1. Éé ní ea náa vaá Jíízọ̀s beè bàn Jìhóvà kọ á kùmà pá a gbò nyòòne nvée ẽ́?

DEE deè nvéè bílá dee ea zilà besĩ́ì Jíízọ̀s à kálá ù, à géè bugi togó boo gbò tã̀àgã̀ e pá a gbò nyòòne nvée é téní bá. Boo béè kọọ̀ Jíízọ̀s vulè pá a kóò, a beè bàn a Tẹ̀ kọ á “kùmàva lọl bá Pọ́lọ́ Nená.” (Jọ́ọ̀n 17:14, 15) Jíízọ̀s beè nyimá kọọ̀ tṍó ea é oòàẹ̀ kẽ kilìè káála, Sétàn ea dú Pọ́lọ́ Nyómáá é kilsĩ́ gè naa uú boo kọ̀láá nen ea gbĩ́ gè fã̀ Jìhóvà. Boo béè vó, gbò gyóòlo Jìhóvà é íe bíi ló kpènà.

2. Éé ní ea náa vaá èé láá àgala boo kọọ̀ Jìhóvà é áálá bẹẹ tã̀àgã ló é?

² Boo béè kọọ̀ Jìhóvà vulè Jíízọ̀s, ea dú a Sã́áná, a beè aalá a tã̀àgã ló. Be è piigà bé e bẹẹ kpóó sim tùlà naa gè naa nú ea léémá Jìhóvà, àé vulè nài gé, vaá aalá bẹẹ tã̀àgã ló tṍó e banì nvèè bá nè kpènà lọ̀líé bá. Dì belí Tẹ̀ ea ólò ẹ̀b nú ea kil ló pá a tọ, Jìhóvà é kilsĩ́ gè vùlè vaá ẹ̀b nú ea kil ló pá a nvín. Be náa náa vó, àé kyọ a bée!

3. Éé ní ea náa vaá è ié bíi ló kpènà ea aa bá Jìhóvà deè nieí é?

³ È palàge ié bíi ló kpènà ea aa bá Jìhóvà kátogóí èlmà bé e beè ié naa. Ba beè tãa bá Sétàn lọl káála tẹlẹ kẽ, vaá “à gboó faalá gbele sṹg” domá. (Kùùà 12:12) À kẹlẹ sìgà gbò kọ bàá tuumá kọọ̀ bà “gé síè tóm neè Bàrì” tṍó e bà bíìgèi ló. (Jọ́ọ̀n 16:2) Gbò e bà náa ólò fã̀ Bàrì gé bíìgèi ló boo béè kọọ̀ née náà nú e pá bàlà boo gé náa. Kọ̀láá bé e bà bíìgèi ló naa, pọ̀ náa é sííi. Lọ́ éé? Boo béè kọọ̀ Kpá Káí kọ́ọ̀: “Dõò bọ́ ló dẹ̀lẹ̀ nyíe boo, vaá à é nveèi kpóó ló vaá kpènài lọl bá Pọ́lọ́ Nena.” (2 Tẹ̀s. 3:3)  Mósĩ́ deè ní e Jìhóvà ólò kpènài ẽ́? Naanii èé nó nú ea kil ló bàà sĩ́deè ea ólò naamá vó.

4. Dẹ̀ẹ̀a boo nú ea di mm̀ kpá Ẹ́fẹsọ̀s 6:13-17, éé ní e Jìhóvà néi kọbé à kpenài ẽ́?

⁴ Jìhóvà beè nèi gbò nuù bé ea é láá kpènài lọl bá gbò nàà uú boo ea aa bá Sétàn. (Bugi Ẹ́fẹsọ̀s 6:13-17.) Gbò nuù bé Bàrìí palàge agaló vaá siá tóm! Sõò àé kpenài áá tṍó e bọ́à buù kà nuù béí—vaá née lọà ló. Éé ní e buù kà nuù béí tõó dọ̀ ẹ? Naanii èé baatẽ́ nú e buù kà tõó dọ̀.

5. Éé ní ea dú kpá láá ẹ́, vaá éé ní ea náa èé íè ge bọá ẹ́?

