ tóm Pọ́ọ̀l beè ãanéi kọ é ‘fẹ́’ dénè tàn ea dìí m​—vaá níí tõó dọ̀ kọọ̀ èé palàge siá kpóó ló nyòòmà gé tú kọ̀láá kà pọ́lọ́ tàn lọa m. Èé kpoolà lóó lọl ló gè ẹ̀b àbèè ge naa gbò nú ea é náa kọ é bã mm̀ dùm kúnàgã̀. (Kọ́l. 3:5; Jóòb 31:1) Tṍó e ẹ̀bmà élaí sĩ́, èé gbẹá boo kìn kọ̀láá íb tóm̀ bùlà àbèè láb ea é láá kyọ̀ bẹẹ gbaa ló kilma ló Bàrì.

7. Éé ní eé bééláfùl ge naa ẽ́, vaá ló éé?

⁷ Jìhóvà ẹbmà dẽe kọ é ‘palàge tú bẹẹ lóó nè mm̀ ge gbàntṍ ló dòbá nu ea néi.’ (Róm̀ 6:17) Gbò tule ea aàẹ́ bá ólò dọ̀ bélè nèi lee, vaá née é láá nyaaná a log. (Àìz. 48:17, 18; 1 Kọ́r. 6:9, 10) Èé piiga boo gè naa nú ea léémá Jìhóvà vaá ié íb dùm e neǹ ọ́lì sọ́l beè iéá, a beè kọọ̀: “Ndaa bééláfùl ge tõó boo gbò o nòòkúu dénè tṍó, tẹlẹ ke kùbmà.” (Ps. 119:112) Náa kal ló béè vó, Sétàn gbĩ́ gè ọọvẹ ló bẹẹ béèlàfùl kilma ló gè fã̀ Bàrì. Mósĩ́ deè ní ea ólò naamá vó é?

8. Mósĩ́ deè ní e Sétàn ólò gbĩ́ gè ọọvẹ ló bẹẹ béèlàfùl ge fã̀ Bàrì tení dú ló bíígá ló é?

⁸ Bíígá ló. Sétàn ólò tú bíígá ló tẹlẹ̀í boo kọbé à ọọvẹ ló bẹẹ béèlàfùl. A nu sẹ̀ẹ̀a sĩ́ dú gè ‘sọ̀ọ̀làí mèn’ vaá kyọ̀ bẹẹ gbaa ló kilma ló Jìhóvà. (1 Pít. 5:8) Ba beè siimà pọ̀ gbò níí Kráìst mm̀ túá gbò gbááá, bòm va, vaá fẹ́ va boo béè kọ bà bééláfùl ge elá àgàlà. (Tóm 5:27, 28, 40; 7:54-60) Sétàn gé bíìgè ló gbò níí Bàrì deè nieí nágé. Níí dọa bàlà kẽ tení dú ló  agẹbá bíígá ló e bà gé tẹ́lẹ boo pá vígà e bà di Russia nè dõona kà gbò dó. Vaá bà gé bíìgè ló gbò e bà gé fã̀ Jìhóvà beeá ló bàlà booí.

