1. Mósĩ́ deè ní e 2 Kọ́rìnt 3:1-3 nveè bá nèi kọ é nvèè ka ló nèà deè e íè ge sẹlẹ nò Kpá Káí ea é náa kọọ̀ nen á dììa múú ẽ́? (Ẹ̀b fùtó ea di boo kóó kpáí.)

À ÓLÒ tõó ló olo naa vàẹ ge mòn nen ea aa kiẽ́e e boólo bõ̀ònatõ̀ò ólò kọ́ kpẹ̀a ea diia múú ẽ́? Mm̀ kà kà, à ólò ẹẹlẹ̀ ni nyíe. (Máát. 28:19) Vaá beè olo ní eo beè zọ̀ẹ noá nu ẽ́, nyíé ni é palàge ẹẹ tṍó ea diia múú! (1 Tẹ̀s. 2:19, 20) Gbò e bà ã́àa dììa múú vaá dú gbò e bà gé nyoone nvéè Kráìst dú “kpá lé bée,” níì kilma ló áá nen ea beè zọ̀va noá nu nì, sõò zivèkà bõ̀ònatõ̀ò.—Bugi 2 Kọ́rìnt 3:1-3.

2. (a) Mókà bíb ea dì bíi ní ea bọ́ló kọ é bugi togó boo é, vaá ló éé? (b) Éé ní ea dú nò Kpá Káí? (Ẹ̀b émì nu ea di kè kẽí.)

² À palàge dú lé gè mòn kọọ̀ mm̀ ténì gbáá ea kil nvéeá, gã́bug nò Kpá Káí * e ba beè sẹlẹ beeá ló zivèkà bàlà booí mm̀ buù ẽ́, beè láá toolá 10,000,000. Vaá mm̀ áá kà gbò gbááá, nú ea é sígá ló 280,000 nen géè dììa múú buù gbáá vaá dú Neǹ Ditõ̀ò Jìhóvà nè ãa nen ea gé nyoone nvéè Kráìst. Mósĩ́ deè ní eé láá nvèè bá nè gã́bug gãà gbò e ólò noòmà Kpá Káí kọ bàá dììa múú ẽ́? Mm̀ begè dẽè tṍó e Jìhóvà dì ea gé ĩimà vaá sọ̀tọ́ deè kọ gbò nen á ié nèà deè ge dú gbò e bàé nyoone nvéè Kráìstí, beele é piigà mm gbala-gbala ima kiẽ́e bẹẹ kpóó sim tùlà, ge nvèè bá nèva kọ bàá sìm kilsĩ́ naa ní e bàé  diia múú. Tṍó á bọọgẹ̀ gé náí bá!—1 Kọ́r. 7:29a; 1 Pít. 4:7.

3. Éé ní eé nó mm̀ nakà togó belí ea kil ló gè sẹlẹ nò Kpá Káí é?

³ Boo béè kọọ̀ à palàge dú bíi gè naa kọ gbò nen á nyoone nvéè Kráìst, Gbò Ge Tulè Tóm beè bĩiná lọ̀ọ̀gà bùlà ea aa bá gbò e bà di kele-kele tọ nàà tóm ea kil ló nú eé láá naa ge nvèè bá nè gbò e ólò noòmà Kpá Káí kọ bàá dììa múú. Mm̀ nakà togó belí nè ní ea bẽene, èé mon nú eé láá nó lọl ló gbò gyà deè sĩ́ tóm, gbò e bà ólò kọ́ kpẹ̀a aa dó dọ dó, nè gbò e bà ólò kùdẽe ló sẹ́kiùt e bà ni téní bá nu. * (Pró. 11:14; 15:22) Bà baatẽ́ nú e gbò e bà ólò noòmà Kpá Káí nè gbò e bà gé nó Kpá Káí é láá naa kọbé nò Kpá Káíá palàge sìm kilsĩ́. Mm̀ nakà togó belí, èé nó vòò kà nú e kọ̀láá nen ea gé nó Kpá Káí íe bíi ló gè naa mm̀ ge sìm kilsĩ́ naa ní ea é láá dììa múú.

