40 TOGÓ BEL GE NÒ
SỌ́L EA GÃ́BUG DÚ 30 Ńdáà Tẹ̀, Nà Bàrì Nè Nà Kóò
Jìhóvà “Ólò Bó Gbò E Nyíé Va Biilà”
“À ólò bó gbò e nyíé va biilà; À ólò bọví nu dẽè ba kom.” —PS. 147:3.
NÚ EÉ NÓ
Jìhóvà ólò palàge ẹ̀b nú ea kil ló gbò e nyíé va biilà àbèè gbò e bà íe tã̀àgã̀ bùlà. Mm̀ nakà togó bel ge nòí, èé ló bel boo bé e Jìhóvà ólò nvèèi nyíé gbàà tṍó e íè tã̀àgã̀ bùlà naa nè bé eé láá nvèè nàgé nyíé gbàà dõona gbò naa.
1. Mó íb tọa ló ní e Jìhóvà ólò ié kilma ló pá a gyóòlo é?
JÌHÓVÀ ólò mòn kọ̀láá kà nú e pá a gyóòlo gé téní bá. À ólò nyimá tṍó e nyíéi ẹ́ẹ nè tṍó e nyíéi biilà. (Ps. 37:18) Nyíée ólò palàge ẹẹ tṍó ea mon kọọ̀ è íè tã̀àgã̀ bùlà vaá è pììgà bé e bẹẹ kpóó sim tùlà naa gè fã̀e. Vaá ní ea bọọ lọ̀l vaá à lee dú kọ à ólò tànìe gè nvèè bá nèi.
2. Éé ní e Jìhóvà ólò naa nè gbò e nyíé va biilà ẹ, vaá mósĩ́ deè ní eé láá ié bélè lọl ló a nvèè bá ẹ́?
2 Kpá Psalm 147:3 kọ́ọ̀ Jìhóvà ‘ólò bọví nu dẽè kom’ gbò e nyíé va biilà. Dọ̀ Kpá Káíá palàge baatẽ́ bé e Jìhóvà ólò ẹ̀b nú ea kil ló gbò e bà íe tã̀àgã̀ bùlà naa. Éé ní eé íè ge naa kọbé è íe bélè lọl ló bé e Jìhóvà gé ẹb nú ea kilíí ló naa ẽ́? Bugi togó boo nakà nu dòòle lóí. Neǹ dóm biè ea palàge nyimá tóm é láá nvèè bá nè nen e kom bã́é ló kọ á ié bóa. Sõò kọbé nen e kom bã́é lóá láá ié bélè lọl ló nvèè bá neǹ dóm bièa, àé íè ge naa nú ea kọ́ á naa. Mm̀ nakà togó bel ge nòí, èé mon bé e Jìhóvà ólò tú Kpá Káí nvèèmà bá nè gbò e bà íe tã̀àgã̀ bùlà naa, nè bé eé láá tú gbò dùùlà bá deè tṍ ea néi siimá tóm naa.
JÌHÓVÀ NÁA KỌ É AGALA BOO KỌỌ̀ À PALÀGE NVEENÌÈI KA LÓ
3. Éé ní ea ólò naa kọ sìgà gbò á ẹ̀b kọ bàá géè ló tọ́ọ̀ nu ẽ́?
3 À dú pọ́lọ́ kọọ̀ gã́bug nen deè nieí náa ólò vùlè dõona gbò. Vó ólò naa kọ bàá tú pọ́lọ́ bá sẹ̀ẹ̀mà gbò nen naa ní ea é tõó vá ló kọ bàá gé ló tọ́ọ̀ nu. Ene kà vígà pábia ea bée kọlà Helen a kọ́ọ̀: “Ńdáà tẹ̀ nè ńdáà kà náa beè vùlèi. Ńdáà tẹ̀ ólò dú gboo-gboo ló vaá à ólò bọọgẹ̀ kọ́ nèi kọ é gé ló tọ́ọ̀ nu.” Belí Helen, be à sẹlẹ ba beè tú pọ́lọ́ bá sẹ̀ẹ̀mà ni, nvèèmà ni lẹ́, àbèè ge naa kọ á tõó ní ló belí kọọ̀ ó gé ló tọ́ọ̀ nu. Be o beè tení bá íb gbò dìtõ̀òá, àé tavàlà ní ló gè zìgà kọ nen é láá vùlè ni.