⁵ Kpá láá tõó dọ̀ gbò kà kà bel ea di mm̀ Kpá Káí. Éé ní ea náa vaá èé íè ge bọá kpá lááí é? Boo béè kọọ̀ Sétàn dú “tẹ̀ kyáá bel.” (Jọ́ọ̀n 8:44) A tú gã́bug gbáá kpọọmá kyáá bel vaá “kẹlẹ dénè bàlà boo”! (Kùùà 12:9) Sõò gbò kà kà bel ea di mm̀ Kpá Káí a kpenài lọl bá a kẹ̀lẹ̀. Mósĩ́ deè ní eé láá bọá kpá lááí é? Èé láá naa vó tení dú ló gè nó nú ea kil ló Jìhóvà, ge fã̀e “m nyómá nè kà kà bel,” nè ge naa nú ea lelà kọ̀láá tṍó.—Jọ́ọ̀n 4:24; Ẹ́fẹ. 4:25; Híb. 13:18.

6. Éé ní ea dú báà kpọ́gọ́lọ́ ea kpenài nù báná nyíe ẽ́, vaá éé ní ea náa à dú bíi é?

⁶ Báà kpọ́gọ́lọ́ ea kpenài nù báná nyíe tõó dọ̀ gbò nòòkúù lé lab dògò Jìhóvà. Éé ní ea náa vaá èé tú báà kpọ́gọ́lọ́í uuá nù báná nyíéi ẽ́? Dì belí bé e báà kpọ́gọ́lọ́ ólò kpènà nù báná nyíè neǹ bé naaá, níà bé e gè tõó boo gbò nòòkúù Jìhóvà ea lelà é kpenà bẹẹ nyíe lọl bá gbò pọ́lọ́ nu ea di mm̀ bàlà booí kọbé náa kyọ́i naa ẽ́. (Pró. 4:23) Jìhóvà gbĩ́ kọ é vulèèe vaá fãèe lọl mm̀ dénè bẹẹ nyíe. (Máát. 22:36, 37) Sõò Sétàn gbĩ́ kọ é gá tú dénè bẹẹ nyíe siimá tóm nè Jìhóvà tení dú ló gè naa kọ é vùlè gbò nú ea di mm̀ bàlà booí—ea dú gbò nú e Jìhóvà ọ́bví. (Jém̀z 4:4; 1 Jọ́ọ̀n 2:15, 16) Tṍó e bè née dọọ̀ bá a kẹ̀lẹ̀í, à ólò gbóó biigèi ló kọbé è náa nú ea bẽ́émá Jìhóvà.

7. Mósĩ́ deè ní eé úúá báà kpọ́gọ́lọ́ ea é kpenài nù báná nyíe ẽ́?

⁷ È ólò uuá báà kpọ́gọ́lọ́ ea é kpenài nù báná nyíeí tṍó e gbaǹ tṍ ló gbò nòòkúù Jìhóvà ea kil ló lé nè pọ́lọ́ vaá tú siimá tóm mm̀ bẹẹ dùm. (Ps. 97:10) À ólò tõó ló sìgà gbò belí kọọ̀ gbò nòòkúù Jìhóvà náa kọ é gá ié dì pọ́ì. Sõò be née tõò na boo gbò nòòkúù ea di mm̀ Kpá Káí, èé di belí neǹ bé ea tú a báà kpọ́gọ́lọ́ lọa nù báná nyíe gbẹá dẽe bé boo béè kọọ̀ à tõoé ló belí kọ à nyee. Ẹ̀b bé ea é dú láb e nyìmànù á gé m naaà! Sõò be è vulè Jìhóvà, a lẹ̀ẹ̀là náa é, “tavàlà ge sẹlẹ,” tãa vó àé dùùlà bẹẹ dùm.—1 Jọ́ọ̀n 5:3.

8. Éé ní ea tõó dọ̀ ge nvèà kpá ká tọọ̀ bé ea dú bé e kpenà ló gè vee lé kpẹ̀a naa ẽ́?

