1. Dẹ̀ẹ̀a boo nú ea di mm̀ kpá Máátìù 24:9, éé ní ea náa vaá náa é bọọí ló be bà ọ́víi é?

JÌHÓVÀ beè dèmii kọ é ié ẹ́ẹ́ nyíe mm̀ ge vùlè dõòna gbò nè tṍó e dõòna gbò vulèi. Vóà naa, nyíéi ólò bììlà tṍó e bà ọ́víi vaá pọ̀ ólò láá siinái gé. Dì belí nu dòòmà bá, ene kà vígà pábia ea bée kọlà Georgina, ea ólò tõó Europe, kọ́ọ̀: “Tṍó em beè toolá 14 gbáá, ńdáà kà beè ọvím boo béè kọọ̀ m̀ fãà Jìhóvà. A beè tõó ḿ ló belí kọ à dú áá m̀m̀, vaá nyíém beè palàge bììlà, a beè naa kọ ḿ bugi togó kọọ̀ m̀ dúù pọ́lọ́ nen.” * Ene kà vígà págbálà ea kọlà Danylo émí kọọ̀: “Pọ̀ nè kẹ́ẹ beè siím tṍó e gbò bé tú nu kpọ́ḿ ló, nvèèmàm lẹ́, vaá kọ bàé nveenìèm kom ló boo béè kọọ̀ m̀ dúù enè Neǹ Ditõ̀ò Jìhóvà.” Nyíéi ólò bììlà tṍó e bà ọ́víi, sõò níí náa ólò bọọí ló. Boo béè kọọ̀ Jíízọ̀s beè kọ́ gbẹẹ́ sĩ́ kọ bàé ọ́víi.—Bugi Máátìù 24:9.

2-3. Éé ní ea náa vaá bà ólò ọví gbò e bà gé nyoone nvéè Jíízọ̀s e?

² Pá bàlà boo ólò ọví gbò e bà gé nyoone nvéè Jíízọ̀s. Ló éé? Boo béè kọọ̀ dì belí Jíízọ̀s, née dṹùnà “pá bàlà boo.” (Jọ́ọ̀n 15:17-19) Náa kal ló béè kọọ̀ è ólò fã̀ dẽè gbò e bà gé bẹl, née ólò fã̀ va àbèè ge kumí sĩ́ kẽ nè nú ea doà va ba. Áá Jíhóvà ní e ólò fã̀e. È ólò nvèè sãa kúm kọ à lela ló áá Bàrì ge bẹ̀l gbò nen—ea dú nú e Sétàn nè ‘pá a gbò’ gé amà sàn tãa tọ́ kẽ. (Jén. 3:1-5, 15) È ólò vee kọọ̀ áá Boǹ Méné Bàrì ní ea é nveè kùbmà ló kọ̀láá kà tã̀àgã̀ ea di ló gbò nen ẽ́, vaá kyọ̀sĩ́ kọ̀láá gbò e bà bé uú boo. (Dán. 2: 44; Kùùà 19:19-21) Níá dú lé kpẹ̀a kilma ló gbò gbọ́ọ́-gbọọ̀ ló, vaá dú pọ́lọ́ kpẹ̀a kilma ló gbò gbóò togó.—Ps. 37:10, 11.

³ Bà ólò ọvínái gé boo béè kọ è gbaǹ tṍ ló gbò log Bàrì. Nú e Bàrì kọ́ à dú lé nè pọ́lọ́ palàge dú kele ló nú e pá bàlà boo kọ́ọ̀ à dú lé nè pọ́lọ́. Dì belí nu dòòmà bá, gbò nen ténmá kọọ̀ kúnàgã̀ dú lé, ea dú nú ea beè naa vaá Bàrì à kyọ̀ sĩ́ Sọ́dòm nè Gòmóràa! (Júùd 7) Gã́bug nen ólò nvèèmài lẹ́ vaá kolíi pọ́lọ́ bée boo béè kọọ̀ è gbaǹ tṍ ló log Bàrì kilma ló íb gbò lábví.—1 Pít. 4:3, 4.

