1. Éé ní ea náa èé láá tú Sétàn doolé ló neǹ tã́à nom ẽ́?

NÚ EA ólò di bùlà neǹ tã́à nom dú gè tãa nomá gbẹẹ́ dùm àbèè ge fẹ̀. Àé láá elí kele-kele íb nu gè siimá nom, belí bé e enè nen ea beè di gbàà gbò e bà géè sẹlẹ ló kọ bà gé nveenìè nyíé gbàà Jóòb beè kọ́ naaá. (Jóòb 18:8-10) Mósĩ́ deè ní e neǹ tã́à nom ólò kẹlẹ nom nvee dáà a gyẽ́ì ẽ? À ólò nó láb nomá, kiẽ́e ea ólò kìl, nú ea ólò leemáe, nè nú e nen é láá elí siimáe. Sétàn dì belí neǹ tã́à nomá. À ólò nó bẹẹ láb. À nyímá kiẽ́e e ólò kìl nè nú ea ólò leemái. Vaá à ólò gbóó elí gyẽ̀ì ea nyímá kọ àé láá siíi tṍó e bè née géè ẹ̀bmà dẽe. Sõò Kpá Káí náa kọ é nyimá kọọ̀ bè à sííi, èé láá aa dáa. À nóòmà nài gé gbò nú eé náa kọbé née dọọ̀ dáa.

2. Éé ní ea dú bàà kà nú e Sétàn ólò bọọgẹ̀ siimá gbò nen ẽ́?

² Bàà kà nú e Sétàn ólò bọọgẹ̀ siimái dú dùm dàlà kpá ló boo nè gọ̀l òò. * Sétàn á tú na gbò nuí siimá tóm mm̀ gã́bug gbáá. À bélí neǹ síì ńnóm ea ólò tú nu ge kẹ̀ẹ̀mà ńnóm elmá gyẽ̀ì, àbèè nen ea ólò kẹlẹ ńnóm nvee dáà gbṍò. (Ps. 91:3) Sõò Sétàn náa é láá sii beele. Ló éé? Boo béè kọọ̀ Jìhóvà a náa kọ é nyimá gbò kyèèlè e Sétàn ólò siimá gbò nen.—2 Kọ́r. 2:11.

3. Éé ní ea náa vaá Jìhóvà à tú nu dòòmà bá gbò e ba beè ié dùm dàlà kpá ló boo nè gọ̀l òò emí mm̀ Kpá Káí é?

³ Enè sĩ́deè e Jìhóvà ólò ãanéi ea kil ló dùm dàlà kpá ló boo nè gọ̀l òò, dú gè sièi kpóó ló kọ é nó nu lọl ló nú ea beè naaá ló dõòna gbò. Èé mon bé e Sétàn beè láá kẹlẹ sìgà gbò e ba beè tú gã́bug gbáá fã̀àmà Jìhóvà mm̀ tṍó ea kil nvéeá naa. É kọ níá tõó dọ̀ kọọ̀ beele née é láá kpòòlà lóó lọl ló gè ié dùm dàlà kpá ló boo nè gọ̀l òò? Níì vó nì.  Jìhóvà beè tú gbò nu dòòmà báí emí mm̀ Kpá Káí kọbé à dú “nu dùùlà bá deè tṍ nè beele.” (1 Kọ́r. 10:11) À nyímá kọ èé láá nó nu lọl ló gbò nu dòòmà báá vaá nyimá bé eé láá kpòòlà lóó lọl ló, àbèè ge aa dáà gyẽ̀ì Pọ́lọ́ Nyómáí naa.

4. Éé ní ea é láá naaáí ló be è íe dùm dàlà kpá ló boo é?

⁴ Sétàn gbĩ́ kọ é ié dùm dàlà kpá ló boo. À nyímá kọ be è sọtọ́ deè kọọ̀ dùm dàlà kpá ló boo á siíi kúm m, èé bélìè ẹlẹ vaá pee dùm e bè náa tá. (Pró. 16:18) Vóà naa, neǹ tóm Pọ́ọ̀l beè ãanéi kọọ̀ dùm dàlà kpá ló boo é láá naa kọọ̀ nen ‘á dọ bá tẽ̀ènè kà bẽge bel e Pọ́lọ́ Nyómá beè dọ báá.’ (1 Tím. 3:6, 7) Níá é láá naaá ló buù bẹ̀ì, kọbèè è ã́àa bã mm̀ bõ̀ònatõ̀ò àbèe e tú gã́bug gbáá fã̀àmà Jìhóvà.

