1. Pọ́ì ńkèm̀ tṍó besĩ́ Pítà à kalá ù, mókà tóm ní e Jìhóvà beè túe siimá ẽ́?

 NEǸ tóm Pítà beè nyimá kọọ̀ àé gé uè. Mm̀ dénè gbò gbáá ea beè bọ́ló dẹ̀lẹ̀ nyíé booá, a beè zọ̀ Jíízọ̀s siá tóm, naa kọ pá vígà á ié ãa ketõ̀ò ge kọ́ kpẹ̀a, vaá dũunà gbò ge tulè tóm. Sõò níì áá nakà gbò tómí ní e Pítà beè sìe nì. Mm̀ gbáá 62-64 C.E., nyómá káí Bàrì beè nvèè bá nèe kọ á emí bàà kà kpá lèèla tóm​—ea dú 1 nè 2 Pítà. A beè dẹlẹ nyíé boo kọọ̀ gbò kpá lẹ̀ẹ̀la tómí é nveè bá nè gbò níí Kráìst tṍó e ẹlẹ ni úè.​—2 Pít. 1:​12-15.

2. Éé ní ea náa vaá pá vígà beè palàge ié bíi ló gbò kpá lẹ̀ẹ̀là tóm e Pítà beè emíá ẽ́?

² Pítà beè emí gbò kpáí tṍó e pá vígà géè tení bá ‘kele-kele íb ẹ̀bmà.’ (1 Pít. 1:6) Gbò pọ́lọ́ géè gbĩ́ gè tú kyáá nòòmànù nè dùm e bè náa õoà nvee mm̀ bõ̀ònatõ̀ò. (2 Pít. 2:​1, 2, 14) A beè dú tṍó e gbò níí Kráìst e bà di Jèrúsalẹ̀m é gé mòn tṍó e ‘dénè nu é íná kùbmà’​—ea dú tṍó e gbò bé pá Róm̀ é gé kyọ̀sĩ́ Jèrúsalẹ̀m nè bẹlbẹ̀l pá Júù. (1 Pít. 4:7) Mm̀ kà-kà, gbò kpá lẹ̀ẹ̀la tóm e Pítà beè emíí beè nvèè bá nè gbò e bà géè nyoone nvéè Kráìst kọ bàá láá ĩ̀ìmà gbò tã̀àgã̀ e ba beè di bá tṍóá nè ní e bàé kpeesĩ́ ló dì deèsĩ́. b

3. Éé ní ea náa vaá à bọ́ló kọ é nó nú ea di mm̀ gbo kpá lẹ̀ẹ̀là tóm e Pítà beè emíá ẽ́?

³ Náa kal ló béè kọọ̀ Pítà beè emí gbò kpá lẹ̀ẹ̀là tómí má gbò e bà géè nyoone nvéè Kráìst mm̀ túá gbò gbááá, Jìhóvà beè kọ bàá tú nvee mm̀ Kpá Káí. Vóà naa, beele é  láá ié nágé bélè lọl ló gbò kpá lẹ̀ẹ̀là tómí. (Róm̀ 15:4) Boo béè kọ è di mm̀ bàlà boó e gbò nen nveè sãa kúm dùm e bè náa õoà, è ólò kpeesĩ́ ló gbò ẹ̀bmà ea é láá naa kọọ̀ ge fã̀ Jìhóvà á tàvàlàí ló. Boo èlmà vó, pọ́ì ńkem̀ tṍó àla, èé kpeesĩ́ ló pọ̀b kpo tã̀àgã̀ ea é agabá èl ní e pá Júù beè kpeesĩ́ lóá. È monì gbò nú ea palàge dú bíi mm̀ bàà kà kpá e Pítà beè emíá. Gbò nuí é nveè bá nèi kọ é kilsĩ́ gè tú deè Jìhóvà sẹ̀ẹ̀a bùlà, bé èlbá síìà pọ̀ ló nen, vaá palàge vùlè ene. Àé nveè nàgé bá nè gbò kànen mm̀ bõ̀ònatõ̀ò kọ bàá láá palàge ẹ̀b nú ea kil ló pá vígà.

