1. Mókà gbò nuù ẹ́ẹ́-ẹẹ̀ nyíe ní e ẹbmà mm̀ Enè Tõ̀ò Gbáá Bẹ̀l Kráìst e?

 DEÉ e kẽ̀èà aa kemà ú é daaà togó gè naaá kèbá Bẹ̀l Kráìst Mm̀ Enè Tõ̀ò Gbááá é dú dũ̀ùnè! À tan dénè nen ge kpá mòn gbò e ba è vùlè e ba beè ù. Níà bé ea tọ́á nágé ló Jìhóvà naa ẽ́. (Jọ́ọ̀b 14:15) Dòòmà dẽe ló íb zààvà ea é dí boo kunukẽ̀í. Dì belí bé eé nó mm̀ nakà togó belí naa, “gbò e ba è naa lé” e ba bée di mm̀ kpá dùm é “kẽeà bã bá dùm.” (Tóm 24:15; Jọ́ọ̀n 5:29) Be à sẹlẹ, gã́bug gbò e beè vùlè é dí zẹ̀ẹ̀ gbò e bàé kẽeà aa kemà ú vaá tõó dùm boo kunukẽ̀í. * Nagé, “gbò e ba è naa pọ́lọ́,” dì belí gbò e bà náa beè ié nèà dee ge nó nú ea kil ló Jìhóvà àbèè ge fã̀e mm̀ bọ́ọ̀ló dẹ̀lẹ̀ nyíé boo besĩ́ bà kalá ù, “é kẽeà bã bá bèèla bel.”

2-3. (a) Dì belí bé e kpá Àìzáíà 11:​9, 10 kọ́ naa, mókà tóm ea bọọ lọ̀l vaá à lee ní ea é beè di boo kunukẽ̀í ẽ́? (b) Éé ní eé ló bel boo mm̀ nakà togó belí é?

² Àé dú bíi ge noòmà nuù dénè gbò e bàé kẽeà aa  kemà ú. (Àìz. 26:9; 61:11) Vóà naa, àé bọ́ló gè tú tóm ge noòmà nu gbò nen nvee kẽ, ea dú tóm ea bọọ lọ̀l vaá à lee. (Bugi Àìzáíà 11:​9, 10.) Ló éé? Boo béè kọ àé dú bíi kọọ̀ gbò e bàé kẽeà aa kemà ú á nó nú ea kil ló Jíízọ̀s Kráìst, nòònù Boǹ Méné, nu ààaá, bé e bée Jìhóvà bọọ naa, nè nú ea náa vaá áá ẹlẹ ní ea lela ló gè bẹ̀l ẹ. Àé dú nágé bíi kọọ̀ gbò lé lab dògò á nó gbò ãa nú e Jìhóvà beè noòmà pá a gbò ea kil ló gbò a tóm̀ bùlà ea beè tẹlẹ bàlà kẽ kilma ló boo kunukẽ̀í. Sìgà gbò e ba beè bọ́ló dẹ̀lẹ̀ nyíé booí beè ú gã́bug gbáá besĩ́ì bà kalá emí zivè kpoò Kpá Káí lọ̀l. Gbò lé lab dògò nè gbò pọ́lọ́ é nó gã́bug nu.

³ Mm̀ nakà togó belí, èé áála gbò bíb ea kọ́ọ̀: Éé ní ea bãaà mm̀ ge tú nòònù ea kil ló gè noòmà nu gbò nen nvee kẽé? Mósĩ́ deè ní e bé e gbò nen lábví láb naa kilma ló nòònùí é náa kọọ̀ ba bée á gbẹá mm̀ kpá dùm àbèè ge naa kọ á gá gbẹá ẹ́? À bọ́ló kọọ̀ ààlá ea kil ló gbò bíbví á palàge bọọí ló. Dì belí bé eé nó naa, sìgà kọ́ọ̀ bùlà Bàrì ea di mm̀ kpá Dániẹ̀l nè Kùùà Nù é nveè bá nèi kọ é dã́ból nù ea é nááá tṍó e gbò e ba beè ù é kẽeà. Naanii èé zẹ́ẹ́ ló bel boo gbò nuù ẹ́ẹ́ nyíe e kọ́ọ̀ bùlà Bàrì ea di mm̀ kpá Dániẹ̀l 12:​1, 2 beè kọ́ nú ea kil ló.