5. Dẹ̀ẹ̀a boo nú ea di mm̀ kpá Ẹ̀klìzíástìs 7:16, 20, mósĩ́ deè ní e nen é láá dàlà kpá ló boo é?

⁵ Gbò dàlà kpá ló boo ólò ié dùm kùlù kúlù. Sétàn ólò pììga boo gè naa kọ é ié dùm kùlù-kúlù, nè ge bugi togó kilma ló bẹẹ bá èlmà bé e bugì togó kilma ló Jìhóvà naa, bọọ èlmà tõ̀ò, tṍó e gé téní bá nu ànà-ànà. Dì belì nu dòòmà bá, é kọọ̀ à íe tṍó e ba beè kpọ́ ni kyáá bel ló, àbèè ge tú pọ́lọ́ bá sẹ̀ẹ̀mà ni? À léémá Sétàn kọ ó kọ́ bel Jìhóvà àbèè pá vígà. Pọ́lọ́ Nyómá gbĩ́ kọ ó bugi togó kọọ̀ áá sĩ́deè ge ààma bá dú gè naa nú ea léémá ni, èlmà ge tõó boo tùle Jìhóvà ea di mm̀ Kpá Káí.—Bugi Ẹ̀klìzíástìs 7:16, 20.

6. Éé ní eo é láá nó lọl ló nú ea beè naaá ló ene kà vígà pábia ea di Netherland e?

⁶ Bugi togó boo nú ea beè naaá ló ene kà vígà pábia ea di Netherland, e nyíée beè palàge bììlà boo béè lọ̀ dõòna gbò. A beè beeláfùl kọọ̀ naá é zọnàè va naaá ná nu. Vígà pábiaá kọ́ọ̀: “A beè tõó ḿ ló belí kọ à dú áá m̀m̀, vaá ním beè láá ia ló nèva. M beè kọ́ nè ńdáà dóm kọ á naa mè é kil dõòna kà bõ̀ònatõ̀ò.” Vígà pábiaí beè gbóó ẹ̀b JW Broadcasting^® níí March 2016. Vídiòa beè kọ́ sìgà nú e nen  é láá naa gè emá lọ̀ dõòna gbò. À kpáá kọọ̀: “M beè gbóó mòn kọọ̀ à dú bíi kọ ḿ kìlmà kpá ló kẽ vaá bugi togó boo nà lọ̀ èlmà ge pììga boo gè nyaaná dùm pá vígà. Vídiòa beè nvèè bá nèm kọ ḿ ká bùlà gbẹẹ́ boo Jìhóvà nè ge nyimá kọọ̀ áá ẹlẹ ní ea lela ló gè kọ́ nú eé náa nèi ẽ́.” Nee kà ea di mm̀ nú e gé kọ́í. Kilsĩ́ gè ká bùlà gbẹẹ́ boo Jìhóvà tṍó eo kpeè sĩ́ ló nu ànà-ànà. Bànie kọ á nveenìè bá neè ni kọbé ò láá ẹ̀b dõòna gbò belí bé e ẹlẹ ẹb va naa. O Tẹ̀ ea di káála mon dénè ba lọ̀; sõò à di kpènà ló gè ia ló nèva. À gbĩ́ kọọ̀ olo ó naa nagé vó.—1 Jọ́ọ̀n 4:20.

7. Éé ní ea beè naaá ló Méné Ùzzáíà ẹ?

⁷ Dàlà kpá ló boo beè naa kọọ̀ Méné Ùzzáíà ea géè bẹ̀l Júdà á gá tõó boo tùle, vó beè naa kọ á sí tóm e bà gáà lẹ̀ẹ̀làẹ kọ á sì. Ùzzáíà beè naa gã́bug lé nu. A beè bé gã́bug bé èlbà, tìb gã́bug bon, vaá ié gã́bug ól. “Kà kà Bàrì beè naa kọ á sìm kilsĩ́.” (2 Kró. 26:3-7, 10) Kpá Káí kọ́ọ̀: “Sõò, tṍó ea sim kilsĩ́, a beè gbóó dàlà kpá ló boo naa ní ea kọọ bá kyọ̀à sĩ́ tẹẹá boo.” Besĩ́ à kalá dọ̀ tṍóá, Jìhóvà beè nè log kọọ̀ áá gbò vààla gyọ́ọ ní e bàé láá mùn ínsèns mm̀ tọọ̀ káíá ẹ́. Sõò Méné Ùzzáíà beè naa nú e náa beè lelàẹ́ ló tení dú ló gè bã mm̀ tọọ̀ káíá vaá mùn ínsèns. Nyíè Jìhóvà beè bììlàẹ́ ló naa ní ea tú kom̀ kulè tẹlẹ̀ẹ́ ló. Kom̀ kulèa beè di ló Ùzzáíà dọ̀ọ̀mà tṍó ea ú.—2 Kró. 26:16-21.

