1-2. (a) Éé ní ea náa vaá à bọ́ló kọọ̀ gbò e bà ã́àa ilá á dẹlẹ nyíé boo Jìhóvà ẹ? (Psalm 37:3, 4) (b) Éé ní eé ló bel boo mm̀ nakà togó bel ge nòí ẽ́?

É KỌ ò gé noo gè ilí àbèè ge iá, sẹ̀ ò ã́àa ilai é? Beè vó, tọ́ọ̀ kà bàà-bàà bùlà á gé ló kọọ̀ ò gé ẹ̀bmà dẽè ge zọ̀ nen eo palàge vùlè dé kpéè ló dùm. À dú kà kà kọọ̀ dóm nè va íe gbò ànà-ànà e bà ólò kpeesĩ́ ló. Gbò e bà ã́àa ilá íe gbò béèlàfùl ea dú bíi ge nè. Nú eo náà nè gbò béèlàfùl eo neè tṍó eo kpeelìì sĩ́ ló ànà-ànàí é tọ́á ló bé eo é íei ẹ́ẹ́ nyíe mm̀ bọọ ílà dóm nè va naa. Be ò dẹẹaí boo Jìhóvà, òé nei lé béèlàfùl, bọọ ílà dóm nè va é agaló, vaá ò íei ẹ́ẹ́ nyíe. Be nóo túì gbò dùùlà bá deè tṍ ea aa bá Bàrì siimai tóm, òó kpeelii sĩ́ ló tã̀àgã̀ ea é náa kọ ó gá iei ẹ́ẹ́ nyíe mm̀ bọọ ílà dóm nè va.—Bugi Psalm 37:3, 4.

² Náa kal ló béè kọọ̀ à dú gè emí nakà togó belí boo béè gbò e bà ã́àa ilá, àé ló bel boo gbò ànà-ànà e kọ̀láá kà dóm nè va é láá kpeesĩ́ ló. Àé ló bel boo nú eé láá nó lọl ló nu dòòmà bá gbò gbálà nè gbò bia e ba beè bọ́ló dẹ̀lẹ̀ nyíe boo dee kéléá. Gbò nu dòòmà báí é nóòmài gã́bug nú eé láá siimá tóm mm̀ bẹẹ dùm, nè mm̀ bẹẹ ílà dóm nè va. Èé mon nagé nú eé láá nó lọl ló nú e sìgà dóm nè va deè niei beè tení bá.

3-4. Mókà gbò ànà-ànà ní e gbò e bà ã́àa ilá é láá kpeesĩ́ ló é?

³ Sìgà gbò é láá kọ́ nè gbò e bà ã́àa ilá kọ bàá tõó dùm belí bé e dõòna gbò tõo naa. Dì belí nu dòòmà bá,  ba gbò tẹ̀ nè kà àbèè gbò e bà dṹùnà va é láá tãgĩ́ va bá kọ bàá gbóó ié nvín. Àbèè kọọ̀ ba lé kóò nè nen ea dṹùnà va é láá kọ bàá zalí tọ vaá zalí lé-lé nu nvee m.

⁴ Beè dóm nè va náa ọ́ẹ̀ dẽe, bàé láá nè béèlàfùl ea é náa kọ bàá dé kom. Vaá níá é láá naa kọọ̀ dóm nè va á tú gã́bug tṍó siimá tóm kọbé bà láá kpẽ́ gbò komá lọa ból. Ba pííla é gbóó láá naa kọ bàá gá ié na tṍó gè noomá Kpá Káí boo ba lóó, sẹ̀ẹ̀mà fã̀ pá tọ, nè ge kọọmá kpẹ̀a. Dóm nè va é láá sí tóm tẹlẹ boo tṍó boo béè bé e bàé náa vaá ièè tõ̀ò kpègè, àbèè ge di boo bé ea é náa bà náa kpóè va lọl ló tóm vaá lọẹ nònù. Be bà náa vó, bàé pee gbò nèà deè ea gáẹ̀ beè naa kọ bàá bọọvẹ̀ gbàà ba sìtóm nè Jìhóvà.

5. Éé ní e nu dòòmà bá Klaus nè Marisa nóòmà ni ẽ́?