4-5. Éé ní e kpá Dániẹ̀l 12:1 tẹ́lẹ bàlà kẽ ea kil ló dee deè nvéè tṍó ẽ́?

⁴ Bugi Dániẹ̀l 12:1. Kpá Dániẹ̀l kó gbò nú ea é nááá mm̀ dee deè nvéè tṍó. Dì belí nu dòòmà bá, kpá Dániẹ̀l 12:1 tẹ́lẹ bàlà kẽ kọọ̀ Máíkẹẹ̀l ea dú Jíízọ̀s Kráìst “gé bé bé boo [gbò níí Bàrì].” Nakà kọ́ọ̀ bùlà Bàrìí beè dààmà togó gè mm̀-má mm̀ gbáá 1914 tṍó e Bàrì beè tú Jíízọ̀s naamá Méné boo a Boǹ Méné gbẹá káála.

⁵ Sõò ba beè kọ nágé nè Dániẹ̀l kọọ̀, Jíízọ̀s é “elá-èla . . . tṍó e tã̀àgã̀ é nááá ea dú íb tã̀àgã̀ ea gáà naaa lọ̀l gé tṍó e dó beè bã kẽ dọ̀ tṍóá.” Nakà ‘tṍó tã̀àgã̀í’ ní ea dú pọ̀b kpo “tã̀àgã̀” e kpá Máátìù 24:21 kọ́ nú ea kil lóáẹ́ ẹ́. Jíízọ̀s é elá-èla, àbèè ge bé bé boo gbò níí Bàrì tṍó e tã̀àgã̀í ni nááá lọ̀l, ea dú tṍó Àmágidòn. Kpá Kùùà Nù kólí nágé gbòí kolí va “gbele gã́bug nen e ba ni ful zelí bá gbele kpóó ló tã̀àgã̀.”​—Kùùà 7:​9, 14.

6. Éé ní ea é nááá tṍó e gbele gã́bug nená ni ful zelí bá pọ̀b kpo tã̀àgã̀e? Baatẽ́. (Ẹ̀b nàgé togó bel ea di mm̀ kpáí ea kọ́ọ̀ “Gbò Bíb E Gbò E Bà Bugi Bĩ́íná” ea kọ́ nú ea kil ló ge kẽ̀èà aa kemà ú vaá tõó dùm boo kunukẽ̀í.)

⁶ Bugi Dániẹ̀l 12:2. Éé ní ea é nááá tṍó e gbele gã́bug nená ni ful zelí bá tṍó tã̀àgã̀í ẽ́? Nakà kọ́ọ̀ bùlà Bàrìí náa gé kọ́ nú ea kil ló ge kẽ̀èà aa kemà ú kil káála ea é nááá mm̀ gbò dee deè nvéè deeí belí bé e beè zẹ́ẹ́ olòó dã́ból ló naa. * Tãa vó, à gé kọ́ nú ea kil ló kẽ̀èà aa kemà ú ea é nááá mm̀ ãa bàlà booá. Éé ní ea náa vaá è kọ́ vóé? Moǹ bel ea kọ́ọ̀ “gbàà dúu” ea dì nàgé mm̀ kpá Jóòb 17:16 tõó dọ̀ “Bànà ú.” Níí tẹ́lẹ bàlà kẽ kọọ̀ kpá Dániẹ̀l 12:2 gé kọ́ nú ea kil ló kẽ̀èà aa kemà ú ea é nááá tṍó e dee deè nvéè dee nè bé Àmágidòn ni íná kùbmà.

7. (a) Mósĩ́ deè ní e sìgà gbò é kẽeà bã mm̀ “dùm e bè náa tá” ẹ́? (b) Mósĩ́ deè ní e nakà kẽ̀èà aa kemà úí “léè èl” ní ea beè naaá tṍó ea kil nvéeá ẽ́?

