1. Mókà bíb ní eé láá bĩiná bẹẹ bá ẹ́?

É KỌỌ̀ pọ̀ ólò sií ni tṍó eo bugì togó boo gbò nú ea é nááá dì deèsĩ́, dì belí kyọ̀à sĩ́ ea é dọ́ boo kyáá fã̀, nàà uú boo ea aa bá Gọ̀g ea dú boo kunukẽ̀ Mégọ̀g, nè bé Ámàgídòn? É kọ à íe tṍó eo beè bĩiná o bá kọọ̀, ‘É kọọ̀ nda é láá kilsĩ́ gè bọ́ló dẹ̀lẹ̀ nyíé boo tṍó e gbò nu pọ̀í é nááá?’ Be o beè bĩiná gbò bíbvá, gbò bel e Jíízọ̀s beè kọ́ mm̀ dọ̀ Kpá Káí e nakà togó bel gè nòí dẹ̀ẹ̀a boo é síè ni kpóó ló. Jíízọ̀s beè kọ́ nè gbò e bà ólò nyoonée nvée kọọ̀: “Ógá iei tã̀àgã̀ bùlà. Iei zìgà mm̀ Bàrì.” (Jọ́ọ̀n 14:1, NW.) Gè ié agẹ zìgà é nveè bá nèi kọ é láá ĩ̀ìmà gbò nú ea é nááá dì deèsĩ́.

2. Mósĩ́ deè ní eé láá agẹlẹ ló bẹẹ zìgà ẹ, vaá éé ní eé ló bel boo mm̀ nakà togó belí é?

² Èé láá agẹlẹ ló bẹẹ zìgà kilma ló gè ĩ̀ìmà gbò nú ea é nááá dì deèsĩ́ tení dú ló gè bugi togó boo nú e náà kátogóí tṍó e bẹẹ zìgà bã́ kèbá ẹ̀bmà. Be è bugi togó boo bé e ólò labví láb naa tṍó e ẹ̀bmà élaí sĩ́, èé mon gbò kiẽ́e ea dú bíi mm̀ bẹẹ dùm kọ é siè kpóó ló bẹẹ zìgà. Buù tṍó e béè ene kà ẹ̀bmà èlbá, bẹẹ zìgà é kpáá agaló. Níí é nveè bá nèi kọ é ĩ̀ìmà gbò tã̀àgã̀ eé kpeesĩ́ ló dì deèsĩ́. Mm̀ nakà togó belí, èé ló bel boo ténì kà dìtõ̀ò ea zógè kọọ̀ gbò nyòòne nvéè Jíízọ̀s beè ié bíí ló gè kpáá bọ̀ọ̀vẹ̀ ba zìgà. Tṍóá, èé gbóó ló nágé bel boo bé e beele é láá bé èlbá gbò ànà-ànàá deè nieí naa, nè bé ea é láá nvèè bá nèi nyòòmà gbò nú ea é nááá dì deèsĩ́ naa.

3. Éé ní e bel e Jíízọ̀s ló mm̀ kpá Máátìù 6:30, 33 nveè bá nèi kọ é dã́tẽ́ ló é?

³ À ólò tàn kọ̀láá nen ea dú togó boo tọ kọọ̀ pá a tọ á ié gyã́á gè dè, nu gè nvèà, nè tọ gè tõó m. Níí náa ólò bọọgẹ̀  valí boo béè kọọ̀ tṍó e dìí tavàlà. Baa kpó sìgà pá bẹẹ vígà lọl ló tóm, vaá kọ̀láá bé e bà piigà naa bà náa láà ié ná dõòna kà tóm gè sì. Sìgà gbò a kin gè sí tóm e náa bọ́ló kọọ̀ neǹ Kráìst á sì. Tṍó e gbò nú ea dì belí vóí nááá, à dú bíi kọ é ié agẹ zìgà kọọ̀ Jìhóvà é náa kọ é ié gbò nú ea dúi bíi ló gè ẹ̀bmà nú ea kil ló pá bẹẹ tọ. Jíízọ̀s beè naa kọọ̀ pá a gbò nyòòne nvée á nyimá níí tṍó ea géè ló Moǹ Bel Bàrì Gbẹá Boo Gùa. (Bugi Máátìù 6:30, 33.) Tṍó e agàla boo kọọ̀ Jìhóvà náa é sọ́i bá gbẹẹ́ kẽ, èé ká bùlà gbẹẹ́ boo gè sí tóm nèe. Vaá tṍó e monì bé e Jìhóvà gé nveè bá nèi kọ é ié gbò nú ea dúi bíi ló gè tõoma dùm naa, níà bé e eé kpáá tõo bã̀é ló vaá ié agẹ zìgà naa ẽ́.

