1-2. Bà mée ní e bàé láá nvèè bá nè gbò e bà gé nó Kpá Káí kọ bàá sìm kilsĩ́ vaá dììa múú ẽ́?

ENE kà vígà pábia ea bée kọlà Amy, ea ólò tõó Fiji beè kọọ̀: “M beè nyimá kọọ̀ nú em géè nó lọl mm̀ Kpá Káí dú kà kà bel. Sõò tṍó em zọọ̀ pá vígà sí nònù ní em daamà togó gè nyaaná nà sĩ́deè tõò dùm vaá gbóó dììa múú ẽ́.” Nú ea beè naaá ló Amy tẹ́lẹ bàlà kẽè nú ea palàge dú bíi: Nen ea gé nó Kpá Káí é láá palàge sìm kilsĩ́ nyòòmà ge dììa múú tṍó e dõòna gbò e bà di mm̀ bõ̀ònatõ̀ò nveè bá nèe.

² Buù nen ea di mm̀ bõ̀ònatõ̀ò é láá nvèè bá naa kọọ̀ gbò e bà gé nó Kpá Káí á dììa múú. (Ẹ́fẹ. 4:16) Ene kà neǹ gyà deè sĩ́ tóm kọ̀ kpẹ̀a, ea bée kọlà Leilani, ea ólò tõó Vanuatu, beè kọọ̀: “Bà ólò kọọ̀ dénè nen ea di mm̀ bon ní ea ólò nvèè bá bumá nvíné. M̀ bulà kọọ̀ níà bé e gè naa kọọ̀ gbò nen á nyoone nvéè Kráìst dì nàgé naa ẽ́; dénè nen ea di mm̀ bõ̀ònatõ̀ò ní e bà ólò nvèè bá naa kọọ̀ nen á dììa múú ẽ́.” Pá tọ, gbò kóò, nè gbò dò bá ólò nvèè bá nè nvín tọọ̀ kpá kọ á láá naa leevè gbẹá tọọ̀ kpá. Bà ólò naa vó tení dú ló gè siè kpóó ló nvíná vaá noòmàe gbò nú ea bọ́ló kọ á naa. Mm̀ tẽ̀ènè sĩ́deèá, dénè gbò e bà di mm̀ bõ̀ònatõ̀ò é láá dùùlà bá deè tṍ, siè kpóó ló, vaá dú lé nu dòòmà bá nèà gbò e bà gé nó Kpá Káí, kọbé bà láá sìm kilsĩ́ vaá dììa múú.—Pró. 15:22.

3. Éé ní eo nóò lọl ló nú e Ana, Dorin, nè Leilani kọ́ ẹ́?

³ Éé ní ea náa vaá nen ea gé nóòmà nu é sọtọ́ deè kọọ̀ dõòna kà pá vígà á nvèè bá nè nen e ẹlẹ ólò noòmà Kpá Káí é? Nvèè kpíí ló nú e nen ea ólò kọ́ kpẹ̀a mm̀ kele sĩ́deè  ea ólò tõó Moldova, ea bée kọlà Ana kọ́, à kọ́ọ̀, “À ólò palàge tàvàlà kọ áá enè nen á láá naa kọ̀láá kà nú ea dú bíi kọbé nen ea ge nóòmà Kpá Káí láá sìm kilsĩ́.” Dõòna kà neǹ kọ̀ kpẹ̀a mm̀ kele sĩ́deè ea ólò tõó nágé dóá, ea bée kọlà Dorin à kọọ̀, “Gã́bug tṍó, dõòna kà vígà ea gé zọ́m kọ́ kpẹ̀a ólò ló gbò bel e ním beè bugi togó boo ea é tọ́á ló nen em ólò noòmà Kpá Káí.” Leilani kọ́ dõòna kà nú ea náa vaá à bọ́ló kọọ̀ nyíéi á ẹẹ tṍó e dõòna gbò nveè bá nèi, tṍó ea kọ́ọ̀, “Tṍó e nen ea gé nó Kpá Káí mon bé e vulèe vaá ẹ̀b nú ea kilíé ló naa, à ólò naa kọ á nyimá kọọ̀ è dúù gbò e gé fã Jìhóvà.”—Jọ́ọ̀n 13:35.