4. Éé ní ea bọ́ló kọ é nyimá ea kil ló nò Kpá Káí e náa bọọgẹ̀ bọọ́ beg é?

⁴ Gã́bug pá bẹẹ gbò vígà págbálà nè pábia ólò elá èla gã́ nù tọ vaá sẹlẹ nò Kpá Káí. Náa kal ló béè kọọ̀ níì kà lé sĩ́deè ge naa kọọ̀ nen á ié lèèma mm̀ Kpá Káí é, na íb bá loa sọ́lá náa ólò bọọ̀gẹ̀ bọọ́ beg vaá náa é láá sẹẹa kọ̀láá kà sè. Ge naa kọ bàá kilsĩ́ gè ié lèèma, sìgà gbò vígà ólò bĩiná fóòn nombà nená vaá kolíe àbèè ge lẹ̀ẹ̀là tóm tenmá boo máe, ge kọọmá nèe ene kà nú e Kpá Káí kọ́. Bàé láá olòó loá ńkem̀ loa sọ́l naaá mm̀ gã́bug ẽ́ vaá à gáà du nò Kpá Káí ea sim kilsĩ́. É kọọ̀ nen ea gé nó Kpá Káí é aa deè sìm kilsĩ́ naa ní ea é kin lóó nè vaá dììa múú é be náa tú gã́bug tṍó nè kói nvee mm̀ ge nó Moǹ Bel Bàrì? Tọ́ọ̀ tóm.

5. Dẹ̀ẹ̀a boo nú ea di mm̀ kpá Lúùk 14:27-33, éé ní e Jíízọ̀s beè ló bel boo ea é láá nvèè bá nèi mm̀ ge naa kọ gbò nen á nyoonée nvée ẽ́?

⁵ Jíízọ̀s beè tú nu dòòmà bá bààmà tẽ́ nú e nen íè ge naa be à gbĩ́ gè nyoonìèe nvée. A beè ló bel ea kil ló nen ea gbĩ́ gè tìb tọ gbàn deè nè neǹ méné ea gbĩ́ gè sí ól bé. Jíízọ̀s beè kọọ̀ nen ea gbĩ́ gè tìb tọá íè ge “zẹ́ẹ́ ĩì tẽ́ kẽ vaá tenmà dẽe ló íb kpègè” ea é túe bá ge tìbmà tọá lọl dẽe vaá neǹ ménéá íè ge “zẹ́ẹ́ ĩì tẽ́ kẽ bùgà togó” kọbè àé láá tú pá a gbò bé beemá èlbá. (Bugi Lúùk 14:27-33.) Mm̀ tẽ̀ènè sĩ́deèá, Jíízọ̀s beè nyimá kọọ̀ nen ea gbĩ́ gè nyoonìèe nvée íè ge palàge ọẹ̀ dẽe ea kil ló nú ea é náa mm̀ ge nyoonìèe nvée. Boo béè vó, à dú bíi kọ é siè kpóó ló gbò e ólò noòmà Kpá Káí kọ bàá zọ̀i noá nú buù sè. Mósĩ́ deè ní eé láá naamá vó é?

6. Éé ní eé láá pììga boo gè naa kọbé è íe nò Kpá Káí ea é sim kilsĩ́ ẽ́?