⁸ Pọ́ọ̀l beè sièi kpóó ló kọ bẹẹ kpá ká tọọ̀ bé á dú bé e kpenà ló nyòòmà ge vee lé kpẹa ea dómà fẹ́ẹ́-fẹẹ̀ ló naa. À tõó dọ̀ kọ é di kpènà ló gè vee lé kpẹ̀a ea kil ló Boǹ Ménéá kọ̀láá tṍó. Tṍó e kọ́ọ̀ gbò nú ea di mm̀ Kpá Káí nè dõòna gbò, bẹẹ zìgà é agaló. À palàge síèi kpóó ló ge mòn gbò níí Jìhóvà beeá ló bàlà booí e bà gé gbĩ́ nèà deè ge kọọmá kpẹ̀a—tṍó e bà di boo tóm, gbẹá tọọ̀ kpá, gbẹá kiẽ́e gbò nen gé dú kíìli-kíìli, tṍó e bà gé kọ́ kpẹ̀a aa tọ dọ tọ, tṍó e bà gé zalí nu, tṍó e bà kãa pá ba dúà ló e bà náa ólò fã̀ Jìhóvà, tṍó e bà gé zọ gbò e bà nyímá ló lóa sọ́l, nè tṍó e bà náa láà aa tọ mm̀ sìgà tṍó. Be pọ̀ sííi vaá née kọ́nà kpẹ̀a, èé bélí neǹ bé ea lọà kpá ká tọ́ tọ gbẹá  dẽè bé; kom é valẹ̀ bá bã̀é ló. Nagé, àé tavàlàẹ́ ló gè kpènà a bá tṍó e bà náa uúé boo, vaá náa é láá tõó boo log ea neǹ togó ne.

9. Éé ní ea náa à dú bíi kọ é dàlà gbọ ẹ́?

⁹ Gbọ tõó dọ̀ bé e dẹlẹ̀ nyíé boo Jìhóvà naa. È dẹlẹ̀ nyíé boo kọ àé ḿm̀-mè gbò a zìgànù. Bẹẹ zìgà é náa kọ é láá gimè “sã́ ló díìla e Pọ́lọ́ Nená é tã́.” Éé ní ea náa à dú bíi kọ é dàlà gbọí é? Boo béè kọọ̀ à ólò kpènài lọl bá nòòmànù gbò e ba beè dọ̀ aa mm̀ kà kàí vaá naa kọ lóói á gá ọọ tṍó e bà nveemài lẹ́ boo béè kọọ̀ è gé fã Bàrì. Be née íè zìgà, àé tavàlàí ló gè bé èlbá tṍó e bà tã́gĩ́i bá kọ é lọ̀l togó kèbá Jìhóvà. Boo dõòna bá, è ólò dalà bẹẹ gbọ buù tṍó e kinì ge naa nú ea bẽ́émá Jìhóvà gbẹá boo tóm àbèè tọọ̀ kpá. (1 Pít. 3:15) Buù tṍó e née zigà ge bã ló tóm e bàé kpẽ́ gã́bug kpègè nèi, ea é náa kọ é gá láá fã̀ Jìhóvà, è gé dalà bẹẹ gbọ. (Híb. 13:5, 6) Vaá bẹẹ gbọ ólò kpènài kọ̀láá tṍó e kilsĩ́ gè fã̀ Jìhóvà kèbá nàà uú boo.—1 Tẹ̀s. 2:2.

10. Éé ní ea dú pẹ̀gẹ̀lẹ̀ bé e a é kpenài togó é, vaá èé úúá naa vàẹ?

¹⁰ Pẹ̀gẹ̀lẹ̀ bé e a é kpenài togó dú ból dẽe sĩ́ e Jìhóvà néi—ból dẽe sĩ́ kọ àé duulài  lọl bá ú, vaá nè kpẽ́ kọ̀láá gbò e bà náa a bùlà. (1 Tẹ̀s. 5:8; 1 Tím. 4:10; Táítọ̀s 1:1, 2) Dì belí bé e pẹ̀gẹ̀lẹ̀ bé ólò kpènà togó neǹ bé naaá, níà bé e ból dẽe sĩ́ kọ èé íe dùùà ólò kpènà bẹẹ bug naa ẽ́. Mósĩ́ deè e? Bẹẹ ból dẽe sĩ́ ólò naa kọ é ká bùlà gbẹẹ́ boo gbò zìgànù Bàrì, vaá nvèè bá nèi kọ bẹẹ gbò tã̀àgã̀ á gá ọọvẹ́i ló. Mósĩ́ deè ní eé úúá pẹ̀gẹ̀lẹ̀í é? Èé náa vó tení dú ló gè bugi togó belí bé e Bàrì bugi togó naa. Dì belí nu dòòmà bá, èé ḿm̀-mè bẹẹ bùlà boo Bàrì, níì boo gyọ́ nì.—Ps. 26:2; 104:34; 1 Tím. 6:17.

11. Éé ní ea dú gẹ̀ bé e nyómá káí néi ẽ́, vaá éé ní ea náa à dú bíi kọ é siimá tóm ẽ́?

