1. Dẹẹa boo nú ea di mm̀ kpá 1 Pítà 5:​2, mókà nèà deè ní e gbò kànen íe é?

 JÌHÓVÀ beè tú tóm gè ẹ̀b nú ea kil ló gbò a naanà ból nvee bá gbò kànen. Pá vígà e bà ne lóóí ólò nvèè ka ló nèà deè e bà íe kilma ló gè sí tóm nè pá vígà, vaá bà ólò “palàge kù va dẽe ló” dẹ̀ẹ̀a boo bé e ba kpóó sim tùlà naa. (Jèr. 23:4; bugi 1 Pítà 5:2.) Nyíéi palàge ẹẹ kọ è íè gbò kànen e bà dì naa vó mm̀ bẹẹ bõ̀ònatõ̀ò!

2. Mókà dò ẹ̀b ní e sìgà gbò kànen ólò kpeesĩ́ ló é?

² Gbò kànen ólò kpeesĩ́ ló gã́bug nu ànà-àna tṍó e bà gé sí ba tóm. Ge ẹ̀b nú ea kil ló bõ̀ònatõ̀ò bĩ́íná gã́bug tóm. Ene kà neǹ kànen ea bée kọlà Tony, ea ólò tõó United State, beè mòn kọ à dú bíi kọọ̀ á nyimàè ló gbò tóm e náa é láá siè. À kọ́ọ̀: “Tṍó e COVID-19 ã́àa dààà togóá, m beè sí gã́bug tóm kọbé è láá sí nònù vaá kọ́ kpẹ̀a. Sõò kọ̀láá bé em piigà naa, gã́bug tóm ge sì beè dì nàgé. Níí beè naa kọ ḿ gá ié ná tṍó ge bugi Kpá Káí, nó nu boo nà lóó, nè ge tãagã ló Bàrì.” Ene kà neǹ kànen ea bée kọlà Ilir, ea ólò tõó Kosovo, beè kpeesĩ́ ló dõona kà nu ànà-ànà. Tṍó e bé beè béá gbẹá kĩée ea ólò tõo, a beè tàvàlàẹ́ ló gè tõó boo tùle e bõ̀ònatõ̀ò ne. À kọ́ọ̀: “Nà ge ié agẹló beè bã kèbá dò ẹ̀b tṍó e tọ nàà tóm ném tóm gè ẹ̀b nú ea kil ló pá vígà e bà di kĩée ea palàge dú gẹẹ-gẹẹ ló. Pọ̀ beè siím, vaá a beè tõoḿ ló kọọ̀ tùle e bà ne náa é síá tóm.” Enè nen ea ólò kọ́ kpẹ̀a aa dó dọ dó ea bée kọlà Tim, ea ólò tõó Asia, beè mòn kọọ̀ ge naa gbò nú ea beè olòó naanìè buù dee beè tàvàlà. À kọ́ọ̀: “Sìgà tṍó, lóóm ólò palàge ọọ vaá ním ólò láá ẹ̀b nú ea kil ló pá vígà.” Éé ní ea é láá nvèè bá nè gbò kànen e bà gé kpeesĩ́ ló íb gbò nu ànà-ànàí ẽ́?

3. Mósĩ́ deè ní e ge bugi togó boo nu dòòmà bá neǹ bèèla ea kọlà Gídìòn é láá dọ̀ bélè nè dénè bẹ̀ì e?

³ Gbò kànen é láá nó nu lọl ló nu dòòmà bá neǹ bèèla ea  kọlà Gídìòn. (Híb. 6:12; 11:32) Aẹ̀ beè nen ea géè kpènà vaá kùdẽe ló gbò níí Bàrì. (Jọ́jìs 2:16; 1 Kró. 17:6) Dì belí Gídìòn, ba beè íbá ló gbò kànen kọ bàá ẹ̀b nú ea kil ló gbò níí Bàrì mm̀ nakà tṍó ea palàge tàvàlàí. (Tóm 20:28; 2 Tím. 3:1) Èé láá nó nu lọl ló bé e Gídìòn beè kìlmà kpá ló kẽ naa, nè bé ea beè nyimá ló gbò nú e bè náa é láá naa, vaá ié dùm gbàntṍ ló naa. A íè ĩ̀ìmà beè bã kèbá dò ẹ̀b tṍó ea géè sí a tóm. Kọbèè è dúù gbò kànen mm̀ bõ̀ònatõ̀ò àbèè née dúù, à dú bíi kọ é nvèè ka ló tóm e gbò kànen gé sí. Èé láá nvèè bá nè gbò kanen e bà gé sí tóm agẹlẹ báí.​—Híb. 13:17.

