1. Mósĩ́ deè ní e nyímà kọọ̀ tóm gè naa gbò nyòòne nvée dú tóm ea man dùùà ẹ?

TÓM gè naa kọọ̀ gbò nen á nyoone nvéè Kráìst dú tóm ea é duulà gbò nen! Éé ní ea náa è nyimáé? Tṍó e Jíízọ̀s beè nè log ea di mm̀ kpá Máátìù 28:19, 20, a beè kọọ̀: ‘Aalii gé naanii kọọ̀ dénè gbò nen á nyooném tení dú ló gè tuí va diileí múú.’ Ge dììa múú dú bíi naa vàẹ? Èé íè ge dììa múú é be è gbĩ́ì ge dùùà. Nen ea gbĩ́ gè dììa múú íè ge zìgà kọọ̀ àé íèè di dùm e bè náa tá boo béè kọọ̀ Jíízọ̀s beè úí boo. Níà nú ea beè naa vaá neǹ tóm Pítà beè kọ́ nè gbò e bà géè gbá nyoone nvéè Kráìst kọọ̀: “[Dììa múú] gé duulà boolo kátogóí . . . tení dú ló kẽ̀èà aa ke mà ú Jíìzọ̀s Kráìst.” (1 Pít. 3:21) Vóá, tṍó e nen ea ã́àa nyoone nvéè Kráìst diìa múú, àé láá ẹ̀bmà dẽè ge tõó dùm dọ̀ dè-dè.

2. Mó íb neǹ nóòmà nu ní e 2 Tímotì 4:1, 2 kọ é dù e?

² Kọbé è láá naa kọ gbò nen á nyoone nvéè Kráìst, à dú bíi kọ é láá “noomà nu gbò nen.” (Bugi 2 Tímotì 4:1, 2.) Ló éé? Boo béè kọọ̀ Jíízọ̀s beè nèi log kọọ̀: ‘Aalii gé naanii kọọ̀ dénè gbò nen á nyooném tení dú ló gè tuí va diileí múú.’ Neǹ tóm Pọ́ọ̀l beè kọ é ‘olòó naa vó lee boo bée kọ be è náa vó, èé láá dùùlà bẹẹ bá, biina gé ló gbò e bà gé pãanéi tṍ ló.’ Boo béè lé bug, Pọ́ọ̀l beè kọọ̀: “Palà ge ọẹ dẽeni e a kil ló íb . . . nu e o é nóomà.” (1 Tím. 4:16) À bọ́ló kọ é láá palàge noomà nuù gbò nen, be à gá náa è gbĩ́ì kọọ̀ bàá nyoone nvéè Kráìst.

3. Éé ní eé ló sọ́l boo ea kil ló gè sẹlẹ nò Kpá Káí mm̀ nakà togó belí é?

³ È dì e gé tú gbò kà kà bel ea di mm̀ Kpá Káí má gã́bug gãà gbò nen beeá ló bàlà booí. Sõò dì belí bé e nakà togó bel e beè nòa kọ́ naa, è gbĩ́ì gè nyimá sĩ́deè ge nvèèmà bá nè gbò e ólò noòmà Kpá Káí kọ bàá dììa múú vaá dú gbò e bàé nyoone  nvéè Kráìst. Mm̀ nakà togó belí, èé ló sọ́l boo dõòna kà vòò kà nú e kọ̀láá nen ea ólò noomà Kpá Káí nen é láá naa mm̀ ge nvèè bá nè nen ea ólò noòmà nu kọ á sìm tùlà ge dììa múú.

4. Éé ní ea náa vaá nen ea gé nóòmà nu íè ge lẹ̀ẹ̀là bel ló a bá tṍó ea gé sẹlẹ nò Kpá Káí é? (Ẹ̀b nàgé émì nu ea di kè kẽí.)