8. Mósĩ́ deè ní e gè gbàntṍ ló nú ea di mm̀ 1 Kọ́rìnt 4:6, 7 é nveè bá nèi kọ é gá ié dùm dàlà kpá ló boo é?

⁸ É kọọ̀ dàlà kpá ló boo é láá naa kọ é sí pọ́lọ́ belí Ùzzáíà? Bugi togó boo nu dòòmà bá José. A beè dú neǹ kànen mm̀ bõ̀ònatõ̀ò vaá a ki géè sìm kilsĩ́. A beè olòó nè lòbèl gbẹá àsémblì nè pọ̀bkà bõ̀ònaló, vaá gbò kùdẽe ló sẹ́kiùt ólò bĩiná dùùlà bá deè tṍ lọ̀líé bá. Vígàa kọ́ọ̀: “Sõò m beè dẹlẹ nyíé boo nú em é láá naa nè gbò nú em ni nyímá. Ním beè dẹ̀ẹ̀a na boo Jìhóvà. M beè dòòmà kọ m tõo lọ̀l, vó beè naa kọ ḿ gá gbàntṍ ló ã̀àne ea aa bá Jìhóvà.” José beè sí kà agẹbá pọ́lọ́ naa ní e bà kpóe lọl mm̀ bõ̀ònatõ̀ò. Ba beè kpáá túe tṍó e gã́bug gbáá ni téní. Kátogóí à kọ́ọ̀: “Jìhóvà a nóòmàm kọọ̀ nú ea palàge dú bíi níì ge ié dọ̀ nì, sõò ge naa nú ea kọ́ é naa.” Naanii mè é kẽèa boo kọọ̀ kọ̀láá kà nú e láà naa nè nèà deè  e íè mm̀ bõ̀ònatõ̀ò aa bá Jìhóvà. (Bugi 1 Kọ́rìnt 4:6, 7.) Jìhóvà náa é túi siimá tóm be è dalà kpá ló boo.

9. Éé ní e dùm gọ̀l òò beè naa kọọ̀ Sétàn nè Íìv á naa ẽ́?

⁹ Túá Sétàn ea dú Pọ́lọ́ Nyómá ní ea ólò kẽ̀èàí nyíe tṍó e gé ló bel ea kil ló dùm gọ̀l òò e. Ge kọọ̀ Sétàn beè dú ene kà gbàà gbò nyómá tóm Jìhóvà beè naa kọ á ié gã́bug nèà deè. Sõò a beè gbĩ́ gè ié èlmà vó. A beè gbĩ́ kọ bàá tú fã̀ ea kuu bá áá Jìhóvà neè ẹlẹ. Sétàn gbĩ́ kọ é belìè ẹlẹ, vó ólò naa kọ á pììga boo gè naa kọọ̀ nú e íè á gá gbõomáí ló. Túá tṍó ea beè dààmà togó gè naa níí beè dú tṍó ea beè ló bel nè Íìva. Vulè e Jìhóvà íe kilma ló Ádàm nè Íìv beè naa kọ á nèva gyã́á ea é gbõomá vá ló, tení dú ló gè sọ̀va tọ́ deè kọ bàá dé ból súú ea dú bè kọ̀láá kà té ea di mm̀ gònòa, daalá lọl ló ene kà. (Jén. 2:16) Sõò, Sétàn beè kẹlẹ Íìv kọ á bugi togò kọọ̀ à dú lé gè dé ból súú ea dú bè té e Bàrì beè kọ bàá gá dèa. Nú e Íìv íe náa beè gbõomáé ló; a beè gbĩ́ gè ié èlmà vó. È nyímà nú ea beè sìlà aa m. Níá beè naa kọọ̀ Íìv á sí pọ́lọ́ vaá ù, tṍó e tṍó téní.—Jén. 3:6, 19.

