1-2. Dẹ̀ẹ̀a boo nú ea di mm̀ 1 Tímotì 6:20, éé ní e ba beè nè Tímotì e?

È ÓLÒ bọọgẹ̀ tú gbò nú e nveè ka ló nvee bá dõòna gbò kọ bàá kùdẽe ló. Dì belí nu dòòmà bá, èé láá tú kpègè sẹlẹ́ tọọ̀ kpóògè deè ló kpègè. Tṍó e náà vó, è ẹbmà dẽe kọọ̀ bàá kùbmà bẹẹ kpègè naa ní e bè náa é pe àbèè kọ bà zib. Vó náa kọ é dã́tẽ́ ló nú ea kọlà ge tú nú e nveè ka ló nvee bá dõòna nèn kọ á kpoogè dee ló.

² Bugi 1 Tímotì 6:20. Neǹ tóm Pọ́ọ̀l beè kẽeé nyíè Tímotì kọ a beè ié nú e ka di ló, ea dú kà kà bel ea kil ló tóm̀ bùlà e Bàrì íe kilma ló gbò nen. Jìhóvà beè naa kọọ̀ Tímotì á ié nèà deè ge “vee mon belí” nè ge “olòó vee Lé Kpẹa.” (2 Tím. 4:2, 5) Pọ́ọ̀l beè siè kpóó ló Tímotì kọ á palàge sii bá ló nú e Bàrì beè nvèèé báá. Dì belí Tímotì, ba beè tú gbò nú e ka di ló nvèèí bá. Níà gbò éé? Vaá éé ní ea náa èé íè ge kùbmà gyọ́ e Jìhóvà ni néi ẽ́?

3-4. Mókà sìgà gbò bug ní ea náa kọọ̀ ka á di ló gbò kà kà bel ea di mm̀ Kpá Káí é?

³ Jìhóvà tã́ànèi dee bá tení dú ló gè naa kọ é nyimá gbò kà kà bel ea kil ló gbò lé-lé nú ea di mm̀ Kpá Káí. Ka di ló gbò kà kà bel ea di mm̀ Kpá Káí boo béè kọọ̀ à nóòmài bé eé láá ié lé gbaa ló kilma ló Jìhóvà vaá baatẽ́ bé eé láá ié kà kà ẹ́ẹ́-ẹẹ̀ nyíe mm̀ dùm naa. Tṍó e zigà ló gbò kà kà belá vaá tõó dùm ea gbááá ló, è di pọ́ì aa kè bá gè dú gyóòlo nè kyáá nòòmànù nè gbò dùm e bè náa õoà.—1 Kọ́r. 6:9-11.

⁴ Dõòna kà nú ea náa vaá ka à di ló gbò kà kà bel ea di mm̀ Kpá Káí dú kọọ̀ Jìhóvà tẹ́lẹ bàlà kẽ nè áá gbò e ẹlẹ “beè sà” e bà dú gbò kìlmà kpá ló kẽ. (Tóm 13:48) Gbò e bà  kilmà kpá ló kẽ ólò zìgà kọọ̀ gyóòlo ea nyímá nu vaá bọ́ló dẹ̀lẹ̀ nyíé boo ní ea gé nóòmài nú ea kil ló Kpá Káí deè nieí é. (Máát. 11:25; 24:45) Née é láá dã́tẽ́ ló Kpá Káí boo beéle lóó, vaá tọ́ọ̀ nú ea dú lé tõ̀ò ge dã́tẽ́ ló á gé.—Pró. 3:13, 15.

5. Dõòna kà éé ní e Jìhóvà nveèí bá ẹ́?

⁵ Jìhóvà ne nài gé nèà deè ge tú kà kà bel ea kil ló ẹlẹ nè gbò a tóm̀ bùlà noòmà dõòna gbò. (Máát. 24:14) Ka palàge di ló lẹ̀ẹ̀là tóm Jìhóvà e veè boo béè kọ à nveè bá nè gbò nen kọ bàá dũùnà pá tọọ̀ Jìhóvà vaá nè va nèà deè ge ié dùm e bè náa tá. (1 Tím. 4:16) Kọbèè èé láá palàge kọ́ kpẹ̀a àbèè kọ née é láá palàge naa vó, è nveè sãa kúm tóm ea bọọ lọ̀l vaá à lee ea gé síá kátogóí. (1 Tím. 2:3, 4) Ẹ̀b bé ea dú kà nuù ẹ́ẹ́-ẹẹ̀ nyíe gè dú gbò e zọọ̀ Bàrì siá tóm naaà!—1 Kọ́r. 3:9.

