1-2. Baatẽ́ bé e gbò nòòkúù Kpá Káí é láá palàge dúi bíi ló naa tṍó e bẹẹ dìtõ̀ò nyááá.

 DÓM nè va ólò palàge pãane tṍ ló lòbèl ílà dóm nè va deé e bà gé ílá. Gbò nòòkúu e bà ló bel boo mm̀ lòbèlá náa ólò dú ãa lóó va. Sõò lọl deeá ààmà, gbò nòòkúuá ólò gbóó kpáá palàge dú va bíi ló. Ló éé? Boo béè kọọ̀ bàé gbá siimá tóm belí dóm nè va.

² Níà bé ea dì nàgé naa tṍó e dóm nè va e bà gé nyoone nvéè Kráìst íe gbò pá nvín ẽ́. Besĩ́ bà kalá ié nvín, ba beè olòó dã́ gbò lòbèl ea kil ló bé e bàé láá bumá gbò pá nvín naa. Sõò kátogóí, gbò nòòkúuá é gbóó kpáá palàge dú va bíi ló. Bàé gbóó gé ié nvín e bàé búmá. Níà kà pọ̀bkà tóm ge sì! Mm̀ kà kà, sìgà dọ̀ Kpá Káí ólò palàge dúi bíi ló tṍó e bẹẹ dìtõ̀ò nyááá. Níì ene kà nu ea náa vaá gbò e bà gé fã Jìhóvà ólò bugi Kpá Káí vaá bugi togó boo nu ea di m belí bé e ba beè kọọ̀ gbò méné e bà gé bẹl Ízràẹ̀l á naa “dénè dee” mm̀ ba dùm naaá.—Dìt. 17:19.

3. Éé ní eé ló bel boo mm̀ nakà togó belí é?

³ Gbò tẹ̀ nè kà, ene kà zẹ̀ẹ̀ tóm ea palàge bọọ lọ̀l vaá à lee dì belí gbò nyòòne nvéè Kráìst, dú gè noomai bọọ gbò nvín nu ea kil ló Jìhóvà. Sõò ò gbĩ́ gè naanii elmai áá gè noomaí va gbò kà kà bel ea kil ló Bàrì. Ò gbĩ́ gè nveenii bá neí va kọ bàá palàge vùlèe. Éé ní eo é láá naanii kọbé bọọ gbò nvín palàge vùlè  Jìhóvà ẹ? Mm̀ nakà togó belí, èé ló bel boo ténì kà nòòkúù Kpá Káí ea é láá nvèè bá nè gbò tẹ̀ nè kà. (2 Tím. 3:16) Èé ló nágé bel boo bé e sìgà tẹ̀ nè kà a íe bélè lọl ló gè tú gbò nòòkúuí siimá tóm naa.

4. Mókà nòòkúu ní ea é láá nvèè bá nè gbò tẹ̀ nè kà kọ bàá naa kọọ̀ ba gbò nvín á vùlè Jìhóvà ẹ? (Jém̀z 1:5)

⁴ 1 Nòòkúu: Gbĩ́ tùle ea aa bá Jìhóvà. Bàn Jìhóvà kọ á neè ni nyìmànù kọbé ò láá nvèè bá nè pá o nvín kọ bàà vùlèe. (Bugi Jém̀z 1:5.) Ẹlẹ ní ea dú lé lọ̀l vaá à lee gè nèi dùùlà bá deè tṍ ẽ́. À íe gã́bug nu ea náa vaá è kọ́ vó. Bugi togó boo bàà kà. Túá kà, Jìhóvà ní ea dú tẹ̀ ea nyímá nu lọ̀l vaá à lee é. (Ps. 36:9) Ní ea égè bàà kà, dùùlà bá deè tṍ ea ne ólò dọ̀ bélè nèi.—Àìz. 48:17.

5. (a) Éé ní e bõ̀ònatõ̀ò Jìhóvà ni náa kọbé à nveè bá nè gbò tẹ̀ nè kà ẹ? (b) Dì belí bé ea di mm̀ vídiòá naa, éé ní eé láá nó lọl ló bé e Vígà Amorim nè a va beè bumá ba nvín naa ẽ́?

