Nda beè mea mm̀ gbáá 1934 gbẹá Swizerland, sõò ńdáà tẹ̀ nè ńdáà kà beè àà kil Timmins, ea dú ene kà ńkem̀ bon ea di Ontario, mm̀ dó Canada. Nyòòmà gbáá 1939, ńdáà kà beè dààmà togó gè bugi Kpá Tọ Kùdẽe Ló vaá zọ̀ Gbò Neǹ Ditõ̀ò Jìhóvà sí nònù. A beè faalá nda bií ló ọ̀ọ̀lẹ̀ kà pá ńdáà vígà siimá nònù. Pọ́ì ńkem̀ tṍó aa ló tṍóá, a beè gbóó dú enè Neǹ Ditõ̀ò Jìhóvà.

Nyíè ńdáà tẹ̀ náa beè ẹẹ kọọ̀ ńdáà kà dú enè Neǹ Ditõ̀ò Jìhóvà, sõò ńdáà kà beè vùlè kà-kàí vaá beeláfùl ge bọ́ló dẹ̀lẹ̀ nyíé boo nè Jìhóvà. A beè kilsĩ́ gè naa vó dọ̀ọ̀mà tṍó e bà kub tóm Gbò Neǹ Ditõ̀ò Jìhóvà gbẹá Canada, nyòòmà mm̀ gbò gbáá 1940. Ńdáà kà beè olòó fã̀ dẽè ńdáà tẹ̀ vaá ló lé bel bã̀àna tṍó e ńdáà tẹ̀ ló pọ́lọ́ bel nèe. A lé nu dòòmà bá beè nvèè bá nè pá ńdáà vígà nè nda kọ é beeláfùl ge fã̀ Jìhóvà. Nyíéi beè palàge ẹẹ kọọ̀ tṍó e tṍó téní, ńdáà tẹ̀ beè nyaaá vaá a beè dààmà togó gè tú lé bá sẹ̀ẹ̀mà pá beélè tọ.

Nyòòmà mm̀ gbò gbáá 1950, m beè sí Àsémblì ea bée kọlà Theocracy’s Increase gbẹá New York. Tṍó em ni zọ pá vígà e bà aa kele-kele ketõ̀ò loá bel vaá pãane tṍ ló ààla bel e pá vígà e ba beè sí Tọọ̀ Kpá Gílẹẹ̀d ne tṍó e bà bĩ́íná va bel, a beè kpáá palàge tànim gè sí tóm nè Jìhóvà! M beè gbóó beeláfùl ge bã boo tóm gyà deèsĩ́ tóm kọ̀ kpẹ̀a. Tṍó em ínà be, m beè gbóó naa fíìl fṍóm̀ ge dú neǹ gyà deèsĩ́ tóm kọ̀ kpẹ̀a dénè tṍó. Tọ nàà tóm ea di Canada beè gbóó emí kpá mám kọ ḿ zẹ́ẹ́ dììa múú. Vaá m beè gbóó dììa múú ló October 1, 1950. M beè dú neǹ gyà deè sĩ́  tóm kọ̀ kpẹ̀a enè ẽ́ aa ló tṍóá, vaá ba beè lẹ̀ẹ̀làm kilma Kapuskasing. Boná beè di kà kpã́á aa ló kĩée e pá beélè tọ beè olòó tõo.

Mm̀ gbáá 1951, tọ nàà tóm beè emí kpá má gbò e bà é láá ló dém bel French vaá bĩiná va be bà é láá òòa kẽ kil Quebec ea dú kĩée e bà ólò ló French. Ba beè palàge ié bíi ló gbò kọ̀ kpẹ̀a gbẹá kĩá. M beè olòó ló dém bel French nè Bèkéè, vó beè naa kọ ḿ nè lóó gè kil kĩá vaá ba beè lẹ̀ẹ̀làm kilma Rouyn. Ním beè nyimá ló tọ́ọ̀ nen ea di kĩá. Áá àdrẹ́ẹ̀s e ba beè nèm em beè zẹ́ẹ́ kọ́ nú ea kil lóá ní ea beè dìḿ bá ẹ́. Dénè nu beè palàge leém ló gbẹá kĩá. Marcel nè nda beè duá kà lé kóò, vaá m beè dé kpéè ló ténì gbáá em beè siimá tóm gbẹá Quebec. Tṍó e tṍó téní, m beè gbóó bã boo kele íb sìtóm dénè tṍó.