 ⁶ Dààmà togó tení dú ló gè bọ̀ọ̀vẹ̀ bèg tṍó eo ólò sẹ̀ẹ̀mà nò Kpá Káí gbẹẹ́ gã́ nù tọá. Be à sẹlẹ, òó láá ló sọ́l boo dõòna kà dọ̀ Kpá Káí buù tṍó eo kãàe. Tṍó e gè tú gã́bug tṍó dììma ló tẹ̀ íè tọá ni ọọlàẹ ló, bĩináe be à íe kiẽ́e eo é láá ĩinii tẽ́ vaá tui bọọ loá sọ́l kilmaí sĩ́. Ààlaà tẹ̀ íè tọá, ní ea é tẹ́lẹ bàlà kẽ bé ea tú nò Kpá Káíá kolmá nu naa ẽ́. Ge nvèè bá nèe naa ní ea é nó nú mm̀ gbala-gbala, òó láá bĩináe be àé taníe gè nó nú bàà tóm mm̀ enè sè. Sõò, gã́bug nu dú bíi èlmà ge nó nú ene àbèè bàà tóm kọ̀láá kà sè.

7. Mósĩ́ deè ní e nen ea é nóòmà nu é láá palàge kpoogá dee ló nyòòmà buù kà nò Kpá Káí é?

⁷ Dì belí nen ea gé nóòmà nu, à dú bíi kọ ó kpoogá dee ló nyòòmà buù kà nò Kpá Káí. Òó láá dààmà togó tení dú ló gè tení boo kpá eo é nói nè gbò dọ̀ Kpá Káí ea di m. Nvèè kpíí ló kà ea di m. Bugi togó boo togó bel ge nòa, gbò a ńkem̀ togó bel, gbò bíb ge noomá, gbò dọ̀ Kpá Káí e bà émí “bugi” ló, tã́à nu, nè vídiò ea é láá baatẽ́ togó belá. Tṍóá ò gbóó bugi togó boo nen eo ólò noòmà Kpá Káí, nè bé eo é láá baatẽ́ belá mm̀ bá ea válí vaá õ̀òa tẽ́ naa ní ea é láá vàlẹ̀ bá dã́ ból ló vaá tú siimá tóm naa.—Nèh. 8:8; Pró. 15:28a.

8. Éé ní e gbò moǹ bel Pọ́ọ̀l ea di mm̀ kpá Kọ́lọsì 1:9, 10 nóòmài kilma ló gè tã̀àgã ló Bàrì má gbò e ólò noòmà Kpá Káí é?

⁸ Tṍó eo gé kpóógá nágé dee ló, tã̀àgã ló Jìhóvà nyòòmà o nvín nò Kpá Káí nè gbò a bíi. Bàn Jìhóvà kọ á nveenìè bá neè ni kọ ó láá noòmàè Kpá Káí mm̀ sĩ́deè ea é tọ́á ló nyíè nená. (Bugi Kọ́lọsì 1:9, 10.) Bĩiná o bá be à íe nú e nen eo ólò noòmà nu náa é dã́tẽ́ ló àbèè kọọ̀ náa é zigà. Sẹ̀ẹ̀a bùlà kọọ̀ ge noòmàe nu naa ní ea é diia múú ní ea dú bíi é.

9. Mósĩ́ deè ní e nen ea ólò noòmà Kpá Káí é láá nvèè bá nè nen e ẹlẹ ólò noòmà nu kọ á kpoogá dee ló nyòòmà a nònù ẽ? Baatẽ́.

