Nakà gã́belí kọ́ọ̀: “Be à gá náa ò mòn kiẽ́e e bà bíìgè ló neǹ tãa vaá kyọ̀gàlà lé bèèla nè lé lab dògò, á gá bọọ́ ní ló. Boo béè kọọ̀ neǹ ea bọọá dì ea gé ẹbvíe, vaá à íe gbò e bà bọọ èl nàgé baala.”—Ẹ̀klì. 5:8.

Tṍó e bè née ẹbvì nu belí bé e Jìhóvà ẹb nu naa, nakà belí é láá tõoí ló belí kọ à gé lóá bel nyòòmà kpóó bẹbẹ̀l gbò nen. Sõò à bọọ èlmà vó, à tẹ́lẹ̀ kà kà bel ea kil ló Jìhóvà bàlà kẽ, ea bọ́ló kọ á nvèèi nyíé gbàà vaá sièi kpóó ló.

Ẹ̀klìzíástìs 5:8 gé ló bel kilma ló bẹbẹ̀l ea bíìgè ló gbò tãa vaá beelá pọ́lọ́ bèèla bel kìlmà vá ló. À bọ́ló kọ nen ea gé bẹlá á nyimá kọọ̀, à íé nen ea palàge bọọ àbèè ge ié kpóó lẹ̀ẹ̀là bel elìè ẹlẹ ea gé ẹbvìèe. Vaá àé láá ié dõòna gbò e bà bọọ ea dì. À palàge dú pọ́lọ́ kọọ̀ bẹbẹ̀l gbò nen náa kọ gbò nen á mòn tã̀àgã̀ boo béè ba pọ́lọ́ bẹbẹ̀l nè pọ́lọ́ bèèla.

Sõò, bã̀àna tṍó ea bélí kọọ̀ née íè nà tọ́ọ̀ kà ẹ̀b dẽe sĩ́, beele íè nvèè nyíé gbàà ge nyimá kọọ̀ Jìhóvà dì ea ‘gé ẹb bã̀àna gbò ea bọọ’ e bà di mm̀ bẹbẹ̀l gbò nen. Èé láá bàn Jìhóvà kọ á nvèè bá nèi vaá tú dénè nú ea tãagẽ́i gbẹẹẹ́ bá. (Ps. 55:22; Fíl. 4:6, 7) Beele nyímà kọọ̀ “súú dẽè Jìhóvà dì ea gé ẹà dénè ketõ̀ò ea di ló boo kunukẽ̀í ló gè nvèè bá nè gbò e nyíé va gbõoma kìlmàé ló.”—2 Kró. 16:9.

Vóà naa, Ẹ̀klìzíástìs 5:8 kọ́ gbò nú ea kil ló bàlà booí nèi nè gé kọọ̀ à íe nen ea palàge bọọ́ mm̀ a gè ié kpóó lẹ̀ẹ̀là bel ea di. Bọọ èlmà tõ̀ò, gã́ belá nvèè bá nèi kọ é nyimá kọọ̀ Jìhóvà ní ea palàge bọọ ẹ́, vaá ẹlẹ ní ea íe dénè Kpóó Lẹ̀ẹ̀là Bel é. Kátogóí ẹlẹ dì ea gé bẹl tení dú ló a Sã́áná Jíízọ̀s Kráìst, ea dú Méné boo a Boǹ Ménéá. Nen ea bọọ lọ̀l vaá à leeá, ea gé ẹb dénè nu, dú neǹ lé lab dògò vaá níà bé ea Sã́áná dì nàgé naa ẽ́.