45 TOGÓ BEL GE NÒ
Bé E Jìhóvà Ólò Nvèè Bá Nèi Kọ É Láá Kọ́ Kpẹ̀a Naa
“Bàé beè nyimá kọọ̀ ene kà neǹ kọ́ọ̀ bùlà Bàrì beè diè vá zẹ̀ẹ̀.”—ÈZÍ. 2:5.
SỌ́L EA GÃ́BUG DÚ 67 “Vee Moǹ Belá”
GE TENÍ BOO NÚ EÉ NÓ a
1. Éé ní eé láá ẹ̀bmà dẽe ẽ́, vaá éé ní e àgala boo é?
ÈÉ LÁÁ ẹ̀bmà dẽe kọọ̀ gbò nen é náa uuí boo tṍó e gé kọ́ kpẹ̀a. Vaá gbò nàà uú booí é kpáá palàge zoogá dì deèsĩ́. (Dán. 11:44; 2 Tím. 3:12; Kùùà 16:21) Sõò, èé láá àgala boo kọọ̀ Jìhóvà é nvèè bá nèi. Ló éé? Boo béè kọọ̀ Jìhóvà ólò nvèè bá nè pá a gyóòlo kọ bàá láá sí tóm ea né va kọ̀láá bé ea tavàlà naa. Kọbé è láá palàge dã́ ból ló níí, naanii eé ló bel boo sìgà nú ea beè naaá ló neǹ kọ́ọ̀ bùlà Bàrì Èzíkiẹ̀l tṍó ea géè kọ́ kpẹ̀a nè pá Júù e ba beè di kèbá síí-sii gbẹá Bábilọ̀n.
2. Éé ní e Jìhóvà beè kọ́ kilma ló gbò e Èzíkiẹ̀l géè kọ́ kpẹ̀a nèe, vaá éé ní eé ló bel boo mm̀ nakà togó belí é? (Èzíkiẹ̀l 2:3-6)
2 Mó íb gbò ní e ba beè di kiẽ́e e Èzíkiẹ̀l géè kọ́ kpẹ̀a ẹ́? Jìhóvà baatẽ́ nú ea kil vá kọọ̀ bà dú gbò “agẹ togó,” “agẹ nyíe,” nè “gbò lọ̀l togó kèbá.” Ba beè dú pọ́lọ́ belí zél gbẹ̀ vaá dú gẹẹ-gẹẹ ló belí pèèle. M gá kọ́ vó e Jìhóvà beè olòó kọ́ nè Èzíkiẹ̀l kọọ̀: “Pọ̀ á gá sií ni”! (Bugi Èzíkiẹ̀l 2:3-6.) Èzíkiẹ̀l beè láá sí a tóm kọ̀ kpẹ̀a boo béè kọọ̀ (1) Jìhóvà ní ea beè lẹ̀ẹ̀làẹ ẹ́, (2) nyómá káí Bàrì beè nèe kói, vaá (3) Moǹ Bel Bàrì beè agẹlẹ́ẹ ló. Mósĩ́ deè ní e taà kà nuí beè nvèè bá nè Èzíkiẹ̀l ẹ? Vaá mósĩ́ deè ní ea nveè bá nè beele deè nieí é?
JÌHÓVÀ—NÍ EA BEÈ LẸ̀Ẹ̀LÀ ÈZÍKIẸ̀L Ẹ
3. Mókà gbò bel ní ea beè láá siè kpóó ló Èzíkiẹ̀l ẹ, vaá mósĩ́ deè ní e Jìhóvà beè naa kọ á agala boo kọọ̀ àé nveenìè bá neèe ẽ́?
