Kọbé gbò e bà gé nó Kpá Káí láá naa nú ea é léémá Bàrì, àé dú bíi kọ bàá toní agẹ zìgà. (Híb. 11:6) Èé láá nvèè bá nè va kọ bàá naa vó tení dú ló gè noòmà va Dé Kpéè Ló Dùm Dọ̀ọ̀mà Dè-dè! Nakà kpá gè noomá Kpá Káíí fáálá gbò dọ̀ Kpá Káí, bààtẽ́ ea válí gè dã́tẽ́ ló, gbò bíb ea tọ́á ló nen, gbò vídiò ea é síè kpóó ló nen, nè lé-lé tã́à nu. Tení dú ló gè nvèè bá nè gbò e gé nóòmà Kpá Káí kọ bàá toní gbò kpãà neǹ Kráìst vaá ié lé gbaa ló kilma ló Bàrì, è gé náa kọ bàá tú gbò nú e sã́ náa é láá taa kyọ̀ dòòmà díí kẽè ba zìgà.​—1 Kọ́r. 3:​12-15.

À tavàla ló sìgà gbò ge zìgà kọ bàé láá duè kóò Bàrì e bà náa é láá mòna. Vóà naa, à gbóó dú bíi kọ é nvèè bá nè va kọ bàá nyimá ló Jìhóvà vaá dẹlẹ́ẹ nyíé boo.

Ẹ̀B VÍDIÒ EA KỌLÀ NAA KỌỌ̀ GBÒ NEN Á IÉ ZÌGÀ MM̀ JÌHÓVÀ TENÍ DÚ LÓ GÈ NÓ “DÉ KPÉÈ LÓ DÙM DỌ̀Ọ̀MÀ DÈ-DÈ!” VAÁ Ò GBÓÓ AALÁ NAGBÒ BÍBVÍ:

• À náàà vaá è nyimá kọọ̀ vígà pábiaá beè palàge kpoogá dee ló nyòòmà ba nònù ẽ?

• Mósĩ́ deè ní ea beè bĩiná dõòna kà gbò bíb ea náa kọọ̀ nen ea gé nó Kpá Káíá á láá kọ́ a bùlà kilma ló kpá Àìzáíà 41:​10, 13 é?

• Vídiò nè dọ̀ Kpá Káíá beè tọá ló nen ea gé nó Kpá Káíá naa vàẹ?

Gã́bug nen náa dã́ ból ló nú e nu ààaá tõó dọ̀, àbèè kọ bà náa ẹb belí dõ̀ònù e Bàrì ne buù nen. (Gàl. 2:20) Vóà naa, èé íè ge nvèè bá nè va kọ bàá ié zìgà mm̀ ú vààa gyọ́ọ̀ Jíízọ̀s.

Ẹ̀B VÍDIÒ EA KỌLÀ NAA KỌỌ̀ GBÒ NEN Á IÉ ZÌGÀ MM̀ JÍÍZỌ̀S TENÍ DÚ LÓ GÈ NÓ “DÉ KPÉÈ LÓ DÙM DỌ̀Ọ̀MÀ DÈ-DÈ!” VAÁ Ò GBÓÓ AALÁ NAGBÒ BÍBVÍ:

• À náàà vaá è nyimá kọọ̀ vígà págbálàá beè palàge kpoogá dee ló nyòòmà ba nònù ẽ?

• Mósĩ́ deè ní ea beè tú nú ea di kè kẽè “Kpáá Gbĩ́ Tẽ́ Ló” nvèèmà bá nè nen ea gé nó Kpá Káíá ẹ́?

• Éé ní ea náa vaá gè zọ̀ nen e gé nóòmà Kpá Káí tã̀àgã ló Bàrì à dú bíi é?