⁵ Jìhóvà ólò tú Kpá Káí, a bõ̀ònatõ̀ò, nè gbò kpá ea dẹẹ̀a boo Kpá Káí nvèèmà bá nè gbò tẹ̀ nè kà kọ bàá noòmà ba gbò nvín bé e bàé vulèèe naa. (Máát. 24:45) Dì belí nu dòòmà bá, òó láá mòn gã́bug dùùlà bá deè tṍ eo é síímá tóm kè kẽè togó bel ea kọ́ọ̀ “Help for the Family,” ea di mm̀ Awake! nè boo bẹẹ website. Nagé, gã́bug vídiò ea di boo jw.org é láá nvèè bá nè gbò tẹ̀ nè kà kọ bàá tú gbò dùùlà bá deè tṍ ea aa bá Jìhóvà nvèèmà bá nè ba gbò nvín. *—Pró. 2:4-6.

6. Mósĩ́ deè ní e tùle e Jìhóvà ne tenmá bá a bõ̀ònatõ̀ò tọ́á ló ene kà gbálà nè a va ẹ́?

⁶ Gã́bug tẹ̀ nè kà a kọ́ọ̀ nyíé va palàge ẹẹlìè ló nvèè bá e Jìhóvà neè va tení dú ló a bõ̀ònatõ̀ò. Ene kà gbálà ea bée kọlà Joe kọ́ọ̀: “Náa válí gè bumá taà kà nvín mm̀ kà kàí. Ńdáà va nè nda ólò tã̀àgã ló Jìhóvà kọ á nvèè bá nèi lee. Vaá è ólò mòn kọọ̀ ãa kpá nè vídiò ea dọ́ bàlà kẽ dú kà lèlà tṍó ea bọ́ló, boo béè kọọ̀ à nveè bá nèi ló  dìtõ̀ò e géè kpeesĩ́ ló. È ólò dẹ̀ẹ̀a boo gbò tùle ea aa bá Jìhóvà.” Joe nè a va mon kọọ̀ gbò kpá nè vídiòí gé nveè bá nè ba gbò nvín kọ bàá tõo bã ló Jìhóvà.

7. Éé ní ea náa vaá à dú bíi kọọ̀ gbò tẹ̀ nè kà á palàge ọẹ̀ dẽe ló láb e bàé lábví é? (Róm̀ 2:21)

⁷ 2 Nòòkúu: Zogè lé nu dòòmà bá. Gbò pá nvín ólò palàge ẹ̀b bé e ba gbò tẹ̀ nè kà gé náa nu naa vaá nó va. Mm̀ kà kà, tọ́ọ̀ kà tẹ̀ nè kà náa gbõoma. (Róm̀ 3:23) Kọbèè vó, à bọ́ló kọọ̀ gbò tẹ̀ nè kà á pììgà bé e ba kpóó sim tùlà naa gè dú lé nu dòòmà bá nè ba gbò nvín. (Bugi Róm̀ 2:21.) Ene kà gbálà beè kọ́ kilma ló gbò pá nvín kọọ̀: “Bà bélí sàpó ea ólò dùùlà múú nvea gbàà.” A beè kpáá kọọ̀: “Bàé kọ́ nèi tṍó e nu e kọ́ bàá naa dú kele ló nu e beele náà.” Vóà naa, be è gbĩ́ kọọ̀ bẹẹ gbò nvín á vùlè Jìhóvà, àé dú bíi kọ baala á mòn kọọ̀ beele palàge vùlèe.

8-9. Éé ní eo nóò lọl ló bel e Andrew nè Emma kọ́ ẹ́?

⁸ À íe gã́bug sĩ́deè e gbò tẹ̀ nè kà é láá noòmà ba gbò nvín kọ bàá vùlè Jìhóvà. Ene kà nvín ãa gbálà ea ni tóólá 17 gbáá ea bée kọlà Andrew kọ́ọ̀: “Nà tẹ̀ nè nà kà ólò noòmàm kọ à palàge dú bíi ge tã̀àgã ló Bàrì. Ńdáà tẹ̀ ólò zọ̀m tã̀àgã ló Bàrì kọ̀láá kà bílá dee, kọbèè nda beè tã̀àgã ló Bàrì lọ̀l. Bà ólò kẽeí nyíe kọọ̀: ‘Òó láá ló bel nè Jìhóvà gã́bug tṍó ea léémá ni.’ Vó náa kọ ḿ palàge nvèè ka ló gè tãagã ló Bàrì, vaá kátogóí m̀ ólò tã̀àgã ló Jìhóvà vaá ẹ̀bvie naamá Tẹ̀ ea vulèm.” Gbò tẹ̀ nè kà, ó gá ẹbvii tẹlẹí kẽ bé e bọọ vulè kilma ló Jìhóvà é láá tọá ló bọọ gbò nvín naa.

