1-2. Mósĩ́ deè ní e nú ea di mm̀ kpá Ẹ̀klìzíástìs 11:6 ló bel kilma ló sìtóm kọ̀ kpẹ̀a ẹ́?

MM̀ SÌGÀ dó, tṍó e gbò nen dã́ lé kpẹ̀aí, à ólò leemá va gè kpáá dã́ bọ̀ọ̀vẹ̀. À ólò belí kọọ̀ bà géè elá bànà! Mm̀ sìgà dó, gbò nen ólò ié gbálà ńkem̀ lèèma kilma ló Bàrì àbèè Kpá Káí. Gbò e bà di kiẽ́e e olo dì ólò labví láb naa và kilma ló lé kpẹ̀aí é? Kọ̀láá bé ea dì naa, Jìhóvà gbĩ́ kọ é kilsĩ́ gè kọ́ kpẹ̀aí dọ̀ọ̀mà tṍó e ẹlẹ é kọ́ a lée.

² Jìhóvà beè beeláfùl kà lèlà tṍó e sìtóm kọ̀ kpẹ̀aí é íná kùbmà. “Na tóm ní e kùbmà nvée tṍó é gboó lee é.” (Máát. 24:14, 36) Besĩ́ì tṍóá kálá lee, mósĩ́ deè ní e beele é láá gbàn tṍ ló gbò moǹ bel ea kọ́ọ̀, “ó gá zìgà kọ lóó ni á ọọ” ẹ́? *—Bugi Ẹ̀klìzíástìs 11:6.

3. Éé ní eé ló sọ́l boo mm nakà togó belí é?

³ Togó bel e aà lóá beè ló sọ́l boo ténì kà nú ea dú bíi kọ é naa kọbé è láá palàge “kolí gbò nen.” (Máát. 4:19) Nakà togó belí é ló sọ́l boo taà sĩ́deè eé láá siè kpóó ló bẹẹ béèlàfùl ge kọ́ kpẹ̀a, náa kal ló béè íb tàvàlà dìtõ̀ò e kpeè sĩ́ ló. Èé nó nú ea náa vaá à dú bíi gè (1) kilsĩ́ gè kọ́ kpẹ̀a, (2) ié ĩ̀ìmà, nè ge (3) kilsĩ́ gè ié agẹ zìgà.

4. Éé ní ea náa vaá à dú bíi kọ é ká bùlà gbẹẹ́ boo tóm e Jìhòvà beè nèi kọ é sì e?

⁴ Jíízọ̀s beè tú tṍó gbẹẹ́ sĩ́ kọ́ gbò nú ea é nááá mm̀ gbò dee e tṍó é gé tà nè gbò e bà géè nyoonée nvée. A beè  nyimá kọọ̀ gbò nuí é láá maaná va bùlà lọl ló gè kọ́ kpẹ̀a. A beè kọ́ nè pá a gbò nyòòne nvée kọọ̀, “kuai dẽe ló.” (Máát. 24:42) Mm̀ deè Núàa, a beè ié gbò dìtõ̀ò ea beè ọọvẹ ló gbò nen kọ bàá gá láá pãane tṍ ló ã̀àne e Núà géè kọ́ nèva. Níà bé ea dì nàgé naá deè nieí é. (Máát. 24:37-39; 2 Pít. 2:5) Níà nú ea náa vaá à dú bíi kọ é ká bùlà gbẹẹ́ boo tóm e Jìhóvà beè nèi kọ é sì e.