⁴ Nyíéi ólò ẹẹ ló nu e nóòmà lọl mm̀ Moǹ Bel Bàrì. Vó é láá naa kọ é ló bel èlmà ló tṍó e gé nóòmà nú ea kil ló. Sõò, kọbèè è gé sẹlẹ nònù Kpá Tọ Kùdẽe Ló, Nò Kpá Káí Bõ̀ònatõ̀ò, àbèè nò Kpá Káí tọ, nen ea gé sẹlẹ á gá ló bel èlmà ló. Kọbé è láá tú Kpá Káí siimá tóm leevè tṍó e gé nóòmà nu, à dú bíi kọọ̀ nen ea gé nóòmà á láá lẹ̀ẹ̀là bel ló a bá vaá á gá gbĩ́ gè baatẽ́ kọ̀láá kà nú ea nyímá ea kil ló dọ̀ Kpá Káí ea bugi àbèè togó belá. * (Jọ́ọ̀n 16:12) Zẹ́ẹ́ bugi togó boo gã́bug nú eo beè nyimá ea di mm̀ Kpá Káí tṍó eo beè dììa múú nè ní eo ni nyímá kátogóí. Mm̀ kà kà, tṍó eo beè dììa múú, túá kpãà nyìmànù ea kil ló gbò nú e Kpá Káí nóòmà ní eo beè nyimáé. (Híb. 6:1) A beè tú ni zivètõ̀ò tṍó bá gè noomá nú eo nyímà deè nieí, boo béè vó, ó gá gbĩ́ gè tú dénè nu noòmà ãa nen eo ólò noòmà nú tẽ̀ènè tṍó.

5. (a) Dẹ̀ẹ̀a boo nú ea di mm̀ 1 Tẹ̀sàlónaikà 2:13, éé ní e gbĩ́ì kọọ̀ nen e ólò noòmà nu á dã́tẽ́ ló lọl mm̀ a nònù ẽ? (b) Mósĩ́ deè ní eé láá siè kpóó ló nen e ólò noòmà nu kọ á ló bel boo gbò nú ea nó ẽ́?

⁵ È gbĩ́ì kọọ̀ nen e ólò noòmà nu á dã́tẽ́ ló kọọ̀ nú ea gé nó aa mm̀ Moǹ Bel Bàrì. (Bugi 1 Tẹ̀sàlónaikà 2:13.) Mósĩ́ deè ní eé láá naamá vó é? Siè kpóó ló nen eo ólò noòmà nu kọ á ló bel boo gbò nú ea gé nó. Tãa vó eo dõogẽ baatẽ́ kọ̀láá kà nu nèe, kọ́ nèe kọ ẹlẹ á baatẽ́ sìgà nè olo. Nvèè bá nèe kọ á mòn bé ea é láá tú Kpá Káí siimá tóm mm̀ a dùm naa. Bĩináe gbò bíb ea é náa kọọ̀ á kọ́ nu ea bugi togó boo àbèè a tọa ló kilma ló gbò dọ̀ Kpá Káí ea bugi. (Lúùk 10:25-28) Dì belí nu dòòmà bá, bĩináe kọọ̀: “Mósĩ́ deè ní e dọ̀ Kpá Káíí nveè bá nè ni kọ ó mòn ene kà kpãà Jìhóvà ẹ?” “Mósĩ́ deè ní e nú eo bugì lọl mm̀ Kpá Káíá é láá nvèè bá nè ni ẽ́?” “Mósĩ́ deè ní e nú eo ã́àa bugiá tọ́a ní ló é?” (Pró. 20:5) Nú ea palàge bọọ, níì gã́bug nú e nen eo ólò noòmà nu nyímá nì, sõò bé ea vulè vaá tú gbò nuá siimá tóm naa.

6. Éé ní ea náa àé dú lé gè kọọ̀ nen ea ólò láá palàge noòmà nu á zọ̀i sì gé sẹlẹ nò Kpá Káí é?