⁵ Gã́bug nu dòòmà bá a zógè kọọ̀ ge ká bùlà gbẹẹ́ boo gè ié gyọ́ ólò naa kọ e gá ié ẹ́ẹ́ nyíe mm̀ dùm. Bugi togó boo nú e ene kà dóm nè va e bà kọlà Klaus nè Marisa beè nò ea kil ló níí. * Tṍó e ba beè ã́àa ilá, ba beè gbá sí tóm kọbé bà íèè tõ̀ò kpègè nè gyọ́. Sõò, bà náa beè ié kàà ẹ́ẹ́-ẹẹ̀ nyíe. Klaus kọ́ọ̀: “E beè ié nú ea dúi bíi ló gè tõoma dùm, sõò née beè ié tọ́ọ̀ kà nòònù ea kil ló gè bọ̀ọ̀vẹ̀ gbàà bẹẹ sìtóm nè Jìhóvà. Mm̀ kà kà, dùm beè tàvàlàí ló.” Be à sẹlẹ olo beè mòn nàgé kọọ̀ ge ká bùlà gbẹẹ́ boo gè ié gyọ́ náa kọ ó gá ié dĩ̀ìnè ló mm̀ dùm. Beè vó, lóó ni á gá ọọ. Ge nó lé nu dòòmà bá dõòna gbò é láá nvèè bá nè ni. Túá kà, naanii èé ló bel boo nú e gbò dóm é láá nó lọl ló nu dòòmà bá Méné Jèhóshefàt.

6. Mósĩ́ deè ní e Méné Jèhóshefàt beè tú dùùlà bá deè tṍ ea di mm̀ kpá Proverbs 3:5, 6 siimá tóm tṍó e gbò bé beè dù gé naa uú boo pá a gbò e?

⁶ Gbò dóm, é kọọ̀ lóói ólò ọọ́ sìgà tṍó boo béè gã́bug tóm eo gé síi? Beè vó, nu dòòmà bá Méné Jèhóshefàt é láá dọ̀ bélè nè ni. Dì belí méné, a beè dú bíi kọọ̀ Jèhóshefàt á naa kọọ̀ dó ea géè bẹl boo á ié kpènà! Mósĩ́ deè ní ea beè siimá tóm ea palàge tàvàlàí é? Jèhóshefàt beè naa nú ea kpóó sim tùlà gè láá kpènà pá a gbò. A beè naa kọọ̀ boǹ Júdà á ié kpènà vaá bõonè ló nú ea sígá ló 1,160,000 gbò bé. (2 Kró. 17:12-19) Tṍó e tṍó téní, Jèhóshefàt beè kpeesĩ́ ló agẹ bá ànà-ànà. Gbò bé pá Ámòn, Móàb, nè gbò e bà aa deè boo gù ea di bálásĩ́ Seir beè naa uú boo ẹlẹ, pá a tọ, nè pá a gbò. (2 Kró. 20:1, 2) Éé ní e Jèhóshefàt beè naa ẽ́? A beè bàn Jìhóvà kọ á neèe kói vaá nveenìè bá neèe. Níí beè gbaaá ló lé dùùlà bá deè tṍ ea di mm̀ kpá Próvẹẹ̀b 3:5, 6. (Bugi.) Tã̀àgã ló Bàrì e Jèhóshefàt beè tã̀àgã̀ ea di mm̀ 2 Krónikòl 20:5-12, zógè bé ea beè dẹlẹ nyíé boo a Tẹ̀ ea di káála  naa. Jìhóvà beè aalá tã̀àgã ló Jèhóshefàt naa vàẹ?

7. Mósĩ́ deè ní e Jìhóvà beè aalá tã̀àgã ló Jèhóshefàt e?

⁷ Jìhóvà beè ló bel nè Jèhóshefàt tení dú ló neǹ Lívaì ea bée kọlà Jahaziel. Jìhóvà beè kọọ̀: “Tú o dọ̀, elá àgàlà, vaá ò mon bé e Jìhóvà é duulà ni naa.” (2 Kró. 20:13-17) Mm̀ kà kà, níá níì bé e bà ólò bé-bé naaé nì! Sõò gbò dùùlà bá deè tṍá náa beè aa bá nen, Jìhóvà ní ea beè aa bá ẹ́. Jèhóshefàt beè naa nú e bà kọ́ nèe boo béè kọọ̀ a beè dẹlẹ nyíé boo a Bàrì. Gbò e Jèhóshefàt beè sẹlẹ́ sĩ́ pá a gbò bé náè bèè gbò e bà nyímá bé, sõò aẹ̀ bèè gbò ọ́lì sọ́l e bà náa fáálá nuù bé. Jìhóvà náa beè kẹlẹ Jèhóshefàt; a beè bé pá a gbò ọ́b èlbá.—2 Kró. 20:18-23.