4. Dẹ̀ẹ̀a boo nú ea di mm̀ kpá Psalm 34:18, éé ní e Jìhóvà náa kọ é agala boo é?
4 Kọbèè à gá náa vaá gbò nen beè tú pọ́lọ́ bá sẹ̀ẹ̀mà ni, òé láá agala boo kọ Jìhóvà vulè vaá nvèè ni ka ló. À “di kuló gbò e nyíé va biilà.” (Bugi Psalm 34:18.) Beè ‘lóó ni ọọ’ vaá à tõó ní ló belí kọ ó gé ló tọ́ọ̀ nu, kẽ̀èa boo kọ Jìhóvà beè mòn gbò lé kpãa ea dì ní m vaá dùùlà ni nvea ló. (Jọ́ọ̀n 6:44) À di kpènà ló gè nvèè bá nè ni boo béè kọ à palàge vùlè ni.
5. Éé ní eé láá nó lọl ló bá e Jíízọ̀s beè sẹ̀ẹ̀mà gbò e gbò nen beè ẹ̀b kọ bàá gé ló tọ́ọ̀ nu ẽ́?
5 Èé láá nó nú ea kil ló íb tọa ló e Jìhóvà ólò ié tení dú ló gè nó nu dòòmà bá Jíízọ̀s. Tṍó e Jíízọ̀s beè di boo kunukẽ̀í, a beè palàge tó sàn gbò e bá e dõona gbò sẹẹmà va beè naa kọ á tõó vá ló belí kọ bàá géè ló tọ́ọ̀ nu. (Máát. 9:9-12) Tṍó e ene kà ńnváá ea géè gbĩ́ gè ié bóa aa bá kà agẹbá zọ̀ló beè daa bá ló a kọ̀là ló, Jíízọ̀s beè nvèèe nyíé gbàà vaá lèèlàẹ boo béè a zìgà. (Máàk 5:25-34) Jíízọ̀s beè ié gbò kpãa ea Tẹ̀ íe. (Jọ́ọ̀n 14:9) Vóà naa, buù bẹ̀ì é láá agala boo kọọ̀ Jìhóvà vulèi vaá à mon gbò lé kpãa e íè, bíi ló zìgà nè vulè e íè kìlmàé ló.
6. Éé ní eo é láá naa be à tõó ní ló belí kọ ó gé ló tọ́ọ̀ nu ẽ́?
6 Éé ní eo é láá naa be à tõó ní ló belí kọ ó gé ló tọ́ọ̀ nu ẽ́? Bugi vaá ò bugi togó boo gbò dọ̀ Kpá Káí ea é náa kọ ó agala boo kọọ̀ Jìhóvà palàge nvèè ni ka ló. b (Ps. 94:19) Be à gá náa vaá nóo láà teelá tùlà gbò nú eo beè noo sẹ̀ẹ̀a sĩ́, àbèè kọ lóó ni ọọ boo béè kọ nóo láà naa nú e dõona gbò gé náa, ó gá bẽgẽ̀ bel o bá. Jìhóvà náa ẹb dẽesĩ́ kọ ó naa nú eo kpóó náa sim tùlà. (Ps. 103:13, 14) Beè nen beè tú pọ́lọ́ bá sẹ̀ẹ̀mà ni, ó gá bẽgẽ̀ bel o bá boo béè nú e nená beè naá ni ã́. Kẽea boo kọọ̀ Jìhóvà é béélá bel ló gbò e bà tú pọ́lọ́ bá sẹ̀ẹ̀mà dõona gbò vaá nvèè bá nè gbò e bà tú pọ́lọ́ bá sẹ̀ẹ̀mà va. (1 Pít. 3:12) Sandra, e ba beè tú pọ́lọ́ bá sẹ̀ẹ̀màe tṍó ea beè di pá nvín kọ́ọ̀, “M̀ ólò bàn Jìhóvà lee kọ á nvèè bá nèm kọ ḿ mòn gbò lé kpãa ea moním m.”