4. Éé ní eé nó mm̀ nakà togó belí é?

⁴ Kọ̀láá bé ea dì naa, òó láá bugi togó kọọ̀, ‘Mósĩ́ deè ní em é láá nvèè bá nè nen ea gé nó Kpá Káí boo tṍó e níì nda ní em gé nóòmàe nu ẽ́ nì?’ Naanii èé ló bel boo sìgà nú eé láá naa tṍó e nen kólíi kọ é zọẹ̀ẹ noòmà Kpá Káí nen, nè nú eé láá naa tṍó e nen ea gé nó Kpá Káí daamà togó gè sí nònù. Èé nó nágé bé e gbò kànen é láá nvèè bá nè gbò e bà gé nó Kpá Káí kọ bàá sìm kilsĩ́ vaá dììa múú naa.

5. Éé ní ea bọ́ló kọ ó naa tṍó e nen kólí ni kọ ó zọẹ̀ẹ noòmà Kpá Káí nené?

⁵ Pọ̀bkà tóm nen ea gé nóòmà Kpá Káí dú gè naa kọọ̀ nen ea gé nó Kpá Káíá á dã́ ból ló nú ea di mm̀ Moǹ Bel Bàrì. Be nen ea gé nóòmà Kpá Káí kọ́ ó zọẹ̀ẹ gbá tọ, à bọ́ló kọ ó ẹ̀b o bá belí a neǹ nvèè bá. (Ẹ̀klì. 4:9, 10) Éé ní eo é láá naa kọbé ò palàge nvèè bá nèe tṍó e nò Kpá Káíá gé kilsĩ́ ẽ́?

6. Tṍó eo gé zọ nen noòmà Kpá Káí nen, mósĩ́ deè ní eo é láá tú nòòkúu ea di mm̀ kpá Próvẹẹ̀b 20:18 siimá tóm ẽ́?

⁶ Kpoogá dee ló nyòòmà nú e bàé nó. Bĩiná nen eo é zọ gbá tọá kọ á kọ́ sìgà nú ea kil ló nen ea ólò noòmà Kpá Káíá nè ni. (Bugi Próvẹẹ̀b 20:18.) Òó láá bĩináe kọọ̀: “Nen eo ólò noòmà Kpá Káíí dì naa vàẹ? Mókà togó bel ní eo é nói ẽ́? Éé ní eo gbĩ́ì kọọ̀ nen eo gé nóòmà Kpá Káíí á nòe? É kọọ̀ à íe nú e náa bọ́ló kọ ḿ kọ̀ àbèe ge naa tṍó e nònùá gé kilsĩ́? Mósĩ́ deè ní em é láá nvèè bá nèe kọ á sìm kilsĩ́ ẽ́?” À dú kà kà kọọ̀ neǹ vígàí náa é kọ́ nè ni gbò bel ke gũ̀a ea kil ló nen ea ólò noòmà Kpá Káíí, sõò nú ea é kọ́ nè ni é nveè bá nè ni. Nen ea ólò kọ́ kpẹ̀a aa dó dọ dó ea bée kọlà Joy ólò kọ́ íb gbò nuí nè gbò e bà zọ́ẹ gé noòmà Kpá Káí nen. À kọ́ọ̀: “Gbò belí ólò nvèè bá nè nen ea zọ́m gbá tọ kọ á láá nvèè bá nè nen ea gé nó Kpá Káíá vaá láá nyimá ló nú ea é kọ́ tṍó e nònùa gé kilsĩ́.”