⁶ Tṍó eo gé sẹlẹ nò Kpá Káí, é kọọ̀ ò ólò faalá gbò vígà e bà ólò láá palàge noòmà nu? Be ò ólò naa vó, òó láá bĩiná va nú e baála bùlà kọ́ kilma ló bá eo sẹẹ̀mà nò Kpá Káíá nè be ò láà tuè gé Kpá Káí siimá tóm leevè. Be ò gbĩ́ì ge dú kà lé neǹ nòòmà nù, òó íè ge kìlmà kpá ló kẽ. (Doolé Tóm 18: 24-26.) Tṍó ea é lée, bĩiná neǹ vígà ea ólò láá palàge noòmà nuá, be ẹlẹ bulà kọọ̀ nen eo géè noòmà nuá dã́tẽ́ ló nú ea gé nó. Òó láá kọ nágé nè neǹ vígàá kọ ẹlẹ á sẹlẹ nò Kpá Káí nè ni, be olo nóo é dí mm̀ ene àbèè bàà sè. Níá é náa kọọ̀ nònùa á kilsĩ́ lee vaá naa kọọ̀ nen ea gé nó nuá á nyimá bé ea nònù palàge dì bíi naa. Á gá tõó ní ló kọọ̀ níì “ńdáà” nò Kpá Káí vaá tọ́ọ̀ nen náa é láá sẹlẹ. Bọọ èlmà tõ̀ò, ò gbĩ́ì nú ea é léé ló nen eo ólò noòmà nu naa ní ea é láá olòó nó zivètõ̀ò nú ea kil ló kà kà belí.

7. Éé ní ea é nveè bá nè nen ea gé nó Kpá Káí kọ nyíée á ẹẹ ló nú ea gé nóé?

⁷ À bọ́ló kọọ̀ nen eo ólò noòmà nu á mòn kọọ̀ ò vulè vaá dẹlẹ nyíé boo gbò nú e Kpá Káí nóòmà. (1 Tẹ̀s. 1:5) Tṍóá, gbò nú ea gé nó é láá gbóó ẹẹlẹ̀ẹ nyíe. Be à bọ́ló, kọ́ nèe bé e gè tú gbò nòòkúù Kpá Káí siimá tóm a nveè bá nè olo naa. Tṍóá àé gbóó nyimá kọọ̀ Kpá Káí fáálá gbò tùle ea é láá nvèè bá nèe.

8. Dõòna kà éé ní eo é láá naa gè nvèè bá nè nen eo ólò noòmà Kpá Káí é, vaá éé ní ea náa òó náa vó é?

⁸ Tṍó e nò Kpá Káí gé kilsĩ́, kọ́ nè o nvín nò Kpá Káí nú ea kil ló gbò gbálà nè gbò bia e ba beè kpee sĩ́ ló gbò nu ànà-ànà ea bélí íb ńlẹ vaá bà bé èlbá. Òó láá faalá enè nen ea di bọọ bõ̀ònatõ̀ò ea lé nu dòòmà bá é láá dọ̀ bélè nè nvín nò Kpá Káíá. Àbèè kọọ̀ òó láá gbĩ́ gbò nú ea beè nááá ló nen ea é síèe kpóó ló lọl boo jw.org gbàà togó bel ea kọ́ọ̀: “The Bible Changes Lives.” * Íb gbò togó belá nè vídiòá é nveè bá nè nen eo ólò noòmà Kpá Káí kọ á mòn bé e nyìmànù di mm̀ gè kọ á tú gbò nòòkúu ea di mm̀ Kpá Káí siimá tóm mm̀ a dùm naa.

9. Mósĩ́ deè ní eé láá siè kpóó ló nvín nò Kpá Káí kọ á kọ́ nú ea kil ló nú ea gé nó nè pá a tọ nè kóò e?

⁹ Beè nen eo ólò noòmà nu beè ilí àbèè ge iá, é kọọ̀ a dóm àbèè a va ólò zọ̀nài gé noá nu? Be náa ólò naa vó, kolíe kọ á zọ̀i nó nu. Siè kpóó ló o nvín nò Kpá Káí kọ á kọ́ gbò nú ea gé nó nè pá a tọ nè pá a kóò. (Jọ́ọ̀n 1:40-45) Mósĩ́ deè e? Òó láá bĩináe kọọ̀: “Mósĩ́ deè ní eo é láá baatẽ́ nakà belí nè pá o tọ ẹ́?” àbèè “Mókà dọ̀ Kpá Káí ní eo é láá kolí nè o kóò mm̀ ge nvèèmà sãa kúm nakà belí é?” Mm̀ na sĩ́deèí, ò gé nóòmà nvín nò Kpá Káíá gè dú neǹ nòòmà nù. Tṍó ea ni sim tùlà, àé láá gbóó dààmà togó gè zọ̀ bõ̀ònatõ̀ò kọ́ kpẹ̀a dì belí nen ea gáà dììa múú. Òó láá bĩiná nen eo ólò noòmà Kpá  Káí be à nyímá ló nen ea é léémáe gè nó Kpá Káí. Be à nyímá, vàlẹ̀ bá sí ló nená vaá gbĩ́ gè zọ̀ẹ noá nu. Zogèe vídiò ea kọlà: Éé Ní Ea Ólò Naaá Tṍó e Bàé nó Kpá Káí é? *

