1. Mókà gbò tã̀àgã̀ ní ea di ló sìgà gbò gyóòlo Jìhóvà ẹ?

É KỌỌ̀ ò gé téní bá agẹbá ẹ̀bmà? Be à sẹlẹ nen ea di mm̀ bõ̀ònatõ̀ò náa nú ea kyẽ́ ni. (Jém̀z 3:2) Àbèè kọọ̀ gbò eo ólò zọ̀ siá tóm àbèè gbò eo gbáì diaí tọọ̀ kpá mangã̀ ni boo béè kọ ò gé fã Jìhóvà. (1 Pít. 4:3, 4) Àbèè kọọ̀ pá bọọ tọ gbĩ́ gè kpèg ni lọl ló gè sí nònù àbèè ge kọ́ nú eo zigà ló nè dõòna gbò. (Máát. 10:35, 36) Lóó ni é láá ọọ be à gá náa vaá gbò ẹ̀bmà eo gé téní bá à agabá. Sõò òó láá àgala boo kọọ̀ kọ̀láá bé eo tã̀àgã̀ agabá naa, Jìhóvà é né ni nyìmànù nè kói ea é náa kọ ó láá ĩ̀ìmà.

2. Dẹ̀ẹ̀a boo nú ea di mm̀ kpá Róm̀ 15:4, mósĩ́ deè ní e gè bugi Kpá Káí é láá nvèè bá nèi ẽ́?

² Éé ní ea beè naa kọ Jìhóvà á kọ bàá tú nú ea beè naaá ló dõòna gbò e bà náa beè gbõoma e baẹ̀ ié ĩ̀ìmà emí mm̀ Kpá Káí é? Kọbé è nó nu lọl ló vaá láá ĩ̀ìmà gbò tàvàlà dìtõ̀ò ea dìí ló. Níà nú e Jìhóvà beè tú neǹ tóm Pọ́ọ̀l emá ẽ́. (Bugi Róm̀ 15:4.) Ge bugi gbò nòòtẽ́í é náa kọ é ié nvèè nyíé gbàà nè ból dẽe sĩ́. Sõò kọbé à láá palàge dọ̀ bélè nèi, à dú bíi kọ é naa èlmà áá gè bugi Kpá Káí. Èé íè ge sọ̀tọ́ deè kọọ̀ gbò nú e bugì lọl mm̀ Kpá Káí á tọáí ló vaá nyaaná bẹẹ bug. Éé ní eé láá naa be è gé gbĩ́ tùle ea kil ló enè íb ẹ̀bmà e gé téní bá ẹ́? Èé láá naa ténì kà nuí: (1) Tã̀àgã ló Bàrì, (2) Dòòmà dẽe ló, (3) Bugi togó boo, vaá ò tú (4) Siimá tóm. Naanii èé nó bé eé láá naa buù kà nuí naa. * Tṍóá, èé beè gbóó tú gbò sĩ́deè ge noomá nuí noomá nú ea beè naaá ló Méné Dévìd nè neǹ tóm Pọ́ọ̀l.

3. Besĩ́ ò kálá dààmà togó gè bugi Kpá Káí, éé ní ea bọ́ló kọ ó naa ẽ́, vaá ló éé?

³ (1)Tã̀àgã ló Bàrì. Besĩ́ ò kálá dààmà togó gè nó Kpá Káí,  bàn Jìhóvà kọ á nveenìè bá neè ni naa ní eo é láá ié bélè lọl ló nú eo é gé bugi. Dì belí nu dòòmà bá, be ò gé gbĩ́ dùùlà bá deè tṍ ea kil ló enè íb tã̀àgã̀ eo gé téní bá, bàn Jìhóvà kọ á nvèè bá neè ni kọ ó mòn gbò nòòkúu ea di mm̀ Kpá Káí eo é láá tú siimá tóm.—Fíl. 4:6, 7; Jém̀z 1:5.

4. Éé ní ea é láá nvèè bá nè ni kọ ó palàge dã́tẽ́ ló nòòtẽ́ eo bugì lọl mm̀ Kpá Káí é?

⁴ (2) Dòòmà dẽe ló. Jìhóvà beè dèmíí mm̀ sĩ́deè ea dú dũ̀ùnè ea náa kọ é láá dòòmà dẽe ló nu. Kọbé ò láá palàge dã́tẽ́ ló nòòtẽ́ ea di mm̀ Kpá Káí, à dú bíi kọ ó dòòmà dẽe ló nu, nè ge tú o lóó sẹlẹ́ dìtõ̀ò nen eo gé bugi nú ea kil lóá. Pììga boo ge dòòmà dẽe ló nú e nená beè mòn àbèè bé e nu beè láá tọáẹ́ ló naa.