7. Éé ní ea náa vaá à dú bíi kọọ̀ ó kpoogá dee ló nyòòmà nú e bàé nó tṍó eo zọọ̀ nen ea é nóòmà Kpá Káí nen gbá tọ ẹ́?

⁷ Be nen kọ́ ó zọẹ̀ẹ gé noòmà Kpá Káí  nen, àé dú lé be ò palàge kpoogá dee ló nyòòmà nú e bàé nó. (Ẹ́zrà 7:10) Vígà Dorin, e beè zẹ́ẹ́ kolí béeá kọ́ọ̀: “Nyíém ólò ẹẹ tṍó e nen ea zọ́m gbá tọ kpóógá dee ló nyòòmà nú em é nóòmà. Tṍóá àé gbóó láá ló bel ea é síè kpóó ló nen ea gé nó Kpá Káíá.” Gbá ló vó, nen ea gé nó Kpá Káíá é nyímá kọọ̀ pálàa bọ̀ì beè palàge kpoogai dee ló, vaá àé nó nu lọl ló. Kọbèè nóo láà kpoogá dee ló nyòòmà dénè nú eo é nói, òó láá tení boo gbò gá ea palàge dú bii mm̀ nú eo é nói.

8. Éé ní eo é láá naa kọbé o tã̀àgã ló Bàrì tọ́á ló nen tṍó eo gé nóomai Kpá Káí nen ẽ́?

⁸ Ge tã̀àgã ló Bàrì dú kà pọ̀bkà gá ea di ló gè noòmà Kpá Káí nen. Vóà naa, gbẹẹ́ sĩ́ bugi togó boo nú eo é láá kọ̀ be à gá náa vaá à kọ ó tã̀àgã ló Bàrì. Tṍóá, òó gbóó láá kọ́ kà lèlà gbò nú ea dú bíi mm̀ o tã̀àgã ló. (Ps. 141:2) Ene kà vígà ea bée kọlà Hanae, ea ólò tõó Japan, kẽèa boo tã̀àgã ló Bàrì e ene kà vígà pábia beè tã̀àgã̀ tṍó ea beè zọ̀ẹ noòmà Kpá Káí nen. À kọ́ọ̀: “M beè gbóó mòn bé ea gbaa ló kilma ló Jìhóvà agaló naa, vaá m beè gbĩ́ gè belíe. Nyíém beè palàge ẹẹ tṍó ea kólí nà bée mm̀ a tã̀àgã lóá.”

9. Dẹ̀ẹ̀a boo nú ea di mm̀ kpá Jém̀z 1:19, éé ní eo é láá naa kọbé ò dú kà lé nen ea zọ nen noòmà Kpá Káí nen ẽ́?

⁹ Nvèè bá nè nen ea gé nóòmà Kpá Káíá tṍó e nò Kpá Káí gé kilsĩ́. Ene kà vígà ea ólò kọ́ kpẹ̀a mm̀ kele sĩ́deè, ea ólò tõó Nigeria, ea bée kọlà Omamuyovbi beè kọọ̀: “Kà lé nen ea zọ́ ni gbá tọ ólò palàge pãane tṍ tṍó e nònùá gé kilsĩ́. Nen ea zọ́ ni gbá tọá é láá ló bel sìà kpóó ló, sõò náa é ló gbele tõ̀ò bel, boo béè kọ à nyímá kọọ̀ níì ẹlẹ ní ea gé nóòmàè nuá ẽ́ nì.” Éé ní ea é náa kọ ó nyimá bel ge lò nè tṍó eo é ló bel é? (Pró. 25:11) Palàge pãane tṍ tṍó e nen ea gé nóòmà nu nè nen ea gé nó nuá gé ló bel. (Bugi Jém̀z 1:19.) Tṍó eo náà vó ní eo é nyímá kà lèlà tṍó ea bọ́ló gè ló bel é. Sõò òó tú nyìmànù siimá tóm tṍó eo gé ló bel. Dì belí nu dòòmà bá, náa dú bíi kọ ó ló gbele tõ̀ò bel, ge ló bel nvee gbàà bel e nen ea gé nóòmà nu gé ló, àbèè ge ló bel boo dõòna kà togó bel. Pọ́ì ńkem̀ bel eo lóò, ge nè nu dòòle ló, àbèè ge bĩiná bíb é náa kọ á dã́ ból ló nú ea gé nó. Sìgà tṍó, àé láá tõó ní ló belí kọọ̀ nóo íèè gã́bug nu gè kọ́ kilma ló togó belá. Sõò be ò íe lèèmá mm̀ nen ea gé nó Kpá Káíá vaá lèèlàẹ, òó nveè bá nèe kọ á sìm kilsĩ́.