10. Éé ní ea beè sìlà aa mm̀ ge kọọ̀ Méné Dévìd íe dùm gọ̀l òò e?

¹⁰ Gọ̀l òò beè naa kọọ̀ gbò nú e Jìhóvà beè nè Méné Dévìd á táẹ́ nyíe, gbò nuí dú gyọ́, pọ̀b dọ̀, nè ge láá bé èlbá gã́bug pá a gbò ọ́b. Nyíè Dévìd beè ẹẹ́ ló gbò nú e Bàrì née naa ní ea kọ́ọ̀, “bà bọọ́ tõ̀ò naa ní e ním é láá kọ́ lọ̀l!” (Ps. 40:5) Sõò à íe tṍó e dénè nú e Jìhóvà beè nè Dévìd beè táẹ́ nyíe. Nú ea íe náa beè gbõomá náé ló; a beè gbĩ́ gè ié èlmà vó. Náa kal ló béè kọọ̀ Dévìd beè ilí gã́bug va, a beè sọ̀tọ́ deè kọọ̀ pọ́lọ́ tàn á bãèé m nyòòmà vaà dõòna nèn. Béè pábiaá beè kọ̀là Bàthshíbà, vaá a dóm beè kọ̀là Ùráíà ea dú Híìt. Gọ̀l òò beè naa kọọ̀ Dévìd á ié gbaa ló kilma ló Bàthshíbà, naa ní ea nííná gbàà. Dévìd beè sí pọ́lọ́, sõò a beè kpáá naa ní ea el vó tení dú ló gè naa kọ bàá fẹ́ Ùráíà! (2 Sám. 11:2-15) Éé ní e Dévìd géè bugi togó boo é? É kọ a beè dòòmà kọọ̀ Jìhóvà náa é monìè ẽ? Náa kal ló béè kọọ̀ Dévid beè tú gã́bug gbáá fã̀àmà Jìhóvà mm̀ bọ́ọ̀ló dẹ̀lẹ̀ nyíé boo, a beè sọ̀tọ́ deè kọọ̀ dùm gọ̀l òò á bãèé m, vaá a beè mòn gã́bug tã̀àgã̀ ea  dú ló. Nyíéi ẹ́ẹ kọọ̀ tṍó e tṍó téní, a beè kọ́ a pọ́lọ́ vaá ọgá. Nyíée beè palàge ẹẹ kọọ̀ Jìhóvà ia ló neèe!—2 Sám. 12:7-13.

11. Dẹ̀ẹ̀a boo nú ea di mm̀ kpá Ẹ́fẹsọ̀s 5:3, 4, éé ní ea é láá nvèè bá nèi kọ é gá ié gọ̀l òò e?

¹¹ Éé ní e nóò lọl ló nu dòòmà bá Dévìd e? È nóò kọọ̀ beè nyíéi ẹ́ẹ́ ló dénè nú e Jìhóvà néi, èé láá bé èlbá dùm gọ̀l òò. (Bugi Ẹ́fẹsọ̀s 5:3, 4.) À bọ́ló kọọ̀ nú e íè á gbõomáí ló. Èé láá noòmà gbò e ólò noòmà Kpá Káí kọ bàá bugi togó boo gbò nú e Jìhòvà ni né va, vaá õáe zaa. Beè nen náa vó kọ̀láá dee mm̀ enè sè, à tõó dọ̀ kọọ̀ a tãàgã ló Jìhóvà boo àlàbà kà kele-kele nu. (1 Tẹ̀s. 5:18) É kọ ò ólò naa nú ea bélí vó? Ge bugi togó boo dénè nú e Jìhóvà ni náa nè ni, é náa kọ ó olòó õáe zaa. Vaá tṍó eo íè dùm ṍà zaa, nú eo íè é gbõomá ní ló. Nóo é íe gọ̀l òò tṍó e nú eo íè gbõomá ní ló.

12. Éé ní e gọ̀l òò beè naa kọọ̀ Júdàs Iskárìọ̀t á naa ẽ́?

