Zẹ́ẹ́ ni doomà dẽe kọọ̀ o beè olòó tõonèe Gálìlì tṍó e Jíízọ̀s beè di dùma. Vaá o kyãà iná Jèrúsalẹ̀m boo béè Sẹ̀lẹ̀ Nù Tọọ̀ La. Zivèkà pọ̀b boná gé gunà boo béè gbò e bà ólò fã̀ Bàrì e bà aa kpã́á deè ketõ̀ò dù. Ò gbĩ́ì ge tú vààla gyọ́ọ nè Jìhóvà. O ból dì ní bá, eo di eo gé téní gbàà gbò nen gbẹá boo èèlè ea biilà kil tọọ̀ káíá. Tṍó eo ínà, ò gbóó mòn kọọ̀ gã́bug gbò e bà gbĩ́ì ge nè vààla gyọ́ọ di ḿ-má kĩá. A lée tṍó e olo é gboó gé tú ńlóò ból nè gbò vààla gyọ́ọ. Tṍóá ò gbóó kẽ̀èa boo kọọ̀ kyẽ̀ nù diè gbàà o vígà ea di gbàà gbòí àbèè mm̀ boná nyoomàè ni. Jíízọ̀s baatẽ́ gbò nu ea bọ́ló kọ ó naa. (Bugi Máátìù 5:24.) Mósĩ́ deè ní e olo nè o vígà e tã̀àgã̀ di gbààí é láá naaá fẹ́ẹ́-fẹẹ̀ ló dì belí bé e Jíízọ̀s kọ́ naa ẽ́? Kuu nú mm̀ ńkpó ea di ló ní ea dú lèlà ààla ea di ló buù kpò ea di kè kẽí.

À BỌ́LÓ KỌ Ó . . .

• zọ̀ o vígà loá bel boo áá tṍó eo bugi togó kọọ̀ à íe nú ea nveèe súng

• pììga boo gè le-le dee bá o vígà tṍó eo monì kọọ̀ nu valẹ̀ bá kyẽ́e àbèè be ò bugì togó kọọ̀ tã̀àgã̀í dúé bá

• ĩ̀ìmà vaá pãane tṍ ló o vígà tṍó ea gé kọ́ a bùlà, kọbè nóo dã́àtẽ́ ló dénè ẹ̀ẹ̀ lọ̀l, tã̀àgã̀é ló boo béè bé ea tọ́a ẹ́ ló naa àbèè boo béè gbò nú ea silà aa mm̀ láb eo beè labví e bè nóo beè nè dẽeí

À BỌ́LÓ KỌ O VÍGÀ Á . . .

• gbĩ́ nvèè bá lọl bá gbò e bà di mm̀ bõ̀ònatõ̀ò tení dú ló gè nootẽ́ dénè pọ́lọ́ eo beè síe

• ló ni pọ́lọ́ bel ló, kọ́ dénè pọ́lọ́ eo beè síe, vaá gbĩ́ kọ ó zìgà kọọ̀ olo ní eo beè siè pọ́lọ́ ẹ́

• nvèè kpíi ló íb gbò agẹló nè kìlmà kpáló kẽ ea íe kọbé à láá bã̀ ní ló vaá ò gbóó ia ló nèe lọa bùlà

Náa kal ló béè kọọ̀ fã̀ e beele gé né deè nieí náa bĩiná ná gè tú nom vaamá gyọ́ọ, éé ní e Jíízọ̀s géè noòmài kilma ló gbaa ló ea di zẹ̀ẹ̀ ge naa kọọ̀ fẹ́ẹ́-fẹẹ̀ ló á di zẹ̀ẹ̀ bẹẹ vígà nè bẹ̀ì, nè ge nè fã̀ e Bàrì ténmá ẽ́?