3 Jìhóvà beè kọ́ nè Èzíkiẹ̀l kọọ̀: “Nda é lẹẹlà ni.” (Èzí. 2:3, 4) Gbò belá beè iè ge siè kpóó ló Èzíkiẹ̀l. Ló éé? Boo bèè kọ a beè kẽ̀èa boo kọọ̀ Jìhóvà beè ló íb gbò belá nè Mózìs nè Àìzáíà tṍó ea beè nè va tóm kọ bàá gé kọ́ a bùlà. (Ẹ́xo. 3:10; Àìz. 6:8) Èzíkiẹ̀l beè nyimá nágé bé e Jìhóvà beè nvèè bá nè pálaa ọ̀và kọ bàá láá sí tóm ea tavàlà naa. Vó ní ea beè naa kọọ̀ pálaa tṍó e Jìhóvà kọ́ nè Èzíkiẹ̀l kọọ̀: “Nda é lẹẹlà ni,” Èzíkiẹ̀l beè gbóó láá àgala boo kọọ̀ Jìhòvà é nveenìè bá neèe. Boo èlmà vó, tã́á bel ea kọ́ọ̀: “Moǹ bel Jìhóvà beè kọ́ nèm kọọ̀,” sila gã́bug tṍó mm̀ kpá Èzíkiẹ̀l. (Èzí. 3:16) Vaá gã́bug tṍó a beè emí nágé tã́á bel ea kọọ̀, “Moǹ bel Jìhóvà beè kpáá kọ́ nèm kọọ̀.” (Èzí. 6:1) Mm̀ kà kà, Èzíkiẹ̀l beè àgala boo kọọ̀ Jìhóvà ní ea beè lẹẹlàẹ̀ẹ ẹ́. Gbáló vó, tẹ̀ Èzíkiẹ̀l beè dú neǹ vààla gyọ́ọ, vaá àé láá dú kọọ̀ a beè noòmàe bé e Jìhóvà beè olòó kọ́ nè pá a gbò kọ́ọ̀ bùlà Bàrì kọ àé nveenìè bá neè va naa. Dì belí nu dòòmà bá, Jìhóvà beè kọ́ nè Áízèk, Jékọ̀b, nè Jèrèmáíà kọọ̀: “Nda dì ní ló.”—Jén. 26:24; 28:15; Jèr. 1:8.
4. Mókà gbò moǹ bel nvèè nyíé gbàà ní ea beè siè kpóó ló Èzíkiẹ̀l ẹ?
4 Mósĩ́ deè ní e sìgà pá Ízràẹ̀l é lábmá láb kilma ló lẹ̀ẹ̀la tóm e Èzíkiẹ̀l géè kọ́ nèva ẹ́? Jìhóvà beè kọọ̀: “Pá tọọ̀ Ízràẹ̀l náa é zigà ge pãané ni tṍ ló, boo béè kọọ̀ bà náa gbĩ́ gè pãane tṍ ló nda.” (Èzí. 3:7) Ge kọ bà kin Èzíkiẹ̀l tõó dọ̀ kọọ̀ bà kìn nàgé Jìhóvà. Gbò moǹ belá beè naa kọọ̀ Èzíkiẹ̀l á àgala boo kọọ̀ ge kọọ̀ pá tọọ̀ Ízràẹ̀l kiníe náa zógè kọọ̀ náa beè láá siè a tóm leevè dì belí neǹ kọ́ọ̀ bùlà Bàrì. Jìhóvà beè naa nagé kọ á àgala boo kọọ̀ tṍó e bèèla bel ea gé kọ́á é nááá, gbòa é “nyimá kọọ̀ ene kà neǹ kọ́ọ̀ bùlà Bàrì beè diè vá zẹ̀ẹ̀.” (Èzí. 2:5; 33:33) Mm̀ kà kà, gbò moǹ bel nvèè nyíé gbààá beè nvèè bá nè Èzíkiẹ̀l kọ́ á láá sí a tóm kọ̀ kpẹ̀a leevè.