⁹ Bugi nagé togó boo nu dòòmà bá Emma. Ba tẹ̀ beè dé gã́bug kom gbẹẹ́ ból ba kà besĩ́ à kalá sọ̀va bá gbẹẹ́ kẽ. Emma kọ́ọ̀: “Gã́bug tṍó ńdáà kà náa beè ié kpègè, sõò à ólò kọ́ nèi nu ea kil ló bé e Jìhóvà ólò ẹ̀b nu ea kil ló pá a gyóòlo naa. Bé ea tõó dùm naa náa kọ ḿ àgala boo kọ à zigà naa vó. Gbò nu e ńdáà kà kọ́ ḿ naa, ní e ẹlẹ ólò naa ẽ́.” Éé ní e nóò lọl ló é? Gbò tẹ̀ nè kà é láá noòmà nuù ba gbò nvín tení dú ló ba lé nu dòòmà bá bã̀àna tṍó e dìtõ̀ò tavàlà.—Gàl. 6:9.

10. Mókà nèà deè ní e gã́bug tẹ̀ nè kà e bà dú Ízràẹ̀l beè ié gè zọ̀ọ̀mà ba gbò nvín loá bel é? (Dìtolónomì 6:6, 7)

¹⁰ 3 Nòòkúu: Olòó zọ̀ pá o nvín loá bel. Jìhóvà beè kọ́ nè pá Ízràẹ̀l deè kéléá kọ bàá olòó noòmà ba gbò nvín nu ea kilìèé ló. (Bugi Dìtolónomì 6:6, 7.) Ba beè ié gã́bug tṍó e bàé láá zọ̀ọ̀mà ba gbò nvín loá bel vaá nvèèmà bá nè va kọ bàá vùlè Jìhóvà lọl mm̀ ba nyíe. Dì belí nu dòòmà bá, ńkem̀ nvín págbálà ea dú Ízràẹ̀l é láá nvèè bá tú gã́bug tṍó zọ̀ọ̀mà a tẹ̀ fó nu àbèè ge toolá nu e bà lọl ól kilma be. A vígà pábia é láá tú gã́bug tṍó zọ̀ọ̀mà a kà lò kàn àbèè ge sí dõòna kà gbò tóm tọ. Gbò tẹ̀ nè kà nè ba gbò nvín é láá loá bel boo gã́bug nú ea dú bíi tṍó e bà gé gbá siá tóm. Dì belí nu dòòmà bá, bàé láá ló bel boo bé e Jìhóvà dú lé naa, nè bé ea gé nveè bá nè pá ba tọ naa.

11. Mó tṍó ní e gbò tẹ̀ nè kà é láá zọ̀ọ̀mà ba gbò nvín loá bel é?

¹¹ Dùm kpáá palàge tàvàlà kátogóí. Mm̀ gã́bug dó, zivè dee ólò tení vaá gbò tẹ̀ nè kà náa é íe tṍó ge zọ̀ọ̀mà ba  gbò nvín loá bel. Gbò tẹ̀ nè kà é láá di ól tóm vaá ba nvín dí tọọ̀ kpá. Boo béè vó, gbò tẹ̀ nè kà é íè ge gbĩ́ gbò nèà deè e bàé zọọmà ba gbò nvín loá bel. (Ẹ́fẹ. 5:15, 16; Fíl. 1:10) Fã̀ pá tọ dú enè sĩ́deè ge naamá vó. Ene kà nvín ãa gbálà ea bée kọlà Alexander kọ́ọ̀: “Ńdáà tẹ̀ ólò noo tṍó gè ié fã̀ pá tọ, vaá náa ólò zìgà kọọ̀ tọ́ọ̀ kà nu á kpega deè. Tṍó ea ni íná kùbmà, è ólò gbóó loá sọ́l.”

12. Éé ní ea bọ́ló kọọ̀ nen ea dú togó boo tọ á sẹ̀ẹ̀a bùlà tṍó e bà íe fã̀ pá tọ ẹ́?