5. Éé ní ea kọlà ge bugi togó boo nu ẽ́, vaá mósĩ́ deè ní eo é láá bugi togó boo nu ẽ́?

⁵ (3) Bugi togó boo. Ge bugi togó boo nu tõó dọ̀ ge palàge tú o bug tàbmà nú eo géè bugi, nè ge nyimá bé e belá tọ́a ní ló naa. À ólò naa kọ é tú gbò nú e bugì doolé ló nú e beè nyimá naa ní eé kpáá palàge dã́ ból ló togó belá. Tṍó eo bugì Kpá Káí vaá nóo bugì togó boo, dì belí gè tú gbò nu gè bùlmà múú ló lẹ́ boo nu vaá nóo bulmà. Tṍó eo bugì togó boo, à bélí gè tú gbò nuù múú lóá tẹlẹ ló kọbé ò láá dé kpéè ló kà lé gã́ gyã́á. Kọbé ò láá bugi togó boo nu, òó láá bĩiná sìgà gbò bíb ea dì belí vóí: ‘Éé ní e nen ea di mm̀ nòòtẽ́í beè naa mm̀ ge nvèèmà bá nèà a bá ẹ́? Mósĩ́ deè ní e Jìhóvà beè nvèè bá nèe ẽ́? Mósĩ́ deè ní e nú em nóòí é láá nvèè bá nèm kọ ḿ ĩ̀ìmà tã̀àgã̀ ẽ?’

6. Éé ní ea náa vaá èé íè ge tú nú e nóò siimá tómé?

⁶ (4) Siimá tóm. Jíízọ̀s beè kọọ̀ be née túù nú e nóò siimá tóm, è dì belí nen ea do díí kẽè a tọ́ boo záí sãa. A beè pììgà, sõò a beè dú pèè tṍó. Ló éé? Boo béè kọọ̀ tṍó e múú bú kòn, vaá fọ́ọ́lọ́ à saá ló, àé kṍóá. (Máát. 7:24-27) Mm̀ tẽ̀ènè sĩ́deèá, be è tãàgã ló Bàrì, dòòmà dẽe ló, vaá bugi togó boo nu, sõò née túù nú e nóòa siimá tóm, è gé pee tṍó. Be à dì naa vó, née é íe agẹló gè emá tṍó e tã̀àgã̀ àbèè nàà uú boo doà bẹẹ zìgà. Sõò tṍó e nóò nu vaá tú siimá tóm, èé láá nè lé béèlàfùl, kpáá ié fẹ́ẹ́-fẹẹ̀ ló, vaá toní agẹ zìgà. (Àìz. 48:17, 18) E baatẽ́ bé eé láá tú ténì sĩ́deè ge noomá nu e géè kọ̀á siimá tóm naa. Naanii èé zẹ́ẹ́ ẹ̀b nú eé láá nó lọl ló nú ea beè naaá ló Méné Dévìd.

7. Mókà nòòtẽ́ ea di mm̀ Kpá Káí ní eé nó nú ea kil ló é?

⁷ É kọọ̀ o kóò àbèè nen ea dṹùnà pá bọọ tọ beè naa nú ea kyẽ́ ni? Beè vó, nòòtẽ́ ea kil ló nú e Dévìd beè naa tṍó ea nvín Ábsalọ̀m beè naa uúé boo vaá gbĩ́ gè tú a dọ̀ méné lọ̀líé bá é dọ bélè nè ni.—2 Sám. 15:5-14, 31; 18:6-14.

8. Éé ní eo é láá naa kọbé ò íe nvèè bá lọl bá Jìhóvà ẹ?

⁸ (1) Tã̀àgã ló Bàrì. Tú nòòtẽ́á sẹ̀ẹ̀a bùlà, vaá ò kọ́ nè Jìhóvà bé e pọ́lọ́ bá e bà sẹẹmà ni tọ́a ní ló naa. (Ps. 6:6-9) Kọ́ nè Jìhóvà kà lèlà bé e nu tọ́a ní ló naa. Tṍóá, ò gbóó bàn Jìhóvà kọ á nvèè bá neè ni naa ní eo é mon gbò nòòkúu ea é nveè bá nè ni kọ ó láá ĩ̀ìmà tã̀àgã̀ eo di bá.

