Gbááá, bõ̀ònatõ̀ò Jìhóvà beè nyaaná bá ló nu, vaá níí beè naa kọọ̀ Gbò Nvín Nò Kpá Káí á gbaaá ló mm̀ ba fã̀. Kpá Tọ Kùdẽe Ló beè dààmà togó gè baatẽ́ gbò dọ̀ Kpá Káí e ba beè nvee mm̀ ba Bõ̀ònaló Gè Tã̀àgã Ló Bàrì, Ọlí Sọ́l, Vaá Kọ́ Kpẹ̀a Lé e ba ólò sẹlẹ buù sè. Gbá ló vó, Gbò Nvín Nò Kpá Káíí beè naa kàlẹ́ndà e gbò dọ̀ Kpá Káí nè sọ́l di dẽe, e nen é láá bugi àbèè ge ọlí tṍó ea gé nó nu boo a lóó, àbèè tṍó e bà íe fã̀ pá tọ.

Gbò Nvín Nò Kpá Káí beè olòó “kọ́ kpẹ̀a lé” gbẹá nònù vaá nootẽ́ gbò nú e ba beè tení bá tṍó e bà géè kọ́ kpẹ̀a. Bà ólò õá Jìhóvà zaa, ọlí sọ́l, vaá tã̀àgã ló Bàrì. Ene kà vígà pábia ea kọlà Eva Barney, ea beè dììa múú mm̀ gbáá 1923 tṍó ea ni tóólá 15 gbáá, kọọ̀: “Be ò gbĩ́ gè kọ́ kpẹ̀a lé, òé élá-èla vaá kọọ̀, ‘M̀ gbĩ́ gè õá Dõò zaa Ió gbò lé nu ea ni náa nèm.’” A beè olòó leemá sìgà gbò vígà págbálà ge kọ́ kpẹ̀a lé. Vígà Barney kpáá kọọ̀: “Enè kà vígà págbálà ea bée kọlà Godwin ea ni dú kànen mm̀ dee ólò õá Dõò zaa boo béè gã́bug nú ea ni náa. Sõò tṍó ea va ni mon kọ a ḿ-má vígà págbálà ea gé ẹb nú ea kil ló bõ̀ònalóá ge pãanée tṍ ló, à ólò dùùlà kọ̀là ló a dóm vaá a dóm gbóó ĩìtẽ́ kẽ.”

Enè tóm buù ẽ́, buù kà bõ̀ònatõ̀ò ólò sẹlẹ kele íb Bõ̀ònaló Gè Tã̀àgã Ló Bàrì, Ọlí Sọ́l, Vaá Kọ́ Kpẹ̀a Lé. Kpá Tọ Kùdẽe Ló níí April 1, 1923, kọ́ọ̀: “Bàá tú báàsĩ́ tṍó e bàé sẹẹmà bõ̀ònalóá kọọmá kpẹ̀a lé ea kil ló sìtóm kọ̀ kpẹ̀a vaá siè kpóó ló pá vígà. . . . È nyímà kọọ̀ gè naa vó é náa kọọ̀ gbaa ló á di zẹ̀ẹ̀ pá vígà.”

Charles Martin, ea ni tóólá 19 gbáá ea dú neǹ tóm (ea tõó dọ̀ neǹ kọ̀ kpẹ̀a) ea ólò tõó Vancouver, ea di Canada, beè íe gã́bug bélè lọl ló gbò nònùí. Tṍó e tṍó téní, a beè kọọ̀: “Gbẹá kĩí ní em beè nó nú em é kọ́ tṍó em é íná nùtọọ̀ nen ẽ́. Gã́bug tṍó pá vígà ólò kọ́ nú e ba beè tení bá tṍó e bà géè kọ́ kpẹ̀a aa tọ dọ tọ. Níí beè naa kọ ḿ nyimá nu gè kọ̀ nè bé em é láá aalá bel naa tṍó e nen náa gbĩ́ gè pãaném tṍ ló.”

Dõona kà nú ea beè olòó naa kọọ̀ pá vígà á gbaaá ló beè dú “deè ge kọ́ kpẹ̀a.” Kpá Tọ Kùdẽe Ló níí April 1, 1923 kọ́ọ̀: “Kọbé gbò nen  gbááá ló sí tẽ̀ènè kà tóm . . . , ba beè tú deè Tuesday, May 1, 1923, naamá deé e dénè nen é kọ́ọ́má kpẹ̀a. Ba beè tú nagé túá kà deè Tuesday mm̀ kọ̀láá kà ẽ́ gbá ló . . . kọbé kọ̀láá nen kọ́ kpẹ̀a.”