5. Mósĩ́ deè ní e kpá Tóm 1:6-8 baatẽ́ bé e sìtóm kọ̀ kpẹ̀aí é kọ́á naa ẽ́?

⁵ Deè nieí, sìtóm kọ̀ kpẹ̀a ea kil ló Boǹ Ménéá bĩ́íná ọ̀ẹ̀ dẽe. Jíízọ̀s beè kọ́ gbẹẹ́ sĩ́ kọọ̀ tṍó e ẹlẹ ni úè, pá a gbò nyòòne nvée é kilsĩ́ gè kọ́ kpẹ̀aí imá gbò kiẽ́e e ẹlẹ náa beè kọẹ̀ imàè. (Jọ́ọ̀n 14:12) Tṍó e Jíízọ̀s ni ú lọ̀l, sìgà pá a nyòòne nvée beè òòà nyoone ba tóm síì dọọ̀. Tṍó e Jíízọ̀s ni kẽeà aa kemà ú, a beè sí ene kà tóm dũ̀ùnè ge nvèè bá nè pá a gbò nyòòne nvée kọ bàá sii gã́bug gyã́à. Tṍó ea ni sí tóm dũ̀ùnèa lọ̀l, a beè gbóó nvèè kà m kọọ̀, sìtóm kọ̀ kpẹ̀a nè ge naa gbò nyoone nvée palàge bọọ èlmà kọ̀láá kà tóm ea dì. (Jọ́ọ̀n 21:15-17) Pọ́ì ńkem̀ tṍó besĩ́ à kálá kil káála, a beè kọ́ nè pá a gbò nyòòne nvée kọọ̀ tóm gè naa gbò nyòòne nvée e ẹlẹ beè daamàè togóá é kọ́á zelí dó Ízràẹ̀l. (Bugi Tóm 1:6-8.) Tṍó e sìgà gbáá ni téní, Jíízọ̀s beè naa kọọ̀ neǹ tóm Jọ́ọ̀n á ié mòà nù dẽé ea kil ló nú ea é nááá mm̀ ‘Deè Nen Ea Íéi.’ * Ene kà gbàà gbò nú e Jọ́ọ̀n beè mòn dú gbele dũ̀ùnè mòà nù dẽe ea kil ló ene kà nyómá tóm ea fáálá “Lé Kpẹa e a di lee” ea gé vee nè “dénè nen e a di bàlà boo, e a dú gbò e bà íe kele kele mèà, vaá aa kele kele gã, vaá ló kele kele dém bel.” (Kùùà 1:10; 14:6) Mm̀ kà kà, à dú bùlà Jìhóvà kọ é dõ̀ònà tõ̀ò ló sìtóm kọ̀ kpẹ̀aí dọ̀ọ̀mà tṍó e ẹlẹ é kọ́ a lée.

6. Mósĩ́ deè ní eé láá kilsĩ́ gè ká bùlà gbẹẹ́ boo sìtóm kọ̀ kpẹ̀aí é?

 ⁶ Èé láá ká bùlà gbẹẹ́ boo sìtóm kọ̀ kpẹ̀aí be è bugi togó boo bé e Jìhóvà gé nveè bá nèi naa . Dì belí nu dòòmà, à búmái tení dú ló gbò kpá ea di boo kòmpútà nè níí dẽè kpá, ọ́diò nè vídiò, nè gbò ní ea di boo íntanèt. Bugi togó boo níí: Gbò bel ea di boo kà lèlà sĩ́ bẹẹ website é sígá ló 1,000 dém bel! (Máát. 24:45-47) Gbò e bà di bàlà booí pooà bã mm̀ kele-kele kpóó bẹbẹ̀l vaá dũunà kele-kele bõ̀ònaló fã̀, vaá sìgà gbò à dú méné, boo tṍó e sìgà gbò dú tãa. Sõò nú ea é sígá ló aatáà gãà gbò gyóòlo Bàrì beeá tení ló bàlà booí aa deè di mm̀ gbaa ló. Dì belí nu dòòmà bá, deè Friday, April 19, 2019, Gbò Neǹ Ditõ̀ò Jìhóvà beeá ló zivèkà bàlà booí beè bõoná ẹ̀b ene kà vídiò ea ló bel boo nú ea dì nè dee. Ló èlà deeá, gã́bug gbò e bà tóólá 20,919,041 beè bõoná ló Sẹ̀lẹ̀nù Ge Kẽ̀èa Boo Ú Jíízọ̀s. À ólò tànii gè kilsĩ́ gè kọ́ kpẹ̀a ea kil ló Boǹ Ménéá tṍó e bugì togó boo kọ à dú kà pọ̀b kà nèà deè ge dõ̀ònà tõ̀ò ló nakà tómí.