4-5. Éé ní ea beè nvèè bá nè ene kà pá tọ kọ bàá láá bé èlbá tã̀àgã̀ bùlà ea kil ló bé e bàé náa láá ié nú ea dú va bíi ló ge tõòma dùm ẽ?

⁴ Bugi togó boo bé e Jìhóvà beè nvèè bá nè ene kà pá tọ e bà di Venezuela naa, tṍó e ba beè ié tã̀àgã̀ bùlà ea kil ló bé e bàé náanìè vaá ièè gbò nú e bà íe bíi ló gè tõ̀òma dùm. À íe tṍó e pá tọọ̀ Castro beè ié gã́bug kpègè e bà íe bíi ló gè tõ̀òma dùm tení dú ló gè olòó kìl ól. Tṍó e tṍó téní, gbò nen beè faalá náa kpoomá va lọl ló ba ìènù naa ní e bà téá aa ba be. Ba tẹ̀ ea bée kọlà Miguel, kọ́ọ̀: “Kátogóí, nú e fóò boo ńkem̀ ól e banì ní ea náa kọ é ié nu gè tõ̀òma dùm ẽ. M̀ ólò bàn Jìhóvà kọ̀láá deeí kó á nèi nú e íè bíi ló deeá.” Dùm palàge tàvàla ló pá tọọ̀ Castro, sõò zìgà e bà íe kọọ̀ Jìhóvà é neè va gbò nú e bà íe bíi ló buù dee, beè naa kọ bàá kilsĩ́ gè sí nònù nè ge kọ́ kpẹ̀a. Ba beè tú gè sí tóm nè Jìhóvà naamá túá kà nú mm̀ ba dùm, vaá a beè nè va nú ea dú va bíi ló.

⁵ Kèbá gbò tàvàlà dìtõ̀òí, Miguel nè a va ea bée kọlà Yurai, beè ká bùlà gbẹẹ́ boo bé e Jìhóvà ni nveè bá nèva naa. Gã́bug tṍó Jìhóvà beè tú pá vígà nvèèmà bá naa kọọ̀ Miguel á ié gbò nú ea dúe bíi ló gè tõ̀òma dùm, bií ló tóm gè sì. Sìgà tṍó, Jìhóvà beè naa kọ bàá ié gbò nú ea dú va bíi ló tenmá bá gbò e bà di tọ nàà tóm. Jìhóvà gáà sọ̀va bá gbẹẹ́ kẽ. Níí a náa kọọ̀ zìgà pá ba tọ á kpáá agaló. Tṍó e bà kọ́ bé e Jìhóvà beè nvèè bá nèva naa lọ̀l, ba síla ea kọlà Yoselin kọ́ọ̀: “Ge mòn bé e Jìhóvà nveè bá nèi naa palàge sièi kpóó ló. Níà ńdáà kóò vaá m̀ agàla boo kọọ̀ àé kilsĩ́ gè nvèè bá nèm.” À kpáá kọọ̀: “Gbò tã̀àgã̀ e pá beélè tọ ni téní bá a búmái nyòòmà gbò agẹbá ẹ̀bmà eé beè kpeesĩ́ ló dì deèsĩ́.”