4. Mókà gbò kpãa ní ea ólò nvèè bá nèi tṍó e gbò nen ọ́víi é?

⁴ Éé ní ea é láá nvèè bá nèi kọ é ĩ̀ìmà tṍó e gbò nen ọ́víi vaá nvèèmài lẹ́ẹ́? À dú bíi kọ é palàge dẹlẹ nyíé boo kọọ̀ Jìhóvà é nveè bá nèi. Dì belí gbọ, èé láá tú bẹẹ zìgà gĩimá “sã́ ló díìla e Pọ́lọ́ Nená é tã́.” (Ẹ́fẹ. 6:16) Níì áá zìgà ní eé íe é nì. À dú bíi kọ é ié nágé vulè. Ló éé? Boo béè kọọ̀ vulà náa ólò “gbalá bã̀ sṹg.” À ólò ĩ̀ìmà kọ̀láá kà pọ́lọ́ nu. (1 Kọ́r. 13:4-7, 13) Kátogóí, naanii èé nó bé e gè vùlè Jìhóvà, pá vígà, nè ge vùlè gbò e bà ọ́víi é láá nvèè bá nèi kọ é ĩ̀ìmà tṍó e bà ọ́víi naa.

5. Éé ní e Jíízọ̀s beè naa boo béè kọọ̀ à vulè a Tẹ̀ ẹ?

⁵ Kà lèlà bílá dee ea zilà besĩ́ì pá a gbò ọ́b à kálá fẹ́ Jíízọ̀s, a beè kọ́ nè pá a gbò nyòòne nvée e bà bọ́ló dẹ̀lẹ̀ nyíé boo kọọ̀: “Nda vulè nà Tẹ̀. Vó ní e a kọ́ ḿ naa kọ̀láá bé e nà Tẹ̀ beè lẹẹlàm̄ naa é.” (Jọ́ọ̀n 14:31) Boo béè kọọ̀ Jíízọ̀s beè vùlè a Tẹ̀, a beè láá emá kà agẹbá tã̀àgã̀ ea beè tení bá. Beele é láá naa nagé vó be è vulè Jìhóvà.

6. Dẹ̀ẹ̀a boo nú ea di mm̀ Kpá Róm̀ 5:3-5, gbò gyóòlo Jìhóvà ólò labví láb naa vàẹ tṍó e pá bàlà boo bíìgè va ló é?

⁶ Vulè e gbò gyóòlo Jìhóvà íe kilma ló Bàrì ólò nvèè bá nè va kọ bàá ĩ̀ìmà bíígá ló. Dì belí nu dòòmà bá, tṍó e pọ̀b tọ bèèla pá Júù beè tenmá kọọ̀ gbò tóm á gá kọ ná kpẹ̀a, vulè e bà íe kilma ló Bàrì beè naa kọ bàá “gban tṍ ló Bàrì èlmà nen.” (Tóm 5:29; 1 Jọ́ọ̀n 5:3) Íb vulàí ní ea ólò nvèè bá nè pá vígà kọ bàá láá elá àgàlà deè nieí bã̀àna tṍó e kpóó ea gé bẹl náa uú vá boo é. Tṍó e pá bàlà boo ọ́víi, nyíéi ólò ẹẹ, tãa vó e lóói ọọ.—Tóm 5:41; bugi Róm̀ 5:3-5.

7. À bọ́ló kọ é labví láb naa vàẹ tṍó e pá bẹẹ tọ náa uúí boo é?

⁷ Àé láá dú kọọ̀ kà pọ̀bkà ẹ̀bmà e gé kpee sĩ́ ló aa bá pá bẹẹ tọ. À ólò tõó ló sìgà pá bẹẹ tọ belí kọ bà dagẹ̀i tṍó e bà nyímá kọ è gbĩ́ gè fã̀ Jìhóvà. Àé láá tõó ló sìgà gbò belí kọ é gé ná mm̀ bẹẹ bug. (Doolé ló Máàk 3:21.) Bàé láá dọ bàlà kẽ naa uúí boo. Á gá bọọí ló tṍó e bà náa uúí boo. Jíízọ̀s beè kọọ̀: “Gbò e a di tọ ló nen ní e bà náa é gbĩ́ gè mònie mii é.” (Máát. 10:36) Mm̀ kà kà, kọ̀láá bé e pá bẹẹ dúà ló tú pọ́lọ́ bá sẹ̀ẹ̀mài naa, née ólò ẹ̀bva belí pá bẹẹ gbò ọ́b. Bé e bẹẹ vulè kilma ló Jìhóvà gé bọọ naa, níà bé e bẹẹ vulè kilma ló dõòna gbò é bọọ naaé. (Máát. 22:37-39) Sõò née é aa ló gè gbàn tṍ ló log Bàrì nè gbò nòòkúu ea di mm̀ Kpá Káí boo béè ge naa nú ea é léémá gbò nen.