7. Mósĩ́ deè ní e nu dòòmà bá Jíízọ̀s nvèè bá nèi kọ e ká bùlà gbẹẹ́ boo sìtóm kọ̀ kpẹ̀a ẹ́?

⁷ Dõòna kà sĩ́deè èé láá ká bùlà gbẹẹ́ boo sìtóm kọ̀ kpẹ̀aí dú gè nyoone nvéè nu dòòmà bá Jíízọ̀s. Náa beè sọ̀tọ́ deè kọọ̀ tọ́ọ̀ nu á maanàè a bùlà lọl ló gè kọ́ kpẹ̀a. (Jọ́ọ̀n 18:37) Ge kọọ̀ Sétàn tú “dénè kpá dó bàlà booí nè ba leelé” kẹ̀ẹ̀mà Jíízọ̀s náa bee ọọvẹ ló a zìgà; àbèè kọọ̀ a beè ọọvẹ nagé ló a zìgà tṍó e ba beè gbĩ́ gè túe naamá méné. (Máát. 4:8, 9; Jọ́ọ̀n 6:15) Tã́gĩ̀ bá gè bã̀ méné àbèè agẹbá nàà uú boo náa beè ọọvẹ́ẹ ló. (Lúùk 9:58; Jọ́ọ̀n 8:59) Tṍó e beélè zìgà bã́ kèbá dò ẹ̀b, èé láá ká bùlà gbẹẹ́ boo sìtóm kọ̀ kpẹ̀a be è kẽèa boo dùùlà bá deè tṍ neǹ tóm Pọ́ọ̀l. A beè siè kpóó ló gbò níí Kráìst kọ bàá nó nu dòòmà bá Jíízọ̀s kọbé lóó va “àà ló gè ọọ”!—Híb. 12:3.

8. Éé ní ea dú gè ié ĩ̀ìmà ẽ, vaá éé ní ea náa vaá à palàge dú bíi kátogóí é?

⁸ Nen ea íe ĩ̀ìmà ólò dĩine ló elá dọ̀ọ̀mà tṍó e dìtõ̀ò é nyááá. À dú bíi kọ é ié ĩ̀ìmà kọbèè è gé ẹbmà dẽè ke kùbmà nú e náa é dú lé àbèè kọ è gé ẹbmà dẽè nú ea léémái kọ á naaá. Neǹ kọ́ọ̀ bùlà Bàrì Hábakọ̀k beè tú gã́bug tṍó emá bànà ke kùbmà ea é bã́ ló pọ́lọ́ lab dògò ea di mm̀ sìgà gbò e ba beè di Júdà. (Háb. 1:2) Gbò nyòòne nvéè Jíízọ̀s beè ẹ̀bmà dẽe kọọ̀ Bàrì é gé “dàlà togó lẹ̀ẹ̀là bel” naa ní e bàé valìè bá diè pọ́ì aalìè kèbá bẹbẹ̀l pá Róm̀ ea géè biigè va lóá. (Lúùk 19:11) Beele ẹbmà dẽè deé e Boǹ Méné Bàrì é lọl kọ̀láá kà pọ́lọ́ lab dògò vaá gbóó domà ãa bàlà boo e gbò lé lab dògò ní e bàé dí m ẽ́. (2 Pít. 3:13) Kọ̀láá bé ea dì naa, à dú bíi kọ é ié ĩ̀ìmà vaá elá bànà tṍó e Jìhóvà sa gè naamá níí. Bugi togó boo sìgà sĩ́deè e Jìhóvà nóòmài gè ié ĩ̀ìmà.