Tṍó em beè di Quebec, nyíém beè paIàge ẹẹ tṍó e bà kólím kọ ḿ sí ní ea égè 26 Tọọ̀ Kpá Gílẹẹ̀d ea beè sẹ̀ẹ̀à gbẹá South Lansing, ea di New York. Tọọ̀ kpáá beè iná kùbmà ló February 12, 1956, vaá ba beè lẹ̀ẹ̀làm kilma kĩée e bà kólíe Ghana kátogóí, b ea di West Africa. Besĩ́ m̀ kalá àà, a beè dú bíi kọ ḿ zẹ́ẹ́ tú “sìgà sè” tõoma Canada dọ̀ọ̀mà tṍó e dénè nà kpá ge kilma Ghana é égá.

M beè tú àlàbà ẽ́ tõ̀òma Toronto kọbé dénè nà kpá égá. Gbẹá kĩá, m beè tõó ló pá tọọ̀ Cripps vaá ba beè tú lé bá sẹ̀ẹ̀mà m, m beè gbóó nyimá ló ba nvín pábia ea bée kọlà Sheila. E beè vùlè ene. Tṍó em beè gbĩ́ gè kọ́ nèe kọ m̀ é ílíe, ba beè gbóó nèm nà kpá ge ààma dóá. Sheila nè nda beè tã̀àgã̀ ló Bàrì kilma ló belá vaá e beè gbóó beeláfùl kọ m̀ é aà gé sí tómá. Sõò e beè beeláfùl gè olòó emí kpá má ene kọbé è nyímá be èé láá ilá dì deèsĩ́. Náa beè valí gè nè nakà béèlàfùlí, sõò tṍó e tṍó téní, e beè gbóó nyimá kọ e beè nè kà lé béèlàfùl.

M beè gbóó iná Accra ea di Ghana, tṍó em ni tú enè ẽ́ bã̀àmà mm̀ train, mìàlo, nè ńkìlà. Gbẹá kĩá, ba beè kọ ḿ sí tóm ge kùdẽe ló dístrìt. Níí beè naa kọ ḿ sí kele-kele bon ea  di Ghana, Ivory Coast (e bà kólíe Cṍte d’Ivoire kátogóí) nè Togoland (e bà kólíe Togo kátogóí). Gã́bug tṍó em gbĩ́ gè sí ketõ̀ò, áá m̀m̀ ní em beè olòó bã mm̀ faà e tọ nàà tóm beè nèm ẽ́. Ge kãa pá vígà beè olòó ẹẹIẹ̀m nyíe!

Kọ̀láá kà kùbmà nvéè sè, m̀ ólò nè lòbèl gbẹá bõ̀ònaló sẹ́kiùt. Née beè ié tọ́ọ̀ kà Asẹ́mblì Họ́ọ̀l. Vó beè naa kọọ̀ pá vígà á tìb tọọ̀ la e bà é tõó m kọbé gbẹi náa táá va. Boo béè kọ tọ́ọ̀ kà nú ea ólò naa kọọ̀ nu á dú tọ́ọ náa beè di mm̀ tọ e bà ólò tõó m bùl nu, ba beè olòó tú nom sẹlẹ́ kuló kĩá kọbé bà láá kèl nèèmà gyã́á gbò e bà di àsémblìa.

À íe sìgà nu ea ólò naa kọọ̀ nen á màngã̀ gbẹá àsémblì. À íe deé e Herb Jennings, c e ólò gbá kọ́ kpẹ̀a aa dó dọ dó géè nè lòbèl vaá námà à gbóó fùl díí teelá aa kĩée e bà ólò tõo bùl nuá. A beè teelá tení deèsĩ́ tã́á té ea di gbà-gbá nen ea géè nè lòbèla nè pá vígà. Vígà Herb beè pĩigã́ vaá nomá náa beè nyimá kĩée ea gá téélá tení. Sõò ténì kà gbò vígà págbálà e bà íe agẹ ló beè siíe kilma tọ bùl nuá vaá pá vígà beè màngã̀.