JÌHÓVÀ NÍ EA LẸẸLÀI TÓM DEÈ NIEÍ É
Dì belí Èzíkiẹ̀l, sìgà gbò náa ólò pãanéi tṍ ló vaá bà ólò naa uuí boo, sõò è nyímà kọọ̀ Jìhóvà dìí ló (Ẹ̀b 5-6 kpò)
5. Dẹ̀ẹ̀a boo nú ea di mm̀ kpá Àìzáíà 44:8, ãàe ní e bẹẹ kói ólò ààẹ?
5 À ólò siè nagé kpóó ló beele gè nyimá kọọ̀ Jìhóvà ní ea lẹẹlài tóm ẽ́. À nveèi ka ló tení dú ló gè kolíi pá gbò “neǹ ditõ̀ò.” (Àìz. 43:10) Níá kà pọ̀bkà nèà deè e íè! Dì belí bé e Jìhóvà beè kọ́ né Èzíkiẹ̀l kọọ̀ ‘pọ̀ á gá siíe’ naaá, níà bé ea kọ́ nágé nè beéle kọọ̀: “Ó gá iei kéné ló,” naa ẽ́. Éé ní ea náa vaá náa dú bíi kọọ̀ pọ̀ á siíi ló gbò e ba gé uuí boo é? Boo béè kọọ̀ Jìhóvà ní ea lẹẹlài é, vaá à dìí ló belí bé ea beè di ló Èzíkiẹ̀l naaá.—Bugi Àìzáíà 44:8.
6. (a) Mósĩ́ deè ní e Jìhóvà zigà kọọ̀ àé nveenìè bá neèi ẽ́? (b) Ãàe ní e ólò ié nvèè nyíé gbàà nè sìà kpóó ló lọ̀l ẹ?
6 Jìhóvà zigà kọọ̀ àé nveenìè bá neèi. Dì belí nu dòòmà bá, besĩ́ à kalá kọọ̀: “Booloò pá ńdáà gbò neǹ ditõ̀ò,” a beè zẹ́ẹ́ kọọ̀: “Tṍó eo gé ténií mm̀ múú, nda é díí ló, vaá tṍó eo gé ténií pène, náa é túi. Tṍó eo é ténií dáà sã́, náa é táái, àbèè kọ a kéi é sím̀ nùló gbẹaí ló.” (Àìz. 43:2) È ólò kpeesĩ́ ló gbò ànà-ànà ea belí pene múú nè sã́ tṍó e gé kọ́ kpẹ̀a. Náa kal ló béè vó, tení dú ló nvèè bá Jìhóvà, èé láá kilsĩ́ gè kọ́ kpẹ̀a. (Àìz. 41:13) Dì belí gbò e ba beè di mm̀ deè Èzíkiẹ̀la, gã́bug nen ólò kìn lẹ̀ẹ̀la tómí deè nieí. Sõò, èé kẽeà boo kọọ̀ ge kọ gbò nen kin lẹẹla tómí náa tõó dọ̀ kọọ̀ née láà kọ́ kpẹ̀a leevè. À ólò nvèèi nyíé gbàà vaá sèi kpóó ló tṍó e nyímà kọọ̀ nyíè Jìhóvà ẹẹ tṍó e kilsĩ́ gè kọ́ kpẹ̀a mm̀ bọ́ọ̀ló dẹ̀lẹ̀ nyíé boo. Neǹ tóm Pọ́ọ̀l beè kọọ̀: “Bàrì é kpẽ́ nè buù nen nyòòmà bé e tóm e ẹlẹ beè sì tóólá naa.” (1 Kọ́r. 3:8; 4:1, 2) Ene kà vígà pábia ea ni tú gã́bug gbáá siimá tóm gyà deèsĩ́ tóm kọ̀ kpẹ̀a kọ́ọ̀: “Nyíém ólò ẹẹ tṍó em nyímà kọọ̀ Jìhóvà é ném kpẽ́ ló nà pììgà.”
