1. Mósĩ́ deè ní e Kpá Káí baatẽ́ kà-kà vulà ẹ?

 ‘SÃ́ EA aa ló [vulè] gé bẹ́, vaá níà sã́ ea aa bá Jáà. Kpoò múú ea gé tóbví náa é láá naa kọọ̀ vulè á iná kùbmà, vaá múú ea gé gbálá náa é láá gbalẹ̀ ààmà.’ b (Sọ́l Sól. 8:​6, 7) Ẹ̀b bé e níí dú kà lé sĩ́deè ge bààmà tẽ́ kà-kà vulà naaà! Gbò belí náa kọ gbò e ba ní ílá á agala boo kọọ̀: Bàé láá ié vulè e náa é íná kùbmà kilma ló ene.

2. Éé ní ea bọ́ló kọọ̀ dóm nè va á naa kọbé ba vulà náa ọb tọ́ọ ẹ́?

² Kọbé dóm nè va láá ié vulè e náa é íná kùbmà, àé dú bíi kọ bàá kilsĩ́ gè vùlè ene. Dì belí nu dòòmà bá, sã́ e bà gé zugà é kilsĩ́ gè bẹ̀​—be bà ólòó kpaagá. Sõò be bà náa kpáágá, àé gímí. Mm̀ tẽ̀ènè sĩ́deèá, vulè ea di zẹ̀ẹ̀ dóm nè va é kilsĩ́ gè agabá​—be bà ólòó naa gbò nú ea é agẹlẹ ló ba gbaa ló. Sìgà tṍó, àé láá tõó ló dóm nè va kọọ̀ bà náa láà vulè nàè ene belí bé e ba beè olòó vùlà naa, bọọ èlmà tõ̀ò tṍó e bà kpeesĩ́ ló nání bá, zọ̀ ló, àbèè tã̀àgã̀ ea dú ló gè bumá gbò pá nvín. Vóà naa, be o ílí àbèè ge iá, mósĩ́ deè ní eo é láá naa kọọ̀ sã́ ea aa bá Jáà á kilsĩ́ gè bẹ́ mm̀ bọọ ílà dóm nè vaẹ́? Mm̀ nakà togó belí, èé ló bel boo taà sĩ́deè eo é láá naa kọọ̀ bọọ ílà dóm nè va á agaló kọbé ò íei ẹ́ẹ́-ẹẹ̀ nyíe. c

3. Mósĩ́ deè ní e gè ié kà lé gbaa ló kilma ló Jìhóvà ólò nvèè bá nè dóm nè va kọ bàá kilsĩ́ gè vùlè ene ẽ́? (Ẹ̀klìzíástìs 4:12) (Ẹ̀b nàgé fòtó.)

³ Kọbé “sã́ ea aa bá Jáà” kilsĩ́ gè bẹ̀, à dú bíi kọọ̀ dóm nè va á agẹlẹ ló ba gbaa ló kilma ló Jìhóvà. Mósĩ́ deè ní e ge naa vó é láá nvèè bá nè ba ílà dóm nè va ẹ́? Tṍó e dóm nè va nveè ka ló gbaa ló e bà íe kilma ló ba Tẹ̀ ea di káála, bà ólò di kpènà ló gè tú a dùùlà bá deè tṍ siimá tóm, vaá gbò dùùlà bá deè tṍí ólò naa kọ bàá láá bé èlbá gbò tã̀àgã̀ ea gáẹ̀ naa kọọ̀ bàá gá vùlè nà ene. (Bugi Ẹ̀klìzíástìs 4:12.) Gbò e bà íe kà lé gbaa ló kilma ló Jìhóvà ólò pììga boo gè nóe vaá ié gbò a kpãa, dì belí lé láb, ĩ̀ìmà, nè ge ia ló pọ́lọ́. (Ẹ́fẹ. 4:32–5:1) Tṍó e dóm nè va íe gbò kpãaí, à ólò naa kọ á valí vá ló gè vùlè ene. Ene kà vígà pábia ea bée kọlà Lena, ea beè iá dóm mm̀ nú ea sígá ló 25 gbáá kọ́ọ̀, “À ólò valí gè vùlè vaá fã̀ dẽè nen ea sííá pọ̀ ló Jìhóvà.”

4. Éé ní ea náa vaá Jìhóvà beè sà Jósẹ̀f nè Mérì kọ bàá dú tẹ̀ nè kà Mèzáíà ẹ?