4. Dẹ̀ẹ̀a boo nú ea di mm̀ 2 Pítà 3:​3, 4, éé ní ea é láá ọọvẹ̀ ló bẹẹ zìgà ẹ?

⁴ È di zẹ̀ẹ̀ gbò e bà náa zigà ló gbò kọ́ọ̀ bùlà Bàrì ea di mm̀ Kpá Káí. Gbò nàà uú boo é láá gbẹ́i boo béè kọ e tú gã́bug gbáá vèèmà kọọ̀ kùbmà é bã́ ló bàlà booí. Sìgà gbò ólò tuumá kọọ̀ kùbmà náa é bã́ ló bàlà booí tọ́ọ̀ dee. (Bugi 2 Pítà 3:​3, 4.) Be è dã́ gbò belí lọl gã́ nen e gé kọ́ kpẹ̀a nè, gbò e ólò zọ̀ siá tóm, àbèè pá bẹẹ tọ, àé láá naa kọ lóói á ọọ. Pítà kọ́ gbò nú ea é láá nvèè bá nèi.

5. Éé ní ea é nveè bá nèi kọ é ẹ̀b nú boo bá ea bọ́ló tṍó e kùbmà gáà bã ló nakà pọ́lọ́ bàlà booí é? (2 Pítà 3:​8, 9)

⁵ Àé láá tõó ló sìgà gbò kọọ̀ Jìhóvà pee tṍó ló gè nvèè kùbmà ló nakà bàlà booí. Gbò bel e Pítà beè lòí é láá nvèè bá nèi kọ é ẹ̀b nú boo bá ea bọ́ló, boo béè kọ à kẽeí nyíe kọọ̀ bé e Jìhóvà ẹb nu naa dú kele ló bé e gbò nen ẹb nu naa. (Bugi 2 Pítà 3:​8, 9.) Jíhóvà ólò ẹ̀b enè tõ̀ò gbáá belí enè dee. Jìhóvà íe ĩ̀ìmà boo béè kọ náa gbĩ́ kọọ̀ tọ́ọ̀ nen á ié kyọ̀àsĩ́. Tṍó ea tṍó ni lée, àé nveè kùbmà ló nakà bàlà booí. À bọ́ló kọ é tú kùbmà tṍó ea sígáí kọọmá kpẹ̀a nè dénè gbò e bà di bàlà booí.

6. Mósĩ́ deè ní eé láá kilsĩ́ gè tú “deè Jìhóvà sẹẹa bùlà” ẹ? (2 Pítà 3:​11, 12)

⁶ Pítà síèi kpóó ló kọ é kilsĩ́ gè tú deè Jìhóvà ‘sẹẹa bùlà.’ (Bugi 2 Pítà 3:​11, 12.) Mósĩ́ deè ní eé láá naa vóé? À bọ́ló kọọ̀ buù deèí, é olòó bugi togó boo gbò tã́áná dee bá eé íé mm̀ ãa bàlà booá. Dòòmà dẽe ló kọọ̀ ò gé duulà lé nù ló fọ́ọ́lọ́, dé lé gã́ gyã́á, zaava ló gbò e bà kẽeà aa kemà ú, vaá noomà nu gbò e ba beè ú gã́bug gbáá ea kil nvéeá kọ bàá dã́ ból bé e gbò kọ́ọ̀ bùlà Bàrì ea di mm̀ Kpá Káí beè mm-má naa. Gè bugi togó naa vó é nveè bá nè ni kọ ó kilsĩ́ gè elá bànà deè Jìhóvà. Be è ‘nyímá’ gbò nú ea kil ló dì deèsĩ́, née é zigà kọọ̀ gbò nen á tú ba kyáá nòòmànù “tuumái” lọl mm̀ kà-kàí.​—2 Pít. 3:17.

7. Éé ní e gè siiá pọ̀ ló nen é láá naaí ló é? (1 Pítà 3:15)

⁷ Boo béè kọ è nyímà kọọ̀ Jìhóvà é nveè kùbmà ló nakà pọ́lọ́ bàlà booí pọ́ì ńkem̀ tṍó àla, èé piigà bé e bẹẹ kpóó sim tùlà naa gè kọ́ lé kpẹ̀aí nè dõona gbò. Sõò sìgà tṍó, àé láá tàvàlàí ló gè kọ́ kpẹ̀a nè gbò nen. Ló éé? Boo béè kọọ̀ pọ̀ é láá siíi ló nen. Níà nú ea beè naaá ló Pítàẹ. Kà lèlà bílá dee e bà béélá bel ló Jíízọ̀sa, Pítà beè àmà sàn kọ náa dṹùnàè pá a gbò nyòòne nvée vaá náa zẹ́ẹ̀ nyimàè ló Jíízọ̀s. (Máát. 26:​69-75) Tṍó e tṍó téní, tẽ̀ènè kà neǹ tómí beè tú agẹló kọọmá kọọ̀: “Tọ́ọ̀ kà pọ̀ á gá siíi lóó va, vaá bọọ bùlà á gá tã̀àgã̀.” (1 Pít. 3:14) Gbò bel Pítàí náa kọ é agala boo kọọ̀ èé láá bé èlbá gè siiá pọ̀ ló nen.