6. Éé ní ea beè naaá ló sìgà gbò e bà náa beè kùà dẽe ló é?

⁶ Mm̀ tṍó Tímotìa, sìgà gbò níí Kráìst náa beè nvèè ka ló nèà deè e bà íe ge zọ̀ Bàrì siá tóm. Boo béè kọ nakà bàlà boo e di m-mí beè kpe ló Dímàs, beè naa kọ á gbẹmà nvéè nèà deè ge zọ̀ Pọ́ọ̀l siá tóm. (2 Tím. 4:10) Be à sẹlẹ, Faigẹ́lọ̀s nè Hamọ́jènìz beè kùb ge kọ́ kpẹ̀a boo béè kọọ̀ pọ̀ beè sií va kọ bàé bíìgèè va ló belí bé e bà géè biigè ló Pọ́ọ̀l naaá. (2 Tím. 1:15) Haimẹníọ̀s, Alẹkzándà, nè Failítọ̀s beè ììà aa boo èèlè kà kà bel vaá kùb ge fã̀ Jìhóvà. (1 Tím. 1:19, 20; 2 Tím. 2:16-18) Dénè gbòí beè olòó vùlè Jìhóvà, sõò ba beè òòà aa ló gè bugi togó kọọ̀ ka di ló gbò nú ea neè va.

7. Mókà gbò kyèèlè ní e Sétàn gbĩ́ gè tú kẹ̀ẹ̀mài ẽ́?

⁷ Mósĩ́ deè ní e Sétàn gbĩ́ kọọ̀ é tú gbẹ́gẹ-gbẹ́gẹ̀ bá sií ló gbò gyọ́ e Jìhóvà nveèí bá ẹ́? Nvèè kpíí ló sìgà gbò kyèèlè e Sétàn ólò tú siimá tóm. À ólò tú gbò nú e ẹbvì dẽè fíìm, Íntanèt, níùz pẹpà, gbò kpá nè màgàzíìn siimá tóm mm̀ sĩ́deè ea é náa kọ é bugi togó vaá labví láb mm̀ sĩ́deè ea é náa kọ é olòó òòà aa ló gè vùlè Jìhóvà àbèè ge gbàn tṍ ló gbò a log. À gbĩ́ gè naa kọ pọ̀ á siíi tení dú ló gbò bel e gbò nen lóí ló àbèè bíígá ló kọbé è ooà aa ló gè kọ́ kpẹ̀a. Vaá à gbĩ́ gè kẹlẹ́i kọ é pãane tṍ ló gbò “nòòmà nu e gbò e bà náa nyímá gé kólíe nyìmà nuá” kọbé è ooà aa ló gè fã̀ Jìhóvà.—1 Tím. 6:20, 21.

8. Éé ní e olo nóò lọl ló nu ea beè naaá ló ene kà vígà ea kọlà Daniel ẹ?

⁸ Be née ọ́ẹ̀ dẽe, èé láá dààmà togó kpõ̀tẽ́ aa mm̀ kà kàí. Bugi togó boo nu dòòmà bá Daniel, * ea dú nen ea ólò  leemáe gè bìlà vídiò gém. A beè kọọ̀: “Nda beè dààmà togó gè bìlà vídiò tṍó em beè láá toolá gbán òb gbáá. Túá ból, m beè olòó bìlà gbò gém̀ e bè náa beè bọọgẹ̀ dú pọ́lọ́. Sõò ńkem kem, m beè dààmà togó gè bìlà gbò gém̀ ea beè dú gboo-gboo ló vaá tú kpóó zọ naamá nu.” A beè olòó tú 15 ávà buù dee bìlmà vídiò gem̀í. Daniel kọ́ọ̀: “Ge ló kà kà bel, m beè nyimá kọọ̀ íb gbò gém̀ em géè bìlà nè gã́bug tṍó em nveè mm̀ ge bìlà géè olòó ọọvẹ ló nà gbaa ló kilma ló Jìhóvà. Sõò, m beè kẹlẹ nà bá ge zìgà kọọ̀ gbò nòòkúu ea di mm̀ Kpá Káí náa lóá bel kilma ló nda.” Boo béè vó, be née ọ́ẹ̀ dẽe, kólì kyáà é láá naa kọ é gá elá àgàlà mm̀ kà kàí. Be níá lẹẹàí ló, èé láá pee gbò nú e ka di ló e Jìhóvà beè nèi.