4. Mósĩ́ deè ní e Gídìòn beè zogè kọ à íèè dùm kìlmà kpá ló kẽ vaá nyimá gbò nú e bè náa é láá naa ẽ́?

⁴ Gídìòn beè nyimá ló gbò nú e náa é láá naa vaá dú neǹ kìlmà kpá ló kẽ. b Tṍó e nyómá tóm Jìhóvà kọ́ nè Gídìòn kọọ̀ Bàrì sáẹ kọ á dùùlà pá Ízràẹ̀l lọl bá pá Mídìàn, gbálà ea beè kìlmà kpá ló kẽí beè kọọ̀: “Pá beélè tọ ní e bà dú ńkem zẹ̀ẹ̀ pá gãà Mànásà ẹ, vaá nda ní em dúù kà ńkem mm̀ tọọ̀ ńdáà tẹ̀ ẹ.” (Jọ́jìs 6:15) A beè tõoé ló kọ náa é láá siè tómá, sõò Jìhóvà beè ẹ̀b kọ àé láá sì. Gídìòn beè sí tómá leevè tení dú ló nvèè bá ea aa bá Jìhóvà.

5. Mó tṍó ní ea é láá tàvàlà ló neǹ kànen gè kìlmà kpá ló kẽ vaá nyimá ló gbò nú e náa é láá naa ẽ́?

⁵ Mm̀ dénè nú e gbò kànen gé náa, bà ólò pììga bé e ba kpóó sim tùlà naa ge zogè kọ bà íèè dùm kìlmà kpá ló kẽ nè ge kọ à ié sìgà nú e bà náa é láá naanìè. (Máí. 6:8; Tóm 20:​18, 19) Bà náa ólò tú gbò nú e bàé láá naa àbèè gbò nú e ba ni náa dààmà kpá ló boo; vaá bà náa ólò ẹ̀b kọ bàá géè ló tọ́ọ̀ nu tṍó e ba íe lọ̀. Sõò sìgà tṍó, àé láá tavala ló nen kànen gè ié dùm kìlmà kpá ló kẽ vaá nyimá ló gbò nú e náa é láá naa. Dì belí nu dòòmà bá, neǹ kànen é láá zìgà kọ àé síè gã́bug tóm e bà née, sõò náa é mm-mè dénè nú ea beè zìgàa. Àbèè kọọ̀ bàé láá gbẹ́ẹ boo béè tóm e náa láà sì àbèè ge lèèlàẹ ló bé ea sí dõona kà tóm e ba beè nèe leevè naa. Kèbá íb gbò dìtõ̀òí, éé ní e gbò kànen é láá nó lọl ló Gídìòn ẽ́?

6. Éé ní e gbò kànen é láá nó lọl ló dùm kìlmà kpá ló kẽ e Gídìòn beè iéé? (Ẹ̀b nàgé fòtó.)

 ⁶ Bĩiná nvèè bá. Nen ea kìlmà kpá ló kẽ ólò nyimá kọ à ié gbò nú e náa é láá naanìè. Gídìòn beè nyimá kọ à íe gbò nú e náa é láá naanìè vaá a beè di kpènà ló ge bĩiná nvèè bá lọl bá dõona gbò. (Jọ́jìs 6:​27, 35; 7:24) Gbò kànen e ba nyimá nu ólò naa nagé vó. Tony e beè zẹ́ẹ́ kọ́ nú ea kil lóá kọ́ọ̀: “Boo béè bé e ba beè bumám naa, à ólò tànim gè sí gã́bug tóm èlmà bé em é láá sí naa. Vó beè naa kọ ḿ sà togó bel ea kil ló gè nyimá nú e nen náa é láá naa nvee mm̀ bẹẹ fã̀ pá tọ vaá kọ ńdáà va á kọ́ a bùlà kilma ló. M beè ẹ̀b nàgé vídiò ea di boo jw.org ea kọlà, Bumá, Dẹlẹ Nyíe Boo, Vaá Ò Tu Tóm Nè Dõòna Gbò Kọ Bàá Sì, Dì Belí Bée Jíìzọ̀s Beè Naaá.” Tony beè gbóó dààmà togó gè kọ́ nè dõona gbò kọ bàá zọẹ̀ẹ siàẹ̀ tóm. Éé beè sìlà aa m ẽ́? Tony kọ́ọ̀: “Ba beè sí gbò tóm ea di mm̀ bõ̀ònatõ̀ò, vaá m beè gbóó ié gã́bug tṍó ge noomá Kpá Káí.”