9. Mókà gbò nu dòòmà bá ní ea zógè kọọ̀ Jìhòvà dú neǹ íè ĩ̀ìmà ẽ?

⁹ Jìhóvà dú nu dòòmà bá ea gbõoma mm̀ ge ié ĩ̀ìmà. A beè tú gã́bug tṍó nè Núà kọ á kaamá faà vaá “vee kọ gbò nen á naa nu e a lelà.” (2 Pít. 2:5; 1 Pít. 3:20) Jìhóvà beè kilsĩ́ gè pãane tṍ ló gbò bíb e Ébràhàm géè bĩináe ea kil ló a béèlàfùl ge kyọ̀sĩ́ gbò pọ́lọ́ e ba beè di pọ̀b boǹ Sọ́dòm nè Gòmórà. (Jén. 18:20-33) Mm̀ gã́bug gbò gbáá, Jìhóvà beè ié kele íb ĩ̀ìmà kilma ló dó Ízràẹ̀l e bà náa beè bọ́ló dẹ̀lẹ̀ nyíé booá. (Nèh. 9:30, 31) Deè nieí, beele é láá palàge mòn nàgé kọọ̀ Jìhóvà dú neǹ íè ĩ̀ìmà boo béè kọọ̀ à ne gã́bug tṍó kọ̀láá gbò e ẹlẹ gbĩ́ kọ bàá duè pá a kóò kọ bàá  “ọgá ló ba pọ́lọ́.” (2 Pít. 3:9; Jọ́ọ̀n 6:44; 1 Tím. 2:3, 4) Nu dòòmà bá Jìhóvà náa kọ é ié lé bug ea é náa kọ é ié ĩ̀ìmà boo tṍó e gé kọ́ kpẹ̀a vaá noòmà nù. À nóòmà nài gé ĩ̀ìmà tení dú ló gbò bel dòòle ló ea di mm̀ Kpá Káí.

10. Dẹ̀ẹ̀a boo nú ea di mm̀ kpá Jém̀z 5:7, 8, éé ní e nu dòòmà bá neǹ kìl ól nóòmài ẽ́?

¹⁰ Bugi Jém̀z 5:7, 8. Nu dòòmà bá neǹ kìl ól nóòmài bé ea dú bíi gè ié ĩ̀ìmà naa. À dú kà kà kọọ̀ sìgà nú e bà fó ólò bọọ gbalá. Sõò, gã́bug nu e bà fó, èlmà tõ̀ò gbó ní ea é mumí ból súú, náa ólò vàlẹ̀ bá bọọ. Pá Ízràẹ̀l beè olòó tú ọ̀ọ̀lẹ̀ ẽ́ foomá nu. Neǹ kìl ól ólò fó nu ló ãa ból boo vaá bùùlà nyòòmà ãa byó gbei tṍó e boo náa gé bọọ̀gẹ̀ dọọ na. (Máàk 4:28) À zógè kọ è nyímà nu be è nó íb ĩ̀ìmà e neǹ kìl ól ólò ié. Sõò, níí náa bọọ̀gẹ̀ valí.

