O Beè Nyímá Gé?
Éé Ní Ea Náa Vaá È Nyimá Kọọ̀ Pá Ízràẹ̀l Beè Palàge Nvèè Ka Ló Gè Ọlí Sọ́l Ẹ́?
PÁ ÍZRÀẸ̀L beè palàge dé kpéè ló gè ọlí sọ́l. Gã́bug tṍó Kpá Káí ólò ló bel kilma ló gbò e ba beè tú nu kpaamá sọ́l vaá ọlí sọ́l. Kàsĩ́ bà émí sọ́l mm̀ gã́bug ketõ̀ò ea di mm̀ Kpá Káí. Dì belí nu dòòmà bá, ba beè emí kpá Psalm, Sọ́l Sólomòn, nè Làmèntéshìòn, kọbé bà ólòó ọlí. Ene kà kpá ea kọ́ bé e gbò nen beè olòó tõó dùm tṍó e bà géè emí Kpá Káíá naa tẹ́lẹ bàlà kẽ kọọ̀ pá Ízràẹ̀l beè olòó ọlí sọ́l gã́bug tṍó e bà gé náa nu.
Ba beè olòó ọlí sọ́l. Pá Ízràẹ̀l beè olòó tú nu kpaamá sọ́l vaá ọlí mm̀ ge zogè bé e nu tọ́a vá ló naa. (Àìz. 30:29) Gbò bia beè olòó tú kpá làlà kpaamá sọ́l vaá zòb-zob ge zogè kọ nyíé va ẹ́ẹ tṍó e bà gé úu pẹ̀gẹ̀lẹ̀ ból méné, gbẹá kè sẹ̀lẹ̀nù, nè tṍó e bà bé ba gbò ọ́b èlbá. (Jọ́j. 11:34; 1 Sám. 18:6, 7; 1 Kíǹ. 1:39, 40) Pá Ízràẹ̀l beè olòó ọlí nágé sọ́l tṍó e nen ú ge zogè bé e nyíé va biilà naa. (2 Kró. 35:25) È agàlà boo níí boo béè kọọ̀ kpá ea kọlà McClintock and Strong’s Cyclopedia kọ́ọ̀, “à palàge dọa bàlà kẽ kọọ̀ pá Ízràẹ̀l beè palàge vùlè ge ọlí sọ́l.”
Gbò méné e bà géè bẹ̀l Ízràẹ̀l beè palàge dé kpéè ló sọ́l. A beè olòó leemá gbò méné pá Ízràẹ̀l ge pãane tṍ ló sọ́l. Méné Sọ́ọ̀l beè tú Dévìd sẹlẹ́ a tọ kọbé à ólòó kpá sọ́l nèe. (1 Sám. 16:18, 23) Tṍó e tṍó téní e Dévìd ni dú méné, a beè naa sìgà nu gè kpaamá sọ́l, emí sìgà sọ́l, vaá noo gbò e bà é ólòó kpá sọ́l gbẹá mm̀ tọọ̀ káí Jìhóvà. (2 Kró. 7:6; Émòs 6:5) Méné Sólomòn beè ié nágé gbò gbálà nè gbò bia e bà ólò ọlí sọ́l nèe.—Ẹ̀klì. 2:8.
Ba beè olòó ọlí sọ́l tṍó e bà gé fã Jìhóvà. Pá Ízràẹ̀l beè palàge nvèè ka ló gè ọlí sọ́l tṍó e bà gé fã Jìhóvà. Kàsĩ́, 4,000 nen beè olòó tú nu kpaamá sọ́l gbẹá mm̀ tọọ̀ káí ea beè di Jèrúsalẹ̀m. (1 Kró. 23:5) Ba beè olòó tú kpá làlà, gòmà, koò, nè dõona kà nú e díí di boo kpaamá sọ́l. (2 Kró. 5:12) Sõò níì áá gbò e ba beè olòó tú nu kpaamá sọ́l ní e bà ólò ọlí sọ́l tṍó e bà gé fã Jìhóvà ẹ nì. Gã́bug pá Ízràẹ̀l beè olòó ọlí sọ́l e bà kólíe Songs of the Ascents tṍó e bà gé kil Jèrúsalẹ̀m gé fã̀ Jìhóvà. (Ps. 120-134) Dẹ̀ẹ̀a boo émì nuù pá Júù, pá Ízràẹ̀l beè olòó ọlí sọ́l ea kọlà Hallel tṍó e bà gé sẹlẹ Nàànù Ténì Zelí a.
Deè nieí, gbò gyóòlo Bàrì ólò palàge ọlí nágé sọ́l. (Jém̀z 5:13) È ólò ọlí sọ́l tṍó e gé fã Jìhóvà. (Ẹ́fẹ. 5:19) È ólò tõo bã ló pá vígà tṍó e gbáà ọlí sọ́l nè Jìhóvà. (Kọ́l. 3:16) Vaá sọ́l ólò sièi kpóó ló tṍó e di kèbá tã̀àgã̀. (Tóm 16:25) Ge ọlí sọ́l dú kà lé sĩ́deè ge zogè kọọ̀ è dẹlẹ̀ nyíé boo Jìhóvà vaá vùlèe.
a Pá Júù beè olòó kolí sọ́l ea di mm̀ kpá Psalm 113 tẹlẹ 118 kolíe Hallel, vaá ba beè olòó ọlí sọ́lí tṍó e bà gé leelà Jìhóvà.