7. Mósĩ́ deè ní eé láá tú gbò nú e beè tení bá siimá tóm nè Jìhóvà ẹ?
7 Á gá bọọ ní ló kọ Jìhóvà é láá tú ni nvèèmà bá nè dõona gbò. À né ni nèà deè kọ ó kọ́ kpẹ̀a ea kilíé ló. (1 Kọ́r. 3:9) Boo béè gbò pọ́lọ́ nu ea ni náaa ní ló, àé láá valí ní ló gè dã́ ból ló dõona gbò e bà gé mon tã̀àgã̀ vaá vó é náa kọ ó láá nvèè bá nè va. Helen e beè zẹ́ẹ́ kọ́ nu ea kil lóá beè ié nvèè bá lọl bá dõona gbò, vaá kátogóí ẹlẹ dì ea gé nvèè nàgé bá nè dõona gbò. À kọ́ọ̀: “A beè olòó tõó ḿ ló kọ ḿ gé ló tọ́ọ̀ nu, sõò kátogóí Jìhóvà a náa kọ ḿ mòn kọọ̀ gbò nen vulèm vaá a túm nvèèmà nàgé bá nè dõona gbò.” Nyíè Helen palàge ẹẹ gè dú neǹ gyà deèsĩ́ tóm kọ̀ kpẹ̀a.
JÌHÓVÀ GBĨ́ KỌ É NYIMÁ KỌ A IÀẸ̀ LÓ NEÈI
8. Éé ní e Jìhóvà kọ́ nèi mm̀ kpá Àìzáíà 1:18 é?
8 Sìgà gbò gyóòlo Jìhóvà ólò ié tã̀àgã̀ bùlà boo béè gbò pọ́lọ́ nú e ba beè naa tṍó e bà gáà beè dììa múú àbèè tṍó e ba ni diia múú lọ̀l. Sõò à bọ́ló kọ é kẽea boo kọ Jìhóvà vulèi, vaá níà nú ea náa à lẹ̀ẹ̀là a Sã́áná kọ á úí boo kọbé à láá ia ló bẹẹ pọ́lọ́ nèi ẽ́. Mm̀ kà-kà, Jìhóvà gbĩ́ kọ é nyimá kọ a iàẹ̀ ló neèi. À náa kọ é agala boo kọ àé iàẹ̀ ló neèi be è zọẹ̀ẹ “kpoogè dee ló tã̀àgã̀ ea dìí zẹ̀ẹ̀.” c (Bugi Àìzáíà 1:18.) Nyíéi palàge ẹẹ kọ Jìhóvà náa ólò kẽea na boo pọ́lọ́ e beè sì! Vaá lé e náà náa ólò táẹ́ nyíe.—Ps. 103:9, 12; Híb. 6:10.
9. Éé ní ea náa vaá náa bọ́ló kọ é ká bùlà gbẹẹ́ boo gbò pọ́lọ́ e beè sí tṍó ea kil nvéeá ẽ́?
