È ólò tú bẹẹ kói siimá tóm mm̀ sĩ́deè e nyìmànù di m tṍó e noò gbò nu sẹ̀ẹ̀a sĩ́ ea é náa kọ é tú gã́bug tṍó siimá tóm nè Jìhóvà. (1 Kọ́r. 9:26) Gbò nú e noò sẹ̀ẹ̀a sĩ́ ólò nvèè bá nèi kọ é láá palàge tú bẹẹ tṍó siimá tóm leevè besĩ́ì kùbmà kálá bã ló nakà bàlà boò Sétàní. (Ẹ́fẹ. 5:15, 16) Tṍó bọọ fã̀ pá tọ, òé láá noonii gbò nu sẹ̀ẹ̀a sĩ́ eo é láá teai tulai mm̀ ãa gbáá sìtóm kọ̀ kpẹ̀a. Kọbé ò láá ié nvèè bá, nakà kpá bõ̀ònaló sìtómí fáálá gbò nu sẹ̀ẹ̀a sĩ́ eo é láá bugi togó boo vaá tã̀àgã ló Bàrì nyòòmà.—Jém̀z 1:5.

Dì belí nu dòòmà bá, pá tọ é láá bilá ló vaá nvèè bá naa ní e kọ̀láá bé ea kil kẽ naa enè nen é láá bã boo tóm gyàdeè sĩ́ tóm dénè tṍó. Be nóo agàla boo kọ òó láá teá tùlà gã́bug tṍó e bà bĩ́íná lọ̀l ní bá, zọ̀ gbò gyàdeè sĩ́ tóm e ba dìtõ̀ò bélí ńlo loá bel boo. (Pró. 15:22) Beà sẹlẹ òó láá bĩiná bel enè neǹ gyàdeè sĩ́ tóm tṍó eo íèì fã̀ pá tọ. Tṍóá ò gbóó emí bé eo é láá noo o tṍó naa. Be o beè dú neǹ gyàdeè sĩ́ tóm tṍó ea kil nvéeá, bugi togó boo be o dìtõ̀ò é sọ́ni tọ́ deè kọ ó láá kpáá naa kátogóí.

É kọọ̀ enè nen ea di bọọ tọ é láá bã boo tóm gyàdeè sĩ́ tóm ńkpulu dẽè tṍó mm̀ enè ẽ́ àbèè sìgà ẽ́? Be nóo íè gã́bug kói, òó láá bã boo tóm gyàdeè sĩ́ tóm mm̀ ńkpulu dẽè tṍó tení dú ló gè tú ńkem̀ tṍó buù dee kọọmá kpẹ̀a. Be nóo íe tṍó gè kọọmá kpẹ̀a èèlè nyíè zẹ̀ẹ̀ sè, boo béè kọọ̀ ò gé sí tóm bèkéè dénè tṍó àbèè kọ ò di tọọ̀ kpá, beà sẹlẹ òó láá sà ẽ́ ea íe tṍó bõ̀séi àbèè kọ à íe vòò kà tà sè. Nvèè kpíí ló ẽ́ eo noò ge bã boo sìtóm kọ̀ kpẹ̀a mm̀ ńkpulu dẽè tṍó vaá ò émí bé eo noò naá dẽè kpá.—Pró. 21:5.

Ẹ̀B VÍDIÒ EA KỌLÀ DÚ ÀGẸLÓ . . . NEǸ GYÀ DEÈSĨ́ TÓM KỌ̀ KPẸ̀A, VAÁ Ò GBÓÓ AALÁ NAGBÒ BÍBVÍ:

• Éé ní e nú ea beè naaá ló Vígà pábià Aamand nóòmài ea kil ló sĩ́deè e Jìhóvà ólò ẹ̀bmà nú ea kil ló gbò e bà tú lóó vaamá gyọ́ọ kọbé bà láá bã boo tóm gyàdeè sĩ́ tóm ẽ́?