6. Mósĩ́ deè ní eo é láá agẹlẹ ló o zìgà tṍó e nání bá dì ní dẽe ẽ́?

⁶ É kọọ̀ nání bá dìní dẽe? Beè vó, níì kà tàvàlà tṍó kilma kiẽ́e eo dì. Kọ̀láá bé ea dì naa, òé láá tú tṍóí naamá nú ea é agẹlẹ ló o zìgà. Tã̀àgã ló Bàrì besĩ́ ò kálá bugi gbò bel e Jíízọ̀s kọ́ mm̀ kpá Máátìù 6:25-34 vaá ò bugi togó boo gbò nú eo bugì. Bugi togó boo gbò nu dòòmà bá ea di mm̀ beélè deeí ea zógè kọọ̀ Jìhóvà ólò nvèè bá nè gbò e bà kilsĩ́ gè fã̀e. (1 Kọ́r.  15:58) Ge naa vó é náa kọ ó àgala boo kọọ̀ Jìhóvà é nveè bá nè ni belí bé ea beè nvèè bá nè gbò e ba dìtõ̀ò bélí nágé ńlo naaá. À nyímá gbò nú ea dú ni bíi ló, vaá nyimá sĩ́deè ge nèèmà ni. Tṍó eo monì bé e Jìhóvà gé nveè bá nèni naa, o zìgà é kpáá agaló vaá naa kọ ó láá ĩ̀ìmà gbò ẹ̀bmà ea palàge agabá dì deèsĩ́.—Háb. 3:17, 18.

7. Dẹ̀ẹ̀a boo nú ea di mm̀ kpá Máátìù 8:23-26, mósĩ́ deè ní e “gbele kpóó ló fọ́ọ́lọ́” beè dòà zìgà gbò nyòòne nvéè Jíízọ̀s e?

⁷ Tṍó e gbele kpóó ló fọ́ọ́lọ́ beè ula ló Jíízọ̀s nè pá a gbò nyòòne nvée gbẹá sĩ́ pene, Jíízọ̀s beè tú tṍóá nvèèmà bá nèva kọ à dú bíi kọ bàá kpáá palàge ié zìgà. (Bugi Máátìù 8:23-26.) Jíízọ̀s beè di dáá tṍó e fọ́ọ́lọ́á ulà vaá faalá kpoò múú nvee mm̀ faàa. Tṍó e pá a gbò nyòòne nvée e pọ̀ géè siívaá kẽée lọl dáá kọ á duulàẹ̀ va, a beè tú gbọ́ọ́-gbọọ̀ bá kọọmá nèva kọọ̀: “Éé ní e a náa vaá pọ̀ à siíi é? Boolo nóo láá dẹlẹi nyíe boo Bàrì!” À beè bọ́ló kọọ̀ pá a gbò nyòòne nvée e pọ̀ géè siívaá á nyimá kọọ̀ Jìhóvà íe kpóó gè dùùmà Jíízọ̀s nè gbò e bà dìé ló. Éé ní eé láá nó lọl lóé? Agẹ zìgà é láá nvèè bá nèi kọ é bé èlbá gbò ẹ̀bmà ea bélí “gbele kpóó ló fọ́ọ́lọ́.”

8-9. Éé ní ea beè dòà zìgà vígà Anel e, vaá éé ní ea beè nvèè bá nèe ẽ́?

⁸ Bugi togó boo bé e zìgà ene kà vígà pábia ea bée kọlà Anel, ea dú Puerto Rico, ea gáà ia dóm beè kpáá agaló naa tṍó ea ĩimà agẹbá ẹ̀bmà ea beè tení bá. A tã̀àgã̀ beè dú “gbele kpóó ló fọ́ọ́lọ́.” Níí beè dààmà togó mm̀ gbáá 2017 tṍó e gbele kpóó ló fọ́ọ́lọ́ ea kọlà Hurricane Maria beè faalá múú kyọ̀ọ̀mà sĩ́ a be. Nú ea beè sìlà aa m dú kọọ̀ náa beè ié ná tóm ge sì. Anel kọ́ọ̀: “M beè palàge ié tã̀àgã̀ bùlà kèbá gbò dìtõ̀òí, sõò m beè nó gè dẹIẹ nyíé boo Jìhóvà tení dú ló gè olòó tã̀àgã̀é ló, vaá ním beè zìgà kọọ̀ nà tã̀àgã̀ á ọọvẹ́m ló.”