9 Be ò dì eo gé íe tã̀àgã̀ bùlà boo béè pọ́lọ́ nu eo beè naa tṍó ea kil nvéeá, pììga boo gè bugi togó boo gbò nú eo gé náa kátogóí nè nú eo é náa dì deèsĩ́. Bugi togó boo nu dòòmà bá neǹ tóm Pọ́ọ̀l. A beè ọgá ló bé ea beè olòó biigè ló gbò e bà gé nyoone nvéè Kráìst naa, sõò a beè nyimá kọ Jìhóvà a iàẹ̀ ló neèe. (1 Tím. 1:12-15) É kọ a beè olòó bugi togó boo gbò pọ́lọ́ ea beè sí tṍó ea kil nvéeá? Ẽ́èe náa beè naa vó, belí bé e náa beè kilsĩ́ gè bugi togó boo pọ̀b dọ̀ ea beè ié tṍó ea beè dú neǹ Fàrìsíì naaá. (Fíl. 3:4-8, 13-15) Tãa vó, Pọ́ọ̀l beè kilsĩ́ gè ká bùlà gbẹẹ́ boo a sìtóm kọ̀ kpẹ̀a vaá bugi togó boo gbò bélè ea é beè ié dì deèsĩ́. Dì belí Pọ́ọ̀l, née é láá nyaaná bá ló gbò nú ea beè naaá tṍó ea kil nvéeá, sõò èé láá tú kọ̀láá kà nèà deè e íè fã̀àmà Jìhóvà vaá bugi togó boo gbò tã́áná deè bá ea zigà nèí dì deèsĩ́.
10. Éé ní eé láá naa be e beè sí pọ́lọ́ gbò nen tṍó ea kil nvéeá ẽ́?
10 Òé láá ié tã̀àgã̀ bùlà boo béè gbò pọ́lọ́ eo beè sí dõona gbò tṍó ea kil nvéeá, sõò éé ní ea é láá nvèè bá nè ni ẽ́? Gbĩ́ gbò sĩ́deè eo é láá nvèèmà bá nè gbò eo beè sí pọ́lọ́á, bàn va kọ bàá ia ló nè ni, vaá zogè kọ ò ọ́gà ló nú eo beè naaá. (2 Kọ́r. 7:11) Tã̀àgã ló Jìhóvà kọ á nvèè bá nè gbò eo beè sí pọ́lọ́á. Àé nveè bá nè gbò eo beè sí pọ́lọ́á nè ọ̀ọ̀ kọ ó láá lọlii nyíé boo nú ea beè naaá vaá iei fẹ́ẹ́-fẹẹ̀ ló.
11. Éé ní eé láá nó lọl ló nu dòòmà bá neǹ kọ́ọ̀ bùlà Bàrì Jónà ẽ? (Ẹ̀b nàgé fòtó ea di boo kóó kpáí.)
11 Nó nu lọl ló gbò lọ̀ eo beè ié tṍó ea kil nvéeá, vaá ò sọtọ́ deè kọ Jìhóvà á tú ni siimá tóm. Nvèè kpíi ló nú ea beè naaá ló neǹ kọ́ọ̀ bùlà Barì Jónà. Tãa vó ea aà kil Nínevà e Bàrì beè lẹ̀ẹ̀làẹ kọ á kìl, a beè teelá kil dõona ketõo. Jìhóvà beè nèe kpọ̀té vaá Jónà beè nó nu lọl ló a lọ̀. (Jónà 1:1-4, 15-17; 2:7-10) Jìhóvà náa beè aa ló gè tú Jónà siimá tóm. Bàrì beè kpáá nèe dõona kà nèà deè kọ á sí Nínevà, vaá Jónà beè gbànìe tṍ ló. Jónà náa beè sọ̀tọ́ deè kọ lọ̀ ea beè ié tṍó ea kil nvéeá á òòmàe lọl ló gè sí tóm e Jìhóvà née.—Jónà 3:1-3.