¹¹ Gẹ̀ bé e nyómá káí néi dú Moǹ Bel Bàrì, ea dú Kpá Káí. Gẹ̀ béá íe kói gè tú kọ̀láá kà kyáá bel ẹẹ́ dẹi vaá naa kọọ̀ nen á di pọ́ì aa bá kyáá nòòmànù nè pọ́lọ́ láb. (2 Kọ́r. 10:4, 5; 2 Tím. 3:16, 17; Híb. 4:12) Èé nó gè tú gẹ̀ béá siimá tóm leevè tení dú ló gè nó Kpá Káí boo bẹẹ lóó nè gbò búma e bõ̀ònatõ̀ò Bàrì néi. (2 Tím. 2:15) Gbá ló nuù bé e Jìhóvà néií, à nenài gé dõòna kà nú ea é kpenài. Níà éé?

12. Dõòna kà éé ní e íè bíi ló é, vaá ló éé?

¹² Neǹ bé ea nyímá nu ólò nyimá kọọ̀ áá ẹ̀ẹ̀ náa é láá beè gbele tõ̀ò gbò bé; à íe bíi ló nvèè bá ea aa bá dõòna gbò e bà gbá sí ól béá. Mm̀ tẽ̀ènè sĩ́deèá, áá bẹ̀ì née é láá bé Sétàn èlbá, è íè bíi ló nvèè bá ea aa bá pá vígà. Jìhóvà beè nèi ‘pá vígà m Kráìst’ e bà di kpènà ló gè nvèè bá nèi.—1 Pít. 2:17.

13. Dẹ̀ẹ̀a boo nú ea di mm̀ kpá Híbrù 10:24, 25, mósĩ́ deè ní e bẹẹ gbò nònù ólò nvèè bá nèi ẽ́?

¹³ Enè sĩ́deè e ólò ié nvèè bá dú gè olòó sí nònù. (Bugi Híbrù 10:24, 25.) Lóói ólò ọọ́ sìgà tṍó, tṍó ea nááá naa vó, ge sí nònù é nveè bá nèi. Gbò bel e pá vígà áálá gbẹá nònù ólò sièi kpóó ló. Gbò lòbèl ea dẹẹ̀a boo Kpá Káí nè gbò nu gè naa e gbò nvín tọọ̀ kpá ólò naa, ólò sièi kpóó ló kọ é kilsĩ́ gè fã̀ Jìhóvà. Vaá gbò sọ́l e lóà besĩ́ì nònù kálá dààmà togó nè tṍó ea ni íná kùbmà ólò sièi kpóó ló. (1 Tẹ̀s. 5:14) Gbá ló vó, bẹẹ gbò nònù ólò naa kọ é ié ẹ́ẹ́ nyíe ea dú ló gè nvèè bá nè dõòna gbò. (Tóm 20:35; Róm̀ 1:11, 12) Bẹẹ gbò nònù ólò nvèè nàgé bá nèi mm̀ dõòna sĩ́deè. À ólò naa kọ é sìm kilsĩ́ mm̀ bẹẹ kalì ge beemá bé, ea dú gè kọ́ kpẹ̀a nè ge noòmà nu. Dì belí nu dòòmà bá, è ólò nó gè tú Gbò Kpá E Ólò Noòmà Gbò Nen siimá tóm leevè. Vóà naa, palàge kpoogá dee ló nyòòmà nú e bàé nó gbẹá nònù. Tṍó e nònù di boo, palàge pãane tṍ ló nú e bà gé nó. Tṍó e nònù ni íná kùbmà, tú gbò nú eo nóòa siimá tóm. Tṍó e náà vó, èé dú “lé nen bé Kráìst Jíìzọ̀s.”—2 Tím. 2:3.

14. Mókà dõòna kà nvèè bá ní e Jìhóvà nèi ẽ́?

¹⁴ Gã́bug gãà gbò nyómá tóm e bà íe kpóó gé nveè bá nèi. Zẹ́ẹ́ bugi togó boo nú e áá ene kà nyómá tóm é láá naa! (Àìz. 37:36) Kátogóí, bugi togó boo nú e gã́bug gãà gbò nyómá tóm é láá naa. Tọ́ọ̀ nen àbèè zọ náa é láá bé èlbá gbò bé Jìhóvà ea íe kpóó. Jìhóvà íe kpóó èl dénè nen, vaá boo béè kọọ̀ à dìí ló, èé bé èlbá kọ̀láá gbò e bà gé náa uúí boo. (Jọ́j. 6:16) Níí palàge dú kà kà! Tṍó e gbò eo gé gbái siai tóm, gbò eo gbáì diaí tọọ̀ kpá, àbèe pá o dúà ló e bà náa ólò fã̀ Bàrì kọ́ àbèè ge naa nú ea náa kọ lóó ni á ọọ, kẽ̀èa boo gbò e bàé láá nvèè bá nèni. Kẽ̀èa boo kọọ̀ níì áá ọ̀ọ̀ ní eo gé bé béí é nì. Jìhóvà dì ea gé túlè ni.