⁹ Anel kọ́ nágé kọọ̀ gbàntṍ ló dú dõòna kà nú ea beè nveenìè bá neèe kọ á láá beè elìè bá gbò a ẹ̀bmà. À kọ́ọ̀: “Ge tõó boo gbò tùle e bõ̀ònatõ̀ò Jìhóvà ne beè nvèè bá nèm kọ ḿ gá ié tã̀àgã̀ bùlà. M beè mòn bé e Jìhóvà nveè bá nèm naa tení dú ló gbò bel sìà kpóó ló nè nvèè bá ea aa bá pá vígà págbálà nè pábia.” A beè kpáá kọọ̀: “Jìhóvà beè nèm èlmà boo nú em gáẹ̀ beè bĩiná, vaá nà zìgà beè kpáá agaló.”

10. Éé ní eo é láá naa tṍó eo gé téní bá ẹ̀bmà ẽ?

¹⁰ É kọ à íe agẹbá ẹ̀bmà eo gé téní bá? Àé láá dú nání bá boo béè bùló kyọ̀à sĩ́ nu ea nááá. Àbèè agẹbá zọ̀ló ea ọọvẹ́ ni ló vaá nóo nyímà nu gè naa. Àé láá tãagẽ́ ni sìgà tṍó, sõò ógà zìgà kọ á ọọvẹ ló o gè dẹlẹ nyíé boo Jìhóvà. Tõo bã̀é ló mm̀ tã̀àgã ló. Agẹlẹ ló o zìgà tení dú ló gè bugi togó boo gbò tṍó e Jìhóvà beè nvèè bá nè ni. (Ps. 77:11, 12) Àgala boo kọọ̀ náa é sọ́ ni bá gbẹẹ́ kẽ tọ́ọ̀ dee.

11. Éé ní ea náa à bọ́ló kọ é beeláfùl ge gbàntṍ ló gbò e bà gé túlèi é?

 ¹¹ Dõòna kà éé ní ea é láá nvèè bá nèni kọ ó ĩ̀ìmà gbò tã̀àgã̀ eo téní báẹ́? Dì belí bé e Anel beè kọ́ naaá, gbàntṍ ló é láá nvèè bá. Nó gè dẹlẹ nyíé boo gbò e Jìhóvà nè Jíízọ̀s dẹlẹ nyíé boo. Sìgà tṍó, gbò kànen é láá nè tùle e náa léémái. Sõò Jìhóvà ólò tãanè dee bá neǹ gbàntṍ ló. È nyímà nú ea kil ló gbò e gbàntṍ beè naa kọ bàá ié dùùà e Kpá Káí kọ́ nú ea kil vá ló, nè gbò e ba beè bọ́ló dẹ̀lẹ̀ nyíé boo mm̀ beélè deeí. (Ẹ́xọ. 14:1-4; 2 Kró. 20:17) Olòó bugi togó boo gbò e ba beè naa vó. Ge naa vó é náa kọ é beeláfùl ge gbàntṍ ló tùle e bõ̀ònatõ̀ò ne kátogóí nè dì deèsĩ́. (Híb. 13:17) Pọ̀ náa é síí ni ló pọ̀b kpo tã̀àgã̀ ea gé dú.—Pró. 3:25.

12. Éé ní e kpá Lúùk 18:1-8 kọ́ kilma ló gè ié zìgà nè ge ĩ̀ìmà pọ́lọ́ bèèla ẹ́?