Buù sè besĩ́ bà kálá sẹlẹ àsémblì, m̀ ólò zogè ene kà bẹẹ vídiò ea kọlà The New World Society in Action gbẹá gbò bon ea di kuló kĩá. Kọbé m̀ láá zogè vídiòa, m̀ ólò tú ẹ́ẹ́ báà kàn talí zẹ̀ẹ̀ bàà kà kpóó té e bà tib vaá m̀ gbóó naa ní e vídiòa é sila dẽè báà kàna. À ólò leemá gbò e bà di boná ge ẹ̀b vídiòa! Kilma ló sìgà gbò, níà túá tṍó e bà gé ẹb vídiò e. Ba beè palàge kpá bá tṍó e bà mon gbò e bà gé diia múú. Vídiòa beè nvèè bá nè gbò e bà géè ẹ̀b kọ bàá nyimá kọọ̀ dénè Gbò Neǹ Ditõ̀ò Jìhóvà beeá ló bàlà booí ólò gbaaá ló.

Nyíém beè palàge ẹẹ gè sí International Convention ea beè sẹẹa mm̀ gbáá 1958 gbẹá New York, tṍó e sìgè ńkem à dú bàà gbáá em ni tõoma Africa. Nyíém beè palàge ẹẹ tṍó em monì Sheila, ea beè di boo kele íb sìtóm dénè tṍó ea aa Quebec dù. E beè olòó emí kpá lẹ̀ẹ̀la tóm má ene, sõò tṍó e ni monà m beè bĩináe be àé íám vaá a beè zìgà. M beè emí kpá má Vígà Knorr d vaá bĩináe beè Sheila é láá sí Tọọ̀ Kpá Gílẹẹ̀d kọbé à láá zọ̀m sí tóm gbẹá Africa. A beè kọ àé láá sì. Dee-deè nvée, Sheila beè gbóó dú Ghana. E beè ilá gbẹá Accra, ló October 3, 1959. E beè mòn bé e Jìhóvà palàge tãanèi dee bá naa, boo béè kọ e beè tú gè fã̀e naamá túá kà nú mm̀ bẹẹ dùm.

Mm̀ gbáá 1961, ba beè kọ é kil dó Cameroon gé sí tóm. M beè palàge di mm̀ kíìli-kíìli, boo béè kọọ̀ ba beè kọ ḿ zọ̀ pá vígà siá tóm kọbé ãa tọ nàà tóm láá di kĩá. A beè dú bíi kọ ḿ nó gã́bug nu, boo béè kọ ba beè ím bá ló kọ ḿ ẹ̀b nú ea kil ló tóm ea géè siá gbẹá Cameroon. Sheila beè gbóó niiná gbàà mm̀ gbáá 1965. A beè tàvàlàí ló gè dã́ ból ló kọọ̀ èé gé dú tẹ̀ nè kà. Boo tṍó e nyíéi ni ẹ́ẹ ló nakà ãa tóm ea bã́í báí vaá e noo gè òòa kẽ kil Canada, kà pọ́lọ́ nu beè gbóó naaá.

Nvín ea beè di gbàà Sheilaa beè ù besĩ́ à kalá mèà. Neǹ dóm biè beè kọ́ nèi kọọ̀ nvín págbálà ní ea beè dìé gbàà ẹ. Níà nú ea beè naaá nú ea sígá ló 50 gbáá ea kil nvéeá, sõò náa ólò táí nyíe. Náa kal ló béè kọọ̀ nyíéi beè palàge bììla ló nú ea beè naaáí, e beè kilsĩ́ gè sí tóm gbẹá Cameroon vaá e beè palàge vùlè tómá.

Ba beè olòó biigè ló pá vígà gbẹá Cameroon boo béè kọ bà náa gbááá ló bìlà bẹlbẹ̀l. Bíígá lóá ólò palàge zoogá kọ̀láá tṍó e bà gé tẹ́lẹ̀ kpá nè nen ea é bẹl dóá. Pọ̀ beè kpáá palàge siíi tṍó e kpóó ea gé bẹl dóá beè kùb tóm Gbò Neǹ Ditõ̀ò Jìhóvà ló May 13, 1970. Kpóó ea gé bẹl dóá beè tú ãa tọ nàà tóm e beè kil m kóló vòò ẽ́ aa ló tṍóá lọ̀líí bá. Mm̀ kóló tẽ̀ènè sè, ba beè kpó dénè gbò e bà ólò kọ́ kpẹ̀a aa dó dọ dó lọl dóá bií nágé ló Sheila nè nda. A beè tàvàlàí ló gè aa ló pá vígà e bà di kĩá, boo béè kọ ba beè palàge ẹ̀b nú ea kilíí ló vaá e beè ié tã̀àgã̀ bùlà ea kil ló nú ea é láá naaá vá ló.