Gbò Nvín Nò Kpá Káí e bà di mm̀ ba deè ãa ólò kọ nagé kpẹ̀a. Vígà pábia ea kọlà Hazel Burford, ea beè toolá 16 gbáá tṍóá kọ́ọ̀: “Kpá e beè olòó nó gbẹá nònù ea kọlà Bulletin beè faalá gbò nu dòòmà bá (ea belí gbò nu dòòmà bá gè dààmà togó loá sọ́l kátogóí) eé láá kẽea boo. a Nda nè ńdáà nómá tè ólò tú ẹ́ẹ́-ẹẹ̀ nyíe kọọmá kpẹ̀a.” Sõò, a beè bọọ́ ló Vígà Burford bé e ene kà vígà págbálà beè labví naa tṍó ea géè kọ́ kpẹ̀a. À kọ́ọ̀: “Ene kà vígà págbálà ea ni dú kànen mm̀ dee beè kọ ḿ gá kọ ná kpẹ̀a. Tṍóá, sìgà nen náa beè dã́ból ló kọ à dú bíi kọọ̀ dénè Gbò Nvín Nò Kpá Káí á kọ́ kpẹ̀a, vaá níí tõó dọ̀ kọọ̀ ‘gbò nvín ãa gbálà nè gbò nvín ãa bia’ á gbá lèèlà ba Neǹ Dèmnù.” (Ps. 148:​12, 13, King James Version) Sõò Vìgà Burford beè kilsĩ́ gè kọ́ kpẹ̀a. A beè sí ní ea égè bàà kà Tọọ̀ Kpá Gílẹẹ̀d vaá dú nen ea gé kọ́ kpẹ̀a aa dó dọ dó gbẹá Panama. Tṍó e tṍó téní, pá vígà beè gbóó nyaaná bá ló bé e bà géè ẹ̀b gbò nvín ãa e bà gé kọ́ kpẹ̀a naa.

Pọ̀bkà bõ̀ònaló beè naa kọọ̀ pá vígà á gbaaá ló. Gbò pọ̀bkà bõ̀ònalóí beè olòó íe dee e bàé kọ́ọ́má kpẹ̀a, dì belí ní ea beè sẹ̀ẹ̀a gbẹá Winnipeg, ea di Canada. Pọ̀bkà bõ̀ònaló ea beè sẹ̀ẹ̀a March 31, beè faalá togó bel ea kọ́ọ̀, “Kele Íb Kọ̀ Kpẹ̀a Gbẹá Winnipeg,” vaá ba beè kọọ̀ dénè gbò e ba beè di kẽè bõ̀ònalóí á kọ́ kpẹ̀a gbẹá boná. Gbò deè ge kọọmá kpẹ̀a ea bélí níí beè naa kọọ̀ gã́bug nen á bã mm̀ bõ̀ònatõ̀ò. Vaá ló August 5, nú ea é láá dú 7,000 nen beè sí kẽè dõona kà bõ̀ònaló ea beè sẹ̀ẹ̀a gbẹá Winnipeg. Gbò e ba beè sí kẽè nakà bõ̀ònalóí beè palàge bọọ́ tõ̀ò èl kọ̀láá kà bẹẹ gbò bõ̀ònaló ea ni sẹẹà gbẹá Canada.

Pọ̀bkà bõ̀ònaló Gbò Neǹ Ditõ̀ò Jìhóvà ea beè palàge bọọ dú ní ea beè sẹẹa ló August 18-26, mm̀ gbáá 1923, gbẹá Los Angeles, ea di California. Mm̀ gbò sè besĩ́ pọ̀bkà bõ̀ònalóí à kálá sẹ̀ẹ̀à, níúz pepà beè vee nú ea kil ló  pọ̀bkà bõ̀ònalóí, vaá Gbò Nvín Nò Kpá Káí beè nè nú ea sígá ló 500,000 kpá kól. Ba beè tú kpá ea kọ́ nú ea kil ló pọ̀bkà bõ̀ònalóí ká ló faà pá vígà nè faà ge ọbmá èèlè.