¹² Jíízọ̀s beè nyimá kọọ̀ pọ́lọ́ bèèla é beè dòà zìgà pá a gbò nyòòne nvée. Kọbé bà láá ĩ̀ìmà, a beè nèva ene kà nu dòòle ló ea di mm̀ kpá Lúùk. Jíízọ̀s beè kọ́ nú ea kil ló ene kà vaà tãa ea beè kilsĩ́ gè bàn neǹ bèèla e náa ólò fã̀ Bàrì kọ á beelá bel lele. A beè àgala boo kọọ̀ gbálàa é nveenìè bá neèe be à kilìè sĩ́ gè bànie. Tṍó e tṍó téní, neǹ bèèlaá beè nvèè bá nèe. Éé ní e níá nóòmài ẽ́? Jìhóvà níì neǹ pọ́lọ́ lab dògò nì. Boo béè vó, Jíízọ̀s beè kọọ̀: “É kọ Bàrì náa é beelá leèvè pá ńlẹ gbò e a tó kolíe ẹ́ẹ́ èlà nè bílá dee?” (Bugi Lúùk 18:1-8.) Tṍóá, Jíízọ̀s beè kpáá kọọ̀: “Tṍó e Nda, Sã́áná Nen, é kpáá dù, é kọ m̀ é mon gbò nen boo sãà kunu kẽí e bà é dẹlẹ̀m̄ nyíe boo?” Tṍó e ténì bá pọ́lọ́ bèèla, à bọ́ló kọ é zogè kọ è íè ĩ̀ìmà nè agẹ zìgà belí vaà tãaá. Íb zìgàá é náa kọ é àgala boo kọọ̀ pọ́ì ńkem̀ tṍó àla, Jìhóvà é nveè bá nèi. À dú nágé bíi kọ é àgala boo kọọ̀ tã̀àgã ló Bàrì íe kpóó. Sìgà tṍó Bàrì é láá aalá bẹẹ tã̀àgã ló mm̀ sĩ́deè e née géè ẹ̀bmà dẽe.

13. Mósĩ́ deè ní e tã̀àgã ló Bàrì beè nvèè bá nè ene kà pá tọ e ba beè tú pọ́lọ́ bá sẹ̀ẹ̀mà va ẹ́?

¹³ Bugi togó boo nú ea beè naaá ló ene kà vígà pábia ea bée kọlà Vero, ea ólò tõó Democratic Republic of Congo. Vero nè a dóm e náa ólò fã̀ Bàrì, bií ló a nvín pábia ea ni tóólá òb nè vòò gbáá, beè teá aa ba bon tṍó e gbò bé bã́ ba bon. Tṍó e bà di èèlè e bà gé aà, gbò bé beè sií va vaá siìmà va pọ̀ kọ bàé fẹ́ẹ̀ va. Tṍó e Vero daamà togó gè tò, a nvín pábiaá beè pììga boo gè naa kọọ̀ lóóe á dĩ̀ìnà tení dú ló gè tã̀àgã ló Bàrì tẹlẹ bàlà kẽ, vaá olòó kolí béè Jìhóvà mm̀ a tã̀àgã ló. Tṍó ea tãàgã ló Bàrì lọ̀l, neǹ togó gbò béá beè gbóó bĩináe kọọ̀, “Nvín pábia, mée beè noòmà ni gè tã̀àgã ló Bàrì e?” A beè aalá nèe kọọ̀, “Ńdáà kà ní ea beè noòmàm ẽ́, tení dú ló nu dòòmà bá ea di mm̀ kpá Máátìù 6:9-13.” Neǹ togó gbò béá beè gbóó kọọ̀, “Nvín pábia, zọ̀ o  tẹ̀ nè o kà aa mm̀ fẹ́ẹ́-fẹẹ̀ ló, vaá Jìhóvà ea dú o Bàrì á kpènà ni!”

14. Éé ní ea é láá dòà bẹẹ zìgà ẹ, vaá éé ní ea é láá nvèè bá nèi kọ é ĩ̀ìmà ẽ?