¹² Gọ̀l òò beè naa kọọ̀ Júdàs Iskárìọ̀t á sí kà agẹbá pọ́lọ́ vaá oo Jíízọ̀s. Sõò Júdàs náa beè dú pọ́lọ́ nen aa kẽ. (Lúùk 6:13, 16) Jíízọ̀s beè sàẹ naamá a neǹ tóm. Jíízọ̀s beè dẹlẹ nyíé boo Júdàs, níà nú ea náa vaá ba nèe kpó kpègè kọ á faaláẹ́. Jíízọ̀s nè pá a gbò tóm beè olòó tú gbò kpègèa ẹ̀bmà nú ea kil ló ba sìtóm kọ̀ kpẹ̀a. A beè dì belí kpègè e bà lọlà nyòòmà ge nvèèmà sãa kúm sìtóm kọ̀ kpẹ̀a ea gé kọ́á beeá ló bàlà booí deè nieí. Sõò tṍó e tṍó téní, Júdàs beè gbóó dààmà togó gè zìb nu, náa kal ló béè kọọ̀ à géè dã̀ tṍó e Jíízọ̀s géè olòó ãane gbò nen kọ bàá gá ié dùm gọ̀l òò. (Máàk 7:22, 23; Lúùk 11:39; 12:15) Júdàs beè gbẹmà nvéè gbò ã̀àneá.

13. Mó tṍó ní e Júdàs beè zogè kọ à íèè dùm gọ̀l òò e?

¹³ Júdàs beè zogè kọ à íèè dùm gọ̀l òò pọ́ì ńkem̀ tṍó besĩ́ bà kalá fẹ́ Jíízọ̀s. Sáímòn ea dú nen e kom̀ kulè beè zẹ́ẹ́ dọ lóá beè kolí kyáà Jíízọ̀s nè pá a gbò nyòòne nvée, bií ló Mérì nè a vígà Mátà. Tṍó e bà gé dé gyã́áá, Mérì beè aa boo vaá tú kpée kpéè nù ló nóo ea sí gbele tõ̀ò kpègè tṍ ból Jíízọ̀s. A beè palàge biile nyíè Júdàs nè nagbò e bà ólò nyoone nvéè Jíízọ̀sa. A beè láá tõó ló nagbò nyòòne nvéeá kọọ̀ à gáẹ̀ tú kpègèá nvee mm̀ sìtóm kọ̀ kpẹ̀a. Sõò nú ea beè di bùlà Júdàs beè dú kele. Ẹ̀ẹ̀ “beè nen zib,” vaá a beè gbĩ́ gè zìb kpègè lọl mm̀ kpó kpègèa. Tṍó e tṍó téní, gọ̀l òò beè naa kọọ̀ Júdàs á oo Jíízọ̀s ló kpègè e bà ólò oo gyóòlo ló.—Jọ́ọ̀n 12:2-6; Máát. 26:6-16; Lúùk 22:3-6.

14. Éé ní e ene kà dóm nè va beè naa boo béè kọ bà gban tṍ ló dùùlà bá deè tṍ ea di mm̀ kpá Lúùk 16:13 é?

¹⁴ Jíízọ̀s beè naa kọọ̀ pá a gbò nyòòne nvée á kẽ̀èa boo nakà kà kà bel ea palàge dì bíií, tṍó ea kọ́ọ̀: “Nóo é láá dui gyóòlo Bàrì nè gyọ́.” (Bugi Lúùk 16:13.) À dú nágé kà kà deè nieí. Bugi togó boo bé e ene kà dóm nè va e bà di Romania beè tú gbò bel Jíízọ̀sá siimá tóm naa. Ba beè mòn tóm gè bã ló gbẹá dó e gyọ́ dì. Bà kọ́ọ̀: “E beè bọọlẹ gã́bug kpègè lọl tọ gè sẹlẹ kpègè vaá è gáà beè kpẽ̀, vó beè naa kọ é zẹ́ẹ́ bugi togó kọọ̀ tómí dú tã́áná dee bá ea bá Jìhóvà.” Sõò à íe nú ea beè dú tã̀àgã̀. Be bà sí tómí, bà náa é íe ná gã́bug tṍó gè fã̀àmà Jìhóvà. Tṍó e bà bugi ene kà togó bel ea di mm̀ Kpá Tọ Kùdẽe Ló níí August 15, 2008 ea kọ́ọ̀, “Maintain Loyalty With a Unified Heart,” ba beè gbóó nè ba béèlàfùl. Bà kọ́ọ̀: “Be è aà kil dõòna kà dó gé gbĩ́ gã́bug kpègè ea é náa kọ é gá ié gã́bug tṍó ge fã̀àmà Jìhóvà, à tõó dọ̀ kọọ̀ bẹẹ gbaa ló kìlmàé ló náa bọọí ló. E beè  nyimá kọọ̀ tã̀àgã̀ é bã́ ló bẹẹ gbaa ló kilma ló Jìhóvà.” Vó beè naa kọ bàá gá sí tómá. Éé ní ea beè gbóó naaá ẽ́? A dóm beè gbóó mòn ene kà tóm gbẹá ba dó, e bàé kpẽ́ kpègè ea é gbõomá ló ba bíi. A va kọ́ọ̀: “Jìhóvà ólò kilsĩ́ ge nvèè bá nè pá a gyóòlo.” Nyíè dóm nè vaí ẹ́ẹ boo béè kọọ̀ ge fã̀ Jìhóvà bọọ́ vá ló èl kpègè.