9. Nè nu dòòmà bá ea kil ló nú ea náa vaá à dú bíi kọ é ié ọ̀ẹ̀ dẽe kilma ló tã́gĩ̀bá ea é láá vàlẹ̀bá sivèi.

⁹ Gbò tã́gĩ̀bá ea é láá vàlẹ̀bá sivèi. Gbá ló bíígá ló, Sétàn ólò tú pọ́lọ́ kyèèlè domáí ló. (Ẹ́fẹ. 6:11) Bugi togó boo nú ea beè naaá ló ene kà vígà págbálà ea bée kọlà Bob, e ba beè baáẹ gbẹá tọọ̀ biè. A beè kọ́ nè gbò dóm biè kọọ̀ kọ̀láá bé e nu meà naa bàá gá nveenìèe mii ló. Neǹ dóm bièa beè zìgà kọ àé nveenìè ka ló a béèlàfùl. Sõò, bílá deè deeá besĩ́ bà kalá baáẹ, nen ea é tibvíe biè kyọ́ọ́ beè sì gé kãáe tṍó e pá a tọ ni aà kil be. A beè kọ́ nè Bob kọọ̀ bà náa é nveèe mii ló, sõò bàé tú sẹlẹ kuló kọbé bà nveèé ló be à dú bíi. Be à sẹlẹ, neǹ dóm bièa beè ié bùlà kọọ̀ Bob é nyááná a bùlà bé e pá a tọ á gé naé kpàna. Sõò Bob beè elá àgàlà vaá kọ́ nèe kọọ̀ bàá á gá nveenìèe mii ló kọ̀láá bé e nu meà naa.

10. Éé ní ea náa vaá bug togó gbò nen à dú gẹẹ-gẹẹ lóé? (1 Kọ́rìnt 3:19, 20)

¹⁰ Bé e gbò nen ólò bugi togó naa. Be è ẹb nu belí bé e gbò nen ólò ẹb nu naa, àé náa kọ é ẹ̀b Jìhóvà nè gbò a nòòkúu tẹlẹ kẽ. (Bugi 1 Kọ́rìnt 3:​19, 20.) Gã́bug tṍó, ‘nú e pá bàlà booí tú kolmá nyìmànù’ ólò tãgĩbá gbò nen kọ bàá lọ̀l togó kèbá Bàrì. Sìgà gbò nyòòne nvéè Kráìst e ba beè di Páágàmàm nè Taiatáírà beè ẹ̀b kọọ̀ pọ́lọ́ á gé ló dùm kúnàgã̀ nè dùm ge fã̀ gbò ńbàlì e bà náàmà bá dì belí bé e gbò e bà di gbò boná ẹb naa. Jíízọ̀s beè palàge kọ́ bel gbò bõ̀ònatõ̀òí boo béè kọ bà sọtọ́ deè kọọ̀ dùm kúnagã̀ á di vá zẹ̀ẹ̀. (Kùùà 2:14, 20) Deè nieí, gbò nen é láá tãgĩ́i bá kọ é ẹ̀b nu boo bá e náa bọ́ló. Pá bẹẹ tọ nè gbò e nyímà ló é láá tãgĩ́i bá kọ é dọ̀ log Bàrì. Dì belí nu dòòmà bá, bàé láá kọọ̀ náa bọọgẹ̀ dú bíi kọ é naa nú ea dú lé dénè tṍó, nè ge kọọ̀ gbò nòòkúu ea di mm̀ Kpá Káí ea kil ló gè tõó dùm ea õoà náa gé síá ná tóm deè nieí.

11. Boo tṍó e gé élá àgàlà, éé ní ea bọ́ló kọ é gá naa ẽ́?

¹¹ Sìgà tṍó, èé láá bugi togó kọọ̀ Jìhóvà náa kọ́ dénè nú eé náa nèi. Vaá níí é láá naa kọ é gbĩ́ gè zelí “boo nu e ba è emí mm̀ Kpá Káí.” (1 Kọ́r. 4:6) Gbò tule bõ̀ònaló fã̀ e ba beè di mm̀ deè Jíízọ̀sa beè dọ̀ nakà logí. Ba beè tú baálà log gbá ló log Bàrì vaá naa kọ á tavala ló gbò nen gè gbàn tṍ ló. (Máát. 23:4) Jìhóvà ólò nèi tùle e palàge dã́tẽ́ tenmá bá a bõ̀ònatõ̀ò. Náa dú bíi kọ e kpáá tú dõona kà log gbáló gbò tule e Jìhóvà gé néi. (Pró. 3:5-7) Be è náa vó, née zélì boo gbò nu e ba beè emí mm̀ Kpá Káí, àbèè ge tenmà log e á gé mm̀ Kpá Káí.