7. Mósĩ́ deè ní e gbò kànen é láá nó Gídìòn tṍó e bà gbẹ́ va ẹ́? (Jém̀z 3:13)

⁷ Ó gá nvèè súng be bà gbẹ́ ni. Dõona kà nu ànà-ànà e gbò kànen ólò kpeesĩ́ ló dú tṍó e bà gbẹ́ va. Nu dòòmà bá Gídìòn é láá nvèè nàgé bá. A beè nyimá kọ náa gbõomàè vaá níí beè naa kọ á tú gbọ́ọ́-gbọọ̀ ló loomá bel tṍó e pá gãà Ífrèm gbẹ́ẹ. (Jọ́jìs 8:​1-3) Gídìòn náa beè tú súng loomá bel nèva. A beè kìlmà kpá ló kẽ vaá pãané va tṍ ló tṍó e bà géè kọ́ bé e nu tọ́a vá ló naa, vaá níí beè kìlmà ba súng kẽ. Gbò kànen e bà nyímá nu ólò nó Gídìòn tení dú ló gè pãane tṍ vaá tú gbọ́ọ́-gbọọ̀ ló loomá bel tṍó e bà gbẹ́ va. (Bugi Jém̀z 3:13.) Bà ólò naa kọọ̀ fẹ́ẹ́-fẹẹ̀ ló á di mm̀ bõ̀ònatõ̀ò.

8. À bọ́ló kọọ̀ gbò kànen á labví láb naa vàẹ tṍó e bà leelà va ẹ́? Nè nu dòòmà bá.

⁸ Tú ka nè Jìhóvà. Tṍó e ba beè nvèè ka ló Gídìòn boo béè kọ à bé pá Mídìàn èlbá, a beè tú ka ea dú ló nè Jìhóvà. (Jọ́jìs 8:​22, 23) Mósĩ́ deè ní e gbò kànen é láá nó Gídìòn ẽ? Bàé láá tú ka ea dú ló gbò nú e bà láá naa nè Jìhóvà. (1 Kọ́r. 4:​6, 7) Dì belí nu dòòmà bá, be bà lèèlà neǹ kànen boo béè kọ à láá noomà nu, àé láá kọọ̀ dùùlà bá deè tṍá aa mm̀ Kpá Káí, àbèè kọọ̀ bõ̀ònatõ̀ò Jìhóvà ní ea gé búmái ẽ́. Sìgà tṍó, à bọ́ló kọọ̀ gbò kànen á bugi togó boo beè nú e bà gé nóòmà nvèè ka ló Jìhóvà àbèè kọ bà gé nóòmà nú ea léémá gbò nen. Bugi togó boo nu dòòmà bá ene kà neǹ kànen ea bée kọlà Timothy. Tṍó e bà ã́àa íbá ló Timothy naamá neǹ kànen, a beè olòó leemáe gè nè lòbèl kèsĩ́ gbò nen. À kọ́ọ̀: “M̀ ólò tú gbò nu dòòle ló ea bọọ́ beg vaá faalá kói dààmà togó. Vó ólò naa kọọ̀ gbò nen á lèèlàm. À dú pọ́lọ́ boo béè kọọ̀ à ólò kolí bùlà gbò nen mám, tãa vó e bà lèèlà Jìhòvà àbèè Kpá Káí.” Tṍó e tṍó téní, Timothy beè gbóó mòn kọ à dú bíi kọ á nyaanàè bá ló a nòòmànù kọbé náa bọọgẹ̀ kólí bùlà gbò nen nèà a bá. (Pró. 27:21) É beè sìlà aa m ẽ́? À kọ́ọ̀: “Kele-kele pá vígà ólò kọ́ bé e nà lòbèl ni nveenìè bá neè va kọ bàá láá ĩimà gbò tã̀àgã̀ e bà gé kpeelìè sĩ́ ló vaá kpáá tõo bã ló Jìhóvà naa. Tṍó em dã́à gbò belí nyíém ólò paIàge ẹẹ èlmà tṍó e ba beè olòó lèèlàm gbò gbáá ea kil nvéeá.”