9. Dẹ̀ẹ̀a boo nú ea di mm̀ 1 Tímotì 1:18, 19, éé ní e Pọ́ọ̀l beè tú Tímotì doolé ló é?

⁹ Bugi 1 Tímotì 1:18, 19. Pọ́ọ̀l beè tú Tímotì doolé ló neǹ bé vaá sièe kpóó ló kọ á kilsĩ́ gè bé “kà lé bé.” Pọ́ọ̀l náa géè ló bel kilma ló gè bé-bé gbò nen. Mósĩ́ deè ní e gbò níí Kráìst dì belí gbò bé e bà di dẽè bé é? Mókà gbò kpãa ní ea dú bíi kọ é ié dì belí gbò bé Kráìst e? Naanii mè é ló sọ́l boo vòò kà nú eé láá nó lọl ló bel dòòle ló Pọ́ọ̀l. Gbò nú eé nóí é nveè bá nèi kọ é bii bá ló kà kà belí.

10. Éé ní ea kọlà ge fã̀ Bàrì e, vaá éé ní ea náa è ié bíi ló é?

¹⁰ Toní kpãà ge fã̀ Bàrì. Kà lé neǹ bé ólò bọ́ló dẹ̀lẹ̀ nyíé boo. Àé bé-bé agẹlẹ bá mm̀ ge kpènà nen ea vulè àbèè nú ea nveè ka ló. Pọ́ọ̀l beè siè kpóó ló Tímotì kọ á toní dùm ge fã̀ Bàrì—níà ge davá gbẹá ló Bàrì mm̀ bọ́ọ̀ló dẹ̀lẹ̀ nyíé boo. (1 Tím. 4:7) Bé e bẹẹ vulè e íè kilma ló Bàrì gé bọọ naa, níà bé ea é kpáá palàge tànii gè bii bá ló kà kà belí naa ẽ́.—1 Tím. 4:8-10; 6:6.

11. Éé ní ea náa vaá è ié bíi ló gè bumá bẹẹ bá mm̀ ge naa nú ea lelà ẹ?

¹¹ Bumá o bá mm̀ ge naa nú ea lelà. Neǹ bé íè ge bumá a bá mm̀ sĩ́deè ea é náa kọọ̀ á olòó di kpènà ló gè bé-bé. Tímotì beè láá kilsĩ́ gè fã̀ Bàrì boo béè kọọ̀ a beè tú dùùlà bá deè tṍ Pọ́ọ̀l siimá tóm mm̀ ge bé pọ́lọ́ tàn, toní lé-lé kpãa, nè ge gbaá ló pá vígà mm̀ Kráìst. (2 Tím. 2:22) Níá bĩ́íná kọ nen á bumá a bá. È íè bíi ló gè bumá bẹẹ bá kọbé è láá bé bẹẹ gbò pọ́lọ́ tàn èlbá. (Róm̀ 7:21-25) Ge kpáá tẹlẹ ló, è íè bíi ló gè bumá bẹẹ bá mm̀ ge naa nú ea dú lé kọbé è láá kilsĩ́ gè kìn bẹẹ nómá dùm vaá toní lé-lé kpãa. (Ẹ́fẹ. 4:22, 24) Tṍó e ni aa ól tóm iná tọ, èé íé bíi ló gè pììga boo gè sí nònù deeá.—Híb. 10:24, 25.

12. Mókà gbò sĩ́deè ní eé láá sìm kilsĩ́ mm̀ ge tú Kpá Káí siimá tóm ẽ́?

¹² Neǹ bé ólò ié bíi ló gè nó gè tú a nuù bé siimá tóm. Kọbé à láá palàge tú siimá tóm, à dú bíi kọ á olòó nó lee. Tẽ̀ènè áá báá, è gbĩ́ì ge pàlà ge tú Moǹ Bel Bàrì siimá tóm. (2 Tím. 2:15) Èé láá nó sìgà gbò sĩ́deè ge naamá vó gbẹá bẹẹ gbò nònù. Sõò be à gá náa vaá è gbĩ́ gè naa kọọ̀ dõòna gbò á zìgà kọọ̀ gbò kà kà bel ea di mm̀ Kpá Káí é láá nvèè bá nè va, à dú bíi kọ é olòó nó lee. À bọ́ló kọ é nó Kpá Káí mm̀ ge agẹlẹ ló bẹẹ zìgà. Níí tõó dọ̀ kọọ̀ níì áá gè bugi Kpá Káí ní eé náa ẽ́ nì. À bĩ́íná kọ é bugi togó boo nú e bugì vaá gbĩ́tẽ́ ló nú mm̀ bẹẹ gbò kpá, naa ní eé láá dã́tẽ́ ló vaá tú Kpá Káí siimá tóm leevè. (1 Tím. 4:13-15) Tṍóá èé láá gbóó tú Moǹ Bel Bàrì noòmà dõòna gbò. Nagé, níí bĩ́íná kọọ̀ née dõogẽ bugi áá gbò dọ̀ Kpá Káí nè va. È gbĩ́ì ge nvèè bá nè gbò e bà pãanéi tṍ ló kọ bàá dã́tẽ́ ló dọ̀ Kpá Káí vaá kọ́ nè va bé  e bàé láá tú siimá tóm naa. Tení dú ló gè davá gbẹá ló bẹẹ nòònù ge bugi Kpá Káí buù dee, èé láá kpáá palàge pàlà ge tú Moǹ Bel Bàrì noòmà dõòna gbò.—2 Tím. 3:16, 17.