NYÓMÁ KÁÍ BÀRÌ BEÈ SIÈ KPÓÓ LÓ ÈZÍKIẸ̀L
Èzíkiẹ̀l beè mòn faà bé Jìhóvà mm̀ mòà nù dẽe, vaá níí beè sièe kpóó ló kọ á àgala boo kọọ̀ Jìhóvà é nveenìe bá neèe kọ á láá síè a tóm kọ̀ kpẹ̀a lọl dẽe (Ẹ̀b 7 kpò)
7. A beè tọá ló Èzíkiẹ̀l naa vàẹ tṍó ea bugi togó boo nú ea beè mon mm̀ mòànù dẽeá ẽ́? (Ẹ̀b fùtó ea di boo kóó kpáí.)
7 Èzíkiẹ̀l beè mòn bé e nyómá káí Bàrì íe kpóó naa. Nú e Èzíkiẹ̀l beè mon mm̀ mòà nù dẽe beè nvèè bá nèe kọ á nyimá kọọ̀ nyómá káí Bàrì ní ea gé nvèè bá nè gbò nyómá tóm Bàrì vaá naa kọọ̀ pọ̀bkà kpú kẽ ea di kè kẽè faà bé Jìhóvà á kyã̀àe. (Èzí. 1:20, 21) Èzíkiẹ̀l beè labví láb naa vàẹ? A beè emí gbò nú ea moná. À kọ́ọ̀, “Tṍó em monì, m beè kumí sĩ́ kẽ.” A beè palàge bọọ́ ló Èzíkiẹ̀l naa ní ea dọ kumí sĩ́ kẽ. (Èzí. 1:28) Kọ̀láá tṍó e Èzíkiẹ̀l bugi togó boo nú ea beè mon mm̀ mòànù dẽeá, à ólò naa kọ á àgala boo kọọ̀ àé láá siè a tóm leevèè tení dú ló nvèè bá ea aa bá nyómá káí Bàrì.
8-9. (a) Éé ní ea beè naaá ló Èzíkiẹ̀l tṍó e Jìhóvà kọ́ nèe kọ á “elá èla” ẹ́? (b) Mósĩ́ deè ní e Jìhóvà beè kpáá siè kpóó ló Èzíkiẹ̀l mm̀ a sìtóm kọ̀ kpẹ̀a ẹ́?
8 Jìhóvà beè kọ́ nè Èzíkiẹ̀l kọọ̀: “Nvín nen, elá èla mè nda é ló bel nè ni.” Tṍó ea kó naa vó nè Èzíkiẹ̀l, a beè gbóó kpáá ié kóí ea náa kọ á láá elá èla. Èzíkiẹ̀l beè emí kọọ̀: “Nyómá beè gbóó bã̀m m vaá naa kọ ḿ elá èla.” (Èzí. 2:1, 2) Tṍó e tṍó tení, “Bá Bàrì”—ea tõó dọ̀ a nyómá káí beè nvèè bá nè Èzíkiẹ̀l mm̀ dénè a sìtóm kọ̀ kpẹ̀a. (Èzí. 3:22; 8:1; 33:22; 37:1; 40:1) Nyómá káí Bàrì beè nvèè bá nè Èzíkiẹ̀l kọ á láá sí tóm e Bàrì beè nèeá—ea dú gè kọ́ kpẹ̀a nè gbò e ba beè “ié agẹ togó nè agẹ nyíe” e ba beè di mm̀ a deeá. (Èzí. 3:7) Jìhóvà beè kọ́ nè Èzíkiẹ̀l kọọ̀: “M náa kọọ̀ o sĩ́ á àgà belí ba sĩ́ vaá m náa kọọ̀ boo gbòsĩ́ ni á àgà belí ba boo gbòsĩ́. Ndaa náa kọọ̀ boo gbòsĩ́ ni á belí diamond, vaá àgà èl báà dem. Pọ̀ á gá sií ni lóó va, àbèè ge ié kéné ló boo béè bé e sĩ́ va meà naa.” (Èzí. 3:8, 9) Aẹ̀ belí kọọ̀ Jìhóvà gé kọ́ nè Èzíkiẹ̀l kọọ̀: ‘Ó gá sọ̀tọ́ deè kọọ̀ ba agẹ togó á ọọvẹ́ ni ló. Nda é agẹlẹ́ ni ló.’