8-9. Éé ní ea beè nvèè bá nè ene kà vígà pábia kọ á láá elá àgàlà kèbá agẹbá nàà uú boo é?

⁸ Georgina, e beè zẹ́ẹ́ kolí béeá, beè elá àgàlà náa kal ló béè kọọ̀ a kà géè naa uúé boo. Georgina kọ́ọ̀: “Ńdáà kà nè m̀m̀ beè dààmà togó gè zọ̀ gbò Neǹ Dìtõ̀ò Jìhóvà  noá Kpá Káí. Sõò tṍó e ọ̀ọ̀lẹ̀ ẽ́ téní vaá m̀ gbóó dààmà togó gè sí nònù, ńdáà kà beè dààmà togó gè naa uúḿ boo. M beè gbóó nyimá kọ à géè zọ̀ gbò e ba beè dọ̀ aa mm̀ kà kàí naaá nu, vaá à ólò tú gbò kyáá bel e bà kpọ́ nèe loomá bel nèm. À ólò nvèèmàm lẹ́, dùùlà nà gyáa, tú nú ea é sṍgèm nvèèḿ byṍ, vaá toví nà kpá èèla kẽ. M beè dììa múú tṍó em ni tóólá 15 gbáá. Kọbé ním fã nà Jìhóvà, ńdáà kà beè túm tẹlẹ boo bé kiẽ́e e áá gbò nvín ãa bia ní e bà dìe, e sìgà ọ̀và ólò ṍ pọ́lọ́ biè vaá labví pọ́lọ́ láb. À ólò tàvàlà ge ĩ̀ìmà tṍó e nen e vulè, ea bọ́ló kọ à gáẹ̀ ẹ̀b nú ea kilíí ló ní ea gé bíìgèi ló é.”

⁹ Éé ní ea beè nvèè bá nè Georgina kọ á ĩ̀ìmà ẽ? À kọ́ọ̀: “Tṍó e nà kà daamà togó gè naa uúḿ boo dú tṍó em ã́àa bugi zivè kpoò Kpá Káí lọ̀l. Tṍóá m beè palàge àgala boo kọọ̀ m bã́ mm̀ kà kà bõ̀ònatõ̀ò, vaá Jìhóvà dìḿ ló. M̀ ólò tã̀àgã̀é ló lee, vaá à ólò dám mon. Tṍó em beè di boo bé kiẽ́e ea beè túm tẹlẹ̀a, ene kà vígà pábia beè kolím siimá a tọ vaá è gbá noá Kpá Káí. Dénè tṍóá, pá vígà géè sièm kpóó ló gbẹá Kíndòm Họ́ọ̀l. Ba beè naa kọ ḿ dũùnà pá ba tọ. M beè nyimá kọọ̀ Jìhóvà íe kpóó èl gbò e bà gé náa uúí boo, kọ̀láá bé e bà meà naa.”

10. Éé ní eé láá dẹlẹ nyíé boo kọọ̀ Jìhóvà é náa ẽ́?

¹⁰ Neǹ tóm Pọ́ọ̀l beè kọọ̀ “náa íe tọ́ọ̀ kà nu e Bàrì beè dèm e a é láá kpòòlà beele lọl ló vulà súú dẽe ló Bàrì e beele íè tení domá ló bẹẹ Dõò Kráìst Jíìzọ̀s.” (Róm̀ 8:38, 39) Kọbèè à gá náa vaá è mòn tã̀àgã̀ sìgà tṍó, Jìhóvà é ólòó nvèèi nyíé gbàà vaá sièi kpóó ló. Nú ea beè naaá ló Georgina zógè kọọ̀ Jìhóvà ólò nvèè bá nèi tení dú ló pá vígà.

11. Mósĩ́ deè ní e íb vulà e Jíízọ̀s beè kọ́ nú ea kil ló mm̀ kpá Jọ́ọ̀n 15:12, 13, ólò nvèè bá nè pá a gbò nyòòne nvée ẽ́? Nè nu dòòmà bá.