E beè tú ọ̀ọ̀lẹ̀ ẽ́ tõ̀òma tọ nàà tóm ea di France. Gbẹá kĩá, m beè pììgà bé e nà kpóó sim tùlà naa gè ẹ̀b nú ea kil ló bíì pá vígà e bà di Cameroon. Mm̀ December tẽ̀ènè gbááá, ba beè lẹ̀ẹ̀lài kilma tọ nàà tóm ea di Nigeria ea beè dààmà togó gè ẹ̀b nú ea kil ló tóm ea gé síá gbẹá Cameroon. Pá vígà e bà di Nigeria beè tú lé bá tuumái, vaá nyíéi beè palàge ẹẹ mm̀ gã́bug gbáá e beè siimá tóm gbẹá kĩá.

A beè dú bíi kọ é nè kà agẹbá béèlàfùl mm̀ gbáá 1973. Kpá ló Sheila géè zọ̀. Tṍó e beè di pọ̀b kà bõ̀ònaló ea beè sẹ̀ẹ̀à gbẹá New York, a beè kọ́ nèm kọọ̀: “Ním é láá si ná tómí! Lóóm ọọ vaá kpá lóm a zọ́ mm̀ gã́bug tṍó.” A beè zọ̀m tú nú ea é sígá ló 14 gbáá siimá tóm gbẹá West Africa. Nyíém beè palàge ẹẹ ló tóm ea géè sí mm̀ bọ́ọ̀ló dẹ̀lẹ̀ nyíé boo. Sõò, a beè dú bíi kọ é nyaaná bá ló sìgà nu. Tṍó e ni lóá bel boo bẹẹ dìtõ̀ò vaá tú gã́bug tṍó tã̀àma ló Bàrì boo lọ̀l, e beè gbóó beeláfùl ge òòà kil Canada, kọbé à láá ié lé bóa. Ge aa ló bẹẹ tóm gè kọ́ kpẹ̀a aa dó dọ dó nè tóm gè sí tóm dénè tṍó ní ea dú kà tàvàlà béèlàfùl e beè nèe.

Tṍó e ni íná Canada, m beè gbóó zọ̀ ene kà nà kóò ea ólò oo faà gbẹá Toronto siá tóm. E beè bàn tọ, làb nuù tọ e beè zalí lọl tọọ̀ dõona gbò kilma m, vaá è gbóó dààmà togó gè tõó kĩá e bè née bọọlẹ̀ kpègè. E beè tõó dùm ea válí bá, vaá ẹ̀bmà dẽè ge kpáá bã boo tóm  dénè tṍó. A beè bọọí ló kọọ̀ gbele tõ̀ò tṍó náa beè tení tṍó e nú e géè ẹ̀bmà dẽeá nááá.

M beè dààmà togó gè nè lóó ge tú deè Saturday siimá tóm ãa Àsémblì Họ́ọ̀l e bà géè tìb gbẹá Norval, ea di Ontario. Tṍó e tṍó téní, ba beè ím bá ló kọ ḿ ẹ̀b nú ea kil ló Àsémblì Họ́ọ̀la. Kpá ló Sheila beè valí vaá e beè ẹ̀bmà dẽe kọ èé láá sí ãa tóm e bà néi ã́. Vó beè naa kọ é làb nu kilma mm̀ tọ e bà néi ea di boo beè Àsémblì Họ́ọ̀la ló June 1974. Nyíéi beè palàge ẹẹ kọ è kpáà dààmà togó gè sí tóm dénè tṍó!

Nyíéi beè palàge ẹẹ kọ kpá ló Sheila beè palàge valí. Bàà gbáá aa ló tṍóá, ba beè ím bá ló naamá nen ea gé kudẽe ló sẹ́kiùt. Kĩée e ba beè kọ é kìl gé sí tómá dú Manitoba, ea dú ene kà ńkem̀ bon ea di Canada e tọ́ọ ólò palàge dì. Náa kal ló béè vó, e beè palàge dé kpéè ló gbaa ló ea di zẹ̀ẹ̀ pá vígà e bà di kĩá. E beè nó kọọ̀ níì kĩée e tõò ní ea dú bíi é nì, sõò ge fã̀ Jìhóvà gbẹá kọ̀láá kĩée e dì ní ea dú bíi é.