8. Éé ní e gbò dóm é láá nó lọl nu dòòmà bá Jèhóshefàt e?

⁸ Gbò dóm, òó láá noi nu dòòmà bá Jèhóshefàt. Boo béè kọ ò íèì dọ̀ tóm gè ẹbvii nú ea kil ló pá bọọ tọ, ò síì tóm agẹlẹi bá kọbé ò láá kpenai vaá ẹbvii nú ea kil vá ló. Tṍó eo kpeèsĩ́ ló tã̀àgã̀, àé láá tõó ní ló kọ ò íèè gbò nú ea dú bíi ea é náa kọ ó láá kpoogè dee ló boo o lóó. Sõò, ó gá dẹ̀ẹ̀a boo o bá. Tãa vó, bàn Jìhóvà kọ á nveenìè bá neè ni tṍó ea dú áá ọ̀ọ̀. Gbá ló vó, zọ̀ nàgé o va tã̀àgã ló Bàrì. Gbĩ́ tùle ea aa bá Jìhóvà tení dú ló gè nó Kpá Káí nè gbò kpá e bõ̀ònatõ̀ò Bàrì ni émí, vaá ò tú gbò nú eo nóò siimá tóm. Be à sẹlẹ dõòna gbò náa é zọ́ ni zìgà ló gbò béèlàfùl eo neè boo béè gbò nú eo bugì lọl mm̀ Kpá Káí, vaá bàé láá kol ni neǹ ból. Bàé láá kọọ̀ kpègè nè gyọ́ é náa kọọ̀ pá o tọ á ié kàà kpènà. Sõò kẽ̀èa boo nu dòòmà bá Jèhóshefàt. A beè dẹlẹ nyíé boo Jìhóvà vaá zogè naa vó tení dú ló a láb. Jìhóvà náa beè sọ̀bá gbálà ea beè bọ́ló dẹ̀lẹ̀ nyíé booí, vaá náa é sọ nàgé bá olo. (Ps. 37:28; Híb. 13:5) Dõòna kà éé ní e dóm nè va é láá naa kọbé bà gbá ié ẹ́ẹ́ nyíé ẽ́?

9. Éé ní eé láá kọ́ kilma ló neǹ kọ́ọ̀ bùlà Àìzáíà nè a va ẹ́?

⁹ Neǹ kọ́ọ̀ bùlà Bàrì Àìzáíà nè a va beè ká bùlà gbẹẹ́ boo gè sí tóm nè Jìhóvà. Àìzáíà beè neǹ kọ́ọ̀ bùlà Bàrì, vaá àé láá du nágé kọọ̀ a va beè dú “neǹ kọ́ọ̀ bùlà Bàrì” boo béè kọọ̀ Kpá Káí kọ́ vó. (Àìz. 8:1-4) Àìzáíà nè a va beè tú gè sí tóm nè Jìhóvà naamá túá kà nú mm̀ ba dùm. Ẹ̀b bé e bà zógè kà lé nu dòòmà bá nè gbò dóm nè va deè niei naaà!

10. Mósĩ́ deè ní e gè nó kọ́ọ̀ bùlà Bàrì ea di mm̀ Kpá Káí é láá nvèè bá nè gbò dóm nè va kọ bàá beeláfùl ge bọ̀ọ̀vẹ̀ gbàà ba sìtóm nè Jìhóvà ẹ?

¹⁰ Gbò dóm nè va é láá ká bùlà gbẹẹ́ boo gè sí tóm nè Jìhóvà tení dú ló gè naa nú e ba kpóó sim tùlà. Bàé láá kpáá palàge dẹlẹ nyíé boo Jìhóvà tení dú ló gè gbá nó kọ́ọ̀ bùlà Bàrì ea di mm̀ Kpá Káí nè ge mòn bé ea gé ḿḿ-má naa. * (Táítọ̀s 1:2) Bàé láá gbá bugi togó boo nú e bàé láá naa mm̀ ge mm-mè sìgà gbò kọ́ọ̀ bùlà Bàrì ea di mm̀ Kpá Káí. Dì belí nu dòòmà bá, bàé láá gbaaá ló gè mm-mè kọ́ọ̀ bùlà Bàrì e Jíízọ̀s beè kọ̀ ea kil ló gè vee lé kpẹ̀a ea kil ló Boǹ Méné Bàrì beeá ló bàlà booí besĩ́ ke kùbmà kálá lee. (Máát. 24:14) Bé e dóm nè va agàla boo kọọ̀ gbò kọ́ọ̀ bùlà Bàrì ea di mm̀ Kpá Káí gé ḿḿ-má naa, níà bé e  bàé kpáá beeláfùl ge bọ̀ọ̀vẹ̀ gbàà ba gè sí tóm nè Jìhóvà naa ẽ́.