10. Dẹ̀ẹ̀a boo nú ea di mm̀ 1 Tẹ̀sàlónaikà 2:7, 8, mósĩ́ deè ní e nen ea ólò noòmà nu é láá nó nu dòòmà bá Pọ́ọ̀l ẹ?

¹⁰ Gbò e bà ólò noòmà nu íè ge zogè kọ bà bulàẹ̀ nú ea kil ló vaá ié lèèma mm̀ gbò e bà ólò noòmà nu. Ẹ̀b va dì belí gbò e bàé láá valẹ̀ dú pá o vígà págbálà nè pábia mm̀ bõ̀ònatõ̀ò. (Bugi 1 Tẹ̀sàlónaikà 2:7, 8.) Náa é váli vá ló gè kìn gbò kóò e ba beè bãàa mm̀ bàlà booí vaá nyaaá mm̀ dénè sĩ́deè ea dú bíi mm̀ ge sí tóm nè Jìhóvà. À bọ́ló kọ é nvèè bá nèva kọ bàá mòn kà kà kóò mm̀ bõ̀ònatõ̀ò. Bã̀àa kóò nen eo ólò noòmà Kpá Káí tení dú ló gè tú tṍó dììmàe ló níì áá tṍó eo gé nói nu nì, sõò boo dõòna kà gbò dìtõ̀ò nagé. Ge kolíe boo fóòn, ge lẹ̀ẹ̀là tóm tenmá boo fóòn máe, àbèè ge bìlà kyẽè gé kãáe zógè kọọ̀ ò palàge bùlà nú ea kilíé ló.

11. Éé ní e gbĩ́ì kọọ̀ bẹẹ gbò nvín nò Kpá Káí á mon mm̀ bõ̀ònatõ̀ò ẽ, vaá ló éé?

¹¹ Bà ólò ló ene kà kìna bel kọọ̀: “Gyoo bṍóná ló à sí nóo.” Èé láá gbóó kọọ̀: “Zivèkà bõ̀ònatõ̀ò ólò bõonè bá ló gè naa kọọ̀ nen á nyoone nvéè Kráìst.” Níà nú ea náa vaá nen ea ólò láá palàge noòmà Kpá Káí ólò dò bá pá a gbò nvín nò Kpá Káí nè dõòna gbò e bà di mm̀ bõ̀ònatõ̀ò e bàé láá nvèè bá nèva kọ bàá tõo bã ló Jìhóvà ẹ. Gbò nvín nò Kpá Káíá é gbóó láá dé kpéè ló ge zọ̀ gbò níí Bàrì, e bàé láá nvèè bá nè va kọ bàá bã̀àa kóò Jìhóvà vaá siè va kpóó ló mm̀ tṍó tã̀àgã̀ gbaaá ló. È gbĩ́ì kọọ̀ buù nen e ólò noòmà Kpá Káí á nyimá kọọ̀ nyíéi ẹ́ẹẹ́ ló ge kọ à dìí ló mm̀ bõ̀ònatõ̀ò vaá dũùnà pá tọ e gé gbá fã̀ Bàrì. È gbĩ́ì kọọ̀ á láá bã ló pá vígà págbálà nè pábia e gé gbá nyoone nvéè Kráìst. Tṍóá àé gbóó valíé ló gè òòà aa ló gè gbaaá ló gbò e bà náa síèe kpóó ló kọ á vùlè Jìhóvà. (Pró. 13:20) Be gbò ea beè olòó zọ̀ naaá nu kiníe, àé nyímá kọọ̀ àé láá gbĩè kà kà kóò mon mm̀ bõ̀ònatõ̀ò Jìhóvà.—Máàk 10:29, 30; 1 Pít. 4:4.