12. Mósĩ́ deè ní e Sétàn ólò tú ‘kẹ̀lẹ̀’ siimá tóm ẽ́?

¹² Kẹ̀lẹ̀. Sétàn ólò tú ‘kẹ̀lẹ̀,’ “nàà nu gbò nen nè log bàlà booí” kẹ̀ẹ̀mà gbò nen vaá naa kọ bàá pòòà. (Kọ́l. 2:8) Mm̀ túá gbò gbááá, a beè tú nyìmànù gbò nen nè dò bá nuù pá Júù e bè náa dẹẹa boo Kpá Káí nvee kẽ, vaá kọọ̀ gbò nen é íe ge gbàntṍ ló Log Mózìs. Níí beè dú kẹ̀lẹ̀ boo béè kọ à beè tú gbò nen lọl ló Jìhóvà, ea dú Kpòkúm kà-kà nyìmànù. Deè nieí, Sétàn ólò tú rédiò nè íntanet vèèmà kyáá bel ea aa gã̀ gbò e bà gé bẹl. E beè dã́ gã́bug kyáá belí tṍó e pọ́lọ́ kom ea kọlà COVID-19 géè palàge zoogáá. c  Gbò Neǹ Ditõ̀ò Jìhóvà e ba beè tõó boo gbò tùle e bõ̀ònatõ̀ò Jìhóvà gé nè náa beè ié íb tã̀àgã̀ bùlà e gbò e bà gbàntṍ ló gbò kyáá belí beè ié.​—Máát. 24:45.

13. Éé ní a náa à bọ́ló kọ é ié ọ̀ẹ̀ dẽe kilma ló gbò nú ea é láá maanái bùlà ẹ?

¹³ Gbò nu ea é láá maanái bùlà. À bọ́ló kọ é ká dẽe gbẹẹ́ boo gbò nú ea “palàge dú bíi.” (Fíl. 1:9, 10, NW.) Gbò nú ea é láá maaná bẹẹ bùlà ólò tú gã́bug tṍó e gáẹ̀ beè naamá nú ea palàge dú bíi lọ̀líí bá. Gbò nú e ólò naa​—dì belí gè dé nu, ge ṍ nu, kólì kyáà, nè tóm e gé sí​—é láá naa kọ é gá ká bùlà gbẹẹ́ boo gbò nú ea palàge dú bíi mm̀ bẹẹ dùm. (Lúùk 21:34, 35) Gbá ló vó, kọ̀láá deeí è dì e gé dã́ kpẹ̀a ea kil ló dùlà-dùlà ea di zẹ̀ẹ̀ gbò kpóó bẹlbẹ̀l nè gbò e bà gé bé boo nú ea kuu va. Née é zigà kọọ̀ gbò nuí á maanái bùlà. Be née íè ọ̀ẹ̀ dẽe, èé láá dààmà togó gè nvèè sãa kúm enè gbò mm̀ bẹẹ nyíe. Sétàn ólò tú gbò nú e ni kol béeí siimá tóm kọbé à ọọvẹ ló bẹẹ béèlàfùl ge naa nú ea léémá Bárì. Naanii èé ló bel boo bé eé láá bé èlbá vaá kilsĩ́ gè elá àgàlà naa.

14. Éé ní ea é láá nvèè bá nèi kọ é gá aa ló Jìhóvà ẹ?

¹⁴ Bugi togó boo nú ea beè naa kọ ó kìn lóó nè Bàrì vaá diia múú. O beè naa gbò nuí boo béè kọ o beè gbĩ́ gè dì nè Jìhóvà. Bugi togó boo nú ea beè naa kọ ó agala boo kọ o monìè kà-kà bõ̀ònaló fã̀. O beè nó nú ea kil ló Jìhóvà vaá níí beè naa kọ ó fã̀e dẽe vaá vùlèe dì belí o Tẹ̀ ea di káála. O beè gbóó ié zìgà vaá níí beè naa kọ ó ọgá ló o pọ́lọ́. O beè kìn gbò pọ́lọ́ láb eo géè labví vaá tõó dùm ea gbááá ló bùlà Bàrì. Lóó ni beè dĩ̀ìnà tṍó eo nyímà kọọ̀ Bàrì a ia ló o pọ́lọ́. (Ps. 32:1, 2) O beè sí nònù vaá dààmà togó gè kọ́ nú eo gé nó nè dõona gbò. Kátogóí, boo béè kọọ̀ o kin lóó nè Bàrì vaá dììa múú, ò dì eo gé kyãa boo èèlè ea é náa kọ ó ié dùm, vaá beeláfùl kọ nóo é aalìè boo.​—Máát. 7:13, 14.