11. Mósĩ́ deè ní e gè ié ĩ̀ìmà é láá nvèè bá nèi mm̀ bẹẹ sìtóm kọ̀ kpẹ̀a ẹ́?

¹¹ Gbò nen e bà náa gbõoma ólò gbĩ́ gè mòn nú ea silà aa mm̀ ba sìà kpóó ló tẽ̀ènè tṍóá. Sõò, be è gbĩ́ì kọọ̀ nú e bè fò á múmí, èé íè ge palàge sí tóm ló, ea dú gè ùb kẽ, fó nu, gbaa víl ló, vaá tṍ múú ló. À bĩ́íná sìà kpóó ló kọbé è láá kilsĩ́ gè kọ́ kpẹ̀a. À ólò tú gã́bug tṍó bái gè láá nvèè bá nè nen e ólò noòmà Kpá Káí kọ á tú dùm kpòl nèà lọa m vaá nó gè vùlè gbò nen. Bẹẹ íè ĩ̀ìmà é nveè bá nèi kọọ̀ lóói á gá ọọ tṍó e kpeè sĩ́ ló tàvàlà dìtõ̀ò. Èé íè ge ié ĩ̀ìmà tṍó e monì nen ea léémáe gè pãanéi tṍ ló vaá tànìè gè nó nu. Née gé láá tú bá kpóó siimá nen e ólò noòmà Kpá Káí kọ á ié zìgà. Sìgà tṍó, bã̀àna gbò nyòòne nvéè Jíízọ̀s beè ọọ ló gè dã́ kà ea di mm̀ nú ea géè noòmà va. (Jọ́ọ̀n 14:9) Beele é láá kọ́ kpẹ̀a vaá nóòmà nuù gbò nen, sõò Bàrì ní ea é náa kọ bàá ié zìgà ẹ.—1 Kọ́r. 3:6.

12. Mósĩ́ deè ní eé láá ié ĩ̀ìmà kilma ló pá bẹẹ tọ e bà náa ólò sí nònù ẽ?

¹² Àé láá tàvàlàí ló gè ié ĩ̀ìmà tṍó e gé kọ́  kpẹ̀a nè pá bẹẹ tọ e bà náa ólò sí nònù. Nòòkúu ea di mm̀ kpá Ẹ̀klìzíástìs 3:1, 7 é láá nvèè bá nèi. Kĩá kọ́ọ̀: “À íe . . . tṍó gè pĩi gã́ nè tṍó gè ló bel.” Bẹẹ láb é láá nvèè bá naa kọ á tàn pá bẹẹ dúà ló gè pãane tṍ ló bẹẹ lẹ̀ẹ̀la tóm. Beele é íè ge dì nàgé kpènà ló gè kọ́ nú ea kil ló Jìhóvà nè va. (1 Pít. 3:1, 2) Èé íè ge tú bẹ̀à sã́ bùlà kọọmá kpẹ̀a vaá noòmà nuù gbò nen, sõò èé íè ge ié ĩ̀ìmà kilma ló kọ̀láá nen, bã̀àna pá bẹẹ tọ.

13-14. Mókà sìgà nu dòòmà bá ea kil ló gè ié ĩ̀ìmà ní eé láá nò ẽ?

¹³ Èé láá nó gè ié ĩ̀ìmà lọl ló nu dòòmà bá gbò e ba beè bọ́ló dẹ̀lẹ̀ nyíé boo tṍó ea kil nvéeá nè gbò e bà di deè nieí. A beè tàn Hábakọ̀k kọọ̀ ke kùbmà á gbóó bã ló pọ́lọ́ lab dògò, sõò a beè zogè ĩ̀ìmà tṍó ea kọ́ọ̀: “Nda é kilsĩ́ gè elá boo ńdáà kpò nùtọ.” (Háb. 2:1) Neǹ tóm Pọ́ọ̀l beè kọọ̀ à tanìèe gè siè a tóm kọ̀ kpẹ̀a “ínmá kùbmà.” Vó beè naa kọ á ié ĩ̀ìmà vaá kilsĩ́ gè “vee Lé Kpẹa.”—Tóm 20:24.