¹⁴ Íb gbò nu dòòmà báá nóòmài kọ é gá ẹ̀b tã̀àgã ló Bàrì tẹlẹ kẽ. Sõò èé kọ́ vàẹ beè Bàrì náa áálá o tã̀àgã ló mm̀ gbala-gbala àbèe mm̀ sĩ́deè eo géè ẹ̀bmà dẽe ẽ́? Dì belí vaà tãá ea di mm̀ nu dòòle ló Jíízọ̀sa, kilsĩ́ gè tã̀àgã ló Bàrì vaá ò dẹlẹ nyíé boo kọọ̀ Bàrì náa é sọ́ ni bá gbẹẹ́ kẽ vaá àé áálá o tã̀àgã ló. Kilsĩ́ gè bàn Jìhóvà kọ á neè ni a nyómá káí. (Fíl. 4:13) Kẽ̀èa boo kọọ̀ pọ́ì ńkem̀ tṍó àla, Jìhóvà é palàge tãanè ni dee bá naa ní e dénè tã̀àgã̀ eo beè tení bá é tání nyíe. Tṍó eo ĩimà tã̀àgã̀ tení dú ló nvèè bá ea aa bá Jìhóvà kátogóí, òó kpáá palàge ié agẹ ló gè ĩ̀ìmà gbò ní ea gé dú sĩ́.—1 Pít. 1:6, 7.

15. Dẹ̀ẹ̀a boo nú ea di mm̀ kpá Máátìù 17:19, 20, mókà nu ànà-ànà ní e gbò nyòòne nvéè Jíízọ̀s beè kpeesĩ́ ló é?

¹⁵ Jíízọ̀s beè noòmà pá a gbò nyòòne nvée kọọ̀ zìgà é nveè bá nèva kọ bàá naa gbò nú ea tàvàlà. (Bugi Máátìù 17:19, 20.) Náa kal ló béè kọọ̀ gbò nyòòne nvéè Jíízọ̀s beè láá olòó kpó zọ lọl mm̀ nen, à íe tṍó e bà náa beè láá naa vó. Éé ní ea beè naa kọ á mèà naa vóé? Jíízọ̀s beè kọ́ nèva kọ à dú bíi kọ bàá kpáá ié zìgà. A beè kọ nèva kọọ̀ zìgà é láá naa kọ bàá naa nú ea palàge tàvàlà dì belí ge kpõ̀ònà gù! Deè nieí, beele é láá kpee nagé sĩ́ ló gbò nu ànà-ànà ea palàge tàvàlà.

16. Mósĩ́ deè ní e zìgà beè nvèè bá nè Geydi kọ á láá ĩ̀ìmà tṍó e bà fẹ́ a dóm ẽ́?

¹⁶ Bugi togó boo nu dòòmà bá ene kà vígà pábia ea dú Guatemala, ea beè kọlà Geydi. Ba beè fẹ́ a dóm ea bée kọlà Edi, tṍó e bà géè aa nònù kil be. Mósĩ́ deè ní e zìgà Geydi beè nvèè bá nèe kọ á láá ĩ̀ìmà nakà dìtõ̀ò bììla nyíeí ẽ́? À kọ́ọ̀: “Ge tã̀àgã ló Bàrì beè nvèè bá naa kọ ḿ tú nú ea tãagém gbẹẹ́ bá Jìhóvà, vaá a beè naa kọ ḿ ié fẹ́ẹ́-fẹẹ̀ ló bùlà. M beè mòn bé e Jìhóvà ẹb nú ea kilíḿ ló naa tení dú ló pá nà tọ nè pá vígà e bà di mm̀ bõ̀ònatõ̀ò. Ge kilsĩ́ gè sí tóm nè Jìhóvà beè naa kọọ̀ nyíém á gá bọọgẹ̀ bììlà na, vaá a beè nvèè bá nèm kọ ḿ gá ié ná tã̀àgã̀ bùlà buù dee. Nú em ténì báí nóòmàm kọọ̀, kọ̀láá íb tã̀àgã̀ em kpeèsĩ́ ló dì deèsĩ́, nvèè bá ea aa bá Jìhóvà, Jíízọ̀s nè pá vígà é náa kọ ḿ láá bé èlbá.”

17. Éé ní eé láá naa tṍó e kpeèsĩ́ ló ẹ̀bmà ea palàge tàvàlà ẹ?