13. Éé ní e kpá Híbrù 5:14 kọ́ èé íè ge naa kọbé è láá nó gè nyimá ló kele ea di gbàà lé nè pọ́lọ́ ẹ́?

¹³ Nyimá ló kele ea di gbàà lé nè pọ́lọ́. Neǹ bé íè ge nyimá gè láá gbẹẹ́ sĩ́ mòn dìtõ̀ò gẹẹ-gẹẹ ló ea gé dú sĩ́ vaá ììlà ló. Beele nagé íè ge nó gè nyimá ló gbò dìtõ̀ò ea é láá túi nvee kè bá gẹẹ-gẹẹ ló vaá pììga kọbé née dọọ̀ bá. (Pró. 22:3; bugi Híbrù 5:14.) Dì belí nu dòòmà bá, à dú bíi kọ é tú nyìmànù sààmà bẹẹ bìlà bil nè kólì kyáà. Gbò nú e bà zógè dẽè fíìm ólò bọọgẹ̀ zogè dùm e bè náa õoà. Beele nyímà kọọ̀ íb lábvá bẽ́émá Bàrì vaá àé tú tã̀àgã̀ tẹlẹ boo nen ea náa vó nè dõòna gbò. Boo béè vó, èé kin kólì kyáà ea é láá olòó ọọvẹ ló bẹẹ vulè kilma ló Bàrì.—Ẹ́fẹ. 5:5, 6.

14. Mósĩ́ deè ní e gè nyimá ló lé nè pọ́lọ́ beè nvèè bá nè Daniel ẹ?

¹⁴ Daniel, e beè kolí béeá, beè dààmà togó gè nyimá kọọ̀ ge bìlà gbò vídiò gem̀ e bà eelà mii nen vaá tú kpóó zọ naamá nu náa dú lé. A beè gbĩ́tẽ́ ló gbò kpá ea di mm̀ Watchtower Library ea é nveè bá nèe kọ á bé tã̀àgã̀í èlbá. Mósĩ́ deè ní e níá beè nvèè bá nèe ẽ́? A beè kùb ge bìlà gbò vídiò gem̀ ea dú pọ́lọ́. A beè nvèè kùbma ló kiẽ́e bà ólò tenmá kọọmá nèe nú ea kil ló gbò gém ea di boo Íntanèt vaá kùb ge zọ̀ dõòna gbò e bà ólò bìlà gbò gém̀á gbaá ló. Daniel kọ́ọ̀: “Tãa vó em bilà vídiò gem̀, m beè dààmà togó gè bìlà kyẽè sí ló gbò kóò e bà di mm̀ bõ̀ònatõ̀ò.” Daniel a dú neǹ gyà deè sĩ́ tóm nè neǹ kànen kátogóí.

15. Éé ní ea náa vaá kyáá bel à dú gẹẹ-gẹẹ ló é?

¹⁵ Dì belí Tímotì, èé íè ge nyimá gẹẹ-gẹẹ ló ea di mm̀ kyáá bel e gbò e ba beè dọ̀ aa nvéè Kráìst gé zaali. (1 Tím. 4:1, 7; 2 Tím. 2:16) Dì belí nu dòòmà bá, bàé láá zaali kyáá nòòtẽ́ ea kil ló pá bẹẹ gbò vígà àbèè ge naa kọ é ié bàà-bàà bùlà ea kil ló bõ̀ònatõ̀ò Jìhóvà. Íb gbò kyáá belá é láá ọọvẹ ló bẹẹ zìgà. Èé íè ge òòà aa ló gè ziga ló gbò kyáá belí. Ló éé? Boo béè kọọ̀ íb gbò belá aa bá gbò “e bà náa nyímana ló kà kà bel.” Ba nu sẹ̀ẹ̀a sĩ́ dú gè “olòó zọ̀ nen tàlà vaá kaná boo kọ̀láá nu e nen kọ́.”  (1 Tím. 6:4, 5) Bà gbĩ́ kọọ̀ é ziga ló ba kyáá bel vaá òòà aa ló gè dẹlẹ nyíé boo pá bẹẹ gbò vígà mm̀ Kráìst.