⁴ Bugi togó boo ene kà nu dòòmà bá ea di mm̀ Kpá Káí. Tṍó e Jìhóvà géè sà tẹ̀ nè kà e bàé ẹb nú ea kil ló Mèzáíà, a beè sà Jósẹ̀f nè Mérì lọl gbàà gã́bug gbò e bà dú mana-mana Dévìd. Ló éé? Boo béè kọọ̀ ba beè ié kà lé gbaa ló kilma ló Jìhóvà, vaá Jìhóvà beè nyimá kọọ̀ bàé tú gè fã̀e naamá túá kà nu mm̀ ba ílà dóm nè va. Dóm nè va, éé ní eo é láá noi lọlíí ló Jósẹ̀f nè Mérì e?

5. Éé ní e gbò dóm é láá nó lọl ló Jósẹ̀f e?

⁵ Jósẹ̀f beè olòó tú tùle ea aa bá Jìhóvà siimá tóm, vaá níí beè naa kọ á dú kà lé dóm. Be à sẹlẹ, àé láá dú taà tóm e Bàrì beè nèe tule ea kil ló pá a tọ. Buù tṍóá, a beè vàlẹ̀ bá naa nú ea kọ́, bã̀àna tṍó ea beè tàvàlàẹ́ ló. (Máát. 1:​20, 24; 2:​13-15, 19-21) Ge gbàntṍ ló tùle ea aa bá Bàrì beè naa kọọ̀ Jósẹ̀f á kpènà Mérì, vaá ẹ̀b nú ea kilíé ló. Dòòmà dẽe ló bé e láb Jósẹ̀f beè naa kọọ̀ Mérì á palàge fã̀e dẽe vaá vùlèe naa! Gbò dóm, òé láá noi Jósẹ̀f tení dú ló gè tui gbò dùùlà bá deè tṍ ea di mm̀ Kpá Káí siimai tóm tṍó eo gé ẹbvii nú ea kil ló pá bọọ tọ. d Tṍó eo túù gbò dùùlà bá deè tṍí siimá tóm, kọbèè tṍó ea tàvàlà, ò zógè kọọ̀ ò vulè o va, vaá àé agẹlẹ ló bọọ ílà dóm nè va. Ene kà vígà pábia ea di Vanuatu, ea beè iá dóm mm̀ nú ea sígá ló 20 gbáá kọ́ọ̀: “Tṍó e ńdáà dóm tú tùle ea aa bá Jìhóvà siimá tóm, m̀ ólò palàge fã̀e dẽe. M̀ ólò dẹlẹ nyíé boo a béèlàfùl vaá lóóm ólò dĩ̀ìnà.”

6. Éé ní e gbò va é láá nó lọl ló Mérì e?

 ⁶ Mérì beè ié kà lé gbaa ló kilma ló Jìhóvà; a zìgà náa beè dẹẹa boo nú e Jósẹ̀f náa. A beè palàge nyimá Kpá Káí. (Ẹ̀b study note ea di ló kpá Lúùk 1:46.) A beè ie nágé tṍó gè bùgmà togó boo gbò nu ea nó. (Lúùk 2:​19, 51) Mm̀ kà-kà, lé gbaa ló e Mérì beè ié kilma ló Jìhóvà beè naa kọ á dú kà lé va. Deè nieí, gbò va ólò pììga boo gè nó Mérì. Dì belí nu dòòmà bá, ene kà vígà pábia ea bée kọlà Emiko kọ́ọ̀: “Tṍó em gáà beè ia dóm, m beè olòó nó nu boo nà lóó. Sõò tṍó em íà dóm, boo béè kọọ̀ ńdáà dóm ní ea ólò tã̀àgã ló Bàrì vaá sẹlẹ fã̀ pá tọ é, nà zìgà beè gbóó dẹẹa boo áá gbò nú e ẹlẹ náa. M beè gbóó mòn kọ à dú bíi kọọ̀ nda á naa gbò nú ea é náa kọọ̀ nà gbaa ló kilma ló Jìhóvà á aga ló. Kátogóí, m noo tṍó em é tãagã ló Bàrì, bugi Kpá Káí, vaá bugi togó gbò nu em bugì.” (Gàl. 6:5) Gbò va, be ò kilíí sĩ́ gè agẹlẹi ló bọọ gbaa ló kilmaí ló Jìhóvà, bọọ gbò dóm é mon nú e bàé élá boo lèèlài vaá vùlèi.​—Pró. 31:30.