11. Éé ní e Akílà nè Presélà beè láá naa ẽ́, vaá ló éé?

¹¹ Gbò e bà ã́àa ilá é láá nó nu dòòmà bá Presélà nè Akílà e bà dú Júù e ba beè tõó Róm̀. Ba beè dã́ lé kpẹ̀a ea kil ló Jíízọ̀s vaá gbóó nyoonée nvée. Mm̀ kà kà, lóó va beè dĩ̀ìnà. Sõò, mm̀ bùló, ba ditõ̀ò beè nyaaá tṍó e Gbele Méné Klọ́dìàs beè tenmà log kọọ̀ kọ̀láá kà pá Júù á aa Róm̀. Bugi togó boo bé e níá beè láá tọá ló Akílà nè Presélà naa. Bàé nyááná tõ̀ò aa kiẽ́e ea ni ọọlà va ló, vaá gbóó dààmà togó ba pííla, ea dú gè lò kàn ge tìbmà tọ oo gbẹá kiẽ́e e bà kil. É kọọ̀ tàvàlà dìtõ̀ò e beè kpeesĩ́ lóí beè naa kọ bàá gá tuná gè sí tóm nè Jìhóvà kolmá nu? Òó láá nyimá ààla bíbvá. Gbẹá Kọ́rìnt ea dú ãa kiẽ́e e bà kilá, Akílà nè Presélà beè gbaá ló bõ̀ònatõ̀ò ea di kĩá vaá zọ̀ Pọ́ọ̀l siá tóm mm̀ ge siè kpóó ló pá vígà. Tṍó e tṍó téní, ba beè kil dõòna kà gbò bon e bíì gbò kọ̀ kpẹ̀a palàge bọọ. (Tóm 18:18-21; Róm̀ 16:3-5) Ba beè ié gã́bug tóm gè sì vaá ié ẹ́ẹ́ nyíe!

12. Éé ní ea náa à bọ́ló kọọ̀ dóm nè va á noo nú ea kil ló gè fã̀ Bàrì sẹ̀ẹ̀a sĩ́é?

¹² Gbò dóm nè va e bà di deè niei é láá nó Presélà nè Akílà tení dú ló gè tú Boǹ Méné Bàrì naamá túá kà nú mm̀ ba dùm. Kà lé tṍó e dóm nè va é láá loá bel boo ba nu sẹ̀ẹ̀a sĩ́ dú tṍó e bà gé bílá ló gè ilá. Tṍó e dóm nè va gbá nè béèlàfùl ea kil ló gè fã̀ Bàrì vaá pììga boo gè teá tùlà, bàé mon bé e nyómá káí Jìhóvà gé síá tóm mm̀ ba dùm naa. (Ẹ̀klì. 4:9, 12) Bugi togó boo nú e Russell nè Elizabeth beè tení bá. Russell kọ́ọ̀, “Tṍó e géè bilá ló gè ilá ní e beè palàge ló bel boo bẹẹ nu sẹ̀ẹ̀a sĩ́é.” Elizabeth kọ́ọ̀, “E beè loá bel naa vó kọbéè tṍó eé ne béèlàfùl, née neè ní ea é oomài lọl ló gè teá tùlà gbò nú e beè noo sẹ̀ẹ̀a sĩ́.” Dìtõ̀ò Russell nè Elizabeth beè naa kọ bàá kil Micronesia gé sí tóm kiẽ́e e bíì gbò kọ̀ kpẹ̀a palàge bọọ.

13. Dẹ̀ẹ̀a boo nú ea di mm̀ kpá Psalm 28:7, éé ní ea é silà aa m tṍó e dẹlẹ̀ nyíé boo Jìhóvà ẹ?

 ¹³ Dì belí Russell nè Elizabeth, gã́bug dóm nè và a bééláfùl ge òòà aa ló gbò nú ea gáẹ̀ beè naa kọ bàá gá bọ̀ọ̀vẹ̀ gbàà ba sìtóm kọ̀ kpẹ̀a nè ge noòmà nu. Gã́bug lé nu é silà aa m tṍó e dóm nè va tú nòònù ge sí tóm nè Jìhóvà sẹ̀ẹ̀a sĩ́ vaá pììgà ge teá tùlà. Bàé mon bé e Jìhóvà é ẹb nú ea kil vá ló naa, bàé kpáá palàge dẹlẹ́ẹ nyíé boo, vaá bàé íe kàà ẹ́ẹ́ nyíe.—Bugi Psalm 28:7.