Tṍó e Jìhóvà ni duulà Jónà lọl gbàà pọ̀b kà gyã́àa lọ̀l, a beè gbóó kpáá kọ́ nèe kọ á aà kil Nínevà gé kọ́ a lẹ̀ẹ̀la tóm nè va (Ẹ̀b 11 kpò)
JÌHÓVÀ ÓLÒ TÚ A NYÓMÁ KÁÍ NVÈÈMÀI NYÍÉ GBÀÀ
12. Mósĩ́ deè ní e Jìhóvà ólò naa kọ é ié fẹ́ẹ́-fẹẹ̀ ló tṍó e di kèbá tàvàlà dìtõ̀ò ẽ? (Fílipaì 4:6, 7)
12 Jìhóvà ólò tú a nyómá káí nvèèmà bá nèi tṍó e pọ́lọ́ nu náaaí ló. Bugi togó boo nú ea beè naaá ló Ron nè Carol. Ba nvín págbálà ea beè toolá 39 gbáá beè fẹà a bá. Bà kọ́ọ̀: “E beè tení bá gã́bug tàvàlà dìtõ̀ò, sõò níí palàge dú pọ́lọ́ èl kọ̀láá kà. E beè tã̀àgã ló Bàrì gã́bug bílá dee e née beè láá daa, vaá e beè ié fẹ́ẹ́-fẹẹ̀ ló e kpá Fílipaì 4:6, 7 kọ́ nu ea kil lóá (Bugi.) Beè nú ea beè naaá ní ló náa kọ ó ié tã̀àgã̀ bùlà, tã̀àgã ló Jìhóvà vaá ò kọ́ gbõ̀ònà bé e nu tọ́a ní ló naa nèe. (Ps. 86:3; 88:1) Bàn Jìhóvà kọ á nè ni a nyómá káí mè àé nveè bá nè ni.—Lúùk 11:9-13.
13. Mósĩ́ deè ní e nyómá káí Bàrì é láá nvèè bá nèi kọ é kilsĩ́ gè fã̀ Jìhóvà mm̀ bọ́ọ̀ló dẹ̀lẹ̀ nyíé boo é? (Ẹ́fẹsọ̀s 3:16)
13 É kọọ̀ gã́bug tã̀àgã̀ eo ni téní bá a náa kọ lóó ni á ọọ? Nyómá káí Bàrì é láá nvèè bá nè ni vaá siè ni kpóó ló kọ ó kilsĩ́ gè fã̀ Bàrì mm̀ bọ́ọ̀ló dẹ̀lẹ̀ nyíé boo. (Bugi Ẹ́fẹsọ̀s 3:16.) Bugi togó boo nú ea beè naaá ló ene kà vígà pábia ea bée kọlà Flora. A dóm nè ẹ̀ẹ̀ beè dì e bà géè sí tóm gè kọ́ kpẹ̀a aa dó dọ dó tṍó ea dóm kúná gã̀ gbẹẹ́ẹ, vó beè naa kọ bàá zaali ba ílà dóm nè va. À kọ́ọ̀: “Nyíém beè palàge bììlà boo béè kọ à kẹlẹ́m, vaá níà áá nú em géè bugi togó boo é. M beè bàn Jìhóvà kọ á nèm a nyómá káí kọbé m̀ láá ĩ̀ìmà. Jìhóvà beè nvèèm nyíé gbàà vaá nvèè bá nèm kọ ḿ láá ĩ̀ìmà, náa kal ló béè kọọ̀ túá ból a beè tõo ḿ ló kọ ním é láá lọ̀l nyíé boo.” Flora kọ́ nágé kọọ̀ Bàrì a nveenìèe nyíé gbàà kọ á láá palàge dẹlẹ̀ẹ̀ẹ nyíé boo, vaá à agàlàẹ̀ boo kọ àé nveenìè bá neèe kèbá kọ̀láá kà tã̀àgã̀ ea kpeelìè sĩ́ ló. A beè kpáá kọọ̀: “Nú ea di mm̀ kpá Psalm 119:32 ea kọ́ọ̀: ‘M̀ é gbálá nyoone ge tõó boo gbò o log boo béè kọọ̀ ò túù nvee mm̀ nà nyíe’ palàge baatẽ́ bé e Jìhóvà ni nveè bá nèm naa.”