¹⁷ É kọ ò gé bãagã̀ boo béè kọọ̀ nen eo beè vùlè ú? Noo tṍó bùgmà togó boo gbò nòòtẽ́ ea kil ló kẽ̀èà aa kemà ú, kọbé à agẹlẹ ló o zìgà. É kọ ò gé bãagã̀ boo béè kọọ̀ bà kpó nen ea dṹùnà ni lọl mm̀ bõ̀ònatõ̀ò? Nó nu kọbé ò agàla boo kọọ̀ bá e Jìhóvà ólò dùùmà bá deè tṍ nen ní ea dú lé lọ̀l vaá à lee é. Tú kọ̀láá kà dìtõ̀ò  eo kpeèsĩ́ ló naamá nèà deè ge kpáá agẹlẹ ló o zìgà. Kọ́ kà lèlà bé e nu tọ́a ní ló naa nè Jìhóvà. Tãa vó eo kpoolà o lóó sẹlẹ́ kele, kpáá palàge tõo bã kpàn pá vígà págbálà nè pábia. (Pró. 18:1) Naa gbò nú ea é nveè bá nè ni kọ ó láá ĩ̀ìmà, kọbèè àé náa kọ ó tò tṍó eo kẽèa boo nú ea beè naaá ní ló. (Ps. 126:5, 6) Kilsĩ́ gè olòó sí nònù, kọ́ kpẹ̀a, nè ge bugi Kpá Káí. Vaá ò ká bùlà gbẹẹ́ boo gbò tã́áná dee bá e Jìhóvà zigà nèní dì deèsĩ́. O zìgà é kpáá palàge agaló tṍó eo monì bé e Jìhóvà nveè bá nèni naa.

18. Beè gbò tã̀àgã̀ eo ténì bá doà o zìgà, éé ní eo é láá naa ẽ́?

¹⁸ Beè gbò ẹ̀bmà eo beè tení bá tṍó ea kil nvéeá àbèè kátogóí doà o zìgà, lóó ni á gá ọọ. Tú naamá nèà deè eo íè ge kpáá agẹlẹ ló o zìgà. Bàn Bàrì kọ á nè ni “àgẹ zìgà” belí bé e gbò tómá beè bàn naaá. (Lúùk 17:5, NW.) Bugi nagé togó boo gbò nu dòòmà bá e beè nó mm̀ nakà togó belí. Dì belí Miguel nè Yurai, olòó kẽ̀èa boo kọ̀láá tṍó e Jìhóvà beè nvèè bá nèni. Dì belí nvín Vero nè Anel, olòó tã̀àgã ló Jìhóvà, bọọ èlmà tõ̀ò tṍó e dìtõ̀ò tavàlà. Vaá dì belí Geydi, nyimá kọọ̀ Jìhóvà é láá nvèè bá nèi tení dú ló pá bẹẹ tọ àbèè pá bẹẹ kóò. Tṍó eo sọọ̀ tọ́ deè kọọ̀ Jìhóvà á nvèè bá nèni kọ ó láá ĩ̀ìmà gbò tã̀àgã̀ eo gé téní bá kátogóí, òó gbóó láá àgala boo kọọ̀ àé nveè bá nèni kọ ó ĩ̀ìmà gbò ní eo é beè láá kpeesĩ́ ló dì deèsĩ́.

19. Éé ní e Jíízọ̀s beè dẹlẹ nyíé boo é, vaá éé ní e beele agàla boo é?

¹⁹ Jíízọ̀s beè ló bel boo gbò kiẽ́e ea dú bíi kọọ̀ pá a gbò nyòòne nvée á ié zìgà mm̀ ba dùm, vaá a beè àgala boo kọọ̀ Jìhóvà é nveè bá naa ní e bàé láá bé èlbá gbò ẹ̀bmà e bà kpeesĩ́ ló. (Jọ́ọ̀n 14:1; 16:33) A beè dẹlẹ nyíé boo kọọ̀ agẹ zìgà é náa kọọ̀ gã́bug nen á fùl zelí bá pọ̀b kpo tã̀àgã̀ ea gé dú sĩ́. (Kùùà 7:9, 14) É kọọ̀ olo é dí vá zẹ̀ẹ̀? Tení dú ló sàn nyíe ea aa bá Jìhóvà, òó dí vá zẹ̀ẹ̀ be ò tú kọ̀láá kà nèà deè eo íè kátogóí naamá gbò nú ea é agẹlẹ ló o zìgà!—Híb. 10:39.