7. Éé ní e dóm nè va é láá nó lọl ló Jósẹ̀f nè Mérì ea kil ló gè gbá fã̀ Bàrì e?

⁷ Jósẹ̀f nè Mérì beè gbá naa nagé kọọ̀ ba gbaa ló kilma ló Jìhóvà á aga ló. Ba beè dã́ból ló bé e gè gbá fã̀ Jìhóvà dì belí pá tọ dú bíi naa. (Lúùk 2:​22-24, 41; 4:16) A beè láá tàvàlà ge naa vó, bọọ èlmà tõ̀ò tṍó e bà íe gbò pá nvín, sõò ba beè pììga boo gè naa vó. Níà kà lé nu dòòmà bá nè gbò dóm nè va deè nieí! Be o íei gbò pá nvín belí Jósẹ̀f nè Mérì, àé láá tàvàlàí ló gè sí nònù àbèè ge noo tṍó eo é sẹẹmai fã̀ pá tọ. Kàsĩ́, àé láá tàvàlàí ló gè noo tṍó eo é nóomai nu àbèè ge gbá tã̀àgã ló Bàrì belí dóm nè va. Sõò kẽ̀èa boo kọọ̀ tṍó eo gbáì fãi Jìhóvà, àé náa kọ ó tõonii bãí ẽ́ ló vaá tõo bã ló ene. Vóà naa, tui gè fãi Bàrì naamai bọọ nu sẹ̀ẹ̀a sĩ́.

8. Éé ní e dóm nè va e tã̀àgã̀ bã́ vá zẹ̀ẹ̀ é láá naa kọbé bà kpáá ié bélè lọl ló ba fã̀ pá tọ ẹ́?

⁸ Vaá beè tã̀àgã̀ bã́ zẹ̀ẹ̀ bọọ ílà dóm nè vaà? Náa é tan pálaa bọ̀ì ge gbá noá nu. Be à meà naa vó, òé láá daamaí togó tení dú ló gè naanii nú ea ólò leemá pálaa bọ̀ì, di belí nu e pálaa bọ̀ì beè gbĩi gè loi bel boo. Ge naa vó é láá agẹlẹ ló bọọ gbaa ló, vaá naa kọ ó kpáá iei tàn ge noi nu ea kil ló Jìhóvà dì belí dóm nè va.

9. Éé ní ea náa vaá à dú bíi kọọ̀ dóm nè va á noo tṍó dììma ló ene ẽ́?

⁹ Dóm nè va, òé láá kilíí sĩ́ gè naanii kọọ̀ vulè eo íèì kilmaí ló ene á agaló tení dú ló gè noonii tṍó diimaí ló ene. Be ò naanii vó, òé nyímai bé e buù nen bugi togó naa nè bé e nu tọ́á ló ene naa. (Jén. 2:24) Nvèè kpíi ló nú e Lilia nè Ruslan e ba beè ilá mm̀ nú ea sígà ló 15 gbáá ea kil nvéeá beè mòn tṍó e bà ã́àa ilá lọ̀l. A va kọ́ọ̀: “E beè gbóó mòn kọọ̀ née é láá ié gã́bug tṍó dììma ló ene belí bè e beè bugi togó naa. Tóm e ólò sì nè tóm mm̀ tọ beè tú gã́bug bẹẹ tṍó, vaá tṍó e tṍó téní gbò pá nvín beè gbóó bã gbàà. E beè mòn kọọ̀ be née íè tṍó nè ene, àé náa kọ é tõó kpã́á aa ló ene.”