¹⁴ Bugi togó boo nu dòòmà bá dóm nè va e ba beè sĩ́ tọọ̀ kpá Gílẹẹ̀d vaá bà lẹ̀ẹ̀là va tẹlẹ dó e gbálà ńkem̀ pá vígà ní e bà dìe, vaá gã́bug gbò e bà di dóá náa ólò nyoone nvéè Kráìst. Gbálà ńkem̀ gbò ní ea beè tàn ge nó Kpá Káí é. Sõò, gbò e ba beè gbá sí tọọ̀ kpá Gílẹẹ̀d e bà di dõòna kà dó ólò lẹ̀ẹ̀là tóm má va kọ bà íèè gã́bug gbò nvín nò Kpá Káí naa ní e gã́bug ọ̀và ni sí nònù. Dóm nè vaí beè ié ĩ̀ìmà vaá kilsĩ́ gè kọ́ kpẹ̀a, náa kal ló béè kọọ̀ gã́bug gbò e bà di ba ketõ̀ò ge kọ́ kpẹ̀a náa pãané va tṍó ló. Tṍó e ba ni tú aatáà gbáá kọọmá kpẹ̀a gbẹá kĩá, nyíé va beè ẹẹ gè mòn enè nen e bà ólò noòmà Kpá Káí ea diìa múú. Éé ní ea dú bèla ea di ló nu dòòmà bá gbò e ba beè di deè kéléá nè níí deè nieí é? Gbò e bà bọ́ló dẹ̀lẹ̀ nyíé booí náa beè òòà aa ló gè kọ́ kpẹ̀a àbèè ge zìgà kọọ̀ lóó va á ọọ, vaá Jìhóvà beè nèva kpẽ́ ló ba íè ĩ̀ìmà. Vóà naa, naanii èé belí “gbò e bà zigà vaá láá ié ĩ̀ìmà, naa ní e bà é láá ié nu e Bàrì beè zìgà nèva.”—Híb. 6:10-12.

15. Mókà enè sĩ́deè ní e zìgà é láá siè kpóó ló bẹẹ béèlàfùl ge kọ́ kpẹ̀a ẹ́?

¹⁵ Ge kọ è íè zìgà mm̀ sìtóm kọ̀ kpẹ̀aí ní ea náa kọ é pììgà ge iná ló gã́bug nen ea válií ló é. È dẹlẹ̀ nyíé boo gbò zìgànù Bàrì ea di mm̀ Kpá Káí. (Ps. 119:42; Àìz. 40:8) È monì kọọ̀ gã́bug kọ́ọ̀ bùlà Bàrì ea di mm̀ Kpá Káí a ḿḿ-má mm̀ beélè deeí. E mon nagé bé e dùm gbò nen nyááá vaá dú lé naa tṍó e bà tõó boo gbò dùùlà bá deè tṍ ea di mm̀ Kpá Káí. Gbò níí naa kọ é kpáá palàge àgala boo kọọ̀ à bọ́ló kọ kọ̀láá nen á dã́ lé kpẹ̀aí.

16. Dẹ̀ẹ̀a boo nú ea di mm̀ kpá Psalm 46:1-3, mósĩ́ deè ní e gè dẹlẹ nyíé boo Jìhóvà nè Jíízọ̀s é síè kpóó ló bẹẹ béèlàfùl ge kọ́ kpẹ̀a ẹ́?

¹⁶ È dẹlẹ̀ nàgé nyíé boo Jìhóvà, ea dú kpò kúm lẹ̀ẹ̀la tómí, nè Jíízọ̀s ea tú naamá Méné boo Boǹ Ménéá. (Jọ́ọ̀n 14:1) Kọ̀láá kà dìtõ̀ò e kpeè sĩ́ ló, Jìhóvà é kilsĩ́ gè dú bẹẹ kpènà nè bẹẹ kói. (Bugi Psalm 46:1-3.) Gbá ló vó, è agàla boo kọọ̀ Jíízọ̀s di káála ea gé le-le dee bá tómí tení dú ló kpóó ge lẹ̀ẹ̀mà bel e Jìhóvà beè nèe.—Máát. 28:18-20.