9 Tṍó e tṍó téní, Bàrì beè tú a nyómá káí nvèèmà bá nè Èzíkiẹ̀l mm̀ a sìtóm kọ̀ kpẹ̀a. Èzíkiẹ̀l beè emí kọọ̀: “Bá Jìhóvà beè palàge agẹlẹ́m ló.” A beè tú enè sè bá neǹ kọ́ọ̀ bùlà Bàrìí kọ á noomá vaá dã́ból ló lẹẹla tómá kọbé à láá tú agẹ ló kọọmá nè gbò nen. (Èzí. 3:14, 15) Tṍóá Jìhóvà beè gbóó kọ́ nèe kọ á àà kil mm̀ kolo-kolo kẽ kiẽ́e e “nyómá [é bã́é] m.” (Èzí. 3:23, 24) Èzíkiẹ̀l beè di kpènà ló gè dààmà togó a sìtóm kọ̀ kpẹ̀a.
NYÓMÁ KÁÍ BÀRÌ ÓLÒ NÈI KÓI E ÍÈ BÍI LÓ
É é ní ea beè nvèè bá nè Èzíkiẹ̀lẹ, vaá éé ní ea ólò nvèè bá nè beele deè nieí kọ é láá kilsĩ́ gè kọ́ kpẹ̀a ẹ́? (Ẹ̀b 10 kpò)
10. Éé ní e íè bíi ló kọbé è láá kọ́ kpẹ̀a ẹ́, vaá ló éé?
10 Mókà nvèè bá ní e íè bíi ló kọbé è láá kọ́ kpẹ̀a ẹ́? Kọbé è láá aalá nakà bíbví, kẽ̀èa boo nú ea beè naaá ló Èzíkiẹ̀l. Besĩ́ à kalá dààmà togó gè kọ́ kpẹ̀a, nyómá kái Bàrì beè nèe kói ea íe bíi ló. Dì belí bé ea beè naaá ló Èzíkiẹ̀l naaá, áá beele née é láá kọ́ kpẹ̀a beè nyómá káí Bàrì náa nveè bá nèi. Ló éé? Boo béè kọọ̀ Sétàn dì ea gé béi kọbé née láà kọ́ kpẹ̀a. (Kùùà 12:17) Gã́bug nen ólò bugi togó kọọ̀ née é láá bé Sétàn èlbá boo béè kọọ̀ à palàge ié kpóó. Sõò tení dú ló sìtóm kọ̀ kpẹ̀aí, è gé bée èlbá! (Kùùà 12:9-11) Mósĩ́ deè e? Tṍó e kọ́ọ̀ kpẹ̀a, è zógè kọọ̀ pọ̀ náa sííi ló Sétàn. Buù tṍó e gé kọ́ kpẹ̀a, lóó Sétàn ólò ọọ. Vóà naa, éé ní eé gbóó láá kọọ̀ à ólò nvèè bá nèi kọ é kilsĩ́ gè kọ́ kpẹ̀a bã̀àna tṍó e gbò nen náa uuí boo é? Èé láá kọọ̀ nyómá káí Bàrì ní ea ólò sièi kpóó lóé, nè ge kọọ̀ Jìhóvà ténmài.—Máát. 5:10-12; 1 Pít. 4:14.
11. Éé ní e nyómá káí Bàrì é náa nèi ẽ́, vaá éé ní eé láá naa kọbé è kilsĩ́ gè iéé?