9. Mósĩ́ deè ní eo é láá baatẽ́ nú ea beè naaá zẹ̀ẹ̀ Dévìd nè Ábsalọ̀m ẽ?

⁹ (2) Dòòmà dẽe ló. Bugi togó boo nú ea beè naaá mm̀ nòòtẽ́í, vaá ò doomà dẽe ló bé ea beè tọá ló Méné Dévìd naa. A nvín Ábsalọ̀m beè tú gã́bug gbáá naamá nú ea é náa kọọ̀ dõòna gbò á vulèè ẹlẹ. (2 Sám. 15:7) Tṍó e Ábsalọ̀m ẹb kọọ̀ tṍó a lée, a  beè gbóó lẹ̀ẹ̀làgì gbò nen e bàé kọ́ nú ea gé nááá dénè ketõ̀ò ea di Ízràẹ̀l neèe, kọbé gbò nen nveè sãa kúm kọ bàá túèe naamàè ba méné. A beè kẹlẹ nagé bã̀àna díì díílá kóò Dévìd ea ólò nèe dùùlà bá deè tṍ, ea bée kọlà Àhítofẹ̀l, kọ á gbaaàẹ̀ ló ẹlẹ. Ábsalọ̀m beè gbĩ́ gè tú a lóó naamá méné, vaá gbĩ́ gè sii Dévìd fẹ̀, ea é láá dú kọọ̀ kpá lóe géè palàge zọ̀ tṍóá. (Ps. 41:1-9) Dévìd beè gbóó nyimá nú e Ábsalọ̀m géè noo vaá teelá dọ ól aa Jèrúsalẹ̀m. Tṍóá, gbò bé Ábsalọ̀m nè gbò bé Dévìd beè nyòònà vaá gbò bé Dévìd à èlbá naa ní e bà fẹ́ Ábsalọ̀m.

10. Méné Dévìd gáẹ̀ beè láá labví láb naa vàẹ?

¹⁰ Nagé, dòòmà dẽe ló bé e gbò nú ea géè naaáí beè láá tọá ló Dévìd naa. A beè vùlè Ábsalọ̀m vaá dẹlẹ nyíé boo Àhítofẹ̀l. Sõò pálàa ọ̀và beè gbá naa uúé boo. Ba beè naa kọọ̀ nyíè Dévìd á palàge bììlà vaá gbĩ́ gè fẹ́ẹ. Níí gáẹ̀ beè láá naa kọọ̀ Dévìd á gá dẹlẹ na nyíé boo dõòna kà pá a kóò, vaá bugi togó kọọ̀ baa gbááá nágé ló Ábsalọ̀m. À gáẹ̀ beè láá bugi togó boo a bá vaá áá ẹ̀ẹ̀ téélá dọ ól. Àbèè kọọ̀ bììla nyíe náa kọ á tẹlẹ̀ gbẹ́gẹ̀lẹ̀. Sõò Dévìd náa beè naa vó. A beè bé dénè gbò ẹ̀bmàí èlbá. Éé ní ea beè nvèè bá nèe kọ á láá naa vó é?

11. Éé ní e Dévìd beè naá kèbá tàvàlà dìtõ̀ò ẽ?

¹¹ (3) Bugi togó boo. Mókà gbò nòòkúu ní eo nóò lọl ló nakà nòòtẽ́í ẽ́? Aalá bíb ea kọ́ọ̀, “Éé ní e Dévìd beè naa mm̀ ge nvèèmà bá nèà a bá ẹ́?” Dévìd náa beè siiá pọ̀ vaá tú gbala-gbala nèèmà pọ́lọ́ béèlàfùl. Náa beè ié nágé tã̀àgã̀ bùlà naa ní e bè náa nyímá ló nu gè naa. Tãa vó, a beè bàn Jìhóvà kọ á nveenìè bá neèe. A beè kọ nágé nè pá a kóò kọ bàá nveenìè bá neèe. Vaá a beè tú gbala-gbala labmá láb boo a béèlàfùl. Náa kal ló béè kọọ̀ nyíè Dévìd beè palàge bììlà, náa beè aa ló gè dẹlẹ nyíé boo dõòna gbò àbèè ge ọví va. A beè kilsĩ́ gè dẹlẹ nyíé boo Jìhóvà nè pá a kóò.