9. Mósĩ́ deè ní e dùm gbàntṍ ló nè àgẹló e Gídìòn beè ié beè bã kèbá dò ẹ̀b ẹ? (Ẹ̀b fòtó ea di boo kóó kpáí.)

⁹ Tṍó e Bàrì ni íbá ló Gídìòn naamá neǹ bèèla lọ̀l, a dùm gbàntṍ ló nè àgẹló ea beè  ié beè bã kèbá dò ẹ̀b. Bàrì beè nèe tóm ea tavàlà ge sì, a beè kọ á kyọ̀sĩ́ gbàni vààla gyọ́ọ ea tẹ̀ ólò tṍó boo vaalá gyọ́ọ nè Béèl. (Jọ́jìs 6:​25, 26) Tṍó e tṍó téní aa ló tṍó ea ni bṍònè ló pá a gbò bé lọ̀l, bàà tóm e Jìhóvà beè kọ́ nèe kọ á tú sìgà gbò béá lọl ló. (Jọ́jìs 7:​2-7) Dee deè nvée, Jìhóvà beè gbóó kọ́ nèe kọ á bé gbò ọ́bvá taa tóm dáá bílá dee.​—Jọ́jìs 7:​9-11.

10. Mósĩ́ deè ní e dùm gbàntṍ ló e neǹ kanen íe é láá bã kèbá dọ̀ ẹ̀b ẹ?

¹⁰ À bọ́ló kọ gbò kànen á di kpènà ló ge “kìlmà togó ló bug ea lelà.” (Jém̀z 3:17) Neǹ kànen ea kìlmà togó ló bug ea lelà ólò di kpènà ló ge naa gbò nú e Kpá Káí kọ́ vaá tõó boo tùle e bõ̀ònatõ̀ò Bàrì ne. Dõona gbò é láá nó a lé nu dòòmà bá. Sõò, à ié tṍó ea é láá tàvàlàẹ́ ló gè ié dùm gbàntṍ ló. Dì belí nu dòòmà bá, àé láá tàvàlàẹ́ ló gè gbàntṍ ló tùle e bà née. Sìgà tṍó, àé láá bugi togó boo beè sìgà dùùlà bá deè tṍ e bà née é dọ bélè àbèè ge ẹ̀b be à íe nyìmànù ea di m. Àbèè kọ bàé láá kọ a sí tóm ea é tú a dùm nvee kèbá gẹẹ-gẹẹ ló. Mósĩ́ deè ní e gbò kanen é láá nó Gídìòn kèbá íb gbò dìtõ̀òí ẽ́?

11. Éé ní ea é láá nvèè bá nè gbò kànen kọ bàá gbàntṍ ló tùle é?

¹¹ Palàge pãane tṍ ló tùle e bà né ni vaá ò tú siimá tóm. Bàrì beè kọ́ nè Gídìòn bé ea é kyọsĩ́ gbàni vààla gyọ́ọ̀ a tẹ̀ naa, kĩée ea é tib ń-ãa nè Jìhóvà, nè íb nom ea é váámá gyọ́ọ. Gídìòn náa beè bĩiná bíb kilma ló​—tãa vó a beè naa kà lèlà nú e Jìhóvà beè kọ́ nèe. Deè nieí, gbò kànen ólò ié dùùlà bá deè tṍ ea aa mm̀ bõ̀ònatõ̀ò Jìhóvà tení dú ló kpá lẹ̀ẹ̀la tóm, nè gã́, nè gbò nòòkúu ea kil ló bé eé láá kpènà bẹẹ bá vaá tõo bã ló Bàrì naa. È vulè gbò kànení boo béè kọọ̀ bà bọ́ló dẹ̀lẹ̀ nyíé boo vaá tõó boo gbò tùle e bõ̀ònatõ̀ò Jìhóvà ne. Dénè nen ea di mm̀ bõ̀ònatõ̀ò ólò ié bélè lọl ló.​—Ps. 119:112.

12. Mósĩ́ deè ní e gbò kànen é láá tú nú ea di mm̀ kpá Híbrù 13:17 siimá tóm beè bõ̀ònatõ̀ò Jìhóvà kọ́ bàá nyaaná bá ló bé e bà ólò naa nu naa ẽ́?