⁹ È ẹbmà dẽe kọọ̀ nò Kpá Káí ea gé sẹẹ̀a lee, é nveè bá nè nen ea gé nó kọ á zààva ló dénè nú e Jìhóvà nè Jíízọ̀s ni náa, vaá àé gbóó tànie gè kpáá nó bọ̀ọ̀vẹ̀. (Máát. 5:3, 6) Ge palàge ié dọ̀ bélè lọl ló nònùá, nen ea gé nó nu íè ge palàge tú bùlà má nu ea gé nó. Kọbé à láá naa vó, baatẽ́ nèe bé ea dú bíi kọ á kpoogá dee ló nyòòmà buù tṍó nònù tení dú ló gè tú tṍó gbẹẹ́ sĩ́ tení boo vaá bugi togó boo bé ea é láá tú gbò nú ea nó siimá tóm naa. Mósĩ́ deè ní eo é láá nvèèmà bá  nèe ẽ́? Zọ̀ nen eo ólò noòmà nu tení boo, ge dòòmà bá nèe bé ea ólò dú gè naa naa. * Baatẽ́ nèe bé ea é láá gbĩ́ lèlà ààlaà gbò bíbvá naa, nè bé e gè kuu nú kè kẽè ńkem̀ tã́á bel é nveè bá nèe kọ á kẽ̀èa boo ààla naa. Tṍóá ò gbóó kọ́ nèe kọ á aalá mm̀ sĩ́deè bé ea ólò ló bel naa. Tṍó ea náa vó, òó láá gbóó nyimá bé ea dã́tẽ́ ló nú eo gé nóiá naa. À íe dõòna kà nú eo é láá siè kpóó ló nen eo ólò noòmà Kpá Káí kọ á naa.

10. Éé ní ea náa à dú bíi gè bugi Kpá Káí buù dee é, vaá éé ní ea dú bíi gè naa kọbé nen íe dọ̀ bélè lọl ló gè bugi Kpá Káí é?

¹⁰ Gbá ló gè zọ̀ nen ea ólò noomàe nu noá nú buù sè, nen ea gé nó nuá é íe dọ̀ bélè lọl ló gè naa dõòna kà nú boo a lóó kọ̀láá dee. À dú bíi kọ á zọ̀ Jìhóvà loá bel. Mósĩ́ deè e? Tení dú ló gè pãanée tṍ ló vaá ló bel nè Jìhóvà. Àé láá pãane tṍ ló Bàrì tení dú ló gè bugi Kpá Káí buù dee. (Jós. 1:8; Ps. 1:1-3) Zogèe bé ea é láá tú “Bible Reading Schedule” e bàé láá naa príǹt ea di boo jw.org siimá tóm naa. * Ge nvèè bá nèe kọ á palàge ié dọ̀ bélè lọl ló a gè bugi Kpá Káí, sièe kpóó ló kọ á bugi togó boo nú e Kpá Káí gé nóòmàe ea kil ló Jìhóvà nè bé ea é tú nú ea gé nó siimá tóm mm̀ a dùm naa.—Tóm 17:11; Jém̀z 1:25.

11. Mósĩ́ deè ní e nen ea gé nó nu é láá nó gè tã̀àgã ló Bàrì leevè e, vaá éé ní ea náa à dú bíi kọ á olòó tã̀àgã ló Jìhóvà ẹ?

¹¹ Siè kpóó ló nen eo ólò noòmà nu kọ á zọ̀ Jìhóvà loá bel tení dú ló gè tã̀àgã ló Bàrì buù dee. Tã̀àgã ló Bàrì lọa kè tẽ́ o nyíe tṍó eo daamà togó nè tṍó eo nveè kùbma ló bọọ nònù, vaá kòl béè nen eo ólò noòmà nuá mm̀ gbò tã̀àgã lóá. Boo tṍó ea dã́ bé eo tã̀àgã ló Bàrì naa, àé nó bé ea é láá tã̀àgã ló Jìhóvà Bàrì tení dú ló béè Jíízọ̀s Kráìst naa. (Máát. 6:9; Jọ́ọ̀n 15:16) Zẹ́ẹ́ bugi togó boo bé e gè bugi Kpá Káí buù dee (ea dú gè pãane tṍ ló Jìhóvà) nè ge tã̀àgã ló Bàrì (ea dú gè ló bel nè Jìhóvà) é nveè bá nè nen eo ólò noòmà Kpá Káí kọ á tõo bã ló Bàrì naa! (Jém̀z 4:8) Beè nen eo ólò noòmà nu náa vó lee, àé nveè bá nèe kọ á sìm kilsĩ́ nyòòmà ge kìn lóó nè vaá dììa múú. Dõòna kà éé ní ea é nveè bá nèe ẽ́?

