Èé íè ge ié zìgà kọbé è láá naa nú ea léémá Jìhóvà. Sõò Kpá Káí kọ́ọ̀ “níì dénè nen ní ea ziga ló moǹ bel Bàrì e nì.” (2 Tẹ̀s. 3:2) Neǹ tóm Pọ́ọ̀l beè ló bel kilma ló gbò e bá géè biigèe ló e bà dú, “gbò bàg nè gbò pọ́lọ́,” ea beè ié bíi ló nen ea é duulàẹ̀ ẹ lọ̀l vá bá. Sõò bel ea beè lò kilma ló zìgà dú nágé kà-kà kilma ló gã́bug nen. Sìgà nen náa zigà kọọ̀ Bàrì ní ea beè dèm dénè nu ẽ́. (Róm̀ 1:20) Sìgà nen é láá kọò bá zigàẹ̀ ló ene íb nu àbèè nen ea palàge ié kpóó. Sõò áá gè zìgà naa vó náa é láá naa kọ é naa nú ea léémá Jìhóvà.

Èé íè ge agala boo kọọ̀ Jìhóvà dì vaá à ólò nè kpẽ́ gbò e bà palàge dẹlẹ́ẹ nyíé boo. (Híb. 11:6) Kọbé è láá ié íb nakà zìgàí, è íè bíi ló nvèè bá ea aa bá nyómá káí Bàrì. Vóà naa, à dú bíi kọ é olòó tã̀àgã ló Jìhóvà kọ á nèi a nyómá káí. (Lúùk 11:​9, 10, 13) Ge olòó bugi Kpá Káí é nveè bá nèi kọ é ié nyómá káí Bàrì. Tṍó e náà vó, èé gbóó láá bugi togó boo gbò nú e bugì vaá tú siimá tóm mm̀ bẹẹ dùm. Jìhóvà é tú a nyómá káí nvèèmà bá nèi kọ é ié zìgà vaá naa nú ea é léémáe.