11 Dõòna kà éé ní e agàla boo tṍó e bugì togó boo bé e Jìhóvà beè siè kpóó ló Èzíkiẹ̀l kọ á láá kọ́ kpẹ̀a naa ẽ́? Nyómá káí Bàrì é láá sièi kpóó ló kọ é bé èlbá kọ̀láá íb tã̀àgã̀ e kpeèsĩ́ ló tṍó e gé kọ́ kpẹ̀a. (2 Kọ́r. 4:7-9) Beè vó, éé ní eé láá naa kọbé è kilsĩ́ gè ié nyómá káí Bàrì e? À dú bíi kọ é kilsĩ́ gè tã̀àgã ló Jìhóvà, vaá è dẹlẹ nyíé boo kọ àé aalá bẹẹ tã̀àgã ló. Jíízọ̀s beè noòmà pá a gbò nyòòne nvée kọọ̀: “Banii, . . . Gbĩi, . . . Konii bá ló.” Jìhóvà é aalá vaá tú a “nyómá káí nè gbò e bà bĩ́inaé bá.”—Lúùk 11:9, 13; Tóm 1:14; 2:4.
MOǸ BEL BÀRÌ BEÈ AGẸLẸ LÓ ZÌGÀ ÈZÍKIẸ̀L
12. Dẹ̀ẹ̀a boo nú ea di mm̀ kpá Èzíkiẹ̀l 2:9–3:3, úl kpáá beè aa ãàe, vaá éé ní ea di m ẽ́?
12 Níì áá nyómá káí Bàrì ní ea beè nè agẹ ló Èzíkiẹ̀lẹ nì, Moǹ Bel Bàrì beè agẹlẹ nagé ló a zìgà. Mm̀ mòànù dẽeá, Èzíkiẹ̀l beè mòn úl kpá ea di bá nen. (Bugi Èzíkiẹ̀l 2:9–3:3.) Úl kpáá beè aa ãàe? Éé ní ea di m ẽ́? Mósĩ́ deè ní e nú ea di m beè siè kpóó ló Èzíkiẹ̀l ẹ? Naanii eé ẹb. Úl kpáá aa ló kpòté méné Bàrì. Àé láá dú kọọ̀ Jìhóvà beè tú ene kà zẹ̀ẹ̀ ténì kà gbò nyómá tóm e Èzíkiẹ̀l beè zẹ́ẹ́ mòna nèèmàe úl kpáá. (Èzí. 1:8; 10:7, 20) Úl kpáá fáálá gbò bèèla bel e Bàrì beè kọọ̀ Èzíkiẹ̀l á kọ́ nè gbò lọ̀l togó kèbá e ba beè di ól síí-siiá. (Èzí. 2:7) Ba beè emí lẹ̀ẹ̀la tómá sĩ́ nè nvéè ul kpáá.
13. Éé ní e Jìhóvà beè kọ́ nè Èzíkiẹ̀l kọ á naa ló úl kpáá ẹ́, vaá éé ní ea náa kọ á kpè e?
13 Jìhóvà beè kọ́ nè nen ea géè kọ́ a bùlàa kọ á tagi úl kpáá “naa ní ea é [ḿ-maé] gbàà.” Èzíkiẹ̀l beè gbàntṍ ló vaá tagi zivè kà úl kpáá. Éé ní e nagá ea di ló mòànù dẽeí tõó dọ̀ ẹ? A beè dú bíi kọọ̀ Èzíkiẹ̀l á palàge ge dã́ból ló lẹ̀ẹ̀la tóm ea é gé kọ̀í. A beè dú bíi kọ á zigà ló belá kọbé à láá vee lẹ̀ẹ̀la tómá. Sõò à íe nu bọ̀ọ̀ ló ea beè naaá. Èzíkiẹ̀l beè mòn kọọ̀ úl kpáá kpé “gã́ belí nóò záá zóó.” (Èzí. 3:3) Ló éé? Ge kọọ̀ Èzíkiẹ̀l gé sí tóm e ka di ló ea dú gè elá dọ̀ Jìhóvà beè dú lé vaá kpe ló. (Ps. 19:8-11) Nyíée beè ẹẹ kọọ̀ Jìhóvà sáẹ kọ á duè a neǹ kọ́ọ̀ bùlà Bàrì.