¹¹ Kà lèlà bílá dee ea zilà besĩ́ Jíízọ̀s à kalá ù, a beè kẽeé nyíè pá a gbò nyòòne nvée kọ bàá vùlè ene. (Bugi Jọ́ọ̀n 15:12, 13.) A beè nyimá kọọ̀ ge ié dùm ge tú lóó vaamá gyọ́ọ é nveè bá nè va kọ bàá láá gbaaá ló vaá ĩ̀ìmà tṍó e pá bàlà boo é ọ́ví va. Bugi togó boo nú ea beè naaá ló bõ̀ònatõ̀ò ea beè di Tẹ̀sàlónaikà. Ba beè olòó biìgè ló gbò e bà di bõ̀ònatõ̀òá lọ̀l gé tṍó ea beè bã kẽ. Sõò pá vígàa beè  zogè kà lé nu dòòmà bá mm̀ ge bọ́ló dẹ̀lẹ̀ nyíé boo nè ge ié vulè. (1 Tẹ̀s. 1:3, 6, 7) Pọ́ọ̀l beè siè va kpóó ló kọ bàá kilsĩ́ “m vulà súú dẽe lóí.” (1 Tẹ̀s. 4:9, 10) Vulà é náa kọ bàá nvèè nyíé gbàà vaá siè kpóó ló gbò e lóó va ọọ. (1 Tẹ̀s. 5:14) Ba beè tú dùùlà bá deè tṍ e Pọ́ọ̀l beè nèvaá, boo béè kọọ̀ mm̀ ní ea égè bàà kà kpá e Pọ́ọ̀l émí enè gbáá aa ló tṍóá, a beè kọ́ nèva kọọ̀: “Ò gé kpáá palà ge vulenai gé ene.” (2 Tẹ̀s. 1:3-5) Ba vulà beè nvèè bá nèva kọ bàá láá ĩ̀ìmà kèbá tàvàlà dìtõ̀ò nè bíígá ló.

12. Tṍó e bé beè dọ ene kà dó, mósĩ́ deè ní e pá vígà beè zogè kọ bà vulèè pá vígà e bà téélá dú ba bon ẽ́?

¹² Bugi togó boo nú ea beè naaá ló Danylo, e beè zẹ́ẹ́ kolí béeá, nè a va. Tṍó e bé ea géè beá ba dó íná ba bon, ba beè kilsĩ́ gè sí nònù, kọ́ kpẹ̀a imá kiẽ́e e ba kpóó sim tùlà, vaá dõo gyã́á e bà íe nè pá vígà. Enè dee, gbò bé e bà fáálá náa beè bã tọọ̀ Danylo. Danylo kọ́ọ̀: “Ba beè kọ ḿ zìgà kọ ním é dú nàè enè Neǹ Ditõ̀ò Jìhóvà. Tṍó e ním zigà, ba beè sẹlẹ ló kọ bàé tã́ànìè m vaá tã́ náaá gbàn deè. Besĩ́ bà kalá àà, ba beè kọ bàé beè kpáá ooàẹ̀ kẽ duè gé kuná nà va. Sõò pá vígà beè vàlẹ̀ bá dù gé túi nvee mm̀ train kilma dõòna kà bon. Bé e pá vígà beè vùlèi naa náa é táḿ nyíe. Tṍó e ínà boná, pá vígà e bà di kĩé beè nèi gyã́á, vaá nvèè bá nèi kọ é ié tóm ge sì nè tọ gè tõó m! Vó beè naa kọ é ié kiẽ́e e dõòna kà pá vígà e bà téélá dú bóná é tõo.” Gbò nú ea beè naaáí zógè kọọ̀ vulà ea di zẹ̀ẹ̀ gbò níí Kráìst é láá nvèè bá nèi kọ é ĩ̀ìmà tṍó e bà ọ́víi.

13. Mósĩ́ deè ní e nyómá káí Bàrì ólò nvèè bá nèi kọ é ĩ̀ìmà vaá kilsĩ́ gè sí tóm nè Jìhóvà bã̀àna tṍó e gbò nen ọ́víi é?