12. Mósĩ́ deè ní e Jìhóvà beè nvèè bá nè Dévìd e?

¹² Mósĩ́ deè ní e Jìhóvà beè nvèè bá nè Dévìd e? Be ò gbĩ́tẽ́ ló, òé mon kọọ̀ Jìhóvà beè nè Dévìd kói ea dúe bíi ló kọbé à láá ĩ̀ìmà ẹ̀bmàí. (Ps. 3:1-8; émì nu ea di boo togó) Jìhóvà beè tãanè dee bá gbò béèlàfùl e Dévìd ne. Vaá a beè nvèè sãa kúm pá kóò Dévìd e ba beè bọ́ló dẹ̀lẹ̀ nyíé booá, tṍó e ba géè bé-bé boo béè ge kpènà ba méné.

13. Mósĩ́ deè ní eo é láá nó Dévìd beè nen náa nú ea kyẽ́ ni ẽ́? (Máátìù 18:15-17)

¹³ (4) Siimá tóm. Bĩiná o bá kọọ̀, ‘Mósĩ́ deè ní e nda é láá nó Dévìd e?’ Àé dú bíi kọ ó labví láb mm̀ gbala-gbala kilma ló tã̀àgã̀ ea bã́ kẽá. Dẹ̀ẹ̀a boo bé e dìtõ̀ò meà naa, òé láá tú dùùlà bá deè tṍ àbèè nòòkúu ea di mm̀ bel Jíízọ̀s ea ẽ́á mm̀ kpá Máátìù 18 togó siimá tóm. (Bugi Máátìù 18:15-17.) Sõò ó gá tú súng nèèmà gbala-gbala béèlàfùl. Bàn Jìhóvà kọ á neè ni dĩ̀ìnè ló bùlà nè nyìmànù kọbé ò nyimá ló nu gè naa. Ó gá aa ló gè dẹlẹ nyíé boo pá o kóò. Tãa vó, ò tú nvèè bá e bà né ni. (Próvẹẹ̀b 17:17) Bọọ èlmà vó, tõó boo gbò dùùlà bá deè tṍ e Jìhóvà né ni ea di mm̀ Kpá Káí.—Pró. 3:5, 6.

14. Kèbá mókà gbò dìtõ̀ò ní e gbò nòòtẽ́ ea di mm̀ 2 Tímotì 1:12-16; 4:6-11, 17-22, á láá siè ni kpóó ló é?

¹⁴ É kọọ̀ ò gé téní bá nàà uú boo ea aa bá pá bọọ tọ? Sẹ̀ é kọ ò di dó e kpóó ea gé bẹl kub tóm Gbò Neǹ Ditõ̀ò Jìhóvà ẹ? Beè vó, gbò nòòtẽ́ ea di mm̀ 2 Tímotì 1:12-16 nè 4:6-11, 17-22, é láá siè ni kpóó ló. * Tṍó  e Pọ́ọ̀l beè di tọọ̀ kpọ́gọ́lọ́ ní ea beè emí nagbò dọ̀ Kpá Káíí é.

15. Éé ní eo é láá bàn lọl bá Jìhóvà ẹ?

¹⁵ (1) Tã̀àgã ló Bàrì. Besĩ́ ò kálá bugi gbò nòòtẽ́á, kọ́ nè Jìhóvà bé ea tọ́a ní ló naa. Kọ́ nè Jìhóvà kà lèlà bé e nu tọ́a ní ló naa. Tṍóá, ò gbóó bàn Jìhóvà kọ á nvèè bá neè ni naa ní eo é mon gbò nòòkúu ea di mm̀ nú ea beè naaá ló Pọ́ọ̀l ea é nveè bá nè ni kọ ó láá ĩ̀ìmà tã̀àgã̀ eo di bá.

16. Éé ní ea beè naaá ló Pọ́ọ̀l ẹ?

¹⁶ (2) Dòòmà dẽe ló. Dòòmà dẽe ló kọ ò dúè Pọ́ọ̀l. À di tọọ̀ kpọ́gọ́lọ́ gbẹá Róm̀. Ba beè zẹ́ẹ́ siíe nvee kpọ́gọ́lọ́ dõòna tṍó, sõò kátogóí, à nyímá kọ bàé fẹ́ẹ̀ẹ. Sìgà gbò e ba beè dìé ló beè kìnie, vaá lóóe a palàge ọọ.—2 Tím. 1:15.