10. Mósĩ́ deè ní e nú eo beè tení bá é láá nvèè bá nè nen ea gé nó Kpá Káí é?

¹⁰ Kọ́ gbò nú ea ni nááa ní ló. Be àé nveè bá nè nen eo gé nóomai Kpá Káíá, tú pọ́ì ńkem̀ tṍó kọọmá bé eo beè bã mm̀ kà kàí naa, bé eo beè bé èlbá enè íb ànà-ànà naa, àbèè bé e Jìhóvà beè nvèè bá nè ni naa.  (Ps. 78:4, 7) Àé láá dú kọọ̀ nú ea beè naaá ní lóá níà kà lèlà nú ea dú bíi kọọ̀ nen ea gé nó Kpá Káíá á dã̀e. Àé agẹlẹ ló a zìgà vaá sièe kpóó ló kọ á sìm kilsĩ́ vaá dììa múú. Vaá àé láá nvèè bá nèe kọ á bé èlbá gbò tã̀àgã̀ ea gé téní bá. (1 Pít. 5:9) Gabriel, ea dú neǹ gyà deè sĩ́ tóm kọ̀ kpẹ̀a kátogóí gbẹá dó Brazil, kẽèa boo nú ea beè nvèè bá nèe tṍó ea géè nó Kpá Káí. À kọ́ọ̀: “Tṍó e pá vígà kọ́ nú ea beè naaá vá ló nèm, m beè gbóó nyimá kọọ̀ Jìhóvà nyímá kọ̀láá íb tã̀àgã̀ e gé téní bá. Vaá be baala beè láá bé èlbá, nda é láá be nágé èlbá.”

11-12. Éé ní ea náa vaá à bọ́ló kọ é zààva ló nen ea gé nó Kpá Káí tṍó ea sí nònù ẽ?

¹¹ Kọbé nen ea gé nó Kpá Káí láá sìm kilsĩ́ vaá dììa múú, àé íè ge olòó sí nònù vaá ié bélè lọl ló. (Híb. 10:24, 25) Be à sẹlẹ nen ea ólò noòmàe nu kólíe siimá nònù túá dee. Tṍó ea ni íná nònù, dénè bẹ̀ì é láá sièe kpóó ló kọ á olòó dú nònù. Mósĩ́ deè ní eé láá naa vó é?