16. Mókà gbò nú ea é máánái bùlà ní eé kpoolà lóó lọl ló é?

¹⁶ Ó gá zìgà kọọ̀ tọ́ọ̀ nu á maaná ni bùlà. Dì belí “lé nen bé Kráìst Jíìzọ̀s,” a beè dú bíi kọ Tímotì á ká bùlà gbẹẹ́ boo sìtóm kọ̀ kpẹ̀a èlmà ge tú gã́bug a tṍó nvee mm̀ ge gbó gyọ́ nè dõòna kà gbò nu sẹ̀ẹ̀a sĩ́ mm̀ dùm. (2 Tím. 2:3, 4) Dì belí Tímotì, náa bọ́ló kọ é zìgà ge íe tàn nyòòmà ge gbó gyọ́. “Tàn ge bã̀ méné” é láá naa kọ é gá vùlènà Jìhóvà, é gá zààvàna ló a Moǹ Bel, nè ge kọọ̀ néé íé ná tàn ge kọ́ nú ea kil ló nè dõòna gbò. (Máát. 13:22) Èé íè ge tõó dùm ea válí bá vaá tú bẹẹ tṍó nè kói gbĩimá gè “zẹ́ẹ́ . . . [di] ke lẹ̀ẹ̀là bel Bàrì.”—Máát. 6:22-25, 33.

17-18. Éé ní eé láá naa gè kpènà bẹẹ gbaa ló kilma ló Jìhóvà ẹ?

¹⁷ Kpoogá dee ló gè labví láb mm̀ gbala-gbala. Neǹ bé íe bíi ló gè tú tṍó gbẹẹ́ sĩ́ nòòmà nú ea é náa mm̀ ge kpènà a bá. Be è gbĩ́ gè kpènà nú e Jìhóvà beè nvèèí bá, à dú bíi kọ é labví láb mm̀ gbala-gbala tṍó e monì nuù gẹẹ-gẹẹ ló. Éé ní ea é láá nvèè bá nèi kọ é naa vó é? À dú bíi kọ é noo gbẹẹ́ sĩ́ bé eé láá labví láb naa tṍó e monì nuù gẹẹ-gẹẹ ló.

¹⁸ Dì belí nu dòòmà bá, tṍó eo di kè sẹ̀lẹ̀nù, bà ólò kọ́ nè gbò e bà di ke sẹ̀lẹ̀nùa kọ bàá gbĩ́ kiẽ́e bàé láá tení dọ̀ọ̀ma dẹ̀i besĩ́ bà kálá dààmà togó sẹ̀lẹ̀nùa. Ló éé? Kọbé bà láá vàlẹ̀ bá teelá tení dọ dẹ̀i be à íe bù ló nu ea nááá. Mm̀ tẽ̀ènè sĩ́deèá, èé láá noo “láb tọ” eé tú gbẹẹ́ kẽ be è mon fùtó ea zógè kóló kè tẽ́ nen, gbò nú ea zógè èèla mii àbèè nú ea aa bá gbò e ba beè dọ̀ aa nvéè Kráìst mm̀ bù ló, tṍó e di boo Íntanèt àbèè kọọ̀ tṍó e gé ẹb fíìm. Be è kpóógá dee ló nyòòmà nú ea é láá naaá, èé láá labví láb mm̀ gbala-gbala gè kpènà bẹẹ gbaa ló e íè kilma ló Jìhóvà nè ge tõó dùm ea õoàé kè sĩ́.—Ps. 101:3; 1 Tím. 4:12.

19. Mókà gbò tã́áná dee bá ní eé íe be è kpenà gbò nú e ka di ló e Jìhóvà beè nvèèí bá ẹ́?

¹⁹ Èé íè ge palàge kpènà gbò nú e ka di ló e Jìhóvà beè nèi—gbò kà kà bel e ka di ló ea di mm̀ Kpá Káí nè nèà deè e íè mm̀ ge tú noòmà dõòna gbò. Tṍó e náà vó, èé íe õ̀òa bug, dùm ea é dọ bélè, nè zààvà ea dú ló gè nvèè bá nè dõòna gbò kọ bàá nyimá ló Jìhóvà. Tení dú ló a nvèè bá, èé láá kpènà nú ea beè nvèèí báá.—1 Tím. 6:12, 19.