8. Éé ní ea é láá nvèè bá nèi kọ é bé èlbá gè siiá pọ̀ ló nen ẽ́? (1 Pítà 3:15)

 ⁸ Éé ní ea é láá nvèè bá nèi kọ é bé èlbá gè siiá pọ̀ ló nen ẽ́? Pítà kọ́ nèi kọọ̀: “Tui bọọ nyíe nveemai ka ló Kráìst naamai Dõò ea di káí.” (Bugi 1 Pítà 3:15.) Níí bãàa mm̀ gè olòó bugi togó boo íb dọ̀ nè kpóó e bẹẹ Dõò nè Méné Kráìst Jíízọ̀s íe. Beè pọ̀ síí ni tṍó eo íè nèà deè gè kọ́ lé kpẹ̀aí nè dõona gbò, kẽ̀èa boo bẹẹ Méné. Dòòmà dẽe ló kọ ò monìe tṍó ea gé bẹl gbẹá káála vaá gã́bug gbò nyómá tóm di bééá teníé ló. Kẽea boo kọọ̀ Bàrì beè nèe “dénè lẹ̀ẹ̀là bel mm̀ káála nè boo kunukẽ̀í,” nè gè kọọ̀ àé “díí ló dénè dee dọ̀ọ̀mà ke kùbmà bàlà booí.” (Máát. 28:​18-20, NW.) Pítà síèi kpóó ló kọ é di “kpènà ló” gè ló bel boo nú e zigà ló nè dõona gbò. É kọ àé léémá ni gè kọ́ kpẹ̀a gbẹá ól tóm, tọọ̀ kpá, àbèè tṍó e nóo beè noo? Beè vó, tú tṍó gbẹẹ́ sĩ́ bugi togó boo tṍó eo é láá naamá vó, vaá ò gbóó bugi togó boo nú eo é kọ́. Tãagã ló Jìhóvà kọ á neè ni agẹló vaá ò dẹlẹ nyíé boo kọọ̀ àé nveè bá nè ni kọ ó láá bé èlbá síìà pọ̀ ló nen.​—Tóm 4:29.

9. Mó tṍó ní e Pítà náa beè zogè kọ à íèè vulè e? (Ẹ̀b nàgé fòtó.)

⁹ Pítà a nyímá bé e nen é láá zogè kọọ̀ à íèè vule naa. A beè dì tṍó e Jíízọ̀s néva  log kọọ̀: “Ãa lẹ̀ẹ̀là em gé néi kọlà kọ ó vulei ene. Vulei ene belí bé e nda beè vùlèi naa.” (Jọ́ọ̀n 13:34) Náa kal ló béè vó, tṍó e tṍó téní pọ̀ beè sii Pítà naa ní e náa beè zìgà ge zọ̀ pá vígà e bà náa dú Júù deá gyã́á. Neǹ tóm Pọ́ọ̀l kólí láb e Pítà beè labvíá kolíe gè “tob kììà,” àbèè gè tõó mm̀ dùm bàà sĩ́. (Gàl. 2:​11-14) Pítà beè tú dùùlà bá deè tṍ e Pọ́ọ̀l beè nèeá vaá nó nu lọl ló. Mm̀ pálaa kà kpá lẹ̀ẹ̀la tóm e Pítà beè emíá, a beè emí kọọ̀ née e dõogẽ tuumá kọ è vulè pá vígà, sõo èé zogè kọ è vulè va.

