GE TÕÓ DÙM DÌ BELÍ GBÒ E GÉ NYOONE NVÉÈ KRÁÌST
GE SÌM KIL SĨ́ MM̀ BẸẸ KALÌ BÁ GÈ KỌỌMÁ KPẸ̀A—Noòmà Nen E Ólò Noòmà Nu Kọ Á Kpoogá Dee Ló
NÚ EA NÁA À DÚ BÍI: Tṍó e gbò e ólò noòmà nu kpóógá dee ló, àé náa kọ bàá gbĩ́ gè dã́tẽ́ ló nè ge kẽ̀èa boo nú e bà gé nóá. Bé e bà dã́tẽ́ ló vaá kẽ̀èa boo naa, níà bé e bàé sim kilsĩ́ mm̀ gbala-gbala naa ẽ́. Bã̀àna tṍó e baa ni diìamúú lọ̀l, à dú bíi kọ bàá kpoogá dee ló nyòòmà nonù nè sìtóm kọ̀ kpẹ̀a kọbé bà láá di kùà “dẽe ló.” (Máát. 25:13) Boo béè vó, ge nyimá bá gè noomá nu nè ge ié dùm ge nó nu é dọ́ bélè nè va dénè deé mm̀ ba dùm. Lọl dààmà togó, à bọ́ló kọ é nvèè bá nè gbò e ólò noòmà nu kọ bàá toní dùm ge kpoogá dee ló nyòòmà gbò e baala é nóòmà Kpá Káí.
BÁ GÈ SIÍ LÓ:
-
Dú kà lé nu dòòmà bá. (Róm̀ 2:21) Tú nen eo ólò noòmà nuá sẹ̀ẹ̀a nyíe tṍó eo gé kpóógá dee ló nyòòmà buù kà nònù. (km 11/15 3) Naa kọọ̀ ẹlẹ á mòn lọl mm̀ ńlóò kpá kiẽ́e e olo beè kuunú kè tṍó eo géè kpoogá dee ló
-
Sièe kpóó ló kọ á kpoogá dee ló. Kọ̀láá tṍó eo ni daamai togó gè noai nu, naa kọ á nyimá kọọ̀ ge kpoogá dee ló dṹùnà báàsĩ́ ea di ló a nòònù ge nó Kpá Káí, vaá ò baatẽ́ gbò bélè ea di ló nèe. Nèe sìgà lọ̀ọ̀gà bug ea kil ló bé ea é noo tṍó nèà a bá naa. Tṍó e nònùa gé kilsĩ́, sìgà gbò e bà gé nóòmà nu ólò tú baláà kpá e baala beè kuunú kè nè nen e bà gé nóòmà nuá kọbé à mon gbò bélè ea di ló. Palàge lèèlàẹ tṍó ea kpóógá dee ló
-
Zogèe sĩ́deè bé ea é kpóógá dee ló naa. Besĩ́ì à kàlà dọ̀ kátogóí, sìgà gbò e bà gé nóòmà nu ólò tú zivèkà kpò nònùa dòòmà bá nè nen e bà ólò noòmà nu sĩ́deè bé e bàé kpóógá dee ló nyòòmà buù kpò nònù naa