Deè Saturday, August 25, Vígà Rutherford beè nè lòbèl ea togó bel kọ́ọ̀, “Gbò Naanà Ból nè Gbò Kà Ból.” Mm̀ a lòbèl, a beè baatẽ́ kọọ̀ gbò “naanà ból” dú gbò lé lab dògò e bàé tõó mm̀ páradaìs boo kunukẽ̀í. Vaá a beè bugi kpá ea dẹẹa boo béèlàfùl e bõ̀ònatõ̀ò ne, ea togó bel kọ́ọ̀ “Ã̀à Ne.” Nakà béèlafùlí beè tẹ́lẹ bàlà kẽ kọ à dú bíi kọọ̀ pà vígà á kìn kyáá bõ̀ònaló fã̀, vaá gbò e bà íe lé bùlà á tení aa mm̀ “Gbele Bábilọ̀n.” (Kùùà 18:​2, 4) Tṍó e tṍó téní, Gbò Nvín Nò Kpá Káí e bà dì beeá ló bàlà booí, beè tú bẹ̀à sã́ bùlà dõ̀òmà gã́bug gãà kpá ea fáálá béèlàfùlí nè gbò nen.

Dee deè nvéè dee e pọ̀bkà bõ̀ònalóí beè sẹ̀ẹ̀àa, nú ea sígà ló 30,000 nen beè sí kẽè lòbèl kèsĩ́ gbò nen e Vígà Rutherford beè nè, ea tógó bel kọ́ọ̀, “Dénè Dó Gé Kyãà Nyoone Àmágidòm, Sõò Gã́bug Gbò E Bà Di Kátogóí Náa É Ú Ná (All Nations Marching to Armageddon, but Millions Now Living Will Never Die).” Boo béè kọọ̀ Gbò Nvín Nò Kpá Káí géè ẹ̀bmà dẽè gã́bug gbò e bàé sí kẽè lòbèlí, ba beè bàn pọ̀bkà tọ e bà ã́àa tìb ea di Los Angeles. Kọbé dénè nen láá dã́ bel e bà gé ló, pá vígà beè tú kpẹ́ lóòmà bel ea di ló pọ̀bkà tọá siimá tóm, vaá nuù lóòmà belí beè dú ãa nuù tóm ea dọ bàlà kẽ tṍóá. Gã́bug nen beè dã nagé lòbèlí tenmá boo rédiò.

Mm̀ gbáá 1923, sìtóm kọ̀ kpẹ̀a beè palàge bọọ dọ ló gbẹá Africa, Europe, India, nè South America. Gbẹá India, Vígà A. J. Joseph, a va, nè ọ̀ọ̀lẹ̀ kà pá a nvín géè naa príǹt bẹẹ gbò kpá mm̀ dèm bel Hindi, Tamil, Telugu, nè Urdu.

Gbẹá Sierra Leone, Gbò Nvín Nò Kpá Káí e ba bée kọlà Alfred Joseph nè Leonard Blackman beè bàn nvèè bá, vaá emí kpá lẹ̀ẹ̀la tóm tẹlẹ tọ nàà tóm ea gé ẹb nú ea kil ló sìtóm kọ̀ kpẹ̀a beeá ló bàlà booí ea di Brooklyn, New York. Ló April 14, 1923, ba beè nèva ààla. Alfred kọ́ọ̀ “Ba beè kolím boo fóòn taa tóm dáá bílá deè deè Saturday tṍó e ním géè ẹ̀bmà dẽe.” A beè dã́ agẹ mon ea bĩ́ínáe kọọ̀, “É kọ olo ní eo beè emí kpá má Watch Tower Society kọ bàá domà gbò e bà ólò kọ́ kpẹ̀a ẹ́?” Alfred beè naa, “Ẽei.” Nená beè kọọ̀, “Nda ní e bà lẹẹlàẹ.” Aè beè moǹ William R. Brown. Ẹlẹ nè a vaà Antonia, nè bàà kà a nvín pábia e bà kọlà Louise nè Lucy beè aa Caribbean dù.  A beè palàge tàn pá vígàí ge mòn Vígà Brown nè pá a tọ.