10. Tṍó e nen íe ‘kà-kà vulè,’ éé ní ea ólò sìlà aa m ẽ́? Baatẽ́. (1 Pítà 1:22)

¹⁰ Pítà kọ é íe “kà kà vulè” kilma ló pá vígà e bà di mm̀ bõ̀ònatõ̀ò. (Bugi 1 Pítà 1:​22, NW.) Èé láá zogè kọ è íè nakà vulèí tṍó e ‘gbaǹ tṍ ló kà-kà bel’ e nóò lọl mm̀ Kpá Káí. Nakà kà-kà belí nóòmài kọọ̀ “tẽ̀ènè íb bá ní e Bàrì tuumá kọ̀láá nen ẽ́.” (Tóm 10:​34, 35) Née é láá gbàntṍ ló log e Jíízọ̀s beè nè ea kọ́ é vùlè eneá be née vulè dénè nen ea di mm̀ bõ̀ònatõ̀ò. À dú kà-kà kọọ̀ à íe sìgà pá vígà e bà di mm̀ bõ̀ònatõ̀ò eé láá palàge zọ̀ naaá nu èlmà sìgà gbò, belí bé e Jíízọ̀s beè naaá. (Jọ́ọ̀n 13:23; 20:2) Sõò Pítà síèi kpóó ló kọ é pììgà bé e bẹẹ kpóó sim tùlà naa gè ‘vule pá bẹẹ vígà m Kráìst’​—naamá gè vùlè dénè pá vígà págbálà nè pábia​—boo béè kọọ̀ è dṹùnà ene kà pá tọ.​—1 Pít. 2:17.

11. Éé ní e gè “vùlè ene mm̀ agẹbá” tõó dọ̀ ẹ?

¹¹ Pítà síèi kpóó ló kọọ̀, “vulei ene mm̀ agẹbá.” Gbò gã́bel ea nyoone dọ̀ Kpà Káí ea kọ́ é vùlè ene mm̀ ‘agẹbáí,’ bãàa mm̀ ge vùlè nen bã̀àna tṍó ea tavàlàí ló gè naa vó. Dì belí nu dòòmà bá, tṍó e neǹ vígà náa nú ea kyẽ́i àbèè gè síi pọ́lọ́, túá kà nú ea ólò bã̀í nyíe dú gè kpẽ́ pọ́lọ́á èlmà ge zogè kọ è vulèe. Sõò, Jíízọ̀s beè noomà Pítà kọọ̀ gè kpẽ́ pọ́lọ́ náa léémá Bàrì. (Jọ́ọ̀n 18:​10, 11) Pítà beè emí kọọ̀: “Ó gá tui pọ́lọ́ kpẽemai pọ́lọ́ àbèè ge kàl gbéé nen ea kalíi gbéé. Tãa vó, ò kọ́ Bàrì á tãanèva dee bá.” (1 Pít. 3:9) Sọ̀tọ́ deè kọọ̀ agẹbá vulè eo íè á naa kọ ó ié lé nyíe nè tóè sàn kilma ló gbò e bà sí ni pọ́lọ́.

12. (a) Dõona kà éé ní e gè vùlè ene mm̀ agẹbá é síèi kpóó ló kọ é naa ẽ́? (b) Dì belí bé ea dọa bàlà kẽ mm̀ vídiò ea kọlà, Preserve the Precious Gift of Unity naa, éé ní ea é léémá ni gè naa ẽ́?

¹² Mm̀ a túá kà kpá lẹ̀ẹ̀la tóm, Pítà beè tú moǹ bel ea kọ́ọ̀, “vulei ene mm̀ agẹbá” loomá bel. Nakà vulèí ólò naa kọọ̀ “gbele tõ̀ò pọ́lọ́ e nen ni sí á dú gè ẹ̀b lọl dẽesĩ́.” (1 Pít. 4:8) Be à sẹlẹ, Pítà beè kẽ̀èa boo nú e Jíízọ̀s beè noomàe gã́bug gbáá ea kil nvéeá ea kil ló gè ia ló pọ́lọ́. Tṍóá, àé láá dú kọọ̀ a beè tõó ló Pítà kọọ̀ be à iàẹ̀ ló pọ́lọ́ neè a vígà “àlàbà tóm gbò,” à íèè sàn nyíe. Sõò Jíízọ̀s nóòmà Pítà​—nè beele kọọ̀ é ia ló pọ́lọ́​—77 tóm,” ea tõó dọ̀ kọọ̀ née é bugi gã́bug tṍó e ia ló pọ́lọ́ e nen síi. (Máát. 18:​21, 22) Beè ge tú nakà dùùlà bá deè tṍí siimá tóm tavàlà ní ló, lóó ni á gá ọọ! Sìgà tṍó à ólò tàvàla ló gbò gyóòlo Jìhóvà gè ia ló pọ́lọ́ boo béè kọọ̀ bà náa gbõoma. Nú ea palàge dú bíi kọ ó naa kátogóí dú gè ia ló pọ́lọ́ e neǹ vígà beè sí ni vaá ò zọ́ẹ naaá fẹ́ẹ́-fẹẹ̀ ló. c

13. Éé ní ea é láá naa kọ á tavala ló gbò kànen gè noo tṍó kã̀àmà pá vígà ẹ?