 ⁷ Éé ní e kpá Dániẹ̀l 12:2 tõó dọ̀ tṍó ea kọ́ọ̀ sìgà gbò é kẽeà aa kemà ú vaá ié “dùm e bè náa tá” ẹ́? Níí tõó dọ̀ kọọ̀ gbò e bà kẽeà aa kemà ú vaá nyimá ló, àbèè ge kilsĩ́ gè nyimá vaá gbàntṍ ló Jìhóvà nè Jíízọ̀s mm̀ 1,000 gbááá, é íe dùm e bè náa tá. (Jọ́ọ̀n 17:3) Nakà kẽ̀èà aa kemà úí “léè èl” níí ea beè naaá tṍó ea kil nvéeá. (Híb. 11:35) Ló éé? Boo béè kọọ̀ gbò e ba beè kẽeà tṍóá beè kpáá ù.

8. Mósĩ́ deè ní e nagbòa é kẽeà aa kemà “bã bá nvèèà lẹ́ nè gbẹ́a ea é di lee é?”

⁸ Sõò níì dénè gbò e bà kẽeà aa kemà ú ní e bàé gbĩ́ gè nó nu ea kil ló Jìhóvàẹ nì. Kọ́ọ̀ bùlà Bàrì Dániẹ̀l beè kọọ̀ sìgà gbò é kẽeà “bã bá nvèèà lẹ́ nè gbẹ́a ea é di lee.” Boo béè kọọ̀ bà náa íe dùm gbàntṍ ló, ba bée náa é di mm̀ kpá dùm vaá bà náa é íe dùm e bè náa tá. Tãa vó, bàé bã́ kèbá “gbẹ́a ea é di lee,” àbèè kyọ̀à sĩ́. Vóà naa, kpá Dániẹ̀l 12:2 gé kọ́ nú ea é nááá ló dénè gbò e bàé kẽeà aa kemà ú dẹẹ̀a boo nú e bà náa tṍó e ba ni kẽeà. * (Kùùà 20:12) Sìgà gbò é íe dùm e bè náa tá; sõò sìgà gbò náa é íe.

9-10. Dõòna kà éé ní ea é nááá tṍó e pọ̀b kpo tã̀àgã̀ ni íná kùbmàe, vaá bà mée ní e bàé “mo belí sĩ́ káála” ẹ́?

⁹ Bugi Dániẹ̀l 12:3. Dõòna kà éé ní ea é nááá tṍó e ‘tṍó tã̀àgã̀’ ni téní tàẹ? Gbá ló nú ea di mm̀ kpá Dániẹ̀l 12:​2, a 3 gã́bel kọ́ nágé nú ea é nááá tṍó e pọ̀b kpo tã̀àgã̀ ni nááá lọ̀l.

¹⁰ Bà mée ní e bàé “mo belí sĩ́ káála” ẹ́? A ààla di mm̀ bel e Jíízọ̀s beè kọ́ mm̀ kpá Máátìù 13:​43, ea kọ́ọ̀: “Tṍóá gbò lé lab dògò é gbóó mò belí nàànì gbẹá kĩ e ba Tẹ̀, Bàrì, gé lẹẹlà bel.” Mm̀ gbò gã́bel ea di mm̀ nakà dọ̀ Kpá Káíí, Jíízọ̀s géè ló bel kilma ló “gbò e Bàrì gé lẹẹlà bel ló,” naamá pá a vígà e Bàrì beè tṍ va nóo ból e bàé zọ́ẹ bẹ̀l gbẹá káála. (Máát. 13:38) Vóà naa, kpá Dániẹ̀l 12:3 gé ló bel kilma ló gbò e Bàrì beè tṍ nóo ból nè tóm e bàé sĩ́ kèbá Bẹ̀l Kráìst Mm̀ Enè Tõ̀ò Gbááá.

11-12. Mókà tóm ní e 144,000 nená é sí mm̀ 1,000 gbááá ẹ́?

¹¹ Mósĩ́ deè ní e gbò e Bàrì beè tṍ nóo ból é “náa kọọ̀ gã́bug nen á dú gbò lé lab dògò” e? Gbò e Bàrì beè tṍ nóo ból é zọ Jíízọ̀s Kráìst nè tùle gbò e bàé nóòmà nu gbò nen gbẹá boo kunukẽ́í mm̀ 1,000 gbááá. 144,000 nená é dú gbò méné nè gbò vààla gyọ́ọ. (Kùùà 1:6; 5:10; 20:6) Vóà naa, bàé nveè bá bó “dénè bàlà boo,” vaá naa kọọ̀ gbò nen á gbõoma. (Kùùà 22:​1, 2; Èzí. 47:12) Ẹ̀b bé e nyíè gbò e Bàrì beè tṍ ból é ẹ́ẹ naaà!