¹³ Jíízọ̀s beè kọ́ nè pá a gbò nyòòne nvée kọ bàá vùlè pá ba gbò ọ́b. (Máát. 5:44, 45) É kọ à válí gè naa vó? Ẽ́èe! Sõò nyómá káí Bàrì é láá naa kọ á valíí ló gè naa vó. Vulà, ĩ̀ìmà, lé nyíe, gbọ́ọ́ gbọọ ló, nè ge láá lẹ̀ẹ̀là bel ló bẹẹ bá dṹùnà gbò gá ea di ló ból súú nyómá káí Bàrì. (Gàl. 5:22, 23) Gbò kpãaí ólò nvèè bá nèi kọ é ĩ̀ìmà tṍó e bà ọ́víi. Gã́bug gbò e bà ólò naa uúí boo a nyááá boo béè lé láb e ba dóm, va, nvín, àbèè pá ba kè gyṍó lábví kìlmà vá ló. Kàsĩ́, gã́bug ọ̀và a zọ́i fã̀ Bàrì.  Boo béè vó, be à gá náa vaá à tàvàlà ní ló gè vùlè gbò e bà ọ́ví ni boo béè kọ ò gé fã Jìhóvà, bàn Bàrì kọ á neè ni a nyómá káí. (Lúùk 11:13) Àgala boo kọọ̀ ge gbàn tṍ ló Bàrì dú kà lé nu gè naa kọ̀láá tṍó.—Pró. 3:5-7.

14-15. Mósĩ́ deè ní e kpá Róm̀ 12:17-21, beè nvèè bá nè Yasmeen kọ á vùlè a dóm náa kal ló béè kọ à géè palàge biìgèe ló é?

¹⁴ Bugi togó boo nú ea beè naaá ló ene kà vígà pábia ea kọlà Yasmeen. Tṍó ea dú enè Neǹ Ditõ̀ò Jìhóvà, a dóm beè dòòmà kọ bà kẹlẹ́ẹ, vaá pììga boo gè kpègie kọ á gá fã̀ nà Bàrì. A beè nvèèmàe lẹ́, vaá kọ́ nè pá ba dúà ló, tẹ̀ sĩ́ ba bõ̀ònaló fã̀, nè nen ea ólò siiá zọ, kọ bàá siìmàe pọ̀ kọ à gbĩ́ gè zaali a tọ. A dóm beè dù gé nvèèmà nàgé lẹ́ pá vígà gbẹá nònù! Yasmeen beè olòó tó lee boo béè pọ́lọ́ bá ea sẹẹmàe.

¹⁵ Pá vígà beè olòó nvèè nyíé gbàà vaá siè kpóó ló Yasmeen gbẹá Kíndòm Họ́ọ̀l. Gbò kànen beè sièe kpóó ló kọ á tú nú ea di mm̀ dọ̀ Kpá Káíí siimá tóm, Róm̀ 12:17-21. (Bugi.) Yasmeen kọ́ọ̀, “A beè tàvàlàḿ ló. Sõò m beè bàn Jìhóvà kọ á nvèè bá nèm, m beè pììgà bé e nà kpóó sim tùlà naa gè tú nú e Kpá Káí kọ́ siimá tóm. Vóà naa, tṍó e nà dóm tú súng tãamá bá kpá kẽ èèla bẹẹ tọ bùl nu, m̀ ólò õ̀ònà lọ̀l. Tṍó ea nveemàm lẹ́, m̀ ólò tú gbọ́ọ́-gbọọ̀ ló aamá bel nèe. Vaá tṍó e kpá lóe zọ, m̀ ólò ẹ̀b nú ea kilíé ló.”

16-17. Éé ní eo nóò lọl ló nú ea beè naaá ló Yasmeen ẽ?

¹⁶ Yasmeen beè ié tã́áná dee bá boo béè kọ à vulè a dóm. À kọ́ọ̀: “Nà dóm beè dààmà togó gè dẹlẹ́m nyíé boo, boo béè kọ à nyímá kọ m̀ ólò ló kà kà bel. A beè gbóó dààmà togó gè palàge pãaném tṍ ló tṍó em gé ló bel ea kil ló bõ̀ònaló fã̀, vaá a beè zìgà kọ àé náànìè kọọ̀ fẹ́ẹ́-fẹẹ̀ ló á diè bẹẹ tọ. Kátogóí, à ólò sièm kpóó ló kọ ḿ sí nònù. Nà dóm nè m̀m̀ íè kà lé gbaa ló vaá dia mm̀ fẹ́ẹ́-fẹẹ̀ ló kátogóí. M̀ gé ẹbmà dẽè tṍó e nà dóm é bã́ mm̀ kà kàí vaá zọ̀m fã̀ Jìhóvà.”