¹² Be ò dúù togó boo tọ, éé ní eo é láá naa kọbéè fã̀ pá tọ kpé ló bọọ gbò nvín ẽ́? Òó láá zọ̀ pá o nvín noá ãa kpá ea kọlà Dé Kpéè Ló Dùm Dọ̀ọ̀mà Dè-dè! Àé náa kọ ó ié kà lé nèà deè ge zọ̀ọ̀mà va loá sọ́l. Ò gbĩ́ì kọọ̀ pá o nvín á kọ́ gbò nu ea tãagẽ́ va nè ni, vóà naa ó gá tú tṍó fã̀ pá tọ bèlmà va bel ló. Vaá ó gá nvèè súng beè pá o nvín ló gbò bel e náa gbááá ló gbò nòòkúù Kpá Káí. Tãa vó, nyíé ni á ẹẹ kọ bà kọ́ bé e nu tọ́a vá ló naa, vaá ò síè va kpóó ló kọọ̀ pọ̀ á gá sií va gè kọ́ ba bùlà. Áá tṍó eo nyímà bé e nu tọ́á ló pá o nvín naa ní eo é láá palàge nvèè bá nèva ẹ́.

13. Mókà dõòna kà gbò nèà deè ní e gbò tẹ̀ nè kà é láá nvèèmà bá nè ba gbò nvín kọ bàá tõo bã ló Jìhóvà ẹ?

¹³ Gbò tẹ̀ nè kà, gbĩi gbò nèà deè eo é nveemai bá nei bọọ gbò nvín buù dee kọ bàá tõo bã ló Jìhóvà. Ó gá elá bànà kọọ̀ áá tṍó eo gé nóòmà va Kpá Káí ní eo é nóòmà va kọ bàá vùlè Bàrì e. Lisa kọ́ọ̀: “E beè noòmà bẹẹ gbò nvín nu ea kil ló Jìhóvà tení dú ló gbò nu ea beè dèm. Dì belí nu dòòmà, tṍó e bẹẹ gbógó náa nuù mang nè bẹẹ gbò nvín, è ólò kọ́ nèva kọọ̀ Jìhóvà dú Bàrì ẹ́ẹ́ nyíe, vaá à gbĩ́ kọọ̀ nyíè beele á ẹẹ nagé.”

14. Éé ní ea náa à dú bíi kọọ̀ gbò tẹ̀ nè kà á nvèè bá nè ba gbò nvín kọ bàá bã̀àà lé kóò e? (Próvẹẹ̀b 13:20)

¹⁴ 4 Nòòkúu: Nvèè bá nè pá o nvín kọ bàá bã̀àà lé kóò. Moǹ bel Bàrì tẹ́lẹ bàlà  kẽ kọọ̀ kóò e bãaà é láá naa kọ é dú lé àbèe pọ́lọ́. (Bugi Próvẹẹ̀b 13:20.) Gbò tẹ̀ nè kà, é kọ ò nyímàì ló kóò bọọ gbò nvín? É kọọ̀ o beè mòn va vaá zọ̀ va loá sọ́l? Éé ní eo é láá naa mm̀ ge nvèèmà bá nè pá o nvín kọ bàá bã̀àà kóò gbò e bà vulè Jìhóvà ẹ? (1 Kọ́r. 15:33) Òó láá nvèè bá nèva kọ bàá bã̀àà lé kóò tení dú ló gè kolí gbò e bà gé náa leevè mm̀ bõ̀ònatõ̀ò kọ bàá zọ̀ pá o tọ naaá nu mm̀ kele-kele sĩ́deè.—Ps. 119:63.

15. Éé ní e gbò tẹ̀ nè kà é láá naa mm̀ ge nvèèmà bá nè ba gbò nvín kọ bàá bã̀àà lé kóò e?

¹⁵ Bugi togó boo nu dòòmà bá ene kà gbálà ea bée kọlà Tony. À kọ́ nu e ẹlẹ nè a va beè naanìè mm̀ ge nvèèmà bá nè ba gbò nvín kọ bàá bã̀àà lé kóò, à kọ́ọ̀: “Mm̀ gã́bug gbáá e pálaa bẹ̀ì ni búmá bẹẹ gbò nvín, è ólò kolí pá vígà e bà di mm̀ ba deè ãa nè gbò e ba ni dú kànen mm̀ dee domá bẹẹ be. Bà ólò zọ̀i deá nu vaá ié fã̀ pá tọ. Níì kà lé sĩ́deè ge nyimá ló gbò e bà vulè Jìhóvà vaá tú ẹ́ẹ́ nyíe fã̀àmàe. E beè ié gbò kùdẽe ló sẹ́kiùt, gbò e bà ólò kọ́ kpẹ̀a aa dó dọ dó, nè dõòna gbò e bà ólò tõó bẹẹ be. Gbò nu e ba beè tení bá, ba bẹ̀à sã́ bùlà, nè ba gè tú lòó vaamá gyọ́ beè palàge nvèè bá nè bẹẹ gbò nvín vaá naa kọ bàá tõo bã ló Jìhóvà.” Gbò tẹ̀ nè kà, piigaí boo gè nveenii bá nei bọọ gbò nvín kọ bàá bã̀àà lé kóò.