¹² Bà mée ní e bàé dí zẹ̀ẹ̀ “gã́bug nen” e bàé dú gbò lé lab dògò e? Níà gbò e bàé kẽeà aa kemà ú, gbò e bàé ful zelí bá bé Àmágidòn, nè gbò pá nvín e bàé meà gbẹá mm̀ ãa bàlà booá. Tṍó e 1,000 gbááá ni íná kùbmà, dénè gbò e bàé dí boo kunukẽ̀í é gbóó gbõoma. Vóà naa, mó tṍó ní e bàé gbóó tú báílò emá ba bée mm̀ kpá dùm ẽ?

13-14. Éé ní ea é dú bíi kọọ̀ dénè gbò e bàé gbõoma á naa kọbé bà láá ié dùm e bè náa tá gbẹá boo kunukẽ̀í ẽ́?

¹³ Èé íe ge kẽ̀èa boo kọọ̀ ge gbõoma náa tõó dọ̀ kọọ̀ nen é gbóó ié dùm e bè náa tá. Bugi togó boo Ádàm nè Íìv. Ba beè gbõoma, sõò a beè dú bíi kọ bàá gbàntṍ ló Jìhóvà Bàrì kọbé bà láá ié dùm e bè náa tá. À dú pọ́lọ́ kọọ̀ bà náa beè gbànie tṍ ló.​—Róm̀ 5:12.

¹⁴ Éé ní ea é nááá ló gbò e bàé dí boo kunukẽ́í tṍó e 1,000 gbááá ni íná kùbmàe? Dénè nen é gbõoma. É kọọ̀ dénè gbò e bà gbõomaá ní e bàé nveè sãa kúm bẹ̀lbẹ̀l Jìhóvà dọ̀ọ̀mà dè-dè e? Sẹ̀ à íe gbò e bàé bélí Ádàm nè Íìv​—e náa kal ló béè kọọ̀ ba beè gbõoma bà náa beè bọ́ló dẹ̀lẹ̀ nyíé booá ẹ́? À dú bíi gè aalá gbò bíbví, sõò mósĩ́ deè e?

15-16. (a) Mó tṍó ní e gbò nen é íe nèà deè ge zogè kọọ̀ bà bọ́ẹ̀ ló dẹ̀lẹ̀ nyíé boo neè Jìhóvà ẹ? (b) Éé ní ea é nááá ló gbò e bà ful zelí bá dee deè nvéè ẹ̀bmàe?

¹⁵ Bàé tú Sétàn nvee kpọ́gọ́lọ́ mm̀ 1,000 gbááá. Tṍóá, náa é láá kẹlẹ na tọ́ọ̀ nen. Sõò, bàé kpáá lọ̀ẹ bá tṍó e 1,000 gbááá ni íná kùbmà. Vaá àé beè kpáá pììga boo gè kẹlẹ gbò nen. Tṍóá kọ̀láá gbò e bà di boo kunukẽ̀í é íe nèà deè ge zogè kọ bà nveenìè ka ló vaá  nveenìè sãa kúm bẹlbẹ̀l Bàrì. (Kùùà 20:​7-10) Láb e buù nen lábví kilma ló nú e Sétàn náa ní ea é náa kọọ̀ ba bée á gbẹ́á mm̀ kpá dùm ẽ.

¹⁶ Kpá Káí náa kọ é nyimá kọọ̀ sìgà gbò náa é bọ́ló dẹ̀lẹ̀ nyíé boo belí bé e Ádàm nè Íìv náa beè bọ́ló dẹ̀lẹ̀ nyíé boo naaá, vaá bàé kin bẹlbẹ̀l Jìhóvà. Éé ní ea é nááa vá ló é? Kpá Kùùà Nù 20:15 kọ́ nèi kọọ̀: “Ba è tovi nágé kọ̀láá nen e bà náa è emí a bée m kpá dùma tẹlẹ mm̀ bànà sã́í.” Mm̀ kà kà, bàé kyọsĩ́ gbò e bà lọl togó kèbá dọ̀ọ̀mà dè-dè. Sõò gã́bug nen é ful zelí bá dee deè nvéè ẹ̀bmàí. Tṍóá, ba bée é gbóó gbẹá mm̀ kpá dùm.