¹² Di kpènà ló ge nyaaná bá ló nu. Kẽ̀èa boo kọọ̀ Jìhóvà beè kọ́ nè Gídìòn kọ á òòmà gã́bug pá a gbò bé kilma be. (Jọ́jìs 7:8) Àé láá dú kọ a beè bugi togó kọọ̀: ‘É kọ à dú bíi kọọ̀ sìgà ọ̀và á kil be? É kọọ̀ ge naa vó é dú lé?’ Náa ka ló béè vó, Gídìòn beè gbàntṍ ló. Deè nieí, gbò kànen ólò nó Gídìòn tení dú ló gè tõó boo gbò nyààa ea bã kẽ mm̀ bõ̀ònatõ̀ò. (Bugi Híbrù 13:17.) Dì belí nu dòòmà bá, mm̀ gbáá 2014 a, Gbò Ge Tulè Tóm beè nyaaná bá ló bé e bàé ne kpègè ge tìbmà Kíndòm Họ́ọ̀l nè Àsémbìlì Họ́ọ̀l naa. (2 Kọ́r. 8:​12-14) Bõ̀ònatõ̀ò náa ólò bọọlẹ na kpègè. Tãa vó, gbò bõ̀ònatõ̀ò ea dì beeá ló bàlà booí ólò nè lọ̀là-lọ̀là kọbé bà láá tìb Kíndòm Họ́ọ̀l kĩée ea dú bíi, kọbèè pọ́ì ńkem̀ kpègè ní e gbò e bà di kĩá  láá nèe. Tṍó e José dã́ naa vó, a beè tõóé belí kọ náa é láá naaá naa vó, a beè bugi togó kọọ̀: ‘Bà náa é láá tìb kọbèè ene kà Kíndòm Họ́ọ̀l. Bà náa ólò naa nu naa vó gbẹá kĩí.’ Éé ní ea beè nvèè bá nè José kọ á láá nvèè sãa kúm nyààaí ẽ́? À kọ́ọ̀: “Bel ea di mm̀ kpá Próvẹẹ̀b 3:​5, 6 beè nvèè bá nèm kọ ḿ dẹ̀lẹ̀ nyíé boo Jìhóvà. Vaá lé nu beè sìlà aa m! Níì áá gè tìb ãa Kíndòm Họ́ọ̀l ní e gé náa ẽ́ nì, sõò e nyimá nágé kele-kele sĩ́deè ge nèèmà lọ̀là-lọ̀là kọbé nu e íè láá kùnà.”

13. (a) Éé ní e Gídìòn beè àgalà boo é? (b) Mósĩ́ deè ní e gbò kànen é láá nóe ẽ́? (Ẹ̀b nàgé fòtó.)

¹³ Tú agẹló naamá bùlà Jìhóvà. Gídìòn beè gbàntṍ ló Jìhóvà náa kal ló béè kọọ̀ pọ̀ beè siíe vaá a dùm beè bã kèbá gẹẹ-gẹẹ ló. (Jọ́jìs 9:17) Tṍó e Jìhóvà ni ló bel àgẹló nèe lọ̀l, Gídìòn beè gbóó agala boo kọọ̀ àé nveenìè bá neèe tṍó ea gé kpenàè gbò níí Bàrì. Gbò kànen e bà di kĩée e bà kub bẹẹ tóm ólò nó Gídìòn. Bà ólò tú agẹló sẹ̀ẹ̀mà nònù vaá kọ́ kpẹ̀a náa kal ló béè kọọ̀ bàé láá sií va nvee kpọ́gọ́lọ́, bĩiná va bel, lọ̀l va ló tóm, àbèè ge bó va bàg. c Tṍó pọ̀b kpo tã̀àgã̀, àé dú bíi kọọ̀ gbò kànen á ié agẹló kọbé bà láá gbàntṍ ló gbò tùle e bà néva​—kọbèè ge naa vó é tú ba dùm nvee kèbá gẹẹ-gẹẹ ló. Dì belí nu dòòmà bá, bàé láá nèva gbò tùle ea kil ló bé eé kọ́ bèèla bel ea dọ́ boo gbò e bà náa gbantṍ ló Bàrì naa, nè nú eé náa kọbé è áá dùùà.​—Èzí. 38:18; Kùùà 16:21.

14. Mósĩ́ deè ní e ĩ̀ìmà e Gídìòn beè ié beè bã kèbá dò ẹ̀b ẹ?

¹⁴ A beè dú bíi kọọ̀ Gídìòn á tú agẹbá siimá tóm dì belí neǹ bèèla. Bílá deè deé e bé beá vaá pá Mídìàn à teeláá, Gídìòn beè kpenè va lọl boo gù Jézrẹẹ̀l tení Pene Jọ́dàn, e té beè beeá tení lóá. (Jọ́jìs 7:22) É kọ Gídìòn beè elá gbẹá gã́ pène Jọ́dàn? Ẽ̀èe! Lóó va beè ọọ, sõò Gídìòn nè 300 nená beè fùl pèneá vaá kilsĩ́ gè kpó va.  Dee deè nvée, ba beè sii pá Mídìàn vaá bé va èlbá.​—Jọ́jìs 8:​4-12.