15. Éé ní ea náa vaá ge nó Kpá Káí nè ge bugi togó boo nú e nóò é dọ̀ bélè e?

 ¹⁵ Nó Moǹ Bel Bàrì vaá ò bugi togó boo. Dì belí bé e té ólò elá àgàlà tṍó ea lí palàge bã mm̀ kunukẽ naaá, níà bé e bẹẹ zìgà é kpáá agaló tṍó e nóò Kpá Káí naa ẽ́. Bé e té gé bọọ naa, níà bé ea lí ólò bã kunukẽ vaá bọọ́ tõ̀ò naa ẽ́. Tṍó e nóò Kpá Káí vaá bugi togó boo, à ólò agẹlẹ ló bẹẹ zìgà vaá naa kọ é palàge agala boo kọọ̀ gbò nú e Bàrì kọ́ é naa ní ea dú lé lọ̀l vaá à lee é. (Kọ́l. 2:6, 7) Bugi togó boo bé e dùùlà bá deè tṍ ea aa bá Jìhóvà, a tùle, nè a kpènà beè nvèè bá nè pá a gbò tṍó ea kil nvéeá naa. Dì belí nu dòòmà bá, Èzíkiẹ̀l beè palàge ẹ̀b tṍó e nyómá tóm géè tú ọ̀ẹ̀ dẽe dòòmà tọọ̀ káí ea beè mon mm̀ a mòànù dẽeá. Mòànù dẽeí beè siè kpóó ló Èzíkiẹ̀l, vaá à noomài bé eé láá kilsĩ́ gè tõó boo gbò nòòkúù Jìhóvà ea kil ló õ̀òa fã̀ naa. d (Èzí. 40:1-4; 43:10-12) Beele ólò ié nágé bélè lọl ló gè noo tṍó noomá Kpá Káí vaá bugi togó boo gbò nú ea tavàlà ge dã́ból ló ea di m.

16. Mósĩ́ deè ní e gè ié agẹ nyíe beè kpènà Bob ẹ? (Psalm 112:7)

¹⁶ Ié agẹ nyíe. Méné Dévìd beè baatẽ́ bé e vulè ea íèè kilma ló Jìhóvà agabá naa tṍó ea ọ́lí kọọ̀: “M̀ élà àgàlà, E Bàrì.” (Ps. 57:7) Beele nagé é láá elá àgàlà mm̀ bẹẹ nyíe vaá palàge dẹlẹ nyíé boo Jìhóvà. (Bugi Psalm 112:7.) Bugi togó boo bé e níí beè nvèè bá nè Bob e beè zẹ́ẹ́ kọ́ nu ea kil lóá naa. Tṍó e bà kọ́ nèe kọọ̀ bàé túè mii sẹlẹ kuló, kọbé bà nveenìèé ló be à dú bíi, a beè kọọ̀ àé aalìè tọọ̀ bièa be bà kọ́ bàé nveenìèe mii ló. Tṍó e tṍó téní, Bob beè kọọ̀, “Ním beè ié bàà-bàà bùla kilma ló nu gè naa, vaá pọ̀ náa beè siím ló nu ea é láá sìlà aa m.”

17. Éé ní eé láá nó lọl ló nu ea beè naaá ló Bob ẹ? (Ẹ̀b nàgé fòtó.)