14. Éé ní ea beè nvèè bá nè Èzíkiẹ̀l kọ á di kpènà ló gè sí a tóm ẽ́?
14 Tṍó e tṍó téní, Jìhóvà beè kọ́ nè Èzíkiẹ̀l kọọ̀: “Gbàntṍ ló kọ̀láá kà bel em kọ́ọ̀ nèni vaá ò tú sẹ̀ẹ̀a bùlà.” (Èzí. 3:10) Tení dú ló gbò belá, Jìhóvà beè kọ́ nè Èzíkiẹ̀l kọ á tú gbò bel ea di mm̀ úl kpáá sẹ̀ẹ̀a bùlà vaá bugi togó boo. Ge naa vò beè agẹlẹ ló zìgà Èzíkiẹ̀l. A beè naa nagé kọọ̀ á láá tú agẹ ló vèèmà lẹ̀ẹ̀la tómá nè gbò nen. (Èzí. 3:11) Tṍó e Èzíkiẹ̀l dã́tẽ́ ló vaá zigà ló lẹ̀ẹ̀la tómá, a beè gbóó di kpènà ló gè kọ́ kpẹ̀a vaá kilsĩ́ gè naa vó dòòmà tṍó ea sí tómá lọ̀l.—Doolé ló Psalm 19:14.
DEÈ NIEÍ—MOǸ BEL BÀRÌ ÓLÒ AGẸLẸ LÓ BẸẸ ZÌGÀ
15. Kọbé è láá kilsĩ́ ge kọ́ kpẹ̀a, éé ní ea dú bíi kọ é “sẹ̀ẹ̀a bùlà” ẹ?
15 Kọ́bé è láá kilsĩ́ gè kọ́ kpẹ̀a, à dú nágé bíi kọ é naa kọọ̀ Moǹ Bel Bàrì á agẹlẹ ló bẹẹ zìgà. À dú bíi kọ é tú kọ̀láá kà bel e Jìhóvà kọ́ nèi “sẹ̀ẹ̀a bùlà.” Deè nieí, Jìhóvà ólò ló bel nèi tení dú ló a Moǹ Bel ea dú Kpá Káí. Mósĩ́ deè ní eé láá kilsĩ́ gè naa kọọ̀ Moǹ Bel Bàrì á tọá ló bẹẹ bug, bé e nu tọaí ló naa, nè bé e labvì láb naa ẽ́?
16. Éé ní eé íè ge tú Moǹ Bel Bàrì naamáé, vaá éé ní eé naa kọbé è dã́ból ló Moǹ Bel Bàrì e?
16 Dì belí bé e gyã́á ólò agẹlẹ́i ló naaá, níà bé e Moǹ Bel Bàrì ólò agẹ́lẹ́i ló tṍó e nóò vaá bugi togó boo naa ẽ́. Èé tú gbò nú e nóò lọl ló úl kpáá sẹ̀ẹ̀a bùlà. Jìhóvà gbĩ́ kọọ̀ a Moǹ Bel á “[ḿ-máí] gbàà,” naamá gè kọọ̀ é palàge dã́ból ló a Moǹ Bel. Èé láá naa vó, tení dú ló ge tã̀àgã ló Bàrì, bugi Kpá Káí, vaá bugi togó boo. Túá kà, èé kpóògè dee ló bẹẹ nyíe tení dú ló gè tãagã ló Bàrì kọbé è láá dã́ a bùlà. Tṍóá è gbóó bugi Kpá Káí. Tṍó e ni bugi lọ̀l, èé gbóó zẹ́ẹ́ elá vaá palàge bugi togó boo gbò nú e géè bugi. Éé ní ea é silà aa m ẽ́? Bé e bugì togó boo naa, níà bé eé dã́ból ló Moǹ Bel Bàrì vaá agẹlẹ ló bẹẹ zìgà naa ẽ́.