17. Pọ́ọ̀l gáẹ̀ beè láá labví láb naa vàẹ?

¹⁷ Pọ́ọ̀l gáẹ̀ beè láá ká bùlà gbẹẹ́ boo nú ea beè naaá, vaá bugi togó kọọ̀ be náa géè nyoonìè nvéè Kráìst, náa gáẹ̀ beè diè tọọ̀ kpọ́gọ́lọ́. Nyíée gáẹ̀ beè láá bììla ló gbò e ba beè di Ésìà e ba beè kìnie gbẹẹ́ kẽá, vaá à gáẹ̀ láá kùb ge dẹlẹ nyíé boo dõòna gbò. Sõò Pọ́ọ̀l náa beè naa tọ́ọ̀ kà gbò nuá. Éé ní ea beè naa vaá à kilsĩ́ gè àgala boo kọọ̀ pá a kóò é bọ́ló dẹ̀lẹ̀ nyíé boo vaá Jìhóvà é neèe kpẽ́é?

18. Éé ní e Pọ́ọ̀l beè naá kèbá tã̀àgã̀ ẽ?

¹⁸ (3) Bugi togó boo. Aalá nakà bíbví, “Éé ní e Pọ́ọ̀l beè naa mm̀ ge nvèèmà bá nè a bá ẹ́?” Bã̀àna tṍó e Pọ́ọ̀l nyímá kọ bàé gé fẹẹ̀ẹ, náa beè táẹ́ nyíe kọ à palàge dú bíi kọọ̀ á naanìè nú ea é nveè ka ló Jìhóvà. Vaá a beè kilsĩ́ gè bugi togó boo bé ea é láá siè kpóó ló dõòna gbò naa. A beè dẹ̀ẹ̀a boo Jìhóvà tení dú ló gè olòó tã̀àgã̀é ló. (2 Tím. 1:3) Tãa vó ea bọọgẹ̀ bugi togó boo gbò e ba beè kìnieá, nyíée beè palàge ẹẹ ló gbò e bà bọ́ló dẹ̀lẹ̀ nyíé boo vaá nvèè bá nèe mm̀ kele-kele sĩ́deèa. Gbá ló vó, Pọ́ọ̀l beè kilsĩ́ gè olòó nó Kpá Káí. (2 Tím. 3:16, 17; 4:13) Bọọ èlmà tõ̀ò, a beè palàge àgala boo kọọ̀ Jìhóvà nè Jíízọ̀s palàge vulèe e. Bà náa beè sọ̀ẹ bá gbẹẹ́ kẽ, vaá bàé née kpẽ́ ló a tóm ea sí mm̀ bọ́ọ̀ló dẹ̀lẹ̀ nyíé boo.

19. Mósĩ́ deè ní e Jìhóvà beè nvèè bá nè Pọ́ọ̀l ẹ?

¹⁹ Jìhóvà beè kọ́ nè Pọ́ọ̀l kọ àé mon tã̀àgã̀ boo béè kọọ̀ à gé nyoone nvéè Kráìst. (Tóm 21:11-13) Mósĩ́ deè ní e Jìhóvà beè nvèè bá nè Pọ́ọ̀l ẹ? A beè aalá a tã̀àgã ló, vaá sièe kpóó ló aa tṍó dọ tṍó. (2 Tím. 4:17) Bàrì beè kọ́ nè Pọ́ọ̀l kọọ̀ àé neèe kpẽ́ ló gbò tóm ea beè sì. Jìhóvà beè tu nágé pá kóò Pọ́ọ̀l e bà bọ́ló dẹ̀lẹ̀ nyíé boo nvèèmà bá nèe.

20. Dẹ̀ẹ̀a boo nú ea di mm̀ kpá Róm̀ 8:38, 39, mósĩ́ deè ní eé láá nó bé e Pọ́ọ̀l beè ié zìgà naa ẽ́?

²⁰ (4) Siimá tóm. Bĩiná o bá kọọ̀, ‘Mósĩ́ deè ní e nda é láá nó nu dòòmà bá Pọ́ọ̀l ẹ?’ Dì belí Pọ́ọ̀l, èé íè ge ẹ̀bmà dẽe kọ bàé bíìgèi ló boo béè bẹẹ zìgà. (Máàk 10:29, 30) Kọbé è láá kilsĩ́ gè bọ́ló dẹ̀lẹ̀ nyíé boo kèbá ẹ̀bmà, à bọ́ló kọ é dẹ̀ẹ̀a boo Jìhóvà mm̀ tã̀àgã ló vaá olòó nó Kpá Káí. Èé íè ge kẽ̀èa boo kọọ̀ kà pọ̀bkà nú eé láá naa dú gè naa nú ea é nveè ka ló Jìhóvà. Èé láá àgala boo kọọ̀ Jìhóvà náa é sọ́i bá gbẹẹ́ kẽ, vaá tọ́ọ̀ nu àbèè nen náa é láá kpèg Bàrì lọl ló gè vùlèi.—Bugi Róm̀ 8:38, 39; Híb. 13:5, 6.