10. Mósĩ́ deè ní e dóm nè va é láá tú nòòkúu ea di mm̀ kpá Ẹ́fẹsọ̀s 5:​15, 16 siimá tóm ẽ́?

¹⁰ Éé ní e dóm nè va é náa kọbé bà láá ié tṍó dììma ló ene ẽ́? À dú bíi kọ bàá noo tṍó dììma ló ene. (Bugi Ẹ́fẹsọ̀s 5:​15, 16.) Ene kà vígà págbálà ea bée kọlà Uzondu ea dú Nigeria kọ́ọ̀: “Tṍó em gé noo gbò nú em é náa, m̀ ólò noo nagé  tṍó e ńdáà va nè m̀m̀ é diima ló ene, vaá m̀ ólò tú tṍóá kolmá nu.” (Fíl. 1:10) Bugi togó boo bé e Anastasia, ea dú vaà ene kà neǹ kùdẽe ló sẹ́kiùt ea di Moldova, beè tú a tṍó siimá tóm leevè naa. À kọ́ọ̀: “M̀ ólò pììgà boo gè naa gbò nú ea bọ́ló kọ ḿ naa tṍó e ńdáà dóm gé sí gbò tóm ea dìé bá. Tṍó e náà vó, è ólò gbóó láá ié tṍó eé dììma ló ene.” Sõò, èé kọ́ vàẹ beè tóm ea dìí bá náa kọ á tàvàlàí ló ge noo tṍó dììma ló ene ẽ́?

11. Mókà tóm ní e Àkílà nè Presélà géè gbá sìe?

¹¹ Dóm nè va é láá nó nu dòòmà bá Àkílà nè Presélà, e gã́bug pá vígà mm̀ túá gbò gbááá beè palàge vùlèa. (Róm̀ 16:​3, 4) Náa kal ló béè kọọ̀ Kpá Káí náa kọ́ gã́bug nu ea kil ló ba ílà dóm nè va, à tẹlẹ bàlà kẽ kọọ̀ ba beè gbá siá tóm, kọ́ kpẹa, vaá nvèè bá nè dõona gbò. (Tóm 18:​2, 3, 24-26) Kàsĩ́, Kpá Káí ólò gbá kolí béè pálaa ọ̀và tṍó ea gé kọ́ nu ea kil vá ló.

12. Éé ní é dóm nè va é náa kọbé bà láá tú gã́bug tṍó diima ló ene ẽ́? (Ẹ̀b nàgé fòtó.)

¹² Mósĩ́ deè ní e gbò dóm nè va é láá nó nu dòòmà bá Àkílà nè Presélà ẹ? Bugi togó boo gbò nú ea dú bíi kọọ̀ o dóm nè ọ̀ọ̀ ó gbai naanii. É kọọ̀ òé láá gbai siai tóm dì belí dóm nè va, tãa vó e buù nen sí ńlẹ? Dì belí nu dòòmà bá, Àkílà nè Presélà beè olòó gbá kọ́ kpẹa. É kọ ò ólò noonii tṍó eo é gbai kọi kpẹa? Àkílà nè Presélà beè olòó gbá siá nágé tẽ̀ènè kà tóm. Be à sẹlẹ, o va nè ọ̀ọ̀ nóo gé síi tẽ̀ènè íb tóm, sõò é kọọ̀ òé láá gbai siai tóm gbẹá tọ? (Ẹ̀klì. 4:9) Tṍó eo gbáì siai tóm, òé dii ló ene vaá òé íei nèà deè ge loomai sọ́l. Robert nè Linda beè ilá mm̀ nú ea é sígá ló 50 gbáá. Robert kọ́ọ̀: “Mm̀ kà-kà, née ólò ié gã́bug tṍó gè gbá bìlà bíl. Sõò, nyíém ólò palàge ẹẹ tõó em lógì bọ́lì vaá ńdáà va à õ̀ònà ló, àbèè kọ m̀ di ke dẹi em gé gbaa víl vaá à dù gé zọ̀m gbaa. Ge gbá naaá nu ólò naa kọ é tõo bã ló ene. Bẹẹ vulà ólo kilsĩ́ gè bọọ dọ ló.”

13. Kọbé dóm nè va láá gbaaá ló, éé ní ea bọ́ló kọ bàá naa ẽ́?

¹³ Kẽ̀èa boo kọọ̀, áá gè kọọ̀ dóm nè va gbá di tẽ̀ènè ketõ̀ò náa é náa kọ bàá palàge dũ̀ùà bã ló ene. Ene kà ńnváá ea ólò tõó Brazil kọ́ọ̀: “Gã́bug nú ea é láá maanái bùlà tọla kẽ deè nieí, vaá èé láá tuuma kọọ̀ è ólò tú gã́bug tṍó dììma ló ene boo béè kọ è di tẽ̀ènè kà tọ. Nda monì kọ à dú bíi kọọ̀ ḿ zọ̀ nà dóm loá bel vaá nyimá bé e nu tọ́aẹ́ ló naa, níì áá gè zọ̀ẹ dia tọ nì. Vaá à dú nágé bíi kọ ḿ naa gbò nú ea biíe.” Nvèè kpíí ló bé e Bruno nè a va ea bée kọlà Tays, ólò piiga boo gè mòn kọ bà túè gã́bug tṍó loomàè sọ́l naa. À kọ́ọ̀: “Tṍó e gbĩ́ gè loá sọ́l, è ólò  tú bẹẹ fóòn lọá bá kọbé è láá palàge dé kpéè ló bẹẹ loa sọ́l.”

