Bíb E Gbò E Bà Bugi Bĩ́íná
É kọọ̀ tã́á bel ea kọ́ọ̀ “òé kumà va,” ea di mm̀ kpá Psalm 12:7, gé lóá bel kilma ló “gbò e bà kil kẽ” (5 gã́bel) sẹ̀ à gé lóá bel kilma ló “gbò bel ea aa gã́ Jìhóvà” ẹ (6 gã́bel)?
Gbò bel ea di mm̀ dọ̀ Kpá Káíí zógè kọọ̀ à gé lóá bel kilma ló gbò nen.
Kpá Psalm 12:1-4 kọ́ọ̀ “gbò e bà bọ́ló dẹ̀lẹ̀ nyíé boo a ú tá zẹ̀ẹ̀ gbò nen.” Vaá kpá Psalm 12:5-7, à kọọ̀.
“‘Jìhóvà kọ́ọ̀ “Boo béè kọ bà gé bíìgè ló gbò e bà kil kẽ,
Boo béè kọọ̀ gbò tãa gé bãagã̀,
Nda é aa boo vaá labví láb.
‘Nda é duulà va lọl bá gbò e bà gé tú pọ́lọ́ bá sẹ̀ẹ̀mà va.
Gbò bel ea aa gã́ Jìhóvà di õ̀òa;
Bà õoà belí ẹ́ẹ́ kpẽ́ e bà ọ́ví dáà sã́, vaá õ̀ònà àlàbà tóm.
Oló Jìhóvà, é kumà va;
Òé kpenà buù ọ̀và lọl nakà kúúlíí dọ̀ọ̀mà dè-dè.”
A 5 gã́bel kọ́ nú e Bàrì é náa nè gbò e bà kil kẽ. Àé duulà va.
A 6 gã́bel à kọọ̀ “gbò bel ea aa gã́ Jìhóvà di õ̀òa,” ‘belí ẹ́ẹ́ kpẽ́ e bà ọ́ví dáà sã́.’ Níà bé e gbò e bà gé fã Bàrì ólò ẹ̀b a Moǹ Bel naa ẽ́.—Ps. 18:30; 119:140.
Vaá kpá Psalm 12:7 kọ́ọ̀: “Oló Jìhóvà, é kumà va; Òé kpenà buù ọ̀và lọl nakà kúúlíí dọ̀ọ̀mà dè-dè.” Éé ní e moǹ bel ea kọlà “ọ̀và” gé lóá bel kilma ló é?
Boo béè kọọ̀ a 7 gã́bel ló bel kilma ló “gbò bel ea aa gã́ Jìhóvà,” sìgà gbò é láá bugi togó kọọ̀, “ọ̀và” e bà lóómá bel kĩá tõó dọ̀ Moǹ Bel Bàrì. È nyímà kọọ̀ Bàrì beè kumà a Moǹ Bel lọl bá gbò e bà géè gbĩ́ gè kyọ̀sĩ́.—Àìz. 40:8; 1 Pítà 1:25.
Sõò, à dú nágé kà-kà kọọ̀ Jìhóvà ólò kpènà pá a gbò dì belí bé e a 5 gã́bel kọ́ naa. Jìhóvà ólò kpènà vaá àé kilsĩ́ gè nvèè bá vaá dùùlà “gbò e bà kil kẽ” nè “gbò e bà gé bíìgè ló.”—Jóòb 36:15; Ps. 6:4; 31:1, 2; 54:7; 145:20.
Vóà naa, éé ní e “ọ̀và” ea di mm̀ a 7 gã́belá tõó dọ̀ ẹ?
Nú ea di mm̀ kpá psalmí zógè kọọ̀ “ọ̀và” gé lóá bel kilma ló gbò nen.
Kpá Psalm 12:1 kọ́ nú ea kil ló “gbò e bà bọ́ló dẹ̀lẹ̀ nyíé boo” e be à sẹlẹ ba beè kpọ́ kyáá bel nè va. Mm̀ dõona kà gã́bel, è monì tã́á bel ea kọ́ọ̀ Jìhóvà é kyọsĩ́ gbò e ba beè kpọ́ kyáá belá. Dọ̀ Kpá Káíá náa kọ é agala boo kọọ̀ Bàrì é nveè bá nè pá a gbò boo béè kọọ̀ gbò bel ea aàẹ́ gã́ di õ̀òa.
Vóà naa, a 7 gã́bel gé kọ́ọ̀ Jìhóvà é kumà vaá kpènà “va” naamá gbò e gbò pọ́lọ́ lab dògò gé “bíìgè ló.”
Bà tú moǹ bel ea kọ́ọ̀ “ọ̀và” loomá bel mm̀ Kpá Káí e ba beè emí mm̀ dém bel Híbrù. Kpá Káí e ba beè tàb lọl mm̀ dém bel Híbrù nvee mm̀ dém bel Gríìk tú moǹ bel ea kọ́ọ̀ “beele” loomá bel bàà tóm mm̀ a 7 gã́bel, ea gé lóá nágé bel nyòòmà gbò e bà bọ́ló dẹ̀lẹ̀ nyíé boo e bà gé bíìgè ló vaá tú pọ́lọ́ bá sẹ̀ẹ̀mà va. Dee-deè nvéè tã́á bel ea di mm̀ a 7 gã́bel kọ́ọ̀, òé kpenà “buù ọ̀và” naamá gbò e bà bọ́ló dẹ̀lẹ̀ nyíé boo “lọl nakà kúúlíí,” ea tõó dọ̀ ge kpènà va lọl bá gbò pọ́lọ́ lab dògò e bà gé bíìgè va ló. (Ps. 12:7, 8) A 7 gã́bel mm̀ Kpá Káí e ba beè emí mm̀ dém bel Híbrù vaá bà tàb nvee mm̀ dém bel Aramaic kọ́ọ̀: “OLÓ E DÕÒ, é kpenà gbò lé lab dògò, òé kpenà va lọl bá nakà pọ́lọ́ kúúlíí dọ̀ọ̀mà dè-dè. Gbò pọ́lọ́ di kọ̀láá ketõ̀ò e bà gé kyãà belí toi ea gé ṍ miì gbò nen.” Níí kpáá tẹlẹ bàlà kẽ kọọ̀ nú ea di mm̀ kpá Psalm 12:7 náa gé ló bel kilma ló gbò bel ea aa gã́ Bàrì.
Boo béè vó, nakà gã́belí náa kọ “gbò e bà bọ́ló dẹ̀lẹ̀ nyíé boo” á agala boo kọọ̀ Bàrì é beè labví láb.