12. Mósĩ́ deè ní e nen ea ólò noòmà Kpá Káí é láá nvèè bá nè nen ea ólò noòmà nu kọ á toní lé gbaa ló kilma ló Jìhóvà ẹ?

¹² È gbĩ́ì kọọ̀ nen e ólò noòmà Kpá Káí á nó nu ea kil ló Jìhóvà. Sõò gbò nú ea nó íè  ge bã̀é nyíe kọbé à tanie gè tú gbò nú ea nóá siimá tóm. Jíízọ̀s beè noòmà gã́bug nuù gbò nen vaá a beè leemá va gè nó nu lọ̀líe bá. Sõò gbò nen beè bììà é nvée boo béè kọọ̀ a beè tọá vá ló nyíe. (Lúùk 24:15, 27, 32) À dú bíi ló nen eo ólò noòmà Kpá Káí kọ á ẹ̀b Jìhóvà naamá kàà Nen, nen e ẹlẹ é láá ié lé gbaa ló kìlmàé ló, nè ge nyimá kọọ̀ Jìhóvà é láá duè a Tẹ̀, a Bàrì, nè a Kóò. (Ps. 25:4, 5) Tṍó eo gé nói Kpá Káí, naa kọọ̀ á mòn gbò lé-lé kpãa e Bàrì íe. (Ẹ́xọ. 34:5, 6; 1 Pít. 5:6, 7) Kè bá kọ̀láá kà togó bel eo gé lói sọ́l boo, ká bùlà gbẹẹ́ boo íb Nen e Jìhóvà dú. Nvèè bá nè nen eo ólò noòmà Kpá Káí kọ á dã́tẽ́ ló gbò lé-lé kpãà Jìhóvà—dì belí a kpãà vulè, lé láb, gbọ́ọ́-gbọọ̀ ló nè tóè sàn. Jíízọ̀s beè kọọ̀ “log . . . e a bọọ èl dénè” dú gè ‘vùlè Jìhóvà ea dú o Bàrì.’ (Máát. 22:37, 38) Pììga boo gè naa kọọ̀ nen eo ólò noòmà Kpá Káí á palàge vùlè Jìhóvà.

13. Nè ene kà nu dòòmà bá ea zógè sĩ́deè ge nvèèmà bá nè nen e ólò noòmà nu kọ á nó gbò lé kpãà Jìhóvà.

¹³ Tṍó eo gé zọ nen eo ólò noòmà nu loá sọ́l, baatẽ́ nèe nú ea náa vaá ò vùlè Jìhóvà. Vó é náa kọọ̀ ẹlẹ á nyimá kọọ̀ à bọ́ló kọ á duè kóò Jìhóvà nè ge nó gè vùlèe. (Ps. 73:28) Dì belí nu dòòmà bá, é kọọ̀ à íe tã́á bel ea di mm̀ kpá ge nò àbèè mm̀ Kpá Káí ea kọ́ nú ea kil ló bé e Jìhóvà íe vulè, nyìmànù, dú neǹ lé bèèla, vaá ié kpóó naá ea léémá olo? Kọ́ nè nen eo ólò noòmà nu, vaá naa kọ á nyimá kọọ̀ níà ene kà nú ea náa vaá olo ò vulèè bẹẹ Tẹ̀ ea di káála ẹ́. À íe dõòna kà nú ea bọ́ló kọọ̀ kọ̀láá kà nvín nò Kpá Káí á naa kọbé à láá sìm tùlà ge dììa múú.

14. Éé ní e kpá Híbrù 10:24, 25 kọ́ nèi ea kil ló gè sí nònù ea é láá nvèè bá nè nvín nò Kpá Káí kọ á sìm kil sĩ́é?