17. Nè ene kà nu dòòmà bá ea náa vaá èé kilsĩ́ gè kọ̀ kpẹ̀a.

¹⁷ Zìgà ólò naa kọ é àgala boo kọọ̀ Jìhóvà é tã́ànè dee bá bẹẹ sìà kpóó ló, sìgà tṍó mm̀ sĩ́deè e bè née beè ẹ̀bmà dẽe. (Ẹ̀klì. 11:6) Dì belí nu dòòmà bá, kọ̀láá dee, gbò nen ólò mòn kiẽ́e e lẹ́ẹ̀ kpá gè kọọmá kpẹ̀a boo nu. É kọ níí dú ene kà lé sĩ́deè ge kọọmá kpẹ̀a? Ẽei! Our Kingdom Ministry níí November 2014 kọ́ nú ea kil ló  ene kà nvín pábia ea di pọ̀b tọọ̀ kpá ea géè gbĩ́ gè emí nú boo togó bel ea kọ́ọ̀ Gbò Neǹ Ditõ̀ò Jìhóvà. Náa beè nyimá kiẽ́e e Kíndòm Họ́ọ̀l dì, sõò a beè mòn bẹẹ gbò kpá e bà lẹ́ boo nu gè kọọmá kpẹ̀a gbẹá boo beè ba tọọ̀ kpá, vaá a beè mòǹ nàgé kpá ea é láá emí nú ea kil ló a togó bel lọl m. Tṍó e tṍó téní, a beè dììa múú vaá dú nen ea gé sí tóm gyà deè sĩ́ tóm. Ge dã́ gbò bel ea dì naa vóí síèi kpóó ló kọ é kilsĩ́ gè kọ́ kpẹ̀a, boo béè kọọ̀ à zógè kọọ̀ gã́bug nen íe bíi ló gè dã́ kpẹ̀a Boǹ Ménéí.

18. Éé ní ea náa è àgala boo kọọ̀ sitóm kọ̀ kpẹ̀aí é síá lọ̀l tṍó e Jìhóvà gbĩ́é?

¹⁸ Èé láá àgala boo kọọ̀ sìtóm kọ̀ kpẹ̀aí é íná kùbmà kà lèlà tṍó ea bọ́ló. Ni bugi togó boo nú ea beè naaá mm̀ deè Núàa. Jìhóvà zógè kọ à ólò naanìè nú boo kà lèlà tṍó ea bọ́ló. Jìhóvà beè tú 120 gbáá gbẹẹ́ sĩ́ kọ́ tṍó e Tù Múúá é daaà togó. Tṍó e gã́bug gbáá ni téní, Jìhóvà beè gbóó kọ́ nè Núà kọ á ká faà. Mm̀ nú ea é láá dú 40 àbèè 50 gbáá besĩ́ Tù Múúá à kalá dààmà togó, Núà beè kilsĩ́ gè tú agẹ bá siimá tóm. Kọ̀láá bé e bà náa géè pãanée tṍ ló naa, a beè kilsĩ́ gè kọ́ kpẹ̀a dọ̀ọ̀mà tṍó e Jìhóvà kọ́ a lée gè gbóó tú gbò nom nvee mm̀ faàa. Tṍóá, “Jìhóvà beè gbóó kùb nù tọá,” kà lèlà tṍó ea bọ́ló.—Jén. 6:3; 7:1, 2, 16.

19. Éé ní eé láá ẹ̀b dẽe sĩ́ gè ié be née zigà kọọ̀ lóói á ọọ ẹ́?

¹⁹ Pọ́ì ńkem̀ tṍó àla, Jìhóvà é nveè kùbmà ló tóm kọ̀ kpẹ̀aí; ẹlẹ é gbóó ‘kyọ̀ sĩ́’ bàlà boò Sétàní vaá gbóó domà ãa bàlà boo e lé láb dògò ní ea é dí m-mé. Besĩ́ à kálá dọ̀ tṍóá, naanii mè é kilsĩ́ gè nó Núà, Hábakọ̀k, nè dõòna gbò e bà náa beè zìgà kọ lóó va á ọọ. Naanii mè é ká bùlà gbẹẹ́ boo sìtóm kọ̀ kpẹ̀a, ge ié ĩ̀ìmà, vaá dẹlẹ nyíé boo Jìhóvà nè gbò a zìgànù.