14. Mósĩ́ deè ní eé láá sọ̀tọ́ deè kọ nyómá káí Bàrì á nvèè bá nèi ẽ́?
14 Éé ní ea bọ́ló kọ ó naa tṍó eo ni ban Jìhóvà kọ á neè ni a nyómá káí é? Kilsĩ́ gè naa gbò nú ea é náa kọ nyómá káí Bàrì á nvèè bá nè ni. Gbò nuí bãaa mm̀ ge sí nònù nè ge kọ́ kpẹ̀a. Olòó bugi Kpá Káí buù dee vaá bugi togó boo gbò nú eo bugì. (Fíl. 4:8, 9) Tṍó eo gé bugi Kpá Káí, bugi togó boo gbò e Kpá Káí ló bel kilma ló e ba beè tení bá tã̀àgã̀ vaá ò bugi nagé togó boo bé e Jìhóvà beè nvèè bá nè va naa. Sandra, e beè zẹ́ẹ́ kọ́ nú ea kil lóá beè tení bá gã́bug tã̀àgã̀. À kọ́ọ̀: “Nòòtẽ́ ea kil ló Jósẹ̀f beè palàge tọá ḿ ló. Náa beè sọ̀tọ́ deè kọ tã̀àgã̀ nè pọ́lọ́ bèèla ea géè tení bá á naa kọ lóóe á ọọ ló gè fã̀ Jìhóvà.”—Jén. 39:21-23.
JÌHÓVÀ ÓLÒ TÚ PÁ VÍGÀ NVÈÈMÀI NYÍÉ GBÀÀ
15. Bà mée ní e bà é láá nvèèi nyíé gbàà ẹ, vaá mósĩ́ deè ní e bà é láá nvèè bá nèi ẽ́? (Ẹ̀b nàgé fòtó.)
15 Tṍó e gé mon tã̀àgã̀, pá vígà é láá ‘palàge nvèè bá nèi.’ (Kọ́l. 4:11) Pá vígà dú enè sĩ́deè e Jìhóvà ólò zogè kọ à vulèèi. Bà é láá nvèèi nyíé gbàà tení dú ló gè dìí kpàn vaá pãanéi tṍ ló tṍó e gé kọ́ bé e nu tọ́aí ló naa nè va. Bà é láá bugi dọ̀ Kpá Káí ea é nveèi nyíé gbàà àbèè ge zọ̀i tã̀àgã ló Bàrì. d (Róm̀ 15:4) Sìgà tṍó, pá vígà é láá kẽeéí nyíe bé e Jìhóvà ẹb nu naa, vaá nvèè bá nèi kọ é kilsĩ́ gè ĩ̀ìmà. Bà ólò láá naa nagé sìgà nu ea é nveè bá nèi tṍó e nyíéi biilà, dì belí gè bùl gyã́á mái.
Gbò kóò e bà bọ́ló dẹ̀lẹ̀ nyíé boo e bà vulè Jìhóvà é láá nvèèi nyíé gbàà vaá nvèè bá nèi (Ẹ̀b 15 kpò)
16. Éé ní ea dú bíi kọ é naa kọbé dõona gbò láá nvèè bà nèi ẽ́?
16 Sìgà tṍó, àé dú bíi kọ é bĩiná nvèè bá lọl bá dõona gbò. Pá vígà palàge vùlèi vaá bà gbĩ́ gè nvèè bá nèi. (Pró. 17:17) Sõò bà náa é láá dõogẽ nyimá nú e gé téní bá àbèè nú e íè bíi ló. (Pró. 14:10) Be ò íè tã̀àgã̀ bùlà, òé láá kọ́ bé e nu tọ́a ní ló naa nè gbò kóò e togó va tulà nu kọbé bà láá nvèè bá nè ni, vaá ò kọ́ nú eo íè bíi ló nè va. Òé láá kọ nagé nú eo gé téní bá nè ene àbèè bàà kà neǹ kànen ea di mm̀ bõ̀ònatõ̀ò eo ólò láá palàge bã ló. Sìgà gbò vígà pábia ólò ié nvèè nyíé gbàà tṍó e bà zọ gbò vígà pábia e ba ni agaló mm̀ ge fã̀ Bàrì loá bel boo nú ea gé tãagẽ́ va.