15. Mó tṍó ní ea é láá tavala ló neǹ kànen gè ié ĩ̀ìmà ẽ?

¹⁵ Lóó neǹ kànen é láá palàge ọọ boo béè ge ẹ̀b nú ea kil ló bõ̀ònatõ̀ò nè pá a tọ. Tṍó ea meà naa vó, mósĩ́ deè ní e gbò kànen é láá nó Gídìòn ẽ?

16-17. Éé ní ea beè nvèè bá nè Gídìòn kọ á láá ĩ̀ìmà ẽ, vaá éé ní e gbò kànen é láá àgala boo é? (Àìzáíà 40:​28-31) (Ẹ̀b nàgé fòtó.)

¹⁶ Dẹlẹ nyíé boo kọọ̀ Jìhóvà é né ni kói. Gídìòn beè dẹlẹ nyíé boo kọọ̀ Jìhóvà é neèe kói, vaá Jìhóvà náa beè kẹlẹ́ẹ. (Jọ́jìs 6:​14, 34) À íe tṍó e Gídìòn nè pá a gbò géè tú kpóó tọ kpoomá bàà kà méné e ba beè di boo nom̀ tee. (Jọ́jìs 8:​12, 21) Sõò, tení dú ló nvèè bá ea aa bá Jìhòvà, pá Ízràẹ̀l beè sií va vaá bé va èlbá. Mm̀ tẽ̀ènè sĩ́deèá, gbò kànen é láá dẹlẹ nyíé boo Jìhóvà, ea dú nen e “lóóe náa ólò ọọ àbèè ge kọọ̀ àé ọọ dọ̀.” Àé né va kói tṍó ea dú va bíi ló.​—Bugi Àìzáíà 40:​28-31.

¹⁷ Bugi togó boo nú ea beè naaá ló Matthew, ea dṹùnà gbò Hospital Liaison Committee. Éé ní ea beè nvèè bá nèe kọ á láá ĩ̀ìmà ẽ? Matthew kọ́ọ̀: “M beè ié kói ea aa bá Jìhóvà e kpá Fílipaì 4:13 kò nú ea kil lóá. Gã́bug tṍó e lóóm palàge ọọ vaá à tõoḿ ló kọ ním é naa na tọ́ọ̀ nu, m̀ ólò tāagã ló Bàrì, vaá bànie kọ á nèm kói em íè bíi ló kọbé m̀ láá nvèè bá nè pá vígà. Tṍóá, m̀ ólò gbóó mòn bé e nyómá káí Jìhóvà síèm kpóó ló kọ ḿ láá ĩ̀ìmà gbò tã̀àgã̀ em di báá naa.” Dì belí Gídìòn, gbò kànen ólò tení bá gã́bug tã̀àgã̀ tṍó e bà gé ẹb nú ea kil ló gbò níí Bàrì. Sõò, à dú bíi kọ bàá nyimá gbò nú e bà náa é láá naa vaá náa gbò ní e bàé láá naa. Bàé láá dẹlẹ nyíé boo kọọ̀ Jìhóvà é dã́è ba tã̀àgã ló vaá nèva kói kọbé bà láá ĩ̀ìmà.​—Ps. 116:1; Fíl. 2:13.

18. Ge tení boo nú e ni nó, mósĩ́ deè ní e gbò kànen é láá nó Gídìòn ẽ?

¹⁸ À íe gã́bug nú e gbò kànen é láá nó lọl ló Gídìòn. À bọ́ló kọọ̀ gbò kànen á nyimá gã́bug tóm e bàé láá sì nè bé e bàé labví láb naa tṍó e ba leelà va àbèè ge gbẹ́ va. À bọ́lọ́ kọ bàá ié àgẹló vaá ié dùm gbàntṍ ló, bọọ èlmà tõ̀ò tṍó e kùbmà nakà bàlà booí ni kpáá dũ̀ùà iná kulóí. Vaá à dú bíi kọ bàá àgala boo kọọ̀ kọ̀láá bé e ẹ̀bmà e bà kpeesĩ́ ló agabá naa, Bàrì é né va kói kọbé bà láá ĩ̀ìmà. Mm̀ kà-kà, è nveè ‘ka ló kọ̀láá gbò e ba dì belí vó’ e bà dú gbò kùdẽe ló e bà gé sí tóm agẹlẹ báí.​—Fíl. 2:29.