¹² Palàge zààva ló nen ea gé nó Kpá Káí tṍó ea sí nònù. (Róm̀ 15:7) Be è náa kọọ̀ lóóe á dĩ̀ìnà tṍó ea íná nònù, àé náa kọ á tànie gè olòó dú Kíndòm Họ́ọ̀l. Zààvàẹ́ ló vaá ò dóe bá nè dõòna gbò mm̀ sĩ́deè ea é náa kọọ̀ lóóe á tú kẽ. Zọ̀ẹ loá bel, boo béè kọọ̀ nen ea beè kolíe domáá é láá dú kpẹ̀ nvée àbèè kọọ̀ à íe dõòna kà gbò tóm gè sí gbẹá nònù. Palàge pãane tṍ ló gbò bel ea ló, vaá ò íée lèèmá m. Ge tú lé bá tuumáe é láá nvèè bá nèe naa vàẹ? Nvèè kpíí ló nú ea bee naaá ló vígà Dmitrii, ea beè dììa múú sìgà gbáá ea kil nvéeá vaá dú neǹ nvèè bá sìtóm. Tṍó ea kẽèa boo túá deé ea beè sí nònù, à kọ́ọ̀: “Ene kà vígà págbálà beè mònim tṍó e pọ̀ gé síím gbẹá boo beè Kíndòm Họ́ọ̀l vaá kyã̀à dù gé faalám nvee tọ. Gã́bug nen beè dù gé kànàm mon. A beè palàge bọọ́ ḿ ló. A beè kpèḿ ló naa ní ea taním kọọ̀ nònù á di kọ̀láá dee. M̀ gáà beè mòn tọ́ọ̀ kà bõ̀ònaló ea bélí vó.”

13. Mósĩ́ deè ní eo lé nu dòòmà bá é láá nvèè bá nè nen ea gé nó Kpá Káí é?

¹³ Nè lé nu dòòmà bá. O lé nu dòòmà bá é nveè bá nè nen ea gé nó Kpá Káíá kọ á àgala boo kọọ̀ níì kà kà gbò nyòòne nvéè Kráìst e. (Máát. 5:16) Vígà Vitalii, ea ólò kọ́ kpẹ̀a mm̀ kele sĩ́deè gbẹá dó Moldova, kọ́ọ̀: “M̀ géè olòó ẹ̀b bé e gbò e bà di mm̀ bõ̀ònatõ̀ò tõó dùm naa, nè bé e bà bugi togó naa. Níí beè naa kọ ḿ àgala boo kọọ̀ Gbò Neǹ Ditõ̀ò Jìhóvà ní e bà dú kà kà bõ̀ònaló fã̀e.”

14. Mósĩ́ deè ní eo nu dòòmà bá é láá nvèè bá nè nen kọ á sìm kilsĩ́ ẽ́?

¹⁴ Kọbé nen ea gé nó Kpá Káí láá sìm tùlà ge dììa múú, àé íè ge tú gbò nú ea gé nó siimá tóm. Níí náa ólò bọ̀ọ̀gẹ̀ valí. Sõò  tṍó e nen ea gé nó Kpá Káí mon bé e gbò nòòkúu ea di mm̀ Kpá Káí dọ bélè nè ni naa, àé gbóó gbĩ́ gè nó ni. (1 Kọ́r. 11:1) Bugi togó boo nú ea beè naaá ló Hanae, e beè zẹ́ẹ́ kolí béeá. A beè kọọ̀: “Pá vígà géè naa gbò nú em géè nó gè naa lọl mm̀ Kpá Káíá. M beè mòn bé em é láá olòó siè kpóó ló dõòna gbò, ia ló pọ́lọ́ vaá vùlè va naa. Bà ólò ló lé bel kilma ló dõòna gbò. M beè gbĩ́ gè belí va.”

15. Mósĩ́ deè ní e kpá Próvẹẹ̀b 27:17 nveè bá nèi kọ é mòn bé ea bọ́ló gè tú nen ea gé nó Kpá Káí naamá bẹẹ kóò boo tṍó ea gé kilsĩ́ gè sí nònù ẽ?