16. Éé ní eo é náa be o nvín kọ́ náa é fã nàè Jìhóvà ẹ?

¹⁶ Èé kọ́ vàẹ beè ene kà ea di zẹ̀ẹ̀ pá o nvín kọ náa é fãè Jìhóvà kọ̀láá bé eo piigà naa ẽ́? Ó gá tuumá kọ nóo láà bumàè o nvín. Jìhóvà beè nè dì pọ́ì buù bẹ̀ì kọ é sà be èé fãèe àbèè née é náa vó. Beè o nvín bééláfùl ge òòà aa ló Jìhóvà, ó gá pee bùlà boo béè kọọ̀ enè dee, àé beè láá òòa kẽ dù. Bugi togó boo nu dòòle ló ea kil ló nvín pèè gyọ́. (Lúùk 15:11-19, 22-24) Nvín pèè gyọ́í beè sí gã́bug pọ́lọ́, sõò  dee deè nvée, a beè òòa kẽ. Sìgà gbò é láá kọọ̀, “Níà beè nu dòòle ló. É kọ àé láá naaá gé bàlà kẽ?” Ẽei, àé láá naaá! Kàsĩ́, níà nu ea beè naaá ló ene kà nvín ãa gbálà ea bée kọlà Elie e.

17. Mósĩ́ deè ní e nu dòòmà bá Elie síè ni kpóó ló é?

¹⁷ Elie kọ́ kilma ló a tẹ̀ nè a kà kọọ̀: “Ba beè pììgà ge nvèè bá nèm kọ ḿ vùlè Jìhóvà nè a Moǹ Bel ea dú Kpá Káí. Sõò m beè dààmà togó gè lọ̀l va togó kèbá tṍó em tóòlà òb nè sìgà gbáá.” Elie beè dààmà togó gè gũá sí pọ́lọ́, vaá kìn dénè nvèè bá ea tẹ̀ nè a kà née ea kil ló ge fã̀ Bàrì. Tṍó ea aa be, a beè bã mm̀ pọ́lọ́ dùm. Kọbèè vó, à ólò zọ̀ ene kà a kóò loá sọ́l boo Kpá Káí sìgà tṍó. Elie kọ́ọ̀: “Bé em gé ló bel ea kil ló Jìhóvà nè nà kóò naa, níà bé em kpáà bugi togó boo Jìhóvà naa ẽ́. Ńkem kem, gbò ból súú kà kà bel e ńdáà tẹ̀ nè ńdáà kà beè fó mm̀ nà nyíeá beè gbóó dààmà togó gè bọọ.” Elie beè òòa kẽ bã mm̀ kà kàí tṍó e tṍó téní. * Nyíè a tẹ̀ nè a kà beè palàge ẹẹ kọ ba beè piigàẹ̀ boo gè noomàèe nu lọl pá nvín kọ á vùlè Jìhóvà!—2 Tím. 3:14, 15.

18. À ólò tọá ní ló naa vàẹ tṍó eo monì gbò tẹ̀ nè kà e bà gé palàge nvèè bá nè ba gbò nvín kọ bàá vùlè Jìhóvà ẹ?

¹⁸ Gbò tẹ̀ nè kà, Jìhóvà tú tóm ea palàge bọọ nvèèí bá, ea dú gè bumá ãa gbò e bàé fã́e dì deèsĩ́. (Ps. 78:4-6) Níì kem̀ tóm nì, vaá è leelài ló bọọ pììgà ge nveenii bá nei bọọ gbò nvín! Be ò kilíí sĩ́ gè naanii dénè nu e bọọ kpóó sim tùlà ge nveenii bá neí va kọ bàá vùlè Jìhóvà, òó láá agalaí boo kọọ̀ nyíè bẹẹ Tẹ̀ ea di káála ea vulèi é palàge ẹẹ.—Ẹ́fẹ. 6:4.