¹³ Nú e Jíízọ̀s beè kọ́ nè Pítà tṍó ea kẽeà aa kemà ú náa é táẹ́ nyíe, a beè kọ́ nèe kọọ̀: “Bumá nà gònò naanà ból.”  (Jọ́ọ̀n 21:16) Be ọ̀ọ̀ nen kànen, ò nyímà kọọ̀ gbò belí kuu nagé olo. Náa kal ló béè vó, àé láá tavala ló neǹ kànen gè ié tṍó ea é síímá nakà tóm ea dú bíií. Gbò kànen íè ge zẹ́ẹ́ ẹ̀b nú ea kil ló pá ba tọ, vùlè va, vaá nvèè bá nèva kọ bàá tõo bã ló Bàrì. Bà ólò tu nagé bẹ̀à sã́ bùlà kọọmá kpẹ̀a, kpoogá dee ló vaá naa gbò nú e bà néva gbẹá nònù, àsémbìlì, nè pọ̀bkà bõ̀ònaló. Sìgà ọ̀và dṹùnà Hospital Liaison Committee, vaá sìgà ọ̀và ólò zọ̀ Local Design/Construction Department siá tóm. Mm̀ kà-kà, gbò kànení gé sí gã́bug tóm!

14. Éé ní ea é láá siè kpóó ló gbò kànen kọ bàá ẹ̀b nú ea kil ló naanà ból Bàrì e? (1 Pítà 5:​1-4)

¹⁴ Pítà beè siè kpóó ló gbò kànen kọ bàá ‘bumá gònò naanà ból Bàrì.’ (Bugi 1 Pítà 5:​1-4.) Be ò dúù neǹ kànen, è nyímà kọọ̀ ò vùlè pá o vígà págbálà nè pábia vaá àé léémá ni gè ẹ̀b nú ea kil vá ló. Náa kal ló béè vó, sìgà tṍó òé láá ẹ̀b kọọ̀ ò bọọgè dìè mm̀ kíìli-kíìli àbèè kọ lóó ni bọọgẹ̀ ọọ naa ní e nóo é láá sí nakà tómí. Éé ní eo é láá naa ẽ́? Kọ̀láá tṍó ea meà naa vó, kọ́ gbò nú ea gé tãagẽ́ ni nè Jìhóvà. Pítà beè emí kọọ̀: “Nen ea gé sí tóm á tú kói ea aa bá Bàrì siimá.” (1 Pít. 4:11) Pá vígà e bà di mm̀ bõ̀ònatõ̀ò é láá kpeesĩ́ ló tã̀àgã̀ e áá Boǹ Méné Bàrì ní ea é láá nvèè kùbmà lóé. Sõò kẽea boo kọọ̀ ‘nen togó gbò kùdẽe ló naanà ból Bàrì’ ea dú Jíízọ̀s Kráìst, é láá nvèè bá nèva èlmà bé eo é láá naa. Àé nveè bá nèva kátogóí nè mm̀ ãa bàlà boo. Bàrì gbĩ́ kọọ̀ gbò kànen á vùlè pá vígà, ẹ̀b nú ea kil vá ló, vaá tú ba lóó naamá “nu dòòmà bà” nèva.