12. Éé ní ea náa à bọ́ló kọ é ló bel ea kil ló gè kìn lóó nè bií ló gè dììa múú nè nen e ólò noòmà nu ẽ́?

¹² Olòó ló bel boo nú ea náa à dú bíi gè kìn lóó nè Jìhòvà vaá dììa múú. Kọ̀láá bé ea dì naa, bẹẹ nu sẹ̀ẹ̀a sĩ́ tṍó e gé sẹlẹ nò Kpá Káí dú gè nvèè bá nè nen e gé nóòmà nu kọ á fã̀ Jìhóvà vaá dììa múú. Tṍó e nvín  nò Kpá Káíá a nó nú mm̀ sìgà ẽ́, bọọ èlmà tõ̀ò, tṍó ea ni daàmà togó gè sí nònù, à bọ́ló gè naa kọ á nyimá kọọ̀ è gbĩ́ì ge nvèè bá nèe kọ á dú enè Neǹ Ditõ̀ò Jìhóvà.

13. Mókà gbò láb tọ ní e nvín nò Kpá Káí é tú be à gbĩ́ì ge sìm tùlà ge dììa múú ẽ́?

¹³ À íe gã́bug nú e nen ea gé nó Kpá Káí ea gbĩ́ gè dììa múú é láá naa! Túá kà, àé nyímá ló Jìhóvà vaá vùlèe bií ló gè dẹlẹ́ẹ nyíé boo. (Jọ́ọ̀n 3:16; 17:3) Àé bãàà kóò Jìhóvà nè nàgé gbò vígà págbálà nè pábia e bà di mm̀ bõ̀ònatõ̀ò. (Híb. 10:24, 25; Jém̀z 4:8) Dee deè nvée, àé kin gbò láb e bè náa dú lé vaá ọgá ló gbò a pọ́lọ́. (Tóm 3:19) Nagé, àé kọ́ nú ea ni ziga ló nè dõòna gbò. (2 Kọ́r. 4:13) Tṍóá sõò, àé gbóó kìn lóó nè Jìhóvà vaá zogè tẹlẹ bàlà kẽ tení dú ló gè dììa múú. (1 Pít. 3:21; 4:2) Deeá é dú kà deè ẹ́ẹ́-ẹẹ̀ nyíe nèà kọ̀láá nen! Boo tṍó eo nvín nò Kpá Káí tú buù kà láb tọí mm̀ ge teelá tùlà a nu sẹ̀ẹ̀a sĩ́, palàge lèèlàẹ vaá sièe kpóó ló kọ á kilsĩ́ gè naa vó.

14. Mósĩ́ deè ní e neǹ nòòmànù é láá dò ẹ̀b be a nvín nò Kpá Káí gé sim kilsĩ́ ẽ́?

¹⁴ À dú bíi kọ é ié ĩ̀ìmà tṍó e gé nveè bá nè nvín nò Kpá Káí kọ á sìm tùlà ge kìn lóó nè vaá dììa múú. Sõò à íe tṍó ea é bọ́ló kọ é ẹ̀b be à íe gé tàn ge fã̀ Jìhóvà. É kọọ̀ ò monì gbò nú ea zógè kọọ̀ nvín nò Kpá Káíá gé piìgà ge gbàn tṍ ló gbò lẹ̀ẹ̀là e Jíízọ̀s beè nè? Sẹ̀ áá gè nó gbò lé nú ea di mm̀ Kpá Káí ní ea léémáe ẽ́?

15. Éé ní ea é náa kọ nen ea ólò noòmà nu á nyimá be a nvín nò Kpá Káí a sim tùlà ge dììa múú ẽ́?