17. Éé ní e ba beè kọ́ nè Dániẹ̀l kọ àé nááá mm̀ beélè deeí é? (Dániẹ̀l 12:​4, 8-10)

¹⁷ À palàge ẹẹlẹ̀i nyíe gè bugi togó boo gbò nú ea é nááá dì deè sĩ́! Sõò, à íe bel ea palàge dú bíi e ene kà nyómá tóm beè kọ́ nè Dániẹ̀l ea kil ló beélè deeí, naamá mm̀ “dee deè nvéè” tṍóí. (Bugi Dániẹ̀l 12:​4, 8-10; 2 Tím. 3:​1-5) Nyómá tómá beè kọ́ nè Dániẹ̀l kọọ̀: “Kà kà nyìmànù é beè gbóó tọla kẽ.”  Mm̀ kà kà, gbò níí Bàrì é beè palàge dã́ból ló gbò bel kọ́ọ̀ bùlà Bàrì ea dì mm̀ kpáá. Nyómá tómá beè kọ nágé kọọ̀ mm̀ gbò tṍóá “gbò pọ́lọ́ é lábví pọ́lọ́ láb, vaá tọ́ọ̀ ọ̀và náa é dã́ból ló.”

18. Éé ní ea é nááá ló gbò pọ́lọ́ pọ́ì ńkem̀ tṍó àla ẹ́?

¹⁸ Deè nieí, èé láá tuumá kọọ̀ kpọ̀té náa tulà gbó pọ́lọ́ ló lab dògò ló pọ́lọ́ e bà gé sí. (Mál. 3:​14, 15) Sõò pọ́ì ńkem̀ tṍó àla, Jíízọ̀s é bééla bel ló gbò e bà bélí kà ból vaá kpòòlà va lọl gbàà gbò e bà bélí naanà ból. (Máát. 25:​31-33) Gbò pọ́lọ́í náa é ful zelí bá pọ̀b kpo tã̀àgã̀ àbèè ge kẽ̀èà bã mm̀ ãa bàlà booá. Ba bée náa é dí “mm̀ kpá kẽ̀èa boo” e kpá Málakaì 3:16 kọ́ nú ea kil lóá.

19. Éé ní e beele é náa kátogóí é, vaá ló éé? (Málakaì 3:​16-18)

¹⁹ Níì kà lèlà tṍó ea bọ́ló kọ é zogè kọọ̀ née dṹùnà gbò pọ́lọ́ lab dògò e. (Bugi Málakaì 3:​16-18.) Jìhóvà dì ea gé bṍònè ló gbò e ẹlẹ ẹb naamá a “kele íb ìènù,” àbèè gyọ́ e ka di ló. À palàge tàn beele gè dì vá zẹ̀ẹ̀.

20. Mókà zìgànù ní ea dú dee deè nvéè nú e Bàrì beè zìgà nè Dániẹ̀l ẹ, vaá éé ní ea náa ò gé ẹbmà dẽè a m̀m̀-me ẽ́?

²⁰ Mm̀ kà kà, è di tṍó e gã́bug nu gé nááá. Sõò gã́bug nu dũ̀ùnè é nááá pọ́ì ńkem̀ tṍó àla. Pọ́ì ńkem̀ tṍó àla, èé mon kyọ̀à sĩ́ ea é dọ́ boo dénè gbò pọ́lọ́. Vaá zìgànù e Jìhóvà beè zìgà nè Dániẹ̀la é gbóó mm-má, a beè kọọ̀: “Òé beè aa boo vaá dé kpéè ló o tóm tṍó e dee deè nvéè deeá ni íná kùbmà.” (Dán. 12:13) É kọ ò gé ẹbmà dẽe tṍó e Dániẹ̀l nè gbò eo beè vùlè é kpáá “aa boo”? Beè vó, pììgà bé eo kpóó sim tùlà naa gè bọ́lọ́ dẹ̀lẹ̀ nyíé boo, mè o bée é gbẹ́á mm̀ kpá dùm ea di bá Jìhóvà.