Tṍó e ni tú gã́bug gbáá siimá tóm gè kùdẽe ló sẹ́kuìt, ba beè kolíi mm̀ gbáá 1978 kọ é sí tóm tọ nàà tóm ea di Canada. Pọ́ì ńkem̀ tṍó aa ló tṍóá, kà pọ́lọ́ nu beè naaá sõò m beè nó nu lọl ló. Ba beè kọ ḿ tú ene kà ávà nè sìgà nèèmà lòbèl mm̀ dém bel French gbẹá kẽè ene kà kele íb bila ló bel ea beè sẹ̀ẹ̀à gbẹá Montreal. À dú pọ́lọ́ kọọ̀ ním beè láá nè lòbèla mm̀ sĩ́deè ea tọ́á ló gbò e bà géè pãaném tṍ ló, vó beè naa kọọ̀ ene kà vígà ea ólò sí tóm Service Department á dùùlàm bá deè tṍ. À dú kà-kà kọọ̀ ním ólò láá palàge ló bel mm̀ sĩ́deè ea é tọ́á ló nen, sõò ním beè tú dùùlà bá deè tṍá. Bẹẹ loa sọ́l náa beè kyãa boo bá ea bọ́ló vaá nyíém beè bììlà boo béè kọ a beè tõó ḿ ló kọọ̀ à dõogẽ kọ́m bel tãa vó ea leelà m. M beè lọ̀, boo béè kọọ̀ m beè ká bùlà gbẹẹ́ boo bá ea neemàm dùùlà bá deè tṍá nè bé em ẹbvì nen ea ném dùùlà bá deè tṍá naa.

Sìgà dee aa ló tṍóá, enè nen ea dṹùnà Branch Committee beè zọ̀ m loá bel boo belá. Tṍó e lóà bel lọ̀l, m beè ọgá kọ ním beè tú dùùlà bá deè tṍ e vígàa beè nèm, vó beè naa kọ ḿ síé ló gé kọ́ nèe kọ á gbẹẹ vó. A beè ia ló nèm. Nú ea beè naaá ã́ náa ólò tá ḿ nyíe, boo béè kọọ̀ a beè naa kọ ḿ nyimá bé e gè kìlmà kpá ló kẽ palàge dú bíi naa. (Pró. 16:18) M beè palàge tã̀àgã ló Jìhóvà gã́bug tṍó kọ á nvèè bá nèm kọ ḿ gá bã̀ súng tṍó e bà ném dùùlà bá deè tṍ.

M tú 40 gbáá siimá tóm tọ nàà tóm ea di Canada, vaá m íe nèà deè ge dũunà Branch Committee lọl mm̀ gbáá 1985 tẹlẹ kátogóí. Ńdáà vaà Sheila beè ù ló February 2021. Ge kọ à ú palàge biilém nyíe vaá kpá lóm dì ea gé zọ. Sõò tóm em gé sí nè Jìhóvà palàge ẹẹlẹ̀m nyíe naa ní e ním ólò ‘nyimá gã́bug dee em ni tõoma dùm.’ (Ẹ̀klì. 5:20) M mon gã́bug nú ea ólò naa kọọ̀ nyíém á ẹẹ, náa kal ló béè kọ m téní bá gã́bug tã̀àgã̀ mm̀ dùm. Ge tú Jìhóvà naamá túá kà nú mm̀ nà dùm vaá sí tóm nèe mm̀ 70 gbáá a náa kọ Jìhóvà á tãanè m dee bá. M̀ baǹ Jìhóvà kọ á nvèè bá nè gbò nvín ãa kọ bàá kilsĩ́ gè tú gè sí tóm nèe naamá túá kà nú mm̀ ba dùm, boo béè kọ m̀ palàge agala boo kọọ̀ be bà náa vó, bà é íe dĩ̀ìnè ló dúm nè kà-kà ẹ́ẹ́-ẹẹ̀ nyíe.