17. Mókà gbò ànà-ànà ní ea é láá naa kọ é gá ié nvèè bá lọl bá pá vígà ẹ, vaá mósĩ́ deè ní eé láá bé èl bá ẹ́?
17 Zọ̀ pá vígà naaá nu. Sìgà tṍó, nyíé ni é láá palàge bììlà naa ní e náa é tan ni gè zọ̀ dõona gbò naaá nu. Vaá sìgà tṍó, pá vígà náa é láá dã́ ból ló bé e nu tọ́a ní ló naa, àbèè kọ bà é láá ló bel ea é kyẽ́ ni. (Jém̀z 3:2) Sõò ó gá di boo béè vó vaá ò ooà aa ló gè zọ̀ pá vígà naaá nu, boo béè kọ Jìhóvà é láá tú va nvèèmà bá nè ni. Ene kà neǹ kànen ea bée kọlà Gavin, ea beè ié agẹ bá tã̀àgã̀ bùlà kọ́ọ̀: “Gã́bug tṍó, náa ólò tànim gè zọ̀ pá nà kóò naaá nu.” Sõò Gavin ólò pììgà ge zọ̀ pá vígà naaá nu, vaá gè naa vó ólò nvèè bá nèe. Ene kà vígà pábia ea bée kọlà Amy kọ́ọ̀: “Gbò nú ea beè naaá ḿ ló beè naa kọ á tàvàlà ḿ ló gè dẹlẹ nyíé boo gbò nen. Sõò kátogóí m̀ gé nó gè vùlè vaá dẹlẹ nyíé boo pá vígà belí Jìhóvà. Ge naa vó ólò naa kọ nyíè Jìhóvà á ẹẹ, vaá à náa nagé kọ nyíém á ẹẹ.”
GBÒ NÚ E JÌHÓVÀ ZÌGÀ KILMA LÓ DÌ DEÈSĨ́ É LÁÁ NVÈÈI NYÍÉ GBÀÀ
18. Éé ní e gé ẹbmà dẽe gè ié dì deèsĩ́ ẽ́, vaá éé ní eé láá naa kátogóí é?
18 Pọ́ì ńkem̀ tṍó àla, Jìhóvà é lọl gbò nú ea ólò naa kọ nyíéi á bììlà. (Kùùà 21:3, 4) Tṍóá, née é “kẽea na boo” gbò pọ́lọ́ nú ea beè náaaí ló. (Àìz. 65:17) Bã̀àna tṍó e gé mon tã̀àgã̀ kátogóí, Jìhóvà ólò ẹ̀b nú ea kilíí ló. Jìhóvà a néi gã́bug nú ea é nveè bá nèi vaá nvèèi nyíé gbàà. Tú nvèè bá e Jìhóvà gé né ni vaá ò agala boo kọọ̀ à ‘bùlà nú ea kil ní ló.’—1 Pít. 5:7.
SỌ́L EA GÃ́BUG DÚ 7 Jìhóvà Ní Ea Néi Kóí É
a À dú gè nyaaná sìgà bée.
b Ẹ̀b ńkpó ea kọ́ọ̀ “ Jìhóvà Nvee Ni Ka Ló.”
c Kọbé è láá zọ̀ Jìhóvà ‘kpoogè dee ló tã̀àgã̀ ea dìí zẹ̀ẹ̀,’ à dú bíi kọ é zogè kọ è ọ́gà ló bẹẹ pọ́lọ́, bàn a ia ló vaá nyaaá. Be e beè sí kà agẹbá pọ́lọ́, à dú bíi kọ é sí ló gbò kànen mm̀ bõ̀ònatõ̀ò kọ bàá nvèè bá nèi.—Jém̀z 5:14, 15.