¹⁴ À tan dénè bẹ̀ì kọ nen e ólò noòmà nu á sìm tùlà ge dììa múú. Ene kà lé sĩ́deè eé láá naamá vó dú gè siè va kpóó ló kọ bàá sí nònù. Gbò e bà ólò noòmà Kpá Káí e bà ni téní bá nu kọ́ọ̀, nvín nò Kpá Káí ea valẹ̀ bá sí nònù ólò palàge sìm kilsĩ́. (Ps. 111:1) Sìgà gbò ólò baatẽ́ nè nen e bà ólò noòmà nu kọ bàé íèè báà sĩ́ nyìmànù ea kil ló gè nó Kpá Káí lọl mm̀ ba nònù vaá nakà báà sĩ́á, bà íèè lọl ló gè sí nònù. Zọ̀ nen eo ólò noòmà nu bugi Híbrù 10:24, 25, vaá ò baatẽ́ nèe gbò bélè ea é íe lọl ló gè sí nònù. Bìlà vídiò ea kọlà: Éé Ní Ea Ólò Naaá Kíndòm Họ́ọ̀l lẹ? * nèe. Nvèè bá nè nen eo ólò noòmà nu kọ á pììgà ge tú gè sí  nònù buù sè naamá nú ea dú bíi mm̀ a dùm.

15. Éé ní eé láá naa gè nvèè bá nè nen e ólò noòmà nu kọ á olòó sí nònù ẽ?

¹⁵ Éé ní eo é láá naa beè nen eo ólò noòmà nu gáà si nònù àbèè kọọ̀ náa ólò sí kọ̀láá dee é? Tú zààvà kọọmá nú eo ã́àa nó lọl nònù nèe. Níá é palàge sièe kpóó ló èlmà áá gè kolíe siimá nònù. Nèe Kpá Tọ Kùdẽe Ló àbèè Dùm Nè Kpá Bõ̀ònaló Sìtóm Kọ̀ Kpẹ̀a e bà gé nó tṍóá. Zogèe kiẽ́e e bàé nó dõòna deè nònù, vaá ò bĩ́ínáe gá ea palàge leemáe ea di m. Gbò nú e nen eo ólò noòmà nu mon vaá dã́ túá deé ea é sí nònù é palàge lee èl kọ̀láá kà nú ea ni mon vaá dã́ gbẹá dõòna kà bõ̀ònaló. (1 Kọ́r. 14:24, 25) Àé mon dõòna gbò e ẹlẹ é láá nó ba lé nu dòòmà bá vaá bà nveè bá nèe kọ á sìm tùlà ge dììa múú.

16. Éé ní ea dú bíi kọbé nen láá sẹlẹ nò Kpá Káí ea é náa kọọ̀ nen á dììa múú ẽ́, vaá éé ní eé nó mm̀ togó bel ea bẽene níí ẽ́?

¹⁶ Mósĩ́ deè ní eé láá sẹlẹ nò Kpá Káí ea é náa kọọ̀ nen á dììa múú ẽ́? Èé láá nvèè bá nè buù nen e ólò noòmà nu kọ á tú a nònù kolmá nu tení dú ló gè sièe kpóó ló kọ á nó nú buù sè nè ge kpoogá dee ló nyòòmà buù tṍó nònù. Èé síè nàè gé kpóó ló kọ á zọ̀ Jìhóvà loá bel buù dee nè ge toní lé gbaa ló kìlmàé ló. Èé síè kpóó ló nen e ólò noòmà nu kọ á sí nònù. (Ẹ̀b ńkpó ea di boo 12 náásĩ́, “ Gbò Nú Ea Bọ́ló Kọ Nen Ea Gé Nó Nú Á Naa Kọbé À Sim Tùlà Ge Dììa Múú.”) Sõò, dì belí bé e togó bel ea bẽene níí baatẽ́ naa, à íe dõòna kà vòò kà nú e nen ea ólò noòmà Kpá Káí nen é láá naa mm̀ ge nvèè bá nè nen ea ólò noòmà nu kọ á sìm tùlà ge dììa múú.