14. Mósĩ́ deè ní e Pítà nè a va beè zogè kọ bà dẹlẹ̀ẹ̀ nyíé boo zìgànù ea di mm̀ kpá Máátìù 6:25, 31-34 é?

¹⁴ Dóm nè va é láá no nágé nu lọl ló nu dòòmà bá neǹ tóm Pítà nè a va. Nú ea é láá dú ọ̀ọ̀lẹ̀ ẽ́ aa ló tṍó e neǹ tóm Pítà beè zọ̀ Jíízọ̀s nyòònà, a beè dú bíi kọ á nè agẹbá béèlàfùl. Síì dọọ̀ ní e Pítà beè olòó ẹ̀bmà nú ea kil ló pá a tọ ẹ́. Vó beè naa kọọ̀ tṍó e Jíízọ̀s kọ́ọ̀ Pítà á dù gé nyoonìèe nvée, Pítà beè bugi togó boo nú ea kil ló a va tṍó ea ne béèlàfùl. (Lúùk 5:1-11) Pítà beè sà ge biia nvéè Jíízọ̀s gé kọ́ kpẹ̀a. A beè nè lé béèlàfùl! Vaá è agàla boo kọọ̀ a va beè nvèè sãa kúm a béèlàfùl. Kpá Káí tẹ́lẹ bàlà kẽ kọọ̀ tṍó e Jíízọ̀s ni kẽeà aa kemà ú, vaà Pítà beè olòó zọ̀ a dóm sí kyẽè sìgà tṍó. (1 Kọ́r. 9:5) Gè kọ a beè dú kà lé va beè naa kọọ̀ Pítà á láá taaá ló ló bel tṍó ea gé duulà deè tṍ gbò dóm nè va. (1 Pít. 3:1-7) Mm̀ kà kà, Pítà nè a va beè palàge dẹlẹ nyíé boo gbò zìgànù Jìhóvà, kọ àé neè va nú e bà íèè bíí ló be bà túè Boǹ Méné Bàrì naamàè túá kà nú mm̀ ba dùm.—Bugi Máátìù 6:25, 31-34.

15. Éé ní eo nóò lọl ló nú e Tiago nè Esther beè tení bá ẹ́?

¹⁵ Be a dú gã́bug gbáá eo beè ilai, mósĩ́ deè ní eo é láá kilíí sĩ́ gè iei tàn kilma ló gè bọ̀ọ̀vẹ̀ gbàà bọọ sìtóm kọ̀ kpẹ̀a ẹ́? Enè sĩ́deè dú gè nó nú ea kil ló nú e dõòna kà gbò dóm nè va beè tení bá. Dì belí nu dòòmà bá, òé láá bugi “Gbò Nòòtẽ́ Ea Kil Ló Dùm Nen.” Íb gbò togó belá beè nvèè bá nè Tiago nè Esther e bà dú Brazil, kọ bàá ié tàn ge sì gé kọ́ kpẹ̀a kiẽ́e e bíi bọọ. Tiago kọ́ọ̀: “Tṍó e bugì nòòtẽ́ ea kil ló bé e Jìhóvà ni nveè bá nè pá a gyóòlo deè nieí naa, à tan nagé beele kọọ̀ Jìhóvà á kpènài vaá ẹ̀b nú ea kilíí ló.” Tṍó e tṍó téní, ba beè kil Paraguay, bà dì e bà gé kọ́ kpẹ̀a nè gbò e bà ólò ló dém bel pá Portugal lọl gbáá 2014 na. Esther kọ́ọ̀: “Ene kà dọ̀ Kpá Káí ea ólò palàge leemá pálaa bẹ̀ì dú kpá Ẹ́fẹsọ̀s 3:20. Gã́bug tṍó, e mon bé e gbò belá dú kà kà naa kilma ló tóm e gé sí nè Jìhóvà.” Mm̀ kpá lẹ̀ẹ̀la tóm e Pọ́ọ̀l beè emí má pá Ẹ́fẹsọ̀sa, a beè zìgà kọọ̀ Jìhóvà é néi nú ea palàge bọọ èl ló nú e beele é láá bĩiná. Zìgànùá a ḿḿ-má gã́bug tṍó!