14. Éé ní e dóm nè va é láá naa be bà náa dé kpéè ló tṍó e bà diima ló ene ẽ́?

¹⁴ Sõò be náa ólò leemá o va nè ọ̀ọ̀ ge gbai naaá nuà? Be à sẹlẹ, àé láá dú kọọ̀ tẽ̀ènè íb nu náa ólò leemái àbèè kọọ̀ ò ólò naanii nuù súng nei ene. Éé ní eo é láá naanii ẽ́? Bugi togó boo sã́ gè zùgà e beè kọ́ nú ea kil lóá. Túá ból, náa ólò palàge bẹ̀. Àé dú bíi kọ bàá kilsĩ́ gè tú báà-báà kã́áni nvee dẽe kọbé à palàge bẹ̀. Mm̀ tẽ̀ènè sĩ́deèá, òé láá olòó tui ńkem̀ tṍó diimai ló ene buù dee. Piigai boo gè naanii nú e pálaa bọ̀ì é dé kpéè ló, níì nú ea é man kana nì. (Jém̀z 3:18) Be ò náa nii ńkem-kem, bọọ vulè é láá kpáá bọọ dọ̀ ló.

15. Éé ní ea náa vaá à bọ́ló kọọ̀ dóm nè va á fã̀ dẽè ene ẽ́?

¹⁵ Fã̀ dẽe palàge dú bíi mm̀ ílà dóm nè va. Èé láá tú doolé ló fọ́ọ́lọ́ ea ólò naa kọọ̀ sã́ á kilsĩ́ gè bẹ̀. Kĩée e fọ́ọ́lọ́ á gé, sã́ ólò gbẹá boo gimí. Mm̀ tẽ̀ènè sĩ́deèá, beè dóm nè va náa fã dẽè ene, vulè e bà ié kilma ló ene é láá vàlẹ̀ bá ọ̀b tọ́ọ. Sõò, beè dóm nè va piiga boo gè fã̀ dẽè ene, àé náa kọọ̀ ba vulè á kilsĩ́ gè bọọ dọ ló. Kẽ̀èa boo kọọ̀, níì ge tuumá kọ ò fãè dẽe o dóm àbèè o va ní ea dú bíi é nì, sõò o dóm àbèè o va á nyimá kọ ò fãèe dẽe. Penny nè Aret e baa ni ílà mm̀ nú ea é sígá ló 25 gbáá kọ́ọ̀: “Ge kọọ̀ è palàge fã̀ dẽè ene náa kọ é palàge vùlè ene. Lóói ólò taaá gè kọ́ bé e nu tọ́aí ló naa nè ene boo béè kọọ̀ è nveè ka ló bé e buù nen ẹb nu naa.” Vóà naa, éé ní eo é láá naa kọbé o dóm àbèè o va nyímá kọ ò fãèe dẽe ẽ́? Bugi togó boo nu dòòmà bá Ébràhàm nè Sérà.

16. Éé ní e gbò dóm é láá nó lọl ló nu dòòmà bá Ébràhàm ẽ? (1 Pítà 3:7) (Ẹ̀b nàgé fòtó.)