15. Mósĩ́ deè ní e enè neǹ kànen beè ẹ̀b nú ea kil ló naanà ból Jìhóvà ẹ? (Ẹ̀b nàgé fòtó.)

¹⁵ Ene kà vígà págbálà ea bée kọlà William, ea ni tú gã́bug gbáá duumá neǹ kànen dã́ból ló bé e gè kãa pá vígà dú bíi naa. Tṍó e COVID-19 ã́àa dààmà togóá, ẹlẹ nè gbò kànen e bà di mm̀ ba bõ̀ònatõ̀ò beè palàge siá kpóó ló vaá kolí buù neǹ vígà ea di mm̀ ba grúùp buù sè. À kọ́ọ̀: “Gã́bug pá vígà ólò dõogẽ di tọ e bà gé bugi togó, vaá níí é láá naa kọ bàá bugi togó boo gbò nú e náa dú lé.” Tṍó ea íe nú ea gé tãagẽ neǹ vígà, William ólò palàge pãanée tṍ ló kọbé à nyímá nú ea gé tãagẽ́e bùlà nè nú ea íe bíi ló. Tṍóá, à  ólò gbóó gbĩ́ gbò togó bel ea di mm̀ bẹẹ gbò kpá àbèè vídiò ea é láá nvèè bá nèe lọl boo bẹẹ website. À kpáá kọọ̀: “À palàge dú bíi kọ é kãa pá vígà kátogóí èlmà tṍó ea kil nvéeá. È ólò palàge siá kpóó ló vaá nvèè bá nè gbò nen kọ bàá nó nú ea kil ló Jìhóvà; níà bé ea dú nágé bíi kọ é siá kpóó ló mm̀ ge kãa pá vígà vaá nvèè bá nèva kọ bàá kilsĩ́ gè fã̀ Jìhóvà naa ẽ́.”

16. Mósĩ́ deè ní eé láá tú gbò nú e nóò lọl mm̀ kpá lẹ̀ẹ̀la tóm Pítà siimá tóm ẽ́?

¹⁶ E ló bel boo sìgà nú eé láá nò lọl mm̀ bàà kà kpá lẹ̀ẹ̀la tóm e Pítà beè emí kèbá tùlè nyómá káí Bàrì. Àé láá dú kọọ̀ o mon sìgà kĩée ea bọ́ló kọ ó sí tóm boo mm̀ o dùm. Dì belí nu dòòmà bá, é kọ àé léémá ni gè kpáá bugi togó boo gbò tã́áná dee bá eé íe mm̀ ãa bàlà boo? É kọ o tú gè kọ́ kpẹ̀a gbẹá ól tóm, tọọ̀ kpá, àbèè gbẹá kĩée e nóo beè noo naamá o nu sẹ̀ẹ̀a sĩ́? É kọ o bugi togó boo gbò sĩ́deè eo é láá kpáá zogè kọọ̀ ò vulèè pá vígà págbálà nè pábia? Gbò kànen, é kọ ò dií kpènà ló gè ẹ̀bvii nú ea kil ló gbò naanà ból Jìhóvà lọaí mm̀ dénè bọọ bùlà e bà náa tã́gĩ́i bá? Be ò tẹ́lẹ̀ dẽé kẽ vaá ẹ̀b o bá leevè, òé láá mòn gbò kĩée ea dú bíi kọ ó sí tóm boo, sõò níí á gá ọọvẹ́ ni ló. Nyimá kọọ̀, “Dõò dú lé” vaá àé nveè bá nè ni kọ ó naa leevè. (1 Pít. 2:3) Pítà kẽeí nyíe kọọ̀: “Bàrì . . . é gbóó bumái inmá kùbmà. Àé náa kọ lóói á àgà, àé síèi kpóó ló, àé tibvíi agẹlẹ.”​—1 Pít. 5:​10, NW.

17. Be è kilsĩ́ gè fã̀ Jìhóvà vaá sọ̀tọ́ deè kọọ̀ á bumái, éé ní ea é silà aa m ẽ́?

¹⁷ À íe tṍó ea beè tõó ló Pítà kọọ̀ náa bọ́ẹ̀ ló gè diè kpàn Sã́áná Bàrì. (Lúùk 5:8) Sõò tení dú ló nvèè bá ea aa bá Jìhóvà nè Jíízọ̀s, Pítà beè kilsĩ́ gè sí tóm vaá nyoone nvéè Kráìst. Tṍó e tṍó téní, Bàrì beè tenmà Pítà kọ á di zẹ̀ẹ̀ gbò e “Jíízọ̀s Kráìst, ea dú bẹẹ Dõò nè bẹẹ Nen Dùùlà, é lẹẹlà bel ló dọ̀ dè-dè.” (2 Pít. 1:11) Ẹ̀b bé e nakà kpẽ́í dú dũ̀ùnè naaà! Be ò kilsĩ́ gè fã̀ Jìhóvà belí Pítà vaá sọ̀tọ́ deè kọọ̀ Jìhóvà á bumá ni, òé íe nagé kpẽ́ dùm e bè náa tá. Vaá ‘Bàrì é duulà ni boo béè kọ ò dẹlẹ̀ nyíé boo Kráìst.’​—1 Pít. 1:9.