¹⁵ Bã̀àà kóò nen ea gé nó Kpá Káí. Olòó ié lèèma mm̀ nen ea gé nó Kpá Káí tṍó ea gé kilsĩ́ gè sí nònù. (Fíl. 2:4) Gbĩ́ gè nyimáe ló leevè. Òó láá kọ́ nèe bé e nyíé ni ẹ́ẹ́ ló bé ea sim kilsĩ́ naa vaá bĩináe bé ea nò Kpá Káí, pá a tọ, nè a tóm dì naa. Nagbò loa sọ́lí é náa kọ ó palàge tõo bã̀é ló. Tṍó eo túù nen ea gé nó Kpá Káí naamá o kóò, àé nveè bá nèe kọ á sìm kilsĩ́ vaá dììa múú. (Bugi Próvẹẹ̀b 27:17.) Hanae ea ni dú neǹ gyà deè sĩ́ tóm kátogóí, kẽèa boo nú ea beè naaá tṍó ea beè dààmà togó gè sí nònù, tṍó ea kọ́ọ̀: “Tṍó em bãaà kóò gbò e bà di mm̀ bõ̀ònatõ̀ò, a beè olòó tànim gè sí nònù, vaá m̀ ólò sì kọbèè tṍó e lóóm ọọ. A beè olòó leemám gè di kpàn pá nà ãa kóòí, vaá a beè nvèè bá nèm kọ ḿ kùb ge bã̀àà kóò gbò e bà náa ólò fã̀ Jìhóvà. M beè gbĩ́ gè tõo bã ló Jìhóvà nè pá vígà. Vó beè naa kọ ḿ beeláfùl ge dììa múú.”

16. Dõòna kà éé ní eo é láá naa kọbé nyíè nen ea gé nó Kpá Káí ẹ́ẹ kọ à dṹùnàè bõ̀ònatõ̀ò ẽ?

¹⁶ Boo tṍó e nen ea gé nó Kpá Káí sim kilsĩ́, nvèè bá nèe kọ á nyimá kọọ̀ à dṹùnàè bõ̀ònatõ̀ò. Òó láá naa níí tení dú ló gè kolíe kyáà. (Híb. 13:2) Denis, ea ólò tõó Moldova, kẽèa boo tṍó ea géè nó Kpá Káíá vaá kọọ̀: “Gã́bug tṍó, bà ólò kolí kyáà ńdáà va nè m̀m̀ naa ní eé láá ié tṍó ge dììma ló pá vígà. Bà ólò kọ́ nèi bé e Jìhóvà ni nveè bá nè va naa. Vó beè sièi kpóó ló. Gbò nuí beè naa kọ é àgala boo kọọ̀ è gbĩ́ gè fã̀ Jìhóvà vaá èé íe dùm e bè náa tá.” Òó láá faalá nen ea gé nó Kpá Káí kọọmá kpẹ̀a tṍó ea ni sim tùlà ge kọ́ kpẹ̀a. Ene kà neǹ kọ̀ kpẹ̀a ea ólò tõó Brazil, ea bée kọlà Diego kọ́ọ̀: “Gã́bug pá vígà ólò kolím kọ ḿ zọẹ̀ va kọá kpẹ̀a. Níí beè dú kà lé sĩ́deè ea náa kọ ḿ palàge nyimá va ló. M beè nó gã́bug nu tṍó em zọọ̀ va kọá kpẹ̀a, vaá níí beè naa kọ ḿ tõo bã ló Jìhóvà nè Jíízọ̀s.”

17. Mósĩ́ deè ní e gbò kànen é láá nvèè bá nè gbò e bà gé nó Kpá Káí é?

¹⁷ Noo tṍó ge zọ̀ gbò e bà gé nó Kpá Káí naaá nu. Gbò kànen é láá nvèè bá nè gbò e bà gé nó Kpá Káí tṍó e bà zógè kọ bà vulèè va vaá ẹbvìè nú ea kil vá ló. É kọ òó  láá olòó zọ̀ va loá bel gbẹá nònù? Bàé nyímá kọ ò ẹbvìè nú ea kil vá ló be ò tú ba bée kolmá va, bọọ èlmà tõ̀ò tṍó e bà daamà togó gè aalá bíb gbẹá nònù. É kọ òó láá noo tṍó eo é zọọmà enè neǹ vígà gbá tọ tṍó ea é nóòmà Kpá Káí nen? Òó láá nvèè bá nè nen ea gé nó Kpá Káíá èlmà bé ea beè tõó ní ló naa. Ene kà neǹ gyà deè sĩ́ tóm kọ̀ kpẹ̀a, ea ólò tõó Nigeria ea bée kọlà Jackie, kọ́ọ̀: “A beè bọọ́ ló gã́bug nen em ólò noòmà Kpá Káí tṍó e bà nyímá kọọ̀ nen ea beè zọ̀m gbá tọá dú neǹ kànen mm̀ bõ̀ònatõ̀ò. Enè ọ̀và beè kọọ̀: ‘Beélè pastor náa é zigà ge naa vó. À ólò kãa áá gbò méné áá tṍó e bà kpẽ́ kpègè nèe!’ ” Vaá kátogóí à gé sí nònù.