Alfred kọ́ nágé kọọ̀: “Tṍó e dee zilà, Leonard nè nda géè nó Kpá Káí belí bé e ólò naá buù sè. Mm̀ bùló, e beè gbóó mòn gbele gãboo nen ea di élá gã́ bẹẹ nùtọ. Aè beè Vígà Brown. A beè palàge íe bẹ̀à sã́ bùlà nyòòmà kà-kàí, naa ní ea beè gbĩ́ gè nè lòbèl kèsĩ́ gbò nen dee ea bẽene deá.” Besĩ́ ẽ́á à kalá tá boo, Vígà Brown beè nè dénè kpá ea beè faalá. Ba beè lẹ̀ẹ̀là 5,000 bẹẹ gbò kpá máe, sõò náa beè gbõoma. Náa kal ló béè vó, bà náa beè ẹ̀b Vígà Brown naamá neǹ óò kpá. A beè tú bẹ̀à sã́ bùlà siimá tóm nè Jìhóvà, vaá a beè olòó kolí Kpá Káí mm̀ a lòbèl. Vó ní ea náa vaá gbò nen à kolíe Bible Brown ẽ.

Mm̀ gbò tṍóá, tọ nàà tóm ea beè di Barmen, ea di Germany, beè dú ńkem ló tóm e bà géè sì, vaá ba beè dã nagé kọọ̀ gbò bé pá France gbĩ́ gè lẹ̀ẹ̀là bel ló boná. Gbò Nvín Nò Kpá Káí beè mòn tọ ea di Magdeburg ea é dú lé gè tõó m naa príǹt bẹẹ gbò kpá. Besĩ́ à kalá dú June 19, pá vígà beè õá dénè ńzì gè naamá príǹt kpá nè dénè ba nuù tóm kilma aã Tọ Nàà Tóm ea di Magdeburg. Kà lèlà deé e bà kọ́ nè tọ nàà tóm ea gé ẹb nú ea kil ló sìtóm kọ̀ kpẹ̀a beeá ló bàlà booí kọ baa lab nu lọl kĩé, ní e níuz pepà vee kọọ̀ gbò bé pá France a tú pọ̀b boǹ Barmen nvea bá ẹ́. Nyíè pá vígà beè palàge ẹẹ ló bé e Jìhóvà beè kpènà vaá nvèè bá nèva naa.

George Young, ea ni sí gã́bug ketõ̀ò gé kọ́ kpẹ̀a, beè noo ãa tọ nàà tóm nvee kẽ vaá naa príǹt Kpá Tọ Kùdẽe Ló mm̀ dém bel Portugal gbẹá Brazil. Sìgà ẽ́ aa ló tṍóá, a beè nè nú ea sígà ló 7,000 kà kpá. A gè iná Brazil beè naa kọọ̀ Sarah Ferguson á ié nèà deè ea géè ẹ̀bmà dẽe. A beè olòó bugi Kpá Tọ Kùdẽe Ló lọl gé mm̀ gbáá 1899, sõò, à gáà beè dììa múú. Sìgà ẽ́ aa ló tṍóá, Vígà Ferguson nè ténì kà a nvín beè gbóó dììa múú.

Tṍó e gbáá é gé tá , Kpá Tọ Kùdẽe Ló níí December 15, 1923 beè kọ́ nú ea silà aa mm̀ gbaa ló ea beè di zẹ̀ẹ̀ Gbò Nvín Nò Kpá Káí mm̀ ba sì tóm kọ̀ kpẹ̀a, à kọ́ọ̀: “A beè dọa bàlà kẽ kọọ̀ pá vígà beè kpáá palàge ié agẹ zìgà . . . Naanii èé bọ́á nuù bé Bàrì vaá tú bẹ̀à sã́ bùlà nè ẹ́ẹ́-ẹẹ̀ nyíe siimá tóm gbáá eé gé bã m-mí.”

Gbáá àlà é dú nagé dõona kà gbáá ea é naa kọọ̀ nyíè Gbò Nvín Nò Kpá Káí á ẹẹ. Pá vígà e bà di Bẹ́tẹẹ̀l a tú sìgà ẽ́ siimá tóm boo ba kunukẽ̀ ea di Staten e múú beeá tení ló, ea beè di kuló tọ nàà tóm ea gé ẹb nú ea kil ló sìtóm kọ̀ kpẹ̀a beeá ló bàlà booí ea di Brooklyn. Ba beè tìb tọí lọ̀l tṍó e bà ã́àa bã mm̀ gbáá 1924, vaá níí beè naa kọọ̀ pá vígà á gbaaá ló vaá tú bẹ̀à sã́ bùlà kọọmá lé kpẹ̀aí èlmà bé e bà géè naa.