17. Éé ní ea náa vaá à dú bíi kọ é bugi togó boo gbò nú e bugì lọl mm̀ Kpá Káí é?
17 Éé ní ea náa vaá à dú bíi kọ é bugi Kpá Káí vaá bugi togó boo é? Ge naa vó, é náa kọ é ié kói gè kọọmà kpẹ̀a ea kil ló Boǹ Méné Bàrì kátogóí vaá kọọmá agẹbá bèèla bel mm̀ dì deèsĩ́. Tṍó e bugì nagé togó boo gbò lé kpãa e Jìhóvà íe, àé náa kọọ̀ é kpáá palàge agaló. Nú ea é silà aa m é dú kọọ̀, èé dé kpéè ló nù ea palàge kpè àbèè nú ea dú lé—ea dú fẹ́ẹ́-fẹẹ̀ ló nè dĩ̀ìnè ló bùlà.—Ps. 119:103.
JÌHÓVÀ ÓLÒ SIÈI KPÓÓ LÓ KỌBÉ È LÁÁ KILSĨ́ GÈ KỌ́ KPẸ̀A
18. Éé ní e gbò e bà di kiẽ́e e ólò kọ́ kpẹ̀a é beè nyimáé, vaá ló éé?
18 Beele née ólò kọ́ bùlà Bàrì belí Èzíkiẹ̀l. Sõò, è béèlàfùl ge kilsĩ́ ge vee gbò Moǹ Bel Jìhóvà ea di mm̀ Kpá Káí dọ̀ọ̀mà tṍó ea é nveè kùbmà ló sìtóm kọ̀ kpẹ̀a. Tṍó bèèla bel, gbò e bà di kiẽ́e e ólò kọ́ kpẹ̀a náa é ié nú e bàé gbá ból kọọ̀ bà náa beè dãé ã̀àne àbèè kọọ̀ Bàrì dõogẽ kyọẹ̀ va sĩ́. (Èzí. 3:19; 18:23) Tãa vó, bàé nyímá kọọ̀ lẹ̀ẹ̀la tóm e géè veeá beè aa bá Bàrì.
19. Éé ní ea é néi kói kọ é kọ́ kpẹ̀a iná kùbmà ẽ?
19 Éé ní ea é néi kói kọ é kọ́ kpẹ̀a iná kùbmà ẽ? Taà kà nú ea beè siè kpóó ló Èzíkiẹ̀la ní ea é sièi kpóó lóé. Èé kilsĩ́ gè kọ́ kpẹ̀a boo béè kọ è nyímà kọọ̀ Jìhóvà ní ea beè lẹ̀ẹ̀lài é, nyómá káí Bàrì ólò sièi kpóó ló, vaá Moǹ Bel Bàrì ólò agẹlẹ ló bẹẹ zìgà. Tení dú ló nvèè bá ea aa bá Jìhóvà, èé láá kilsĩ́ gè kọ́ kpẹ̀a vaá ‘ĩ̀ìmà tẹlẹ kùbmà.’—Máát. 24:13.
SỌ́L EA GÃ́BUG DÚ 65 Sìm Kilsĩ́!
a Mm̀ nakà togó belí, èé ló bel boo taa kà nú ea beè nvèè bá nè neǹ kọ́ọ̀ bulà Bàrì Èzíkiẹ̀l mm̀ a sìtóm kọ̀ kpẹ̀a. Èé ló bel boo bé e Jìhóvà beè nvèè bá nè neǹ kọ́ọ̀ bùlà Bàrìí naa, vaá níí é náa kọ é àgala boo kọọ̀ àé nveè nagé bá nè beele mm̀ bẹẹ sìtóm kọ̀ kpẹ̀a.