15. Éé ní ea náa è àgala boo kọọ̀ èé láá di pọ́ì aa bá gyẽ̀ì e Sétàn gbĩ́ gè siimái ẽ́?

¹⁵ Éé ní eé náa be è mon kọọ̀ dùm dàlà kpá ló boo àbèè gọ̀l òò bã́í m-mé? Èé láá nyaaá! Pọ́ọ̀l beè kọọ̀ gbò e “bà nyímá ba lóó” kọọ̀ gyẽ̀ì Sétàn a síìlìè va, é láá teelá ààẹ́ bá. (2 Tím. 2:26) Níí beè naaá ló Dévìd. A beè pãane tṍ ló agẹbá dùùlà bá deè tṍ e Nétàn beè nèe, ọgá aa ló a dùm gọ̀l òò, vaá kpáá ié lé gbaa ló kilma ló Jìhóvà. Á gá tá ní nyíe kọọ̀ Jìhóvà íe kpóó èl Sétàn. Vóà naa, be à gá náa vaá è tú nvèè bá ea aa bá Jìhóvà, èé láá di pọ́ì aa bá gyẽ̀ì e Pọ́lọ́ Nyómá gbĩ́ gè siimái.

16. Éé ní ea é láá nvèè bá nèi kọ é gá dọ dáà gbò gyẽ̀ì Sétàn ẽ?

¹⁶ Mm̀ kà kà, à palàge dú lé be née íè dùm dàlà kpá ló boo àbèè gọ̀l òò, èlmà ge ié vaá gbóó gbĩ́ gè teelá aa bá. Èé láá naa vó tení dú ló áá nvèè bá ea aa bá Jìhóvà. Náa bọ́ló kọ é bugi togó kọọ̀ níí náa é láá naaáí ló! Bã̀àna gbò e ba ni tú gã́bug gbáá fã̀àmà Jìhóvà a íe dùm dàlà kpá ló boo nè gọ̀l òò. Vóà naa, bàn Jìhóvà kọ̀láá dee kọ á nveenìè bá neè ni kọ ó nyimá tṍó e pọ́lọ́ dùmí ni daamà togó gè bã mm̀ o bug nè o láb. (Ps. 139:23, 24) Pììgà bé eo kpóó sim tùlà naa kọbé dùmí náa bã́ ní m!

17. Éé ní ea é beè gé naaá ló Pọ́lọ́ Nyómá ea dú bẹẹ neǹ ọ́b pọ́ì ńkem̀ tṍó àla ẹ́?

¹⁷ Sétàn a dú neǹ tã́à nom mm̀ gã́bug tõ̀ò gbáá. Gbálà ńkem̀ tṍó àla, bàé bọ́bvíe vaá kyọ̀ẹ sĩ́ lọ̀l. (Kùùà 20:1-3, 10) À taníi ge mònmà dẽè deeá. Dọ̀ọ̀mà tṍóá, palàge ié ọ̀ẹ̀ dẽe ea kil ló gbò gyẽ̀ì Sétàn. Ó gá zìgà kọọ̀ dàlà kpá ló boo àbèè dùm gọ̀l òò á lẹẹlàẹ̀ ni bel ló. Beelai fulii gè “bei Pọ́lọ́ Nyómá, mè à é gboó téá kil kpã́á ààí ló.”—Jém̀z 4:7.