¹⁷ Nú ea beè naaá ló Yasmeen, zógè kọọ̀ “vulà náa ólò kõ̀òà. À ólò naa kọ nen á . . . ié ból dẽe sĩ́ nè ĩ̀ìmà nu m kọ̀láá kà di tõ̀ò.” (1 Kọ́r. 13:4, 7) Vulà palàge ié kói èlmà ọ́la. À ólò nyaaná nen. Vaá à ólò naa kọọ̀ nyíè Jìhóvà á ẹẹ. Sõò kọbèè à gá náa vaá gbò nen à ọvíi, èé láá kilsĩ́ gè ié ẹ́ẹ́ nyíe. Mósĩ́ deè e?

18. Éé ní ea náa vaá nyíéi é ẹ́ẹ tṍó e bà ọ́víi é?

¹⁸ Jíízọ̀s beè kọọ̀: “Nyíéi á ẹẹ tṍó e gbò nen gé ọ́víi.” (Lúùk 6:22, NW.) Náa ólò tànii kọ bàá ọvíi. Náa ólò leemái kọ bà bíìgèi ló boo béè nú e zigà ló. Vóà naa, éé ní ea é náa kọ nyíéi á ẹẹ tṍó e bà ọ́víi é? Bugi togó boo taà kà nú ea náa. Túá kà, nyíè Bàrì ólò ẹẹí ló tṍó e ĩimà. (1 Pít. 4:13, 14) Ní ea égè bàà kà, bẹẹ zìgà é kpáá palàge aga ló vaá dú lé. (1 Pít. 1:7) Ní ea égè taa, èé íe kpẽ́ e née é láá tú kpègè zalmá—ea dú dùm e bè náa tá.—Róm̀ 2:6, 7.

19. Éé ní ea beè naa kọọ̀ gbò tómá á ṍ kààgà tṍó e bà kpọ́va té ló é?

¹⁹ Ńkem̀ tṍó aa ló tṍó e Jíízọ̀s kẽeà aa kemà ú, gbò tómá beè ié íb ẹ́ẹ́-ẹẹ̀ nyíe ea géè ló bel kilma lóá. Ba beè ṍ kààgà tṍó e bà kpọ́va té ló, vaá kùbva kọ bàá gá kọná kpẹ̀a. Ló éé? Boo béè kọọ̀ “Bàrì bugieva naamàè gbò e bà bọ́e ló gè mònie tã̀àgà vaá tuaè kẹ́ẹ boo bée Jíìzọ̀s.” (Tóm 5:40-42) Vulè e bà íe kilma ló Nen Ea Íé va beè bọọ èl síìa pọ̀ ea aa bá pá ba gbò ọ́b. Ba beè zogè kọ bà íèè vulè tení dú ló gè “olòó nóòmà nu” nè ge vee lé kpẹ̀a. Gã́bug pá vígà dì e bà gé fã Bàrì mm̀ bọ́ọ̀ló dẹ̀lẹ̀ nyíé boo kèbá tàvàlà dìtõ̀ò. Bà nyímá kọọ̀ vulè e bà íèè kilma ló Jìhóvà nè tóm e bà síè neèe náa é táẹ́ nyíe.—Híb. 6:10.

20. Éé ní eé nó mm̀ togó bel ea bẽene níí ẽ́?

²⁰ Pá bàlà boo é ọ́víi kùbmà tṍó e di mm̀ pọ́lọ́ bàlà booí. (Jọ́ọ̀n 15:19) Sõò náa dú bíi kọ pọ̀ á siíi. Dì belí bé eé nó mm̀ togó bel ea bẽene níí naa, Jìhóvà ‘é síè kpóó ló vaá kpènà’ pá a gbò e bà bọ́ló dẹ̀lẹ̀ nyíé boo. (2 Tẹ̀s. 3:3) Vóà naa, naanii èé kilsĩ́ gè vùlè Jìhóvà, pá vígà, vaá vùlè nàgé gbò e bà ọ́víi. Tṍó e túù gbò dùùlà bá deè tṍí siimá tóm, gbaa ló é díí zẹ̀ẹ̀, vaá bẹẹ zìgà é aga ló, èé nveè ka ló Jìhóvà, vaá zogè kọọ̀ vulà palàge bọọ èlmà ọ́la.