18. Dẹ̀ẹ̀a boo nú ea di mm̀ kpá Tóm 20:28, mósĩ́ deè ní e gbò kànen mm̀ bõ̀ònatõ̀ò é láá sí tóm e Jìhóvà beè nèva leevè e?

¹⁸ Bumá vaá ò síè kpóó ló gbò e bà gé nóòmà Kpá Káí nen. Gbò kànen mm̀ bõ̀ònatõ̀ò, ò íèì kà agẹbá tóm ge sii, ea dú gè nvèè bá nè gbò kọ̀ kpẹ̀a kọ bàá láá kọ́ kpẹ̀a nè ge noòmà nu leevè. (Bugi Tóm 20:28.) Be à gá náa vaá à ié nen e kẹ́ẹ sííe ló gè noòmà Kpá Káí nen tṍó eo dìé ló, bĩiná be òó láá noòmà nuù nená. Jackie, e beè zẹ́ẹ́ kolí béeá kọ́ọ̀: “Gbò kànen ólò bĩinám nú ea kil ló gbò em ólò noòmà Kpá Káí. Bà ólò nvèè bá nèm tṍó ea tavàlàḿ ló gè noòmà Kpá Káí.” Gbò kànen é láá pììgà ge olòó siè kpóó ló gbò e bà ólò noòmà Kpá Káí nen. (1 Tẹ̀s. 5:11) Jackie kpáá kọọ̀: “Nyíém ólò ẹẹ tṍó e gbò kànen síèm kpóó ló vaá kọ bà nveenìè ka ló tóm em gé sí. Gbò belá ólò sièm kpóó ló belí tọ́ọ̀ múú e nen ṍ deé e gbei gé mo. Gbò belí ólò sièm kpóó ló vaá naa kọọ̀ nyíém á kpáá palàge ẹẹ ló gè noòmà Kpá Káí nen.”—Pró. 25:25.

19. Mókà ẹ́ẹ́ nyíe ní e dénè bẹ̀ì é láá iéé?

¹⁹ Kọbèè née gé nóòmà Kpá Káí nen kátogóí, dénè bẹ̀ì é láá nvèè bá nè nen ea gé nó Kpá Káí kọ á sìm kilsĩ́ vaá dììa múú. Kọbèè née lóò gbele tõ̀ò bel, ge kpoogá dee ló leevè é náa kọ é láá ló bel ea é nveè bá nè nen ea gé nóòmà nuù nen. Èé láá bã̀àà kóò gbò e bà gé nó Kpá Káí tṍó e bà dú Kíndòm Họ́ọ̀l, vaá èé láá dú kà lé nu dòòmà bá nèva. Gbò kànen é láá nvèè bá nè gbò e bà gé nó Kpá Káí tení dú ló gè ié tṍó nèva, vaá nvèè nàgé bá nè gbò e bà gé nóòmà nuù nen tení dú ló gè bumá va nè ge lèèlà va. Nyíéi ólò palàge ẹẹ tṍó e nveè bá nè nen kọ á vùlè Jìhóvà vaá sí tóm nèe, kọbèè à gá náa vaá bẹẹ nvèè bá à dú ńkem.