¹⁷ Bob beè elá àgàlà boo béè kọ a beè tú a béèlàfùl kpã́á dee besĩ́ à kalá sí tọọ̀ biè. Túá kà, a beè ié tàn ge naa kọọ̀ nyíè  Jìhóvà á ẹẹ. Ní ea égè bàà, a beè tú ọ̀ẹ̀ dẽe noomá Kpá Káí nè gbò kpá ea dẹẹa boo Kpá Káí ea kọ́ nú ea kil ló bé e dùm nè mii di káí naa. Ní ea égè taa, a beè agala boo kọọ̀ ge tõó boo tùle e Jìhóvà ne é dọẹ̀ bélè neèe dọ̀ọ̀mà dè-dè. Beele nagé é láá ié íb nakà àgẹ nyíeá kọ̀láá bé e ẹ̀bmà ea élaí sĩ́ meà naa.

18. Mósĩ́ deè ní e nu dòòmà bá Béràk nóòmài kọ é dẹlẹ nyíé boo Jìhóvà ẹ? (Ẹ̀b fòtó ea di boo kóó kpáí.)

¹⁸ Dẹlẹ nyíé boo Jìhóvà. Bugi togó boo bé e Béràk beè bé èlbá tṍó ea tõó boo tùle ea aa bá Jìhóvà naa. Náa kal ló béè kọọ̀ tọ́ọ̀ kà sòbà nè gbọ gè uuá deè náa beè di dó Ízràẹ̀l, Jìhóvà beè kọọ̀ Béràk á àà gé bé gbò bé Síserà e bà dú Kénaan, e ba beè ié gbõ̀òme nuù bé. (Jọ́jìs 5:8) Neǹ kọ́ọ̀ bùlà Bàrì ea bée kọlà Dẹ́borà beè kọ́ nè Béràk kọ á kil kĩée e kẽ ọ́ọ́gá gé bé Síserà nè 900 kà faà bé ea beè faalá. Náa kal ló béè kọọ̀ kĩée ea ọọgáí é láá palàge leé ló gbò bé Síserà, Béràk beè gbàntṍ ló tùleá. Tṍó e gbò béá íná Boo Gù Tébọ̀, Jìhóvà beè naa kọọ̀ gbele agẹbá boo á dọọ. Gbò faà bé Síserà beè siilá gbẹá gbàà gbá vaá Jìhóvà beè naa kọọ̀ Béràk á bé èlbá. (Jọ́jìs 4:1-7, 10, 13-16) Mm̀ tẽ̀ènè sĩ́deèá, Jìhóvà é náa kọ é bé èlbá be è dẹlẹ́ẹ nyíé boo vaá tõó boo gbò tùle ea néi tenmá bá a bõ̀ònatõ̀ò.​—Dìt. 31:6.

19. Éé ní ea náa ò beeláfùl ge kilsĩ́ gè elá àgàlà ẹ?

¹⁹ Àé dú bíi kọ é siá kpóó ló kọbé è láá kilsĩ́ gè elá àgàlà boo béè kọọ̀ nàà uú boo náa é íná kùbmà dọ̀ọ̀mà tṍó e kùbmà é bã́ ló bàlà boò Sétàní. (1 Tím. 6:11, 12; 2 Pít. 3:17) Naanii née é zigà kọọ̀ bíígá ló, gbò tã́gĩ̀bá ea é láá vàlẹ̀bá sivèi, bé e gbò nen bugi togó naa, kẹ̀lẹ̀, nè gbò nú ea é láá maanái bùlà á naa kọ é gá elá àgàlà. (Ẹ́fẹ. 4:14) Tãa vó, naanii èé kilsĩ́ gè elá àgàlà, beeláfùl ge fã̀ áá Jìhóvà, vaá gbàntṍ ló gbò a log. À dú nágé bíi kọ é dú gbọ́ọ́-gbọọ̀ ló. Mm̀ togó bel ea bẽene níí, èé ló bel boo bé e Jìhóvà nè Jíízọ̀s dú kà lé nu dòòmà mm̀ ge dú gbọ́ọ́-gbọọ̀ ló naa.