¹⁶ Ébràhàm beè fã̀ dẽè Sérà. A beè bugi togó boo a lọ̀ọ̀gà bùlà vaá fã̀ dẽè bé e nu tọ́aẹ́ ló naa. À íe tṍó e nyíè Sérà beè palàge bììlà naa ní ea tú súng loomá bel nè Ébràhàm vaá kọọ̀ nú ea nááá dúé bá. É kọọ̀ Ébràhàm beè pomíé ló vaá ló pọ́lọ́ bel nèe? Ẽ́èe. A beè nyimá kọọ̀ a vaà Sérà ólò fãèe dẽe vaá nvèè sãa kúm gbò a béèlàfùl. Ébràhàm beè pãanée tṍ ló vaá piiga boo gè kpoogè dee ló tã̀àgã̀a. (Jén. 16:​5, 6) Éé ní e níí nóòmài ẽ́? Gbò dóm, boólo ní ea lela ló gè nè béèlàfùl mm̀ bọọ tọ ẹ́. (1 Kọ́r. 11:3) Sõò, àé palàge dú lé be ò zẹ́ẹ́ bugi togó boo lọ̀ọ̀gà bùlà o va besĩ́ ò kalá nè béèlàfùl, bọọ èlmà tõ̀ò kilma ló nú ea é tọ́aẹ́ ló. (1 Kọ́r. 13:​4, 5) Sìgà tṍó, o va é láá ié tã̀àgã̀ bùlà naa ní ea é dú bíi kọ á kọ́ bé e nu tọaé ló naa. É kọ ò ólò fã̀ dẽè bé e nu tọ́aẹ́ ló naa  tení dú ló gè palàge pãanée tṍ ló? (Bugi 1 Pítà 3:7.) Angela nè Dmitry a ílá mm̀ nú ea é láá dú 30 gbáá. Angela baatẽ́ bé ea dóm ólò fãèe dẽe naa, à kọ́ọ̀: “Dmitry ólò di kpènà ló gè pãaném tṍ ló tṍó e nyíém biilà àbèè tṍó em gbĩ́ ge dõogẽ ló bel. À ólò ié ĩ̀ìmà bààna tṍó em túù bá kpóó lóómá bel.”

17. Éé ní e gbò va é láá nó lọl ló nu dòòmà bá Sérà ẹ? (1 Pítà 3:​5, 6)

¹⁷ Sérà beè fã̀ dẽè Ébràhàm tení dú ló gè nvèè sãa kúm gbò a béèlàfùl. (Jén. 12:5) À íe tṍó e Ébràhàm beè kolí kyáà gbò e bà náa géè ẹ̀bmà dẽe. A beè kọ́ nè Sérà kọ á aaló nu ea géè naa gé naa gyã́á. (Jén. 18:6) Sérà beè nvèè sãa kúm béèlàfùl a dóm vaá gbẹá boo naa nú ea kọ́. Gbò va, òé láá noi Sérà tení dú ló gè nveenii sãa kúm béèlàfùl bọọ gbò dóm. Be ò náanii vó, àé agẹlẹ ló bọọ ílà dóm nè va. (Bugi 1 Pítà 3:​5, 6.) Dmitry, e beè kọ́ nú ea kil lóá baatẽ́ bé ea va ólò fãèe dẽe naa. À kọ́ọ̀: “Nyíém palàge ẹẹ ló bé e Angela ólò nvèè sãa kúm nà béèlàfùl naa, kọbèè tṍó e nà béèlàfùl náa gbááá ló a bùlà. Náa ólò kọ́m bel bã̀àna tṍó e lé nu náa aa mm̀ nà béèlàfùl.” Ẹ̀b bé ea válí gè vùlè nen ea fã́ ni dẽe naaà!

18. Mókà bélè ní e dóm nè va é ié be bà kilsĩ́ gè vùlè ene ẽ́?

¹⁸ Deè nieí, Sétàn gbĩ́ gè naa kọọ̀ vulè ea di zẹ̀ẹ̀ dóm nè va e bà gé nyoonè nvéè Kráìst á ọ̀b tọ́ọ. À nyímá kọọ̀ beè dóm nè va náa vulè na ene, bàé láá òòà aa ló gè fã̀ Jìhóvà. Sõò kà-kà vulà náa ólò ọ̀b tọ́ọ! Vóà naa, naa kọọ̀ vulà ea di zẹ̀ẹ̀ bọọ ílà dóm nè va á belí ní e kpá Sọ́l Sólomòn kọ́ nú ea kil lóá. Beeláfùl ge tú Jìhóvà naamá túá kà nu mm̀ bọọ ílà dóm nè va, iei tṍó nei ene, bugii togó boo bé e nu tọ́á ló ene naa, vaá ò bulai nú ea kil ló ene. Be ò náanii vó, bọọ ílà dóm nè va é nveè ka ló Jìhóvà ea dú nen e kà-kà vulà aa ba, vaá dì belí sã́ e bà palàge kpaagá, bọọ vulè é di dọ̀ọ̀mà dè-dè.