É kọ à ólò tàvàlà ní ló gè nó Kpá Káí buù sè, sẹ̀ nóo ólò dé kpéè ló gè nó nu boo o lóó é? À ólò láá mèà naa vó ló dénè bẹ̀ì sìgà tṍó. Sõò bugi togó boo sìgà nú e ólò naá kọ̀láá dee dì belí gè bìlà múú. Ge bìlà múú ólò túi tṍó bá, sõò lóói ólò dĩ̀ìnà tṍó e bilà lọ̀l! Gé nó Kpá Káí ólò dĩinéi ló belí “múú” e bilà. (Ẹ́fẹ. 5:26) Naanii èé ló bel boo sìgà lọ̀ọ̀gà bùlà ea é láá nvèè bà nèì:

• Noo tṍó eo é nóómá Kpá Káí buù sè. Ge nó Kpá Káí di gbàà gbò nú “ea palàge dú bíi” kọ buù bẹ̀ì é naa dì belí gbò e gé nyoone nvéè Kráìst. (Fíl. 1:10) Kọbé tṍó eo beè noo gè noomá Kpá Káí náa tá ní nyíe, òé láá emí deeá nè tṍóá sẹlẹ́ kĩée eo é valẹ̀bá mòn, àbèè kọ ò náa sẹ́ẹ̀t àlám̀ boo o fóòn naa ní ea é olóò kẽe ní nyíe.

• Bugi togó boo tṍó nè sĩ́deè ea é palàge valí ní ló gè noomá nu. É kọ à ólò valí ní ló gè tú begè dẽè tṍó noomá nu, sẹ̀ ge tú ńkpulu dẽè tṍó noomá nu ní ea ólò valí ní ló é? Gé nyimá bé eo dìtõ̀ò meà naa é nveè bà nè ni kọ ó noo tṍó ea é lée ní ló. Beè tṍó eo beè noo gè noomá nu lée vaá náa tan ni, òé láá sà ge tú kóló òb kà mínìt noomá nu. Ge tú kóló òb kà mínìt noomá nu dú lé èl ge kọ nóo nóò. Be à sẹlẹ tṍó eo ni daamà togó gè nò, àé láá tàn ni gè kilsĩ́.​—Fíl. 2:13.

• Tú tṍó gbẹẹ́ sĩ́ sà togó bel eo é nó. Be ò élá bànà tṍó eo é nó nu besĩ́ ò kálá sà togó bel eo é nó, nóo é láá tú o ‘tṍó naamá lé nu.’ (Ẹ́fẹ. 5:16) Vóà naa, òé láá emí gbò togó bel eo gbĩ́ gè nò nvee dẽè kpá. Dí belí nu dòòmà bá, òé láá emí bíb àbèè nú e nóo láà dã́ ból ló dẽè kpá. Vaá kọ̀láá tṍó eo ni nó nu lọ̀l, òé láá emí gbò togó bel ea é tan ni gè nó dõona tṍó.

• Di kpènà ló gè nyaaná bá ló nu. Òé láá pììgà ge nyaaná bá ló sìgà nu, dì belí tṍó eo ólò noomá nu àbèè togó bel eo beè sà. Ge nó nu buù sè ní ea palàge dú bíi é. Kọbé ò láá naa vó, àé láá dú bíi kọ ó nyaaná bá ló dee nè tṍó, begè dẽè tṍó eo nóòmà nu, nè togó bel eo é nó.

Be è nó nu buù sè, èé íe gã́bug bélè lọl ló, bẹẹ gbaa ló kilma ló Jìhóvà é palàge agaló, vaá èé láá nè kà lé béèlàfùl mm̀ dùm vaá ié agẹló.​—Jós. 1:8.