21. Éé ní ea beè nvèè bá nè Aya nè Hector kọ bàá láá bé èlbá tã̀àgã̀ e bà géè tení bá ẹ́?

²¹ Kọ̀láá bé e bẹẹ dìtõ̀ò meà naa, gbò nu dòòmà bá ea di mm̀ Kpá Káí é láá sièi kpóó ló. Dì belí nu dòòmà bá, Aya, ea dú neǹ gyà deè sĩ́ tóm kọ̀ kpẹ̀a ea ólò tõó Japan, kọ́ọ̀ nòòtẽ́ ea kil ló Jónà beè nvèè bá neèe  kọ á láá beè elìè bá síìa pọ̀ ge kọ́ kpẹ̀a kiẽ́e e gbò nen bọọ. Hector, ea dú ene kà nvín ãa gbálà ea di Indonesia, ea tẹ̀ nè a kà náa ólò fã̀ Jìhóvà beè kọọ̀, nu dòòmà bá Rúùt beè nvèè bá neèe kọ á noè nú ea kil ló Jìhóvà nè ge fã̀e.

22. Éé ní ea é nvèè bá nè ni kọ ó palàge ié bélè lọl ló gbò vídiò ea dẹẹ̀a boo Kpá Káí, àbèè ge bugi gbò bel ea di kè kẽè “Imitate Their Faith” e?

²² Ãàe ní eo é láá mòn gbò nu dòòmà bá ea di mm̀ Kpá Káí ea é síè ni kpóó ló é? Bẹẹ gbò vídiò, nu gè bìlà e bàé dã́ áá mon, nè gbò bel ea di kè kẽè “Imitate Their Faith” é nveè bá nè ni kọ ó dã́tẽ́ ló bé e gbò nòòtẽ́ ea di mm̀ Kpá Káí beè naaá naa. * Besĩ́ ò kálá ẹ̀b, pãane tṍ ló, àbèe ge bugi gbò nòòtẽ́í, bàn kọ Jìhóvà á nvèè bá neè ni kọ ó mòn kà lèlà nú ea é nveè bá nè ni. Dòòmà dẽe ló kọ ò dúè nen eo gé bugi nú ea kil lóá. Bugi togó boo nú e gbò gyóòlo Jìhóvà e bà bọ́ló dẹ̀lẹ̀ nyíé booí beè naa nè bé e Jìhóvà beè nvèè bá nè va kọ bàá láá bé èlbá gbò tàvàlà dìtõ̀ò e ba beè tení bá naa. Tṍóá ò gbóó tú siimá tóm. Õá Jìhóvà zaa ló bé ea gé nveè bá nè ni naa. Vaá ò zógè kọ nyíé ni ẹ́ẹ̀lìè tení dú ló gè gbĩ́ gbò sĩ́deè eo é nveemà bá nè dõòna gbò vaá siè va kpóó ló.

23. Dẹ̀ẹ̀a boo nú ea di mm̀ kpá Àìzáíà 41:10, 13, éé ní e Jìhóvà zigà kọ àé náànìè neèi ẽ́?

²³ Ge tõó dùm mm̀ nakà bàlà boo e Sétàn gé lẹẹlà bel lóí é láá palàge tàvàlà, vaá sìgà tṍó, néé nyímá ló nu gè naa. (2 Tím. 3:1) Sõò náa dú bíi kọ é siiá pọ̀ àbèè ge ié tã̀àgã̀ bùlà. Jìhóvà nyímá gbò tã̀àgã̀ e gé téní bá. Tṍó e íè bíi ló nvèè bá, à zigà kọ àé túè a bálè siilìèí ló. (Bugi Àìzáíà 41:10, 13.) È agàla boo kọọ̀ Jìhóvà é nveè bá nèi, vaá Kpá Káí síèi kpóó ló kọ é láá ĩ̀ìmà kọ̀láá íb tã̀àgã̀ e gé téní bá.