16. Gbò e bà ã́àa ilá é láá tú dùùlà bá deè tṍ bà mée tṍó e bà gé bugi togó ba gbò nu sẹ̀ẹ̀a sĩ́é?

¹⁶ Gbò e bà ã́àa ilá é láá nó nu lọl ló gbò e ba beè dẹ̀ẹ̀a boo Jìhóvà. Sìgà dóm nè va a tú gã́bug gbáá siimá tóm gyà deèsĩ́ tóm. Bĩiná dùùlà bá deè tṍ lọ̀l vá bá be ò gé bugi togó boo nú ea kil ló gbò o nu sẹ̀ẹ̀a sĩ́. Níí dõòna kà sĩ́deè ge zogè kọọ̀ ò dẹlẹ̀ẹ̀ nyíé boo Jìhóvà. (Pró. 22:17, 19) Gbò kànen nagé é láá nvèè bá nè gbò e bà ã́àa ilá kọ bàá noo nú ea kil ló gè fã̀ Bàrì sẹẹ̀a sĩ́ vaá teá tùlà.

17. Éé ní ea beè naaá ló Klaus nè Marisa ẹ, vaá éé ní e nú e ba beè tení bá nóòmài ẽ́?

¹⁷ Sìgà tṍó, bẹẹ béèlàfùl ge bọ̀ọ̀vẹ̀  gbàà bẹẹ sìtóm náa ólò naaá belí bé e géè ẹ̀bmà dẽe naa. Níà nú ea beè naaá ló Klaus nè Marisa, e beè kọ́ nú ea kil lóá ẹ́. Taà gbáá aa ló tṍó e ba beè ilá, ba beè aa ba bé vaá nè lóó gè sí tóm gè tìb tọ gbẹá tọ nàà tóm ea di Finland. Sõò, ba beè nyimá kọọ̀ bà náa gé zìgà kọ bàá tõonìè kĩá zelmá ló ọ̀ọ̀lẹ̀ ẽ́. Túá ból, náa beè leemá va. Sõò pọ́ì ńkem̀ tṍó aa ló tṍóá, ba beè gbóó kolí va kọ bàá gé nó dém bel pá Arab, vaá kátogóí, bà dì e bà gé tú ẹ́ẹ́ nyíe kọọmá kpẹ̀a nè gbò e bà ólò ló dém bel pá Arab gbẹá dõòna kà dó. Tṍó e Marisa kẽèa boo gbò nú ea beè naaáí, a kọ́ọ̀: “Pọ̀ beè siím ló gè naa nú em gáà naa tọ́ọ̀ dee vaá a beè dú bíi kọ ḿ dẹlẹ nyíé boo Jìhóvà. Sõò ndaa mon bé e Jìhóvà ni nveè bá nèi mm̀ sĩ́deè e née beè ẹ̀bmà dẽe naa. Níí náa kọọ̀ ḿ kpáá palàge dẹlẹ nyíé boo Jìhóvà.” Dì belí bé e nakà nu dòòmà báí tẹ́lẹ bàlà kẽ naa, òó láá àgala boo kọọ̀ Jìhóvà é tã́ànè ni dee bá be ò palàge dẹlẹ́ẹ nyíé boo.

18. Éé ní e dóm nè va é láá naa kọbé bà kilsĩ́ gè dẹlẹ nyíé boo Jìhóvà ẹ?

¹⁸ Ílà dóm nè va dú dõ̀ònù ea aa bá Jìhóvà. (Máát. 19:5, 6) À gbĩ́ kọọ̀ dóm nè va á dé kpéè ló nakà dõ̀ònùí. (Pró. 5:18) Boólo eo ã́àa ilai, bugii togó boo nú eo é túi bọọ dùm naamai. Naanii kọ̀láá nu e bọọ kpóó sim tùlà ge zogè kọ ò nveenìì ka ló gbò dõ̀ònù e Bàrì néi. Tã̀àgãi ló Jìhóvà. Gbĩi gbò nòòkúu eo é láá siimai tóm lọl mm̀ Kpá Káí. Túi gbò dùùlà bá deè tṍ e Jìhóvà néi siimá tóm. Be ò kái bùlà gbẹẹlíí boo gè sii tóm nei Jìhóvà, òó láá agalaí boo kọ òó íei ẹ́ẹ́ nyíe nè dĩ̀ìnè ló dùm mm̀ bọọ ílà dóm nè va!