15. Dẹ̀ẹ̀a boo nú ea di mm̀ kpá Àìzáíà 54:15, 17, éé ní ea náa vaá tọ́ọ̀ nen náa é láá kùb sìtóm kọ̀ kpẹ̀a ẹ́?

¹⁵ À íe gã́bug nú ea náa vaá bàlà boó e Sétàn gé lẹẹlà bel lóí à ọvíi. Née ólò nvèè sãa kúm tọ́ọ̀ kà bẹbẹ̀l vaá née ólò sí ól bé. È ólò vee nú ea kil ló béè Bàrì, bé e áá a Boǹ Méné ní ea é dómà fẹ́ẹ́-fẹẹ̀ ló naa ẽ́, nè ge tõó boo gbò a nòòkúù lé lab dògò. Èé ólò naa kọ gbò nen á nyimá kọọ̀ nen ea gé lẹẹlà bel ló bàlà booí dú neǹ kyáá bel nè neǹ fẹ̀ nèn. (Jọ́ọ̀n 8:44) È ólò vee nú ea kil ló kyọ̀à sĩ́ ea é gé dọ boo bàlà boò Sétàní. Née é zigà kọọ̀ Sétàn nè pá a gbò á kùbvii lọl ló gè kọ́ kpẹ̀aí. Tãa vó, èé kilsĩ́ gè tú kọ̀láá kà nèà deè e íè lèèmà Jìhóvà! Kọ̀láá bé e Sétàn íe kpóó naa, náa é láá naa kọọ̀ sìtóm kọ̀ kpẹ̀aí á gá kọá iná ló gbò e bà dì beeá ló bàlà booí. Áá kpènà ea aa bá Jìhóvà ní ea é láá naa kọọ̀ níí á valíé.—Bugi Àìzáíà 54:15, 17.

16. Mósĩ́ deè ní e Jìhóvà é duulà pá a gbò tṍó pọ̀b kpo tã̀àgã̀ ẽ?

¹⁶ Éé ní ea é nááá dì deè sĩ́é? Tṍó pọ̀b kpo tã̀àgã̀, Jìhóvà é duulà pá a gbò mm̀ bàà sĩ́deè ea dú dũ̀ùnè. Àé zẹ́ẹ́ dùùlà pá a gyóòlo e bà bọ́ló dẹ̀lẹ̀ nyíé boo tṍó ea é náa kọọ̀ gbò méné bàlà boo á kyọ̀sĩ́ Gbele Bábilọ̀n, ea dú bõ̀ònaló kyáá fã́. (Kùùà 17:16-18; 18:2, 4) Tṍóá, àé gbóó dùùlà pá a gbò tṍó ea é tú bé Amagẹ́dọ̀n kyọ̀ọ̀mà sĩ́ gbò e bà dṹùnà bàlà boò Sétàn ea sígáá.—Kùùà 7:9, 10; 16:14, 16.

17. Mókà bélè ní eé íe be è tõo bã ló Jìhóvà ẹ?

¹⁷ Tṍó e tõò bã ló Jìhóvà, Sétàn náa é láá naa tọ́ọ̀ nú ea é gbẹ́ẹ́i gbóò ló. Kàsĩ́, ẹlẹ ní e kyọ̀à sĩ́ ea dì dọ̀ dè-dè é dọ́ boo é. (Róm̀ 16:20) Boo béè vó, bọá dénè nuù bé Bàrì—vaá ó gá lọa ló! Áá ọ̀ọ̀ ó gá bé Sétàn nè a bàlà boo. Nvèè bá nè pá vígà. Tõó boo gbò tùle e Jìhóvà ne. Be ò náa vó, òé láá àgala boo kọọ̀ o Tẹ̀ ea di káála ea vulè ni é né ni kói vaá kpènà ni.—Àìz. 41:10.