¹⁵ Olòó dò tṍó ẹ̀b bé e nen eo ólò noòmà Kpá Káí gé sim kilsĩ́ naa. Dì belí nu dòòmà bá, é kọọ̀ à ólò kọ́ bé e nu tọ́aẹ́ ló naa nè Jìhóvà? É kọọ̀ à ólò tã̀àgã ló Jìhóvà? (Ps. 116:1, 2) É kọọ̀ à ólò dé kpéè ló gè bugi Kpá Káí? (Ps. 119:97) É kọọ̀ à dì ea gé sí gé nònù lee? (Ps. 22:22) É kọọ̀ a láá nyaaná enè íb dùm ea beè ié, ge zogè kọọ̀ à tú nú ea gé nó siimá tóm? (Ps. 119:112) É kọọ̀ a daamà togó gè kọ́ nú ea gé nó nè pá a tọ nè kóò? (Ps. 9:1) Ní ea palàge bọọ, é kọọ̀ à gbĩ́ì ge dú enè Neǹ Ditõ̀ò Jìhóvà? (Ps. 40:8) Be à gá náa vaá nvín nò Kpá Káí náa gé sim kilsĩ́ mm̀ tọ́ọ̀ kà gáí, tú kyèèlè gbĩimá gè nyimá nú ea dú boo vaá ò gbóó zọ̀ẹ loá sọ́l boo mm̀ sĩ́deè ea bọ́ló vaá dú kà kà. *

16. Mó tṍó ní eo é kub gè zọ̀ nen noá nu ẽ́?

¹⁶ Olòó bĩiná o bá lọl tṍó tẹlẹ tṍó be à gá náa òó kilsĩ́ gè zọ̀ nen noá nu. Bĩià o bá kọọ̀: ‘É kọọ̀ nvín nò Kpá Káíí náa ólò kpoogá dee ló nyòòmà a nònù? É kọọ̀ náa ólò tànie gè sí nònù? É kọọ̀ à íe gbò pọ́lọ́ láb ea gé lab lábví? É kọọ̀ à du dṹùnà enè neǹ gbàà kyáá bõ̀ònaló fã̀?’ Be ààlaà gbò bíbví dú ẽei, ge kilsĩ́ gè noòmàe nu é di belí gè noòmà zọ́bvì múú nen e náa gbĩ́ kọọ̀ múú á kpolàẹ́ ló! Be nen eo ólò noòmà Kpá Káíá náa aa deè nvèè ka ló nú ea gé nó vaá á gé kpènà ló gè nyaaá, éé ní ea é náa kọọ̀ ó kpáá zọ̀ẹ noá nu ẽ́?

17. Dẹ̀ẹ̀a boo nú ea di mm̀ 1 Tímotì 4:16, éé ní e dénè nen ea ólò noòmà Kpá Káí íè ge naa ẽ́?

¹⁷ Tóm gè naa kọọ̀ gbò nen á nyoone nvéè Kráìst palàge bọọí ló, vaá è gbĩ́ì ge nvèè bá nè gbò e ólò noòmà Kpá Káí kọ bàá sìm tùlà ge dììa múú. Níà nú ea náa èé tú Kpá Káí siimá tóm leevè vaá noòmà nú mm̀ sĩ́deè ea é zógè kọọ̀ è vulè vaá dẹlẹ nyíé boo nú e nóòmà ẽ. Èé síè kpóó ló nen e ólò noòmà Kpá Káí kọ á bã̀àà kóò mm̀ bõ̀ònatõ̀ò. Vaá è ólòó ló bel boo bé e gè kìn lóó nè Jìhóvà vaá dììa múú dú bíi naa nè ge olòó dòe ẹ̀b lọl tṍó tẹlẹ tṍó be à gé sim kilsĩ́. (Ẹ̀b ńkpó ea di boo 13 náásĩ́, “ Gbò Nú Ea Bọ́ló Kọọ̀ Nen Ea Ólò Noòmà Kpá Káí Á Naa Kọbé Nen Ea Ólò Noòmà Nu Sim Tùlà Ge Dììa Múú.”) Nyíéi ẹ́ẹ kọọ̀ è dṹùnà gbò e gé sí tóm ge dùùlà gbò není! Naanii èé bééláfùl ge pììgà imá kiẽ́e bẹẹ kpóó sim tùlà ge sẹlẹgi nò Kpá Káí ea é náa kọọ̀ nen á dììa múú.