Bila ló bel gè sì gé kọ́ kpẹ̀a dì nàgé belí bẹẹ gbò nònù, à dú nènù ea aa bá Jìhóvà ea ólò nveè bá nèi kọ é vùlè ene vaá sí lé tóm. (Híb. 10:24, 25) À bọ́ló kọ bàá tú vòò àbèè àlàbà kà mínìt sẹ̀ẹ̀mà, ea bãàa mm̀ ge bõonè ló gbò e bàé gé kọ́ kpẹ̀a, ge dõo kiẽ́e e bàé kọ́ kpẹ̀a, nè ge tã̀àgã ló Bàrì. (Beè bila ló belí é sẹẹà tṍó e dõòna kà nònù ni íná kùbmà, náa bọ́ló kọ á bọọ́ beg.) Nen ea é sẹlẹ bila ló belí á kpoogá dee ló nyòòmà ge kọ́ nu ea é nveè bá nè gbò e bàé kọ́ kpẹ̀a deeá. Dì belí nu dòòmà bá, beè deè Saturday tṍó e gã́bug nen ea di kĩá gáà kọ kpẹ̀á zivèkà sèa, àé láá dú lé gè ló bel boo nú e bàé kọ́ nè tẹ̀ íè tọ. Mókà dõòna kà gbò togó bel ní ea é láá dú lé gè ló sọ́l boo é?

• Gbò nu dòòmà bá gè dààmà togó loá sọ́l ea di mm̀ Kpá Bõ̀ònaló Sìtóm—Bẹẹ Dùm Dìbelí Gbò E Gé Nyoone Nvéè Kráìst Nè Bẹẹ Sìtóm Kọ̀ Kpẹ̀a

• Bé eo é láá tú nú ea ã́àa naaá àbèè ãa kpẹ̀a dààmà togó loa sọ́l naa

• Bé eo é láá labví láb kilma ló enè íb nàà uú boo ea tọla kẽ kiẽ́e eo ólò kọi kpẹ̀a naa

• Bé eo é láá kọ́ kpẹ̀a nè nen e náa zigà kọọ̀ Bàrì dì, nen ea ziga ló kọọ̀ nu beè dõogẽ fùùà dì, nè nen ea ólò ló dõòna kà dém bel naa, àbèè nen ea ólò sí bõ̀ònaló fã̀ e bè náa tọla kẽ kiẽ́e eo ólò kọi kpẹ̀a

• Bé eo é láá tú jw.org, JW Library^®, àbèè Kpá Káí siimá tóm naa

• Bé eo é láá tú ene kà kpá ea di zẹ̀ẹ̀ Gbò Kpá E Ólò Noòmà Gbò Nen siimá tóm naa

• Bé eé láá tú kele sĩ́deè ge kọọmá kpẹ̀a siimá tóm naa, dì belí gè kọ́ kpẹ̀a tenmá boo fóòn, ge emí kpá lẹ̀ẹ̀là tóm kọọmá kpẹ̀a, ge kọ́ kpẹ̀a gbẹá kiẽ́e gbò nen bọọ, ge sì gé kãa nen, àbèè ge noòmà Kpá Káí nen

• Gbò nu kẽ̀èa boo ea kil ló gè kpènà o bá, ge láá nyaaá nyoone dìtõ̀ò ea bã́ kẽ, ge ié lé láb, àbèè gbò nú ea bélí vó

• Ene kà nu gè nò àbèè vídiò ea di mm̀ bróshọ̀ ea kọlà Nvèè Sĩ́ Ló Gè Olòó Bugi Nu Nè Ge Noòmà Nu

• Bé eo é láá siè kpóó ló vaá nvèè bá nè nen eo gé gbái kọi kpẹ̀a naa

• Ene kà dọ̀ Kpá Káí ea ló bel kilma ló sìtóm kọ̀ kpẹ̀a àbèè nú ea beè naaá ló nen tṍó ea géè kọ́ kpẹ̀a ea é láá siè kpóó ló nen